|
Billy Lau Ho-Him's Home Page |
|
Home |
Globefish 河豚
2003年10月某星期日, 同班朋友傾開計, 一想到明天請早, 又要返工, 就有感而發: 「營營役役, 勞勞力力, 晚晚返屋企陪屋企人食飯訓教, 日日返工放工望加人工, 在公司又對住同一群雞泡魚, 都幾悶...」 「點解你要用雞泡魚去形容D同事呢?」其中一人問.
又係喎! 點解孩子要用雞泡魚去形容身邊的同事呢? 我為這個問題想了三日, 終於想通. 首先讓我們對雞泡魚有多點認識,
雞泡魚的認識 在我們印象中, 雞泡魚就是漲得吹鬚凸眼, 滿身是剌, 而且含有劇毒的魚. 學名叫河豚, 又名魨. 香港人叫它雞泡魚, 台灣人體積較大的叫作「狗頭」, 較小的叫「娃娃魚」. (與上大陸食野味, 會發出嬰兒叫聲的娃娃魚不同.) 當雞泡魚受到攻擊, 被人撈出水面, 又或是與其他魚爭鬥時, 能將水或空氣吞入腹部內側的囊中, 造成吹鬚凸眼的效果. 除了有虛張聲勢的作用, 在自然界, 大魚食細魚都是整隻吞入腹內消化, 身體漲大亦可避免被較大的魚類吞吃.
單看河豚外貌, 也許不太討好. 人都是看外貌的, 耶和華是看內心, 河豚就要看肉身. 因為它是魚生之王, 極品中的極品. 其魅力在於肉質鮮美, 把生魚肉切成如紙片般的薄片, 嚼起來比一般的魚肉更緊密且有嚼勁, 它的口感介於魚、肉之間, 淡中有餘香. 而河豚皮可以做成魚皮凍, 軟骨可酥炸, 鰭部份烘烤過可以泡清酒, 河豚鰾據說也是上品 ; 河豚在宰殺之後需冰鎮三小時, 方達最佳狀況.
河豚肉美味, 但夠唔夠膽食又係另一回事. 皆因河豚含有劇毒, 輕則使人手腳麻痺, 四肢無力, 嚴重的會昏迷, 甚至呼吸衰竭而死. 毒素主要在它的卵巢和肝臟, 其次為腎臟, 血液, 眼睛, 鰓和皮膚. 正因如此, 便有「拼死吃河豚」這是一句諺語. 在台灣大陸就有不少人為嘗一口河豚肉而入院甚至送命, 它的剖殺及烹調的技巧非常講究和嚴緊, 唔想死但又要試試, 最好到領有「處理河豚執照」的餐廳或飯店. 當然, 食河豚內企圖自殺的朋友就唔洗避忌咁多. 食貴夾唔飽的河豚肉而死, 自然比起燒炭高層次許多, 但都係死. 無奈生命冇 take two, 食過河豚肉, 先發覺人生係咁滋味無窮, 汗流夾背方得糊口, 雖然係一個從創世以來人招來的咒詛, 食過河豚肉, 就知道當中滿有恩典.
雞泡魚的聯想 但凡打工一族都是雞泡魚, 人人都求一份平安穩妥的工作, 不求有功, 但求無過, 穩定收入, 有理想的醫療保險, 有薪假期多D, 放工就真係放工.....邊過唔想? 無奈你受得人二分四, 人家唔會當你係人, 亦唔會當你係狗, 只會當你係一部機器. 一部機器要買得平(under paid), 買返來就用到佢殘為止 (over work). 點都好, Handle工作都可以接受, 只要勤勤力力, 肯學同肯蝕底, Ok, 最困難係人事.
辨工室像個水族館, 有唔同的魚類, 弱肉強食, 大魚食細魚, 死0左的叫魷魚, 生存的, 唔知係進化定退化, 慢慢都變成雞泡魚. 平時彼此吹漲不在話下, 天花亂墜說是講非冇所謂, 一提到關於自己, 就裝刺, 保持距離. 同事/上司有意無意的傷害&誤會, 更是苦毒連天.
成長的雞泡魚, 叫「狗頭」, 正宗古法炮製的烚熟狗頭, 最會陽奉陰違, 跟人口水尾. 有的成為全時間雞泡魚, 由朝到晚, 古古氣氣, 通處剌人, 總愛先下手為強. 未成長的叫「娃娃魚」, 對人歡笑背人愁, 內心裝滿了各種苦毒, 同事和普通朋友還以為他/她好好地, 卻是把怨氣發洩在家人和熟人身上. 中毒者莫明其妙, 全身麻痺.
最近為媽咪跟她的團契翻譯了一首八十年代的粵語流行曲<<人生於世>>, 對一班打工仔都幾有提醒, 在這裡向大家推介.
雞泡魚的剖白 陰功! 好辛苦啊! 我活在雞泡魚群中, 自己又是雞泡魚, 又因我認識神, 那位創天造地, 做出雞泡魚, 各從其類, 又按自己形象造人的神. 感謝神! 衪救我們脫離「雞泡魚」的困局.
雞泡魚有刺有毒, 會吹漲人, 但肉質鮮味, 是魚生中的極品. 照樣人有軟弱, 有罪, 互相虧欠, 但有神的形象, 是萬物之靈, 不過比神微少一點. 大能廚師刀法如神, 可以把有毒的部份除去, 叫雞泡魚成為名貴的菜式; 照樣主耶穌是人類的大祭司, 用真理剖開心靈深處, 叫人可以坦然無懼地來到神座前求隨時的幫助, 又成為貴重的器皿, 豐盛的人生; 有人願意「拼死吃河豚」, 主耶穌卻為愛犧牲自己, 為救贖你我的生命.
經過處理, 雞泡魚依然是雞泡魚, 得救之後, 照樣罪人依然是罪人. 不同是: 我們是蒙恩的罪人, 一條得人如得雞泡魚的雞泡魚. 若果你真明白自己是個蒙恩的罪人, 就能因神接納自己而接納自己. 若果你真明白雞泡魚的脾性, 明白它的行為是出於自我保護, 同時又知道它內裡有苦毒, 但肉質卻是鮮甜, 就能接納它, 同佢和睦相處.
也不知是誰開始, 教人要事事保護自己, 唔好get hurt.... 好像去到邊人人都不懷好意, 要加害你咁. 神做雞泡魚, 令佢識吹漲有毒又有剌, 為什么衪造人的時侯, 唔比根剌佢, 唔比D毒佢, 比隻角佢都好?! 我以前養過鴨仔, 出世一日就會行會走會覓食, 人? 廿幾歲都未畢業, 靠佢開飯就死. 我鐘意食炒黃鱔, 我Daddy捉過條鱔返屋企, 一個月唔理佢都未死. 人? 萬物之中, 人是最軟弱, 最唔能夠自我保護的, 點解呢?
因為神創造萬物, 讓它們可以自己攪惦, 唯獨造人, 神願意差派聖靈活在人裡頭, 親自保護與安慰, 又願意人相親相愛, 而不是弱肉強食. 當你要事事保護自己, 成日以為人家要害你, 反應過敏, 你就會焦慮. 要不就先發制人, 刺人吹漲人, 令那些你以為要篤你背脊, 同你爭上位的人求生不得求死不能; 要不就把苦毒傳遍天下, 叫愛你關心你的人連連受傷.
雞泡魚的脫變 如果你是基督徒, 什么叫你在公司與別不同呢? 十一奉獻? 唔買649? 定食飯有祈禱? 這是你的 life style, 與我何干? 精明能幹, 克苦勤力? 個個好員工都應該係咁. 什么叫你在公司與別不同呢? 叫人看出你屬天的氣質. 係唔自我保護埋藏地分享生命, 又無保留地幫助別人建立別人去完成工作, 你唔open, 唔好expect人open, 真會有 listen to your gospel么?
有趣是: 我們在教會愛講委身, 說為主背十架, 兩腳一離開教會, 就立刻改口說要保護. 什么是背十架? 如果主耶穌要保護, 何必去耶路撒冷? 如果主耶穌要保護, 何不差派天使天軍護駕? 如果主耶穌要保護, 為什么被審判而不辯解? 為什么被釘十架呢? 何必自我保護? 它真能保住你的飯碗么? 誰讓你找到工作? 誰讓你和老細同事關係和睦? 神要你升高, 邊個阻得住? 神要你忍耐, 誰敢不順從? 何必自我保護呢?
這是聖靈在孩子第一日進入社會工作的警告勸勉, 與一般人的concept好唔同, 你亦可能唔 agree. 但這是我至今依然持守的道理: 「誰主浮沉, 伸冤在神, 以誠待人, 蝕底何愁?」 希望能與各位共勉, 一齊學習. 必有人說: 「耶穌不是叫人"靈巧像蛇, 純良像鴿子"么? 這不就是要保護自己么?」 這是只知其一, 不知其二, 留意馬太福音十章的上文下理, 「我差你們如羊進入狼群中...」主耶穌差遣使徒進入人群中, 作么? "靈巧像蛇, 純良像鴿子"地傳福音, 唔係差你出去, 把光收在床下底. 以弗所書第六章說什么能保護我們呢? 是救恩, 公義, 信德, 真理, 平安的福音, 聖靈同多方的祈禱. 若充充足足有這幾樣, 還怕什么? 不用散香爐灰, 落蒙汗藥(迷暈丸), 用小寶神功, 不用狐假虎威, 促虎吞狼, 離間反間, 也不用像數月前, 董特首夫人穿上全副「軍裝」探望陶大花園居民. 為此作了首打油詩做總結:
|