Filipiniana

Kalibungan

ni Jonard Sode

Kamakalilipay hinin aton kalibungan,

Kun aton o-obserbahan, puno hin karisyuhan.

Kun aton sisiplatan, puno hin karikuhan,

Labi kun aton pagmamang-nuan, magigin

maupay gud nga tinughan,

Aton pamatian pagaspas hit kadahunan,

Aton pamatian balud han kadagatan,

Aton pamatian huni han katamsihan,

Nga hinayhinay naton nga gin wawara ha

kadayonan.

Responsibilidad naton pagtimangno hit aton

kalibungan

Kalibungan nga hinay-hinay nga nawawara

ha at' paniplatan

Aton kalibungan uusa la it' tinguha

Magmalinampuson hit' kaupayan naton

nga makukuha.

Ayaw naton pabay-i it aton kalibungan

Kay kon aton ini pabay-an, bangin kita mawarayan

Hinaut unta diri naton ini abusaran

Kay bangin ha kaurhian waray kita matagamtaman.

Libung, libung, kalibungan

Libung nga magtitimangno hit'

mga kataw-han

Pananglitan ikaw mapukan

Ano daw la it' mahitatabo hit' katilingban?

Mga Nakaulang

ni Lino Jay Añover

Kagab-i gin sugo ako ni nanay

"Anak, palit daw hin katol kay

manamok."

Gumuli-at ako katapos bumaton,

"Nagtetele-babad pa ako, kasamok!"

Sumunod liwat hi tatay pag-sugo,

"Anak, paliti daw hin upat nga yosi."

Warak ako sumugot kay an rason,

"May ka-text ko pa gad, uyabs pa

gud ini,"

Tapos, sumunod liwat an ak bugto

"Doy, alayuni daw pagpalit hin spray net."

Akon liwat gin baton an akon

bugto,

"Kuya, may ka-chat ko pa gad

ha internet."

Yana liwat hi ako an nag-sugo,

"Alayon daw pag-alsa han

akon dara."

Sumiplat hira ngan bumaton,

"Nagkikita pa kami

hin Rosalinda."