Sinong Jesus?

(Which Jesus?)

“…ngunit ako’y natatakot na kung paanong si Eva ay dinaya ng ahas sa pamamagitan ng kanyang katusuhan, ang inyong mga pag-iisip ay mailigaw mula sa katapatan at kadalisayan kay Cristo. Sapagkat kung may dumating na nangangaral ng ibang Jesus na hindi namin ipinangaral, o kung kayo’y tumanggap ng ibang espiritu na hindi ninyo tinanggap noon o ibang ebanghelyo na hindi ninyo tinanggap, kayo kaagad na napapasakop doon.” 2 Corinto 11:3, 4.

Si apostol Pablo ay nangusap tungkol sa mga nagsisilitaw na nangangaral ng ibang ‘jesus;’ sa mga tumatanggap ng ibang espiritu at tumatangkilik ng ibang ebanghelyo. Ang tanong na imumungkahi namin sa iyo na mambabasa ay: “Aling espiritu ang tinatangkilik mo, aling ebanghelyo ang tinanggap mo at SINONG JESUS ANG PINANINIWALAAN MO? Mag-ingat sapagkat maraming huwad o pekeng ‘jesus’ ang kumakalat ngayon!

Ang ‘jesus’ na Kapatid ng Demonyo:

Ang jesus na ito ay hindi ang ikalawang Persona ng Trinity (Ang Nag-iisang Diyos na Tatlong Persona), at wala naman daw talagang Trinity ayon sa doktrina ng mga naniniwala rito. Ang jesus na ito ay isa lamang pre-existent spirit at espiritung-kapatid ng Dyablo at kasal kina Maria at Martha! Si Brigham Young, na kahalili ng tagapagtatag ng relihiyong ito na si Joseph Smith, ay nagpahayag na ang sakripisyo sa krus ng jesus na ito ay walang bisa para sa paglilinis ng ibang kasalanan. Ang tao mismo ang magbabayad ng kasalanang iyon na hindi kayang bayaran ng dugo ng jesus nila. Ito ang jesus ng Mormons. Ang jesus na ito ay huwad na jesus at hindi tunay na tagapagligtas.

Ang ‘jesus’ na Maliit na Diyos:

Ayon sa mga naniniwala sa jesus na ito siya ay hindi tunay na diyos kundi isang maliit o nakabababang diyos lamang. Siya ay isa lamang anak ng Diyos ngunit hindi siya mismong Diyos. Ang jesus na ito ay muling nabuhay na dakilang nilalang na espiritu at ang kanyang kapanganakan sa mundo ay hindi pagkakatawang-tao ayon sa doktrina ng mga naniniwala rito. Ang jesus nila ay hindi na muling magbabalik sapagkat siya’y narito na sa mundo, hindi nga lamang nakikita. Ang jesus na ito “…ay nagtanggal ng epekto ng kasalanan ni Adan sa pamamagitan ng kanyang sakripisyo sa kalbaryo, subalit magkakaroon lamang ng kumpletong bisa kapag ang mga nakaligtas sa Armageddon ay manumbalik sa Diyos sa pamamagitan ng kanilang sariling kapasyahan (free-will) at magpasakop sa pamamahala ng kalooban ni Jeshovah” (The Kingdom of the Cults, p. 99). Ito ang jesus ng Jehovah’s Witnesses. Ang jesus na ito ay huwad na jesus at hindi tunay na tagapagligtas.

Ang ‘jesus’ na Nagdusa sa Impyerno:

Ang jesus na ito ay hindi nagbayad ng kasalanan ng tao doon sa krus. Ang kanyang pisikal na kamatayan ay walang natupad. Ang jesus na ito ay kinakailangan pang pumunta sa impyerno at dumanas ng nakapanghihilakbot na pagdurusa at pagpapahirap ng Dyablo at ng mga demonyo upang kumpletuhin ang kanyang pagbabayad. Ang jesus na ito ay kinakailangang mamatay nang espiritwal. Ang kamatayan ng jesus na ito ay hindi nagbayad ng kasalanan ng tao sa pamamagitan ng krus kundi sa impyerno. Ang kamatayan sa krus ng jesus na ito ay hindi ganap na pantubos kundi pasimula lamang ng pagtutubos at nakumpleto lamang ng kanyang paghihirap sa impyerno (Kenneth Copeland, Believer’s Voice of Victory, April 1982, p. 10). Ito ang jesus ng Faith Movemment. Ang jesus na ito ay huwad na jesus at hindi tunay na tagapagligtas.

Ang ‘jesus’ na Alipin ng Kautusan:

Ang jesus na ito ay may pagkakahawig sa totoong Jesus, subalit ang pagkakahawig ay hindi nangangahulugang sila ay magkapareho. Ayon sa kanilang propetang babae na si Ellen G. White, “Ang dugo ng Panginoong Jesu-Cristo, bagamang ito ay magpapalaya sa nagsisising makasalanan mula sa hatol ng kautusan, ay hindi nag-aalis ng kasalanan… [ang dugong] ito ay mananatili sa santuwaryo hanggang sa maganap, ang huling pagbabayad-sala” E.G. White, Patriarchs and Prophets, p. 357).Ang jesus na ito ay “…nagbigay ng kanyang buhay upang ang tao ay magkaroon ng isa pang pagkakataon sa panibagong paglilitis. Hindi siya namatay sa krus upang pawalan ng bisa ang kautusan ng Diyos, kundi siguruhin para sa tao ang ikalawang pagkakataon” (E.G. White, Testimonies and Ministers, 1953, p. 134). Ito ang jesus ng mga “Sabadista” o Seventh-Day Adventists. Ang jesus na ito ay huwad na jesus at hindi tunay na tagapagligtas.

Ang ‘jesus’ na Tao Lamang:

Ang jesus na ito ay hindi tunay na diyos kundi isang tao lamang. Hindi siya ang Diyos na tanging nagliligtas: “Si Cristo-Jesus ay tagapagligtas, hindi dahil siya ay Diyos, kundi dahil ang Diyos ay nagliligtas sa pamamagitan niya” (Pasugo, July/August 1993, p.3). At ang paraan naman ni cristo sa kanyang pagliligtas ay ang kanyang ‘iglesia:’ “At si Cristo naman ay nagliligtas sa pamamagitan ng kanyang iglesia” (Pasugo, Sept. 1974, p. 4). Kung ibig ng isang tao na maligtas hindi sapat na siya ay sumasampalataya lamang: “Ang pananampalataya kay Cristo ay mahalaga subalit ang pananampalataya ay dapat na may kaakibat na pagsapi sa Iglesia ni Cristo” (Pasugo, Sept. 1974, p. 4). Ito ang jesus ng Iglesia ni Cristo. Ang jesus na ito ay huwad na jesus at hindi tunay na tagapagligtas.

Ang ‘jesus’ na Walang-silbi ang Katuwiran:

Ipinangangalandakan ng mga nagtuturo ng jesus na ito na ang pagsampalataya lamang sa kanya ay hindi sapat upang maligtas ang tao. Ang pananampalataya ayon sa relihiyong ito ay pasimula lamang ng paraan ng kaligtasan ng tao at kailangang ganapin o kumpletuhin niya ito sa pamamagitan ng kanyang mabubuting gawa sa kanyang buhay. Ang kaligtasan para sa kanila ay ang sundin ang “katuwiran” umano ng Diyos. Ngunit ang katuwirang ito ay hindi katuwirang mula sa Diyos na nakay Cristo kundi nasa kanilang “sariling” katuwiran o mabubuting gawa. Ang sarili nilang katuwiran, at hindi ang perpektong katuwiran ng Jesus ng Biblia, ang dahilan kung bakit sila ay maliligtas. Ito ang jesus ng kilusang Dating Daan. Ang jesus na ito ay huwad na jesus at hindi tunay na tagapagligtas.

Ang ‘jesus’ na hanggang Ngayon ay Nakapako:

Ayon sa mga nagtuturo ng jesus na ito ang kanyang kamatayan sa krus ay hindi sapat na pambayad para sa mga kasalanan ng lahat ng kanyang tinubos. Ang jesus na ito ay namatay upang tubusin ang lahat ng tao sa kasalanan ngunit ang kanyang kamatayan ay hindi pa sapat upang maging lubos na pambayad para sa lahat ng kasalanan, kaya kailangang ang tao ay maghirap sa kaparusahan sa “Purgatoryo” upang sila ay lubusang luminis sa kasalanan, at nang sa gayon, maging dalisay at karapat-dapat na pumasok sa langit. Ang jesus na ito ay nakikita sa altar ng kanilang mga simbahan bilang “tinapay at alak” at patuloy na inihahain sa Diyos bilang alay para sa mga kasalanan ng tao. Ito ang jesus ng simbahang Romano Catolico. Ang jesus na ito ay huwad na jesus at hindi tunay na tagapagligtas.

Ang ‘jesus’ na Alipin ng Free-will ng Tao

Ang jesus na ito ay pinakakilala at higit na sinasamba kaysa sa lahat ng huwad na ‘cristo.’ Ang jesus na ito ay isa ring bulaang cristo na namatay, hindi para sa hinirang lamang ng Diyos, kundi para sa lahat ng taong ipinanganak. Ang kanyang kamatayan ay hindi upang siguraduhin ang kaligtasan ng sinuman kundi upang ang kaligtasan ay gawing “posible” lamang para sa bawat isa, nakadepende sa kanilang pagpili sa kanya ayon sa kanilang free-will. Ang jesus na ito ay hindi tunay na tagapagligtas ng kanyang mga hinirang, kundi “posibleng tagapagligtas” lamang ng bawat isa, kaya’t ang desisyon pa rin ng tao para sa Diyos ayon sa kanyang free-will ang sa katapus-tapusan ay siyang magpapasya ng kanyang kaligtasan. Hindi si Cristo at ang Kanyang ginawa ang siyang nagdudulot ng kaibahan sa pagitan ng naligtas at napapahamak kundi ang free-will ng tao. Ang kamatayan sa krus ng jesus na ito ay walang bisa sa sinumang pinag-alayan niya ng buhay malibang tanggapin ng tao ang ginawa niya, sa gayon lamang magiging tunay at mabisa ang ginawa ng jesus na ito. Ito ang jesus ng Arminianism. Ang jesus na ito ay huwad na jesus at hindi tunay na tagapagligtas.

Ang Totoo at Tunay na Jesus:

Mayroon lamang iisa at tunay na Jesus, ang Jesus ng Biblia: Siyang pinatotohanan ng Diyos, Siyang namatay, inilibing at muling nabuhay “ayon sa mga Kasulatan” (1 Cor. 15:1-4). Mayroon lamang isang Tagapagligtas na kinikilala ng Diyos, iyon ay ang Kanyang Anak at tanging ang Kanyang Anak lamang ang nagliligtas: Siya ang Jesus na hindi lamang Anak ng Diyos kundi Siya ay mismong Diyos. Ang tunay na Jesus ay ang ikalawang Persona ng Trinity, 1 Juan 5:6, 7, hindi gaya ng ‘jesus’ na kapatid ng Demonyo (turo ng Mormonism). Ang muling-nabuhay na katawan ng totoong Jesus ay binubuo ng “laman at buto” (Lucas 24:39). Ang totoong Jesus ay hindi kasalukuyang sikretong nasa mundo sapagkat ang Kanyang muling pagdating ay makikita ng lahat (Gawa 1:9-11 at Luc. 17), hindi gaya ng ‘jesus’ na maliit na diyos (turo ng Jehovah’s Witnesses). Ang tunay na Jesus ay nakaupo sa kanang luklukan ng Ama at hindi napakikita bilang tinapay at alak sa pagkaway at pagtawag ng mga pari sa kanilang mga altar (turo ng Romano Catolico). Saan mang bahagi ng Biblia ay walang makikita na ang paghihirap ng totoong Jesus ay ipinagpatuloy sa impyerno para sa katubusan ng tao (turo ng Faith Movement ni Kenneth Copeland). Ang totoong Jesus ay namatay sa krus ng Kalbaryo at ang Kanyang dugo na nabuhos (ang Kanyang kamatayan), ay ganap na mabisa at talagang nagbayad sa lahat ng mga kasalanan ng Kanyang hinirang. Ang Kanyang kamatayan ay “minsanan at magpakailanmang” panghaliling sakripisyo (substitutionary sacrifice) para sa Kanyang hinirang at hindi na kailangang ulitin at dagdagan pa ng gawa ng tao upang maging mabisa. Ang Kanyang kamatayan ay sapat na pantubos sa bawat kasalanan—sa nakaraan, sa kasalukuyan at sa hinaharap—ng lahat ng taong ibinigay sa Kanya ng Diyos.

Ang mga jesus na itinataas ng mga bulaang ebanghelyo ng relihiyon ay nabigong magbayad ng kasalanan sa kanilang ‘kamatayan’ sa krus. Ang pagbayad ng totoong Jesus para sa Kanyang mga hinirang ay mabisa para sa katubusan ng bawat isang pinag-alayan Niya ng dugo, “…na pinawi ang sulat kamay na laban sa atin na nasa mga tuntuning salungat sa atin, at ito’y kanyang inalis at ipinako sa krus” (Colosas 2:14; Hebreo 9:13-14); “…Subalit ngayon minsanan siyang nahayag sa katapusan ng panahon para sa pag-aalis ng mga kasalanan sa pamamagitan ng pag-aalay ng kanyang Sarili (Heb. 9:26); “…tayo’y ginawang banal sa pamamagitan ng pag-aalay ng kamatayan ni Cristo minsan at magpakailanman” (Heb. 10:10); “Sapagkat sa pamamagitan ng isang pag-aalay ay kanyang pinasakdal magpakailanman ang mga pinababanal (Heb. 10:14); “sa kanya (Jesus) na umibig sa atin, at nagpapalaya sa atin mula sa ating mga kasalanan sa pamamagitan ng kanyang dugo” (Apocalipsis 1:5). Ang lahat ng Kasulatang ito’y nagpapatotoo sa katotohanan ng pagiging sapat at sa kakayahan ng minsanan at magpakailanmang sakripisyo ni Jesus sa krus para sa Kanyang mga “tupa.”

Hindi kailan man tatanggapin ng Diyos ang hindi perpektong matuwid (Santiago 2:10, 11; Mateo 22:37-40). Kalakip ng pagsasakripisyo ni Cristo ay ang Kanyang naging perpekto at matuwid na buhay na siyang tanging kinalulugdan at tinatanggap ng makatarungang Diyos. Ang katuwirang ito ang ibinibilang (o itinuturing na) sa mga hinirang kung kaya’t sila ay tinatanggap ng Diyos. Hindi ito dahil sa kanilang sariling katuwiran (Filipos 3:9; Roma 3:20-22; 4:5; 10:2-4), “Ngunit sa kanya na hindi gumagawa, kundi sumasampalataya sa kanya na umaaring-ganap sa masamang tao, ang kanyang pananampalataya ay itinuturing na katuwiran. Gaya naman ng sinasabi ni David tungkol sa pagiging mapalad na itinuturing (ibinibilang) ng Diyos na matuwid na hiwalay sa gawa…” (Roma 4:5-8).

Ang iba’t ibang ebanghelyong ipinapangaral ng mga bulaang relihiyon ay hindi talaga ang tunay na ebanghelyo, kung kaya, ang iba’t ibang jesus nila ay hindi talaga ang tunay na Jesus, at hindi tunay na tagapagligtas! Napakahalaga na tayo ay manampalataya sa tunay na Jesus. Ang totoo, buhay at kamatayan ang nakataya dito. Ang jesus na mayroon ka ang tumutukoy kung anong doktrina ang pinaniniwalaan mo. Bilyun-bilyon ang bilang ng mga tao sa mundo subalit mayroon lamang iisang ‘ikaw’ at iisang ‘ako,’ kaya’t mayroon ding IISANG DIYOS at IISANG PANGINOONG JESU-CRISTO. Mayroon lamang IISANG TAGAPAGLIGTAS at sinumang hindi nananatili sa Kanyang aral at sinumang hindi naniniwala sa natatanging Ebanghelyo na nagpapahayag ng kabanalan at kamatayan ni Cristo, na kung wala ito’y walang maliligtas, SAMAKATUWID siya ay walang Diyos at walang pag-asa: “Sinumang lumalampas o hindi nananatili sa aral ni Cristo, ay walang Diyos…” (2 Juan 9); “Sapagkat hindi ko ikinahihiya ang Ebanghelyo ni Cristo: sapagkat ito ang kapangyarihan ng Diyos sa kaligtasan ng sinumang sumasampalataya… sapagkat sa Ebanghelyong ito ang katuwiran ng Diyos ay nahahayag…” (Roma 1:16, 17).

Isipin mo ang isang silid na puno ng iba’t ibang mga jesus. Sa itaas ng kanilang mga ulo ay nakasulat : “ang jesus na kapatid ng Demonyo;” “ang jesus na nagdusa sa impyerno;” “ang jesus na hanggang ngayon ay nakapako;” “ang jesus na alipin ng free-will ng tao;” “ang jesus na alipin ng kautusan;” “ang jesus na tao lamang,” atbp. Ang mga katangian, kasaysayan at ginawang pagtutubos ng jesus na sinusunod mo ay dapat naaayon sa Jesus ng Biblia, sapagkat kung hindi ay tumanggap ka ng bulaang jesus (1 Cor. 15:1-4; 2 Cor. 11:3-4). Bakit napakamapanganib na magkamali ka sa iyong paniniwala sa kung sino ang tagapagligtas at ano ang kanyang ginawa? Hindi ba ang kaunting lebadura ang nagpapaalsa sa buong masa? Sapagkat ikaw ay tiyak na mapapahamak kapag nagkamali ka rito. Kung ikaw ay hindi nananangan sa katotohanan tungkol kay Jesus, papaanong sasabihing nasa iyo si Jesus? Ang katuruang tumutukoy at nagpapakilala sa ‘jesus’ na iyong pinaniniwalaan ay dapat na umaayon sa Banal na Kasulatan, dahil kung hindi ay maaaring ikaw ay naturuan at sumusunod sa isa sa maraming huwad na jesus na hindi nakapagliligtas. Ang tunay na Jesus ay siyang namatay sa krus, at ang Kanyang kamatayan ay talagang sapat na nagtubos ng kasalanan ng bawat isang pinag-alayan Niya ng buhay. Tanging ang Jesus na ito lamang ang tunay na Tagapagligtas; tanging ang Jesus na ito ang nagkaloob ng kaligtasan para sa Kanyang hinirang, “silang mga pinili ng Diyos at ibinigay sa Kanyang Anak bago pa nilikha ang sanlibutan” (Efeso 1:4; Jn. 17:2, 3). Kung ang pinaniniwalaan mo ay ibang jesus, gaano man siya kahawig ng totoong Jesus, ikaw ay tumanggap pa rin ng bulaan at mala-satanas na huwad na jesus na magdadala sa iyo sa walang hanggang kaparusahan sa impyerno. Subalit ang sumasampalataya sa tunay na Jesus ng tunay na Ebanghelyo ay maliligtas (Marcos 16:16).

Return to Articles list

Go to Homepage