Billy Lau Ho-Him's Home Page
Email address: [email protected]

<<心債>>

聖經就係神既話語, 我地知.

神既話語沒有一句不帶能力, 係信仰和生活的依歸, 我地都知.

問題係, 呢一D「知道」似乎冇辦法幫到我地去花多D時間讀經同明白神話語. 點解?

我地似乎都無法逃避久而久之對聖經續漸冷感, 立刻冷感, 甚至反感既「宿命」.

有一個姑娘

記得初信果陣, 為左更清楚自己信緊 D乜, 每日係大學個 library, 除左咪書同瞓教之外, 就不停咁讀經同祈禱.

有位信左好耐, 就來畢業既姊妹見到, 就同我講:

「我以前都好似你咁熱心, 不過, 到你好似我咁信左十年, 就唔會咁架啦!」

我卻將呢句說話一直藏係心入面, 冇即時作出反應, 因為我好驚, 好驚我將來會唔會好似佢咁.

做學生, 本 Text book 好似舊磚頭咁, 千幾頁.

如果肯讀下書, 果個三個月至少都會讀到半次先去考試 (Assume果科 past paper同 notes唔夠你 pass啦)

聖經唔係金庸, 一個月讀唔完, ok, 一年讀唔完一次, 你話啦, 合唔合理?

奇怪係: 冇人覺得有問題喎! 反而當你每日讀十來章, D人覺得你先至有問題喎!

唔讀經原來冇問題喎! 聖經係信仰和生活的依歸, 但係唔讀經原來係冇影響喎!

你信唔信? 我就唔信.

我地一日睇幾多電視, 上幾多網, 同幾多人講野.

你認為你比呢 D野更新你既生命多, 定係比神既話語影響得多?

但係, 唔讀經原來真係冇影響, 當然冇影響, 係冇被神影響嘛!!

於是我地要問: 點解弟兄姊妹對讀經反應咁冷淡呢?

我地讀經少, 係我地對神既愛唔夠嗎?

但當我見到弟兄姊妹任勞任怨, 不辭勞苦咁係教會事奉果陣, 又唔知點解釋.

真係唔愛主嗎? 如果真係唔愛主, 咁事奉又為左乜呢?

要說教會事奉是為自己, 唔係為左神, 依然講唔通.

如果真係為自己, 星期日不如遲些起床, 星期五晚去唱 K, 平日賺多個錢, 又或者進修下, 更加對得住自己啦!

冇愛又何必自討苦吃呢? 更何况為神同為自己係好多情况之下都唔係互相對立, 無須妄自菲薄.

但如果我地真心愛主, 咁點解唔肯讀經, 唔肯親近神呢?

似乎講唔通, 但又每日都發生係我地每個人身上喎.

多少個新年立志讀完全本聖經, 唔夠兩個半星期就放棄, 點解呢?

一個諗左八年都唔明既問題, 開始有 D眉目.

有人用灰姑娘遇上王子既故事來比喻我地同主耶穌, 地位懸殊,

但敢真敢愛敢死, 十字架果份既浪漫又轟轟烈烈既愛情.

童話小說既 happy ending係灰姑娘同王子結婚過住幸福快樂既生活.

不過, 係人都知, 婚後既共處生活往往先係惡夢既開始......

皇宮有好多大大小小既規矩同禮儀, 要教曉灰姑娘「知書識禮」,

入得御膳厨房, 出得上書房, 談何容易啊?

昔曰既海誓山盟係真心, 亦唔係唔想做好 D既, 但今日對清規戒律果份厭煩亦半點不假.

我地會唔會好似灰姑娘咁, 將聖經睇成一本<<大清律例>>.

以致我地一方面尊重佢, 唔敢否定佢, 另一方面好怕見到佢, 好驚提起佢?

孝莊

又或者, 我地會好似<<孝莊秘史>>裡面既莊妃咁, 與十四王爺多爾袞青梅竹馬,

本來就係天造地設既一對情侶, 可惜天意弄人, 陰差陽錯下嫁左比皇太極.

莊妃對皇太極冇情, 只係好似朋友咁, 係佢心裡面只有多爾袞.

直到佢為皇太極誕下左福臨(後來既順治帝), 為左保住佢呢個皇兒既命,

助佢登上龍座, 保佢既江山, 才不昔與多爾袞在政治上角力/結盟, 以及在糾纏不清既愛情之中劃清界線.

不過, 做兒子既福臨, 又點會明白母親既一番苦心呢?

我地有時都好似莊妃咁. (希望我地都唔好似莊妃咁.)

跟和我地<<愛不釋手>>, 青梅竹馬既罪來個難捨難離.

對神, 愛談不上, 但如果唔同神一齊, 後果又係我地承擔不起.

於是, 呢段神, 我地同罪之間既三角關係一直咁維持下去,

直到有左神同我地孕育出來既福音事工同種種事奉之後,

我地會唔會仍舊再想跟罪做情人, 但為左逃避去事奉?

又會唔會因為唔敢正視我地同神有名無實既呢段關係先專注事工呢?

又或者, 係莊妃內心深處, 舊情人令我地感到無奈, 丈夫令我地生厭,

兒子順理成章成為左佢生存既唯一力量同盼望.

我地會唔會將福音事工同種種事奉當左係神呢?

信主前我地講恩典, 我地話信就 ok, 乜都唔洗做, 實在亦乜都冇能力做.

因為恩典之所以謂恩典正正就係乜都唔洗做.

不過, 信主之後, 支歌仔就唔係咁唱.

做...不停咁做...要被認同, 要在教會生存, 要應付組長既密集式車輪式, 對你「生命成長」既挑戰同期望.

做...不停咁做...我地漸漸忘記左恩典, 忙完就忘, 忘然後亡.

呢種工作令我地討厭親近神, 更惶論佢本聖經, 亦好自然咁眷戀番從前無拘無束既生活.

於是, 我地不停咁做, 但靈命卻不停係十字路口徘徊.

因為我地怕, 怕繼續行會換來更多使命, 更多令人吃不消既工作,

但同時間我地又唔咁心走回頭路.

難怪好多人拒絕福音, 原因都係佢在你身上見到太多 No, 太多包袱, 太多工作,

但反而見唔到你口口聲聲所強調既「恩典」.

「好對唔佳, 我睇唔到呀!!」

<<心債>>既歌詞好適合形容呢種矛盾同掙扎:

悠悠心中痴意(對罪)

源源不絕撫慰(由神)

只望可補償一切(內疚感 & 左右為難)

明明用盡了努力(事工)

明明事事都不計(借事奉去忘記一切)

為什麼萬般癡心都等如枉費(因為忘記恩典)

出路

我唔知我有冇講中你既內心世界, 灰姑娘也好, 莊妃也罷.

聖經點講? 講道/查經原則太多, Application太多, 夠啦!!

試下個人讀經既時侯, 將本聖經當成一本王子日記簿/情信, 而唔係一本<<大清律例>>?

你同阿爸講野, 都唔會次次都淨係想知道:「阿爸, 我今日有乜要做呀?」

阿爸話:「我想陪乖乖你傾下計, 捉下棋.」

你就話:「阿爸, 如果我今日揾唔到乜野做, 你又唔叫我做野, 令我生命改變, 咁我同你既對話就真係廢話,

阿爸, 我真係冇用, 乜都做唔到......」

恩典!!! 關係既建立!!!  你唔係奴僕, 係兒子.

<<如果還有愛>>你自然會係生活行為果度做到, 如果唔係只會吃力不討好, 冇得逼.

唔係原則唔重要, 唔係 application冇用, 係我地失去左起初果份愛心, 冇力再行, 一切變左流水作業.

來罷!! 讓我地回轉, 由<<大清律例>>回轉到日記簿, 由 Application回轉到 Conversation, 由工作回轉到恩典之中.

今日, 就開始你同神既讀經生活啦!!

試下放低你手頭上既事奉/工作一會子, 改變下你一向以為天經地義既讀經方法同目標 - 原則&Application.

借住呢本日記, 靠住呢份恩典, 重新好好建立番呢段失落巳久既關係.

當你向前行, 同神續漸拉近既時侯, 本來纏繞多時既罪自然慢慢疏遠, 甚至生厭.

果陣你會發覺只要冇罪, 原來同神一齊亦可以繼續過你一定都希望果種無拘無束既生活,

仍然可以<<實現理想>>同<<心願>>, 只不過係你一直以為, 神同你既過去對立, 逼你放棄一切.

其實, 神只係希望你離開罪, 係你一直都唔知.

今日, 就開始你同神既讀經生活啦!! 佢係你唯一既出路.