
CHAPITRE 21

dans lequel les raisons pretenduës des
deistes sont renversees, depuis le
soixante-quatriesme quatrain jusques
au septante deuxiesme ; et où il est
monstré que Dieu est exempt de colere,
quand il punit les meschans : que
le peché merite un supplice eternel, et
que Dieu use d' une plus grande douceur
envers nous que nous ne faisons
envers nos semblables, etc. 
Le Deiste
il ne sert rien de dire que ces attributs ne
sont enoncez de Dieu que pour figurer nos crimes,

p595

et que par iceux on entend quelques vertus
infinies en exprimant leurs effects.
car puis que ces effects se rapportent necessairement
à leur cause, Dieu est sujet à perturbation,
ou cette doctrine est une fable. 
Le Theologien
voicy le deiste, qui
veut faire le docteur
en theologie, prenant
ce luy semble la solution
qu' on apporte pour expliquer
ce qui se dit de la colere de
Dieu ; voyons un peu s' il y entend
finesse. Je nie premierement que
les catholiques gazoüillent ce
qu' il advance dans le soixante-quatriesme
quatrain, car nos crimes
n' ont que faire d' estre figurez,
puis qu' ils sont reels sans fiction,
et trop bien gravez, et figurez

p596

d' eux-mesmes, et ce d' une figure
merveilleusement affreuse, puis
qu' ils sont opposez, et repugnants
à la beauté eternelle. Il est vray
qu' il faut estre bien testu, si supposant
que Dieu fust capable de colere,
et qu' il n' y eust rien qui le
peut fascher que les pechez, on
ne concluoit de là l' horreur, et l' enormité
du peché ; en ceste façon
on pourroit dire que quand l' escriture
exprime la colere de Dieu,
son but est de faire apprehender,
et paroistre la laideur du vice, et la
peine qu' il merite.
Il est vray pareillement que
quand on dit que Dieu est courroucé
contre les pecheurs, ou
qu' on luy attribue quelque passion,
qu' on veut exprimer cet acte
eternel de la volonté divine, par
lequel il hayt le peché de toute

p597

eternité ; car par le mesme acte de
volonté, par lequel il a creé le
monde, par le mesme il le conserve
jusques à present ; par le mesme
il hayt toute sorte de vice, et par le
mesme il veut punir les meschans ;
bref ce seul acte estant infiny, c' est
par luy que Dieu veut tout ce qu' il
veut. En cette façon il est certain
que les discours que nous faisons
de Dieu, soit par anthropopatie, ou
autrement, ne sont que pour entendre,
et pour expliquer ses perfections
divines, lesquelles nous ne
pourrons jamais icy entendre parfaitement,
estant infinies, et nous
limitez, et bornez.
Si le deiste ne se contente de
ces façons de parler, je suis d' avis
qu' il prenne des aisles pour s' envoler
au ciel, afin d' apprendre le
langage des anges, et de redescendre

p598

pour nous instruire, car
pour nostre égard nous confessons
qu' il nous faut maintenant
user de paroles corporelles pour
exprimer ce qui est spirituel, et
divin. Ce qui n' empesche pas
neantmoins que nous ne croyions,
et protestions que Dieu est un acte
spirituel tres-pur, infiny, et libre
de toute passion, de tout mouvement,
et de tout changement.
Passons au soixante-cinquiesme
quatrain, lequel ne conclud
rien, non plus que le precedent,
car bien que les effets se rapportent
à leurs causes, il ne s' ensuit pas
que Dieu soit sujet à perturbation,
ou que la doctrine catholique
soit une fable, car ce n' est pas estre
sujet à perturbation que punir les
meschans, et recompenser les
bons ; ce sont actes de vertu ; qui a

p599

jamais dit que la vertu fust un
trouble, ou cause de perturbation,
veu que c' est elle qui dissipe l' orage
des émotions, et qui apporte
le calme et la tranquilité de l' ame ?
Jamais on n' exerça tant de vertus
au monde, depuis qu' il a esté creé
jusques à present, comme on en
pratique au ciel à chaque moment,
est-ce à dire qu' il y ait de la perturbation ?
Nullement : puis que c' est le
lieu de repos, et de perfection.
Je sçay bien qu' il se treuve du
trouble dans nos appetits sensitifs,
et dans l' imagination, lors qu' il
faut exercer quelque acte de force,
de justice, ou de quelqu' autre
vertu, particulierement si l' acte est
exterieur ; mais en Dieu il n' y a ny
phantaisie, ny sentiment corporel,
il est un pur esprit, et le pere de
toutes les intelligences ; ô ! Que le

p600

prophete royal a fort bien dit,
(...), ne pouvant
rien arriver de nouveau à l' estre
eternel, qui est exempt de toute
imperfection, quelque petite
qu' elle puisse estre, et qui a toutes
les perfections concevables, non
seulement par l' esprit angelique,
mais par l' increé.
Or parce que la justice de laquelle
nous nous servons en punissant
les criminels, s' arme de la
poincte de l' appetit sensitif, nous
disons qu' un homme est en colere,
lors qu' il punit quelqu' un, ce
qui n' arrive neantmoins pas tousjours,
comme il paroist lors qu' on
chastie quelqu' un par le seul zele
de la justice ; de là vient que le juge
des-interessé qui n' a autre pretension
que la justice, condamne
un criminel sans aucune passion,

p601

et le bourreau l' execute sans aucune
émotion, ou perturbation. Si
nous avions une parfaite habitude
à la vertu, nous ne sentirions aucune
perturbation en l' exerçant : que
sera-ce donc de Dieu, quand il punit,
luy qui n' a pas seulement l' habitude
de la vertu, mais qui est la
pure, et l' essentielle vertu, au regard
de laquelle à peine nos vertus
meritent-elles d' estre appellees
ombres de vertu. Vous me demanderez
peut-estre pourquoy
nous disons donc que Dieu se fasche
contre les pecheurs, s' il ne
peut avoir de colere. à quoy je
vous respons, qu' on parle ainsi
pour plusieurs raisons, je me contenteray
d' en apporter icy deux,
lesquelles vous feront advoüer
que la doctrine catholique n' est
pas une fable, mais une tres-grande,

p602

et tres-certaine verité.
La premiere est afin que nous
puissions concevoir combien le
peché que nous faisons, est grand,
puis qu' il merite une punition,
non telle quelle, mais digne de
Dieu, et de sa grandeur, et perpetuelle,
comme luy mesme il est
perpetuel, et le suject qu' il punit,
perpetuel ; c' est pourquoy nous disons
que Dieu se colere contre le
pecheur, parce qu' il le punit si rigoureusement,
qu' il est impossible
qu' une telle punition soit faite
par l' homme, ou par l' ange.
Or si par une supposition d' impossible
Dieu se pouvoit cholerer,
il ne chatiroit pas le mal de coulpe
avec une plus grande rigueur,
ny avec un plus grand mal de peine,
qu' il le chastie maintenant.
C' est ainsi qu' on exprime sa force

p603

par un lyon de la tribu du Juda,
quand on parle du verbe incarné,
afin que ce qu' on pense icy estre
de plus fort, nous serve comme
d' echelon pour monter à la cognoissance
de Dieu ; ce que font
paroistre les doctes, lors qu' ils entament
les propos, et les discours
sublimes des perfections divines,
et des façons d' agir, desquelles
Dieu se sert, car estans elevez plus
haut, (...), et disent (ce qui nous fournira
la seconde raison) que tout ce que
nous pouvons faire par tous les
actes de nostre volonté, et de toutes
nos puissances, est fait par un
seul acte de la volonté divine, laquelle
est comme un centre infiny,
lequel estant ramassé, et uny en
soy-mesme indivisiblement, estend
sa vertu sur toute la circonference.

p604

Mais Dieu fait tellement tout par
cet acte eternel, et infiny, que de
toutes les imperfections, qui accompagnent
nos actes, il n' y en
peut avoir aucune dans cet acte
divin.
Or comme nous sommes finis,
et corporels, appercevans qu' il
nous faut autant de diverses actions
que nous produisons de divers
effects, nous taschons de parvenir
à la cognoissance des actions
divines en nous servant des nostres,
parce que nous n' en experimentons
point d' autres, jusques à
ce que nous nous elevions par la
foy, et par la theologie à ce qui
est de divin, et d' incree. D' où je
conclu ce que je vous disois, sçavoir
est que nostre doctrine est
tres-vraye, et que Dieu n' est point
suject à perturbation, bien qu' il

p605

chastie les damnez d' un infiny
tourment, et qu' il recompense les
saincts d' une couronne immortelle :
si cela vous suffit vous pouvez
apporter ce qui suit.
Le Deiste
bien que nous dissions que Dieu fust irrité
contre les meschans, il ne s' ensuit pas qu' il les
doive punir d' un supplice eternel.
le bigot est infiniment cruel, de desirer
qu' un méfait limité soit puny d' un infiny tourment,
car c' est égaler l' instant de nostre vie au
tousjours. 
Le Theol ouy, il sensuit que
si Dieu est irrité contre les meschans,
qu' il faut que leur chastiment
dure autant comme leur
meschanceté, car comme il n' y a
nulle mutation du costé de Dieu,
mais seulement du costé du pecheur,

p606

si on peut dire que Dieu soit
irrité, autant que durera la raison
pour laquelle il est irrité, autant
durera son ire, laquelle cessera
le peché cessant ; or puis que
l' object de la justice vindicative
est le chastiment des meschans, il
faut que ceste punition dure autant
que le peché ; mais quand
l' impie meurt dans son peché ne
voulant pas le quitter (sçachant
qu' il n' y a que le temps de ceste vie
pour le pardon des offenses, et que
par apres il est impossible de l' impetrer)
il fait assez paroistre qu' il
veut offenser Dieu eternellement,
il faut donc que ceste volonté eternellement
meschante, reçoive
un chastiment qui dure aussi long
temps que son mauvais propos, et
que le pecheur demeurant dans une
opiniastreté eternelle d' offenser

p607

Dieu, et de luy deplaire, soit puny
d' un supplice eternel, car il faut
que le supplice soit égal au forfait,
si nous voulons que toutes les oeuvres
de Dieu tant de grace, que de
nature, gardent le poids, le nombre,
et la mesure ; à ce que Dieu
mettant tout en ordre, monstre
qu' il est le maistre de tout l' univers,
et qu' il ne se peut rien faire
qu' il ne sçache le ranger comme
il luy plaist.
Mais voicy vostre rimeur, qui
crie dans son 67 quatrain, au
meurtre, au carnage, et à la cruauté,
afin que s' il manque son coup
du costé de Dieu, et qu' il ne puisse
l' accuser de cruauté, qu' il jette
ceste calomnie sur le chrestien,
qu' il appelle tousjours bigot
à ce que ce mot de supersticieux , ou
de bigot assaisonne ses rimes, comme

p608

les blasphemes les paroles des
soldats perdus, qui n' ont plus aucun
respect de Dieu. Or ce n' est pas le
catholique, qui fait que le supplice
des pechez soit eternel, cela ne
dependant que de Dieu seul ; mais
estant bien instruit dans l' école de
la foy, il ratifie, et approuve la volonté
de son Dieu en ce supplice ;
mais de peur qu' il ne fasse à croire
à quelque idiot que Dieu n' a pas
raison de punir le peché eternellement,
considerez je vous prie, contre
qui se fait le peché, voyez quelle
est sa malice, laquelle s' oppose à
la volonté de Dieu, et contrevient
aux ordonnances, qu' il nous a
prescrites, non afin de retirer quelque
nouveau contentement de
nous, car sa beatitude, et sa joye ne
depend que de soy-mesme, mais à
ce que nous soyons participans ; de

p609

ceste joye eternelle, qu' il a preparee
de toute eternité pour ceux
qui feroient estat de ses commandemens,
et qui le serviroient avec
toute sorte de respect, et de fidelité.
Disons donc, pour achever, que
le peché est infiny en deux façons
tres-suffisantes à ce qu' il soit puny
eternellement ; la premiere est,
que j' ay n' agueres touchee, que
quand le meschant vient à mourir,
il demeure volontairement, et
librement dans ces pechez, lesquels
il sçait ne pouvoir estre pardonnez
qu' en ce monde, et par
ainsi il les rends eternels, et infinis :
la seconde est parce que comme
l' amour surnaturel de Dieu est
d' un prix infiny, que nous aquerons
par la vertu, assistee de sa
grace, de mesme la hayne qu' on

p610

porte à Dieu, ou à ce qui luy appartient,
tels que sont ses commandemens,
merite un mespris
infiny, qui s' aquiert par le peché ;
laquelle hayne, puis qu' elle est opposee
à l' amour de Dieu, et que
cet amour merite, et aura une recompense
eternelle, merite, et
souffre un supplice eternel, car en
bonne logique (...).
Ce qui est d' autant plus veritable,
qu' il est vray que l' aversion
que nous avons des ordonnances
divines, et la hayne que nous leur
portons, nous fait perdre la grace
divine, laquelle nous rendoit amis,
et enfans de Dieu, et coheritiers
de la gloire eternelle. Ce n' est
que nostre faute de ce que nous
n' avons plus ceste grace, sans laquelle

p611

il est impossible d' estre sauvez,
et par laquelle nous eussions
eternellement jouy d' un bonheur
inexplicable sans le peché lequel
est si malitieux, que si nous avions
une grace infinie, il nous en priveroit,
et nous renderoit dignes d' une
peine eternelle.
Passons outre, et disons que
celuy qu' on offense, à une infinie
dignité, et que par suite necessaire
on le doit honorer infiniment
d' un honneur infiny, si faire se
pouvoit, et que quiconque le deshonore
par le peché, commet une
infinie irreverence, qui ne peut
estre expiee, que par une peine infinie,
apres que nous sommes hors
de ce monde, car ce pendant que
nous vivons icy, nous pouvons satisfaire
pour nos pechez par des
actions, lesquelles sont finies

p612

quand à ce qui est de leur nature,
et de leur duree, mais elles sont
renduës infinies par l' union qu' elles
ont avec le merite, le sang, et la
passion de nostre sauveur, et redempteur
Jesus-Christ : c' est de là
qu' elles ont la force de satisfaire, de
mesme que les couleurs prennent
la force de se faire voir, de la lumiere ;
mais force laquelle n' est
pas infinie, comme celle de la grace,
qui estend sa vertu jusques à la
gloire eternelle.
De là vient que nous pouvons dire
que les actes de penitence par
lesquels nous satisfaisons pour
nos pechez, sont infinis eu esgard
à la vertu qu' ils reçoivent de la
grace de Dieu, et des merites de
nostre Seigneur, sans lesquels
nous ne pourrions satisfaire pour
aucun peché, ny ne pourrions recouvrer

p613

la grace, et l' amour de
Dieu, quand nous endurerions
tous les tourmens du monde.
N' importe que l' action de nostre
peché soit finie, et qu' il ne se
retreuve rien dans le peché qui ne
soit finy, c' est assez afin que Dieu le
punisse justement d' un eternel
supplice, que celuy qui la commis,
se soit despoüillé de la grace, par
laquelle il fust arrivé à une recompense
infinie ; et que l' affection
qu' il a au peché soit infinie, entant
qu' il est en luy. Je die infinie
quand à la duree, car sçachant
qu' il ne la peut quitter, que ce pendant
qu' il vit icy bas, et qu' il n' y a
plus de grace apres ceste vie, sans
laquelle neantmoins on ne peut
quitter le peché, lors qu' il meurt
avec ceste mauvaise affection il la
rend infinie, puis que sa volonté,

p614

dans laquelle est le peché, durera
tousjours avec la mesme affection,
et avec le mesme peché.
Veritablement il n' y a nul suject
de se plaindre de ce que les
supplices des damnez sont eternels,
car il n' a tenu qu' à eux qu' ils
n' ayent demandé pardon à Dieu.
Considerez je vous prie quelle
meschanceté, qu' elle opiniatreté,
et quelle negligence, de ne s' estre
pas seulement voulu repentir d' avoir
offensé Dieu ; si les damnez
eussent conceu un regret d' avoir
peché cependant qu' ils estoient
en vie, Dieu leur eust pardonné ;
ils n' ont pas voulu, ils sont demeurez
opiniastres avec leur volonté
perverse, et en ceste façon se sont
eux mesmes jettez dans le supplice
eternel, dans lequel ils tremperont
autant comme durera ceste

p615

maudite affection, qu' ils ont à
leurs pechez.
Or il faut que vous preniez garde
que quand nous appellons le
supplice, infiny, cela ne s' entend
que de sa duree, car il ne finira jamais,
et non de la grandeur, et de
l' intension du supplice, lequel
pourroit estre beaucoup plus
grand, si Dieu le vouloit renforcer ;
c' est de ceste intension que
vient la diversité des supplices eternels,
comme la diversité de la
gloire eternelle, procede des divers
degrez de felicité que Dieu
depart selon la diversité des merites,
et des graces qu' on a euës en
ce monde, car quand à l' infinité de
la duree, les peines des damnez,
et les recompenses du ciel sont
infinies.
Croyez donc fermement

p616

que le supplice est tel que nous le
croyons, à ce que les malheureux
damnez, qui n' ont pas voulu obeïr
à Dieu, et n' ont daigné faire paroistre
l' infinité de sa gloire, ny en
porter le charactere gravé sur toutes
leurs puissances, monstrent
par leurs supplices eternels, qu' il
meritoit un service, une obeissance,
et un respect eternel. C' est donc
ainsi que la providence de Dieu
embrasse tout, que d' un grand
mal elle tire un plus grand bien,
et qu' elle sçait, et peut renger au
supplice, ceux qui ont mesprisé la
recompense.
Le D beny soit nostre Seigneur,
qui m' a fait la grace d' estre
aujourd' huy si bien instruit, vrayement
ce poëte n' auroit maintenant
qu' à me venir cajoler, et tascher
de me faire quitter la crainte

p617

de Dieu, je le renvoyerois bien
loin avec ses impietez, et ses paralogismes :
or je voy maintenant clairement
pourquoy les instans de nostre
vie peuvent à bon droit estre
égalez à l' eternité, car ces actions
momentanees regardent un object,
qui dure tousjours, et puis appartiennent
à une ame immortelle,
laquelle elles soüillent pour
tousjours, si ce n' est qu' elle impetre
pardon de la divine bonté, j' entens
quand les actions sont mauvaises,
car si elles sont bonnes, elles
l' enrichissent d' une beauté immortelle,
si elle ne vient à la perdre
par sa faute. Voicy ce qui suit.
Le Deiste
Dieu puniroit vainement, l' impunité des
damnez n' estant point dommageable ; et puis

p618

quelle apparence y a-il qu' il nous soit loisible
de suivre la douceur, si c' est injustice à Dieu de
faire le semblable.
ceste punition eternelle ne seroit-elle pas
inutile apres le trespas ? Car quel bien Dieu en
peut-il tirer, si les damnez ne se corrigent
point ? 
Le Theol il me semble que
ce n' est pas estre vainement punisseur,
lors qu' on punit, afin qu' il
n' y ait rien de tellement dereglé
au monde, qu' il ne soit reduit à
quelque ordre ; or j' ay desja monstré
cy-dessus que quand Dieu
chastie les impies, il les fait tomber
sous sa providence, de laquelle ils
vouloient se soustraire, et monstre
par là que (...) :
Dieu n' est donc pas
vainement punisseur, puis qu' il
fait un acte tres-vertueux, et qu' il
nous enseigne par là, que le peché

p619

luy est desagreable ; c' est pourquoy
cet acte n' est non plus vain,
que l' acte par lequel il recompense
les saincts.
Mais voyons quelles raisons il
apporte pour establir son impieté,
et pour oster toute sorte de peine
deüe aux pechez. Il veut que l' impunité
ne soit point dommageable,
ce qui est tres-faux, car combien
y en auroit-il qui ne se soucieroient
pas de bien faire, et feroient
le pis qu' ils pourroient,
s' ils croyoient que le mal ne deut
point estre puny ? De plus, Dieu ne
recompenseroit pas les demerites,
de la peine qu' ils meritent,
comme il recompense les merites
par la gloire eternelle, s' il laissoit
les meschancetez impunies, et ne
verrions pas l' esclat de sa justice
pareil a celuy de sa bonté ; or qu' il

p620

ait designé ce supplice eternel, outre
que les sainctes escritures nous
l' enseignent tres-clairement, nous
le concluons de l' infinité de sa justice,
laquelle n' estant pas moindre
que sa bonté, a sans doute un effect
pareil en duree, lors qu' il punit,
et quand il recompense ; car il
n' appartient pas moins à un juge
de condamner les criminels, que
de recompenser les bons ; lequel
tant plus il sera juste, et clairvoyant,
et plus juste sera le supplice
qu' il ordonnera pour le crime.
Dites moy de grace, si un juge
estoit tres juste, et qu' il y eust un
meschant qui fist continuellement
des actes dignes de mort, et
neantmoins que le criminel ne
peust mourir, ce juge ne luy feroit-il
pas endurer des tourmens
continuels, qu' il feroit durer eternellement,

p621

s' il demeuroit eternellement
en son office de judicature ;
or Dieu est tres-juste, et eternel, et
celuy qui meurt en son peché, demeure
tousjours en sa malice, laquelle
n' aura jamais de fin, il faut
donc conclurre que le supplice est
tres-juste, que Dieu ordonne pour
les damnez ; bref il ne feroit pas
paroistre qu' il fust tout bon, ou
ne nous enseigneroit pas l' horreur
du peché, s' il ne monstroit par un
juste chatiment quel il est, et en
quelle estime nous le devons
avoir.
Il appelle à la douceur des hommes,
j' en suis content, mais il faut
qu' il considere que Dieu est cent
fois plus doux, plus benin, et plus
misericordieux, que jamais homme
ne fut, ny ne sera, car quelques
pechez que nous ayons faits, quand

p622

nous serions tombez un milion de
fois en sa disgrace, il nous tend les
bras, et est si prompt à nous faire
misericorde que nous n' avons pas
plustost demandé pardon, et jetté
un souspir, qu' il nous redonne
toutes sortes de graces, et de droits
à la vie eternelle, bien que nous
eussions perdu tout cela par le peché.
Mais il n' y a que le temps auquel
nous sommes en ce monde
qui soit propre pour cet effect. Si le
deiste veut entrer en raison avec
Dieu pourquoy il la ainsi voulu,
je luy demanderay pourquoy
Dieu a ainsi creé ce monde, comme
il est ; pourquoy il n' a pas mis
le soleil au pole arctique ; pourquoy
sa declinaison de l' equateur
n' est de plus de 23 degrez et (...) ;
pourquoy il est eccentrique à la
terre ; pourquoy il y a un tel nombre

p623

d' estoilles, et de planettes ;
pourquoy la terre n' est pas plus
grande, pourquoy il n' y a que
14000 semidiametres de la terre
jusques au firmament. Pourquoy
parut une nouvelle estoille l' an
1572 dans la Cassiopee, lors que la
nouvelle lune fut apperceuë vers
le 5 de novembre : pourquoy l' autre
fut veuë dans le Serpentaire
l' an mil six cens quatre, lors que la
triplicité des signes ignees recommença
pour la huictiesme fois :
pourquoy la grande conjonction
de Saturne, de Jupiter, et de Mars,
se fist au mesme temps dans le Sagitaire :
pourquoy ceste conjonction
ne se fait que de huict cens
en huict cens ans : pourquoy les
estoilles proches de l' equateur
font l' espace d' une heure 4 milions
529 mille 538 lieuës, et dans

p624

une seconde minute (ou dans l' espace
que l' artere du bras, ou que
le coeur bat une fois, car l' artere
bat 4 mille fois dans une heure,
dans laquelle il y a presque autant
de secondes, sçavoir est 3600 ; par
ou vous pouvez mesurer une minute
de temps quand il vous plaira,
car le poux bat 66 fois dans une
minute, quand il est naturel) 1258
lieuës, supposé que les estoilles se
meuvent. Vous pouvez voir le
mouvement, et la grandeur de
chaque ciel, et de chaque planette
dans la 33 raison que j' ay apportee
sur la Genese contre les athees,
qui vous feront aussi empesché
que ce que je vous ay rapporté du
firmament. J' ay dit supposé que
les estoilles se meuvent, car bien
que la terre roulast, ce pendant
que le firmament se reposeroit,

p625

neantmoins je defierois aussi bien
tous les deistes de pouvoir donner
raison pourquoy la terre feroit
225 lieuës ce pendant qu' une
heure se passe ; et pourquoy presque
4 lieuës dans une minute,
comme j' ay remarqué dans la 9
question sur la genese article 4, et
5 ce qui est un mouvement si rapide
qu' il faudroit que les parties de
la terre qui sont sous l' equateur,
allassent du moins 5 fois aussi viste
comme le boulet d' une artillerie, qui
demeureroit une minute entiere
s' il voloit l' espace d' une lieuë aussi
promptement, comme il va dans
sa plus grande force, et par consequent
120 heures à faire tout le circuit
de la terre, lesquelles contiennent
7200 minutes, autant comme
elle a de lieuës françoises en
son tour, (desquelles chacune contient

p626

3 mille pas, et chaque pas 5
pieds de roy) et par ainsi le boulet
feroit seulement en cinq jours
qui comprennent justement 120
heures, ou 7200 minutes, ce que
la terre feroit dans un jour.
Il y a mille autres choses desquelles
ils ne me sçauroient
non plus rendre raison, que de
ce que je viens de dire ; comme
pourquoy la terre pese (...) livres :
(qui est un nombre que les
imprimeurs ont oublié de mettre
dans la 9 question que j' ay desja citee,
article 6 à la derniere ligne de
la 906 colomne, ce qui n' a point
esté marqué (...)).
Car ce n' est pas assez qui me dient
que le bien de l' univers desire ces
mouvemens, ces grandeurs, et ce
poids ; et que la disposition de la

p627

matiere des cieux a esté cause que
ces nouvelles estoilles ont plustost
paru és susdites annees, qu' és
autres suyvantes : il faudroit qu' ils
me donnassent la raison pourquoy
le monde a esté disposé de
ceste façon, veu qu' il eust peu recevoir
une infinité d' autres formes,
d' autres espaces, et d' autres
mouvemens, ce qu' ils ne sçauroient
faire.
Qu' ils ayent donc honte desormais
de demander pourquoy
Dieu fait cecy, ou cela, et de ne
vouloir croire que ce qu' ils peuvent
comprendre dans leur petit
esprit, puis qu' ils ne sçauroient
comprendre la moindre chose du
monde. Ce que je leur prouveray
tres-facilement en leur proposant
ce qui se voit devant nos yeux, et
sans avoir mon recours à ce qui se

p628

fait au ciel, car je les defie tous de
me dire la vraye, et la naive signification
de ce peu de lignes, qui
suivent, lesquelles ne contiennent
rien qu' une verité tres-claire, et palpable.
(...).

p630

Voyla ce qu' un de mes amis a
proposé, qui ne contient rien que
de tres-certain : quand vostre poëte
m' aura expliqué cela, nous verrons
s' il luy faut permettre de s' enquester
des raisons pourquoy
Dieu fait cecy, ou cela ; bien que
cecy soit tres-facile à dechifrer au
pris des autres choses que j' ay rapportees
cy dessus, desquelles il ne
sçauroit rendre raison, quand il y
penseroit un milion d' annees.
Par où vous voyez que c' est
une grande presomption, et une
folie intolerable de vouloir sçavoir
pourquoy Dieu a fait cecy, ou
cela, de façon qu' on ne le vueille
pas croire, si on n' en comprend la raison.

p631

Ne croyons nous pas ce que le
roy fait, ou commande, avoir esté
fait, et commandé, bien que nous
n' en sçachions pas la raison ?
Pourquoy est-ce donc que vous
ne voulez pas croire ce que Dieu
a ordonné, encore que vous ne
sçachiez le pourquoy ? J' adjouste
neantmoins que quand Dieu n' auroit
pas voulu punir le peché, il
ne seroit pas injuste, mais il ne
manque d' une infinité de raisons,
pour lesquelles il l' a voulu punir.
Vous voyez donc que ce poëte
a apporté la douceur des hommes
fort mal à propos pour la contre-poincter
à la justice divine, puis
que Dieu use d' une plus grande
clemence en pardonnant un peché
mortel, que tous les hommes
du monde ne firent jamais en pardonnant

p632

les injures qui leur ont
esté faites.
Et puis ce n' est pas d' un juge
qu' il faut attendre la douceur,
mais l' equité, et la justice, laquelle
il rend à un chacun, et le traitte selon
ses merites, ou ses demerites
sans excepter personne, s' il est tres-juste,
tel qu' est le juge souverain,
et tout puissant, duquel vous ne
devez, ny ne pouvez justement
attendre autre chose qu' une parfaite
justice, car on ne sçauroit le
tromper, ny luy déguiser aucune
chose, puis qu' il sçait tout : c' est
pourquoy je vous conseille de
vous mettre en bon estat, et vous
repentir de toutes les offenses que
vous avez faites, à ce que vous puissiez
employer le reste de vos jours
à servir Dieu, et que vous recompensiez
vos mauvais deportemens

p633

par une bonne vie ; ce que faisant,
je vous asseure que vous eviterez
ces supplices, et aurez la gloire
eternelle pour recompense.
Je passe à l' autre quatrain, et dy
que cette punition n' est ny vaine,
ny inutile ; elle n' est pas vaine, puis
qu' elle est vraye et reelle ; elle n' est
pas vaine, puis que c' est le juste
loyer du peché ; elle ne peut estre
vaine, puis que celuy qui punit ne
peut estre sujet à vanité ; bref elle
n' est pas vaine, puis qu' elle sert
pour remettre dans l' ordre de la justice
vindicative, celuy qui s' est
soustrait de l' ordre de la justice
premiative, ou recompensante.
Elle n' est pas aussi inutile, car elle
sert à tout ce que nous avons dit,
et à beaucoup d' autres choses, lesquelles
nous cognoistrons apres
cette vie ; Dieu vueille que cette

p634

cognoissance des peines eternelles
ne soit point pratiquee dans
nous, mais seulement speculative,
telle qu' elle sera és bien-heureux.
Quant à ce qui est de la correction,
qu' il nie s' en ensuivre, il faut
icy distinguer deux, ou trois sortes
de corrections, l' une desquelles
est afin que celuy qui est corrigé
s' amende, et que quittant son vice
il embrasse la vertu, et devienne
meilleur ; en cette façon les damnez
ne sont pas corrigez : l' autre
est pour servir d' exemple à la posterité,
à ce que les autres fuyent
le mal, pour lequel on punit le
malfaicteur ; mais la troisiesme est
simplement pour le zele de la justice,
afin qu' on rende à un chacun
ce qui luy appartient ; or le supplice
eternel appartient aux damnez,
ausquels si on pouvoit faire tort,

p635

se seroit en ne les punissant pas ;
c' est cette correction qui doit estre
faite, soit qu' on espere amendement,
ou non, soit que cela serve
d' exemple, ou qu' il n' en serve pas.
Il ne faut donc plus que les deistes
s' estonnent de ce que Dieu
chastie les damnez, bien qu' il n' en
vueille tirer ny exemple, ny amendement,
car ces choses icy estans
relatives, Dieu qui est juste d' une
justice absoluë, n' a que faire de ces
considerations. De plus, je dy
qu' un juge peut, et doit faire mourir
un deiste, un athee, etc. Bien
qu' il n' en esperast ny amendement,
ny exemple. Est-ce pas assez
qu' il venge la querelle de Dieu ?
Est-ce pas assez qu' il le punisse selon
les loix ? Est-ce pas assez qu' il ne
commette point d' injustice en cet
acte remply d' equité.

p636

Le D monsieur, je suis merveilleusement
content de vostre
response, mais il faut que je vous
avoüe que je brusle du desir que
j' ay de sçavoir l' explication de cet
enigme lequel vous avez rapporté,
car je ne pense pas qu' il n' y ait
des merveilles comprises sous
iceluy.
Le Theol vous sçavez desja
que je me suis excusé sur choses
beaucoup plus faciles, de peur
d' interrompre le fil de nostre discours
touchant la malheureuse
doctrine laquelle vous a perverty ;
c' est pourquoy je vous prie de rechef
que nous remettions cecy à
la fin du poëme, car je vous promets
de vous faire part de l' explication
que deux habiles personnages
ont donné sur ce sujet : vous
verrez si elles vous aggreront.

p637

Le D je crains fort que la
commodité ne vous permette pas
d' estre si long-temps avec moy
que vous me puissiez expliquer
tout cecy, neantmoins je vis en ceste
esperance, c' est pourquoy je
vous diray le 70, et le 71 quatrain.
Le Deiste
c' est cruauté, et vanité que de se plaire,
et de chercher de la gloire en punissant les
meschans, or Dieu n' est suject ny à cruauté, ny
à vanité.
on se mocqueroit d' un monarque, si on
faisoit estat de la victoire qu' il auroit emportee
sur un goujat, donc le bigot est phrenetique
quand il dit que Dieu treuve de la gloire à perdre
les hommes. 
Le Theol je vous ay desja dit
que Dieu n' a que faire de mandier
de la gloire, ny du contentement

p638

de ses creatures, puis que de soy-mesme
il est infiniment glorieux,
et content, c' est pourquoy tous
ces deux quatrains donnent du
nez en terre. Nous avons aussi monstré
que Dieu n' estoit point cruel,
car qu' est-ce que cruauté ? Est-ce
pas chastier outre mesure ? Or Dieu
ne chastie jamais que selon la mesure
des iniquitez ; (...).
Je diray neantmoins que la gloire
de Dieu à nostre respect est manifestee
par le supplice des meschans,
parce que ceux qui faisoient les
rodomonts, et les galans, ne se soucians
pas de Dieu, et crachans blasphemes,
et injures contre sa majesté,
comme s' il n' eust point esté,
ou s' il n' eust esté assez sçavant
pour les treuver, et assez puissant
pour les punir, sont attrapez, et

p639

suppliciez selon leurs demerites.
Ce poëte voudroit bien que les
bons, et les mauvais fussent mis en
mesme rang, et en mesme balance,
c' est dommage qu' on ne l' establit
chef de quelque republique,
car il donneroit aussi tost les premieres
dignitez aux meurtriers,
qu' à ceux qui ont sué sang, et eau
pour le salut de la republique.
Non, non, il faut que les meschans
soient punis. S' il veut eviter la peine
deuë à ses impietez, qu' il recoure
de bonne heure à Dieu, qui l' attend
les bras ouvers, à ce qu' il se
repente de ses vices enormes ; et
qu' il se garde bien desormais d' user
des mots de goujat , de bigot , ou
d' autres injures, quand il sera question
de parler de Dieu, car la divinité
estant la saincteté mesme, il
n' en faut jamais parler, ny approcher

p640

qu' avec un tres-grand respect.
Dieu vueille l' esclairer, et luy
oster le bigotisme de la teste, j' ay
bien peur qu' il ne devienne frenetique,
s' il ne l' est desja, en se peinant
de persuader que nous sommes
frenetiques ; poursuivez.
CHAPITRE 22

dans lequel les quatrains de l' impie sont
renversez depuis le 72 jusqu' au 84 ;
et est monstré que Dieu punit tres-justement
les meschans d' un supplice
eternel, avec plusieurs calomnies, et
mensonges refutez. 
Le Deiste
si le chastiment ne sert que pour l' exemple
qu' on en tire, qu' est-ce que l' enfer qu' un
tourment supposé, par lequel les religions
s' entretiennent ?

p641

Dieu ne nous a-il pas tous formez pour
quelque fin derniere, puis que le but d' un sage
entendement est la premiere intention de ses
desseins ?
Dieu pourroit-il avoir visé pour nous à
quelque fin d' immortelle misere, puis que le bigot
mesme ne se peut proposer que de bien faire
à ses enfans ? 
Le Theologien
voyla justement où
ce deiste vouloit tomber,
s' il eust treuvé
quelque duppe, à qui
vendre ses coquilles rimees, car
pourveu que ces gens-là esteignent
la lumiere de la foy, et qu' ils
s' abbrutissent tellement qu' ils
n' ayent plus ny Dieu, ny diable, ny
enfer devant les yeux, mais la seule
volupté, afin d' en prendre par tous
les bouts, et par toutes les façons

p642

desquelles ils s' avisent, ce leur est
assez ; mais la dance finira bien tost
avec tous leurs passe-temps, et tous
leurs plaisirs : croyez que ces gallans
ne riront pas tousjours, et
qu' il viendra un jour, qu' il leur faudra
rendre conte de toutes leurs
risees, paroles, et pensees.
Disons donc encore un coup,
que ce n' est pas pour l' exemple,
ou pour la correction, que toute
punition se fait, le but final du supplice
des meschans est celuy, que
j' ay declaré cy devant, si bien que
l' enfer demeure en son entier,
nonobstant le desir, et le quatrain
de ce rimailleur. Asseurément le
philosophe a fort bien dit que
(...), car ce qui a mis la plume à la main
de cet athee, est qu' il desireroit
grandement qu' il n' y eust point

p643

d' enfer, à ce qu' il n' eust aucun remords
de conscience, quand il embrasse
toute sorte d' impietez.
Je m' asseure qu' il nieroit aussi
bien le paradis, n' estoit qu' il veut
flatter son humeur, et joüer la
fourbe entiere, pour mieux persuader
son impieté. Vous voyez
aussi clairement qu' il fait passer
toutes sortes de religions dans une
mesme categorie, ne se souciant
non plus de l' une, que de l' autre,
et les estimant toutes fabuleuses,
et mensongeres ; voyla ce brave
docteur, qui veut mettre tout le
monde en repos. Sçachez donc
que la vraye religion, ne peut se
maintenir par la seule peur d' un
enfer, il faut d' autres ressorts, pour
faire quelle subsiste parmy tant
de larmes, et d' alarmes ; c' est la
grace de Dieu, la foy, l' esperance,

p644

et tous les sacremens, les martyrs,
les propheties, les miracles, et tous
les saincts, qui la conservent, et
non la seule crainte d' un enfer.
Il sera bon de remarquer icy
que le deiste est contraint de recognoistre
l' utilité de la creance
du supplice eternel, qu' il disoit cy
devant estre inutile, puis qu' il confesse
que les religions se conservent
par la peur de l' enfer ; et par
consequent que ceste peur est
cause, du moins en partie, et suivant
l' opinion du deiste, de tous
les biens qu' apporte la religion,
tant à l' esprit d' un chacun, qu' aux
royaumes, et aux autres estats.
à quoy j' adjouste, laissant se
deiste à part, que bien que la seule
peur de l' enfer ne maintienne
pas la religion catholique, neantmoins
elle ayde aux chrestiens à

p645

se maintenir en leur devoir ; car si
quelques-uns ne sont pas assez
épris de l' amour de Dieu pour garder
ses commandemens en consideration
de ce qu' il est souverainement
bon, ils peuvent adjouster
la peine de l' enfer, à ce qu' ils
embrassent les ordonnances divines
avec plus de diligence, et d' affection,
puis que l' observation des
preceptes divins, nous garantit de
ces supplices eternels : c' est là le
moyen de parvenir à l' amour de
Dieu par la crainte, laquelle nous
fait pleurer nostre mauvaise vie
passee, et nous fait embrasser la penitence
pour retourner en grace
avec Dieu.
Ostez donc de vostre imagination
ce que ce miserable poëte
vous avoit mis dans l' esprit, car il
est aussi certain qu' il y a un enfer

p646

pour les damnez, comme il est certain
qu' il y a un paradis pour les
bien-heureux ; et l' un et l' autre est
aussi veritable, comme il est vray
que Dieu est juste ; je croy que cela
suffit à ce que l' impieté de vostre
poëte s' evanouisse, et que vous
croyiez la verité des supplices
eternels, lesquels le deiste vouloit
oster, pour mieux establir son libertinage,
et son deisme : vous
voyez donc maintenant que c' est
que de s' imaginer un Dieu qui
soit tresbon, et qui ne soit pas tres-juste,
et qu' il est tres-veritable que
(...).
Voyons son 73 quatrain, lequel
ne fait rien contre nous, puis que
nous avoüons franchement que
l' intention laquelle Dieu a euë en
creant le monde, a esté de faire

p647

paroistre sa gloire, et faire reluire
ses divines perfections en tous les
estages de l' univers, dans lequel il
n' y a pas une creature depuis la
plus grande jusques à la plus petite,
laquelle ne declare la sagesse, la
puissance, et la bonté du souverain
architecte. Voyla donc la
premiere intention de Dieu, qui a
voulu se manifester en ces façons ;
il a fait comme un grand prince,
lequel venant à la couronne, offre
ses faveurs à tout le monde, promet
des recompenses, et des dignitez
à un chacun, et declare que
son intention est que tous ses sujects
fassent bien, et vivent en bonne
intelligence.
Pour cet effect il leur donne
des loix qu' il veut estre observees,
de façon qu' il destine des peines à
ceux qui les violeront, desirant

p648

qu' on le recognoisse tres-juste
prince, et grand amateur de la justice ;
dites moy s' il vous plaist,
quand il chastira les transgresseurs
de ses ordonnances, cela fera-il
qu' il n' ait pas eu intention de faire
bien à un chacun ? Nullement ;
mais ce sera la seule faute des rebelles,
qui n' auront pas voulu correspondre,
et cooperer avec l' intention
de leur prince, lequel sera
autant loüable en la justice qu' il
rendra en les punissant, comme
en la recompense qu' il donnera à
ses fideles serviteurs. C' est ainsi
que Dieu a eu intention qu' un
chacun fust sauvé, car il nous en a
donné les moyens tres-faciles, et
nous y ayde a chaque moment,
c' est pourquoy ceux qui se damnent
parmy tant de graces, ne peuvent

p649

se plaindre que d' eux-mesmes.
Prenez garde neantmoins qu' il
ne nous a pas fait tellement determinez
à la gloire eternelle, qu' il
ne nous ait laissé nostre liberal arbitre,
afin qu' il eust des serviteurs
libres, et non contraints, et que
nous possedassions le paradis par
tiltre de recompense : il ne tiendra
qu' à nous, si nous ne l' aquerons
par nos travaux. Mais bon
dieu quel travail, veu qu' il n' est
question d' autre chose que de
vous obeyr : et quoy, si nous obeissons
au roy avec tant de facilité,
et d' affection, avec quel ardeur devons
nous marcher quand il est
question d' obeyr à Dieu ? C' est à
quoy je vous convie, et vous conjure
entant qu' il est en moy ; asseurez
vous que vous aurez plus de

p650

contentement dans une heure obeissant
à Dieu, et vous comportant
selon sa saincte volonté, laquelle
il nous a declaree en l' escriture
saincte, et par son eglise,
que vous n' avez eu en toute vostre
vie, depuis que vous avez embrassé
ce malheureux party.
Mais passons à l' autre quatrain,
dans lequel il change de batterie,
et fait cet enthymeme icy ; le pere
parmy nous ne voudroit pas malfaire à
ses enfans, ou du moins les punir eternellement,
donc Dieu ne le peut vouloir faire,
puis qu' il est pere de ce tout . S' il nous
estoit permis de comparer Dieu
à l' homme, nous nous bastirions
un beau dieu, car il faudroit que
nous transportassions toutes nos
imperfections dans la divinité, ce
qui est impossible : neantmoins
il procede le plus finement qu' il

p651

peut, car comme il voit que la douceur
est grandement prisee entre
nous, particulierement celle d' un
pere envers ses enfans, il veut
nous persuader que Dieu ne peut
non plus chastier les meschans
eternellement, que le pere ses enfans.
Or outre que nous voyons de
bons peres, qui punissent pour
tout jamais leurs enfans en les desheritant,
et les desadvoüant, et
d' autres qui les font executer par
la justice, se conformant en cela
aux loix divines, et humaines, (ce
qui seroit suffisant pour decrediter
le 74 quatrain de ce poëte),
je dy que quand nul pere ne pourroit
vouloir chastier son enfant,
non pas mesme d' une peine temporelle,
d' un simple coup de verge,
ou d' une simple parole de reprehension,

p652

que Dieu auroit
neantmoins un droit souverain,
et une tres-juste raison de punir les
damnez eternellement, car l' homme
dépend davantage de Dieu,
et luy est beaucoup plus redevable,
qu' il n' est à quelqu' autre homme
que ce soit, fust-ce son pere, ou
sa mere, lesquels ne donnent rien
que le corps à l' enfant, lequel ils
ne peuvent engendrer, qu' au prealable
ils n' ayent receu cette puissance
generative de Dieu, de façon
qu' ils luy en sont entierement
obligez.
Voyez donc comme tout ce
qui est dans la nature a une souveraine
obligation à Dieu, qui ne
peut jamais estre assez loüé par
toutes les creatures, encore qu' elles
se convertissent toutes en voix,
en langues, en pensees, et en loüanges,

p653

et neantmoins afin que cette
loüange fust eternelle, et que le
contentement des hommes ne finist
jamais, Dieu leur a preparé un
lieu, où ils puissent faire cela avec
une felicité, laquelle ne se peut exprimer,
pourveu seulement qu' ils
recognoissent en ce monde icy
l' obligation qu' ils ont à la majesté
souveraine, et qu' ils obeissent
à sa volonté signifiee par ses commandemens.
Et quoy ? Si au lieu de se mettre en
estat d' acquerir cette gloire par
un travail si court, si plaisant, si leger,
si juste, et si raisonnable (telle
qu' est l' observation des loix divines)
quelqu' un est si meschant,
ou si oublieux de son devoir, qu' il
dédaigne de faire ce que Dieu demande
de luy, et qu' au lieu de le
servir de tout son coeur, il se bande

p654

contre ses ordonnances, ne merite-il
pas d' estre puny eternellement ?
Il le merite asseurément,
puis qu' il a mesprisé la bonté, et la
beatitude eternelle ; et ne croy pas
que personne voulut estre advocat
d' une si mauvaise cause.
Or ce qu' il apporte touchant
le pere plus clement vers son enfant,
n' est icy à propos, car premierement
le pere n' est pas offensé
par son fils en qualité de souverain,
comme il appert de ce que
nous avons dit ; secondement, il
ne cognoist pas la qualité de la
faute, comme Dieu la cognoist, et
par ainsi il n' en peut pas juger asseurément.
Troisiesmement l' offense
entant qu' elle est infinie,
n' est pas faite contre le pere, qui
est limité, mais contre Dieu, puis
que le peché est une aversion du

p655

souverain bien, et du createur, et
un retour à la creature ; c' est ce retour
au plus, que le pere chastie ;
mais Dieu estant aussi juste, qu' il est
misericordieux, ce seroit merveille
s' il ne punissoit tres-justement.
Dieu n' est pas comme l' homme,
lequel remply de compassion ne
veut, ou ne peut pas souvent rendre
telle justice qu' il faudroit, car
exempt de passion il punit, ou recompense
comme il faut selon l' equité,
et la raison sans consideration
des personnes, des grandeurs,
et des dignitez de ceux qui ne luy ont obey.
Pleust à Dieu que nous peussions
voir clairement l' horreur du
peché, la grande justice, et la raison
que Dieu a de le punir eternellement,
nous nous estonnerons
comment l' enfer n' engloutit

p656

celuy qui a offensé, si tost que le
peché est commis ; mais aveugles
que nous sommes, nous nous figurons
les chastimens divins, comme
les temporels, et l' eternel comme
le finy. Il ne faut pas icy que le
deiste me reparte que puis que
l' estime que nous faisons de ces
peines, et de ces façons d' agir, dont
Dieu se sert, est humaine, et passagere,
que la peine du peché doit
aussi estre temporelle, et finie, car
nous avons la lumiere de la foy, et
la raison naturelle, laquelle nous
enseigne que Dieu merite un honneur
souverain, et que le deshonorer,
ou ne luy rendre ce qu' il requiert
de nous, merite un tourment
aussi grand comme le delinquant
s' en trouvera capable, puis
que tout ce qu' il est, comme il
estoit hypothequé à ce devoir, est

p657

aussi obligé à la reparation, ce que
monstre pareillement la raison naturelle,
comme vous avez veu cy devant :
si bien qu' il n' y a aucun sophisme,
ny aucune excuse, qui nous
puisse garantir de ce supplice. Veritablement
il est bien raisonnable
que si la gloire de ceux qui font
bien, et honorent Dieu, est infinie,
que la peine de ceux qui font le
contraire, soit infinie. Faites donc
(ô mon Dieu) que vostre honneur,
et vostre justice soit garantie de la
dent du meschant deiste, et que
personne ne vous attaque jamais,
(...).
Le deiste voudroit bien estre
sauvé pour ses beaux yeux, et pour
sa mine, et ne sçay s' il ne pense
point que Dieu mesme luy soit redevable
des bonnes cheres qu' il

p658

fait, et des caresses qu' il donne à
son propre corps. Il verra à la
mort, pour le plus tard, si Dieu ne
le chastie plustost exemplairement
en permettant, et faisant que
la justice le decouvre, et le fasse
brusler à petit feu, comme il le merite,
il verra dis-je que c' est que de
se moquer de la religion, et des
chrestiens, et maudira le temps
qu' il aura employé à cela, mais ce
sera trop tard, car s' il attend le
point, auquel son ame sortira de
son corps, et auquel le temps de
meriter sera finy, il n' y a plus de
pardon pour luy, ny de misericorde.
Sçachez donc, monsieur, que
Dieu ne vise point à la perdition
d' aucun, et que ce n' est que nostre
faute, lors que Dieu nous punit,
puis que nous pouvons nous sauver.

p659

Au reste, prenez garde que ceste
comparaison trop niaise du
pere envers son enfant, ne vous esloigne
de ce que ces discours vous
ont mis dans l' esprit, car ils sont
tres-veritables, et suis prest de mourir
pour leur deffence.
Le D je ne doute plus en aucune
façon de la fourbe, et de l' ignorance
de nostre poëte, qui à
voulu nous persuader ses caprices
mensongeres, et trompeuses, au
lieu de la pure verité ; achevons vistement,
il m' ennuye fort que ce
n' est fait, car je suis lassé d' entendre
tant d' impietez sorties de la
bouche, et de l' esprit d' un si meschant
homme ; voicy ce qui suit.
Le Deiste
d' où je conclus que puis que Dieu ne nous a
peu faire naistre pour un malheur sans fin, que

p660

nous parviendrons tous au repos que l' amour
divin nous a l' imité pour nostre meilleur estre.
en fin pourroit-il nous quitter, puis que
nous sommes son principal ouvrage ? Pourrions
nous parvenir qu' au but où sa bonté a visé devant
tout aage. 
Le Theol je respons que ce
qu' il veut inferer, de ce que Dieu
ne nous a pas fait naistre pour nostre
malheur, sçavoir est, que nous
serons tous sauvez, est aussi faux
comme la parole divine est veritable,
laquelle nous asseure du
contraire, de sorte qu' il faut aussi
bien croire que ceux qui meurent
sans repentance de leurs iniquitez,
seront damnez, comme nous
croyons que les justes seront sauvez.
Car c' est un mesme Dieu, et
une mesme foy, qui nous enseigne
l' un, et l' autre.

p661

Il est vray que nous parviendrons
tous à la gloire eternelle,
s' il ne tient à nous ; mais voulez
vous que Dieu sauve une personne
malgré qu' elle en ait ? Il n' y a
nulle apparence : il faut donc que
nous y apportions du nostre, et
que nous usions de nostre liberté
en élisant le bien, et le moyen, que
Dieu a voulu qu' on tienne pour
aller en paradis. Mais ce qui a fait
tomber vostre poëte dans cet erreur,
est qu' il a pensé, ou qu' il a voulu
faire à croire aux ignorans, que
Dieu avoit tellement creé les hommes
dans cet univers, que de toute
eternité il avoit absolüement
voulu que tous fussent sauvez,
quelque chose qui en peut arriver,
ou quelque vie qu' ils menassent,
sans les astraindre, ou les
obliger à faire cecy, ou cela ; or ce

p662

fondement s' en allant par terre, et
estant tres-faux, tout ce qu' il pense
conclurre est ridicule, et contre
toute sorte de verité.
L' ordre que Dieu a voulu observer
dans l' univers, a esté, et est
(pour ce qui touche les anges, et
les hommes) qu' ils se comportassent
en ce qui est de leur liberté,
comme il leur plairoit, de sorte
qu' il a promis assistance à un chacun
pour vouloir, ou ne vouloir
pas tout ce qui luy semblera bon,
mais à condition, et avec une promesse
infallible que s' ils vouloient
garder ce qu' il leur prescriroit,
qu' il leur donneroit un eternel
contentement, par lequel ils auroient
tout ce qui se pourroit souhaitter ;
au contraire s' ils mesusoient
de leur liberté, et qu' ils ne
voulussent pas suivre le chemin

p663

royal de ses ordonnances, qu' il
les puniroit eternellement, (...).
Je respons au 76 quatrain, que
Dieu ne se des-unit pas des meschans,
bien qu' il les punisse, car il
leur est aussi present, quand à ce
qui est de son essence, et de sa puissance,
comme il est en paradis,
mais il s' en des-unit seulement en
ce qu' il ne leur donne pas la recompense
des justes, et leur denie
sa grace, par ce qu' ils l' ont mesprisee.
Disons donc que Dieu n' est pas
moins bon, quand il punit les meschans,
au contraire, s' il se pouvoit
faire que Dieu fust meilleur dans
une action, que dans une autre, il
faudroit dire qu' il seroit meilleur
en punissant les mauvais, qu' en les

p664

espargnant, ou ne voulant pas les
chastier.
Le deiste pense que Dieu se
change, s' il punit ceux qu' il vouloit
estre sauvez, mais il se trompe
lourdement, car par la mesme volonté,
par laquelle il a determiné
la recompense pour les bons, par la
mesme il a determiné le supplice
pour les meschans ; il n' est non plus
vray de dire que Dieu abandonne
son ouvrage, lors qu' il chastie les
damnez, au contraire il monstre
qu' il en a grand soing, leur donnant
ce qu' ils ont merité.
Dieu par sa misericorde nous
vueille preserver de ceste misere,
et nous fasse la grace de nous esloigner
l' esprit de ces impietez. Il est
vray que Dieu a visé de toute eternité
à nostre salut, mais ç' a esté en
y comprenant nostre liberté, et

p665

son bon usage. Que ce poëte voye,
et qu' il se tâte le poux, et la conscience,
il treuvera qu' il a souvent
mes-usé de sa liberté, et qu' il ne
tient qu' à luy, qu' il ne quitte ses
erreurs, et ses phantaisies. Poursuivez.
Le Deiste
bien que Dieu nous voulust reduire dans l' ancien
chaos, est-ce pas blasphemer de le taxer de
nous mettre au repos où nous estions, avant que
d' estre, en ce principe mesme.
je sçay qu' on nous fera icy des contes fabuleux
pour nous faire quitter les maximes les
plus evidentes.
et qu' on nous dira que les effects divins
nous sont impenetrables, et que nos sens, et
nos raisons nous trompent souvent, comme s' il
n' y avoit rien de certain que leurs songes, et
leurs fables.

p666

de plus, ils vomiront des injures contre
nous, comme faisoit Ulespiegle contre ceux qui
découvroient ses couleurs, et ses peintures.
car ils veulent que nous soyons des souches
insensibles pour nous ranger à leurs opinions.
et nous espouvanter comme une nourrice
laquelle effraye ses petits pour regler leurs
jeunes appetits, à ce qu' ils nous puissent ranger
sous leur diadesme.
mais tout ce qu' ils nous sçauroient dire
n' est que pour effrayer les sots, qui se laissent
decevoir à l' ignorance, laquelle les embeguine
d' une fausse creance. 
Le Theol j' ay voulu vous laisser
rapporter ces 7 quatrains tout
d' un coup, par ce qu' ils appartiennent
à une mesme impieté ; et bien
que vous voyez assez par ce qui a
esté dit cy dessus, que tout ce qu' il
rapporte ne sont que pures sottises,
je vous diray encore quelque

p667

chose sur ce suject. Son 77 quatrain
me semble fort obscur, neantmoins
je pense qu' il veut comparer
ces deux punitions icy, sçavoir
est ou d' estre damné , ou d' estre
reduit au neant , et crois qu' il pense
que ceste derniere peine du neant
est moindre que celle du dam, ce
que supposant, il veut accuser Dieu
d' injustice, s' il nous reduisoit en
l' ancien chaos à cause de nos offenses.
Or soit que ceste reduction
au neant doive estre estimee un
plus grand supplice que celuy de
l' enfer, comme la pluspart des
theologiens disent, à cause que la
damnation suppose l' estre en son
entier, que l' aneantissement destruit
tout à fait ; soit que la peine
du dam soit plus grande, comme
d' autres pensent à raison de ces
paroles que nostre Seigneur prononça

p668

en parlant de la trahison de
Judas en son endroit, (...), il est tres-asseuré
que si Dieu reduisoit tous
les hommes, non seulement qui
sont meschans, et reprouvez, mais
tous les bien-heureux, et tout le
monde au neant, qu' il ne pourroit
estre accusé d' injustice, que tres-injustement,
et sans raison : mais
c' est assez que Dieu ne fasse pas
ceste reduction, à ce que ce quatrain
soit sans fondement ; par où
il appert que ce poëte n' a qu' une
chetive rime sans raison.
Pour le 78 quatrain, vous voyez
combien cet homme est sot, et ridicule
avec ses boufonneries, qui
tasche de rendre fabuleux tout ce
qui appartient à la theologie, et à
la religion ; vous avez apporté dans
les quatrains precedens ce qu' il

p669

appelle fables, où je vous ay monstré
la fausseté, et l' erreur de son dire,
ce qui n' est pas besoing de repeter ;
or au lieu de faire quitter les
maximes claires, et evidentes,
nous les establissons plus fort, n' y
ayant aucune verité, que les chrestiens
n' embrassent de bon coeur,
comme procedante de Dieu pere
de la verité.
Voyons le 79 quatrain, par lequel
il se moque de ce que nous
disons, que les oeuvres de Dieu surmontent
nostre capacité, et qu' il
n' y a rien de certain que ce que
Dieu a revelé, et nous a appris, car
c' est cela qu' il appelle songes, et
fables : si bien que si nous voulons
croire à ce rimailleur, la puissance
divine sera merveilleusement petite,
puis qu' il ne veut pas que Dieu
puisse rien faire, que nous ne puissions

p670

comprendre, ce qui nous
rend égaux à Dieu, car si nous penetrons
tout ce qu' il peut faire,
nous en sçaurons autant que luy ;
nostre science sera donc infinie,
donc nous serons des dieux, ce qui
est une chose tres-ridicule, et impossible.
Je suis fort esbay, comme il s' est
tant oublié dans ce quatrain, veu
qu' il fait le grand dialecticien, et
le philosophe ; s' il estoit tel, il eust
incontinent aperçeu qu' il faut
que les objects respondent à la
puissance, or les objects de la puissance
de Dieu sont infinis, et ne se
peuvent penetrer qu' en penetrant
la mesme puissance ; nostre
entendement est finy, et limité, et
par consequent il ne peut comprendre
ny la puissance divine, ny
toutes ses oeuvres : qu' il me die si

p671

ce sont fables que cela.
Or que nos sens, et nos raisons
nous deçoivent, je n' en veux que
mille, et mille experiences, qui se
voyent tous les jours, ce que la perspective,
la catoptrique, et la dioptique
enseignent assez en ce qui
est des objects, et des rayons de la
veuë : si nos raisons ne nous trompoient,
d' où viendroit qu' à peine
peut-on proposer aucune question
de philosophie, qu' il ne se
treuve diverses opinions toutes
contraires sur le mesme suject, lesquelles
ont toutes leurs raisons, et
neantmoins il n' y en a qu' une veritable.
Voyez je vous prie, lors
qu' on propose un affaire au conseil
des roys, ou mesme dans les
plus petites communautez, combien
il se rencontre de diverses
opinions, et de raisons contraires,

p672

il faut donc que quelques-uns
soient deceus, et que celuy, par
exemple, qui conclud la guerre, se
trompe, lors qu' elle apporte plus
de mal que la paix, et tout le contraire
de ce qu' il se promettoit
par ses raisons.
Les medecins font ils pas le
mesme, lors que nonobstant toutes
leurs raisons, et leurs consultations,
il arrive souvent tout le
contraire de ce qu' ils pensoient,
et font souvent mourir avec leurs
medecines, et leurs seignees ceux
lesquels eussent encore vescu plusieurs
annees.
Ozias nous a monstré par son
exemple combien nous sommes
sujets à estre deceus, lors qu' il ordonna
qu' on livreroit la ville de
Bethulie dans cinq jours, s' il ne venoit
du secours, se fiant par trop

p673

au conseil humain, et ne se confiant
pas assez en la misericorde
de Dieu, c' est pourquoy Judith reprit
ce conseil là fort aigrement.
Il ne faut donc pas que le deiste
treuve estrange, si nous disons que
nostre raison se trompe souvent,
puis que cela est tres-vray, et que
nous ne pouvons comprendre les
mysteres divins ; cela ne vient pas
de ce que la raison repugne à la
foy, mais de nostre foiblesse, car il
n' y a point de raison qui soit contraire
à la foy, puis que Dieu est
aussi bien autheur de l' une que de
l' autre. Je défie tous les deistes,
et tous les logiciens du monde de
pouvoir apporter une raison qui
s' oppose tellement à la foy, qu' on
ne puisse les accorder, et monstrer
que cette contrarieté est pretenduë,
et non veritable.

p674

Je croy que vous avez assez veu
par ce que nous avons dit cy devant,
que les raisons qu' ils nous
opposoient, comme forteresses
inébranslables, ne sont que
chimeres, et conceptions, ou conclusions
errantes dans quantité de
testes malfaites, et de cerveaux
mal timbrez. Vous voyez donc
que c' est fort mal à propos qu' il
nous reproche l' honneur que
nous rendons à Dieu, lors que
nous confessons ingenuëment
que ses oeuvres sont si excellentes,
que nous ne pouvons les entendre,
ou les penetrer, et que nous
protestons que nostre raison, pour
estre trop foible, ou mal deduite,
ne peut arriver à la verité des operations
divines ; ce que nous experimentons
tous les jours ; mais passons au
8 o quatrain, dans lequel il

p675

monstre qu' il est un second espiegle,
et un homme sans jugement
de comparer les chrestiens à ce
belistre : et ne se trompe pas moins
quand il dit que nous vomissons
des injures contre luy, car bien
que nous eussions toutes les raisons
du monde de le faire à cause
de son impieté, neantmoins vous
pouvez voir à nostre façon de proceder,
si on luy vomit des injures,
nonobstant celles qu' il dit contre
l' eglise catholique, que Dieu vengera
un jour ; ce qu' il auroit desja
fait, n' estoit qu' il attend ce miserable
poëte à resipiscence.
Mais voyons en quoy il nous
compare à cet Ulespiegle ; outre
les susdites injures il veut persuader
par sa rime, que la religion
chrestienne n' est point, non plus
que les tableaux de cet homme

p676

feint à plaisir, c' est pourquoy il
tasche à desraciner la creance de
la religion de l' esprit de ceux qui
ont embrassé la foy de Jesus Christ
nostre sauveur. Or c' est une injure
intollerable, et un blaspheme execrable
de comparer la religion
chrestienne à des brides à veaux,
car elle est la regle seule, unique, et
tres-parfaite de tous ceux, qui veulent
imiter la vie des anges, et qui
veulent se rendre semblables par
leurs sainctes actions au prototype,
d' où ils ont pris leur origine : la religion
est à l' ame ce qu' est l' ame
au corps, c' est elle qui ne nous peut
tromper, et nous empesche d' estre
seduits par les diverses caprices, et
par les fourbes des athees, et des
deistes.
Prenez garde à l' impieté qu' il
veut faire couler par ses sophismes,

p677

lors qu' il dit que les catholiques
desirent des personnes qui
soient des souches insensibles
pour leur faire embrasser la religion ;
ce qui est la plus grande imposture
qui fut jamais, car les plus
beaux esprits, et les plus judicieux
sont ceux qui se captivent à croire
ce qu' il a pleu à Dieu nous reveler,
voyans tresbien que leurs sentimens
sont trop bas, et trop ravallez
pour les suivre, et se laisser
conduire par eux en leurs actions :
aussi est-ce une chose beaucoup
plus excellente d' assujettir son esprit
à Dieu, et à ses inspirations,
que de le sous-mettre aux sens, et
aux objects exterieurs.
Je sçay qu' une legere cognoissance
de la philosophie peut porter
l' inclination à l' irreligion, mais
une plus forte teinture de la mesme

p678

science la peut aussi ramener,
et la reduire à la religion, si on penetre
plus avant ; c' est en quoy ce
rimeur s' est fourvoyé, car sous
pretexte qu' il sçait faire quelque
enthymeme, ou syllogisme, bien
qu' assez mal, et hors de propos, il
s' est efforcé de renverser le christianisme,
mais s' il eust esté plus
sçavant, il eust fait tout le contraire,
et se moqueroit de soy-mesme
detestant son ignorance, et sa bestise :
car son but est de ne suivre
rien que ses sentimens, croyant
qu' il à plus de lumiere de ce costé
là, que du costé de Dieu, et de la
religion.
Je vous proteste que j' ay grande
compassion de ce pauvre estourdy,
je voudrois avoir donné une
partie de mon sang, et qu' il quittât
son erreur ; je ne doute point

p679

qu' il n' ayt commis quelques
grands pechez, pour lesquels Dieu
la puny, et la laissé aller apres ses
concupiscences.
Pleust à Dieu qu' il r' entrast un
peu en soy-mesme, je vous conjure
de la part de Dieu, si vous retournez
à Paris, où vous m' avez
dit qu' il demeure, que vous luy representiez
le hazard qu' il court
d' estre damné avec tous les diables,
et que vous taschiez de desabuser
tous ceux que vous pourrez
decouvrir avoir esté perdus par
ses malheureuses opinions, et par
ses quatrains, qui contiennent autant
d' impietez que de vers, ou
peu s' en faut.
Or vous voyez clairement que
nous ne desirons pas des buches
insensibles, ny des veaux pour estre
catholiques, au contraire les

p680

plus beaux esprits qui embrassent
la raison, nous sont les meilleurs,
car ils advoüent incontinent que
la religion, et ce qu' elle enseigne,
est si relevé, si sainct, et si prisable,
qu' il surpasse la raison, non en la
destruisant, mais en la perfectionnant :
et puis vous voyez si je vous
ay traicté comme une souche insensible,
je vous en fais vous mesme
le juge.
Le D monsieur, je ne sçaurois
que dire la dessus, car vous
m' avez fermé la bouche à toutes
sortes d' objections, je suis parfaictement
content ; et vous respons
que je n' en demeureray pas là, car
si tost que je seray à Paris, ou je
veux s' il plaist à Dieu retourner
dans trois ou quatre mois, je m' en
iray le treuver, et s' il ne veut quitter
son impieté, je sçay le moyen

p681

de le faire prendre par la justice,
de laquelle il ne peut esperer que
le feu pour juste recompense de
son impieté : j' en sçay encore quelques-uns
de ce malheureux party,
lesquels je tascheray à ramener à
ce qui est de la verité selon qu' il
me sera possible.
Le Theol le 82 quatrain apporte
une autre comparaison d' une
nourrice, mais qui est aussi niaise
que les precedentes, et qui meriteroit
que ce rimailleur fust remis
au rang des enfans, pour estre
effrayé par le foüet, puis que la raison
ne luy sert de rien : or bien que
les predicateurs donnent de la terreur
aux meschans en leur proposant
les peines de l' enfer deuës aux
pechez, neantmoins ce n' est pas
pour les effrayer vainement, mais
pour leur faire quitter leurs mauvaises

p682

coustumes, et leur faire embrasser
la vertu : ce ne sont pas tant
les predicateurs, que Dieu mesme,
qui plante la crainte par sa
saincte parole dans nos ames, pour
nous faire quitter le mal.
Mais ce rimeur treuve mauvais
que Dieu nous vueille ranger sous
son diademe, car lors qu' il attribuë
cela aux catholiques, c' est afin
que son impieté se glisse plus finement,
ne s' osant attaquer à Dieu,
de peur de se rendre trop ridicule.
Les catholiques n' ont autre diademe
que l' honneur de Dieu, lequel
est leur coronne, et leur gloire ;
et lequel ils procurent en tout
ce qu' ils peuvent. C' est là leur but
et leur intention ; c' est leur estude,
et leur travail, s' ils sont tels qu' ils doivent estre.
Que ce poëte voye donc quel

p683

tort nous luy faisons, et si nous forlignons
de la droite raison, quand
nous taschons d' amener toutes
sortes de nations au service de
Dieu. S' il y a du mal dans un bon
chrestien, c' est celuy là ; il n' en faut
point chercher d' autre. Si l' impieté
ne luy silloit les yeux de l' esprit,
il confesseroit ingenuëment que
l' eglise catholique est une vraye
mere nourrice, laquelle nous allaicte
de la vraye doctrine qu' elle
a en depost, et ne tourneroit jamais
une si grande verité en risee ; mais
Dieu le sçaura bien treuver, et luy
fera ressentir tost, ou tard les peines
deuës à son impieté, par laquelle
il conclud au dernier quatrain,
que toutes les raisons que
fournit la theologie en faveur de
la foy catholique, ne peuvent faire

p684

peur qu' aux sots, et aux ignorans.
Je vous asseure que celuy-la seroit
bien sot, et bien ignorant,
qui se laisseroit persuader par ce
rimailleur, et meriteroit qu' on
l' emprisonnast au fond de l' Arcadie,
s' il avoit les oreilles si longues,
et si grandes que ces blasphemes,
et ces impietez, aiguës en subtilité
comme une boule, luy peussent
entrer dans l' esprit.
Il faut aussi que vous remarquiez
l' impudence de cet homme,
qui s' estime tout seul plus capable,
que tous les apostres, que
tous les saincts, que tous les docteurs,
que tous les chrestiens,
que tous les patriarches, et prophetes,
qui ont esté depuis le commencement du monde jusques à
present, et qui ont tousjours provigné

p685

la foy, et la religion qu' ils avoient
receuë de Dieu ; bref il se
fait plus sage, et plus clair-voyant
que Jesus Christ mesme, lequel il
accuse de nous avoir embeguinez
d' une fausse creance, car c' est
vrayement de luy que nous tenons
la religion, c' est par luy, que
nous esperons d' estre sauvez, bref
c' est celuy là par qui le monde a
esté fait, (...), et par qui le
malheureux deiste subsiste en
son estre, et en ses actions.
ô Dieu ! Est-il possible que vous
permettiés qu' un si meschant homme
vive sur la terre, et qu' il donne sujet
d' un tel scandale à vos enfans !
Jusques à quand attendez vous à
le punir ? Sa mesure est-elle pas encore
pleine ? N' a-il pas encore assez
fait de mal ? Faites luy s' il vous plait

p686

la grace de se convertir à vous, et
de quitter tout à fait son erreur,
afin qu' il desabuse ceux qu' il a
pervertis, et de l' embeguinement
qui l' emprisonne emmy si grandes
impietez, transportez-le à une
vive foy, et à une clarté d' esprit, qui
luy fasse sentir, advoüer, recognoistre,
et publier à tout le monde,
qu' il a esté grandement deceu jusques
à present, ou plustost tres-pernicieux,
et tres-meschant.
CHAPITRE 23


p687

dans lequel les penitences, que font les
chrestiens en se chastiant, par diverses
austeritez du corps, sont deffenduës
contre les objections des deistes :
et auquel est prouvé qu' elles sont
fort agreables à Dieu, et leurs quatrains
sont refutez depuis le 84, jusques
au 89. 
Le Theologien
voyez s' il y a encore quelque
chose dans ce poëme,
qui vous fasse de la peine,
afin que nous achevions promptement,
car sa longueur commence
à m' ennuyer.
Le D il reste encore vingt-trois

p688

quatrains, ausquels je desirerois
fort que vous eussiez respondu, car
ils ont esté cause que jusques à
present je me suis addonné à toutes
sortes de plaisirs, quand j' ay
peu les prendre sans crainte de
chastiment ; si bien que vous redoublerez
l' obligation que je
vous ay desja (si toutesfois une infinie
obligation se peut redoubler)
quand vous aurez monstré
l' erreur des quatrains suivans.
Le Theol je ne veux pas vous
refuser, puis que nous sommes si
pres de la fin, et que je voy que cela
vous affermira davantage dans
la religion catholique, laquelle ce
maudit deiste, et libertin malheureux
s' est efforcé de ruiner par
son poëme ; poursuivez donc s' il
vous plaist.

p689

Le Deiste
quant à ceux que l' on voit se battre et tourmenter,
afin de se punir des deffauts de leur vie,
où treuvent-ils que Dieu se puisse delecter
en l' agitation d' une telle folie.
Si par devant un juge un voleur ne sçauroit
se purger de son crime en punissant soy-mesme,
pourquoy veut le bigot que Dieu en cet endroit
donne ce privilege à la sottise humaine ?
Se mocqueroit-on pas de voir un malfaicteur
de juge, et de partie entreprenant la charge,
de sa propre sentence estre l' executeur,
et en representer l' acte, et le personnage ?
Avons nous pas assez de naturels malheurs
sans nous en inventer ? Est-il rien plus inique
que de nous procurer de nouvelles douleurs,
ny qui ressente plus une ame frenetique ?
Si Dieu veut envers nous user de chastiment
par des esprits malins bourreaux de sa justice,
pourquoy veulent ceux-cy usurper folement
de Dieu l' authorité, et de ceux-là l' office ?

p690

Le D j' ay voulu rapporter ces
5 quatrains tous ensemble, parce
qu' ils buttent à mesme fin, comme
vous voyez, afin que vous
n' eussiez point la peine de rebattre
plusieurs fois une mesme matiere.
Le Theol vous avez bien
fait ; mais commençons un peu à
taster le poux à ce deiste, lequel
n' en diroit pas davantage, s' il avoit
esté gagé pour plaider la cause de
ceux qui ont la peau trop delicate,
le courage trop mol, et qui font
un paradis des delices de ce monde :
croyez que les penitences ne luy
ont pas fait beaucoup de mal, car
il s' en esloigne merveilleusement,
et afin qu' un chacun les fuye, les
haysse, et les ait en horreur, il tasche
de convaincre l' esprit, ou plustost
le sens par ses raisons. Voyons

p691

les un peu : la premiere est qu' on
ne treuve point que Dieu se delecte
en cette agitation, qui se fait
en se frappant, et en se macerant,
lors qu' on veut appaiser l' ire de
Dieu par penitence : la seconde,
que ce n' est pas à faire à un criminel
de se punir soy-mesme ; et qu' il
ne peut estre juge, partie, et bourreau
tout ensemble : la troisiesme,
que nous n' avons que trop de
malheurs sans nous en procurer
de nouveaux, autrement que c' est
estre frenetique, et meschant : la
derniere, que c' est usurper l' authorité
de Dieu, et l' office des diables ;
c' est donc à ces raisonnettes qu' il
faut respondre.
Quand à la premiere il est bien
aysé de monstrer que Dieu se
plaist à la peine, et aux douleurs,
que nous endurons pour luy, ou

p692

pour ce qui luy appartient, car en
cela nous nous esprouvons nous
mesmes, afin de voir si nous l' aymons
comme il faut ; et nous nous
preparons en quelque façon au
martyre, les penitences que nous
faisons pour cet effet de nos propres
mouvemens, estant comme
les preludes du martyre, si jamais
il se presente.
Or sus je vous veux faire paroistre
que l' affliction du corps qu' on
endure volontairement, est fort
agreable à Dieu, de sorte neantmoins
que je ne veux pas rapporter
tous les passages de l' escriture
saincte, qui monstrent cela evidemment.
Je me contenteray de
l' exemple de Daniel, lequel pour
se rendre agreable à Dieu, se mit
à jeusner, et à coucher sur la cendre,
et se couvrit d' un cilice, ce qui

p693

luy reüssit si heureusement que
Dieu luy envoya un ange pour
l' asseurer que tout le peuple seroit
delivré ; si vous en voulez voir tout
le narré, vous aurez un grand plaisir
de lire le neufiesme chapitre de
Daniel.
Ceux de Ninive ont fait assez
paroistre combien les peines du
corps, et les afflictions volontaires
sont agreables à la divine majesté,
car si tost qu' ils eurent affligé
leurs corps par jeusnes, et par
cilices, Dieu leur pardonna, nonobstant
que Jonas en fust mescontent,
pensant que sa prophetie avoit
manqué. Sainct Paul nous
fournit un passage parlant de soy-mesme
dans la premiere epist. Aux
corinthiens, chapitre 4 qui peut
fermer la bouche à vostre poëte,
et à tous les libertins, lors qu' il dit,

p694

(...). Il n' est pas besoin
de s' arrester beaucoup sur
chaque passage, car tout le nouveau
testament enseigne cette
verité, et nostre Seigneur en Sainct
Mathieu chapitre 16 nous y convie,
si nous voulons le suivre, (...) ;
or il n' y a point de doute
que les peines, et les douleurs, qu' il
a endurees tant en sa flagellation,
que quand on le couronna d' espines,
et ailleurs, ont esté sa croix ;
et par consequent si on veut le suivre,
il est certain qu' on fait fort
bien de l' imiter en ce qu' il a enduré

p695

pour nous ; ce qui a fait dire à
l' apostre escrivant aux galates
chapitre 5 (...) : c' est pourquoy
celuy-là qui sera couvert de meurtrisseures
pour l' amour qu' il porte
à Jesus-Christ, pourra bien dire
avec Sainct Paul : (...) : car les
peines que nous endurons, et que
nous nous donnons volontairement
pour imiter Jesus Christ en ses
tourmens, font que nous nous
marquons de sa livree, selon l' advertissement
de Sainct Pierre en sa
premiere epistre chapitre 4 (...). Voyla les armes
de la passion que Sainct Pierre veut

p696

que nous ayons dans la pensee, et
par consequent à la main, puis que
la pensee doit servir pour venir à
la pratique. Ce qui est encore plus
exprez au deuxiesme chapitre, lors qu' il dit, (...).
Pleust à Dieu que cette verité
fust entree si avant dans l' esprit de
vostre poëte, que de railleur qu' il
est, il devint si bon penitent, qu' il
ne se passast jour en sa vie, qu' il ne
fist une rude penitence pour l' expiation
de ses pechez, je vous asseure
que cela luy seroit fort necessaire,
et luy conseillerois volontiers,
que s' il n' a assez de courage,
de force, ou de resolution pour
se punir soy-mesme selon la grandeur
de ses offenses, qu' il prenne
avec luy quelque bon serviteur,

p697

s' il a moyen de le nourrir, ou quelque
amy qui luy puisse faire ce
bon office, le traittant en criminel
de leze majesté divine sans l' espargner
en aucune façon.
Mais apres l' escriture saincte,
il faut apporter quelques raisons,
puis que ceux de vostre secte s' efforcent
de persuader que c' est sans
raison, que les chrestiens s' affligent
le corps, et crucifient leurs
membres pour les rendre conformes
au corps de Jesus-Christ. La
premiere sera donc prise de ce
qu' il n' y a rien plus honorable à
un soldat, que d' imiter les proüesses
de son capitaine, or les catholiques
ont Jesus Christ pour leur
chef, sous lequel, et par la conduite
duquel ils bataillent, ils ne peuvent
donc rien faire de plus genereux
que de se couvrir de douleurs, d' afflictions,

p698

et de pauvreté pour l' amour
de celuy, qui a tant enduré
pour eux.
La seconde est parce qu' un homme
soigneux de la vertu doit prendre
garde que la partie inferieure,
sçavoir est le corps avec ses inclinations,
et ses appetits, ne surmonte
la partie superieure, et fasse la
loy à la raison ; qui est la plus grande
confusion, qui puisse arriver au
microcosme ; or la peine qu' on
donne au corps pour rabattre ses
mouvemens, et le tenir en bride
comme un cheval fort en bouche,
sert pour empescher qu' il n' abbate
l' esprit, et ne se rende le maistre
de l' homme, au lieu qu' il doit estre
le serviteur.
La troisiesme est qu' il est bien
raisonnable que ceux qui ont offensé
Dieu par la volupté du

p699

corps, fassent faire amande honorable
à ce corps mesme, afin que (...) : c' est
ainsi que Dieu, que la nature, et la
raison l' ont ordonné. C' est en ceste
façon qu' on satisfait à la justice
divine à beaucoup meilleur prix,
et plus viste que quand on est en
purgatoire, à cause que les peines
qui sont icy libres, et volontaires,
ont beaucoup plus de pouvoir,
que les autres qui sont necessaires,
et contraintes.
La quatriesme est par ce que
pour une legere peine que nous
nous donnons icy pour l' amour
de Dieu, et pour nous rendre conformes
à son fils nostre sauveur,
nous recevrons une recompense
eternelle en paradis. Je laisse plusieurs

p700

autres raisons, telles que
sont celles-cy ; que par ce moyen nous
venons facilement au mespris des
delices, et delicatesses du monde ;
que nous supportons plus facilement
les peines, et adversitez, qui
nous arrivent apres : que nous
pouvons ayder les ames detenuës
en purgatoire par ce sainct exercice
de penitence : que nous augmentons
le thresor des penitences,
et des satisfactions, lesquelles
se retreuvent dedans l' eglise catholique.
Il faut maintenant respondre
aux objections de vostre poëte,
car c' est par icelles qu' il veut persuader
ses erreurs. Pour la premiere
nous l' avons desja refutee en
monstrant que Dieu a pour agreable
telles punitions, et penitences
volontaires ; j' adjousteray neantmoins

p701

qu' il ne peut estre desagreable
à l' autheur de la nature de voir
que ses creatures s' employent à
des exercices, par lesquels elles desireroient
de tout leur pouvoir
luy rendre actions de graces, et luy
offrir chose, qui recompensast le
present de l' estre, et de tout ce que
nous sommes : de sorte que tout ce
que feront les creatures raisonnables
pour cet effect, sera estimé
partir d' une bienveillance, et de
l' action de graces, que nous taschons
de rendre à l' eternel, or les
peines que nous endurons volontairement,
et dont il est question,
sont tesmoignages de nostre soumission,
et bienveillance envers
Dieu, car nous voulons monstrer
par là, que nous luy appartenons
tant en ce qui est du corps, qu' en
ce qui est de l' ame ; voicy comment :

p702

lors que nous avons commis
quelque peché, duquel la conscience,
et la lumiere de la raison
nous reprend, nous voyons incontinent
que la mauvaise inclination
de la nature corporelle a emporté
le dessus sur la raison, et que
le commandement de Dieu a esté
enfraint par ceste action, et pour
monstrer le desplaisir que nous avons
de nos offenses, parce qu' elles
s' opposent au vouloir de Dieu,
nous affligeons nos miserables
corps, particulierement lors que
le peché s' est fait par la volupté d' iceluy,
afin que nous luy apprenions
par experience, puis qu' il
n' a point de raison, combien c' est
une chose abominable, et meschante
de quitter les commandements
du createur pour une chetive

p703

volupté, qu' on prend en l' offensant.
Et en ceste façon nous reparons
tant que nous pouvons l' honneur
deu à Dieu ; du moins nous
tesmoignons que l' action mauvaise
nous a esté fort desagreable,
puis que nous nous chastions
nous-mesmes ; et que le corps doit
s' employer à recognoistre son
createur ; les marques de recognoissance
sont les peines, et les
tourmens que nous luy faisons
souffrir pour l' assujetir à la raison,
et le soumettre à Dieu : ce qui est
tres-juste, puis qu' il ne depend pas
moins de Dieu, que nos ames.
Si ce n' est que vous pensiez
qu' il soit injuste qu' un maistre
chastie son serviteur, lors qu' il
luy a desobey ; si ce n' est qu' un pere
ne fasse pas bien en corrigeant

p704

son fils quand il a manqué à son
devoir ; ou que le capitaine doive
estre blasmé, lors qu' il fait subir
au soldat, qui a desrobé, la peine
deuë à un tel delit ; car la raison
est la maistresse, le pere, le capitaine,
et le chef au regard de son
propre corps ; mais cela est trop
clair, passons à la seconde raison,
par laquelle il nie qu' on puisse estre
son juge, sa partie, et le bourreau
de soy-mesme.
Pourquoy non ? Les payens mesmes
n' ont ils pas pratiqué cela, lors
qu' ils ont fait rendre conte tres-exact
à leur ame de ce qu' ils avoient
fait toute la journee ? Voyez
Seneque le philosophe, et Epictete,
vous m' advoürés que beaucoup
de grands personnages, qui n' avoient
que la lumiere de la raison
pour leur guide, et leur fanal, se

p705

sont donné beaucoup de peine
tant par leurs abstinences, que par
d' autres privations de volupté, telles
que sont les veilles, et le coucher
sur la dure, afin de domter les
vicieuses inclinations de leur naturel,
et d' acquerir la vertu.
La raison pourquoy une mesme
personne peut estre juge, et
partie, accusateur, tesmoing, et
bourreau est par ce qu' il nous appartient
de sindiquer nos propres
actions, puis que nous devons avoir
soing de nous-mesmes, et que
nous sommes composez de deux
parties, sçavoir est de l' ame, et du
corps, de l' appetit superieur, et de
l' inferieur, de l' homme interieur,
et de l' exterieur, de la partie raisonnable,
et de la brutale ; or puis
que la loy naturelle, et la divine
nous obligent de rendre l' appetit

p706

inferieur suject à la raison, c' est à
nous d' aviser, et de pratiquer les
moyens, qui nous peuvent servir
à cela, entre lesquels, sans doute,
sont ceux là, qui domtent la rebellion
de la chair, et de ses concupiscences,
et appetits dereglez, et qui
luy font vivement ressentir que
ce n' est pas en la volupté du corps
que consiste nostre souverain
bien.
De là vient que nous honorons
Dieu par ceste consideration, d' autant
que nous recognoissons par
les peines, desquelles nous chastions
nostre corps, et par toutes
les autres voluptez, desquelles
nous nous privons volontairement,
que ce n' est pas dans les plaisirs de
ce monde que nous mettons nostre
beatitude, mais en Dieu seul :
et que nous aymons beaucoup

p707

mieux perdre tout le reste, que
d' estre frustrez de nos esperances,
qui nous font attendre le sejour
des bien-heureux.
Voyla donc pourquoy la raison
fait l' office de rapporteur, et de
conseiller pour adviser qu' elle
peine il faut que souffre le corps,
et l' appetit brutal, qu' elle a sous sa
charge, et en sa curatelle, apres l' avoir
convaincu d' avoir esté rebelle
à l' esprit, et de n' avoir suivy la droite
raison ; et puis l' ayant condamné
à endurer cecy, ou cela, elle
prend elle mesme les armes à la
main, et le punit comme il faut,
jusques à ce qu' elle voye que c' est
assez.
C' est ainsi qu' il est permis, et
grandement loüable non seulement
à un chrestien, mais à tout
homme tant barbare, tant docte,

p708

tant riche, pauvre, fort, ou foible
qu' il soit, de se punir apres avoir
contrevenu à la loy de nature, laquelle
est gravee dedans nostre
esprit : et sçay que jamais homme
de bon jugement ne reprendra ceste
procedure, pourveu qu' il se
donne le loisir d' en considerer la
raison, la justice, et l' utilité.
Venons à la troisiesme raison
du deiste, qui est, que c' est estre
frenetique de se procureur de
nouveaux malheurs apres un si
grand nombre, qui nous tallonnent
tousjours ; je croy qu' il ne deviendra
pas frenetique en ceste
façon, car il a fait une trop estroite
alliance avec les plaisirs. Or vous
voyez qu' il choppe des l' entree,
car les tourmens que nous embrassons,
ne nous sont pas des
malheurs, au contraire ils nous

p709

servent comme d' entree au bonheur,
si le bon-heur d' icy bas s' aquiert
par la vertu, et par le mespris
des voluptez ; et si celuy de paradis
s' aquiert par l' amour, et par
le tesmoignage d' amour, que
nous portons à Dieu, à la vertu, et
à tout ce qui plaist à Dieu.
Il faut donc que ce rimeur oste
de sa caprice, et de ses quatrains,
que ce que nous endurons de bon
coeur pour l' amour de Dieu, et de
la justice, nous soyent des malheurs ;
s' il se fust souvenu que jamais
un malheur n' arrive que contre
nostre volonté, et lors qu' il
nous fait perdre un plus grand
bien que celuy qu' il nous apporte,
il ne se fust pas égarré en si beau chemin.
Disons donc qu' il ne peut arriver
un plus grand heur à un homme

p710

dans ce monde icy, que quand il
a tellement combattu son appetit
dereglé, et rendu son corps soupple,
et soubmis à la raison, et à la
loy de Dieu, qu' il ne sent plus aucune
rebellion, ny contrarieté
dans soy-mesme, et que l' esprit, et
le corps s' unissent parfaitement
pour obeyr à Dieu, et pour embrasser
solidement la vertu. Encore
ne voudrois-je pas luy accorder
que ce qui nous arrive contre nostre
gré, fust un malheur, bien que
nous en recevions un dommage
notable, car nous en pouvons faire
nostre profit, et pouvons tirer
de la force de ce desavantage, pour
nous roidir plus fort contre les accidens
de cette vie, et accroistre les
constance, et la valeur, laquelle est
necessaire à un bon chrestien
pour vaincre les assauts du diable,

p711

du monde, et de la chair.
J' estime que ces raisons vous
ont satisfait ; mais je veux respondre
par les quatrains suivans au 87
quatrain de vostre poëte.
ce n' est donc augmenter nos naturels malheurs
comme va presumant le discours deistique
que de nous procurer ces heureuses douleurs,
et rien ne ressent moins une ame frenetique.
car les tourmens par nous volontiers embrassez
ne sont pas des malheurs ; non, malheurs je
n' appelle
que les seuls maux desquels nous sommes oppressez
contre la volonté qui s' y treuve rebelle.
l' amour qui nous agite, et les fervens desirs
de pouvoir obtenir la vie souveraine,
font qu' en tous ces travaux nous trouvons des
plaisirs.
et que nous rencontrons le repos dans la peine.
ce qui nous fait avoir de tous biens le meilleur,
l' appellerons nous mal ? Nommerons nous misere,
ou malheur ce qui cause un souverain bonheur ?
pour qui toute souffrance est icy bas legere. 

p712

Le D pleust à Dieu qu' il vous
souvint de tous les autres quatrains,
afin de me les donner pour
rembarrer le poëme, lequel m' a
perverty avec sa maudite poësie,
car je treuve que ceux-cy sont plus
forts, et remplis de meilleures raisons
que les siens, pourveu que
tous les autres soyent de mesme.
Veritablement je m' estimerois
heureux, s' il vous plaisoit me donner
ce poëme.
Le Theol vous sçavez que je
ne prens pas plaisir à me détourner
de nostre suject jusques à ce
que nous ayons achevé, c' est pourquoy
je vous prie d' attendre à la
fin de nostre discours, je vous promets
que je vous le donneray
pour vostre consolation, afin qu' il
puisse servir d' antidote aux rimes
de vostre poëte. Mais quittons ce

p713

87 quatrain, car ce n' est pas là, où
il met la force de son objection.
La derniere raison qu' il apporte,
semble nous rendre plus insolens
que ceux qui vouloient escalader
le ciel en mettant Ossa sur
Pelion, ou en batissant la tour de
Babel, car il dit que celuy qui se
chastie, usurpe l' autorité divine.
Vrayement cette conception me
plaist fort, puis que nous la pouvons
prendre pour nous, et guarir
la playe par le mesme scorpion,
qui l' avoit faite. Il est vray, c' est
sous l' autorité de Dieu, que nous
tourmentons nostre corps, car sans
doute Dieu nous donnant la raison
pour guide, et maistresse de nos
actions, il luy a donné quant et
quant l' autorité de faire tout ce
qui estoit necessaire, afin que le
corps obeyt à la loy de l' esprit ; de

p714

mesme que le roy donne la puissance
au premier president, et aux
autres juges de faire tout ce qui est
necessaire pour punir les coupables,
et faire que ses ordonnances
soyent gardees en son royaume.
Mais il n' est pas vray que nous
usurpions cette autorité, puis que
Dieu nous donne cette puissance,
si bien que nous en sommes en
possession legitime malgré les voluptueux
deistes, qui ne cherchent
qu' à assouvir leurs appetits brutaux,
et sensuels, quelque protestation
qu' ils fassent és compagnies
esquelles ils ont peur d' estre recognus,
ou repris.
Pour ce qui est de l' office des
diables, il n' est pas besoin de nous
mettre beaucoup en peine de luy
respondre sur ce suject, puis qu' il
ne croit pas qu' il y en ait, toutes-fois

p715

puis qu' il est tres-vray, qu' il y
en a, et que vrayement ils tourmentent
les damnez, ou que du
moins ils les accompagnent dans
leur supplice, je luy respons que
ces malins esprits ne nous punissent
pas pour nous amender, ou
pour nous faire profiter à la vertu,
mais plustost pour nous faire desesperer,
et quitter toute sorte
d' honneur, et de respect deu à
Dieu, si bien que c' est fort mal à
propos de dire que celuy qui fait
penitence, usurpe l' office des demons,
qui ne fuyent, et ne hayssent
rien tant que la penitence. Il
me semble, qu' il n' y a deiste au
monde qui ne se doive contenter
de ses responces ; voyez neantmoins
si vous avez encore quelque
difficulté sur ce suject.
Le D je n' ay point d' autre dificulté,

p716

sinon qu' il semble qu' on
puisse conclurre de ce que vous
avez dit cy-dessus, qu' il est permis,
et loüable de se tuer soy-mesme,
ou de se faire tuer, car puis qu' on
peut s' affliger, et se macerer le
corps pour l' expiation de nos pechez,
et pour les autres raisons que
vous avez deduites, pourquoy est-ce
qu' on ne se pourra pas mettre
à mort pour les mesmes raisons ? Ce
qui me semble fort estrange, car
l' autheur de la nature ne peut pas
prendre plaisir à la destruction de
la mesme nature.
Le Theol il ne s' ensuit pas de
ce que j' ay dit, qu' on se puisse oster
la vie, d' autant que le pouvoir que
Dieu nous a donné sur nous mesmes,
est oeconomique, et tel que
d' un pere de famille sur ses enfans,
ou d' un maistre sur ses disciples,

p717

ou sur ses serviteurs, desquels le
pouvoir n' a autre but que le bien
de celuy qu' ils chastient, sans interest
de la vie, dont la seule authorité
publique peut disposer. Nostre
corps n' est pas moins à nous
que nostre ame ; il faut conserver
l' un, et l' autre, et faire en telle façon
que la partie la plus noble
commande à la plus basse : c' est
pourquoy nos penitences doivent
tellement estre reglees, que les
operations de la partie spirituelle
n' en ressentent nul detriment,
mais plustost qu' elles en soient
aydees, et que les sentimens suivent
tout ce que voudra la raison,
afin que le corps devienne en
quelque façon spirituel, entant
qu' il fuira les actions brutales ne
s' addonnant qu' à celles, qui seront
necessaires pour cooperer avec

p718

l' esprit, qui porte la ressemblance,
et l' image de Dieu.
Il n' est pas besoin que je m' estende
davantage sur ce suject, car
la raison naturelle nous fait assez
voir qu' il ne nous est pas permis
de défaire ce qui n' a pas esté fait
par nous, ny par aucun qui depende
de nous, tel qu' est nostre corps
vivant, qui appartient à Dieu, aussi
bien que l' ame, à laquelle il doit
servir d' eschele, et de moyen pour
se perfectionner, et se disposer à la
gloire eternelle, de laquelle ils
jouyront tous deux ensemble, s' ils
gardent une mutuelle intelligence,
et s' ils s' entr' aydent à servir, et
honorer leur createur.
Le D il faudroit estre bien insensé,
si on ne quittoit ces maudites
erreurs, apres avoir entendu
les raisons pour lesquelles les bons

p719

chrestiens s' affligent ; pour moy je
ne doute nullement que nostre
poëte ne soit fort ignorant, ou malicieux
de combattre ceste saincte
coustume, qui est si bien appuyee.
Pleust à Dieu que toutes vos responces
fussent par escrit, je me ferois
fort de les luy envoyer, et d' en
retenir une coppie par devers
moy pour desabuser ceux qui sont
tombez dans le mesme labyrinte
que moy ; s' il vous plaist prendre la
peine de les reduire par escrit,
quand nous serons arrivez à l' hostellerie,
j' escriray aussi tout le
poëme, afin que l' impieté qu' il
contient soit estouffee, et renversee
par vos responces, et par vos
raisons.
Le Theol monsieur, nous
verrons quand nous y serons arrivez :
si la commodité me le permet,

p720

je vous donneray ce contentement,
si je treuve que le discours
que nous avons eu par ensemble,
soit utile au public, car comme il y
a de malheureux esprits, qui tournent
les plus douces liqueurs en
poison, il faut prendre garde
qu' en pensant estoufer le mal, il
ne s' accroisse davantage.
Le D monsieur, vous pouvez
asseurement quitter ceste peur,
car j' ay souvent apperçeu lors que
j' estois le plus enfoncé dans ces
erreurs, que quand on en a descouvert
quelqu' un, tout aussi tost
qu' il a commencé a s' esventer,
nous avons aussi tost commencé à
le quitter, et à nous jetter dans
quelque autre, demeurans tous
estonnez, et comme estourdis.
Je ne sçache rien qui ait tant de
force pour retenir dans l' aveuglement,

p721

et dans l' erreur ceux qui y
sont entrez par des voyes secrettes,
et par des papiers courant sous
main entre les confidens, que de
n' eventer point le secret, et l' impieté,
car cependant que j' ay tenu ce
poëme caché, et que j' ay creu qu' il
n' y avoit que peu de gens curieux,
qui en eussent la cognoissance,
j' ay esté si presomptueux, et si arrogant,
que je n' estimois personne
capable de mon entretien, ny
qui eust un bel esprit, que ceux qui
suivoient, comme moy, la doctrine
de ce poëme ; mais aussi tost
que je vous l' ay découvert, il me
paroist maintenant si sot, et si brutal,
que je ne l' estime digne d' autre
chose que du feu, non plus que son
auteur. Je ne doute pas qu' il n' en
arrive autant à tous ceux qui verront
vos responses, de sorte que je

p722

ne croy point qu' il puisse arriver
un plus grand bien pour desabuser
tous ceux qui sont de cette cabale,
que de faire voir le jour à ce
discours.
Le Theol nous adviserons à
cela avec plus de loisir, quand
nous serons à la fin, cependant
poursuivez le reste de ces quatrains,
afin que nous couppions
toutes les testes de cet hydre.
CHAPITRE 24


p723

dans lequel les quatrains des deistes
sont renversez depuis le 89 jusques
au 101 : et est monstré que les chrestiens
ne servent pas Dieu par hypocrisie :
que les religieux ne sont pas
oyseux, et qu' il est bon de s' abstenir
de beaucoup de choses pour l' amour
de Dieu. 
Le Deiste
ils sont hors du sens de se feindre la pieté,
et d' en faire une comedie, de nous masquer
Dieu, et de se moquer de nostre aveuglement.
Puis qu' ils se moqueroient d' un respect
controuvé par les ignorans, pourquoy ferons
nous conte du leur envers Dieu ?
Ils tournent les yeux au ciel enflez de vanité,

p724

sur laquelle leur vertu est fondée, et sont
si impudens qu' ils parlent plus irreveremment
de Dieu, que du moindre du monde.
N' importe point à Dieu qu' ils quittent les
faveurs qu' il leur fait, car ils font cela pour user
en oysiveté des douceurs, ausquelles leur appetit
les porte davantage.
Le Theologien
tous ces quatrains icy ne sont
que calomnies, et impostures, car
tout cela est tres-faux ; commençons
à le monstrer par le premier,
où il dit que nous faisons une comedie
de la pieté, comme si nous
croyions le contraire de ce que
nous disons, ou de ce que nous
faisons, et qu' en nostre ame nous

p725

creussions qu' il n' y auroit point
de Dieu ; c' est là le sublimé de la
malice des athees, et des deistes,
lesquels taschent de persuader à
ceux qu' ils treuvent disposez à leurs
erreurs, que les catholiques sçavans
croyent tout au rebours de
ce qu' ils preschent, ou de ce qu' ils
font : car voyant que les predicateurs
decreditent entierement
leurs opinions erronees, et profanes
tant par la vive force de leurs
discours, que par le bon exemple
de leur vie, ils veulent qu' on croye
que tous les beaux esprits sont de
leur advis.
Il ne faut donc point de response
à ce 89 quatrain, c' est assez de le
nier tout à fait, car il n' est pas veritable
qu' aucun chrestien estime,
et croye autrement qu' il ne dit,
ou qu' il ne fait : il ne monstre rien

p726

par ses oeuvres, ny par ses discours,
qu' il n' ait au coeur, estant fidele, et
sincere en sa devotion, et en tout
ce qui appartient à la pieté, sans
aucune feinte, ou hypocrisie, quoy
que ce rimailleur bouphon s' efforce
de tourner tout ce qui est
de plus sainct en raillerie, et en comedie.
Le chrestien est bien esloigné
de se moquer de ceux qui
croyent en Dieu, et en Jesus Christ
son fils unique, et qui suivent tout
ce que commande l' eglise catholique,
car il est grandement fasché
de voir des personnes si meschantes,
qu' elles se moquent de tout
ce qui appartient au service divin,
et qui veulent faire à croire, que
ceux qui servent Dieu de tout leur
coeur, ne le font que par un semblant,
par feinte, et par hypocrisie.
Asseurez vous que c' est là la plus

p727

grande fourbe, qui fut jamais : et
vous proteste que je suis prest de
mourir pour cette verité, sçavoir
est que tous les vrays chrestiens
disent, et font serieusement tout
ce qui appartient à la religion,
comme ils le croyent ; et n' y a pas
un seul parfait chrestien, qui ne
soit disposé à mourir pour la deffense
de la mesme verité, sçachant
par la certitude de la foy divine,
qu' il est aussi veritable que la religion
catholique est la vraye, et
unique, laquelle Dieu approuve,
en laquelle il se plaist, et laquelle
Jesus Christ fils de Dieu vivant a
plantee par son sang, par ses miracles,
et par ses predications, comme
il est veritable que Dieu est,
car il n' y a que Dieu seul, qui puisse
faire les merveilles qui ont esté
faites en toutes sortes de façons,

p728

pour tesmoigner la bonté, et la verité
de nostre religion.
Je demanderois volontiers à ce
malheureux deiste, s' il estime que
ce soient feintes, ou hypocrisies
que les supplices des martyrs, les
austeritez des confesseurs, la chasteté
des vierges, pour laquelle
elles sont mortes si courageusement :
le travail des docteurs, tels
que sont Sainct Hierosme, Sainct
Augustin, Sainct Chrysostome, et
mille autres, qui ont usé leur vie à
la gloire de Dieu, s' abstenant des
plaisirs de ce monde : je laisse la nudité
des capucins parmy le froid,
la solitude des chartreux, et la
constance des jesuistes au martyr,
la pluspart desquels avoient esté
nourris dans les delices chez leurs
parens, et qui pouvoient se reposer
à leur ayse, et se donner du bon

p729

temps, lesquels neantmoins ont
preferé l' amour de Dieu, et le zele
de la religion catholique à tout
cela. Je n' ay pas peur que vostre
poëte les puisse accuser d' ignorance,
de legereté, ou de malice,
car leur suffisance, leur doctrine,
leur preud' homie, leur constance,
et la saincteté de leur vie font assez
paroistre qu' ils sont hors de
tout soupçon ; s' il ose dire le contraire,
tous les hommes de bon
jugement, et tous ceux qui ont
l' esprit bien fait, s' esleveront contre
luy, et tesmoigneront qu' il a la
cervelle renversee, et qu' il est indigne
de vivre parmy les hommes.
Pour ce qui est du 90 quatrain,
à peine sçauroit on deviner ce
qu' il veut dire, si ce n' est qu' il
vueille comparer l' honneur que

p730

nous portons à Dieu, et la façon,
par laquelle nous servons à sa gloire,
et à la grandeur de sa majesté,
à quelques façons de vivre, et de
croire, que quelques idiots auroient
controuvees, et establies
par leur ignorance ; et par consequent
comme nous nous moquerions
de ce respect, aussi les deistes
s' offencent du respect que
nous portons, et maintenons sur
peine de nostre vie, qu' un chacun
doit porter à Dieu, et taschent de
persuader à leurs confidens qu' un
chacun se doit offenser des façons,
dont l' eglise catholique se sert,
pour monstrer le respect qu' il faut
porter à Dieu.
Mais cecy n' est que la mesme
chanson repetee du quatrain precedent,
car il est impossible que la
religion chrestienne soit une
chose controuvee, autrement

p731

Dieu ne l' eust jamais approuvée
par tant de miracles, comme il a
fait ; et puis il n' y a chose aucune
en toute nostre religion, qui
ne soit bonne, saincte, et raisonnable ;
qui ne conduise à la vertu, et à l' horreur
du vice ; si bien que s' il estoit
possible qu' elle eust esté treuvee
par les hommes, et que Dieu ne
l' eust pas instituee, encore faudroit-il
la retenir, puis qu' il est
impossible d' en avoir une meilleure,
comme je pourrois monstrer
par toutes ses parties, et par
tous ses axiomes ; je défie qui que
ce soit de me pouvoir objecter une
seule chose dans toute nostre religion,
qui ne soit conforme à la raison,
à l' equité, à l' honnesteté, à la
vertu, et à Dieu mesme, qui est honoré
par toutes, et chacunes des
actions du vray chrestien, et du fidelle
catholique.

p732

Le quatrain nonante-uniesme
ne butte qu' à faire croire que les
chrestiens n' ont autre chose que
vanité dans la teste, lors qu' ils eslevent
les yeux au ciel, ce qui est
aussi faux, comme ce qu' il a dit au
precedent, car en ces élevations il
tesmoigne qu' il n' attend son secours,
et la gloire eternelle que de
Dieu createur du ciel, et de la terre.
Pour l' impudence, dont il nous
charge, elle ne peut retomber que
sur luy mesme, puis qu' il est tres-faux
que nous parlions de Dieu irreveremment,
car lors que nous
en discourons, c' est avec tout
le respect qui nous est possible.
Mais sçavez vous pourquoy il dit
cela ? Asseurément il pense à la justice,
de laquelle il voudroit dépoüiller
la divinité, afin qu' il peust
plus librement se porter à toutes

p733

sortes de vices sans aucune crainte
d' estre chastié, et sans aucun scrupule ;
voyla seulement à quoy vise
ce sardanapale.
Enfin il attaque, ce semble, de
plus pres en son nonante deuxiesme
quatrain ceux qui abandonnent
les voluptez, et les plaisirs du
monde, et de la chair, et qui se privent
de beaucoup de choses pour
l' amour de Dieu. Vrayement on
sçait bien qu' il n' importe à Dieu
que nous nous abstenions de cecy,
ou de cela, car il ne reçoit rien,
ou ne perd rien, soit que nous fassions,
ou ne fassions pas cecy, ou
cela. Mais c' est à nous qu' il importe,
parce que tant plus nous ferons,
ou que nous nous abstiendrons de
choses indifferentes pour l' amour
de Dieu, tant plus serons nous
heureux.

p734

Il est vray que Dieu nous presente
l' usage de ce qui est icy bas,
et qu' il a creé tout le monde pour
servir à l' homme, mais il ne nous
a pas obligé de nous servir de toutes
choses ; il a laissé cela à nostre
choix, celles-là estans propres pour
l' un, celles-cy pour l' autre. Or il
faut remarquer qu' il a voulu
qu' elles nous servissent principalement
pour nous acheminer, et
nous élever à luy, et aux choses
spirituelles, et eternelles ; si bien
que si nous treuvons par experience,
et par l' advis de personnes
sages, et sçavantes, que nous abstenans
de cecy, ou de cela, nous advancerons
davantage à la vertu,
et nous nous éleverons plus facilement
à Dieu, il est raisonnable
que nous quittions ce qui nous
eust retardé de ce progrez vertueux,

p735

pour lequel Dieu nous a particulierement
creez.
Les jeunes hommes qui se retirent
dans les religions bien vivantes,
lors que leur vocation est divine,
ne s' y mettent pas pour quelque
plaisir sensuel, autrement il
faudroit qu' ils y vissent d' autres
amorces que les peines, et la pauvre
chere qu' on y fait ; au contraire
ils s' y retirent comme à un port
de leur salut, à cause de la saincte
vie qu' on y méne, et afin que par
les austeritez, qu' ils esperent y pratiquer
avec les autres, ils satisfassent
pour les fautes qu' ils ont commises
estant au monde parmy les
compagnies, qui sont le plus souvent
causes de ce qu' on offense Dieu.
C' est pourquoy je nie qu' on entre
dans les monasteres pour vivre en
oysiveté, ou à cause que l' appetit

p736

nous y porte, si ce n' est que par
l' appetit, il entende le raisonnable,
qui a presté l' oreille aux conseils
divins, et qui se porte à embrasser
la croix de Jesus Christ
pour s' en rendre le disciple, et l' imitateur.
C' est un erreur inveteré dans
l' esprit de plusieurs, que les religieux
passent leur temps en oysiveté,
je ne veux autre chose pour
persuader le contraire, sinon que
ces deistes, et ces libertins, qui
ont cette opinion, viennent un
peu demeurer huict, ou quinze
jours parmy les religieux, et qu' ils
pratiquent ce qu' on y fait, ils verront
si on y passe le temps, comme
ils s' imaginent. Les livres, les
predications, les inimitiez reconciliees,
la visite des prisons, et des
malades, et mille autres bonnes

p737

oeuvres, esquelles ils passent leur
temps, monstrent assez qu' ils ne
fuyent rien davantage que l' oysiveté :
s' il s' en treuve quelques uns
qui soyent oyseux, je suis content
qu' on les despoüille de l' habit du
sainct ordre, qu' ils portent, auquel
ils font un tel deshonneur. Il
est donc certain que les bons religieux
n' entrent point dans les
monasteres pour estre oyseux, ou
pour contenter leur appetit sensuel,
mais pour servir à Dieu purement,
et de tout leur coeur ; pour les
mauvais je ne les excuse point, au
contraire je desire qu' ils soyent
punis, et qu' on les jette dehors, s' ils
ne veulent s' amender, et correspondre
à la volonté de Dieu, et à
leur vocation ; poursuivez s' il vous
plaist.

p738

Le Deiste
celuy-là seroit-il loüable qui refuseroit une
viande exquise de la main d' un grand qui l' auroit
appellé à sa table ?
celuy-là nous refuseroit-il une obole, qui
nous voudroit etreiner d' un milion d' or ? Dieu
nous pourroit-il plaindre une chose frivole, s' il
nous veut donner un regne infiny ?
s' il faut esperer que nous jouyrons du paradis
apres ceste vie, ne devons nous pas user des
delices de ceste vie en attendant celles de
l' autre ?
bref si Dieu permet que nous usions des
sensibles effects de sa beneficence, pourquoy les
refuserons nous, et luy en dénierons nous nostre
recognoissance ?
vous voyez donc de tout ce que dessus, qu' il
faut fuyr l' impie enseignement du bigot, et
imiter la piste bien-heureuse du deiste. 
Le Theol je vous asseure que

p739

ce poëte prend beaucoup de peine
pour neant, car il ne faut point
de raisons pour persuader aux
hommes qu' ils se donnent du bon
temps, et qu' ils se servent de toutes
les creatures, car ils passent bien au
delà, puis qu' ils en abusent à tout
propos : il seroit icy beaucoup plus
necessaire de retrancher, que d' ajouster.
Or tous ces quatrains buttent
à persuader qu' il ne faut pas
s' abstenir d' aucune chose, que demandent
nos yeux, nos mains, et
tous nos autres sentimens, tant le
jour, que la nuict, car leurs objects
nous viennent au devant, et Dieu
a creé tout ce qui estoit necessaire
pour les assouvir : voyons ses raisons,
entre lesquelles la premiere
est, que celuy-là est un sot, qui refuse
une viande de la main du maistre,
qui l' a convié à son banquet :

p740

la seconde, que Dieu ne veut pas
que nous refusions de prendre les
voluptez du corps, puis qu' il nous
reserve de plus grands biens : la
troisiesme, qu' il faut user des plaisirs
de ce monde icy en attendant
ceux de l' autre : la quatriesme,
qu' il ne faut pas refuser l' action
de graces à Dieu pour les sensibles
effects, qu' il nous donne icy bas,
et par consequent qu' il en faut user :
ce que faisant, le deiste qui se
donne du bon temps tant qu' il
peut, conclud que celuy qui ne
prend pas ce plaisir, est impie, et
qu' il n' y a que luy seul, qui suive le
bon chemin.
La premiere raison n' a aucune
force, parce que Dieu n' a pas la
mesme intention en nous donnant
les biens de l' ame, ou du
corps, que le maistre presentant

p741

une viande exquise à celuy qu' il a
convié, parce que celuy-cy donne
la viande afin qu' on la mange, et
Dieu nous donne les biens, à ce
que si on treuve expedient de s' en
servir, qu' on en use, autrement
qu' on les laisse. Et puis Dieu n' a
pas fait les biens de ce monde en
telle façon, qu' il vueille qu' un
chacun use de tous ceux qui sont
au monde, car cela ne peut pas se
faire ; et ce qui est bon pour l' un,
est souvent mauvais pour l' autre :
il faut donc que nous y apportions
de la discretion, et de la moderation.
Je passe outre, et di que Dieu
a creé plusieurs biens à dessein,
que nous ne nous en servions pas,
car il a preveu, que quand nous aurions
tel, et tel bien en nostre puissance,
que nous nous en abstiendrions

p742

pour l' amour de luy, ce que
faisans nous l' honorons davantage,
que nous ne ferions en nous
en servans, parce que nous monstrons
par là, que nous faisons plus
grand estat de Dieu, que de tout
autre bien, et que tout ce qui est
au monde, ne nous est rien au prix
de luy. C' est pourquoy voyans que
mille plaisirs, qui sont au monde,
nous empeschent de contempler
ses grandeurs, et ses perfections, et
de vaquer continuellement à son
service, nous quittons une partie
des plaisirs de cette vie, qui plus,
qui moins selon l' amour que nous
portons à Dieu, pour tesmoigner
que nous n' avons aucun plaisir solide
qu' à le servir, et à passer toute
nostre vie à contempler ses merveilles.
Or puis que Dieu ne nous a pas

p743

obligez à nous servir de tout ce
qu' il a fait, et qu' il ne demande
rien davantage de l' homme, que
son coeur, et son amour, il ne faut
pas blasmer ceux-là, qui quittent
les voluptez sensuelles, à ce qu' ils
se portent à Dieu avec plus d' affection,
et d' ardeur, duquel les diverses
affections envers les creatures
nous excentrent bien loing,
car tant plus la puissance finie s' estend
à divers objects, et moins
est-elle puissante pour un chacun,
si bien qu' il n' est pas possible
d' aymer Dieu parfaitement, si on
ne détache son affection de toutes
les creatures ; desquelles comme il
est permis d' user, aussi est-il bien
facile d' en abuser, si on n' y prend
garde de bien pres.
C' est pourquoy plusieurs en
quittent l' usage, de peur qu' ils ont

p744

d' en mes-user, faisans comme ceux
lesquels de peur qu' ils ont de perir
dans la mer, ne veulent seulement
pas approcher des falaises,
de la rade, et des bords. Vous voyez
donc que ce deiste prend les choses
tout au rebours de ce qu' il faut,
et que les religieux sont grandement
loüables de s' abstenir des
plaisirs, qui sont cause que tant de
personnes se perdent, et deviennent
pires que les bestes brutes
par leurs impudicitez, et leurs
autres pechez. Ce seroit assez pour
satisfaire à tous ces quatrains, mais
afin qu' il ne demeure rien en arriere,
voyons le nonante-quatriesme,
qui suit, et contient la seconde
pretenduë raison.
Je l' appelle pretenduë , parce
qu' elle est nulle, car bien que Dieu
nous vueille donner la couronne

p745

d' immortalité, ce n' est pas à dire
qu' il vueille que nous nous donnions
du bon temps en ce monde ;
au contraire il veut que nous endurions,
et combattions icy, car la
couronne ne se doit donner
qu' aux victorieux ; or ce n' est pas
un combat de nous abandonner
aux plaisirs, c' est plustost manque
de courage, et une foiblesse d' esprit,
qui cede à l' appetit brutal, le
combat estant entre le corps, et
l' esprit.
Il faut respondre la mesme chose
à la troisiesme raison, car les voluptez
de ce monde ne sont ny le
chemin, ny l' entree des plaisirs de
l' autre : c' est pourquoy les deistes
se trompent lourdement de penser
qu' ils seront icy bien heureux,
et en l' autre vie : car il est tres-certain
qu' il n' y a rien pour eux en

p746

l' autre monde, qu' une damnation
eternelle. Le fils de Dieu nous a
monstré une autre voye, ne proposant
autre chose pour entrer en paradis,
qu' espines, que douleurs,
que macerations, que croix, qu' injures,
et calomnies, qu' il faut endurer
icy, pour joüir du bon-heur,
qui nous est preparé là haut.
C' est là la piste que les hommes
les plus saincts, et les plus doctes,
qui furent jamais, ont suivy pour
estre sauvez ; c' est la voye, par laquelle
ont marché tous ceux qui
ont prophetisé, et fait des miracles ;
bref c' est le chemin royal,
dans lequel on ne s' égarre jamais,
et au bout duquel on treuve la
grande cité de la celeste Jerusalem,
dans laquelle sont tous les
plaisirs, et tous les contentements
qui se peuvent desirer.

p747

Pour la quatriesme raison elle
suppose une chose fausse, car nous
recognoissons ces faveurs, et rendons
graces à Dieu pour tous les
bienfaits qu' il respand sur nous,
et sur toutes les creatures, bien
que nous n' usions pas de tous, si ce
n' est que vous appelliez usage , quand
ils nous servent pour meriter
en nous abstenant pour l' amour
de celuy qui nous les a donnez.
Or n' estant pas besoin de se servir
d' une chose, pour en remercier le
donateur, ce poëte ne sçauroit que
repartir, bien que celuy qui donne,
fust quelque homme, ou le
maistre du banquet, lequel n' a pas
intention, que celuy, à qui il presente
quelque morceau exquis, le
mange, s' il juge d' autre part, que
cela luy feroit tort, ou qu' il n' en a
pas besoin pour se sustenter.

p748

De tout ce que dessus je conclu,
que toutes et quantesfois qu' on
s' abstient de quelque plaisir pour
estre mieux disposé à servir Dieu,
et à contempler son excellence,
qu' on fait fort bien ; et que toutes
et quantesfois qu' on apperçoit
que les plaisirs nous emportent au
desordre, et au mal, qu' on est obligé
de les fuyr, et de s' en abstenir,
ou tousjours, ou pour quelque
temps. Et mesme que tant plus on
se prive des plaisirs de cette vie,
et plus est-on apte à la vertu, et
plus agreable à Dieu, si bien que
le deiste est fort loing de son conte,
qui concluoit dans son 97 quatrain,
qu' il estoit le plus heureux
du monde, parce qu' il s' abandonnoit
à toutes sortes de voluptez et
de passetemps.
Il ne faut que retourner la proposition

p749

pour dire la verité, sçavoir
est, qu' il est le plus miserable
du monde, de s' assouvir brutalement
de tout ce que sa chair, et son
appetit luy suggere, faisant de son
ventre son Dieu, et ne tesmoignant
par aucun labeur, l' obligation
qu' il a à son createur. Croyez qu' il
ne seroit pas difficile de persuader
cette pretenduë religion à tous
ceux qui ont fait banqueroute à la
vertu, et à l' honnesteté, car elle
méne le grand galop à toutes sortes
de lubricitez, d' ordures, et de
vilenies. Quittons cét impie, et
ces maudites pensees, ou achevons
vitement ce qui reste de sa perverse
doctrine, afin de nous esgayer
en d' autres discours plus
serieux, plus agreables, et plus
honnestes.

p750

Le Deiste
le bigot ne fait rien que sous esperance
d' estre recompensé, et ne fuit pas le vice si ce
n' est pour eviter le supplice deu à son méfait.
et s' effraye de Dieu, comme les enfans d' un
monstre espouvantable, et le blasme par tout
sous pretexte de loüer sa justice ineffable.
il est le seul ennemy juré de sa propre lumiere
entre les ignorans, ne voyant pas les erreurs
que les ans ont enfantez, et qui detiennent
son ame prisonniere. 
Le Theol il faut icy un peu
examiner ce qu' il veut dire par le
bigot ignorant , afin que nous découvrions
mieux toute la malice,
et la ruse de ce rimeur. Par un bigot ,
qui est une diction, qu' on dit
que Calvin à le premier inventee,
on peut entendre deux sortes de

p751

personnes : les unes, qui ont une
vraye devotion reglee selon la volonté
de Dieu, et suivant les loix
de l' eglise, et la direction d' un
homme sçavant, et vertueux, tels
que sont ceux-là, qui communient,
et se confessent souvent, afin d' augmenter
leurs vertus, et de tenir
leur ame plus pure, et plus nette,
et qui font tous les jours une demie
heure de meditation touchant
les mysteres divins, et l' examen
de leur conscience ; qui ne
voudroient pas avoir manqué à
un jour de jeusne, ou à la messe aux
festes, et aux dimanches, et qui
pratiquent le plus exactement, et
le plus diligemment qu' ils peuvent,
tous les commandemens de Dieu,
et de l' eglise catholique, ou qui
suivent les conseils divins pour se
perfectionner davantage, et imiter

p752

de plus pres le fils de Dieu en
se rendans conformes à tout ce
qu' il a enduré pour nous.
Si vostre poëte parle de ceux-là,
comme il y a de l' apparence, son
quatrain est aussi faux, comme il
est faux que le blanc soit noir, ou
que la lumiere soit les tenebres,
car le vray catholique agit principalement
pour l' amour de Dieu,
n' ayant autre but que de luy agreer ;
il ayme tellement la vertu,
qu' il aymeroit mieux mourir que
d' en quitter le desir, l' affection, et
la pratique, de sorte qu' il ne vivroit
pas moins vertueusement,
bien qu' il n' y eust ny enfer, ny paradis,
se contentant que ses actions
soyent conformes au vouloir de
Dieu, qu' il conçoit comme son
souverain createur, son pere, son
maistre, et son protecteur, de qui il

p753

dépend plus que la lumiere ne dépend
du soleil : si bien que tout ce
qui est dans ces trois quatrains, ne
luy peut estre attribué.
Voyons maintenant l' autre sorte
de bigots , lesquels on peut prendre
pour deux ou trois sortes de
personnes, sçavoir est pour ceux
qui feroient scrupule de ne dire
pas leurs heures, ou leurs chappelets,
et ne font pas scrupule de
tempester, de jurer, de blasphemer,
de mentir, et de mesdire de
tout le monde : on pourroit encore
icy rapporter tous ceux qui s' abstiennent
d' offenser Dieu en petites
choses, comme en paroles oyseuses,
et en mensonges legers, faisans
semblant d' estre fort devots,
et en derriere sont pires que des
diables, et traistres comme Judas,
faisans des choses, qu' il n' est seulement

p754

pas licite de penser. On peut
encore icy mettre tous ceux-là qui
viennent jusques à la superstition.
Or nous n' approuvons point
ces sortes de gens, au contraire
nous les detestons, et les avons en
horreur ; mais il semble que ce
deiste n' ait autre intention que
de rendre la religion catholique
odieuse, et de faire que les bons
chrestiens soyent mesprisez par
tout le monde, car bien que tout
ce qu' il dit en ces quatrains ne
convienne à pas un catholique
vivant comme il doit, neantmoins
les quatrains precedens ne font
que trop paroistre son intention.
C' est pourquoy je luy responds à
cela, que tout ce qu' il dit n' est
qu' imposture. Qui ne soit ainsi,
prenez quelque chrestien le plus
idiot, que vous pourrez, et l' interrogez

p755

s' il s' effraye de Dieu, et s' il en
a peur comme d' un monstre ; sur
ma vie, il vous respondra incontinent,
qu' au contraire de s' effrayer,
qu' il a toute son esperance en luy,
et qu' il n' a jamais une plus grande
consolation, ny un plus doux repos,
que quand il a recours à Dieu,
et éleve les yeux, et l' esprit vers sa
divine bonté, et sa grandeur : et
lors qu' il apprehende sa justice infinie,
cela n' engendre autre chose
dans son esprit, qu' une compunction,
et une douleur d' avoir offensé
cette bonté eternelle de
Dieu, et une grande reverence
envers la divine majesté, ou une
crainte d' estre damné, laquelle le
fait revenir à soy, luy fait concevoir
une haine contre le peché, laquelle
ayde à le remettre en grace
avec Dieu ; il sçait que la justice

p756

infinie de Dieu est aussi bien pour
recompenser les bons, comme
pour punir les meschans, si bien
qu' un vray catholique jettant
l' oeil sur cette justice recompensante,
n' a point sujet de s' effrayer,
tenant desja par esperance la couronne
de l' immortalité.
Mais je vous prie de prendre
garde au nonante huictiesme quatrain,
dans lequel il veut persuader
deux choses : la premiere est, que
le chrestien ne fait rien que pour
la peur qu' il a de l' enfer, ou pour
l' esperance du paradis ; la seconde,
qu' il veut tirer de la premiere,
est que ce qu' on fait par crainte,
ou par esperance, ne sert de rien.
Or l' une, et l' autre est fausse, car
pour ce qui est de la premiere, qui
ne sçait que les chrestiens font
leurs actions pour l' amour de

p757

Dieu, et non pour la recompense,
ou pour la peur ? En voulez vous
des tesmoignages pris des chrestiens
mesmes, lesquels vous ne
sçauriez refuser, ou reprocher ;
voicy les paroles de Sainct Augustin, (...).
Je ne veux pas m' amuser à rapporter
une infinité de semblables
passages de tous les docteurs de
l' eglise, pour preuver cecy, car
c' est une doctrine, et une coustume
si receuë parmy les chrestiens,

p758

que tous sont d' accord qu' il faut
faire nos actions l' amour de Dieu,
et qu' il le faut servir parce qu' il est
souverainement aimable, et digne
d' un amour, et d' un honneur infiny.
C' est cet amour qu' on appelle
pur, chaste, et amour de bien veillance,
lequel est si recommandé
parmy nous, que nous disons, que
celuy-là offenseroit Dieu mortellement,
qui aymeroit seulement
Dieu à cause de quelques biens,
soit temporels, soit spirituels, qu' il
auroit receus de luy, car pour lors
il aymeroit plus ces biens qu' il
n' aymeroit Dieu, puis que selon la
maxime commune, (...). Or il
n' y a pas moyen de preferer quelque
chose que ce soit à Dieu, sans
offenser sa divine majesté, ny sans
meriter les peines eternelles de

p759

l' enfer : par où vous voyez combien
nous detestons ce que ce
malheureux nous vouloit imposer
dans son nonante-huictiesme
quatrain.
Venons au second poinct, et disons
qu' il est permis à un chrestien
de faire bien à cause de l' esperance
qu' il a d' estre recompensé
en paradis, et pour la crainte
qu' il a d' estre damné, pourveu
que ce ne soyent pas là ces principaux
motifs ; la raison est parce
que quand il est question de deux
biens qui ont quelque rapport entr' eux,
il est permis de rapporter le
moindre au plus grand, or les actions
que nous faisons icy, ont un
rapport avec la recompense que
Dieu nous a promise, et sont
moindres que cette recompense,
qui est la beatitude eternelle, concluez

p760

donc que nous pouvons faire
nos actions pour la recompense,
pourveu qu' elle ne soit pas nostre
derniere, et nostre principale
fin.
Elle ne sera pas nostre fin, si
nous la rapportons à Dieu, et si
nous sommes tellement disposez,
que nous ne laissassions pas d' aymer
Dieu plus que toutes choses,
encore qu' il n' y eust ny peine, ny
recompense. Je veux fermer cette
verité par l' anatheme du concile
de trente, lequel excommunie
tous ceux qui disent qu' on offense,
lors qu' on fait quelque chose
pour la recompense : c' est à la 6 session,
canon 31, (...).
Pour ce qui est de la crainte,
c' est une chose tres-certaine, qu' elle

p761

ayde à nostre conversion, car
c' est elle par laquelle nous parvenons
à l' amour de Dieu, et qui
nous fraye le chemin de la sagesse, (...).
Est-il pas vray que la foy, et la revelation
divine a esté necessaire
pour nous faire croire les peines
eternelles deuës aux damnez ? Or
tout ce qui vient de la foy, et tout
ce qui se fait par son mouvement,
est bon, et sert à nostre salut ; c' est
pourquoy Sainct Clement Alexandrin
a fort bien dit que, (...).

p762

Mais pourquoy tant de passages ?
Puis que le concile de trente
nous apprend, et nous declare
qu' il y a sept actes, par lesquels les
meschans sont justifiez, qui sont
la foy, la crainte, l' esperance, l' amour,
la penitence, le propos de
recevoir le sacrement, et celuy de
s' amender, et d' embrasser une
meilleure vie, et de garder les commandemens
de Dieu. Et dans la 14
session chap. 4, nous lisons ces paroles
en faveur de cette crainte
des peines, et de l' enfer. (...).

p763

Ce qui me fait conclurre que
ce poëte a trempé dans l' heresie
de Calvin, ou de Luther, avant
que d' estre deiste, car ce quatrain
nonante-huictiesme ressent le huguenot
à pleine bouche : aussi est-ce
contre les heretiques que ce
chapitre, et le quatriesme canon
de la mesme session combattent.
Je prie desormais ces deistes qu' ils
n' ayent pas une si mauvaise opinion
de nous, et qu' ils croyent que
nous ne nous effrayons pas que
bien à propos, et selon qu' il plaist
à celuy de qui nous redoutons les
tres-justes jugemens : passons outre,
et disons, que le catholique ne

p764

blasme pas Dieu, lors qu' il exalte
sa justice, car cette justice est Dieu
mesme, (...).
Certainement ce pauvre
deiste me fait compassion d' avoir
tellement en horreur la justice de
Dieu, qu' à peine semble-il qu' il
ose y penser, sans s' effrayer, et blesmir,
monstrant assez par là que cela
luy pese bien fort sur les espaules,
et qu' il desireroit que Dieu
n' eust point de justice. Or sus dites
moy de grace, est-il possible
que vous ayez esté si aveuglé jusques
icy, que vous n' ayez point
creu que Dieu eust une justice ? Et
quoy si Dieu n' est juste, il est donc
injuste, ce qui ne peut pas mesme
tomber en la pensee, tant la repugnance
est grande, que Dieu soit
Dieu, et qu' il ne soit pas juste.
Que s' il est juste, il faut qu' il le

p765

soit infiniement, car il n' y a rien
en Dieu qui ne soit égal, voire plus
qu' égal, puis que tout ce qui est en
Dieu est une mesme chose ; je le
conjure donc par le mesme Dieu,
duquel il louë l' amour, qu' il confesse
aussi, et qu' il louë sa justice,
telle que les catholiques la
croyent, la reverent, et l' adorent.
Il adjouste dans son 100 quatrain,
que le bigot est detenu prisonnier
dans les erreurs inveterez,
estant ennemy de son propre
bien, et de sa lumiere, ce qui est
une tres grande calomnie, s' il parle
des vrays chrestiens, car il n' y a
point de si grand amy de la lumiere,
et de la verité, que le chrestien,
qui a la mesme verité pour sa conduite,
laquelle ne peut estre deceuë,
ny decevoir, et laquelle dit (...) :

p766

il ne peut se retreuver
aucun erreur en sa presence
qui ne soit dissipé plus viste, que
les tenebres par la presence du soleil.
Mais je vous prie, contemplez
un peu la façon de proceder de laquelle
se sert vostre poëte, et tous
ceux de sa secte ; ils n' ont rien autre
chose pour toutes leurs meilleures
raisons, sinon qu' ils disent que les
enseignemens, et les articles de
nostre religion, et de nostre foy,
sont erreurs, que le temps a conçeu,
et fait passer pour veritables :
il est bien aysé de dire cela de chaque
chose, et n' y a pas grande finesse
a nier une verité ; mais ils
n' ont autre fondement de leur
impieté, que le depit qu' ils ont de
ce que ceste loy evangelique rabat

p767

leur joye, ou du moins est cause
qu' on fait des loix, par lesquelles
on punit ceux qui tiennent des
propos ridicules, faux, et scandaleux
de Dieu, de la foy, et de la religion
catholique ; il n' y a que ce
point, lequel ils tiennent de dure
digestion, sçavoir est, que tout ne
leur est pas permis, car ils ne se soucient
point du reste ; que les chrestiens
s' affligent tant qu' ils voudront,
qu' ils prient, qu' ils adorent,
qu' ils jeusnent, tout cela ne leur
importe, pourveu qu' ils ayent la
pleine carriere, et l' entiere liberté
pour faire, dire, et penser en quelque
temps, ou façon que ce soit,
tout ce qu' ils souhaitteront.
Si ne suis-je pas d' avis qu' on
leur laisse tellement la bride sur le
col, qui n' y ait des roües, des gibets,
des foüets, et des feux, pour

p768

venger la querelle de Dieu, et reprimer
l' audace, et la temerité de
ces impies. C' est en quoy les juges
et les magistrats, les princes, et les
roys doivent veiller, car ils ne
sçauroient faire chose plus agreable
à Dieu, que de poursuivre, et
ruiner de fond en comble ces malheureux
deistes, qui prennent
leur nom du nom de Dieu pour
nous surprendre, et cependant
ils ne croyent aucune divinité.
Voyez s' il reste encor quelque
quatrain.
CHAPITRE 25


p769

dans lequel le reste des quatrains du
deiste, sçavoir est depuis le 101 jusques
au cent sixiesme, sont renversez ;
la ruse du poëte libertin est découverte,
et le deiste minute sa conversion. 
Le Deiste
le deiste n' agit que pour le bien mesme, et
non pour le salaire que les loix proposent, d' autant
qu' il sçait bien que la vertu n' est point
servile.
Par laquelle nous sçavons qu' il faut adorer
une premiere cause, et aymer en elle nostre
prochain sans luy faire aucun tort.
Il observe tout seul la religion, et adore celuy
qui a fait le ciel, et la terre, hayssant
entierement l' irreligion.

p770

Il ayme Dieu, et en luy tout ce qui vit, et
qui respire, se monstrant estre tel envers chacun,
qu' il souhaitte naturellement qu' on soit envers luy.
Le Theologien
si le deiste faisoit ce qu' il
dit, il luy seroit fort facile
de quitter ses erreurs, et
d' embrasser la religion catholique,
laquelle n' a autre intention
en tout ce qu' elle fait, et ce qu' elle
ordonne, sinon qu' un chacun vive,
et fasse toutes ses actions pour
l' unique amour de Dieu, qui est le
souverain bien, et la source originaire
de la vertu. Mais qu' il agisse
en ceste façon, c' est ce que je
ne me peux persuader, autrement
comment seroit-il possible, qu' il fût
si amateur du plaisir, et de la volupté ?
Puis que la vertu est si espineuse,

p771

et remplie de tant de difficultez,
qu' il a faillu que Dieu mesme
se soit fait homme pour nous
l' enseigner par son exemple, et
nous exhorter à vaincre nos appetits,
et nos inclinations, lesquelles
sont le plus souvent dereglees, et
opposees à la raison.
Si ce n' est que le deiste appelle
vertu, quand il donne un parfait
contentement à tous ses sens, et
qu' il assouvit sa concupiscence
brutale par toutes les sortes d' objects,
lesquels il peut rencontrer,
souhaitter, ou s' imaginer ; si ce n' est
qu' il appelle vertu la bonne chere,
la lubricité, l' ambition, et tous
les autres vices, ausquels il est addonné ;
en fin si ce n' est qu' il mesure
la vertu à l' aune de son cerveau
mal timbré, et selon son inclination,
et ses affections : bien qu' il

p772

proteste de bouche dans ces quatrains
icy, et dans les compagnies
qu' il veut abuser, que c' est la pure
vertu, qui le conduit en ses actions,
et guide ses pas, et toutes ses demarches,
afin qu' il surprenne la
jeunesse. Dites moy, de grace, si
cela est vray, car vous avez esté de
ces gens là, et sçavez de quel bois
ils se chauffent, c' est pourquoy je
suis content de m' en rapporter à
vous, comme à un tesmoing oculaire,
et bien experimenté.
Le D monsieur, je vous proteste
que tout cela est faux, car je
n' ay apperçeu ny dans moy, ny
dans ceux de ceste troupe, aucun
desir solide de vivre selon ceste
vertu, qu' il descrit, ny selon Dieu,
mais seulement de passer le temps
sans soucy, et sans apprehension
de la mort, laquelle seule est la

p773

plus capable de les faire trembler,
et de les effrayer. Je peux vous en
rendre un fidelle tesmoignage,
car j' ay trempé vingt ans en cet
erreur, non sans mille craintes, et
mille scrupules, mais je les étouffois
par la bonne chere, et par les
compagnies en m' en divertissant
tant que faire se pouvoit.
Veritablement ce deiste est
bien éloigné de faire tout pour l' amour
de l' autheur du ciel, et de
l' onde, comme il dit tres-faussement,
car je suis asseuré qu' il ne
croit point de Dieu, ou du moins
tasche à se défaire de cette creance
tant qu' il peut, car enfin s' il y a
un dieu, il faut qu' il soit tresbon,
et tres-juste, et qu' il recompense
les bons, et punisse les mauvais ; on
a beau dire, il en faut tousjours revenir
là. Pour ce qu' il dit qu' il hayt

p774

l' irreligion, outre que ses opinions
ne sont qu' irreligion, qu' impietez,
et blasphemes, il ne hayt nullement
ce qu' il dit, car il n' y a personne
avec qui il se plaise tant
qu' avec les athees, quand il en
rencontre ; et Dieu sçait pour lors
les beaux discours, qui tiennent
ensemble, vrayement la religion
catholique est bien remuee, et
sifflee, asseurément il n' y a qu' impieté,
et irreligion dans leur propos,
ny dans leur esprit, comme il appert
à tous ceux qui les hantent.
Il est bien vray que quelques-uns
de ces malheureux ont cette
prudence tres-pernitieuse, qu' ils
se comportent avec toutes sortes
de personnes selon leur religion,
et leur humeur, car avec le catholique,
ils font semblant d' espouser
la vraye religion ; et avec le

p775

calviniste, ils tranchent du calvinisme ;
et se transforment en
plus de couleurs qu' un cameleon,
ou qu' un protee ; mais lors qu' ils
sont avec leurs confidens, ils changent
tout aussi tost de discours, et
de creance. En un mot je vous asseure
que les meilleurs d' entr' eux
ne valent rien.
Il n' ayme pas aussi tout ce qui
vit, et tout ce qui a estre, en Dieu,
comme il dit, car je sçay par experience
qu' il n' ayme autre chose
que ce qui luy peut profiter, et ce
qui le peut mettre en bon predicament,
et en bonne reputation
envers les hommes, particulierement
envers ceux desquels il peut
craindre, ou esperer quelque chose,
de façon que tout ce qu' il a dit
en ces derniers quatrains n' est
qu' un perpetuel mensonge, et un

p776

beau pretexte, duquel il veut pallier
son impieté, et la faire passer
pour vertu, et pour religion ; c' est
ce que je suis prest de signer, et
tesmoigner de mon propre sang,
car j' en ay une longue, et certaine
experience, n' ayant pas esté un des
moindres d' entr' eux ; beny soit mon
Dieu, qui m' a retiré de cette malheureuse
impieté. J' acheveray s' il
vous plaist ce detestable poëme,
bien qu' il finisse par 2 quatrains les
plus meschans qui furent jamais,
afin que toute son impieté soit
eventee, et que cet homme detestable
soit tellement traitté, que
tout le monde luy courre sus, et
attise le feu pour brusler le meschant
arbre, lequel a produit des
fruicts si venimeux, comme sont
ses maudits quatrains, qu' il finit
par ceux-cy.

p777

Le Deiste
au regard de l' athee encor qu' ingratement
il nie l' eternel, et sa saincte police,
si n' en parle-t' il pas injurieusement
comme fait le bigot traitant de sa justice.
ainsi l' athee seul ni la divinité,
le bigot pirement meilleur que Dieu s' estime,
le deiste entre tous l' adore en verité
attendant qu' il parvienne où son but se termine. 
Le Theol je vous asseure qu' il
faudroit estre merveilleusement
aveuglé, qui ne se riroit de ce falot,
qui en donne de si belles ; je
suis bien aise d' avoir sçeu de vous
ce qui en estoit, ne pouvant avoir
un tesmoignage plus autentique
en ce sujet icy. Certainement il est
manifeste, qu' en son penultiesme
quatrain il ne dit pour autre raison,
que l' athee ne parle pas si injurieusement

p778

de Dieu, que le chrestien, que
par ce que celuy cy professe, et proteste
haut et clair, que Dieu est
tres-juste, et qu' il chatira eternellement
les athees, les deistes, et
tous les heretiques avec les mauvais
chrestiens d' un supplice eternel ;
ce qui est bien raisonnable
puis que tous ceux-là sont si opiniastres,
qu' ils ne veulent point
quitter leurs impietez, et leurs vices.
Voyla donc pourquoy ce poëte
dit, que le chrestien, qu' il entend
tousjours par le bigot , est pire
que l' athee, parce que cestuy-cy
nie l' enfer, la justice, et Dieu mesme ;
voyez un peu quelle pertinente
raison il a eu en faisant ce quatrain ;
et neantmoins on dit qu' il
est si presomptueux qu' il croit n' y
avoir personne qui puisse respondre

p779

à ce qu' il met en avant, bien
que toute sa machine se puisse ruiner
par une simple negation de toutes
ses calomnies, et impostures.
Or pour l' oster de ce doute, ou
de ceste creance qu' il a des catholiques,
je ne desirerois autre chose
sinon qu' il s' arraisonnast avec
quelque docteur catholique, car
il verroit combien nous detestons
toutes sortes d' erreurs, de superstitions,
et de bigotisme , (afin que
j' use de son terme) et quel prix
nous faisons de la vertu, et de tout
ce qui appartient à la divinité : il
confesseroit que l' amour que
nous portons à la souveraine cause,
est le premier mobile de nos actions ;
que le bon catholique aymeroit
mieux mourir soudainement,
que de se plaire, ou consentir
à une mauvaise pensee ; et

p780

qu' il n' y a personne au monde qui
cherisse tant la vertu, et l' honnesteté,
ny qui haisse tellement le vice,
que le chrestien, comme il fait
tous les jours paroistre par sa foy
et par ses bonnes oeuvres.
C' est pourquoy je dy que le
vray catholique parle tousjours
honorablement de Dieu ; tant s' en
faut qu' il en parle injurieusement,
car il n' attribue rien à Dieu, que ce
qui est tres-excellent, et ce qui
a une perfection infinie, et ne luy
denie rien, que la seule imperfection.
Achevons avec ce dernier, et
cent-sixiesme quatrain, dans lequel
il y a quasi autant de mensonges, et
d' impietez, que de mots ; car avec
l' athee, tel qu' il l' entend, les deistes,
et les libertins desadvoüent
la divinité, puis qu' ils la dépoüillent

p781

de sa justice, et de sa providence ;
mais passons outre, et disons
que quoyqu' il entende par le
bigot , qu' il est impossible, qu' un
homme usant de la raison, s' estime
meilleur que Dieu. Sçavez vous
pourquoy il dit cela ? C' est par ce
que le chrestien croit, et proteste
que Dieu punira les impies eternellement,
s' ils meurent en leur
peché ; car s' ils veulent se convertir,
et quitter leurs erreurs, et revenir
à l' eglise catholique, Dieu leur
fera misericorde, et leur pardonnera.
Bon dieu ! Vous sçavez si le chrestien
s' estime meilleur que vous,
bien qu' il ne punisse pas ses enfans
apres l' avoir offensé, d' un supplice
eternel, car il sçait qu' on ne
luy doit pas un honneur infiny, et
que l' obligation que luy a son enfant,

p782

est finie, et par consequent
que la peine de telle offense doit
avoir des limites, et il sçait qu' on
vous a une infinie obligation, et
qu' on vous doit un honneur souverainement
infiny, et infiniment
souverain, et par consequent que
la peine de ceux qui vous mesprisent,
et qui ne font conte de vos
sainctes ordonnances, doit estre
infinie, s' ils persistent en leur opiniastreté.
Ils sont bien esloignez
de se croire meilleurs que vous,
puis qu' ils protestent, et croyent fermement,
que leur bonté n' est que
l' ombre de la vostre, et qu' elle
n' est rien qu' une pure dependance
de vostre puissance ; ils sçavent
asseurement que la vostre est si
immense, et si prisable, qu' il vaudroit
mieux que tout le monde
s' en retournast au neant, que de

p783

faire, dire, ou penser aucune chose
contre vostre volonté, et vostre
honneur.
C' est donc fort mal à propos
qu' il conclud que les deistes adorent
Dieu en verité, puis qu' ils
n' ont qu' un perpetuel erreur, et
une impieté continuelle dans le
coeur, et dans la bouche, afin que
leurs actions respondent à leur
creance, et qu' il n' y ait aucun vice
qu' ils ne commettent : c' est pourquoy
nostre poëte a renversé ces
derniers quatrains du malheureux
deiste fort à propos, lors qu' il a
dit, parlant de cet imposteur.
Ennemy conjuré de la religion
feignant aymer la paix, il combat tout le monde,
subtil fauteur qu' il est de l' irreligion
il méconoit l' auteur de la terre, et de l' onde.
Car que tout simplement il ayme l' eternel,
et en luy ce qui est, ce qui vit, et respire,

p784

sans que par les effets il se declare tel,
il est par trop aisé au menteur de le dire.
Si personne jamais mentit impudemment,
le deiste a menty dans une fausse rime
de son dernier quatrain, où il dit sotement
qu' un fidelle chrestien meilleur que Dieu s' estime.
Quelqu' un meilleur que Dieu se peut-il estimer ?
Croiroit-on pas plustost qu' une goute d' eau claire
pourroit estre cent fois plus grande que la mer,
ou le soleil moins clair que le rayon solaire ?
Au regard de l' athee, encor qu' apertement
il nie l' eternel, et sa saincte police,
si n' en discourt-il pas du tout si faussement
que le deiste fait en niant sa justice.
Ainsi l' athee osant nier la deité,
c' est en vain que meilleur le deiste s' estime,
car il n' a point de Dieu s' il dit la verité,
la foy du seul chrestien est seule legitime.
Je vous donneray tous les autres
quatrains avant que nous partions
d' ensemble, comme je vous
ay desja promis, si je ne l' oublie.

p785

Or il faut mettre fin à ce discours,
car vous voyez que vostre
poëte est un homme effronté, qui
n' a ny crainte de Dieu, ny honte
de ses impostures, ny aucun sentiment
de pieté. Mais je vous prie,
comment se pourroit-il faire que
celuy-là adorast Dieu en verité,
qui se moque de ses commandemens,
et nie sa providence ? Comment
honoreroit-il celuy-là duquel
il voudroit que la justice, et la
puissance fust destruite ? Comment
aymeroit-il Dieu, puis qu' il appelle
ceux qui employent toute leur
vie, tout leur esprit, et toutes leurs
actions à son service, bigots, et superstitieux ?
Bref comment adoreroit-il
Dieu, puis qu' il cherche, et
medite toutes sortes de raisons, et
de moyens pour esloigner de son
esprit la pensee du vray Dieu,

p786

n' ayant point de plus grand tourment
que l' apprehension d' une
veritable divinité, qui ne punira
pas moins griefvement les meschans,
qu' elle recompensera les
bons avantageusement, estant infiniment
égale en ses actions.
Sus donc que ce mal-heureux
deiste attende tant qu' il luy plaira
son but, et le terme de sa vie, car
il est tres-asseuré qu' il n' aura point
d' autre recompense, que les flammes
eternelles des damnez, s' il ne
commence à changer d' opinion,
et de vie. Il a beau se promettre la
gloire au bout de la carriere, ce
n' est pas en se donnant du bon
temps, ny en assouvissant ses passions,
qu' il y parviendra ; il ne seroit
pas raisonnable que ceux qui
ont pris toutes sortes de plaisirs
jusques a en regorger, eussent la

p787

mesme recompense de ceux qui
ont tant enduré pour l' amour de
Dieu. Il ne se doit donc rien promettre
de la recompense eternelle,
si premierement il n' expie tous
ses pechez par ses larmes, et par
une juste penitence. Je prie nostre
grand Dieu, qu' il luy fasse cette
grace, et à tous ceux qui ont trempé
en semblables erreurs ; et pour
vous, monsieur, je vous conjure par
toutes sortes de respects, et particulierement
par l' amour que vous
portez à Dieu, que vous taschiez
à desabuser tout autant de personnes
que vous recognoistrez avoir
esté perverties, et ensorcelees par
le mauvais levain, et par le dangereux
venin de ce malheureux poëme.
Le D asseurez vous que j' apporteray
toute sorte de diligence,

p788

afin de retirer tous ceux que je
sçai avoir esté pervertis par les fantaisies
de cet imposteur, car je croy
que la grace que Dieu m' a faite ce
jourd' huy en me dessillant les
yeux ; et me retirant de ces maudites
opinions par vostre moyen,
m' oblige non seulement a embrasser
la religion catholique, laquelle
je revere, j' adore, et recognois
pour la seule, et la tres-veritable,
et à laquelle je veux m' arrester
pour jamais, mais aussi d' essayer
par tous moyens de ramener
à la religion catholique tous ceux
qui se sont perdus par ce malheureux
poëme, et par le discours, et la
hantise des autres libertins.
Or je vous prie de m' enseigner
comme il faut que je me comporte
pour abjurer mon erreur, et me
faire quitte de tous les pechez que

p789

j' ay commis depuis que j' ay suivy
ces opinions extravagantes, et à
qui je me pourray addresser, s' il
me revient quelque doute, ou difficulté
touchant les erreurs, que
j' avois espousez jusques à maintenant.
Le Theol pour ce qui est de
vostre conscience, il faut que vous
la mettiez entre les mains de quelque
confesseur docte, prudent, et
pieux, auquel vous fassiez une confession
generalle de tout le mal
que vous avez fait depuis vostre
jeunesse jusques à present ; vous
n' aurez pas plustost declaré vos
pechez, et n' aurez pas plustost eu
regret de les avoir commis à cause
qu' ils sont contre la volonté divine,
avec un ferme propos de les
eviter desormais, et de servir, et
aymer Dieu de tout vostre coeur le

p790

reste de vos jours, que vous ressentirez
un contentement, et un plaisir
extraordinaire, et confesserez
hautement qu' il n' y a nul plaisir
qui soit vray, et solide, que celuy
que le chrestien ressent en son
ame, lors qu' il ayme Dieu de toute
son affection ; et ne se passera
jour en toute vostre vie, auquel
vous ne benissiez, et remerciez la
bonté divine, de ce qu' elle vous a
retiré des tenebres de l' erreur, parmy
lesquelles vous vous perdiez
miserablement.
Pour ce qui est des difficultez
qui vous pourroient revenir dans
l' esprit, vous ne sçauriez manquer
de doctes personnages, lors que
vous serez arrivé à Paris, lesquels
vous esclarciront sur tous vos doutes,
car vous avez ceste tres-excellente
compagnie de la Sorbonne,

p791

laquelle contient autant de soleils
comme elle a de docteurs,
qui sont les hercules spirituels,
lesquels couppent la teste à toutes
sortes d' erreurs. Je m' asseure que si
vous les allez voir, qu' ils vous recevront
à bras ouverts, et avec un
grand signe de la joye qu' ils ont
que les deistes, et les athees, et
toutes sortes de libertins reviennent
à l' eglise, et quittent leurs erreurs,
et leurs fantaisies.
Ce sont les oracles de toute la
France, desquels mesme les nations
estrangeres tirent resolution
des plus grandes difficultez
qui surviennent és choses morales,
et divines : ce sont des boucliers
tousjours prests à defendre
la foy catholique, apostolique, et
romaine, contre toutes sortes
d' impietez, et d' erreurs, et mesme

p792

contre les portes de l' enfer : ce sont
les ornemens de la France, la terreur
des heretiques, le fleau des
impies, la consolation, et le refuge
des gens de bien.
Mais il est temps que nous nous
separions, car je croy que vous n' avez
plus nul sujet de douter en ce
qui est de la religion catholique,
avisez si je vous peux servir en
quelqu' autre occasion.
Le D monsieur, je croyois que
vous me donneriez encore une
journee pour resoudre les difficultez,
lesquelles m' ont arresté
parmy vos responses selon que
vous me l' aviez promis, c' est dequoy
je vous conjure maintenant.
Le Theol je suis marry que la
commodité ne me le permet, mais
je me dois treuver à quarante
lieuës d' icy dans quatre jours, ce

p793

sera tout ce que je pourray faire
de m' y rendre. Au reste je repasseray
par icy dans un mois, je
vous promets que je vous donneray
satisfaction sur tout ce que
vous aurez treuvé difficile dans
mes discours, si vous voulez prendre
la peine de vous rendre dans
cette ville, cependant vous pourrez
faire un voyage à Paris, afin de
convertir quelques-uns de ceux
qui se sont perdus par la lecture de
vostre poëme, par la conversation
de tous ces libertins dont vous
m' avez parlé, et par la lecture des
mauvais livres.
Le D je ne manqueray pas à
me treuver icy dans un mois jour
pour jour, et vous attendray de
pied ferme, à ce qu' il vous plaise
me resoudre sur les difficultez que
j' ay sur ce que vous avez dit ; s' il me

p794

vient quelque doute, ou quelque
nouvelle difficulté sur ce qui est
de la religion chrestienne, je vous
la proposeray pour en estre éclarcy,
et vous rapporteray fidellement
ce que j' auray découvert à
Paris touchant les malheureux
libertins, avec lesquels je m' estois
perverty.
Le Theol plaise à la divine
bonté nous conduire, et nous assister
durant nos voyages : vous
n' aurez que faire de m' attendre,
car je seray icy de retour dans un
mois precisément, quand je devrois
precipiter les affaires, qui me
pourront survenir au lieu où je
vais.
Or puis que nous avons achevé
de combattre l' erreur, et le mensonge,
il est tres-raisonnable que
nous rendions graces à l' eternelle

p795

bonté, avant que de nous entre-quitter,
puis qu' elle a menagé vostre
salut, et la conduit au port du
bon heur avec tant de facilité,
qu' il estoit ce semble impossible
d' esperer une telle faveur de celuy
lequel vous aviez tant offensé ; disons
luy donc avec cet excellent
poëte, duquel je vous ay desja cité
les vers.
ô Dieu tout bon (...). 

p799

Le D pleust à Dieu que nos
poëtes voulussent imiter cet excellent
personnage, qui parle si
dignement des loüanges de Dieu,
ô quel plaisir il y auroit a les lire ;
je vous proteste que vous m' avez
grandement obligé en me donnant

p800

ces vers ; or avant que prendre
congé de vous, je vous demande
seulement une heure de temps
pour vous proposer quelques autres
raisons, lesquelles m' ont autrefois
donné de la peine.
CHAPITRE 26

dans lequel le deiste dit adieu au
theologien, apres qu' il a proposé les
raisons, pour lesquelles beaucoup de
libertins se perdent ; et puis il declare
sa conversion, et sa resolution
de bien faire. 
Le Theologien
si une heure ne suffit pour
ce sujet, je vous en donneray
trois, proposez hardiment
ces raisons.

p801

Le D vous m' obligez par trop,
je croy qu' une heure tout au plus
sera suffisante pour mettre en avant
ce qui a perdu, ou du moins ce qui
a fort esbranlé plusieurs jeunes
hommes tels que je suis. Voici l' artifice
duquel ils se servent.
Premierement ils ne voyent rien
parmy les catholiques qu' ils ne
taschent à reprendre, et à sindiquer,
afin que ceux ausquels ils parlent,
se scandalisent de la moindre
chose ; par exemple s' ils voyent par
hazard qu' un prestre, lequel s' expose
dans les eglises pour entendre
les confessions, prefere quelque
seigneur de marque, ou quelque
honneste homme de qualité
à un pauvre manoeuvre, ou à quelqu' autre
personne de basse condition,
ils publient par tout où ils
treuvent leurs confidens, qu' il n' y

p802

a rien dans l' eglise, qu' un respect
humain, que tout ce qu' il y a, ne
butte qu' à l' argent, à l' ambition, et
aux commoditez temporelles.
Que diriez vous qu' ils en viennent
jusques là, que quelques uns
d' entr' eux ont embrassé le libertinage,
et ont quitté toute sorte de
religion à cause qu' on les avoit
trop fait attendre dans l' eglise
pour entendre leur confession.
Secondement s' ils voyent, ou
rencontrent quelque prestre, lequel
ne soit pas si modeste, si sage,
ou si sçavant comme requiert sa
qualité, ou comme ils jugent qu' il
devroit estre, ils en font mille risees,
et taschent de calomnier toutes
sortes d' ecclesiastiques sous
pretexte qu' ils en ont treuvé quelqu' un
qui abusoit de son devoir, et
de sa dignité.

p803

Tiercement, s' ils rencontrent
quelque fausseté en lisant quelque
livre d' histoires, ou quelque
livre des proprietez naturelles des
plantes, des animaux, des pierres,
des mineraux, etc. Ils tirent incontinent
une consequence au
desavantage de la religion catholique,
et disent que ce qu' on dit
des miracles, et de la religion, peut
aussi bien estre faus, et controuvé,
comme ce qu' ils ont remarqué
dans ces livres, desquels nous avons
parlé.
4 quand ils lisent la bible, (ce
qu' il ne leur arrive guere souvent,
parce qu' ils n' y treuvent pas les
rimes, ny la douceur qui les chatoüille
en lisant leurs poëtes impudiques,
leurs romans, et leurs
fables) ils tournent tout ce qu' ils
peuvent, en risee, et sont si impudens

p804

qu' ils disent qu' un crocheteur
pourroit composer une bible
mieux faite que la nostre.
Enfin lors qu' ils voyagent, et
qu' ils voyent diverses façons de
vivre, et diverses sortes de religion
entre les divers peuples qui habitent
la terre, ils ayment mieux ne
rien croire du tout, que de suivre
celle-cy, ou celle-là. Voyla une partie
de leurs fantaisies, et des raisons,
pour lesquelles ils abandonnent,
ou n' embrassent pas la religion
catholique.
Le Theol je vous asseure que
vous aviez raison de dire qu' une
heure nous suffiroit pour respondre
à ces raisons, car elles sont si
frivoles, si legeres, et si niaises, qu' il
est impossible qu' un homme de
jugement en soit frappé, ou esbranlé.
Si vous desirez voir plusieurs

p805

autres raisons, pour lesquelles
quantité de jeunes folastres se
laissent aller au libertinage, et à
l' impieté, vous en treuverez dix-huict
dans le 3 article de la question
que j' ay faite contre les athees,
entre lesquelles vous en verrez
quelques-unes qui approchent
des vostres, ausquelles neantmoins
je veux respondre pour
vostre contentement.
Il faut donc que vous sçachiez
que comme la gloire ne destruit
pas la grace, ny la grace la nature,
aussi les loix divines, et les ecclesiastiques
ne destruisent pas, et ne
repugnent point aux loix de l' honnesteté,
ny aux loix de la raison, au
contraire elles les perfectionnent,
et les rendent beaucoup plus excellentes :
or la raison nous dicte
que celuy qui a les affaires du royaume,

p806

de la republique, ou du parlement
en main, et lequel est le
plus souvent contraint de perdre
le boire, et le manger pour rendre
la justice, et pour expedier de pauvres
gens qui l' attendent à sa porte,
et que celuy là lequel est
pressé par des affaires de grande
consequence, doit estre preferé à
celuy qui n' en a point.
Il est donc tres-raisonnable que
le confesseur entende plustost celuy
là que cestuy-cy, puis que les
sacremens ne sont pas instituez
pour empescher le train de la justice,
ny d' aucune affaire honneste,
et licite. Et puis Dieu, et l' eglise
veulent qu' on porte respect aux
magistrats, et à tous ceux qui ont
quelque grande charge, ou quelque
grand merite, qui les rend dignes
d' une singuliere recommandation,

p807

si bien que ce n' est que
manque de jugement, et de consideration,
si quelque libertin se
scandalise, ou plustost feint d' estre
scandalisé, quand on prefere un
homme de qualité soit à la confession,
soit à la communion, soit
à quelque autre chose qui depende
de l' eglise.
Cette preference n' est que du
lieu, du rang, ou du temps, car cela
n' empesche point que le moindre
du monde ne recoive les mesmes
sacremens. Je veux qu' il luy faille
attendre une heure, ou deux pour
se confesser, le voyla bien malade,
luy qui employe les jours, voire le
mois entiers à ses plaisirs, et passe-temps.
Il devroit plustost prendre
occasion de reformer tellement sa
conscience, cependant que Dieu
luy donne ce loisir, qu' il sortist avec

p808

une si ferme resolution de
bien vivre, que jamais il n' offensast
Dieu.
Au reste s' il a des affaires, ou
qu' il soit pressé d' ailleurs, qu' il attende
une autre occasion ; si c' est le
jour de pasques, ou celuy de quelque
autre feste, qu' il reserve sa
confession pour le lendemain, ce
que faisant il n' aura nul suject de
se mécontenter. Je vous donne à
penser si vos confidens ont raison
de conclure leur impieté de ceste
preference, et s' ils ne sont pas merveilleusement
estourdis, et depourveus
de jugement, quand ils
disent qu' on n' a que l' ambition, et
l' avarice en recommandation,
vrayement ceus la se soucient fort
de l' avarice, ou de l' ambition, lesquels
ont quitté tout ce qu' ils avoient,
et toute la pompe, et la vanité

p809

du monde pour suivre les
conseils evangeliques de nostre
Seigneur : il y a bien de l' apparence
que ceux qui se sont rendus miserables
(si j' ose ainsi parler, afin
que je suive les propos, et le sentiment
des libertins) pour suivre
Jesus-Christ, en se depoüillans de
toutes sortes d' honneurs, et de richesses,
avec lesquelles ils pouvoient
vivre splendidement dans
leurs maisons, tels que sont la plus
part de ceux qui se font religieus,
il y a dis-je bien de l' apparence
que ceux là cherchent l' argent, ou
l' honneur.
Vrayement s' ils ne confessoient,
s' ils ne preschoient, et ne faisoient
toutes leurs autres actions que
pour l' argent, ou pour l' honneur,
et qu' ils n' eussent pour fin unique,
ou du moins pour la principale,

p810

et derniere, la gloire, l' honneur,
et l' amour de Dieu devant les
yeux, ils seroient plus miserables
que les bestes, et serois content
qu' on les enfoüist tous vifs dans
les entrailles de la terre.
Non, non, qu' ils ne se persuadent
point que les prestres, lesquels
font bien leur devoir, ayent
autre intention principale que de
plaire à Dieu, de chercher le salut
des hommes, et de faire la saincte
volonté de Dieu, quand ils administrent
les sacremens. S' ils les avoient
hantez, et qu' ils sceussent la
façon dont les bons ecclesiastiques
se comportent en leurs actions,
ils treuveroient que les
bons prestres n' ont point de plus
grand regret, que lors qu' ils ont
laissé passer quelqu' une de leurs
actions, ou de leurs paroles, laquelle

p811

ils n' ont pas rapportee actuellement,
ou virtuellement, expressement,
ou implicitement à la gloire
de Dieu.
Or pour ce qui est des autres,
lesquels ne vivent pas en religieux,
ou selon que requiert l' estat
ecclesiastique, je confesse qu' ils
meritent un grand chastiment,
puis qu' ils sont causes par leurs dereglements,
et par leur vie depravee,
que plusieurs jeunes follastres,
qui ont desja l' esprit disposé
au libertinage, se laissent aller à
l' impieté. Les evesques, et autres
prelats qui ont la charge, et le pouvoir
sur tels ecclesiastiques, doivent
soigneusement prendre garde
à cela, car ils en respondront
corps pour corps, et ame pour
ame au grand jour du jugement,
et en rendront conte au jugement

p812

particulier, lequel se fait tout aussi
tost que l' ame se separe du corps.
Mais un homme de bon esprit,
et de bon jugement, ne se scandalise
pas si facilement, car il sçait
qu' il y a des meschans en toutes
sortes de compagnies : au contraire
il deplore leur condition, et leur
misere, et en advertit les superieurs
ecclesiastiques, s' il le treuve
à propos, à ce qu' ils y apportent
du remede. Je ne veux pas m' amuser
à ce qui est des mensonges, et
des faussetez qui se rencontrent
dans les autheurs profanes de l' histoire,
et dans ceux qui traitent des
plantes, des mineraux, et des animaux,
car nous advoüons cela, aussi
bien qu' eux ; mais c' est estre bien
sot que de conclure le mesme de la
bible, car c' est tout de mesme que
si on inferoit que Dieu fust foible,

p813

ignorant, ou menteur, par ce que
les hommes sont foibles, ignorans
et menteurs, d' autant que la verité
des histoires profanes n' est
appuyee que sur l' authorité des
hommes, mais la verité de l' escriture
saincte est fondee sur la verité
mesme, puis que c' est Dieu, lequel
nous la donnee, et revelee, ce qu' il
a témoigné par une si grande multitude
de miracles, et de faveurs,
qu' il est impossible d' avoir aucune
juste raison d' en douter.
Ils ajoûtent encore malicieusement
que la bible, sçavoir est qu' elle
n' est pas bien faite, et qu' un simple
maneuvre en pourroit faire
autant ; je ne croy pas qu' il puisse
y avoir un plus grand defaut de jugement,
n' y une plus grande ignorance
sur la terre, que de blasphemer
de la sorte touchant l' escriture

p814

saincte, car quand tous les
hommes du monde seroient assemblez,
et qu' ils passeroient toute
leur vie à l' estude, ils ne pourroient
pas composer la valeur d' un
seul verset du premier chapitre
de la genese. Il n' y a philosophie,
ny metaphysique, ny cabale, ny
experience, laquelle puisse nous
enseigner le temps, auquel le monde
a esté creé, ou par quelle partie
sa creation a commencé ; et si je
demande à un cabaliste, ou à un
platonicien pourquoy les corps
sublunaires sont corruptibles, ou
pourquoy il y a des binaires, ou
des dualitez au monde, veu qu' il
semble qu' il seroit meilleur, qu' il
n' y eust que l' agent universel, les
principes simples, et épurez, et l' unité,
personne ne me pourra satisfaire
sur ce suject.

p815

Je demande seulement aux athees,
aux deistes, et à tous ceux
qui ne recognoissent pas la verité
de l' escriture saincte, et qui pensent
que le monde n' a pas esté fait,
qu' ils me fassent la faveur de lire
le trente-huictiesme chapitre du
livre de Job, et qu' ils prennent les
paroles de Dieu pour eux, lequel
reproche l' ignorance de ses oeuvres
à tous ceux qui se meslent
d' en discourir.
(...).

p816

Je laisse le reste, de peur d' estre
trop long ; qu' ils lisent seulement
ce trente-huictiesme chapitre, et
les trois autres suivans, je m' asseure
qu' ils recognoistront qu' il ne
peut y avoir autre verité du commencement
du monde, et de tout
ce qui est proposé dans ces chapitres,
que celle que Dieu nous a revelee
par sa saincte parole, et qui
est contenuë dans l' escriture saincte,
laquelle nous apprend que
Dieu a creé le monde au commencement, (...)
sur lequel se torne, et se fonde toute
la cabale, sans lequel elle ne pourroit
subsister. Si vous voulez sçavoir
pourquoy il a fait la terre,

p817

aussi bien que le ciel, veu qu' il se
pouvoit contenter de cestuy-cy,
qui represente la forme, ou la plus
noble partie du composé, ou l' estre
corporel le plus épuré, le prophete
royal vous respond dans le
pseaume 113 vers. 11 (...), c' est à dire
que Dieu a fait tout ce qu' il a voulu, (...).
Il n' avoit pas besoin du ciel, ny
de la terre, ny de la forme, ny de
la matiere, non plus que du medium,
ou principe mitoyen, ny de
la substance, ou des accidens ; bref
il se fust aussi bien passé de toutes
les creatures, comme il s' en estoit
passé de toute éternité : mais il luy
a pleu de les creer, à ce que toutes
les corporelles servissent à l' homme,
et l' homme à Dieu, dans lequel
il a mis son image, afin de le rendre

p818

bien-heureux, s' il suit sa saincte volonté.
Ce n' est pas merveille si un tas
de jeunes étourdis treuvent à redire
à l' escriture saincte, premierement
par ce qu' ils ne l' entendent
pas, et ne sçavent pas les thresors
inépuisables qui y sont cachez ; secondement,
par ce qu' ils ne suivent
que la volupté brutale des
sens, c' est pourquoy ils ne peuvent
priser, ny gouster ce qui est de l' esprit,
(...).
Pleust à Dieu qu' ils fissent
comme un certain jeune homme,
lequel ayant un bel esprit,
ne prisoit pas davantage la bible
qu' eux, mais apres qu' on luy
eut mis un nouveau testament
grec en main, il ne l' eut pas si tost
leu, qu' il changea de vie, et

p819

d' opinion, car tout aussi tost il confessa
haut et clair, que jamais n' avoit
rien treuvé de semblable parmy
toute la sagesse, ou les livres
des grecs, et des romains, ny parmy
toute la philosophie, et se fist
incontinent religieux dans un ordre
reformé, dans lequel il vit maintenant
avec le grand contentement
de ceux qui le cognoissent.
Je me promets que tous ceux
qui se sont moquez de l' escriture
saincte, feront le mesme, s' ils veulent
prendre la peine de lire le
nouveau testament, ou du moins
les epistres de Sainct Paul avec attention,
et confesseront que jamais
n' ont rien leu, ouy, veu, ou
pensé de si sublime, ny de si excellent,
comme ce qui est dans la bible.
Et puis les miracles ne se sont jamais
faits en faveur d' aucun livre,

p820

comme ils se sont faits en faveur des
veritez qui sont dans l' escriture
saincte : or il ny a nul doute que
les livres, la verité desquels est tesmoignee
par le ciel, et par les faveurs
extraordinaires de l' eternel,
ne soient meilleurs, et plus excellens
que ceux qui n' ont autre tesmoignage
que celuy des hommes,
quels qu' ils soient.
ô pauvres gens, ô miserables
folastres, helas que je vous pleins !
De vous estre abandonnez à vos
fantaisies, et à vos imaginations
chancelantes, et vagabondes ; plaise
à nostre Seigneur les ramener à
la verité de la religion, et à la recognoissance
des veritez, lesquelles
Dieu nous a proposees par sa parole
contenuë dans les saincts livres.
Les divers voyages, et les diverses
cognoissances, et conferences

p821

qu' ils font, est encore cause de ce
qu' ils se jettent tantost d' un costé
tantost d' un autre : aujourd' huy ils
se tournent vers le calvinisme,
demain vers le lutheranisme, puis
apres vers le mahometisme, une
autrefois vers le judaisme, et quand
ils ont quelques bons intervales,
vers la religion catholique ; bref
ils ne cessent de chercher, torner,
et roder jusques à ce qu' ils soient
tombez dans l' impieté, dans l' atheisme,
et dans le libertinage. Je
leur demanderois volontiers ce
que demanda Elie aux israëlites, (...).
Jusques à quand changerez vous tant
de fois d' opinion, et de religion ?
Jusques à quand demeurerez vous
boiteux, et estropiez ? Voyans d' un
costé que la verité vous contraint

p822

de confesser qu' il n' y a point d' autre
religion que la catholique, et
de l' autre ne voulans pas suivre, ny
faire ce qu' elle prescrit.
Et quoy ? Pour je ne sçay quel
mot de gausserie que quelque
malheureux dira de la religion, ou
pour quelque écervelé que vous
rencontrerez, lequel vous estourdira
de son caquet, et voudra controoller
la parole de Dieu, vous
quitterez la foy catholique ! Vous
ne serez pas si lasche que cela, et
me promets que si vous avez un bon
esprit, que vous ne quitterez jamais
la foy divine, quelque royaume
estranger que vous puissiez
visiter, car vous apperceverez facilement
qu' il n' y a rien de semblable,
ny de si excellent dans toutes
les coustumes de vivre, ou dans les
façons de servir Dieu, et de l' adorer,

p823

dont se servent les payens, les
turcs, et les autres nations ennemies
du nom chrestien, comme il
y a dans nostre saincte religion, laquelle
seule adore l' autheur de la
terre, et de l' onde par les voyes, façons,
et ceremonies qu' il nous a
luy mesme prescrites, ou qu' il a
inspirees à la saincte eglise catholique,
apostolique, et romaine,
contre laquelle tout l' enfer, et
tous les efforts des hommes ne
peuvent rien faire qui la puisse ébranler.
Que les calvinistes, et les autres
heretiques soient tant empeschez
qu' ils voudront de resister
aux deistes, ausquels j' ay ouy dire
qu' ils ne peuvent respondre, et devant
qui ils tremblent, car nous
ne craignons non plus les uns que
les autres. Pour moy je treuve que

p824

ceux cy ne sont qu' un rejeton de
ceux là, et quiconque voudra m' aboucher
d' entre les heretiques, je
me fais fort de luy monstrer qu' il
n' a pas meilleur droit que le deiste,
et qu' il faut qu' il embrasse le
deisme, s' il veut maintenir son heresie.
Voyla où les reformateurs
conduisent le monde, lesquels au
lieu de faire des chrestiens reformez,
engendrent des deistes, des
athees, et des libertins. Mais c' est
assez discouru touchant la foiblesse
de ces pauvres esprits, avisez
s' il ne vous reste plus aucune difficulté,
à ce qu' il n' y ait rien qui vous
puisse troubler pendant mon voyage ;
si tost que je seray de retour,
je vous expliqueray ce que vous
n' aurez pas entendu dans tous les
discours que nous avons eu par
ensemble.

p825

Le D je n' ay rien pour le present
qui me tourmente l' esprit,
c' est pourquoy je ne veux pas retarder
plus long temps vostre
voyage, au retour duquel je m' attends
de vous proposer toutes les
difficultez, lesquelles vous avez remises
à la fin du discours, afin que
j' en sois parfaitement éclarcy.
Je m' en vais passer 10, ou 15 jours à
Paris, pour voir si je pourray ramener
quelqu' un de mes camarades
à la religion catholique ; si vous
m' eussiez donné le poëme qui refute
celuy du deiste, je l' eusse opposé
au sien, mais j' espere que vous me
ferez la faveur apres vostre retour,
de m' en donner une copie. Au
reste si j' apprens quelques nouvelles
raisons, qu' ils ayent pour s' opposer
à la vraye religion, je vous les
rapporteray fidellement, à ce qu' il

p826

vous plaise m' enseigner en quoy
elles manqueront.
Le The je vous promets que
je vous donneray toute sorte de
satisfaction, quand je seray de retour,
pourveu que vous trouviez
icy dans le temps prescrit : retenez
seulement toutes les objections,
où raisons, dont ils se servent pour
combattre la verité, afin que vous
soiez armé contre toutes sortes
d' impietez, et que vous puissiez
imposer un perpetuel silence à
tous les libertins, et deistes, avec
qui vous vous rencontrerez desormais.
Or il seroit bon que vous tesmoignassiez
a nostre depart vostre
conversion, et l' abjuration de toutes
vos impietez par quelque forme
de confession de foy, cela vous
affermira davantage en ce qui est
de la vraye religion, et sera cause

p827

que la divine bonté vous remplira
de ses graces, et de ses benedictions.
Le D monsieur, il me semble
que je vous ay rendu des preuves
assez signalees de ma conversion
par mes parolles, et par le contentement
que j' ay pris a tous vos discours,
et par l' aveu que j' en ay fait :
car vous pouvez assurer que ce n' a
pas esté des seules leures que j' ay
quitté les erreurs, qui m' avoient
tenu captif jusques a vostre rencontre,
mais de tout mon coeur, et
de toute mon affection. Je croy que
la façon dont je me comporteray dorenavant
en toutes mes actions, et
mes parolles, vous fera paroistre
avec quelle sincerité j' embrasse la
foy catholique, et quel horreur
j' ay des impietez, ausquelles j' avois

p828

favorisé en quelque façon que ce
soit, jusques à present.
Je desirerois seulement pouvoir
retirer de la mesme impieté
tous ceux qui sont de ma cognoissance,
car ce m' est un grand d' esplaisir
que ceux lesquels j' ayme
passionément, et pour qui je voudrois
endurer la mort, s' il en estoit
besoin, trempent si avant dans le
libertinage. Je ne scache rien que
cela de mal en eux, car ils ne sont
point scandaleux, et font plaisir à
leurs amis fort librement : je croy
que ce sera ce qui me donnera
plus de desplaisir, et d' affliction. Je
les recommande tant que je puis a
vos prieres, a ce qu' il plaise a sa divine
majesté de les regarder de
l' oeil de sa misericorde, et leur donner
une si grande repentance de
tous leurs pechez, et une si grande

p829

aversion de toutes sortes d' impietez,
qu' ils n' ayent aucun repos ny
le jour ny la nuict, jusques à ce
qu' ils ayent quitté leurs mal-heureuses
opinions, et qu' ils ayent
embrassé la religion catholique.
Or il est raisonnable que je vous
témoigne encore un coup ma conversion,
puisque vous le desirez,
car que ne dois-je en faveur de celuy
qui ne m' a rien refusé, et qui
ne me demande rien que ce qui
fait pour mon salut ? Pleust à Dieu
que je rendisse ce tesmoignage du
vray sentiment que j' ay de la verité,
avec mon propre sang : mais la
bonté divine aura mes paroles
pour agreables, jusques à ce que
j' en vienne aux effets, si jamais l' occasion
s' en presente.
J' embrasse donc la religion catholique,
apostolique, et romaine

p830

de tout mon coeur pour jamais,
et deteste les erreurs, les fantaisies,
et les malheureuses opinions
des athees, des deistes, et
autres libertins, ausquelles j' avois
favorisé jusques à ce qu' il eust pleu
à Dieu me faire recognoistre l' aveuglement
ou j' estois, et le peril
que je courois : jamais la verité
chrestienne ne sortira de mon esprit,
et n' auray jamais d' amour
que pour mon sauveur, et redempteur
Jesus-Christ.
Adieu donc malheureux, qui
m' aviez perverti par vos cajolleries,
et par vos impostures : adieu
vers impudiques, ausquels je me
plaisois tant, avant que le rayon de
la lumiere eternelle eust frappé
dans mon esprit. Adieu maudites
voluptez, par qui j' ay esté aveuglé,
enprisonné, et charmé si long

p831

temps. Adieu toute sorte d' impieté,
dans laquelle je m' estois enfoncé
si avant : adieu vanité, adieu tout
ce qui m' a separé de la religion
catholique, et de l' amour, de
l' honneur, et du respect que je
dois à mon Dieu, auquel j' addresseray
desormais ma priere par ces vers.
Vous des meschans l' etonnement
Dieu qui veillez incessamment
dessus les actions des hommes,
qui plus que jamais sont tachez
en cet ingrat siecle où nous sommes,
de toutes sortes de pechez.
Daignez jetter les yeus sur moy
pour vivre selon vostre loy,
j' abandonne celle du vice :
ce monde n' est plus mon vainqueur :
à vous seul je fais sacrifice
de mes desirs, et de mon coeur.
Plongé dedans l' adversité
où le vice m' avoit jetté,
je souffrois un mal incroyable :

p832

mon goust ne treuvoit rien de doux :
bon dieu ! Que l' homme est miserable
quand il est éloigné de vous.
Ce monde doit finir un jour,
qui par un illicite amour
rend nos ames si criminelles :
vous seul pouvez tousjours durer :
les recompenses eternelles,
de vous se doivent esperer.
Aussi depuis que j' ay gouté,
Seigneur, de la felicité
qui dans le paradis abonde :
au pris des delices du ciel,
je treuve les douceurs du monde
plus ameres que n' est le fiel.
Le bien que vous avez promis
dedans le ciel à vos amis,
ce n' est point un bien perissable :
le monde n' a que de l' ennuy,
et c' est bastir dessus le sable
que de s' appuyer dessus luy.
Avant que Dieu m' eut visité,
j' estoy tousjours espouvanté,
mais ! Jouissant d' un bien si rare,
le recit ne m' estonne pas
des tourmens que l' enfer prepare
aus meschans apres le trespas.

p833

Adieu ces écrits, et ces vers
dont je voulois par l' univers
que ma loüange fust semée :
si je ne suis plus amoureux
d' une si vaine renommée,
c' est signe que je suis heureux.
Quand je cherissois ces escrits,
et que mon coeur, et mes esprits
bruloient d' une impudique flame :
sans repos je passois les nuits,
et tous les jours dedans mon ame
naissoient nouveaux sujets d' ennuis.
Maintenant que j' en suis sorti,
et que vous m' avez garanti,
Seigneur, d' un si cruel naufrage :
asseuré dedans vostre port
j' apperçois au gré de l' orage
les hommes courir à la mort.
Vivans parmi l' ambition
ils n' ont que de l' affliction,
et ne sentent que du martyre,
le repos ne les suit jamais :
aussi n' est-ce qu' en vostr' empire
où regn' absolument la pais.
Grand Dieu, qu' un rayon de vos yeux
eleve leurs coeurs dans les cieux

p834

au mespris de toute la terre,
et que d' un sainct amour touchez
ils sortent vainqueurs de la guerre
qu' ils ont avecques les pechez.
