Ang halos taunang proseso at parangal ng Gawad, na unang inilunsad noong 1993, ay karaniwang tumatagal nang mahigit anim na buwan. Pangunahing layunin ng proseso ang maisakatuparan ang misyon ng samahan na tumuklas, magsanay at kumilala ng mga namumukod-tanging kabataang lider ng Laguna nang naaayon sa mga simulain at pangitain ng yumaong Gobernador Felicisimo T. San Luis. Ang timpalak ay bukas para sa lahat ng kabataan
nag-aaral, wala sa paaralan at propesyonal
ng lalawigan ng Laguna na may gulang na 15 hanggang 25 taon at naninirahan sa alinmang bayan ng Laguna nang hindi kulang ng 3 taon. Ang sinumang kuwalipikado ay kinakailangang inomina ng isang indibidwal, samahan, paaralan o tanggapan sa Laguna. Kinakailangang ang kabataang nominado ay may mga katangiang malapit sa mga simulain at prinsipyo ng yumaong Gob. San Luis sa larangan ng pamumuno, paglilingkod, pagpapaunlad ng pamayanan at kagalingang pantao.
    Ang timpalak ay may apat na kategorya:

• Kabataang nasa Mataas na Paaralan,
• Kabataang nasa Kolehiyo,
• Kabataang Nahinto o Hindi Nag-aaral
  Out-of-School Youth
  at
• Kabataang Propesyonal.

Mula sa mga natanggap na nominasyon, masusing pinipili ng Lupon ng Timpalak ang opisyal na nominado ng bawat bayan para sa bawat kategorya batay sa mga profiles ng mga nominado na kanilang isinumite kasama ng mga nomination forms. Ang mga napipiling opisyal na nominado lamang ang may pagkakataong sumailalim sa natatanging proseso at masusing pagsisiyasat. Binibigyan rin sila ng pagkakataong magpahayag tungkol sa kanilang mga sarili at makapanayam ng mga Lupon ng Timpalak at ng Inampalan. Sampung mga finalists, kasama ang apat na Pinakanamumukod-tanging Kabataan ng bawat kategorya, ang pinagkakalooban ng Gawad sa Araw ng Parangal batay sa ipinamalas nilang husay sa pamumuno, kagalingang pansarili at aktibong pakikibahagi sa buong proseso.

    Ang kabataan ay dapat na sumunod at naniniwala sa nga simulain at prinsipyo ng yumaong Gob. Felicisimo T. San Luis. Ipinagkakaloob ito sa kabataang namumukod-tangi sa pamumuno, marunong makisama at maaayos ang pakikisalamuha sa mga nakatataas o mas mabababakasya sa kanya. Natatangi siya sa pakikibahagi sa pagpapaunlad ng kanyang pamayanan.
Kabalikat siya sa mga gawain o proyektong may kinalaman sa pagpapaunlad ng pamayanan at kagalingan nito. Natatangi siya sa ipinakitang kagalinang pansarili. Maganda ang kanyang mga grado sa pag-aaral at kahanga-hanga ang kakayahan sa kanyang sariling gawain at propesyon. Siya ay nangunguna, namumukod at nakikilala rito.
Ang pormularyo ng nominasyon (nomination form) ay kailangang isumite kalakip ng suportang kaalaman tungkol sa kalahoksa tanggapan ng Gawad Felicisimo T. San Luis Foundation, Inc sa BAHAY LAGUNA, Barangay Bungkol, Magdalena, Laguna o sa simumang kasapi ng LUPON NG PARANGAL.
SAMPUNG (10) mga Finalist ang unang pipiliin at ang apat (4) ng pinakaNamumukod-Tanging Kabataan ay pararangalan tuwing Hunyo, sa isang lugar na itinakda ng Lupon. Ang mga kalahok ay daraan sa isang proseso at masusing pagsisiyasat at sila ay bibigyan na pagkakataong magpahayag tungkol sa sarili. Sila ay kakapanayamin ng Lupon ng Inampalan ng timpalak na mula sa kilalang mamamayan at kinakatawang sektor ng Laguna.

GANTIMPALA

Lahat ng 10 finalist ay pagkakalooban ng Isanlibong Piso (P1,000), Sertipiko at mga sorpresang regalo, samantalang lahat ng nominado ay tatanggap ng sertipiko at sorpresang regalo.