
CHAPITRE 16


p405

dans lequel il est monstré que la science,
ou la volonté divine n' est point cause
de nos pechez : et quelle distinction,
ou identité il y a entre les perfections
divines, avec beaucoup d' autres choses,
par lesquelles les quatrains du
deiste sont refutez, depuis le vingt-neufiesme,
jusques au 36. 
Le Deiste
je luy veux demonstrer par les propres
fondemens de son escole, que toute punition cesse
apres le trespas, et qu' elle repugne à l' equité
supréme.

p406

qu' il me responde à cét argument, par lequel
je luy donne le choix entre ces deux questions :
tous mouvemens suivent la cognoissance de
Dieu, ou les actions de nostre volonté suivent
son ordonnance.
s' il choisit le premier, accordant que tous
mouvemens suivent le sçavoir divin, est-il pas
impudent d' opposer le vouloir divin aux objects
de sa cognoissance, et rendre le vouloir, et le
sçavoir de Dieu contradictoires ? 
Le Theologien
demeurez-là, et
voyons un peu ceste
belle demonstration
deistique, advisons si
ce dialecticien quadragenaire entend
bien les fondemens de l' escole
de theologie, et s' il en tirera
sa pretenduë doctrine.
Il nous donne le choix de deux
questions, qu' il embroüille assez

p407

finement, de peur qu' on y voye
clair, mais (...) :
car tous les mouvemens
ne suivent pas la cognoissance
en qualité d' effects, puis que
la science, par laquelle Dieu cognoist
tous les mouvemens, n' est
pas active, et cause des effets, mais
elle est speculative ; et est necessaire
que tous nos mouvemens soient
premierement futurs, avant que
Dieu sçache qu' ils doivent arriver,
si bien que le sçavoir divin
suit plustost (s' il faut ainsi parler)
les susdits mouvemens, qu' il ne les
devance ; c' est pourquoy je nie ceste
premiere proposition.
Pour l' autre question, à sçavoir
si les actions de nostre volonté suivent
l' ordonnance de Dieu, je respons
qu' il n' y a que les bonnes
actions conformes aux conseils,

p408

ou aux commandemens de Dieu,
qui suivent son ordonnance, car
les mauvaises sont contraires à ces
mesmes ordonnances ; aussi bien
que les duels sont contraires aux
ordonnances, et edits du roy.
Voyla donc vostre sophisme par
terre, et vostre quatrain qui commence,
s' il dit en premier lieu, mis à
neant.
Or c' est fort mal à propos de
comparer le vouloir de Dieu avec
les objects de son sçavoir, car s' il
estoit question d' oposer quelque
chose au vouloir, qui est un acte divin,
il falloit prendre quelque autre
acte, ou quelque privation d' acte,
et non pas les objects : mais
poursuivez car vos autres quatrains
pourront nous faire voir
plus clairement la ruse de ce galand,
et nous donneront occasion

p409

d' expliquer cecy plus au long.
Le Deiste
car si quelques objects de la science de Dieu
sont repugnans à sa volonté, faudra-il pas
confesser que la cognoissance, et la volonté divine
seront diverses, comme sont nostre cognoissance,
et nostre volonté ? 
Le Theol nenny, cela ne sensuivra
nullement, car il n' est pas
necessaire que les actes par lesquels
Dieu veut, et cognoist, soient
reellement differents, comme les
nostres, à ce que les objects de l' acte
de cognoissance soient oposez,
et repugnans à sa volonté ; c' est assez
que le mesme acte, par lequel
Dieu veut, et cognoist, tout
ce qu' il veut, et cognoist, ait une si
grande vertu, qu' il responde aux
actes divers de nostre volonté, et
de nostre entendement, à ce que
les objects de cet acte divin, entant

p410

qu' ils sont cognoissables, ou
cogneus soient opposez à ce mesme
acte, entant qu' il est consideré
comme acte de volonté, ou que
les susdits objects soient repugnans
aux objects de ceste volonté.
Ne voyez vous pas que les objects
d' une mesme science sont opposez,
aussi bien que ceux d' une
mesme volonté ? N' est il pas plus
clair que le soleil, que Dieu cognoist
toute sorte de mal, et de
non estre ? Ce mal est-il pas opposé
à sa volonté, et à ce qu' il veut ?
Puis que c' est la nature de la volonté
bien reglee de ne se porter,
ny pouvoir jamais se porter au
mal en l' approuvant, et en l' aymant :
la volonté divine est bonne,
et le mal que Dieu sçait, est
mauvais ; quelle merveille y a-il
donc que l' object de son sçavoir

p411

soit opposé à son vouloir, si ce n' est
que vous trouviez merveilleux
que le mal soit opposé au bien.
De là vous pouvez facilement
conclurre que le cognoistre, et le
vouloir de Dieu ne sont pas choses
differentes, comme ils sont en
nous, encore que leurs objects exterieurs
soient differents, et separez,
d' autant que l' acte de l' entendement,
et de la volonté divine ne
dépend pas de ces objects exterieurs,
puis qu' ils sont creez, et dépendans,
et l' acte divin increé, et
independant.
Pour entendre cecy, il faut vous
souvenir de ce que nous avons dit
cy devant, sçavoir est que l' acte
divin unique, et tres simple est si
parfait, qu' il peut infiniement davantage,
et respond à une plus
grande quantité, et diversité d' objects,

p412

que toutes nos puissances, et
toutes nos actions, de sorte qu' il
fait, qu' il gouverne, et qu' il remuë
tout, bien qu' il soit immuable.
Imaginez vous que le poinct du
centre lequel est un cercle, produise
toutes les lignes, qui en sont tirées,
en telle façon que ces lignes
soient diverses, et contraires, (comme
elles sont en effect) direz vous
que ce poinct soit contraire à soy-mesme ?
Rien moins, car il demeure
tousjours le mesme, nonobstant
les differents effects qu' il produit.
Est il pas vray qu' un poinct de
lumiere rayonne dedans tout l' emisphere ?
Tous les rayons sont differents :
et si on luy oppose quelques
corps opaques de tous costez,
il produira des ombres contraires,
les unes en bas, les autres
en haut, les unes à droict, et les autres

p413

à gauche ; ou si vous luy opposez
un corps opaque d' un seul costé,
et qu' il soit libre de l' autre, il
sera empesché de son operation
d' un costé, laquelle il fera de l' autre :
par consequent les objects ou
les effects differents ne concluent
pas que l' acte qui leur respond,
soit different, mais tout au plus
que l' acte est assez parfaict pour se
porter vers des objects, ou des effects
distincts.
Or personne ne doute de la supréme
perfection de l' acte divin,
lequel peut tout ; autrement s' il ne
pouvoit tout, il en faudroit mettre
plusieurs, et nous en pourrions
concevoir un plus parfaict, car supposons
que Dieu ait besoin de
deux actes, je vous demande si
nous ne pouvons pas concevoir
quelque acte, lequel soit si parfait

p414

qu' il ait tout seul la vertu, et la perfection
de tous les deux, sans doute :
il faut donc que cet acte, qui
contient la perfection des deux
soit en Dieu, si vous n' aymez
mieux dire que ce qui est en la
seule imagination, soit meilleur,
que ce qui est en nature, et en
estre, et que ce qui est imaginaire,
soit plus excellent que ce qui est
reellement, et de fait, ce qui est
impossible : partant il faut necessairement
qu' il n' y ait qu' un seul
acte en Dieu, lequel contienne
toutes les perfections possibles,
ce qui est aussi veritable, comme
il est necessaire que Dieu soit.
Ce que je vous pourrois encore
expliquer par l' exemple d' un miroir
parabolique, auquel on considere
un point, qui contient toutes
les perfections du miroir, bien

p415

qu' il soit indivisible, ce que quelques
mathematiciens appellent
focus , d' autant que tous les rayons
paralleles du soleil qui tombent
sur la surface concave du miroir se
refléchissent en ce poinct, lequel
se retreuve dans l' axe au point qui
est éloigné du sommet du miroir
par la quatriesme partie du costé
droict de la parabole, suivant laquelle
le miroir a esté fait, comme
demonstre Ghetaldus dans la 6
proposition du traicté qu' il a composé
sur ceste matiere.
Or imaginez vous maintenant
que la glace du miroir soit infiniment
grande, le susdit poinct aura en
soy une infinité de rayons, et par consequent
sera infiniment ardent, et
luisant ; c' est en cette façon que
Dieu comprend tous les actes, et
toutes les perfections possibles

p416

dans son acte tres-simple, tres-indivisible,
et tres-pur, mais avec
cette difference que ce poinct lumineux
du miroir dépenderoit de
la surface, et des rayons qui tombent
paralleles à l' axe dudit miroir :
mais l' acte divin ne depend
d' aucune chose, car il est de soy-mesme,
et contient toutes les perfections
qu' on se peut imaginer,
et au delà infiniment.
Le D ces exemples sont merveilleusement
beaux, mais je vous
confesse qu' ils sont trop relevez
pour moy, c' est pourquoy je desirerois
grandement qu' il vous
pleust me les expliquer plus au long.
Le Th monsieur, il n' est pas
maintenant à propos que nous
quittions la suite de ce poëme
pour nous amuser à cela, il vaut

p417

mieux que vous attendiez jusques
à ce que je vous aye satisfait sur
tous vos quatrains, je vous promets
une journee entiere pour
l' esclaircissement des doutes que
vous aurez sur les exemples desquels
je me seray servy en tout nostre
discours, ou sur quelqu' autre
matiere que ce soit.
Or je veux vous apporter un
exemple plus facile pour vous
monstrer que Dieu fait tout par
un mesme acte, lequel comprend
toutes les perfections possibles
sans aucune contrarieté.
Jettez donc les yeux sur l' unité,
car elle vous fera toucher au doigt
tout ce qui appartient à l' acte tres-simple,
et infiny de Dieu, d' autant
qu' elle peut, davantage que tous
les nombres pris ensemble ; premierement,
elle contient tous

p418

les nombres en eminence, comme
l' acte divin tous les actes creez,
et toutes les creatures.
2 elle est sa racine, son quarré,
son cube, son cubicube, et toute
sorte de nombre cossique, comme
l' acte divin est sa vie, son immensité,
sa bonté, sa puissance, sa
justice, et toutes ses perfections.
3 l' unité est infiniment éloignée
des nombres, comme Dieu
l' est des creatures, bien qu' elles
prennent leur origine de Dieu,
comme les nombres de l' unité.
4 l' unité n' a en soy ny parité,
ny imparité, ny composition, bien
qu' elle produise les nombres
pairs, impairs, et composez ; ainsi
l' acte divin estant tres-simple, et
tres-un, produit les creatures corporelles,
les simples comme les

p419

anges, et les composees, comme
les hommes.
5 tous les nombres sont nombres
par la participation de la seule
unité, de laquelle ils dépendent,
tellement qu' il est impossible
qu' ils soient sans elle ; c' est ainsi
que toutes les creatures n' ont
point d' estre que par la participation
de l' acte divin, duquel elles
dépendent eternellement : ce qu' à
fort bien recognu le roy prophete,
quand il a dit : (...) : ce que paraphrase
excellemment le grand du perron.

p420

lors que de tes thresors l' abondance tu verses,
pour combler le desir tour à tour renaissant,
et que ta dextre s' ouvre à leurs plaintes diverses,
en leurs stiles divers ils te vont benissant.
destournes-tu, Seigneur, tant soit peu ton visage,
leurs forces tout à coup se sentent decliner :
l' ame les abandonne, et sans une autre image
en leur premiere poudre on les voit retourner. 
par où vous voyez que nous
dépendons plus de l' acte divin
que les rameaux ne dépendent de
leur tronc, ny le tronc de sa racine,
ny les ruisseaux de leur fontaine,
ny les rayons du corps lumineux,
car nous sommes comme les
membres, lesquels ne sont rien
sans l' unité, nos estres estans un
pur neant sans l' estre divin.
6 tous les nombres tant grands
que petits portent l' image de l' unité,
dans laquelle ils se retreuvent

p421

tousjours ; et toutes les creatures
ont l' image, ou le vestige de la divinité
emprainte dans leur estre.
7 la vertu de l' unité est si grande
qu' elle ne peut estre ny finie,
ny égalee par les nombres, car
donnez quelque nombre que
vous voudrez, l' unité le peut tousjours
augmenter à l' infiny ; la puissance
de l' acte divin est si grande
qu' elle ne peut estre bornée par
les creatures, car bien que Dieu
eust produit une infinité de terres,
de soleils, d' estoilles, et de mondes,
comme a pensé Jordan Brun,
ce que plusieurs philosophes,
et theologiens soustiennent estre
possible, si Dieu le vouloit :
neantmoins Dieu pourroit encore
produire d' autres mondes à
l' infiny, et les pourroit mettre
dans le mesme lieu, auquel seroient

p422

les autres, par penetration
de leurs dimensions.
8 tout est immuable en l' unité :
et tout est tres-parfait en l' acte divin,
mais si tost que les creatures
sont produites, et considerees hors
des idees de l' unité archetype, elles
sont sujettes au changement
que la dualité, ou le binaire sortant
de l' unité arithmetique nous
represente. C' est ainsi que vostre
poëte considere la justice, et la
bonté de Dieu, lesquelles ne sont
qu' une mesme chose, et un mesme
acte divin, bien qu' elles nous paroissent
dissemblables par les effects :
s' il se fust souvenu que les
parallaxes, ou diversitez d' aspects
nous font paroistre le soleil en un
lieu, où il n' est pas, et qu' elles nous
rabaissent les objects, lesquels sont
rehaussez par les refractions, encore

p423

qu' ils demeurent immobiles
en un mesme lieu ; s' il se fust souvenu
qu' une colomne peut tantost
estre à la main droicte, tantost
à la gauche, tantost dessus, ou dessous,
tantost derriere, ou devant,
il n' eust pas conclu que la justice, la
bonté, et les autres attributs divins
ayent diverses subsistences,
bien que Dieu produise divers effects
par iceux, mais ramassant ses
esprits, et ses pensées en l' unité, il
eust confessé que tout cela n' est
qu' une mesme chose en Dieu.
9 adjoustons pour le neufiesme
parallele de l' unité avec Dieu, que
comme elle est la cause, et la fin de
tous les nombres, puis qu' elle les
produit, se retreuvant tousjours
au commencement, et à la fin ; et
qu' elle est aussi parfaite avant
qu' il y ait aucun nombre, comme

p424

apres qu' elle a produit tout ce que
vous voudrez : aussi Dieu est la cause,
et la fin de toutes les creatures,
et est infiniment parfait avant la
creation, toutes les creatures ne
luy apportant autre perfection
que celle que les nombres apportent
à l' unité, à laquelle ils n' adjoustent
rien de nouveau.
10 enfin comme il n' y a nul nombre
devant, ny apres l' unité, et
qu' elle a toutes ses perfections
sans l' ayde des nombres, lesquels
n' ont aucune perfection, et ne meritent
aucune loüange qu' entant
que l' unité est parfaite, et qu' elle
leur donne ce qu' ils ont ; de mesme
il n' y a nulle creature devant,
ou apres Dieu, qui est l' alpha, et
l' omega de toutes choses : et tout
ce qu' elles ont de bon, de beau, de
grand, et d' excellent, n' est qu' une

p425

participation de la bonté, de la
beauté, grandeur, et excellence de
l' acte divin ; d' où nous devons conclure
que si nous sommes sages, ou
forts, sçavans, ou bons, c' est parce
que Dieu est tres sage, tout puissant,
tres-sçavant, et tresbon.
Jamais je n' aurois fait, si je voulois
vous rapporter toutes les ressemblances
que l' unité a avec l' acte
divin, car à peine treuverez
vous une chose en celuy-cy, qui ne
soit en celle-là ; par exemple si vous
voulez comparer toutes les diverses
especes aux divers nombres,
lesquels se conservent par l' indivisible
de leurs differences, comme
l' essence des choses, (...) vous verrez que l' unité
produit les diverses especes : et que
comme un mesme esprit donne la

p426

sagesse à l' un, à l' autre la prophetie,
ou le don des langues, (...),
de mesme l' unité influë,
et envoye les diverses proprietez,
qui se retreuvent au binaire,
ou ternaire, et dans tous les
autres nombres, si bien que toutes
les loüanges qu' on donne à
quelque nombre que ce soit, sont
deües, et retournent à la loüange
de l' unité.
Pleust à Dieu que vostre poëte
voulust faire le mesme en toutes
ses oeuvres, et qu' il prit occasion
de toutes les creatures de loüer
son createur, puisque toute la
loüange qu' on leur attribuë, est
deüe à Dieu ; car elles n' ont rien
qui ne vienne de sa main liberale.
Mais qu' il le fasse, ou non, Dieu tirera
de la gloire de toutes ses oeuvres

p427

mal-gré les impies, qui treuvent
à redire en ses oeuvres : et fera
paroistre au grand jour du jugement
que les deistes ont repris
mal à propos la justice divine, par
laquelle les meschans seront punis
eternellement, s' ils meurent opiniastres
dans leur iniquité. Vous
pouvez voir plusieurs choses de
cette unité dans nostre 6 question
sur la genese.
Le D je vous suis grandement
redevable de m' avoir enseigné
cet exemple, par lequel j' ay mieux,
ce me semble, conceu les perfections
divines, et leur unité en
Dieu, que je n' avois jamais fait ; je
voy maintenant tres-clairement
que ce poëte deiste est aussi mauvais
dialecticien, comme il est
mauvais poëte, et mal-heureux
homme.

p428

Je poursuis neantmoins ses
maudits quatrains, à ce qu' il ne me
reste aucune difficulté, esperant
que vous accomplirez vostre promesse
à la fin du poëme, m' expliquant
ce que je n' auray pas entendu
en vos responses, telles que
sont les parallaxes, et leurs refractions,
desquelles vous avez parlé
cy devant. Voicy donc toute la
substance de son 33 quatrain.
Le Deiste
de plus, si tout ce qui est en l' essence divine
est essence et si ces attributs y gardent leur
difference, ne serons nous pas contraints de
confesser autant de subsistances dans l' essence
divine, comme il y aura d' attributs, ce qui est une
grande absurdité. 
Le Theol ce dialecticien
monstre qu' il n' a pas passé le compendium 

p429

de sa logique, et qu' il
n' entend rien en la metaphysique,
et moins encore en la theologie,
car bien que les attributs divins
soient une mesme chose avec
l' essence de Dieu, neantmoins
nous pouvons les distinguer en
telle façon que les actions de l' un
ne seront pas les actions de l' autre,
formellement parlant ; non qu' un
attribut puisse estre sans l' autre, ou
qu' il ait quelque chose de reel, et
d' essentiel que n' ait pas l' autre, car
tous ne sont qu' une mesme chose,
mais parce que nous concevons
Dieu d' une autre façon, quand
il punit, que lors qu' il recompense,
et nous le considerons sous
autre raison formelle, quand il
produit la nature de chaque chose,
que quand il la cognoist, ou la
destine à quelque fin.

p430

Or à ce que vous entendiez bien
cette matiere, il faut que vous sçachiez
que Dieu n' a qu' un seul acte
divin, lequel est sa mesme essence,
et qui est si grand, et si immense
qu' il contient eminemment toutes
les puissances, facultez, qualitez,
et effects, qu' on se peut imaginer,
ou qui sont possibles : de là
vient que jamais nul effect, fust il
infiny, ne respond à l' acte divin, et
ne le peut égaler en aucune façon.
Or comme cet acte respond à
plus de perfections, qu' il n' y en a
de possibles en toute l' estenduë
des creatures, quelles quelles
soient, il s' ensuit que nous ne pouvons
concevoir la perfection de
cet acte par une seule pensee, et
sous une seule raison, autrement
il faudroit que cette pensee fust infinie,
et par consequent qu' elle fust

p431

Dieu ; c' est pourquoy nous taschons
d' en comprendre ce que
nous pouvons par nos diverses
conceptions, et pour ce faire nous
choisissons plusieurs raisons formelles,
par lesquelles nous traçons
les idees, que nous avons des
perfections divines, selon les divers
effects que nous voyons paroistre
icy bas par la force des sens,
de la raison, ou de la foy, lesquels
nous sçavons estre produits, et
conservez par cet acte divin.
Mais toutes ces diverses pensees
ne font pas qu' il y ait aucune
multiplicité de subsistences en cet
acte, lequel est tres-un, et tres-simple,
et par consequent c' est un
abus insupportable de penser que
les attributs divins ayent diversité
d' essence, ou de subsistance, comme
vostre poëte concluoit contre

p432

nous : car c' est assez que nous
ayons des raisons suffisantes de nostre
costé, afin de distinguer plusieurs
attributs en Dieu, bien
qu' ils ne soient que ce mesme acte,
duquel nous avons parlé jusques
à present.
Je pourrois vous apporter plusieurs
exemples pris de la nature,
pour vous faire voir qu' une mesme
chose peut avoir diverses proprietez,
bien qu' elle soit simple, et
unique, comme nous voyons
dans le mesme point d' un miroir,
lequel reflechit les especes, et les
rayons du soleil en diverses parties,
et represente plusieurs objets,
quoy que diversement esloignez,
et d' une differente grandeur ; ce
qui fait qu' on luy peut attribuer
autant de proprietez, comme il
peut representer d' objects divers,

p433

ou rejetter de rayons en diverses
parties. Le point de l' oeil, dans lequel
s' accomplit la vision, termine
une infinité de piramides, lesquelles
ont leurs bases, et leurs
cones distinguez ; donnez luy autant
de noms, et de proprietez,
comme il recevra de rayons visuels,
et de cones radieux, cela ne
fera pas, qu' il ait aucune diversité
de subsistences en soy-mesme,
mais nous fera seulement concevoir,
que sa vertu est si grande,
qu' il fait autant, comme feroit
une grande multitude de vertus
espanduës en diverses parties de
l' oeil.
Or vous pouvez appeller ce
point du christallin, maison de la
lumiere, entant qu' il reçoit le
rayon du soleil : maison de la
quantité, puis qu' il reçoit les especes,

p434

qui la representent ; maison
des tenebres, qu' il apperçoit par
l' absence de la lumiere : bref maison
de tout ce qu' il reçoit ; pourquoy
ne pourrons nous donc pas
donner une varieté d' attributs à
Dieu, puis qu' il est infiny en toutes
sortes de vertus, sans que ces
perfections soient differentes de
son essence, et sans qu' elles ayent
autre subsistence que l' essence divine.
Il n' est pas besoin que je m' estende icy
davantage, car vostre
poëte ne le merite pas, lequel s' il
se fust souvenu de la distinction
que nous mettons entre les attributs
divins, qui n' est que de raison
raisonnee, rationis ratiocinatae, il
n' eust eu garde d' inferer la diversité
de subsistences entre les attributs
divins ; et quoy ? Si l' entendement,

p435

et la volonté n' ont point en
nous, ny en l' ange d' autres subsistences
que celle de nostre ame ; si
l' appetit sensitif, la faculté nutritive,
la digestive, et les autres, qui
sont és bestes, n' ont point d' autre
subsistence que celle de tout le
composé, comment le deiste veut-il
que les attributs divins ayent
autre subsistence que celle de
Dieu tres-simple, et tres-une ?
Ce qui n' empesche pas qu' en la
divinité il ne se retreuve trois subsistences
relatives dans les 3 personnes
divines, qui sont reellement
distinctes entr' elles, mais elles
sont une mesme chose avec l' essence
divine ; ce qui s' accorde fort
bien avec une tres-simple subsistence
absoluë, et commune aux 3
personnes, laquelle n' est rien autre
chose que l' essence divine, voila

p436

ce que j' ay pensé estre necessaire
de rapporter icy, à ce que vostre
poëte ne vous abuse plus desormais,
vous proposant ce qui n' est
nullement. à quoy vous pouvez
adjouster que le centre du cercle,
bien qu' indivisible, reçoit, et termine
toutes les lignes, qui se peuvent
tirer de la circonference,
quoy qu' infinies ; ce qui est un fondement
suffisant, à ce que nous
formions une infinité de conceptions
sur ce point, lesquelles seront
toutes veritables, et neantmoins
pas une n' égallera la vertu d' eminence,
qu' à la simplicité de ce centre.
à combien plus forte raison cét
acte divin, qui est le centre de tout
ce qui est intelligible, nous donnera-il
sujet de concevoir son infinie
perfection par divers attributs,
et par une infinité de conceptions ?

p437

Et puis le cercle estant tres-uniforme,
et égal en soy-mesme comprend
neantmoins une infinité
d' angles, ce qui est cause qu' on
peut dire qu' il a des differences infinies,
à raison que sa perfection
d' uniformité, et d' égalité respond
à tout autant d' angles divers, comme
on s' en pourroit imaginer ;
d' où vient que c' est par ses arcs,
que nous trouvons, jugeons, et
mesurons tous les angles, quels
qu' ils soient ; que sera-ce donc de
cét acte divin, qui contient par une
si parfaite eminence toutes les
perfections des creatures futures,
presentes, et possibles ? Cela ne doit-il
pas suffire, à ce que nous concevions
une infinité de perfections
avec des idees, et des intelligences
de nostre esprit aussi parfaitement
distinctes, comme s' il y avoit des

p438

distinctions, et diversitez en cet
acte ? Sans doute.
Passons donc outre, et disons que
cet acte est la vraye mesure de nos
perfections, duquel tant plus nous
approcherons, et plus nous serons
parfaits, comme tant plus qu' un
polygone approche de l' égalité, et
de la grandeur du cercle, et plus il
devient parfait, et capable : mais
bien qu' il s' en approche de plus
en plus à l' infiny, jamais neantmoins
il ne peut se rendre si parfait ;
de mesme que la creature s' approche
tant qu' elle voudra, ou
qu' elle pourra de Dieu, jamais elle
n' atteindra la perfection divine,
à laquelle nos perfections estans
parangonnees, ne sont que des
ombres en presence de cette infinie
lumiere ; et par consequent
toutes nos perfections prises ensemble

p439

ne peuvent non plus égaller
la perfection de l' acte divin,
que toutes les ombres la perfection
de la lumiere, ou le polygone
inscript la grandeur de son cercle.
C' est pourquoy quelques subtils,
et sçavans que s' estiment les
deistes, c' est folie à eux, s' ils
pensent pouvoir comprendre les
perfections divines, et une manie
de se rire de ce que nous disons
qu' elles ne peuvent estre comprises
par la foiblesse de nos entendemens.
Adjoustons encore un
exemple, afin que vous entendiez
plus parfaitement cette difficulté.
Nous voyons qu' une chandelle
fait trois effects differents en produisant
les ombres du corps, qui
luy est opposé, car si elle rencontre
un corps plus grand que n' est
sa flamme, elle produit une ombre

p440

laquelle a son cone vers elle, et sa
base luy est opposee, on l' appelle
calathoide ; si le corps est moindre
que la chandelle, l' ombre est conique,
et contraire à l' autre ; et s' il
est égal, l' ombre aura la figure d' une
colomne sans s' estressir, ou
s' eslargir, les deux lignes qui bornent
sa largeur, estans paralleles.
Le soleil nous monstre l' ombre
conique, lors qu' il envoye
l' ombre de la terre dans la lune
durant l' eclypse ; mais il ne fait
point les deux autres especes
d' ombre icy bas, d' autant que tous
les corps sublunaires qu' il illumine,
sont moindres que luy. La
chandelle nous fait paroistre toutes
les trois, comme vous pourrez
experimenter à ce soir, si vous luy
opposez trois corps differents, un
plus grand, un égal, et un moindre,

p441

lesquels produiront un' ombre en
forme de cone renversé laquelle
ira s' eslargissant de plus en plus à
l' infiny, une cylindrique, et l' autre
conique. C' est assez poursuivez
maintenant.
Le D je vous prierois volontiers
avant que passer outre, de me
dire en quel lieu l' ombre de la terre
se termine, sçavoir mon si elle
va par delà la lune, ou non : et me
donner encore quelque exemple
afin de m' esclaircir davantage sur
ce que vous avez dit, et fort bien
preuvé, sçavoir est que Dieu peut
faire choses differentes, et contraires
par un seul acte, lequel n' aura
point de diverses subsistences.
Le Theol il est fort facile
de vous satisfaire sur ces deux
points ; car pour ce qui est de l' ombre
de la terre, elle a quelquefois

p442

en sa longueur 264 semidiametres,
pareils à son semidiametre, et par
consequent elle surpasse la lune
de 196 semidiametres, d' autant
que la lune n' est jamais plus esloignée
de la terre que de 68 semidiametres :
mais elle ne peut atteindre
Venus, ou Mercure, parce qu' ils
sont esloignez de mille cent quarante
et deux semidiametres. Je
vous pourrois demonstrer tout ce
que je viens de dire, mais nous serions
trop long temps ; je passe
donc au second poinct, en vous
produisant un exemple sans sortir
de nostre sujet, car la lune vous
contentera, laquelle est diversement
illuminée par le soleil, bien
que le soleil se tienne en un mesme
lieu, car tantost elle est pleine,
tantost nouvelle, d' autrefois en
croissant, et puis en decours ; bref

p443

elle peut changer de toutes ces
faces encore que le soleil fust immobile,
tel que je le suppose maintenant,
afin que vous perceviez la
force, et la naïfveté de l' exemple.
Supposons donc que le soleil
soit immobile au centre du monde
(selon la figure que j' en ay apportee
dans la 9 question sur la genese)
et que la terre soit au lieu, où
est maintenant le soleil, sçavoir
est au 4 ciel ; je dy que nonobstant
l' immobilité du soleil, nous
pourrons voir toutes les diverses
faces, ou apparences de la lune
d' un mesme point de la terre, car
quand elle sera opposee au soleil,
elle nous paroistra plaine : quand
elle sera vis à vis, elle ne paroistra
point : bref autant de divers lieux
qu' elle changera, elle nous paroitra
diversement autant de fois, encore

p444

que le soleil soit en un mesme
lieu. Disons maintenant que
l' acte divin est comme un infiny
soleil immobile, lequel produit
divers effects sans se changer, ou
s' alterer en nulle façon. Or Dieu
nous a donné nostre liberal arbitre,
par lequel nous pouvons approcher
de luy en gardant ses
saincts commandemens, ou nous
en esloigner en les mesprisant ; le
soleil n' est pas plus prest d' illuminer
la lune, quand elle s' expose à
ses rayons sans empeschement,
que Dieu est de nous remplir de
ses graces, et de nous donner la
gloire eternelle, pourveu que
nous n' opposions point la terre de
nos imperfections, et de nos pechez
à sa lumiere.
Il faut que vous reteniez de ce
discours que Dieu ne se change

p445

pas, et que son acte n' a point de diverses
subsistences, bien qu' il produise
tout ce qui se voit icy bas, et
que vous m' advoüiez que vous
vous estes trop facilement laissé
decevoir à cet imposteur, lequel
n' a remply ses quatrains que de
mensonges, et de calomnies.
Le D jamais je ne fus plus content,
et jamais verité n' entra mieux
dans mon esprit que celle-cy, c' est
pourquoy je poursuis, afin que
vous me fassiez recognoistre les
faussetez des autres quatrains ; voicy
ce que contiennent le 34, et 35.
Le Deiste
puis que Dieu est un pur acte lequel precede
les choses temporelles de toute eternité, celuy là
ne nie-il pas sa tres-simple unité, qui dit que les
choses temporelles font avant les eternelles ?

p446

si son sçavoir suit nos effects contingens, et
que ces effects ayent pris leur estre, et leur
naissance en temps, la science de Dieu ne sera
elle pas temporelle, et finie aussi bien que ses
objects, et par consequent Dieu ne sera-il pas de
mesme essence ? 
Le Theol je ne voy pas que la
consequence vaille rien, car celuy-là
ne nieroit pas l' unité divine, qui
diroit que les choses temporelles
seroient avant les eternelles ; toutefois
il diroit choses impossibles,
car c' est une manifeste contradiction
de dire que ce qui est temporel,
soit devant ce qui est eternel.
Mais je voy bien où il en veut
venir, c' est qu' il veut destruire la
solution que nous avons apportée
au 30, et 31 quatrain, où j' ay dit que
nos actions futures sont plustost
causes de ce qu' il les sçait, que n' est
sa science cause de ce que les effets

p447

contingents sont futurs, bien qu' à
proprement parler ne l' un, ne l' autre
ne soit cause, ny effect.
Pour entendre cecy, eslevez vostre
esprit à la consideration de la
science de Dieu, et à la façon qu' il
se comporte de toute eternité envers
chaque chose, et pour lors
vous recognoistrez le bel ordre,
qui se treuve entre la cognoissance
de Dieu, et tout ce qui doit jamais
arriver, ou ce qui a desja esté
fait : mais il faut premierement
supposer que la science de Dieu
est Dieu mesme, lequel bien que
tres-simple, et tres-un, ne peut
estre conceu des hommes, que par
diverses actions de l' entendement :
encore ne sçaurions nous
l' entendre parfaitement avec toute
la multitude de nos cognoissances ;
or, (afin que nous ne nous jettions

p448

point dans l' abysme de son
essence) pour ce qui est de sa science,
bien qu' elle ne soit pas moins
simple que son essence, puis que
c' est une mesme chose, nous la divisons
en 2 considerations pour
ayder nostre esprit, car nous l' appellons
science de simple intelligence,
et science de vision : par la 1,
Dieu cognoist tout ce qui est possible,
soit qu' il y ait, ou qu' il n' y ait
aucune chose creée : c' est par elle
qu' il voit une infinité de mondes
qu' il pourroit faire en une infinité
de diverses manieres, quelques
conditions que vous puissiez supposer ;
et ceste science est premierement
entenduë, que la seconde,
d' autant qu' elle ne suppose aucun
acte de la volonté divine, sans lequel
il est impossible qu' aucune

p449

chose soit passee, presente, ou future.
La seconde science de vision
suppose cet acte de la volonté, par
lequel Dieu veut, ou permet que
tel, ou tel mouvement arrive en
un tel, ou tel temps, sans lequel
acte Dieu ne peut sçavoir les choses
futures, puis que vrayement elles
ne seroient pas futures, si Dieu
n' avoit premierement determiné
de les faire, ou de permettre qu' elles
fussent faites ; mais aussi tost
qu' il a eu ce decret, il est asseuré
qu' elles arriveront, et par consequent
necessaire que Dieu le sçache
par ceste science de vision, laquelle
n' eust jamais esté, si ces choses
n' eussent esté futures par la force
de cet acte precedent de la volonté
de Dieu ; par où vous voyez
que ceste science n' est point cause

p450

de ce que nous offensons Dieu,
n' y mesme de ce que nous faisons
de bonnes oeuvres, car s' il estoit
possible que Dieu ne cogneust
point ces mouvemens futurs, ils
ne laisseroient pas d' arriver, puis
qu' il a voulu les faire, ou les permettre,
et qu' il a sceu qu' ils arriveroient,
supposé le decret divin.
C' est maintenant icy ou il faut
que vous preniez garde, que la
science de vision n' est pas temporelle
comme les effects, qui ne paroissent
qu' en temps, mais elle est
eternelle, aussi bien que Dieu mesme,
avec lequel elle est une mesme
chose, car bien que les effects
ne paroissent qu' en un certain
temps, neantmoins il est vray
qu' ils sont futurs de toute eternité ;
ce qui a esté cause à mon advis
que plusieurs philosophes n' entendans

p451

pas bien ces mysteres, ont
creu que le monde avoit esté faict
de toute eternité : il semble qu' ils
veissent ce que nous disons maintenant,
sçavoir est que le decret
de Dieu, par lequel le monde a
esté fait, est eternel, et que la science
par laquelle il cognoist ce monde,
qui n' a esté fait que depuis
cinq, ou six mil ans, est pareillement
eternelle.
Cela n' empesche point que
nous ne puissions concevoir quelque
ordre és choses eternelles, car
si tout est icy si bien ordonné, il ne
faut pas douter que tout ne soit en
un plus bel ordre és idees eternelles,
lesquelles on prend ordinairement
pour le monde archetipe, duquel
dependent toutes les creatures ;
c' est pourquoy nous mettons
cet ordre, duquel nous parlons

p452

maintenant, lequel est fondé sur
ce que s' il estoit possible qu' il y
eust quelque suitte de temps, ou
de causes, et d' effects en Dieu, il
faudroit dire en premier lieu, qu' il
entenderoit tout ce qui est possible :
secondement qu' il proposeroit
de produire tout cela, ou quelque
partie qui luy plairoit : tiercement,
qu' au mesme instant qu' il
auroit pris ceste resolution, il sçauroit
asseurement, que tout ce qu' il
auroit ordonné, arriveroit.
C' est en ceste façon que nous
disons que les choses, entant que
futures, sont plustost causes de la
science que Dieu en a, que non
pas ceste science des choses futures,
bien que ce soit plustost l' acte
de la volonté divine, qui est cause
de ceste science ; j' ay dit plustost , par
où j' entends, que s' il se retreuvoit

p453

des causes en cecy, il en faudroit
ainsi parler : mais comme tout cela
est eternel, ce n' est qu' un ordre de
raison, par lequel nous apprehendons
du mieux qu' il nous est possible,
les choses eternelles, n' y ayant
icy autre cause que l' acte de la volonté
de Dieu, par lequel il est la
vraye cause de ce que les choses
sont futures, car du moins il les
permet, et determine par ce mesme
acte de sa volonté, qu' il ne les
empeschera pas.
Or pour respondre (...) à vos
quatrains, je dy que la science de
vision n' ensuit pas nos contingents
effects, entant qu' ils sont produits
en une certaine saison, mais seulement
entant qu' ils sont futurs, ce
qui est au mesme moment de l' eternité,
auquel est l' acte de la volonté
divine, par lequel Dieu veut, ou

p454

permet que cecy, ou cela se fasse
au temps, et au lieu qu' il a choisi :
et par ainsi ceste science n' est
pas temporelle, mais eternelle,
aussi bien que l' essence de Dieu,
avec laquelle elle est une mesme
chose.
Le D veritablement vous
m' avez grandement contenté de
ceste responce, et où je pensois
que nous eussions plus de raison,
je voy maintenant que ce ne
sont que cajolleries : aussi n' avons
nous garde de nous abboucher,
ou contester avec de tels personnages
que vous ; je vous proteste,
que je quitteray ceste opinion
pour tout jamais, si vous me donnez
une aussi entiere satisfaction
sur le reste des quatrains ; voicy la
substance du 36.
CHAPITRE 17


p455

auquel les quatrains du deiste depuis
le trente sixiesme jusques au quarante
troisiesme sont refutez : et est monstré
quel ordre Dieu tient en ses
actions, et en ses pensees, comment
il cognoist tout, comment sa prescience,
et son decret s' accordent avec
nostre liberté, etc. 
Le Deiste
si Dieu pouvoit estre deceu, et qu' il arrivast
contre ce qu' il auroit proposé, son propos,
et son vouloir seroient infirmes, et accompagnez
de doute, d' erreurs, et d' ignorance. 

p456

Le Theologien
non, Dieu ne peut estre
deceu, et jamais
rien n' arrivera qu' il ne
le sçache auparavant
de toute eternité, puis que sa science
est infinie sans aucun erreur,
sans doute, sans ignorance, estant
aussi impossible que Dieu ignore
quelque chose, comme il est impossible
que Dieu ne soit pas
Dieu, ce que vous pouvez sçavoir
de ce que je viens de dire contre le
quatrain precedent.
Prenez donc garde que tout ce
que Dieu a decreté, arrive tousjours
selon qu' il a resolu, mais ce
qui vous deçoit icy est que vous
vous imaginez qu' il a resolu que
toutes choses arrivassent absolument,

p457

et necessairement, ce qui est
tres faux, car il a tellement proposé,
et arresté que telle, ou telle chose
se feroit, ou ne se feroit pas, qu' il
a tousjours conservé la nature, et
la façon d' agir de chaque chose, si
bien qu' il n' a pas voulu que nous
fissions aucune chose bonne, ou
mauvaise, si premierement nous
n' y consentions avec une pleine
liberté, faisant en cela comme un
bon roy, ou un bon pere qui ordonne,
et veut que son fils estudie,
mais il ne le veut pas, si l' enfant ne
s' y porte gaillardement, et librement.
Or ceste resolution consideree
en Dieu n' est jamais que pour le
bien, il n' ordonne point, et ne
veut jamais que nous nous portions
au mal, estant impossible
que la souveraine bonté ait aucune

p458

inclination au mal ; neantmoins
Dieu permet que le mal se fasse, et
quand quelqu' un offense, il est
certain que Dieu a voulu permettre
que cet homme use de sa mauvaise
volonté, de sorte que quelque
chose que nous fassions, bien, ou
mal, Dieu ne peut rien ignorer, ou
douter de ce que nous ferons ; et telles
qu' il voit nos actions avant qu' elles
soient faites, telles arriveront-elles,
non par ce qu' il les sçait, avant
qu' elles arrivent, mais par ce
que sa science est infinie, et embrasse
aussi bien le futur, que le
present, ou le passé ; or comme
Dieu a voulu creer les hommes
dans le monde, il a veu leur portee,
et tout ce qu' ils feroient à tout
jamais, et par ainsi immediatement
apres sa resolution de les
creer, il a cognu par ceste science,

p459

que nous avons appellee de vision ,
toutes les actions, paroles, et pensees,
que tous les hommes, et les
anges auroient ; sa science pourtant
n' estant pas cause de tout cela,
veu qu' elle en seroit plustost
l' effect, s' il pouvoit se retreuver
quelque dependance en Dieu, de
sorte qu' on pourroit appeller les
choses futures, ou la futurition des
choses la cause virtuelle de la science
de vision ; c' est à dire que si ceste
science pouvoit estre produite par
quelque object, ce seroit par ceste
futurition , mais comme cet object
n' est au plus que corelatif à la science
de vision , il ne peut en estre
cause, qu' à la maniere des objects,
lesquels ne sont que termes, ou
terminans, et non pas causes motives ;
car Dieu n' a autre motif de sa
cognoissance que son essence divine,

p460

bien que pour cognoistre les
choses futures, il faille qu' elle soit
comme modifiee du decret divin
de faire, ou permettre ce qui arrivera :
mais ceste modification n' adjouste
rien de nouveau à l' essence
de Dieu, quoy qu' il semble à nostre
trop courte imagination, laquelle
ne peut apprehender tout
ce que Dieu fait par un seul acte, si
ce n' est par plusieurs pensees, et
discours : c' est en quoy nostre Dieu
est grandement admirable, de ce
que quelque bel esprit que nous
pensions avoir, il faut qu' il employe
mille, et mille sortes de pensees
pour atteindre tant soit peu à
la pensee divine.
Le D pleust à Dieu que nostre
poëte fust icy, certainement je ne
pense pas qu' il ait jamais ouy traitter
ceste matiere si dignement ; si je

p461

puis un jour l' aboucher, ce qui ne
peut arriver que lors que je me
transporteray à Paris, car on ma asseuré
qu' il y demeure, je luy communiqueray
ceste excellente response,
laquelle je pense estre capable
de luy faire quitter ses opinions,
esquelles on m' avoit embarqué
sous pretexte de quelque
discours enfilez selon la doctrine
de ce poëme ; je poursuis s' il vous
plaist, afin de me degager des autres
erreurs.
Le Deiste
il n' y a point d' apparence que Dieu depende
de nous, et des lieux, et du temps pour nous
faire bien ou mal, et qu' on se puisse distraire de
son vouloir.
autrement ce seroit le reduire à l' estat de celuy
qui pensant parvenir à ce qu' il esperoit, se
treuve mesconté, et malheureux. 

p462

Le Theol voicy une imposture
bien signalee de vouloir faire à
croire au monde que les catholiques
dient que Dieu est en suspend
sur ce qui arrivera, et que
nous pensions le pouvoir distraire
de son vouloir ; il faut avoir la teste
bien grotesque à ce qu' une opinion
si bigearre y puisse entrer.
Sçachez donc que nous croyons
fermement que Dieu ne peut estre
en suspend, et comme aux attentes,
et aux escoutes pour sçavoir
ce qui arrivera, d' autant que
toutes les choses futures, et toutes
les pensees des anges, et des hommes
qui seront jusques à l' eternité,
luy sont plus cognuës, que ne nous
est cognu le soleil en plein midy,
car puis qu' il est infiny en tous ses
attributs, ne plus ne moins qu' il
est tout puissant, il est aussi tout

p463

sçavant : duquel la puissance, et la
science n' est autre chose que son
essence, et le sçavoir duquel embrasse
parfaitement tout ce qui
est passé, present, et futur.
Or comme sa science ne depend
point de nous, puis qu' il l' avoit
avant que nous fussions, aussi
sa puissance est absoluë, et independante
de tout estre creé, si
bien qu' il peut faire de nous ce
qui luy plaist, car il a un domaine,
et une seigneurie tres-parfaite sur
nos corps, et sur nos ames, de sorte
que quoy qu' il fasse, ou vueille faire
de nous, il n' y a personne qui le
puisse reprendre : non plus que le
pot ne peut reprendre son potier,
soit qu' il le rompe, soit qu' il le
conserve, et l' employe à cecy, ou à
cela ; il ne faut point que la creature
cherche d' autre raison des

p464

actions de son createur, que sa pure
volonté, et qu' elle ne die autre chose
que (...). Nous
sommes donc bien esloignez de
reduire nostre createur à quelque
imbecilité, et de penser qu' il se
mesconte, car il ne peut jamais estre
deceu, non plus qu' il ne peut
decevoir : mais je voy bien ce qui
vous blesse le sens, et l' imagination,
c' est que vous ne pouvez, ou
plustost vous ne voulez concevoir
comment Dieu se comporte envers
nous pour nous sauver, et
comment sa providence, et sa predestination
se peut accorder avec
la puissance que nous avons de
nostre costé de nous perdre, ou de
nous sauver.
Escoutez donc bien attentivement
ce que je m' en vais vous enseigner.
Comme Dieu est tout

p465

puissant, il se peut comporter envers
nous comme il luy plaist, si
bien que s' il veut, il nous rendra
bien-heureux sans que nous y cooperions ;
mais s' il ne veut que nous
soyons sauvez sans nostre cooperation,
cela ne peut se faire autrement :
or je soustiens, et vous asseure
avec tous les catholiques, que
Dieu a tellement disposé de nostre
salut, que jamais il ne nous
donnera la gloire eternelle qu' au-prealable
nous ne la meritions ; (je
parle de ceux qui ont l' usage de
la raison) lequel s' est obligé
de nous ayder à la meriter toutes
et quantefois que nous suivrions
les bons mouvemens du sainct
esprit.
Voyla d' où vient qu' il depend
maintenant de nous mesmes à ce
qu' il nous punisse, ou qu' il nous recompense,

p466

sans toutefois qu' il soit
en suspend si nous ferons cecy, ou
cela, et si nous serons damnez, où
sauvez, car avant que nous fussions
nez, il le sçavoit aussi bien
comme si cela fust desja arrivé ;
or bien qu' il le sçache, il attend à
nous chastier, ou à nous recompenser,
lors que nous avons accomply
ses commandemens, ou
que nous luy avons desobey : et en
ceste façon le supplice, ou la recompense
depend de nous, des
lieux, et du temps, desquels Dieu
ne dépend point, car il est absolu
en toutes façons, et ne peut avoir
aucune dependance.
Voyons l' autre point, lequel appartient
au vouloir divin, auquel il
vous semble que de contrarier, c' est
reduire Dieu à l' imbecilité ; mais
ceste pensee ne provient que d' ignorance,

p467

ou de malice : d' ignorance, si
vous ne sçavez qu' il faut considerer
la volonté de Dieu en deux façons,
premierement entant qu' elle
est volonté absoluë, et de bon
plaisir, (...), secondement
entant qu' elle est (...),
c' est à dire entant qu' il nous commande,
ou nous defend quelque
chose : c' est ceste volonté qui n' est
pas absoluë, mais conditionnee ;
il ne veut pas que nous la suivions,
ou que nous luy obeyssions par
contrainte, et necessairement, mais
librement ; il veut que nous puissions
ne la suivre pas, si tant est
que nous soyons si malheureux,
que de ne la vouloir pas executer :
c' est donc à ceste volonté, à laquelle
nous pouvons nous opposer, ce
que faisans, Dieu n' en reçoit aucune
incommodité, n' y ne se treuve

p468

mesconté, car il treuve son
conte tres-juste, aussi bien lors que
nous luy desobeyssons, comme
quand nous luy obeyssons ; veu qu' il
sçavoit asseurement, avant que le
monde fust, ceux qui luy desobeyroient,
ou qui suyvroient ses
commandemens, et nonobstant
ceste science il n' a pas voulu absolument
empescher que nos volontez,
et nos autres puissances ne
le portassent au mal, mais il nous a
donné puissance de faire, ou ne
faire pas ce qu' il auroit commandé,
monstrant en cela qu' il vouloit
avoir des serviteurs libres, et non
contraints.
Le Deiste
c' est dire que Dieu est indigent comme
l' homme, et qu' il a besoin de quelque object
pour venir à la fin de son intelligence.

p469

c' est l' assubjettir à l' homme comme le pot au
potier, qui se divertit souvent de son but, et de
l' usage, auquel il avoit esté predestiné. 
Le Theol nenny, celuy qui
dit que l' homme peut se rebecquer,
et rebeller contre la divine
volonté, à la façon que je l' ay expliqué,
ne mesure pas le souverain
agent à la puissance de l' homme,
laquelle est finie en toutes façons,
et celle de Dieu infinie ; l' homme
est bien loing de pouvoir faire
tout ce qu' il veut, il ne fait pas seulement
tout ce qu' il doit, et son
pouvoir est si court, qu' il n' y a si
petit animal, qui ne le surmonte
en quelque chose ; mais Dieu fait
à tout moment, tout ce qu' il
veut.
C' est aussi parlé fort mal à propos,
et en ignorant à 24 carats, de
conclure que Dieu ait besoing de

p470

quelque creature pour venir à la
fin de son intelligence, laquelle ne
depend en nulle façon, ny ne peut
dependre de nous, ou de quelque
autre chose que ce soit, estant elle
mesme sa fin, et son bonheur, car
bien qu' il n' y eust aucune creature
ny en acte, ny en puissance, c' est à
dire, bien qu' il n' y eust aucune
creature possible, Dieu seroit autant
heureux comme il est, puis
que ce n' est pas la possibilité, non
plus que l' existence, ou l' actualité
des creatures, qui constituent la
felicité divine, mais la seule contemplation
de la divine essence,
des trois personnes, et de tous les
attributs qui sont en icelle.
Neantmoins nous pouvons dire
en quelque façon, que Dieu
s' assujettit à l' homme par une certaine
condescendence, et anthropopatie,

p471

en ce qu' il accommode
son concours, et son ayde à nostre
volonté, de sorte que quand nous
voulons bien faire, il ayde cet acte
de volonté, et quand nous voulons
faire mal, il ayde encor la mesme
volonté, autrement elle ne pourroit
exercer aucun acte, car elle depend
du concours divin tant en
son operation, et en ses actions,
qu' en son estre.
Or la raison pourquoy il nous ayde
a exercer toutes nos actions exterieures,
et interieures, est, parce
que sçachant que nous ne pourrions
rien sans son secours, il a voulu nous
aider en tout ce qui seroit necessaire
pour agir, de sorte que nous pouvons
en quelque façon appeller
son concours general, qu' il preste
à toutes les creatures, l' accomplissement
de la nature, parce que

p472

sans cét ayde elle est imparfaite, et
boiteuse.
Mais cette subjection n' est pas
s' assujettir, c' est plustost maistriser
la creature que de s' assujettir à elle,
car c' est monstrer la dependance
qu' elle à de Dieu, sans lequel
il seroit impossible qu' elle fust. Or
bien que Sainct Paul compare Dieu
à un potier, et l' homme à un pot,
ce neantmoins il y a bien de la difference,
car Dieu n' a que faire de
l' homme, mais le potier à besoing
de son pot : le pot estant faict ne
depend plus actuellement des
mains du potier, mais l' homme
depend de la puissance de Dieu ; le
pot n' a jamais dependu, n' y ne dependera
du potier quand a sa forme,
ou à sa matiere, ny quant à la
quantité, mais tout ce qui est en
l' homme tant substantiel, qu' accidentel

p473

dépend de Dieu en toutes
façons ; bref il y a plus grande difference
du rapport que le pot a à
son potier avec le rapport que
l' homme, et toutes les creatures
ont à Dieu, qu' il n' y a de difference
entre le ciel, et la terre, entre le
noir, et le blanc, entre les tenebres,
et la lumiere.
Toutefois si le pot, duquel le
potier se vouloit servir à faire parade
sur un buffet, vient à se rompre
entre ses mains faute de la matiere,
qui n' est pas bien obeissante,
ou à servir à quelqu' autre chose
de plus vil, l' homme que Dieu
avoit creé pour estre bien-heureux,
peut aussi se divertir de la
beatitude par sa mauvaise vie,
mais avec cette difference, que
l' homme se divertit volontairement,
et librement, et le pot, ou sa

p474

matiere se divertit necessairement.
Mais c' est assez dit touchant
cette difficulté, car vostre principal
dessein estoit de prouver que
Dieu est subjet à l' homme, supposant
la verité de ce que nous avions
dit auparavant, c' est pourquoy
ayant respondu à cela, nous n' avons
pas besoin d' un plus long
discours, passez aux autres quatrains.
Le Deiste
si Dieu voit tout ce qui est futur, quelle
apparence y a-il qu' il ait deffendu ce qu' il sçait
nous estre inévitable par son vouloir ?
quelle apparence y a-il qu' il nous commande
ce qu' il sçait que nous ne ferons point, ou que
par insuffisance il retienne sa volonté sur le
bien, ou le mal qui vient de nostre choix ? 
Le Theol je laisse maintenant

p475

la façon par laquelle Dieu cognoist
les choses futures, parce
que cela importe fort peu icy, et
dy qu' il est tres faux que Dieu
nous ait deffendu ce qu' il sçait
nous estre inévitable, car il repugne
à la bonté divine ; voyla pour
le quarante-uniesme quatrain :
pour l' autre, je dy qu' il nous peut
commander une chose, bien qu' il
sçache que nous ne la ferons
pas ; c' est assez que nous la puissions
faire, il n' a pas seulement
le domaine de nos actions,
mais aussi de nostre pouvoir ; il
est aussi bien maistre du fond,
et de la racine, comme de l' usufruict,
et des fleurs, ou des fruicts :
il peut donc obliger l' homme à
faire tout ce qui luy est possible,
puis que tout ce qui peut sortir
de la puissance de l' homme, appartient

p476

entierement à Dieu.
Pour le reste du quarante deuxiesme
quatrain, je ne sçay ce que
vous voulez dire, car qu' est-ce que
retenir son vouloir par insuffisance
sur le bien, ou le mal, qui nous
est libre ? Si cette insuffisance se
prend du costé de Dieu, cela est
impossible, car c' est le sadai , le
dieu tres-suffisant, et tres-puissant,
pour faire, entendre, et vouloir
tout ce qui luy plaist ; or si vous
n' entendez pas vostre poëte, non
plus que moy, passez outre jusques
à ce qu' il vous ait expliqué ses
phantaisies, et ses pensees qui sont
aussi obscures, comme elles sont
niaises, et brutales.
Le D il me semble qu' il veut
dire par cette retention de volonté sur
ce qui vient de nostre choix , que Dieu
ne peut qu' il n' ordonne, et ne

p477

vueille le bien, et le mal que nous
faisons, autrement il se feroit quelque
chose sans son vouloir.
Le Theol s' il le prend en
ceste façon, il faut que vous sçachiez
la doctrine des theologiens
sur ce suject, lesquels enseignent
qu' il ne se peut rien faire en
ce monde que Dieu n' ait voulu de
toute eternité par un acte positif,
et reel de sa volonté, sans lequel
rien ne peut estre : si bien que
quand nous faisons quelque chose,
Dieu ne retient pas son vouloir
là dessus, comme si sa volonté estoit
oyseuse, et en suspend, car avant
que nous fassions ce qui depend
de nostre choix, la volonté
de Dieu s' est portee vers l' oeuvre,
ou l' action future, mais en diverse
façon lors qu' elle a esté bonne, et
lors qu' elle est mauvaise, car l' acte

p478

positif de la volonté divine s' est
porté vers celle-cy en la reprouvant,
et vers celle-là en l' approuvant,
vers celle-cy en la hayssant,
et vers celle-là par amour.
Pour bien entendre cecy, apprenez
que la volonté de Dieu estant
infinie, et immuable, penetre
tout, et qu' il n' y a rien qui la
puisse eviter, ou surmonter : laquelle
mesme est cause de ce qu' il
n' y a point d' autres mondes que
cestuy-cy, et de l' absence de toutes
les creatures, qui ne sont point, et
pourroient estre, d' autant qu' elle
a voulu aussi expressement qu' il
n' y eust point d' autres creatures,
comme elle a voulu que celles-là
fussent, qui composent tout ce
grand univers. D' où vient qu' en
ceste façon nous pourrions dire
que Dieu seroit aussi bien la cause

p479

de tout ce qui n' a point esté creé,
comme de ce qui a esté creé, d' autant
que l' acte positif par lequel il
a voulu que rien ne fust que ce
qu' il a voulu faire, est si puissant,
que si par impossibilité les creatures
qui ne sont point, eussent peu
estre d' ailleurs, que de la puissance,
et de la volonté de Dieu, cet acte
positif, par lequel il a voulu
qu' elles ne fussent pas, eust empesché
qu' elles ne fussent sorties d' ailleurs ;
et eust fait qu' elles fussent
demeurees dans leur neant sans
pouvoir sortir dehors le non estre ;
ou si elles eussent desja esté, il les
eust reduites au neant.
Vous voyez donc comment
Dieu ne retient pas sa volonté par
insuffisance sur le bien, ou le mal
fait, qui depend de nostre liberté,
et pure contingence : mais il faut

p480

d' un autre costé que vous preniez
garde de ne vous pas jetter en l' autre
extremité, qui est de penser que
Dieu soit cause de nos pechez, ou
qu' il les vueille, car cela est tres-faux,
et tres-impossible, nonobstant
que sa volonté soit portee
vers iceux par un acte positif, mais
acte de reprobation, et de hayne,
qui est le mesme acte en substance,
par lequel il s' ayme soy-mesme,
car la raison pourquoy il hait le
peché, est parce qu' il est opposé à
sa bonté, et que sa malice nous prive
de la beauté, et de la grace, laquelle
nous rendoit amis de Dieu,
et nous unissoit à luy par amour :
par où vous voyez que Dieu ne se
peut aymer que quand et quand il
ne haysse le peché.
Le D si Dieu se porte vers le
bien et le mal-fait, qui depend de

p481

nostre liberté, par un acte positif, il
est donc, ce semble la cause de nos
pechez, aussi bien que de nos bonnes
oeuvres ; ou s' il n' est cause de
nos mesfaits, il ne peut sçavoir s' ils
arriveront, ou non.
Le Theol je vous prie de vous
rendre attentif à ce que je diray, et
vous serez content : Dieu n' est
point cause de nos mesfaits, et neantmoins
il sçait asseurement, si
nous les commettrons, et combien
de pechez nous ferons en
toute nostre vie, voire combien
en feroient tous les hommes, s' ils
vivoient une eternité avec une pareille
liberté, qu' ils ont, et avec
toutes les occasions, et circonstances,
lesquelles seroient possibles
en ceste eternité.
Mais voyez comment, pourquoy,
et par quoy il le sçait ; et jamais

p482

vous ne vous imaginerez
que Dieu puisse estre cause du
mal, ou qu' il puisse ignorer aucune
chose. Donc avant que Dieu se
fust resolu de faire ce monde avec
tout ce qui y est, il sçavoit qu' il le
pouvoit faire en un milion d' autres
façons, qu' il ne la pas fait, et
prevoyoit que s' il le creoit comme
il est, et qu' il donnast la liberté aux
hommes de faire, et de choisir le
bien, ou le mal, que tous ceux qui
font maintenant de bonnes oeuvres,
et de mauvaises, les feroient
vrayement, comme il les prevoyoit.
Or vous voyez qu' en cet instant
d' eternité Dieu n' est pas cause
du mal, et neantmoins qu' il sçait
desja par l' infinité de sa science (laquelle
penetre toutes les choses
possibles, en supposant quelques

p483

conditions, et circonstances que
vous voudrez) que s' il fait un monde
tel que cestuy-cy, que les hommes
commettront les pechez, que
vrayement ils font maintenant,
par ce qu' ils esliront le mal, bien
qu' ils peussent eslire le bien. Voyla
pour ce qui est de la science infallible
de Dieu touchant le mal ; car
il n' est pas icy besoing que je vous
die qu' elle est la raison precise, et
formelle, par laquelle Dieu sçait
tous les pechez futurs, ce que nous
serons peut estre contraints de dire
par apres.
Voyons donc maintenant pourquoy
il n' est pas cause de nos pechez ;
c' est par ce que le peché est
une aversion, et un esloignement
de Dieu, et un desordre, qui empesche
que nos actions ne regardent,
et ne tendent à Dieu, comme

p484

à leur derniere fin, or Dieu ne
peut estre cause que nous nous esloignons
de luy, puis qu' il desire
estre aymé, et honoré de tout le
monde. Et bien qu' il nous ayde à
faire l' action, et à produire l' action
de la volonté, par laquelle nous
commettons le peché, neantmoins
la diverse façon par laquelle
Dieu, et l' homme font une mesme
action quand à son estre reel,
est tres-suffisante à ce que l' homme
tout seul, et non Dieu, soit cause
du mal ; or ceste diversité d' agir
est en ce que l' homme faisant ceste
action ne garde pas l' ordre, et
la subordination, par laquelle il devroit
rapporter son action à Dieu,
au contraire il pervertit cet ordre,
et se soustrait de l' obeissance, qu' il
doit à son createur ; et par ainsi il
manque à son devoir, d' où vient

p485

que la cause du peché est dite deficiens ,
ce qui ne peut estre attribué
au souverain agent, et au createur
de toutes choses.
Mais le concours de Dieu, par
lequel il fait la mesme action que
nous faisons, est bien ordonné, et
suyvant le decret eternel de sa
saincte volonté, car Dieu preste
son ayde au pecheur pour l' amour
qu' il se porte, veu que ce concours
divin avec nostre liberal arbitre se
rapporte à la gloire de Dieu, comme
à la derniere fin de tous les
estres : est-ce pas une chose qui
reüssit à la gloire de Dieu de voir
que nous ne sçaurions mesme
nous vanter, ou nous glorifier de
l' avoir offensé, si premierement il
ne nous a donné la force, et la liberté
de ce faire ? Est-ce pas une
chose qui fait paroistre la puissance

p486

de Dieu, de ce que nonobstant
qu' on abuse de sa puissance, il en
sçait tirer de l' honneur, et de la
gloire, et qu' il n' y a malice aucune,
laquelle puisse surmonter sa bonté,
et sa justice.
Ce que je vous dy touchant le
concours divin, il faut aussi l' entendre
du decret eternel, par lequel
Dieu a voulu permettre que
l' homme choisit le mal, de sorte
neantmoins qu' il luy donne la
force, et l' addresse de suivre plustost
le bien que le mal, s' il vouloit.
Mais gardez vous bien de penser
que cette permission soit semblable
à celle que les legislateurs
donnent de faire quelque chose,
et qui rend l' action legitime, et
loüable : ce n' est pas ainsi qu' il la
faut entendre, car ce n' est rien autre
chose, sinon qu' il ne nous veut

p487

pas absoluëment empescher de
faire ce que nous voudrons, mais
veut que nous usions pleinement
de nostre liberté, laquelle bien
qu' il n' ait pas ordonnee, ou peu
ordonner, et rapporter au mal,
neantmoins il n' a pas voulu empescher
qu' elle s' y rapportast, et
qu' elle l' esleust, si tant est qu' elle
se vueille rendre esclave du peché.
Cette puissance qu' elle a de pouvoir
pecher, vient de la part de son
non estre, entant qu' elle n' est pas
de soy-mesme, car Dieu ne nous
a pas donné cette puissance pour
offenser, ny mesme entant qu' elle
regarde le peché, ce que Sainct
Augustin a fort bien penetré, lors
qu' il a dit au quatorziesme de la
cité de Dieu, chap. 13, (...).

p488

Or puis que Dieu nous donne
une force suffisante pour resister
à toutes sortes de pechez, et qu' il
ne tient qu' à nous, lors que nous
suivons cette puissance, ou plustost
cette impuissance que nous
avons au peché, laquelle procede
de ce que nous sommes tirez du
neant, il n' y a personne qui puisse
justement rejetter le blasme sur
Dieu, c' est à nous tous seuls qu' il
en faut rapporter la cause, et le
desordre qui suit de là, car le peché
est un éloignement volontaire,
par lequel nous nous retirons de
l' ordre que Dieu a estably, c' est
pourquoy il ne peut avoir aucun
rapport à Dieu, comme les autres
deffauts naturels, qui procedent
du non estre des creatures, lesquels
peuvent avoir quelque habitude,

p489

et rapport à la gloire de Dieu, veu
qu' ils ne sont pas cause qu' aucune
chose soit soustraite de l' obeyssance,
que nous devons au createur ;
il n' y a que le seul defaut moral, et
volontaire, lequel nous devons eviter
plus diligemment que la peste,
ou que quelque autre malheur
que ce soit, fust-ce la peine
eternelle de l' enfer, laquelle il
faudroit plustost endurer, si cela
estoit en nostre choix, que de consentir
à aucun peché, d' autant que
ceste peine eternelle se peut reduire,
et rapporter à la gloire de
Dieu, ce qui ne peut convenir au
peché.
Le D monsieur, il n' y a plus
qu' un doute, qui me travaille sur
ce suject, c' est que je ne peux comprendre
comment Dieu a sçeu de
toute eternité, que, par exemple, je

p490

tomberois en ceste folle opinion
du deisme, et en tous les autres
pechez que j' ay faits, si quand et
quand je ne m' imagine qu' il m' a
esté impossible d' eviter tout ce
que Dieu à preveu de moy, autrement
si cela fust avenu au contraire,
Dieu eust esté deceu, ce qui ne
se peut.
Le Theol s' il n' y a que cela
qui vous fasse de la peine, nous aurons
bien tost fait ; pourveu que
vous puissiez, et vueilliez supposer,
et concevoir ce qui est tres-veritable ;
c' est que la prescience de Dieu
n' est point passee, mais elle est
tres-presente, ce qu' estant presupposé,
et estant necessairement veritable,
puis qu' en Dieu il ne peut y
avoir rien de passé, et que tout est
present dans le poinct immense
de son eternité, je dy que l' acte

p491

de la prescience divine ne nous
est pas plustost present, entant
qu' il cognoist nos pechez presens,
que nos pechez mesmes, lesquels
n' ont point de dependance de ceste
prevision, non plus que si elle
n' estoit point.
Imaginez vous donc que Dieu
n' ait point sçeu le mal que vous
feriez, ny l' opinion des deistes que
vous embrasseriez, afin de mieux
concevoir ce qui est de la verité.
Si cela estoit, ne m' accorderiez
vous pas que vous pourriez eviter
le peché, et l' opinion susdite ? Puis
qu' il n' y a que l' infallibilité de la
science divine, qui vous fasse de la
peine là dessus, et qui semble vous
poser une loy d' infallibilité, ou de
necessité, encore que cela ne soit
pas. Or il est tres-asseuré que la
precognoissance de Dieu ne vous

p492

impose non plus d' infallibilité, ou
de necessité de pecher, que si Dieu
ne sçavoit point vostre peché,
qu' apres qu' il seroit fait.
Imaginez vous encore que vous
n' ayez point besoing du concours
divin, et que vous ne dependiez
point de lui en aucune façon, mais
que vous ayez ceste puissance, et
ceste liberté de faire le mal, et le
peché ou d' un autre que de Dieu,
ou de vous mesme (si par impossible
cela pouvoit estre) vous m' advoürez
que pour lors ceste prescience
divine ne vous imposeroit
non plus de necessité, ou d' infallibilité,
que la cognoissance qu' un
homme auroit de ce que vous
ferez d' icy à une heure, laquelle
n' empescheroit pas vostre liberté,
ny la puissance que vous avez de
ne faire pas ce qu' il sçait que vous

p493

ferez. Or asseurez vous que la prescience
de Dieu ne vous impose
rien autre chose, qui prejudicie à
vostre liberté, que ce que vous impose
la cognoissance que cet homme auroit.
Le D je voy bien maintenant
que le 41 quatrain de ce maudit
poëte est tres-faux, par lequel il
m' avoit persuadé que ce que Dieu
nous deffendoit, nous estoit inevitable ;
mais vous m' avez fort bien
fait concevoir qu' il ne nous estoit
non plus inevitable, que si Dieu ne
le sçavoit point, puis que sa prescience
n' en est point cause en aucune
façon : d' où il est facile à conclure
que Dieu nous à peu justement
prescrire des loix, bien qu' il sceut
que nous ne les garderions pas, ne
tenant qu' à nous et à nostre malice,
si nous ne les gardons ; vrayement

p494

je confesse que ç' a esté le libertinage,
qui nous a jettez en ces
opinions, car pensans que ceste
prescience sembloit favoriser à
nos vices, nous en avons fait un
bouclier, et un rempart pour nous
jetter en toutes sortes d' impietez
sans nul remords de conscience,
comme si Dieu en eust esté l' autheur,
et nous eust aussi bien commandé,
et prescrit toutes sortes de
vices, comme la vertu.
Mais je deteste maintenant cet
erreur, et embrasse la verité catholique
de tout mon coeur, prest
à mourir pour icelle, si besoin est.
Je poursuivray donc ce qui suit,
puis que je n' ay plus aucune difficulté
sur cecy, afin qu' en quittant
mon erreur, je puisse apprendre la
façon de renverser les impietez
que ce detestable poëte à renfermé

p495

en tous ses quatrains : j' espere
avec l' ayde de Dieu que cela me
servira pour ramener beaucoup
de mes compagnons à la verité de
la religion catholique.
CHAPITRE 18

dans lequel le quarante troisiesme quatrain
du deiste est refuté ; et est monstré
que Dieu n' est point la cause de
nos pechez, et que l' homme est inexcusable
en son peché : et que Dieu
est juste, bien qu' il nous ait donné des
loix qu' il sçavoit que plusieurs n' observeroient
pas. 
Le Deiste
s' il sçait tout, comment peut-il avoir donné
une loy laquelle est contre les effects de sa
prescience ? 

p496

Le Theologien
j' accorde que Dieu
sçait tout en soy-mesme,
et par soy-mesme,
car il ne mandie pas sa
cognoissance des objects
exterieurs, comme nous faisons,
mais je ne voy point que la
loy, que nous disons estre emanee
de Dieu, démente les effects de sa
precognoissance, ou de sa prescience ;
car, je vous prie, qui sont
les effects de la prescience eternelle ?
N' est-ce pas principalement
l' infallibilité, et la certitude ? Or
tout ce que Dieu a preveu, ou presceu,
ou tout ce qu' il a veu futur,
arrivera certainement, et infalliblement,
non seulement quant à
la substance, mais aussi selon tous

p497

les accidens, toutes les façons, modalitez,
et circonstances, qu' il a
presceu, et preveu, tant est infallible,
et asseuree sa precognoissance.
Ceste certitude ne dement la
loy de Dieu en aucune façon, n' y
ne repugne à tout ce que nous
croyons en la religion catholique,
apostolique, et romaine,
mais elle s' y accorde parfaictement.
Si vous sçavez quelque autre
effect de la prescience, ou de la
providence de Dieu, lequel vous
pensiez ne s' accorder pas avec la
loy evangelique, et avec la creance
des catholiques, objectez le
moy, et vous verrez comme je
vous contenteray ; autrement
poursuivez vos vers.
Le D il me semble que vous
ne touchez pas l' intention de nostre

p498

poëté, lequel veut dire que la
loy, par laquelle Dieu nous defend
de nous abstenir, ou nous commande
de faire cecy, ou cela, est
contraire à sa prescience, car puis
qu' il a preveu que nous ne ferions
pas ce qu' il a commandé, et que
nous nous porterions au contraire
de ce qu' il a ordonné, pourquoy
nous l' a-il commandé, que
n' ordonnoit-il plustost ce qu' il
prevoyoit que nous ferions ?
Est-ce pas dire que Dieu nous a
tendu des pieges, et des embuscades
pour nous attraper, puis qu' il
sçavoit tres-bien que nous ne ferions
pas ce qu' il nous commandoit :
car puis que les effects decoulans
de sa precognoissance, sont la
certitude, et l' infallibilité, comme
vous avez dit, il estoit certain, et infallible
que nous ne ferions pas ce

p499

que Dieu nous commanderoit, et
neantmoins si c' est une loy qui
vienne d' un tresbon, et tres-sage
legislateur, telle que doit estre la
loy divine, elle doit tellement estre
conceuë, et imposee, qu' on ne
puisse pas manquer à l' accomplir,
autrement le legislateur nous
donneroit occasion de juger qu' il
seroit impuissant, ou qu' il manqueroit
de sagesse, et de bonté : de
sagesse, n' ayant sceu treuver, et
prescrire une loy, qui fust inviolablement
observee ; de bonté,
n' ayant voulu commander ce
qu' on feroit, mais ce qu' on ne feroit
pas, ce qui ne se peut dire en
nulle façon, veu que Dieu est tres-sage,
tres bon, et tres-puissant.
De là il veut conclure que la
loy qui defend l' adultere, l' yvrongnerie,
et tous les autres pechez, et

p500

qui commande de faire bien à tout
le monde, de sanctifier les festes,
et tout ce que vous maintenez estre
commandé, ou defendu par
l' escriture saincte, ou par l' eglise
illuminee par le S Esprit, que ceste
loy dis je ne peut venir de Dieu,
puis qu' on ne la garde pas. Je vous
confesse ingenüment que c' est là
une des plus puissantes considerations,
qui m' ayt arraché la creance
de l' esprit, et fait embrasser le parti
des deistes, lequel à plus d' apparence
de verité que nulle autre
sorte de religion, car ils ne se servent
ny de menaces, ny de promesses,
afin que nous agissions
pour la seule bonté de la vertu, et
pour l' amour que nous portons
au souverain estre, et à la bonté infinie
du createur.
Le Theol je suis fort ayse que

p501

vous m' ayez arresté sur ce quatrain,
car je vous feray voir si clairement
la folie, la malice, et l' ignorance
de vostre rimeur, que vous
vous estonnerez comment vous
avez embrassé ces erreurs. Nous avons
desja monstré que nos actions
tant bonnes, que mauvaises
ne sont pas l' effect de la prescience
divine, car elles ne sont pas
futures à cause que Dieu les sçait,
mais plustost il les sçait, par ce
qu' elles sont futures, ce qui a esté
fort amplement expliqué cy dessus.
à quoy j' adjouste que la loy laquelle
Dieu nous a donnee, ou
qu' il a inspiree à son eglise pour
nous prescrire, n' est pas un effect
de sa precognoissance, puis que ceste
loy ne nous sera pas donnee
par ce que Dieu la sçait, la loy n' estant

p502

pas l' effect d' une science, telle
particulierement qu' est la prescience
de Dieu, laquelle n' est pas
active, ou operante, mais seulement
contemplative, supposant desja
par un instant de raison raisonnante,
ou raisonnee, que tous les effets,
et toutes les loix sont futures, quand
il les cognoist.
Il faut pour establir une loy que
la volonté opere, et que le legislateur
fasse tellement ses ordonnances,
qu' il vueille, et ait intention
qu' elles obligent, autrement elles
ne passent point en loy ; surquoy
vous pretendez que Dieu n' a peu,
ou deu ordonner ce qu' il sçavoit
que nous ne ferions pas, mais vos
raisons n' ont aucune force, autrement
il ne faudroit jamais faire
aucune loy, car les legislateurs
sçavent fort bien qu' elle ne sera

p503

pas gardee par tout le monde, c' est
pourquoy ils ordonnent des supplices
pour chastier les transgresseurs,
et les meschans.
Vous ne pouvez pourtant pas
dire qu' ils tendent des embuches
à ceux qui ne les observeront pas,
moins encore qu' ils soient causes
de ce qu' on ne garde pas la loy, car
le legislateur à intention qu' un chacun
l' observe. Mais quoy, vous repartirez
peut estre que le legislateur
ne peut pas, et ne sçait pas tout
comme Dieu, autrement qu' il ne commanderoit
rien que ce qu' il sçauroit
qu' on feroit ; c' est donc icy
qu' il faut estre attentif, puis que
vous accusez Dieu d' impuissance,
de folie, et de malice, si les loix de
la religion chrestienne ont esté
faites par sa volonté.
En un mot vous pensez que

p504

Dieu ne peut rien ordonner qu' il
n' arrive infalliblement, et necessairement :
et moy je maintiens
avec tous les catholiques, que
Dieu peut ordonner, et a ordonné
tout ce qu' il nous commande en
l' escriture saincte, ou par l' eglise.
Je le preuve par les grands miracles,
qu' il a faits en tout temps, et
en tout lieu, en faveur de ceste
creance, et pour la confirmation
de nostre foy, lesquels vous pouvez
voir tant en l' evangile, et au
viel testament, que dans les autheurs
de l' histoire ecclesiastique.
De plus, je maintiens que Dieu a
peu faire ces loix sans prejudice de
sa toute puissance, de sa sagesse, et de
sa bonté, car ces attributs ne dependent
en aucune façon de ce qui est
icy bas, ny de tout ce qui peut estre

p505

crée, veu que si nous supposions que
chaque estre finy, et crée fust impossible
(ce qui ne peut estre) Dieu
seroit encore tel qu' il est, avec tous
ses attributs. Il ne faut donc pas
mesurer les perfections divines
par ce qui nous paroist icy, si vous
ne pensez mesurer l' infiny par le
finy, la perfection par l' inperfection,
la lumiere par les tenebres,
le tout, et le souverain estre par le
rien, et par le non estre.
Disons donc que nos loix nous
ont esté donnees de Dieu, lequel à
voulu que nous fussions libres de
les observer, ou de les obmettre, et
que cela n' infere aucune impuissance
en Dieu ; au contraire il faut
necessairement qu' il soit tout
puissant, puis qu' il a peu faire des
creatures libres, et franches de
toute contrainte, et necessité :

p506

voyez si ce n' est pas par impuissance
que nos artisans ne sçauroient
faire aucun instrument, ou
chef-d' oeuvre qui soit libre ; tout
ce qu' ils font, en quelque maniere
qu' ils s' en puissent servir, suit la
pante, et l' inclination de sa nature
sans pouvoir se retenir ; il n' y a rien
de visible au monde, le seul homme
excepté, qui n' agisse necessairement,
et n' y a que le seul estre
infiny, qui puisse donner ce degré
de liberté au chef-d' oeuvre de
sa puissance : concluez donc qu' il
est necessairement tout puissant.
Passons à la sagesse, laquelle reluit
merveilleusement dans la liberté,
qu' il nous a donnee, et dans les loix
qu' il nous a prescrites. Je croy que
vous m' accorderez fort volontiers
que vous ressentez dans vous mesmes
une loy, laquelle vous dicte

p507

qu' il ne faut faire mal à personne,
(...) ; qu' il faut aymer celuy qui vous a
fait ; qu' il faut aymer le bien, et
hayr le mal.
De grace qui a mis ceste
loy au fond de vostre coeur, à ce
esté vostre pere, ou vostre mere ?
Rien moins, car ils n' y pensoient
seulement pas ; il faut donc que
Dieu vous l' ait enpreinte dans
l' ame, car vous ne la luy avez pas
mise, autrement vous l' en pourriez
oster quand bon vous sembleroit.
Or vous pouvez transgresser
ceste loy, et plusieurs font tous les
jours le contraire de ce qu' elle dicte,
comme tesmoignent les homicides,
les trahisons, et les autres
crimes, qui ne se font que trop
souvent. Si vous ne pouviez faire
contre ces loix, que j' ay rapportees,

p508

ne vous plaindriez-vous pas
de ce que vous n' auriez point de
liberté ?
Bon dieu quel aveuglement,
et quelle malice des hommes ! De
vouloir accuser Dieu, et treuver à
redire en ce qu' il nous a donné la
liberté, laquelle est une perfection
si relevee, qu' il n' y a que Dieu, et les
anges qui l' ayent : si les malheureux
deistes ne l' avoient pas, et
qu' ils recogneussent ce deffaut en
eux, il n' y auroit rien qu' ils desirassent
plus ardemment ; et maintenant
qu' ils l' ont, ils en abusent, et s' en
servent pour controoller les oeuvres,
les loix, la science, la volonté,
la bonté, la sagesse, et la puissance
de Dieu ; certainement ce desordre
est espouvantable.
Voyez si vous pouvez démentir
ces loix que vous ressentez en

p509

vous mesme, et me dites si vous
voudriez ne les avoir pas, asseurément
vous seriez marry qu' elles
fussent effacees de vostre esprit,
car il faudroit perdre l' humanité,
et la raison, et cesser d' estre capable
de jouyr de la felicité eternelle,
apres laquelle il semble que
vous aspiriez avec tous les deistes,
bien qu' ils s' en éloignent davantage,
que le firmament n' est éloigné
de la terre.
Vous avez donc des loix en vostre
esprit, que Dieu y a gravees,
desquelles vous estes bien aise, et
lesquelles sont les fontaines, et la
source des bons mouvemens, et
des bonnes resolutions que vous
avez tous les jours, et le frain des
passions desordonnees, lesquelles
estans suivies, nous ravallent jusques
à la nature des bestes : il faut

p510

donc advoüer que la bonté, et la
sagesse de Dieu paroist en ces loix,
puis qu' elles sont causes de nos
bonnes actions, qu' elles sont
grandement conformes à nostre
nature, et qu' elles perfectionnent
la raison. Je ne voy plus que vous
puissiez vous plaindre de ce que
Dieu nous a donné des loix, puis
qu' elles sont le plus riche ornement
de nostre nature.
Vous me direz, peut-estre, que
vous demeurez d' accord avec nous
touchant les loix que Dieu nous
a prescrites en nous donnant l' ame, la
raison, l' esprit, et la nature, lesquelles
nous appellons loix naturelles,
et que ce sont celles-là que vous
suivez, mais qu' il y en a d' autres,
que vous ne sçauriez approuver,
telles que sont celles que l' escriture
saincte nous propose, ou que

p511

fait l' eglise. à quoy je respons
que toutes les loix divines, et ecclesiastiques
ne sont rien que conclusions
de celles que nous avons
rapportees, et maintiens que Dieu
les a peu tres-justement instituer :
car si nous regardons les loix qui
concernent son honneur : ô Dieu !
Qu' elles sont justes, bonnes, et raisonnables,
puis que nous n' avons
rien qui n' appartienne à ce souverain
estre : c' est pourquoy nous ne
nous pouvons plaindre, quelque
loy qu' il nous impose.
Celles qui sont pour nous conduire
envers nostre prochain, sortent
de ce principe, fais aux autres,
ou ne fais pas ce que tu voudrois raisonnablement
qui te fissent, ou ne te fissent
pas ; il faut donc que vous les approuviez,
car elles ne sont pas
moins convenables à nostre nature,

p512

que leur racine. Bref les loix
que Dieu nous a donnees pour
nostre gouvernement particulier
sont grandement honnestes, bonnes,
et parfaites. Je suis prest de les
deffendre, si vous y trouvez quelque
difficulté, et de vous monstrer
en gros, et en detail, que tout ce
qu' enseigne la religion catholique,
est loüable, honneste, vertueux,
sainct, et digne de Dieu.
Pourquoy est ce donc que vous
dites que nos loix dementent les
effets de la prescience divine ? Apprenez
aujourd' huy que nous n' avons
aucune loy, qui s' oppose aux
perfections divines, ny a pas un effect
decoulant de la prescience,
predestination, volonté, puissance,
sagesse, et bonté de Dieu ; et que
vostre poëte vous a abusé par ces
rimes, car quand Dieu nous commande

p513

quelque chose que ce soit,
il sçait fort bien qu' il est en nostre
liberté de le faire, ou ne le faire
pas ; mais il sçait par l' infinité de sa
science si nous le ferons, ou non ;
de plus, il est prest de nous ayder à
quelque heure que ce soit, si bien
qu' il ne tiendra qu' à nous, si nous
ne faisons ce qu' il veut ; il ne veut
pourtant pas que nous observions
sa loy par contrainte, ou par necessité,
mais volontairement, et si
librement, que s' il ne nous plaist,
nous n' en ferons rien ; admirez cependant
avec moy la merveilleuse
puissance de Dieu, lequel a fait
une creature si libre, et si indifferente.
à qui attribuerez vous maintenant
la transgression de sa loy divine ?
Sera-ce à l' homme, ou à Dieu ;
ce sera à l' homme asseurément,

p514

puis qu' il ne tient qu' à luy qu' il
n' observe la loy, et que Dieu la luy
avoit prescrite pour cét effect, et
estoit prest de luy ayder en tout
ce qui estoit necessaire : et Dieu cependant
demeurera tres-juste, tres-bon,
et tres-puissant, sans pouvoir
estre accusé de transgression ; tres-juste,
lors qu' il punira rigoureusement
cette transgression volontaire,
de laquelle l' homme a esté
la cause totale : tres-juste parce
qu' en cette transgression il n' y a
nulle apparence d' injustice en
Dieu, et neantmoins il y a une tres-grande
injustice en l' homme, puis
qu' il a denié l' honneur, qu' il devoit
rendre à Dieu par toute rigueur
de justice : tres-bon, puis
qu' il nous a donné la force de meriter
le paradis, et de nous joindre
à sa souveraine bonté par l' observance

p515

de ses commandemens ;
tres-bon, puis qu' il est prest de
nous pardonner toutes nos offenses
au moindre souspir, et à la
moindre larme que nous jetterons
parce que nous luy avons
desobey ; tres-puissant, en ce que
nous ne luy sçaurions rien oster,
ny luy faire aucun tort en ses
biens, ou en ses perfections, car tout
ce qu' il a, est infiny, et exempt de
toutes sortes d' alterations : tres-puissant,
en ce qu' il a tellement
peu nous creer libres, et nous donner
de telles loix, et un tel secours,
que nous pouvons nous vanter
par dessus toutes sortes de nations,
que nous avons la force de monter
au ciel, et d' acquerir à force
d' armes, que Dieu nous a donnees,
le royaume du ciel.
Tres-sage, car il a tellement disposé

p516

nostre nature, que bien qu' elle
soit libre de faire, ou ne faire pas
tout ce qu' elle voudra, neantmoins
il sçait ce qui en sera devant
que le monde fust fait ; et
bien que Dieu sçache dés l' eternité
à quoy nostre volonté se determinera,
elle est toutefois aussi
libre de se determiner, comme si
Dieu ne l' avoit pas sceu. ô merveilleux
accord de la prescience
divine avec nostre liberté ! Vrayement
c' est icy où il faut confesser,
que la sagesse de Dieu surpasse nos
entendemens, et destruit la sagesse
humaine ; tres-sage encore, puis
qu' il ne nous a pas donné cette liberté,
et n' a pas sceu le mal à quoy
elle se determineroit, qu' il n' ait
sceu, et ordonné quant et quant
que le bien qu' il tireroit de nos
mauvaises volontez.

p517

Or sus, monsieur, asseurez vous
donc maintenant, que vostre poëte
est un imposteur, et que nos
actions, et les loix ne sont pas les
effects de la precognoissance divine :
que la volonté de Dieu n' est
point cause de nos pechez, mais
nous tous seuls : que sa prescience,
et sa volonté, aussi bien que ses
loix, et toutes ses oeuvres ne prejudicient
en rien à nostre liberté ; et
que tout ce qu' enseigne la vraye
religion, qu' il a tasché à rendre
ridicule, et odieuse, est tres-sainct,
tres bon, et tres-agreable
à l' autheur de la nature, de la grace,
et de la gloire.
Je ne sçache plus aucune difficulté
que vous puissiez avoir sur
ce sujet, si ce n' est que vous fussiez
fasché de la façon que Dieu a fait
le monde, et que vous desirassiez

p518

qu' il l' eust fait autrement, par
exemple, qu' il n' eust point permis
les pechez : qu' il eust confirmé
tous les hommes en grace, afin
que chacun eust esté sauvé, et qu' il
eust empesché toutes sortes de
maux, et d' afflictions : car s' il y a
gens au monde qui treuvent à
redire, et à reprendre és oeuvres, et
en la volonté de Dieu, ce sont les
deistes, qui voudroient avoir leur
paradis en ce monde.
Je m' estendrois icy, et responderois
fort au long à cette demande,
et à ce desir, n' estoit que j' ay
traitté cette matiere fort amplement
en la question contre les
athees, lors que j' ay respondu à
leur 16, 17, 18, et 21, objection, là où
vous treuverez dequoy vous satisfaire ;
je diray seulement icy que
c' est manque d' esprit, et de jugement

p519

de demander pourquoy
Dieu a fait le monde avec l' ordre
que nous y observons à chaque
moment, d' autant qu' il a une volonté
infinie, laquelle est la regle
souveraine de tout ce qui est, et
de tout ce qui peut estre de bon,
et de beau.
C' est pourquoy il faut croire
qu' il a eu raison d' eslire ce monde
icy, tel qu' il est, entre une infinité
de milions qu' il eust peu faire au
lieu de cestuy cy, bien que nous ne
sçachions pourquoy ; cette question
que proposent vos gens, va
bien plus loin, car ils demanderoient
encore apres que tous les
hommes seroient confirmez en
grace, pourquoy il n' y auroit
qu' un tel nombre d' hommes, et
non plus : pourquoy il n' y auroit
qu' une terre, qu' un firmament,

p520

ou qu' un soleil : pourquoy Dieu ne
nous auroit-il creez aussi parfaits
que les anges, et aussi incorruptibles
que les cieux, et mille autres
choses, que je laisse pour l' occupation
des cerveaux creux, qui perdent
le temps, et leur esprit à faire
quantité de questions badines,
lesquelles ne meritent pas qu' on
s' y arreste.
Quiconque aura bon esprit, il
se resoudra bien tost luy-mesme
sur telles pensees, car lors qu' il
meditera pourquoy Dieu ne fait
pas une infinité de choses qu' il
pourroit faire, il aura incontinent
son recours à la volonté de Dieu,
avec le prophete royal, omnia quaecumque
voluit, fecit, et n' a point fait
tout ce qu' il n' a pas voulu ; c' est là
le rendez vous d' un jugement
bien fait, lequel adorera tousjours

p521

avec une profonde humilité l' ordre,
et la façon, avec laquelle Dieu
se comporte en toutes ses oeuvres.
Pleust à Dieu que ces curieux
se jettassent sur d' autres questions
qui leur seroient beaucoup plus
utiles, telles que sont les suivantes ;
comment il est possible qu' ils offensent
Dieu, et qu' ils menent
une vie si scandaleuse, et si meschante
comme ils font, apres avoir
receu tant de graces, et de si vives
inspirations de Dieu, par lesquelles
la bonté divine frappe à toute
heure à leur coeur, en les invitant
à quitter leur impieté : comment
il est possible qu' ils laissent eschapper
tant d' advertissemens
interieurs qui les portent à faire
penitence ; car je deffie les plus
meschans d' entr' eux de me pouvoir

p522

remarquer une sepmaine,
voire un jour en toute leur vie, depuis
qu' ils ont quitté la vraye religion,
dans lequel ils n' ayent ressenty
quelque remords de conscience,
ou quelque bon mouvement,
par lequel ils ayent esté conviez
de quitter leurs foles opinions, et
leurs débauches : comment est-il
possible qu' ils prisent davantage
les voluptez du corps, que celles
de l' esprit, veu que celuy-là est fait
pour cestuy-cy, et que les plaisirs
sensuels nous ravallent jusques à
nature des bestes, et nous font perdre
ceux de l' entendement, et du
ciel.
Ce sont là des graces prevenantes,
et suffisantes par lesquelles
Dieu les rappelle à soy, et pour lesquelles
il leur faudra rendre conte
au grand jour du jugement ; ce

p523

sont là les douces chaisnes, avec
lesquelles il les veut attirer à la repentance,
et les retirer de leur impieté ;
bref ce sont les rayons de ce
divin soleil, lequel esclaire, et eschauffe
tous les hommes, tantost
d' une façon, tantost d' une autre ;
de sorte qu' il n' y a personne au
monde qui puisse dire, ou se plaindre
que Dieu ne luy a pas fait la
grace de se recognoistre, et de
quitter le peché, car les graces, et
les inspirations divines sont en si
grande abondance, que les plus
meschans en reçoivent mille fois
davantage qu' il n' est necessaire à
ce qu' ils abandonnent leurs impietez,
et embrassent la vraye religion,
hors de laquelle il n' y a ny
salut, ny veritable contentement.
Voyez s' il vous reste quelque difficulté
sur ce quatrain, autrement

p524

proposez ce qui suit dans le quarante-quatriesme.
CHAPITRE 19

dans lequel les quatrains du deiste sont
refutez, depuis le quarante quatriesme,
jusques au cinquante quatriesme ;
et est monstré qu' il n' y a qu' un chemin
pour estre sauvé ; que Dieu peut
faire la mesme chose avec nous sans
pouvoir estre accusé de peché ; que
vrayement il y a un enfer : et que le
lieu, ny la naissance ne nous donnent
pas la religion, avec plusieurs autres
choses. 
Le Deiste
si Dieu se veut servir de loix pour nous guider
selon sa providence, pourquoy voulez vous
nous assujetir à vostre religion ?

p525

qu' importe qu' il nous guide tous à un mesme
bien intelligible par divers chemins ? 
Le Theologien
il faut icy distinguer
entre les loix du monde,
car lors qu' il y a
quelque loy dans un
royaume, dans un empire,
republique, province, cité,
famille, ou mesme dans l' entendement
d' un particulier, laquelle est
contre la raison, l' equité, la justice,
ou les bonnes meurs, ou contre
l' honneur, et la volonté de Dieu,
ceste loy n' est pas celle, de laquelle
Dieu veut que nous nous servions,
car il la deffend expressément,
et commande qu' on aille
prescher sa loy à toutes sortes de
nations par ces paroles, (...) ;

p526

et par plusieurs autres, que nous lisons dans
l' evangile ; c' est là la raison pourquoy
le vray chrestien desire grandement
que tous les payens, les
turcs, les et autres infideles se
convertissent à Dieu, et qu' en
quittant leurs mauvaises coustumes,
et leurs erreurs, ils embrassent
la loy evangelique remplie
de bonnes nouvelles, puis qu' elle
promet une gloire eternelle au
lieu d' un enfer perpetuel, dans lequel
seront tourmentez tous ceux
qui ne suivront pas ceste loy royalle
de nostre sauveur, et redempteur
Jesus-Christ.
De là vient que ceux qui travaillent à la
conversion des infidelles
à perte d' haleine, et de leur
sang, n' ostent point les loix de la
police, n' y ne deracinent aucune

p527

creance, lors que ces loix, et ceste
creance ne sont point contre la
raison, ou contre la lumiere de la
foy, mais ils condescendent à tout
ce qu' ils peuvent pour gaigner les
ames de ces infidelles à Dieu, et
pour les rendre bien-heureuses.
Voyla donc la raison pourquoy
nous desirons, qu' on quitte les
mauvaises loix, parce que Dieu
pere commun des hommes, et
des anges, à voulu qu' il n' y eust
qu' un chemin, par lequel on peust
se sauver, estant bien convenable,
et tres-raisonnable, que tous ceux,
qui tendent à un mesme bien intelligible,
y arrivent par une mesme
voye, afin que nous recognoissions
d' autant plus combien Dieu
tres-un se plaist en l' unité, et en la
simplicité.
C' est pourquoy il a tousjours

p528

conduit son peuple bien aymé par
de mesmes loys fondamentales
depuis le commencement du
monde jusques à present, qui ont
esté ; qu' il ne falloit faire à personne, que
ce que nous voudrions raisonnablement
nous estre fait ; qu' il falloit porter une
grande reverence à Dieu, et à tout ce
qui luy appartient, qu' il falloit l' adorer, 
et beaucoup d' autres choses, que
je laisse pour maintenant : et bien
que quelques loix ayent esté adjoustees
dans la loy escrite, et puis
en l' evangelique, toutefois elles ne
sont point repugnantes aux precedentes,
elles les accomplissent plustost,
et leur donnent un esclat de
beauté, et le sommet de la perfection ;
ce que je pourrois monstrer
fort facilement, n' estoit que je crains
vous ennuyer par de plus

p529

longues responses, et que le temps
nous manque.
Il faut donc bien retenir qu' il
n' y a point de divers chemins dans
ce monde sensible pour parvenir
au ciel, si ce n' est que vous l' entendiez
des divers ordres, qui embellissent
l' eglise de Dieu ; mais
tous les ordres des religieux catholiques,
qui ont esté, sont, et seront,
n' ont qu' une mesme foy, et
un mesme dieu, bien qu' ils portent
divers habits, et ayent quelques
particulieres façons, et ceremonies,
desquelles ils usent en servant
Dieu ; mais pour ce qui est du
fond, ils cheminent par la mesme
voye de l' evangile, par laquelle
vont tous les autres chrestiens.
Certainement nous pouvons
dire que la loy de Dieu n' est pas de
ce monde sensible , suivant ce mot,

p530

(...), car comme
elle ne suit pas le contentement
des sens, mais celuy de l' esprit, elle
doit plustost estre appellee intellectuelle,
et divine, que sensible.
Que vostre rimeur se pourmene
donc tant qu' il voudra par les loix
de son monde sensible , car pour nous
autres catholiques nous avons
beaucoup plus de soing de suivre
les rayons, et les attraits spirituels
du monde archetype, que les appas
sensuels de ce monde corporel.
Le Deiste
ce que nous appellons distinction, est dit
deception en bonne logique, parce que le mesme
effect qui est loüable en Dieu, peut estre inique
en nous.
car si les causes produisent des effects differents,

p531

il faut en fuyr l' identité, afin que l' injuste
consequence soit prevenuë.
par consequent les differents effects condamnez
dans leur cause prochaine, servent au
bien de l' univers selon la volonté de Dieu. 
Le Theol il semble que vostre
poëte ne butte à autre chose
par ces trois quatrains, qu' à nous
vouloir persuader que ce que
nous appellons mal, et peché, n' est
pas vice simplement parlant, mais
au plus, et au pis aller, seulement
entant qu' il est mal en nous, et
non en Dieu ; comme lors qu' un
voleur tuë le marchand, il veut, ce
me semble, dire que Dieu le tuë
aussi, sans neantmoins encourir
aucun peché.
Or en ce sens il est vray que
Dieu peut vouloir, et faire plusieurs
choses, sans aucun peché, ce

p532

que nous ne sçaurions n' y faire,
n' y vouloir sans l' offenser ; le mesme
arrive souvent parmy nous,
car un pere, ou un maistre peut
donner dix, ou vingt escus de son
bien, et peut justement punir son
enfant, et son serviteur, sans aucun
peché, voire avec merite ; ou le fils,
et le serviteur ne peuvent donner
un denier de ce bien, ou frapper
aucun sans offenser Dieu : la raison
de cecy est bien claire, car le pere,
et le maistre ont puissance de distribuer
leur bien, et en faire ce
qu' il leur plaist, et de chastier leurs
enfans, et leurs sujects, lesquels
n' ont point ce pouvoir les uns sur
les autres, si ce n' est que le pere, ou
le maistre le leur donne.
Dieu a bien une puissance plus
absoluë de faire ce qu' il luy plaist
de toutes les creatures, que n' a pas

p533

le pere sur son enfant, ou le roy
sur son suject ; il a le pouvoir de
nous mettre tous à mort, et de destruire
tout ce qui est au monde
sans estre suject à aucune reprehension ;
et neantmoins je croy
qu' il n' y a atheiste, ny deiste qui
voulust advoüer qu' il fust permis
à quelqu' un de tuer tous ceux qu' il
voudroit, et qui ne jugeast digne
de mort celuy, qui auroit entrepris
de faire une quantité de
meurtres ; si bien qu' il faut regarder
quel est celuy qui opere, avant
que juger de son action, afin que
s' il a droit de faire ce qu' il entreprend,
on croye, que son action
est bonne, ou du moins qu' elle est
permise ; ou mauvaise, et illicite, s' il
n' a droit, et pouvoir de faire ce
dont il est question.
Voyla donc comme un mesme

p534

effect peut estre bon estant produit
par la vertu divine, lequel seroit
mauvais executé par un homme,
d' autant que Dieu a le souverain
domaine sur toutes choses, de
sorte qu' il ne peut abuser d' aucune,
quand mesme il reduiroit tout
à neant ; or puis qu' il à ce pouvoir
souverain sur tout ce qui est, qui
vit, et qui respire, il peut nous obliger
à tout ce qu' il voudra sous
quelque peine qu' il lui plaira, sans
que nous puissions treuver suject,
ou couleur d' aucune juste plainte,
ou d' aucun murmure.
Pour le quatrain 47 il ne dit presque
que la mesme chanson, non
plus que le 48 ; car on fuit l' indentité
de l' effet quant à ce qui est de la
moralité, et de la bonté, ou malice,
du merite, ou, du demerite, lors
que c' est Dieu qui opere comme maistre

p535

de toute la nature ; et par ainsi
nous evitons la mauvaise consequence,
que feroit celuy qui diroit
que Dieu feroit mal en faisant ce
qu' il nous defend, comme quand
il feroit mourir qu' lqu' un, ce qui
ne nous est pas permis, si ce n' est
que Dieu nous le commandast.
Or si vostre poëte se formalise
de ce que Dieu peut faire, et vouloir
tres-justement, ce qu' il nous
defend, et ce qu' il ne veut pas que
nous fassions ; je veux qu' il m' advouë
que son serviteur (s' il en a)
peut prendre l' argent de son
cabinet, et en aller joüer, ou faire
bonne chere tant qu' il luy plaira ;
je veux qu' il concede que son serviteur
luy peut bailler un bon
soufflet, ou une couple de bastonnades,
lors qu' il fera quelque chose,
qui deplaira audit serviteur :

p536

bref si le serviteur se rend maistre
de la maison, et qu' il mette son
maistre en estat de serviteur, le
maistre devenu serviteur ne doit
pas se plaindre, si le valet ne fait
point mal d' asservir son maistre ; s' il
treuve ceste proposition ridicule, et
temeraire, comme elle est, qu' il
croye que celle à laquelle il semble
viser, l' est infiniment davantage,
puis que Dieu est infiniment
plus grand maistre sur tout le monde,
que n' est aucun roy, prince, ou
empereur sur ses esclaves, et ses
serviteurs.
Delà s' ensuit que le 48 quatrain
ne conclud rien que ce que tous
les chrestiens advoüent, et enseignent,
sçavoir est que la providence
de Dieu est si admirable, qu' elle
sçait tirer du bien pour l' ornement
de l' univers, et pour la gloire

p537

des bien-heureux des plus grands
maux que la malice de l' homme
puisse inventer, concevoir, et produire.
Le D monsieur, vous m' avez
fort satisfait sur ces derniers quatrains,
car il est veritable, que le
maistre, et par consequent que Dieu
peut faire beaucoup de choses justement,
que le serviteur ne sçauroit
faire, ou vouloir qu' avec injustice,
neantmoins je vous diray la
consequence que ce poëte tiroit
de ces quatrains, lequel m' a merveilleusement
abusé, afin que
beaucoup d' autres se rendent sages
à mon exemple.
Le Deiste
de toutes ces raisons il conclud qu' il n' y a
point d' enfer, ny aucun chastiment apres ceste
vie, et que tout cela n' est que fantasie, et
foiblesse d' esprit. 

p538

Le Theol voila justement ou
ce malheureux desiroit vous faire
tomber, car c' est là que buttent
tous les quatrains que vous avez
apportez, et particulierement ceux
qui suivent depuis le 28 jusques à
ce 49, ou le maudit imposteur, et
cajolleur vomit son impieté. Or
je ne veux point d' autre arbitre
que vous mesme pour juger si ce
quatrain a quelque raison ; et si les
principes desquels il le tire, ont
quelque verité, je m' asseure que
vous confesserez ingenüment que
ce ne sont que surprises, déguisemens,
et menteries, par lesquels les
libertins taschent détouffer la
crainte de Dieu, et de ses jugemens,
et bannir la pieté de l' esprit
des chrestiens.
Certainement si la peur de l' enfer,
et les peines que les damnez, et

p539

les diables endurent, n' estoient
qu' une phantasie, et foiblesse d' esprit,
il faudroit conclure que Dieu
ne seroit qu' une resverie, et une illusion ;
non que Dieu ne fust,
bien qu' il n' y eust point d' enfer,
car il ne dépend d' aucun estre,
mais parce qu' il faudroit advoüer
qu' il seroit menteur, puis que c' est
luy qui nous a revelé ces peines
eternelles, comme il se voit souvent
dans l' escriture saincte.
Pour moy je croy que cet homme
a esté calviniste, et que pour
faire le bon valet, ne se contentant
pas de nier le purgatoire, il veut
encore franchir l' enfer, à ce
qu' il puisse commettre toutes sortes
d' impietez sans nulle peur, et
sans remords de conscience, car
c' est là le desir de tous les libertins.
Je vous proteste que je ne

p540

sçay comment ils sont si effrontez
que de confesser qu' il y a un dieu,
veu qu' ils luy ostent la providence,
et le soing qu' il a que le mal soit
puny, et le bien recompensé ; et
croy qu' ils ne parlent de Dieu que
du bout des levres, le niant ce pendant
en leur esprit ; pires en cela
que les diables, lesquels sçachans
qu' il y a un vray Dieu, le craignent,
et le redoutent, et malgré qu' ils en
ayent, confessent cela haut, et clair,
comme vous pouvez voir dans
l' escriture saincte.
Or sus, monsieur, quittez donc
cet erreur, et croyez asseurément
que c' est une foiblesse d' esprit, et
une imagination tres-fausse de
croire que les meschans ne seront
pas suppliciés, et tourmentez apres
cette vie ; car si un juge ne laisse
point les forfaits impunis, s' il est

p541

juste, Dieu qui est le juge des juges,
et qui penetre jusques au plus
secret de nos pensees, laissera-il regner
les meschans, qui font, et
roullent tant d' iniquitez dans leur
esprit, sans leur donner aucun chastiment ?
Et quoy, pesle-meslera-il les
bons avec les mauvais, et la pieté
avec la perfidie ? Sera-ce donc ainsi
que les bons seront foulez, ruinez
de biens, et d' honneur, meurtris,
tuez, et assassinez sans aucun répit,
et sans esperance de voir un jour leur
innocence declaree, leur bonté, et
leur cause justifiee, et leur esperance
comblee de recompense, et de
s' esjouyr avec leur juste juge nostre
Dieu, nostre sauveur, et redempteur
Jesus-Christ, en la découverte
de toutes les impietez
les plus couvertes, et cachees des

p542

traistres, et perfides, des flateurs,
menteurs, parjures, impudiques, et
autres meschans, qui se sont moquez
de Dieu, et de la religion ?
Vive Dieu il ne sera pas ainsi
que le malheureux deiste se l' est
imaginé, car au grand jour du jugement
les justes, et les gens de
bien se leveront contre les meschans,
de qui ils reçoivent tant
d' afflictions, et de desplaisirs en ce
monde ; et pour lors ces perfides
verront la verité de ce que nous
croyons maintenant, et que nous
lisons dans la parole de Dieu. (...).

p543

Voyla les paroles des meschans,
qui pensoient avec vostre
poëte, que ce fussent fables que la
gloire des bien-heureux, et le supplice
des damnez. Pleust à Dieu
que ce passage fust leu des libertins
avec attention, lequel ils
trouveront plus au long au 5 chapitre
de la sapience, je croy que
leurs frenetiques opinions seroient
bien eschauffees, si ceste
pensee, et ce chapitre ne les refroidissoit.
Il faut donc croire tres-asseurement
que Dieu ne laissera jamais
aucune meschanceté impunie soit
icy, soit apres la mort, c' est pourquoy
vous voyez que les grands

p544

saincts, et les plus sçavans, qui furent
jamais dans l' eglise catholique,
demandent à Dieu qu' il les chastie
en ce monde, afin d' eviter les
effroyables supplices de l' enfer ;
c' est ainsi que Sainct Augustin le
disoit avec ardeur, (...) : car ne plus ne
moins qu' il y a plus de plaisir mille
fois en paradis, qu' il n' y a és plus
grands plaisirs de ce monde (...),
aussi y a-il des peines pour les
damnez plus grandes mille fois,
que tous les tourmens que nous
voyons icy bas.
Le D monsieur, je ne sçaurois
vous exprimer la joye, que j' ay d' avoir
esté si bien esclarcy de vous
sur toutes ces impietez, mais le regret
que j' ay d' avoir trempé en ceste
impieté, depuis que ce traistre

p545

me bailla ce poëme, et me cajola
par diverses rencontres, n' est pas
moins grand ; je voudrois qu' il
m' eust cousté la moitié de mon
sang, et que jamais je ne l' eusse
veu. Je vous proteste que si jamais
je retourne à Paris, je feray tout ce
qu' il me sera possible pour le faire
prendre, et le faire mourir, s' il
ne veut quitter son erreur, ce
que je crains qu' il ne fasse, car il est
merveilleusement testu, et opiniastre,
et croit sçavoir beaucoup sous
pretexte qu' il sçait un peu rimailler,
et discourir. Je ne sçay si je dois
poursuivre davantage, car le reste
est encore fort long, et ne contient
quasi autre chose que ce que
nous avons dit, et neantmoins il
reste encore 58 quatrains.
Le Theol je vous asseure
que je suis si ennuyé de respondre

p546

aux resveries de ce poëte, qu' il me
deplaist de poursuivre davantage,
et puis je voy qu' il est temps que
nous pensions à nostre giste, car si
nous attendons plus long-temps,
je crains les voleurs, qui ont coustume
de courir vers ces lieux icy ;
neantmoins si vous pensez qu' il y
ait quelque chose en ce qui suit,
qui vous fasse de la peine, j' auray
la patience de vous escouter, de
vous respondre, et de fortifier vostre
esprit contre les sottises de ce
baveur.
Le D veritablement je serois
tres aise qu' il vous pleust renverser
ce qui suit, car bien que je ne sois
que trop satisfait de ce que vous
m' avez dit jusques à present, cela
me serviroit pour tascher à reduire
quelques uns de mes camarades à
la religion catholique.

p547

Le Theol poursuivez donc,
et je responderay à ce que vous me
proposerez, car bien que vous ne
sembliez plus douter d' aucune
chose, neantmoins cela servira
pour vous confirmer de plus en
plus dans la creance de l' eglise catholique,
et vous fera voir que
nous ne craignons rien les poinctes
de l' impieté de vostre poëte,
bien qu' il les croye fort acerees.
Le Deiste
le bigot suit la religion qu' il a succee à la
mammelle.
et le vulgaire ignorant croit que ce que ses
devanciers luy ont dit, avoir esté receu de
Dieu. 
Le Theol à ce que je voy vostre
poëte prend le bigot pour toutes
sortes de personnes, qui suivent

p548

(lors qu' ils sont grands) la religion
que leur pere, leur mere, et
leur nourrice, leurs ont fait succer
avec le laict : en cette façon il le
faudra dire bigot , s' il a rencontré
une si malheureuse mere, qui luy
ait appris ce deisme dés la mammelle :
mais afin d' eviter toutes sortes
d' illusions sur ce mot, je confesse
que nous sucçons la religion
dés nos premieres annees, voire
mesme nous l' avons emprainte
avant la mammelle, lors que nous
sommes baptisez, et consacrez au
nom du pere, du fils, et du sainct
esprit ; mais c' est parler avec une
impieté intolerable que d' appeller
cela bigotisme .
Or bien qu' il soit vray que nous
soyons chrestiens par le baptesme
avant que de le sçavoir, ou de
consentir à nostre salut, et à la vraye

p549

religion, nous ne naissons pourtant
pas chrestiens, mais enfans sans aucune
teinture de religion soit virtuelle,
soit habituelle, destituez de
toutes sortes de graces gratifiantes,
estant un grand benefice, et une
signalee faveur de Dieu, quand
nous recevons ce grand sacrement,
lequel est comme la clef, et la
porte de tous les autres, et qui
nous lave, et nettoye l' ame de toutes
sortes de pechez. C' est pourquoy
nous devons rendre graces
à Dieu tous les jours de nostre vie,
de ce qu' il nous a delivrez de la
masse de perdition, dans laquelle
nous estions enfermez par le peché
originel, et detester l' ingratitude,
et l' impudence de vostre
poëte, et de tous ces semblables,
lesquels veulent qu' on croye
qu' ils ont d' excellents esprits, lors

p550

qu' ils renient leur religion, et appellent
toute sorte de pieté, et de vertu,
imagination, foiblesse d' esprit,
et folie, et neantmoins c' est lors
qu' ils sont le plus abbrutis, se ravallans
avec les bestes, qui n' ont
aucun sentiment de pieté, ny de
religion.
Il faut donc recognoistre la grace
que Dieu nous donne, quand il
nous fait naistre dans un pays chrestien,
et de parens catholiques ;
ce que nous pouvons appeller un
commencement, ou plustost un
des premiers effects de la predestination,
car nous pouvons vrayement
dire que non fecit taliter omni
nationi , comme il paroist és infidelles.
Pour les heritiques, je pense
que plusieurs d' entr' eux reçoivent
le baptesme dés leur jeunesse, mais
au lieu de cooperer avec la grace

p551

baptismale, quand ils sont grands,
ils quittent le grand chemin de
l' eglise catholique, et embrassent
diverses chimeres selon qu' ils
sont instruicts par divers huguenots ;
car si c' est un lutherien, il apprendra
le lutheranisme à ses enfans,
et à ses disciples ; si c' est un anabaptiste,
ou un calviniste ; chacun
luy fera entrer l' impieté dans
l' ame, et en bannira la foy receuë
par le baptesme. Je ne suis pas icy
maintenant pour resoudre comment
ces jeunes heretiques sont
excusables, et comment, ou quand
ils sont inexcusables devant Dieu,
car vous ne m' interrogez pas de
cela, c' est assez que nous ayons decouvert
l' effrontee ingratitude
du 50 quatrain de vostre poëte.
Le 51 est encore plus impie, car
il essaye de persuader que nos devanciers

p552

nous ont fait à croire que
ce qu' ils racontoient de la religion,
et de Dieu estoit vray, bien
que le tout ne fust qu' une pure invention
de leur imagination pour
passer le temps, et pour amuser les
petits enfans : asseurément voyla la
conception du rimailleur ; il est
fort facile de parler comme un
perroquet, mais de prouver son
impieté, il est impossible.
Or afin de sçavoir ce qu' il faut
croire, remarquez avec moy qu' il
se peut faire que quelque vieille,
ou quelque autre personne se mesle
de faire plusieurs contes aussi
bien de la religion que d' autres
choses, tels qu' on en voit dans l' alcoran,
et chez quelques rabins :
en ceste façon on pourroit bien
faire à croire à de petits enfans, voire
mesme à de grands, que Dieu

p553

auroit fait, ou revelé quelque chose,
laquelle neantmoins seroit
fausse ; il n' y a que trop de fols, et
d' hypopondriaques dans le monde
pour s' en imaginer des plus
belles, lesquels croyent estre roys,
papes, et dieux ; mais ce n' est pas
de ces fourbes, ny de ces contes
que vostre poëte veut parler, c' est
de la vraye creance approuvee, et
receuë non seulement des enfans et
de la populace, non seulement des
idiots, et des foibles d' esprit, mais
des plus vieux, des plus riches, des
plus doctes, et des plus judicieux,
qui furent jamais au monde, lesquels
ont receu la religion chrestienne
non pas à la legere, non pas induits
par presens, et par faveurs, non
plus que par force, ou par illusion,
mais poussez à cela par de vives
raisons, ausquelles on ne sçauroit

p554

treuver à redire, et par de si grands
prodiges, et miracles, qu' il est impossible
qu' ils ayent esté faits, que
par la premiere cause de l' univers,
laquelle a tousjours tesmoigné
tant en la loy de nature, et la loy
escrite, qu' en celle de la grace, que
la vraye religion luy estoit fort agreable.
Jamais il ne fut, et jamais ne sera,
que Dieu n' approuve la vertu, et
qu' il ne luy favorise ; non plus qu' il
ne se peut faire, qu' il favorise le
peché. Or pour achever ce quatrain,
je dy que si quelques-uns avoient
esté abusez en la creance
dés leur jeunesse (comme il arrive à
tous les infideles, et aux heretiques)
s' ils vivoient selon la lumiere,
que Dieu a imprimee dans leur
esprit, et qu' ils suivissent les bons
mouvemens, qu' il leur envoye,

p555

sans doute Dieu leur feroit faire
rencontre de quelques uns, qui
les desabuseroient, et leur enseigneroient
la vraye, la pure, et la
sincere doctrine de l' eglise catholique,
qui n' est qu' une, en quelque
part qu' elle soit estenduë ; et
par ainsi les erreurs, qu' ils auroient
succez en leur bas aage, ne
nuiroient pas à leur salut.
Je ne doute point que Dieu
n' envoye plusieurs lumieres, et divers
mouvemens à tous les heretiques,
lors qu' ils sont en aage de
recognoistre le vray d' avec le
faux, et ce plus souvent, et plus vivement
que non pas à ceux qui ne
sont point baptisez, la grace du
baptesme requerant un particulier
secours de Dieu pour operer ;
je desirerois fort que tous les heretiques
parvenus à l' usage de raison

p556

s' esprouvassent eux-mesmes,
et fissent reflexion sur ce temps,
afin de voir si Dieu ne les auroit
point touchez, et fait douter, si
nostre creance n' estoit point meilleure
que la leur ; si leurs parens, ou
leurs precepteurs, et ministres ne
les auroient point trompez ou par
malice, et ce pour le bien de la cause, 
comme ils parlent, ou par ignorance.
Je me tromperois fort, si ces
atteintes, ou semblables pensees
ne leur avoient frappé l' esprit, et
qu' ayans fait la sourde oreille, et
suffoqué ceste bonne semence en
qualité de grace prevenante, cela
n' avoit esté cause que Dieu les auroit
abandonnez à leurs imaginations,
jusques à devenir deistes, et
athees, comme vostre poëte fait
assez paroistre.
Or nous sommes si certains que

p557

nos devanciers ne nous ont pas
trompez, ny fait croire à fausses enseignes
que Dieu avoit revelé ce
qui est contenu dans la saincte bible,
et que la doctrine de l' eglise
est tres-veritable, que nous pouvons
hardiment chanter avec le
prophete royal. (...), et dire des apostres,
desquels nous suyvons la
doctrine, (...), car tant de merveilles
ce sont faites en tesmoignage de
ceste verité, que quand je les considere
serieusement, il me semble
qu' il est impossible d' en douter.
Le D monsieur, je vous proteste
que vous me ravissez, et me
tirez les larmes de joye, de voir
que la religion catholique, que
j' avois euë en horreur, et que j' embrasse
maintenant de tout mon

p558

coeur, est si vraye, si claire, si saincte,
et si admirable : neantmoins
j' acheveray d' apporter les quatrains,
qui suivent, puis que vous
vous estes engagé de respondre
jusques à la fin, et tout incontinent
que ce sera fait, nous prendrons
giste, car je voy desja la fumee de
nostre hostelerie ; voicy donc ce
qui suit en vers,
Le Deiste
utile invention pour brider les esprits
des hommes insolens qui pervers de nature
mettent les magistrats, et leurs loix à mespris
pour vivre à l' abandon sans regle, ny mesure.
à quoy semblent aussi viser finalement
les merveilleux effects qu' on voit au monde naistre
dont les pipeniais ombragent finement
leurs contes fabuleux pour les simples repaistre. 
Le Theol pour moy je croy

p559

que vostre poëte a ramassé toutes
les impietez de Lucian, de Machiavel,
et de tous les libertins, et
atheistes qui furent jamais, et
qu' il a souvent fueilleté le maudit
libelle, dans lequel je ne sçay quels
esprits endiablez se sont efforcez
de persuader que ce n' estoit qu' imposture
que la loy divine ; il semble
que ce soit le dernier stratageme
de sathan, qui tasche de nous arracher
la religion de l' esprit, voyant
qu' il ne peut venir à bout de se faire
recognoistre pour Dieu ; je croy
que l' antechrist se servira de quelque
pareille fourbe pour s' insinuer ;
car puis qu' il voudra se faire
recognoistre pour Dieu, ou pour
le vray messie, il faudra par consequent
qu' il fasse perdre la vraye
religion à ses sectaires ; ce qu' il ne
pourra faire plus puissamment,

p560

qu' en accusant nostre sauveur
d' imposture, c' est pourquoy il faut
bien prendre garde aux impietez,
que nos libertins veulent faire
courir, et qui semblent estre les
precurseurs de l' antechrist, lequel
adjoustera des signes, et des prodiges
si grands pour enyvrer les
hommes de son erreur, que si Dieu
tout puissant n' y mettoit la main,
et que permettant à cet inique
d' establir si puissamment son impieté,
il ne secouroit les fideles d' une
particuliere assistance, à peine
se pourroit-il treuver aucun qu' il
n' abusast.
Or que la religion chrestienne
ne soit pas une invention pour
brider les insolens (bien qu' elle
serve grandement à cela, à raison
de sa pureté, et de sa saincteté) il est
evident, en ce que les princes, les

p561

roys, les empereurs, et les legislateurs
la croyent aussi bien emanee
de la parole de Dieu, comme
le simple peuple : et puis il y a
beaucoup de choses dans la vraye
religion, que les hommes ne sçauroient
avoir inventé, et qu' il a faillu
recevoir de Dieu, ce que vous
recognoistrez facilement par la
lecture des saincts livres, et de l' histoire
ecclesiastique.
Mais sur tout je voudrois que
ce poëte, et tous ses complices me
monstrassent comment c' est que
les legislateurs ont peu tous
les grands miracles que nous lisons
dans la saincte escriture pour
confirmation de la religion ; s' ils
nous monstroient que quelques
autres magistrats, et legislateurs
eussent fait, ou fissent de semblables
miracles en nos temps pour

p562

confirmation des loix, et des ordonnances
qu' ils establissent tous
les jours, je les escouterois ; mais ils
parlent comme yvrongnes sans
sçavoir comment, ny pourquoy,
ayans seulement ce dessein, et
cette intention, de se dépestrer
de toutes sortes de loix, de crainte,
et de respect, afin de se veautrer
dans toutes sortes de voluptez tant
soient-elles vilaines, et de faire
tout ce qu' il leur plaist impunément,
et sans scrupule, ou remords
de conscience.
J' estime neantmoins que s' ils
considerent les miracles, qui se
font encor tous les jours en tesmoignage
de nostre religion és
divers lieux de devotion, qui sont
en France, en Espagne, et en Italie,
et ce sans aucun fard, ou deception,
(puis qu' on en voit le fidelle

p563

rapport fait par les medecins, et
par une armee de tesmoins oculaires)
qu' ils reviendront à leur
bon sens, et confesseront qu' il est
impossible que cette religion,
pour la verité de laquelle se font
tant de miracles, soit fausse, controuvee,
ou inventee par les hommes.
Si je voulois rapporter tous les
vrays miracles que Dieu a fait en
faveur de la religion, il me faudroit
du moins autant de volumes,
comme il y a de siecles, depuis
qu' elle est ; je voudrois que vous
vous fussiez treuvé à celui qu' on m' a
depuis peu rescrit estre arrivé à la
descente des reliques de Saincte
Fare à Farmoutier, je m' asseure
que jamais vous ne croiriez rien
plus fermement, que la verité des
miracles, et par consequent que

p564

la vraye religion, dans laquelle ils
se font, en voicy l' abbregé. Y
ayant desja long temps qu' une
des religieuses avoit perdu la
veüe, jusques à là, qu' on luy avoit
bruslé la prunelle avec eaux fortes,
et caustiques, pour la faire mourir,
de peur qu' elle ne gastast les parties
voisines, estant prosternee dans
l' eglise, et priant instamment ladite
saincte, à l' attouchement de son
reliquaire elle recouvra la veüe,
et les yeux, et commença soudain
à s' escrier qu' elle voyoit, ce qui fut
tellement admiré de tous ceux
qui l' avoient cogneüe, qu' un chacun
s' achemina pour voir cette
merveille, car elle voit maintenant
tres clair.
Les medecins mesmes qui
l' avoient veüe aveugle dans Farmoutier,
ou qui luy avoient

p565

bruslé l' oeil, se sont transportez
sur le lieu pour estre tesmoins
irrefragables de ce miracle, lesquels
démentiront cet impudent
deiste, qui nous voudroit bien faire
passer pour une chose certaine
que nous ne voyons pas ce que
nous voyons, et que nous ignorons
ce que nous sçavons tres-bien ;
et ce souz l' ombre d' un quatrain,
dans lequel ce luy est assez
pour toute raison d' appeller non
seulement les chrestiens, mais les
apostres, et Jesus-Christ mesme,
des pipeniais ; blaspheme prodigieux
qui ne se peut expier que
par le feu, encore faudroit il qu' il
fust eternel.
Or les vrays catholiques sont
si esloignez de feindre des miracles,
ou d' eluder par quelques finesses
la creance d' aucun, tant rustaut,

p566

et simple soit-il, qu' ils aymeroient
mieux mourir que de persuader
la foy divine sous pretexte
de quelque subtilité, la proposant
comme vray miracle : pour
mon particulier je proteste au
nom de tous les vrays fidelles, que
nous endurerions plustost mille
tourmens, et mille roües, que
d' imposer la moindre chose à qui
que ce soit, bien que par là nous
pensassions sauver tout le monde.
La foy est genereuse, elle ne
veut pas estre plantee, ny prendre
vigueur par les ruses, et par les
subtilitez, elle veut un esprit
ferme, vigoureux, genereux,
et resolu, qui ne se laisse point piper
à personne, et qui croye simplement
ce qu' il croit, non à cause
de quelque homme, ou de quelque

p567

raison, mais à cause de l' authorité
divine de celuy qui a fait le
ciel, et la terre : asseurez vous que
ceux là se trompent fort, qui pensent
qu' il faille avoir un esprit raffiné,
masle, et subtil pour ne croire
point de religion, si ce n' est qu' ils
estiment que les pecores ayent de
fort beaux esprits, aussi subtils que
la pointe d' une esguille ; je serois
d' avis qu' on servist telles gens de
mesme viande que les pourceaux,
et les autres bestes, puis qu' ils s' accordent
si bien en religion, et en
creance avec eux, car ils n' en ont
les uns n' y les autres.
Il faut donc croire que les miracles
qui ont servy de motifs
pour embrasser la religion catholique,
ont esté tres-veritables, et
que ceux qui se sont convertis à
leur occasion, pour doctes, et subtils

p568

qu' ils ayent esté, n' ont peu y
recognoistre aucun defaut ; certainement
la continuation des miracles
qui se retreuve dans l' estenduë
du christianisme, est si asseuree,
et si merveilleuse, qu' il faudroit
estre privé du sens commun
pour se desvoyer de ce grand chemin
de la foy, qui a esté plantee
par tant de miracles, par la saincteté
de vie, et par le sang de tant, et
tant de martyrs.
Mais je vous prie, pensons à nostre
logis, et à soupper, et demain
vous proposerez le reste de vos
quatrains, si bon vous semble, ausquels
j' acheveray de respondre,
avec l' ayde de Dieu. Si vous desirez
voir à vostre loisir quantité de
raisons pour lesquelles les miracles,
qui ont aydé à establir la
vraye religion des chrestiens,

p569

n' ont peu estre faits par la nature,
ou par l' industrie des hommes, il
vous sera facile, car j' ay traité cela
fort amplement dans quarante et
six chapitres, par lesquels j' ay renversé
la vingt-cinquiesme (...)
des athees, laquelle ils pensoient
estre la plus forte.
Or avant que d' entrer dans
l' hostelerie, je veux vous donner
des quatrains contraires aux deux
que vous avez rapportez, afin que
l' impieté ne puisse avoir le dessus
non plus en rimes qu' en prose.
Si nostre foy n' estoit rien qu' une invention
utile aux magistrats pour retenir en bride
ceux qui mépriseroient leur jurisdiction
ils ne l' auroient choisie eux-mesmes pour leur guide.
Verroit-on comme on fait les princes, et les rois
obliger à la foy leurs sceptres, et couronnes
ou soûmettre à l' eglise, et à ses sainctes loix
avec si grand respect leurs royales personnes ?

p570

Le pape le vray chef de tous les vrais chrestiens
regle ses actions par la mesme creance,
il y vit, il y meurt aussi bien que les siens ;
la mort ne luy fait point changer de conscience.
Qui sont ceux que tu prens pour des pipeniais ?
Jesus-Christ pouvoit-il à ton advis tel estre ?
Les apostres ont-ils cheminé de biais ?
Ayans suivy de prés les pistes de leur maistre.
Sont-ce ceux-là lesquels ont usé finement
des effects merveilleux qu' on voit au monde naistre ?
Voulans (comme tu dis calomnieusement)
de contes fabuleux les plus simples repaistre.
Helas si Jesus-Christ eust cherché ses plaisirs
s' il se fust efforcé de regner sur la terre,
et si pour obtenir la fin de ses desirs
il eust aux empereurs, et aux roys fait la guerre :
s' il n' eust finy sa vie en un infame bois
comme premier témoin des choses revelees,
on eust peu soupçonner qu' il faisoit du matois,
et que ses actions estoient dissimulees.
Si les apostres, ss. Et les martyrs fervens
apres divers travaux, apres diverses peines,
de leur maistre Jesus les desseins poursuivans
n' eussent versé leur sang contenu dans leurs veines.

p571

On eust dit qu' ils preschoient pour leur propre
interest,
pour l' amour seulement des choses temporelles ;
mais leur vie, et leur mort monstre que cela n' est,
et qu' ils ne travailloient que pour les eternelles.
Ils vivoient pauvrement avec simplicité,
méprisoient les honneurs de ce monde sensible,
confessans Jesus-Christ, et sa divinité,
sans craindre la rigueur du tourment plus horrible.
Ces gens eussent-ils peu par des miracles faux
piper le simple peuple, et des fables luy dire ?
Puis souffrir en mourant mille penibles maux
qu' ils pouvoient eviter n' ayans qu' à se dédire.
En voudrois-tu souffrir, pour ton deisme, autant ?
Pourrois-tu l' ombrager d' une seule merveille ?
Non ; pourquoy vas-tu donc ces contes objectant,
puis que tu ne sçaurois faire chose pareille.
CHAPITRE 20


p572

auquel est monstré que nos actions ne
suivent pas l' absolu vouloir de Dieu ;
que Dieu ne reçoit pas de l' offense de
ce qu' il veut : que son essence n' est
point enrichie de nostre misere : que
nous ne croyons pas que Dieu soit agité
de vengeance ; et dans lequel les
quatrains du deiste sont refutez depuis
le cinquante-quatriesme jusques
au soixante-quatriesme. 
Le Deiste
allons, monsieur, il
est temps de partir ;
sus voicy le cinquante
quatriesme quatrain,
je vous prie de m' esclarcir sur les

p573

points, qui y seront deduits, afin
que je m' affermisse tousjours de
plus en plus dans la vraye religion ;
voicy donc ce qui suit.
Le Deiste
secondement, si les evenemens suivent la
volonté de Dieu, il faut donc qu' on nous monstre
qu' il peut recevoir de l' offense de ce qu' il
veut.
car se seroit le faire hypocrite et contraire
à sa volonté, si on disoit qu' il determine en
secret, ce qu' il deffend par ses loix. 
Le Theol or sus parlons au
nom de Dieu, pour sa gloire, et pour
son honneur : il me souvient que
ce 54 quatrain prend une des propositions,
que le poëte traistre à
Dieu, et à la religion, avoit faite
dans le 30 quatrain, car la premiere
estoit, que toutes nos actions

p574

suivent la cognoissance de Dieu :
maintenant il poursuit supposant
ceste seconde, sçavoir est que tout
ce qui se fait, suit l' ordonnance, ou
le vouloir absolu de Dieu. J' ay desja
assez respondu à ce dilemme, car
ne plus ne moins que les actions
de Dieu ne suivent pas sa science
en qualité d' effect, de mesme nos
actions ne la suivent pas en ceste
qualité ; veu que si par hypothese
impossible (qu' on fait souvent
pour entendre plus formellement,
et plus radicalement ce que
l' on propose, et ce qu' on veut conclurre)
Dieu n' avoit pas la cognoissance de
nos actions, pourveu
qu' au reste il se comportast
comme auparavant, elles ne laisseroient
pas de se faire comme
maintenant, c' est pourquoy tout
le discours, que ce poëte a tissu jusques

p575

à present, estant assis sur une
supposition, laquelle est fausse, il
est necessaire que tout le discours
s' en aille par terre, et soit de mesme
qualité que son fondement.
Voyons maintenant la seconde
partie, sur laquelle il fait rouller le
reste de ses quatrains remplis
d' impieté ; il veut donc nous rejetter
sur l' absolu vouloir de Dieu,
afin qu' il tasche de persuader que
toutes nos actions dependent de
ce vouloir absolu en qualité d' effect
necessaire, ce qui est tres-faux,
car bien que Dieu vueille, par exemple,
que nous observions ses
commandemens, que nous croyons
en luy, et que nous aymions nostre
prochain comme nous mesmes,
neantmoins ce n' est pas un
effect, qui parte necessairement
de sa volonté, non plus que de la

p576

nostre, à laquelle il donne une
pleine liberté de faire, et de vouloir,
ou de laisser, et de ne vouloir
ce qu' il nous commande, sans toutefois
qu' il soit en suspend de ce
que nous ferons, car il cognoist
tres-parfaictement toutes les determinations
futures, et possibles
de nos volontez aussi clairement
comme il se cognoist soy-mesme.
Nous ne disons donc pas que
tout evenement suive l' absolu
vouloir de Dieu, mais seulement
le vouloir qu' il accommode au
nostre, lors qu' il est question de
nos actions libres ; car pour les autres
effects, qui dependent seulement
de Dieu, comme le mouvement
de la mer, et des cieux, il suit
l' absolu vouloir de Dieu ; mais nos
actions de liberté vont plustost

p577

avec, qu' elles ne suivent apres : car
Dieu ne commence pas plustost
que l' homme, à faire une action de
liberté humaine ; non plus que
l' homme ne commence pas plustost
que Dieu, mais tous deux ils
commencent ensemble, l' un determinant
l' action quand à l' espece,
et l' autre quand à l' individu.
D' où il s' ensuit que Dieu ne reçoit
pas de l' offense de ce qu' il
veut, au contraire il n' en reçoit
que de ce qu' il hayt, et par consequent
que de ce qu' il ne veut pas ;
qui est le peché, qu' il deffend expressément,
et tesmoigne en mille
lieux de l' escriture saincte qu' il l' a
en horreur, estant impossible qu' il
l' ayme, car cela est contre son inclination
naturelle, par laquelle
il ayme toute sorte de bien, et
hayt toute sorte de mal. C' est donc

p578

fort mal raisonné d' inferer au quatrain
suivant, que nous disions que
Dieu determine en secret, et veut
le contraire de ce qu' il nous commande ;
car comme il ne nous peut
commander que le bien, et le bon,
aussi ne peut-il se faire, qu' il vueille,
et ayme le mal, qu' il nous deffend.
Je pense que ce poëte a estudié
à l' escole de Calvin, et de ses sectateurs,
et qu' il butte contr' eux en
ce quatrain, car ils ont inventé cette
distinction de vouloir arcane , ou
secret de Dieu, pour faire à croire
aux ignorans, que Dieu veut aussi
bien les pechez, que nous faisons,
comme les bonnes oeuvres ; d' où
ils tirent meschamment cette impie
consequence, que Dieu predestine
aussi bien les damnez à estre
damnez, que les saincts à estre

p579

bien-heureux. Mais quittons ces
perfides heretiques, qui ont esté,
et sont encore tous les jours cause
de ce que nous voyons tant d' athees,
et de deistes, je dy que cette
consequence d' accuser Dieu d' hypocrisie,
et d' antinomie en sa volonté,
ne peut estre faite contre les
catholiques, lesquels tous seuls
gardent la vraye religion, et accomplissent
la volonté de Dieu, et
qui preschent par tout le monde
que Dieu n' a point de volonté secrette,
par laquelle il vueille, ce
qu' il nous deffend par ses loix, et
soustiennent au peril de leur vie,
et de leur sang que c' est une heresie
de dire, ou de croire cela.
Renvoyons donc ce rimailleur
à l' escole de Calvin, afin qu' il dispute
contre son maistre, et voye ce
qu' il respondera suivant cette profane,

p580

et maudite doctrine : poursuivez
ces malheureux quatrains,
afin que nous preparions un medicament
à vos playes pris du
mesme scorpion, qui vous a piqué
si fort.
Le Deiste
c' est une grande impieté de vouloir que
Dieu punisse ceux suivent sa volonté, afin
qu' il monstre sa justice.
Dieu ne sçauroit condamner ceux qu' il conduit
en tous leurs mouvemens, autrement il seroit
injuste, et malicieux. 
Le Theol vous voyez manifestement
que ce poëte calvinodeiste
poursuit son impieté selon
les fondemens qu' il a jettez, si
bien que c' est assez de nier toutes
ces consequences, car le catholique,
qu' il appelle bigot, croit, et

p581

proteste que Dieu ne punira jamais
personne de tous ceux qui
suivent sa volonté, et que tous
ceux qui la suivent, seront recompensez
de la gloire eternelle, et
que ceux qui transgressent ses
commandemens, seront punis d' une
peine infinie.
Voila comme Dieu ne condamne
personne de ceux qui se
laissent doucement conduire par
luy en tous leurs mouvemens,
ausquels il donne de si grands
contentemens dés ce monde icy,
que la langue n' est pas capable de
les exprimer. Ils sont donc bien
loing de concevoir quelque injustice
en Dieu, lequel est souverainement
juste, et bon : par où vous
voyez quelles sottes consequences
attire apres soy l' erreur que
vostre poëte s' est imaginé au commencement ;

p582

c' est pourquoy je
pense qu' il n' est pas besoin de discourir
davantage sur ce sujet, car
c' est assez que vous detestiez desormais
cet erreur, et que vous
vous mocquiez d' une suitte si niaise :
poursuivez.
Le Deiste
Dieu pourroit-il exalter sa justice, et enrichir
son essence de nos maux, et de nostre misere ?
est-ce pas le pis qu' on puisse faire que de luy
adapter l' office de bourreau envers nous.
vaudroit-il pas mieux nier Dieu que de
croire qu' il tire de l' heur, et prend plaisir à nous
punir d' une peine immortelle. 
Le Theol voila une plaisante
cajollerie de vouloir conclurre
par forme de question, et d' interrogation,
que Dieu a besoin de nos
maux pour accroistre sa justice, et

p583

pour enrichir son essence de nos
malheurs : croyez que cet homme
a grand besoin d' Ellebore ; je vous
donne à penser si la justice de Dieu,
laquelle est un attribut infiny, dépend
de l' homme, et de ses actions,
et si sa justice, ou son essence,
qui sont infiniment immuables,
se peuvent accroistre. Non,
non, que vostre rimeur ne se perde
point en ces caprices ; la justice,
et l' essence de Dieu n' en seroient
pas moindres, quand il n' y auroit
ny pecheur, ny peché, ny aucune
chose au monde ; ce qui luy appartient
est eternel, et independant.
Mais puis que tout ce qu' il fait, est
bon, et qu' il veut que tout ce qui
est icy bas, se fasse en nombre, en
poids, et en mesure, lors que quelqu' un
a quitté l' ordre que Dieu
avoit estably, et commandé, il tire

p584

le bien de ce mal, reduisant le meschant
en l' ordre, non de la recompense,
et de la grace, mais de la
peine, à laquelle il le destine, apres
qu' il a offensé : laquelle il luy fait
souffrir en ce monde icy, ou en
l' autre.
Mais j' entends le deiste qui
dit qu' il ne faut pas faire Dieu
bourreau ; il faudroit que le bourreau
fist rentrer cette parole impie
dans la gorge de cet avorton,
puis qu' il a parlé de Dieu si indignement,
lequel a des bourreaux
par tout pour executer les supplices
ordonnez sur les pecheurs, sans
qu' il soit necessaire de luy donner
cette qualité : bien que parlant
avec plus de reverence, et de respect,
nous puissions dire que Dieu
est le juge criminel, qui decrete en
dernier ressort la peine deüe à nos

p585

demerites, et à nos offenses ? Et bien
qu' il ne se servist d' aucun diable,
ou d' aucune autre creature pour
nous chastier, mais que luy-mesme
nous affligeast selon nos demerites,
il n' y auroit nul sujet raisonnable
de s' en plaindre, car il a
droict de ce faire, puis qu' il est le
souverain juge independant, qui
ne doit rendre conte à personne
de ses actions, ou de ses conseils :
par consequent on pourroit bien
faire pis que de dire que c' est luy
qui chastie, qui condamne, et qui
punit les meschans, puis que cela
ne met aucune imperfection en
Dieu, au contraire cela nous monstre
combien il a le peché en horreur,
puis qu' il le punit si severement.
Le quatrain suivant suppose
aussi une chose tres-fausse, car

p586

Dieu ne tire, ny ne peut tirer aucun
heur du supplice des meschans,
non plus que de la recompense
des bons, estant necessairement
heureux de soy-mesme, et par
soy-mesme : et bien qu' il chastie les
meschans, et qu' il recompense les
bons, ce n' est pas pour en tirer une
nouvelle felicité, ou un contentement
particulier, mais c' est afin
que le vice, et la vertu soient estimez
tels qu' ils sont, et que ses attributs
nous paroissent en leur
grandeur ; c' est donc pour nostre
instruction, et pour nostre contentement
qu' il fait tout cela, et non
pour le sien ; c' est afin qu' il n' y ait
rien au monde en desordre, et à ce
que tout le monde en son tout, et
en ses parties responde, et ressemble
en quelque façon à son prototype,
qui est Dieu : par où vous

p587

voyez que ce quatrain est plein
d' impostures : poursuivez maintenant.
Le Deiste
le bigot aymeroit mieux estre nié des siens
par leur ingratitude, que d' en estre advoüé
furieux, cruel, impitoyable, et plein de trouble.
si Dieu est exempt de passion, comme
croyent tous les bons esprits, n' est-ce pas estre
ignorant, et superstitieux, de penser qu' il soit
agité de colere, et de vengeance. 
Le Theol ce 60 quatrain suppose
que nous depeignons Dieu
furieux, cruel, et plein de trouble,
ce qui est aussi faux, comme qui diroit
que le blanc est noir, ou que
le ciel n' est pas le ciel ; je m' estonne
de l' impudence de ce poëte, il
faut qu' il ait l' esprit forcené, et
furieux pour deduire des suppositions

p588

si furieuses : croyez donc fermement
que les catholiques
n' ont jamais dit, ou pensé que
Dieu fust sujet à ces inquietudes,
et perturbations d' esprit, qui nous
rendent farouches, et cruels ; mais
ils croyent, et preschent qu' il ne
peut y avoir aucune passion en
Dieu, estant exempt de toute sorte
de changemens, d' alterations,
et de vicissitudes. Et luy-mesme
recognoissant cette verité, et comme
forcé par la raison naturelle
confesse, ou du moins presuppose
au soixante-uniesme quatrain, que
Dieu est éloigné de toute sorte de
passion, afin qu' il tire cette consequence,
que le bigot est ignorant,
et superstitieux, lequel croit que
Dieu est agité de colere.
Vrayement s' il y avoit quelque
bigot au monde, qui tint les sottes

p589

propositions, qu' il veut que les catholiques
tiennent, celuy-là ne seroit
pas seulement superstitieux,
et ignorant, mais atheiste, car il
feroit un dieu sujet à changement,
et par consequent qui ne seroit
pas Dieu, puis que Dieu est un
estre immuable, (...).
Tenez donc pour asseuré,
monsieur, que c' est une pure imposture
de dire que les catholiques
croyent Dieu agité de quelque
passion ; car cela est impossible,
autrement Dieu ne seroit pas
Dieu.
Que si la saincte escriture le
décrit quelquefois tout en colere,
et armé de vengeance, c' est pour
nous faire paroistre ses effects, lesquels
se changent de moment en
moment, mais Dieu ne se change,

p590

ny ne s' altere point ; or comme
nous n' arrivons point à la cognoissance
des attributs divins que par
les divers effets, qui paroissent icy
bas, la saincte escriture a coustume
de nous parler de Dieu selon
nostre portee, bien qu' elle ait diverses
sortes d' explications, et de
gousts pour la diversité de ceux
qui la lisent, et qui la meditent.
Mais renversons le quatrain, et
disons que ce deiste est sot, ignorant,
et superstitieux, si outre son
ignorance, il a eu si grande crainte,
et scrupule jusques à present
qu' il n' ait osé voir quelque sçavant
catholique, afin de se faire
instruire de nostre creance sur
l' immutabilité de Dieu : avoit-il
point peur que s' il eust fait cela,
le catholique luy eust fait quitter
sa religion pretenduë de calviniste,

p591

ou de deiste ? Sus, sus, qu' il s' addresse
desormais à quelque duppe,
qui n' ait pas un carrat de cervelle,
s' il veut persuader ses impostures ;
poursuivez s' il vous plaist,
afin de voir s' il n' a rien de meilleur que cela.
Le Deiste
si vous dites que Dieu est furieux, quand
on n' observe pas les commandemens de Moyse,
vous le faites malheureux, puis que les hommes
les violent sans cesse.
mais s' il n' est jamais en colere, et si la beste
communique à nos maux, le superstitieux est-il
pas insensé de flatter sa volonté d' un chastiment
inique ? 
Le Theol nenny, il ne faut
pas le croire furieux, quand on
n' accompliroit jamais aucune loy,
soit de Moyse, soit de Dieu, soit de

p592

nature, puis qu' il n' est point susceptible
de passion, si bien que c' est
folie de s' imaginer que Dieu puisse
estre malheureux. Mais voicy le
refrein de la cadence du deiste,
lequel apres avoir pris la vraye superstition
estant bien entenduë,
(car Dieu n' a jamais aucune passion
de colere, estant une repugnance
manifeste, que de se l' imaginer
passionné) il prend une autre
supposition dans le mesme soixante-troisiesme
quatrain, qui est
tres-fausse, car la beste ne communique
point aux maux, pour lesquels
Dieu nous punit, puis que le
chastiment n' est que pour les actions
morales, ausquelles nous
dénions la fin, ou les circonstances,
qu' elles devroient avoir, desquelles
la beste n' est pas capable ;
et neantmoins si ce poëte huguenot

p593

n' entend les maux qui nous
sont libres, et qui nous rendent
coulpables, il ne conclud rien,
parce que les maux de peine, et les
maux purement naturels, et necessaires
ne nous mettent point en la
disgrace de Dieu, et ne meritent
aucun chastiment.
Est-il pas trop effronté lors qu' il
conclud cette derniere rime, disant
que le superstitieux flatte la
volonté de Dieu d' un chastiment
inique ? Comme si nous croyions
que Dieu peut estre flatté, et qu' on
luy en puisse faire à croire. Le catholique
ne flatte ny Dieu, ny soy-mesme
d' aucun chastiment, mais
il croit asseurément que la justice
sera faite des meschans, des deistes,
et des athees, tel qu' est ce
poëte : et que le chastiment n' est
pas inique, mais plein de justice, et

p594

d' equité, et est plustost moindre,
que trop grand. Je pense que cela
est assez clair, c' est pourquoy vous
pouvez passer outre.