|
Billy Lau Ho-Him's
Home Page |
|
|
詩篇 42: 1-11 <<你講你愛我>>
vs 1 神, 我愛你 「神阿, 我的心切慕你, 如鹿切慕溪水.」 一句耳熟能詳既經文, <<As a deer>>(如鹿的心)呢首詩歌經常唱. 大概在表達我地對神既愛, 好似鹿切慕溪水咁. 其實鹿如何切慕溪水? 唔知. 總之首歌好聽, 又唱得陶醉同真心.
鹿係山嶺高原生活既動物, 巴列斯坦地水唔多, 不過 vs 6提到黑門, 米薩, 都係雨水充足之地. 有冇必要切慕呢? 不過, 水向低流, 地理方面有由外邦指向猶大國, 對耶路撒冷切慕既可能, 會唔會呢? Q: 究竟詩人點解切慕神呢?
vs 2&3 話佢聽你愛我 詩人問幾時見到神, 唔單止佢自問, 亦有人問, 不住咁問:「你既神係邊?」 詩人仲日日夜夜喊咁口. Q: 點解問神係邊呢? 神唔係<<無所不在>>? 點解喊咁口? 係咪唱詩唱到好感動? 唱緊<<讚美之泉>>? 「切慕神」似乎唔係想像中咁浪漫. 神唔蒲頭, 有兩個可能: 一, 佢冇料到; 二, 佢唔再愛詩人. 詩人似乎在埋怨神唔理佢 or 冇料到, 多過真係切慕神. Q: 點解詩人 feel唔到神呢? 我地乜野時侯會 feel唔到神, 覺得神唔理我地呢? 有冇試過?
vs 4-5 我知你愛我 詩人諗番以前成班人一齊敬拜神好開心既日子, 一諗就喊到收唔到聲, 湯豬咁聲. 可能講緊被擄到巴比倫, 聖殿被毁, 否則何必懷念敬拜神既日子呢? 聖殿被毁, 國破家亡絕對係 Mission Impossible. <<如果這是真的>>, 信仰破產好正常, 有乜情况會令你信仰破產? 考試唔合格可能我地就懷疑神, 行街踩「地雷」又比魔鬼攪. Compare to 聖殿被毁, 國破家亡全部微不足道, 我地可唔可以 strong D?
遇到咁, 諗番 D舊事.... 「點解咁愁? 咁唔開心呢?」 連詩人自己都咁問. 「要仰望神!」 我知呀!「要稱謝神!」我知呀!「神有安慰, 有笑面.」我知呀! 「咁點解仲咁愁? 仲咁唔開心呢?」(唔知喎!) 呢個係我地一般人既心情, 唔開心就唔開心, 我知道唔應該係咁, 但係我真係咁嘛! 咁點? 似乎感覺唔係靠 self denial可以消除. 神點安慰詩人? 講道? 主日學? 唔係. 神聽, 聽詩人唱呢首埋怨之詩, 用笑面去安慰, 去肯定佢既感受. 呂振中譯本將「笑面」譯作「面前」, 911, instant既幫助, 係神自己, 不過, what kind of 幫助? 一個安慰又有何用呢?! 可見詩人一方面向神訴苦, 一方面又宣告神有安慰, 以及兩者間之矛盾同張力, 唔係扮乖乖既日子咁簡單.
vs 6-8 你講你愛我 詩人灰心沮喪, 但見到約旦, 黑門, 米薩就諗起神. 點解呢幾個地方令詩人有此聯想呢? 可能因為係以色列國邊界. 另可能詩人住係附近, 見到 D鹿仔同 D大山有感而發. 瀑布, 深淵, 波浪, 洪濤, 係一個舉雙脚行路遠足/去行船既人都怕遇到. 所以希伯來人畏懼大海, 中國人亦話欺山莫欺水, 而且希伯來人相信海係邪惡, 係敵擋. 等陣.....抵死係: 「你的波浪洪濤漫過我身.」點解神咁大整蠱? 「點解你咁對我?」「點解你玩野呀?」「你 D應許去晒邊呀?」 有冇試過比最親, 最信任既人出賣? 感受係點?
不過, 如果波浪洪濤漫過我身係來自仇敵, 佢唔會手軟, 神會唔會就住手? 唔知. 但至少詩人仍然相信, even 海係邪惡, 係敵擋, 神都 in control, 係唔好受, 但至少神唔係冇料到, 仍然係詩人既求救對像, 波浪洪濤中既水抱. 白晝同黑夜, 令人聯想到出埃及四十年雲柱同火柱, 曠野係冇得擺酒, 然而, 神係人絕境同長期絕境中會有保守. 要禱告, ok, 不過, 歌頌? 以色列人出埃及四十年, 埋怨足四十年有多, 除左過洪海後歌頌過一次. 絕境中歌頌? 歌頌 D乜呢? 歌中有歌頌? 會唔會歌頌番神過去既救恩歷史呢? Anyway, 絕境當中我地通常又點應付?
vs 9-11 承認你愛我 歌頌得好地地, 諗諗下都係唔對路, 再喊過先. 「點解你唔理我? 點解我依家比人蝦?」 「你講吖...你講吖....你講., 你講你愛我, 話我知你愛我, 話佢聽你愛我.」 「人地問我神係邊, 我咁黑仔(被擄, 可能聖殿都冇埋) 我點答佢? 答唔到, 最多用口水吐佢. 不過會比人打.」 (Q: if 係仇敵面前, 唔係唱 K, 點歌頌神? 至少一定唔會好 happy, 拍手歌頌 la.)
「點解咁愁? 咁唔開心呢?」 連詩人又問. 唔開心唔係一個祈禱, 好似開燈關燈咁: 「續漸開心又得, 立即開心亦得, 得左.」 我地係人, 唔係斷六親七情既和尚, 唔係 i-Robert, 唔開心就唔開心, 唔洗扮乖. 不過, 諗住諗住又係死, 唔精神分裂都<<思覺失調>>. 「應當仰望 神, 因我還要稱讚他.」可能係一個方法, 純係發洩好, 真正出路又好, 神想我地同佢講, 而唔係屈係心裡面, 「咖啡杯都企不穩, 仲忍?」返到教會扮乖, 仲扮歡天喜地咁唱歌, 其實裡面好唔惦.
奇怪係: 通常有事我地唔會當神係朋友咁同佢講, 長執/組長唔問/就算問都唔講, 組員 depends, 同未信/ICQ/online game既果份「男」/「女」朋友唔怕講, 唔應該講果句都講, 因為「安全」嘛, 有 distance嘛! 試下當神係你個 MSN/ICQ友, 一樣 on the air, 安全同隔左段 distance (some how).
承認感受係正視問題 1st step, 咁仰望神又阿Q有乜分別? 唔開心/失意有時唔係一時三刻, 一朝一夕既時, 仰望有乜用? 神借耶利米同以色列人講事實, 亦講應許: 「你們要蓋造房屋住在其中、栽種田園喫其中所產的。娶妻生兒女、為你們的兒子娶妻、使你們的女兒嫁人、生兒養女、在那裏生養眾多、不至減少。我所使你們被擄到的那城、你們要為那城求平安、為那城禱告耶和華、因為那城得平安、你們也隨凓得平安。萬軍之耶和華以色列的 神如此說、不要被你們中間的先知和占卜的誘惑、也不要聽信自己所作的夢•因為他們託我的名對你們說假豫言、我並沒有差遣他們•這是耶和華說的。耶和華如此說、為巴比倫所定的七十年滿了以後、我要眷顧你們、向你們成就我的恩言、使你們仍回此地。耶和華說、我知道我向你們所懷的意念、是賜平安的意念、不是降災禍的意念、要叫你們末後有指望。你們要呼求我、禱告我、我就應允你們。你們尋求我、若專心尋求我、就必尋見。」(耶 29:5-13) 呢個就係分別.
|