|
Billy Lau Ho-Him's
Home Page |
|
|
自從 6月參加詩班至今, 原來己經半年多了. 當初點解會參加, 主要原因有三:
有所聽見 加入詩班做男低音, 即係 Bass. Base 對我來講即係 悲s 的英文譯音. 我係一個對數字同文字好敏感, 但係對語言, 圖象同聲音唔識反應的人, 百分百的音樂白痴, 唱 K 還可以, 因為果一刻係最能體會到乜野叫「彼此包容, 彼此饒恕」.
加入詩班, 令我進一步肯定<<我不會唱歌>>. 要我逐隻字, 逐粒音, 逐個拍子咁去執, 咁去唱, 唱完十遍我還未識起頭, 轉下頭又將 D音全部比返晒神, (如果係奉獻就好, 真係全然獻上, 不過唔係, 係冇記性 lor.) 弟兄姊妹成日話:「我聽唔到你唱」「究竟你有冇唱?」「都唔聽到你個口郁!!」我都唔知點答好.
我可以點形容我的心情和困境呢? 就好似我岩岩學揸車咁, 上上, 下下, 左左, 右右, 前前, 後後, 都唔知顧得邊樣好, 仲要顧加油, 踩 Brake, 死得未. 唔止, 由於 Bass 係低音, 聽唔到琴聲係肯定, 自己把聲都分分鐘比人蓋住, 就好似叫個學神揸架老爺車上 highway, 跟住前面架保時捷, 平治同凌志咁, 點跟啊?! 喂! 聽唔到我把聲其實唔出奇喎! 你去買隻 CD返來, 如果你唔留心, 你都唔會聽到 Bass 啦! (我唯有咁樣安慰自己.)
多謝 Laurence同Valiant 啦! 好似個教車師父咁, (真正果位叫 Stevenson), 坐係隔離提點: 「睇住個指揮, 轉 key入線」,「呢度慢 D, 再慢, 踩 brake 要柔 D, 唔好突然收油」, 「加油, 加油, 踩盡佢」 但係點都好, 車始終要自己揸嘛! 所以, 每次「揸車」都幾戰戰兢兢, 「開車」前後都會祈禱, 感謝神賜下出人意外的平安.
有所睇見 今年 11月舉行的陪靈會, 星期五晚的聯合詩班令我印象非常深刻. 一個大約百來人的聯合詩班, 聲勢居然可以咁震撼, 歌聲居然可以咁和, 令本來巳經見怪不怪, 習以為常的聚會, 對神額外生出一份肅然起敬. 當年大衛王為聖殿設立詩班, 共四千人, 分十二班, 有二百八十八位詩班長. (代上 23:2-3, 25:1-8) 我真係唔敢想象, 在大型節日, 四千人大合唱果種氣勢磅礡, 果份聖潔莊嚴, 會有幾咁澎湃, 幾咁榮美. 我更加唔敢想象, 將來在新天新天, 天使天軍, 萬國萬民萬物, 天, 地, 海和其中一切受造物和𥿢合奏係點樣, 也許, 呢個係點解將來天天可以有新歌唱, 又唱極都唔會悶的原因之一.
呢個睇見再次燃燒起我的鬥志, 提升我對神的敬畏, 孩子一定要努力去唱好. 如果數才能, 我相信由教會排到去世紀都未輪到我入詩班, 我覺得我地教會叻人實在好多, 音樂人更加有十二藍同七筐咁多, 平時唱 K 一定好惦. 我唯有更加努力, 敢試, 敢學, 敢錯, ready to serve 咁把握每一個神比我敬拜服侍的機會, 這就成了我的恩賜. 我更相信教會裡面有更多弟兄姊妹比我更 ready, 如果神肯用我, (連我都肯用??) 我想他同樣願意用每一個「肯去」的人.
有所識見 要進步一定要有計劃地進修, 練習同自我增值, 以下係我的三個方向:
但我係非常懶散的人, 求弟兄姊妹, 求神支持我, 鞭策我, 用幾年時間在敬拜上更親近, 更近似愛我們的主. 啊們!
常聽說要事奉神就要睇下神肯唔肯用你, 仲要睇你有冇果一種屬靈恩賜. 坦白講, 我反而會諗我肯唔肯比神用, 有冇恩賜我唔係太 care, 我反而 care我有冇將我所僅有既生命, 時間, 才能, 同一切所有去事奉敬拜我主我神. 或者, 這就是 Billy既恩賜觀 - 「獻上所有」, 做神百般恩賜既好管家. (Billy既恩賜觀既另外一個重點係「互為恩賜」, 在此不作詳細解釋) 係呢套恩賜觀熏陶下, 令 Billy由一個不學無術, 只會讀經既人, 漸漸 develop 寫作既恩賜, 再由寫作 develop 作曲填詞, 以及其他大大小小既恩賜. 當然, 呢個係神既安排同諸般既恩典, 到現在依然係神既恩典.
話說 2002夏天, 有位姊妹為 retreat作左首曲, 邀請了幾位音樂人幫手填詞, 但由於大家都工作繁忙, 結果遲遲未能完成. 後來, 係某祈禱會裡面聽到佢地分享到呢方面既需要, 佢地話不如你都睇下首曲, 一齊 come up with D idea la. 就係咁樣, 我地幾個弟兄姊妹填寫了<<頌讚歸我主>>呢首詩歌既歌詞, 開始左我係作曲填詞方面既服侍. 之後 2003, 2004 retreat 營歌亦有份參與, 到現時為止 (2005年 10月)合共填詞廿七首(其中五首参與作曲).
我經常為此感謝同讚美神既奇妙, 實在唔明神點會用一個只有中一中文程度既音樂白痴去寫出一首又一首既詩歌. 這令我更加肯定神係願意用每一個願意比佢用既人去服侍佢.
巳經有太多弟兄姊妹寫敬拜詩歌, 我自問亦冇辨法寫得好似西伯, 盧永享弟兄咁好. 如果父神容許, 孩子真希望能將人生, 如生, 老, 病, 死, 讀書, 工作, 結婚等等每一個場境, 身邊既人, 事, 物都用來做題材寫一首關於神同我既詩歌. 呢個大概就係我其中一個夢想. 我知道詩歌好難可以好似係昔日大衛時代, 或者今日既俄羅斯(東正教)成為華人圈子/文化既主流, 我亦唔嘗試抱有這種「彌賽亞」式盼望. 不過, 每當我見到弟兄姊妹聽流行曲/懷舊金曲聽到如痴如醉, 但唱詩唱到死去活來時, 我就好希望詩歌創作能夠打破所謂「敬拜」,「福音」同「陪靈」既小圈子. 能進一步將信仰/敬拜透過歌曲歌詞, 由教會四道牆進入日常生活每一個層面. 呢個唔係一個人可以做到, 不過, 可以一齊做.
Adam弟兄係其中一位被神重用既音樂人, 亦係到今日為止同孩子合作最多既弟兄, 最近, 又識到一位姊妹, 同樣有出一隻 Christian music CD既感動. (希望我地既眼目/感動唔係淨係滿足於出一兩隻 CD, 好似我地唔應該淨係讀一兩次 bible咁, 而係更遠大, 當然, 呢個係好開始, 好而非常重要既第一步.) 我唔知道幾個人既力量同智慧有幾大, 但我深信神既恩典比我地想像中大, 佢可以感動更多音樂人, 又或者好似我呢 D非音樂人既讀經人去成就佢既旨意係教會.
|