FLORIDA ZOMI INNKUAN ONG PIANKHIATNA
( PA PUM ZA KHAI - PRESIDENT 2001 )
Ei Zomi a tamzaw hih gam ih pai-na pen sum leh paii zong hi pi pen hi. Tua
zah khat in tulai aa Florida State sunga om pianpih laizom teng khempeuh zong sum
zong a vekpi phial in Sushi nasep sem hi hang’. Pasian thupha piakna leh mihing lam
pan ki panpihna hang’in Sushi sai zong tampi in ki nei khinzo hi. Florida leh Georgia
State sunga Super market minthang mahmah khat ahi Publix Super market ah AFC
Sushi company contract a neihna tawh ki tuakin Sushi sai thak ki hong kawikawi hi.
Oct 23rd 1999 ni-in AFC zumpi pan thukimna bawlna tawh ki tuak in Sushi sai
thak kipat ding thu om ahih manin Publix Super market bulpi ahi Lakeland (FL) ah
ka paito hi. Ka sai ngahna pen Publix Store #356 hi.Hih hun lai-in Florida gam sungah
ei mi tam lo banah Lakeland ah ei mi aa sim ding kei kia bek hi-in mun tuamtuam
a om lawm leh gualte ki ngai leh kimu nuam mahmah hi. Mimal in ki muhna ding
lampi pen nasep ki nei ciat ahih manin om lo a, phone bek tawh kiho hi thapai hi.
Tua laitak in ei mi Sushi nasem lawm leh gualte Dade, Broward leh Palm Beach
county cih munteng ah om zawdeuh uhhi. Ei Zomi a om teng ahuam kim thei pen in
gen leng’: Pa Tuang leh a sepih teng, Sia Mengpute innkuan leh a seppih teng, Pa
Kampite nupa leh Sia Pauno, Hallandale pan Pa Suan Mangte nupa, Dania pan Sia
En Thang leh Deih Sian, Boca Raton pan Tg Gia Paute lawmta teng leh Palm Beach
pan Tg Paupek leh a seppihte cihbang teng bek ki om in ki ngai thei mahmah hi.
Ko Florida sak lam deuh ah pen Orlando ah Pa Kap Paute innkuan, Lakeland
ah kei, St. Petersburg ah Liante unau leh Haine city ah Sia Thangbawi - Landmark
Baptist College ah Sang kahin om hi. Khat leh khat phone mah tawh kiho den in ei
Florida aa om sa Zomi teng khatvei ki muhkhop theih nang’ hanciam ni cih bekbek
genbel leh utbel in ki nei leh a ki lunggulh pi pen ahi hi. 1999 kum lungdambawl in
kimuh khop nang’ hanciam na pi in hizo nai lo hi. Publix sai hong thak ahi Sia Meng
pute kiangah 2000 kum Easter Sunday in ki suktuah theihna ding khensatna ki nei in
ki lawp thei mahmah hi. Hih ki muhkhop nang thu a ki khensat laitakin ei mi ong ki
behlap a, Key West ah Lianbawite nupa leh a seppihte, Cocoa Beach ah Mungpi leh
Mangpu zong Hollywood ong tungsuk hi.
Ko Florida sak lam aa omteng lawp thei mahmah in phone mah tawh ka kikum
tangtang uhhi. Ahun ding taktak ciangin Kap Paute innkuan leh Mungpi ong kihel
thei lo in 22nd April 2000 in St. Petersburg pan Liante unau in Lakeland ah kei ong
zawn phei uhhi. Haine city aa om Sia Thangbawi in kei zong Sang kikhak ding ahih
ciang ong zui ning ci-in kei kiang’ ong pai phei hi. Tua ni zan in ka ding suk
uh a, Palm Beach aa om Paupek kiang ah ka taam uhhi. Paupek leh a lawmte’n nasia
takin zin ong do in ka gim ka tawlna teng uh a bei keii phial hi ( tu’n ka nung ngaihsut
kik teh Paupek in tua lai aa zin hoihtak in ong do pen thupha a na sang kik pah ahih
lam ka phawk kiksan hi ).
A zing ciang Palm Beach pan zingsang nai 9:00 pawl in dingkhia in Boca
Raton ah Giapaute lawmta teng zawn in Miami Beach aa Sia Mengpute kiang’ 10:30
a.m in ka tung uhhi. Ko tunma aa tung tawh ko tunkhit teh ong tung tawh hi ngeiingaii
in nuam kasa mahmah uhhi.Tua khit teh Pasian min tawh hun tomno khat bawl in
Anthony Lianpau ii anhuan a pai khempeuh in gilvah takin ka ne ngeiingaii uhhi. An
pen Sia Mengpute’ innkuan in lungdamkohna minpua in ong vak hi.
An nek khit ciangin thu tuamtuam kikupna om hi. Tuatak ah Florida ah Zomi
hizah om aa kipawlna khat beek nei lo ding ih hi hiam ci’n kikum in, kipawlna neih
ding leh min ding ka kikum uhhi. Amin ding in 3 leh 4 bang om a, ahi zong a tamzaw
ii deihna ahi Florida Zomi Innkuan (USA) hoih kisa pen leh kisang thei pen ahih man
in ki kipsak pah a, Revd Go Lian Thang in Topa tung’ apna ong neihsak hi. Hih
kipawlna min hong om khit teh panmun kitelna om in anuai a teng mipi in panmun len
dingin seh uhhi.
Makaipi - Tg Zam Sawn Pau
Makai huh - Pa Pum Za Khai
Thuzekpi - Pa Pau Sian Lian
Thuzek huh - Pa Kam Sian Lian
Sumkem - Pa Vungh En Thang
Sumkem huh - Pa Thawng Lian Khup
Members
- Pa Tuang Khan Nang
- Pa Thang Suan Mang
- Tg Gin Za Pau
- Tg Neng Ngaih Lian
Hih Florida sunga om Zomiteng ki kaituahna a khatveina ahih na tawh
ki tuakin mailam ah kimuh theih zelna ding cih lunggulhna lianpi tawh hih kipawlna
kiphuan leh ki kaihtuah theih hun ding zong kigeel in Thawkkikni leh Lungdamkohni
hi dingin ki khensat hi. Florida Zomi Innkuan ong piankhiatna hi bangteng hi in, a
Founder cih mimal min leh aituam in kuamah om lo in, tua April 23,2000 ni aa Sia
Mengpute inn aa ki kaihtuahna aa kihel mi khempeuh Founder vive hipah hi.
FZI pen tuni ciangdong mah Florida aa om Zomi khempeuhte ii ki thu
tuahna pen, lungsim kibatna pen, Zomi mimal khat a ding leh kipawlna aa member te
a ding tupna leh geelna tuamtuam te khat khit khat sepkhiat ding kalsuanna kipan khia
kipawlna khat ahi hi.
Hong piankhiat zawh kum 2 kician khawng bek hipan in kicinlohna leh
hawmthawhna tam mahmah ding ahih manin mimal ah a picing, leitung bup aa Zomite
muan pen suan pen zah aa a zungkha a kip kipawlna ong suah nang in kipawlna sunga
om mimal khat ciat leh Zomi u leh naute in thu leh la tawh ahi zong in, tha leh ngal
tawh ahi zongin, neih leh lam tawh ahi zongin pang khawm in sepkhiat ding thu leh la
te a nungta Pasian in thupha ong pia hen la,gualzawhna lampi ong tun den ta hen !
Amen.