|
Home
Profile
Resume
Sharing
Word
Goal
Link
| |
停電 - 2003/08/14
大約四點幾, 我正在同大老細,
仲有個Sales Director傾緊 Budget D 0野, 今晚要send個file去Miami. 忽然間
- 停電. 停電是一件颻�o令人興奮的事,
四十年一次, 幾難得呀!
看到不少人生百態, 特別趕工寫成這篇分享,
將所見所聞, 如實報導; 把所思所想,
盡心傾訴.
辦工室
-
個tax analyst即刻瓜瓜嘈, 跳跳紮,
就是那個有六個男朋友的女仕:「我都話今日溫度一到 31就會停電啦!
真係應驗啦!」
-
個client reporting analyst即刻衝去Loblaws,
話去執平貨喎! 結果去到, Loblaws 已經落閘放"走". 不過,
仍然有好多人,
抱住一線希望, 圍住Loblaws. 心想:「我死唔信你D肉壞,
你都唔賤價賣出來....」
-
個個人都要解決,
在漆黑中卻別有一番滋味. 係過癮, 還是痳煩, 就見仁見智. 有見及此,
我借了枝 light up pen 比有需要的人, 使人在黑暗中得見光明,
解決急"時"之需.
-
個Budget 始終要做, 難以致信是:
Kingston Office都冇電. 只有打電話落 Miami, 報告情況, 然後 - 走人.
原來全安省都down 0左, 故事越來越有趣啦!
-
個 Accounting Department在突發事發生時,
難得有一樣的心思和一樣的意念:
「點解唔早D停電呢?」,「可以早放, 快D走.」
-
只因我習慣隨身載手電筒, 所有同事就推舉我做帶領, 領整個Department走出黑暗,
入奇妙光明. 作鹽作光的人, 原是特別受人尊重.
提醒是: 漆黑的房間, 只需一點燭光去照亮,
在黑暗的世代, 燃燒自己, 照亮他人的, 又有誰呢? 我又能否珍惜今天, 把握機會?
「光在你們中間還有不多的時候,
應當趁著有光行走, 免得黑暗臨到你們; 那在黑暗裡行走的,
不知道往何處去. 你們應當趁著有光, 信從這光,
使你們成為光明之子.」(約 12:35-36)
街道上
-
開始議論紛紛, 發生乜事呢?
係咪恐佈襲擊? 我可以肯定, 唔係世界末日. 因為耶穌話過,
佢0黎果陣, 閃電會從東邊發出, 直照到西邊, 停電?! 洗乜驚呀!
就算有電又點? 冇用啦!
-
開始手痕, 個個人都在打電話,
但打唔通, 就算比你打通又如何, 個個conversation都一樣:「你有冇停電?」「有,
你又停呀?」「知唔知發生乜事?」「唔知.」雖然, 我已經預知到conversation係乜,
我依然打電話返屋企, 同弟兄姊妹. 在滿地可短宣的弟兄姊妹仲有電,
我慶幸那兒的EV night唔會cancel, 卻為他們因此不能見到四十年難得一見的場面而遺憾,
也不能與我們共渡時間.
-
開始等巴士(冇subway), 等到好唔耐煩,
不如行啦!
一直都唔明, 先知以利亞點解跑得快過架馬車? (王上
19:45-46) 今日終於有D眉目, 原來當時塞車.
-
開始交通混亂,「沒有異象,
民就放肆」,「沒有王, 各人就任意而行」, 原來唔洗咁嚴重,
馬路只要沒有交通燈, 一切都橫衝直撞. 就在這個時侯, 一個阿伯挺身而出,
站在路中心, 指揮若定, 令亂七八糟的馬路重新恢復秩序. 原來當整個世界都六神無主的時侯,
只要有一個人企出來, 眾人就會聽從. 他係老係嫩, 係神係鬼定係敵基督,
who care? 人心惶惶, 你唔為神企出來, 敵基督就會取而代之. 當然,
那位阿伯的行為令人佩服, 值得表揚.
-
開始有熱狗檔同雪糕檔出沒,
勁好生意. 無他, 當你唔知道幾時同邊度會再食到下一餐, 你食唔食?
但當你知道「明天」好可能唔會有「你」的存在, 你又唔會積極D,
做好D喎, 點解呢?
-
開始有俠義心腸,
想做臨時義工, 幫麥當勞同魚生鋪清理賣唔去,
而又會變壞的食物,
無奈佢0地都收晒檔.
-
開始失望, 走到Finch
Station, subway停駛. 停駛唔失望, 失望是: 我在停電的那一刻唔係撘緊Subway.
如果在站與站之間停電, 我就可以體會到大衛行過死陰幽谷的滋味.
「我雖然行過漆黑的 subway, 也不怕停電, 因為您與我同在, 您的電筒,
您的手機都安慰我.」
-
終於坐到53號巴士, 冇express
bus, 但感謝神, 排頭, 有位座. 趁著白光, 還是多讀兩章聖經, 無奈太疲累,
居然睡著了. 故事往往從釣魚開始, 究竟是楊千嬅<<少女的祈禱>>?
還是梅艷芳的<<婌女>>? 反正睡了, 下一站.....Warden,
記得落車就感謝神.
-
終於走到Bamburgh
Circle, 對對錶, 無驚無險, 又到七點, 十字路口撞0左車, 過馬路點算? 過好唔過好呢?
-
終於走到屋企樓下, 走火通道打開0左,
意味著可能有爬樓梯的咒詛. 智慧是: 以不變應萬變, 先去大堂睇睇部
elevator work唔work. Work, 感謝神, 即或不然, 我都唔會行到跪低.
你估一個人行走火通道, 會唔會有兩把腳步聲呢? 好似但以理三個朋友咁,
有神與他們同在, 又或者, 好似<<足印>>, 但唔係行沙灘.
(故事的發展, 當然係神保守,
唔洗行啦! 但係淨番一部電梯. 我在電梯裡面, 不見一人, 只見十多條沙甸魚.
所以, 我要做個得人漁夫.)
領悟是: 我0地知道, 呢個世界唔會冇0左邊個唔得,
你死0左, 個地球仲會轉. 但今日我先知道, 原來冇電, 個地球真係會轉慢0左.
生活唔可以冇電, 但係可以冇神,
不是么? 點解你可以唔讀聖經而繼續工作? 點解你可以唔祈禱,
而繼續make
decision? 點解你可以遠離神, 自己唔知道?
原來冇0左神, 對你來講,
唔係咁重要.
其實地球已經轉慢0左, 甚至停0左;
其實唔係今日先至停電, 我0地一早就冇晒電啦!
屋企
-
沒有電視, 沒有電腦,
可以更尊心讀聖經. 雖然今日亦只讀得十章就天黑了. 心
- 變得特別的平靜, 人 - 變得異常的欣慰.
-
沒有熱水的shower, 沖涼得特別快,
特別醒神. 我daddy還在浴室門外叫: 「快D沖啦! 就快冇熱水.」「唔洗咁快呀!
因為已經冇熱水啦! 但係我會比"就快冇熱水"沖得更快.」
-
沒有0野食, 我同daddy召開緊急家庭會議.
最後決定, 乾糧有限, 支持唔到超過三日, 先出街食, 食到街都冇得食,
先食乾糧.
-
沒有水電的food court,
暗中摸黑, 切三文治的技術,
今日終於比我見到. 屋企的小朋友千祈唔好試, 冇專人訓練,
純是頂硬上. 「鬼叫你黑呀! 頂硬上呀! 切就切啦!」
-
沒有關門大吉的豐華, 更是人頭湧湧.
龍尾排到出街, 望望窗廚, 原來淨係有燒臘賣.
-
沒有燈, 背影不可上路, 但係依然要食飯.
食發發牛肉粉.
佢獨市, 真係"發發". 老細熱情的招呼, 不斷為停電賠不是,
再來一碗火辣辣的牛肉粉, 飢火是沒有了, 但更覺焚身似火.
飯後, 和daddy在到中央公園(三楝大廈正中的亭園)漫步,
復感清涼.
-
沒有試過地上一片黑, 壯觀之中有三分悽清,
浪漫之餘又帶點神秘. 我手舞足蹈的同Daddy講:「不如用相機映0左佢啦!
好靚呀!」「黑麻麻, 有乜咁靚?」
-
有種山雨欲來的感覺, 如果有
D 「嗚...嗚...嗚...」的警報聲, 同引擎聲, 再加上幾枚射燈,
真係好似空襲. 「但神是我們的防空洞, 我們的高射炮, 是我們患難中隨時幫助.」Be
still, to know that He is God.
-
有人拿燈籠落街玩, 亦有人不停用電筒向四面百方打訊號.
我同Daddy試著向對面楝大廈打訊號, 原來真係會有人回應.
Daddy話:「不如我0地向街打個求救訊號?」「你唔好呀! 一陣人家真係以為我0地有事,
就死啦!」求救訊號係三長兩短, 非必要都唔好用, 但唔知得救訊號又係點打?
感恩是: 停電唔係發生在安息日,
更加唔係冬天, 否則, 仲可以咁風流快活么? 不同於世界未日是: 收音機勸人安在家中, 而耶穌叫人有咁遠走咁遠.
世界未日可怕么?! 但願主耶穌快來.
我0地唔係應該常作準備么? 停電就識得搶購食水,
Gas, 同乾糧.
末世就不知如何豫備么? 難道真的這么難?
「...世人哪,
耶和華已指示你何為善, 他向你所要的是甚麼呢?
只要你行公義, 好憐憫, 存謙卑的心, 與你的 神同行.」(彌
6:7-8)
飛機場
-
唔知點解, 媽咪每次來加,
地上都有不尋常的事情發生. 上次係911, 今次係大停電, 她都在天上.
下次佢來, 我諗要弟兄姊妹為整個北美洲祈禱.
-
唔知點解, 國泰個電話錄音係冇update.
冇明白, 亦冇信任, 冇計, 只有去機場, 那怕撲個空. 人生有好多unknown,
怕make錯decision, 怕無功而回, 但係原來「愛」係唔會咁斤斤計較.
-
唔知點解, 當地上燈火全無,
才懂得往上望, 月亮光光, 朗月清輝亮. 在高速公路上, 車子彷似一隻奔馳的駿馬,
借著明月的映照, 穿過可怕的黑森林, 呼呼風聲, 嗚嗚狼號,
都唔能夠攔阻天路客上路, 勇救萬千顆空虛的心靈.
-
唔知點解, 可能因為班次延誤,
今日機場變到一團糟. 登機大樓變0左難民營, check in同無數飢民擠湧救援部隊分派食物無異.
昏暗的接機大堂似經過戰火洗禮後的街道旁, 無數傷者躺在地上呻吟,
又見多人挽著隨身細軟離開, 風塵撲撲, 蒼桑滿面. 好不容易,
找到一地勤小姐問問, 佢居然同我講:「班機唔會到, 明天請早
- 六點打呢個電話.」(又係呢個? 都唔 up-date.)
-
唔知點解, 班機六點到, 個voice
message真係六點先up-date lor, 遲到 lor. 飛車, 但係架車點飛都唔會學識點樣飛,
但願我有翅膀像鴿子, 又如何? 飛機都 delay七小時啦!
體會是:
沒有交通燈的日子, 行高速公路係安全過 local好多. 當收音機不停呼籲人要把燈位當做
all way stop, 但係有好多人一於好「少理, 飛車」爭奪「炒車榜」排名第一,
點算?! 飛車係不詳之物, 會為主人帶來殺身之禍, 你諗清楚未? 基督徒的人生有時亦好似駕車,
紅燈照衝, 又speeding, 完全唔聽指示, 明知故犯, 神叫我0地接未信的人去佢度,
我0地反而炒低佢0地, 自己又弄到損手爛腳..... 何必呢?
不一樣的生活
-
8月15日, 下午 4點 30 分,
Bamburgh Circle重光.
-
重光後, 雪櫃的凍肉唔得,
唯有一把火燒晒佢, 去朋友屋企 BBQ.
-
重光後, 生活又回復正常,
但係很不一樣. 經過呢一次教訓, 有人唔敢去食 food court, 亦有人唔敢等到空缸先入油,
更加有人唔敢再用電. 公司冷氣唔夠, 樓下商鋪D燈只開一半,
電動樓梯唔開, 戰後重建咁feel.
-
重光後, 公司大廈管理處要求我們
5 點鐘放工, 為了天下蒼世, 為了老百姓的安危, 要我犧牲小小加班的時間準時回家又有冇所謂呢?
我當然樂意捨命陪君子.
-
重光後, 也由於 5 點鐘放工之故,
搭巴士的人疏疏落落, 沒有少女坐在身旁, 婌女亦欠奉, 更可以安心讀經和睡覺.
一個放在 "Get off! This is not a seat"的汽水罐忽然掉了下來,
碌...碌...碌...碌... 由後面"碌"到前面, 空罐 + 空車
= ?
啟發是: 停電令到人心惶惶,
人人去超市搶食物, 車車去油站搶油, 家家互相搶電.
可能, 現代人已經忘記0左係邊個才是生活的供應者了.
「 人活著不是單靠食物,
乃是靠耶和華口裡所出的一切話.」(申 8: 3)
「神說:“要有光.”就有了光.
」(創 1:3)
可惜, 我0地慢慢用電燈取代了晨光,
用超市取代了禾場. 用私慾取代了神的主權.
當人自以為有能力, 將石頭變成食物,
將不可能變做可能之際,
遇上一次生命的"停電",
又能否令人醒覺, 將眼目轉向父神, 重新踏上天路呢?
如果我0地再唔悔改, 可能會再次"停電",
又或者要"加價".
back
to Memo
|