|
Billy Lau Ho-Him's
Home Page |
|
|
陽光 - 2006/02/28
自從佢0既出現, 每日就好似充滿陽光咁, 可惜.... 可惜....有 D野係唔可以同時擁有, 有時好似間隔著一點距離, 雖然邊度都有陽光, 但唔係度度都可以見到佢.
講緊既「佢」係大统華超市既 food court. 自從爹地走左返香港之後, 每逢加班加到八九點, 都一定光顧佢. (都費事自己煮啦!) 豐華 food court好地地又收歸「國有」, 果當燒臘鋪以前有飯賣, 仲有汽水送, 不過, 依家去到, 「肥仔」哥哥鄉音無改飯無多, 次次都話冇晒飯. 叫我斬料, 斬舊大叉燒返屋企煮飯喎! 「Come on !! 我就係唔想煮飯先來買飯盒嘛!!」 加上豐華太早收, 三和又吊高晒來賣, 周圍既選擇變得越來越少. 雖然最近開多左間雙福樓食北方菜..... 「小二!!!」「點呀?! 少俠.」 「 一盤牛肉, 一斤餃子, 再加一壺女兒紅, 快!!」 總不能餐餐食餃子嘛!!
獅子頭 就係咁, 每晚一放工, 一落巴士, 我就朝屋企既反方向行去 T & T food court. T & T food court裡, 負責筴餸既員工, 通常有兩個阿沈, 同一個女仔. (可以叫做係全大统華最靚既職員, 可稱為「大统華之花」.) 我根據佢地每曰筴餸既表現做左一個簡單而隆重既調查和统計. 我發覺其中一個阿沈比餸特別多, 個女仔比得最少. 有人話「靚唔可以當飯食」, 我終於明白呢句說話既意思.
果日我唔知點解好想食獅子頭. 我個人好怪, 由細到大, 去 food court, 諗唔到食乜就會叫滑蛋牛肉飯, 食潮州野就會叫白飯魚煎蛋, 食上海野就會叫獅子頭. 排隊見到阿沈幫前幾個人筴餸, 筴兩舊獅子頭比果個人, 通常得一舊, 佢居然有兩舊. 於是, 我一邊排隊, 一邊祈禱, 希望排到我既時侯, 係阿沈幫我夾餸, 咁我就可以有兩舊獅子頭. 都唔知係好彩定唔好彩, 居然遇到果個女仔, 一如所料, 點講都冇用, 只有一舊獅子頭.
雖然買左盒飯, 心裡依然因為少左舊獅子頭而慬慬於懷. 當我食完一舊獅子頭巳經夠, 我先發覺, 其實一舊已經足夠有餘, 小吃多滋味, 知足常樂嘛!! 不過, 當你有得揀既時侯, 點都係想生人霸死地, 有幾多餸就希望筴到滿為止, 邊個會嫌 D餸太多嫁?
豬頸骨 除左去大统華 food court, 我仲喜歡去超市買舊豬骨煲湯飲. 有一次同個 C奶傾計都幾有趣: C奶:「我想買舊豬骨, 呢 D係咪豬骨黎嫁?」 肉女: 「係呀? 你要邊舊?」 C奶:「但係個牌寫住豬頸肉, 咁即係唔係豬骨啦!」 肉女: 「我都唔知呀? (咁都得, 你賣肉個喎! 你唔知唔通我知呀?) 應該係嫁!」 我聽到佢地既對話太有趣, 忍唔住加把嘴. 充滿自信同肯定咁同個C奶講: 「係豬骨黎嫁!!」 個C奶望下我, 答:「但係個牌明明寫住豬頸肉喎!」 我不慌不忙咁指住個牌, 解釋比佢聽:「<<豬頸肉>>中文, <<Back Bone>>英文, 所以, 係豬骨.」 「仲有, 你睇下條骨, 至少有四尺長, 呢隻應該係豬, 唔係長頸鹿黎嫁, 如果係豬, 又點會係豬頸肉呢?」 個C奶同肉女聽到我既解釋都忍唔住笑. 「更何况脊骨係由頸一住去, 背脊骨落到尾, 所以, 頸骨仍然係豬骨.」 結果個C奶同我都買左一舊.
不過, 我發覺我唔係太鐘意大统華果 D好似長頸鹿咁既「豬頸骨」, 冇肉食嘛! 豬骨, 始終都係豐華果 D好, 細細舊, 又夠多肉, 反正價錢一樣, 又近水樓臺, 行少一大段路. 好多人話豐華唔夠新鮮, 唔識睇呀! Anyway la.
雞蛋黄 幾個月打下來, 食到冇野好食, 食自己定係出街揾食都冇著落, 於是, 走左去對面麥當勞食早晨全餐. 記得第一次食早餐全餐同埋薯餅都係婆婆買比我, 當時我唔鐘意食個包, 淨係食煎蛋同塊漢堡豬肉. 食蛋落黑胡椒, 食漢堡就落鹽, 一個似乎係癲倒既調味方法, 到今日都冇變. 唔同既係, 婆婆已經唔可以再同我一齊去麥當勞食早晨, 連煎蛋既方法都唔同左, 唔知係人離開左, 定係 D食物唔同左, 早晨全餐似乎冇之前食咁好味, 留低只係一段童年既回憶. 唔捨得婆婆亦唔捨得以前既煎蛋, 可惜一切都返唔到轉頭 :<
正要離開麥當勞既時間, 見到坐在背後的一位老人家, 正在「解剖」手上既豬柳蛋漢堡. 先將兩塊包抽出來, 將蛋放在手上, 小心翼翼咁揸住手術刀, 係膠餐刀至岩, 不停咁挑, 似乎要分開蛋黄同蛋白. 如果要花咁多功夫, 何不叫豬柳漢堡, instead of 豬柳蛋, 何必要在雞蛋裡挑蛋黄咁慘呢? 我睇到覺得好奇怪, 不過, 又已經見怪不怪, 我曾經見過有朋友食家鄉雞剝皮拆骨, 用幾張吸油紙索油, 再過兩次水. 食到咁辛苦, 算啦! 你好核凸呀! 如果咁先叫健康? 如果咁先叫神既心意, 我寧願早死 D.
|