|
An Pag-abat
by Alfonso Calagos
Kun an langit nagtatangis
Pinaagi han makusog nga uran,
Kun an dagat nag-iisog
Pinaagi han dagko nga balud,
Kun an tuna nag-iisog
Pinaagi han linog
Asay pa ba an kasing-kasing nga
naabat hini ngatanan.
Kun an kalipay nawara
pinaagi kan kasubo,
kun an paglaum nawara
pinaagi han kakurian,
kun an pagtapod nawara
pinaagi han paglingo,
asay pa ba an sangkay nga
tumapod ngan umabat.
Sangkay nga gin ngaranan
Pagtapod gintubyan,
Paglingo ha imo ipapahamtang
Kun di ka makagtuman
Han ira kaladnganan.
|
|
Pulitiko Nakit-an
by Jonard Sode
Pastilan, Ginoo ko! rally na liwat mga grupo hin
kabataan.
Waray mga gin kakahadlukan.
Guliat didi, guliat didto
sanglit mga taga-gobyerno lugod
nanrereklamo.
Aadi mga pulitiko, hira nakapuwesto
Pakaagum la hin gahum, nandagko an ulo.
Aadi in mga kablas, igin patapuran buwas
han makapuwesto, pinanamakan lugod.
Sanglit diri urusahon
Kabataan nakikit-an ha kadalanan naton
Dara-dara karatula ngan pula nga tela
Nagsusudoy-sudoy ha kakalsadahan
Kay diri man tuhay nga serbisyo an ira nakikit-an.
Pastilan, intalon! San-o saw la ini mahuhuman
Kamo nga mga gamhanan ha puwesto
pagtuhay na gad la kamo
para an mga kabataan magin mahimtang
it pangukuyan
Ngan para diri na hira pangapuyon pa. |