|
Billy Lau Ho-Him's Home Page |
|
Home |
Wait for food 等食
2003年9月某日, 和Daddy去某food court食晚飯. 我在燒臘店叫一碟鹵味飯, 佢在另一間叫了碟鼓油雞飯. 聽到有個三十來歲的兄台(同女朋友一齊), 一口流利的國語向櫃面投訴: 「我叫了一個二和菜, 現在己經三十分鐘, 還未來嗎?」 聽到佢咁講, 我同我Daddy開始滴汗.
好餓了! 十分鐘後, 對小情人終於有得食, 但係, 等食的人越來越多, 本來坐下的如今站起來, 手叉腰, 紮住馬, 圍住鋪面, 似保鏢, 又似收數, 唧唧復唧唧, 搖頭歎息, 此起彼伏, 一浪接一浪, 舉手對錶, 埋身投訴, 群情胸湧, I 聲四起, 乜都出齊乜都冇用.
所謂:「廚房一把火, 慢工出細貨, 食客心頭火, 難為餓肚腸.」 只見廚房內一張長檯, 擺滿了發泡膠飯盒, 懸疊而上, 越疊越高, 真夠氣勢. 但係十分鐘內未見過有人去pick up, 令我懷疑D盒係裝飾, 定係用來裝飯, 有可能同風水有關, 裡面擺個一字長蛇陣, 出面果然一字長蛇, 服未!
幸好, 我隨身帶本聖經, 當人人餓住等, 我可以讀住等. 「他苦煉你, 任你饑餓......使你知道人活著不是單靠食物, 乃是靠耶和華口裡所出的一切話.」
好忙呀! 五分鐘後, 廚房出了一隻外賣鼓油雞. 個櫃面同個客講:「我好忙, 唔得閒斬呀!」 個客點解唔同佢講:「我有錢, 唔會比你呀!」 Daddy忍唔住埋去摧佢, 佢話漏0左單喎!
忙, 個人就燥, 燥, 個人就語無倫次, 我好明白個櫃面的心情, 但好唔滿意佢D態度. 做生意, 得罪個客, 死路一條, 做人, 咒罵父母, 豬狗不如, 將心比己, 自己有時都好燥, 特別對D關心自己的人, eg. Daddy, Mammy... 態度通常差D, 但係, 當我冇0左佢0地, 先知道佢0地原來咁重要.
佢不停咁接單, 廚房得一個人煮, 一個人執馬, 點算? 至少少0左個樓面, 負責裝飯同packing.
當唔夠人手做0野的時侯, 做只會令到人人唔愉快. 永遠都唔洗止意我再幫襯, 除非好好食啦! 我0地無論做工, 讀書, 定事奉, 都係咁, 唔夠人手, 0野係做唔完, 頂埋人0地果份, 好容易會由忙碌變忙亂, 由忙亂變煩燥, 跟住慘, 一個人burn burn下, 除了burn out, 仲會burn others. 寧願你唔做, 傷害冇咁大.
原來神要我們各盡其職, 缺席的當然抵死, 仍然生存的, 點頂? 有D 0野唔一定要做就 Quit 同 No, 爭取時間靜默同做運動亦可減壓, 學下多D感恩亦好. 長時期都係咁就證明整個生活模式出0左問題, 要成個改. 例如: 間鋪頭應該計劃請人.
再重申: 讀經靈修祈禱係give in, not give out.
好心啦! 又十分鐘後, 碟飯終於來了. 那個兄台又跑到櫃面, 大聲喊道: 「有蟲呀! 看! 蟲呀!」 聽到佢咁講, 我同我Daddy再次滴汗. 我發覺兄台每次講說話, 都令我熱血沸騰, 渾身不安. 只聽櫃面不慌不忙, 頭四十五度角向上傾斜, 說: 「你想點? 要 $ 定煮過碟?」(可能因為我坐低望高, 誤會0左佢.) 果位兄台都算好脾氣, 等了又等, 食蟲又捉蟲, 都仲忍到.
又五分鐘後, 佢碟菜上 (特快 lor!) 回頭望過去, 兄台又食得幾開心喎! 原來同愛人一齊食, 食乜都好, 食乜都冇所謂. 其實我0地日日都同神一齊, 點解仲係咁執著, 咁心多, 咁心浮氣燥?
|