
CHAPITRE 10


p211

dans lequel le theologien porte son
jugement touchant les oeuvres de Cardan,
et de Jordanus Brunus. 
je vous diray nettement
mon advis touchant
Hierosme Cardan,
car il a fait paroistre
beaucoup plus
d' impieté en ses escrits, lesquels
nous ne pouvons parcourir en ce
peu de temps qui nous reste, c' est
pourquoy je me contenteray de
vous monstrer combien quelques
uns de ses livres sont dangereux,
tels que sont sa sagesse, et beaucoup
d' autres passages de son
commentaire sur les jugemens
de Ptolemee, et de son livre de la
subtilité, l. 11 dedans lequel il monstre

p212

ce qu' il est en matiere de religion,
et qu' il n' a autre pieté que
l' extravagance de son esprit. Il
veut quasi par tout faire acroire
qu' il est si grand naturaliste, qu' il
decredite la foy tant qu' il peut,
comme vous pouvez voir en ce
qu' il a escrit de l' astrologie judiciaire :
car il parle de la venuë de
nostre sauveur, et de la loy chrestienne,
qu' il a instituee, comme si
les astres estoient causes de tout
cela, confondant par ces erreurs le
createur, et la creature, et faisant
que ce qui est tout surnaturel, et
miraculeux, vienne des causes naturelles.
C' est en quoy tous les astrologues
ignorans font naufrage,
manque de faire distinction entre
les oeuvres naturelles, et les surnaturelles,
entre la grace, et la nature.

p213

Or je ne veux pas examiner par le
menu tout ce que Cardan a dit
sans raison, ou sans jugement dedans
son astrologie, ce m' est assez
de vous avoir adverty qu' elle est
farcie d' erreurs ou contre la foy,
ou contre la raison, ou contre les
bonnes moeurs. Mais parlons un
peu de sa sagesse, car c' est le tiltre
le plus specieux qu' il eust peu
prendre pour attirer les sages à la
lecture de ce livre, que quelques
uns portent au lieu de manuel, ou
enchiridion de devotion.
Que voudriez vous de plus dangereux
que ce qu' il advance dedans
son troisiesme livre, lors qu' il
veut que les princes fassent autant
d' estat des meschans, comme des
bons et qu' ils embrassent, et caressent
les uns, et les autres indifferemment :
de telle sorte qu' ils ne

p214

demandent aucune justice des
meschans, mais qu' ils s' en servent
pour chastier les autres : comme si
le prince ne devoit pas plutost eslire
les bons pour exercer la justice
tant vindicative, que premiative :
je vous donne à penser ce
que ce seroit, si les meschans
l' administroient, elle se convertiroit
bien tost en injustice. Il faut
donc tenir tout le contraire, car le
prince doit estre estimé d' autant
meilleur qu' il aura plus grand
soin d' exterminer les meschans,
afin que son estat soit comme un
corps en parfaite santé, dedans lequel
tout est si bien proportionné
qu' il n' y a rien de mauvais.
Mais quoy, il veut que les princes
imitent la nature corrompuë
des corps, lesquels se servent des
mauvaises humeurs ; s' il eust pris

p215

garde que ces humeurs peccantes
corrompent la santé petit à petit,
jusques à ce qu' elles ayent le dessus,
d' où la mort s' ensuit, il eust veu
que son opinion fait le mesme dedans
les royaumes, et dans les republiques,
car si on endure, ou
qu' on caresse un meschant homme,
cela sera cause que pour un
vous en aurez bien tost à miliers,
ce que nous voyons tous les jours
arriver en France, dans laquelle
pour avoir enduré un athee, un libertin,
ou un deiste, une grande
partie des jeunes hommes se sont
perdus, et égarez de la foy.
Sçavez vous pas que la maladie
se communique des uns aux autres,
et non la santé ? Ce n' est à propos
qu' il prend Dieu pour confirmer
son erreur, car s' il endure les
meschans, et qu' il s' en serve pour

p216

faire meriter les bons, il est tout
puissant pour empescher leurs desseins,
quand bon luy semble, et
pour faire qu' ils n' exterminent les
justes, ausquels il donne la force
de resister contre les pervers, et
scelerats. Disons donc que les princes
doivent avoir un soin particulier
de se desfaire de toutes sortes
de personnes, qui n' ont ny la vertu,
ny la justice, ny la religion en
aucune estime, ou recommandation,
et qu' ils ne doivent fier ny
leurs biens, ny leur vie, ny leurs sujects
à telles gens, s' ils ne veulent
que leurs estats soyent en un perpetuel
desordre, et courent risque
d' estre perdus.
Il eust deu se souvenir en plusieurs
de ses livres, de ce qu' il reprend
en Erasme au 3 livre de sa
sagesse, quand il le blasme de ce

p217

qu' il a aporté des raisons pour, et
contre la penitence, afin de se mettre
en bonne estime tant envers
les catholiques, qu' envers les lutheriens ;
mais il ne l' a pratiqué en
l' unziesme livre de sa subtilité, car
apres avoir mis l' opinion, et l' erreur
des gentils, des juifs, et des
mahometans en parallele avec la
vraye religion, au lieu de refuter,
et renverser les pretenduës raisons
de ces irreligions, il laisse le tout à
la force des armes, se contentant
de dire en passant, qu' il luy seroit
fort facile de respondre à leurs raisons.
Est-ce pas là un brave chrestien,
et un excellent champion, lequel
pour tout payement, apres avoir
estendu l' empire de l' erreur
turquesque dans la chrestienté
par toutes les raisons dont il s' est

p218

peu adviser, il dit que s' il vouloit, il
chasseroit bien les ennemis ; à Dieu
ne plaise que nous nous servions
de telles gens pour deffendre la
verité de nostre religion, lesquels
font tout ce qu' ils se peuvent imaginer,
afin qu' ils fassent passer les
miracles de nostre sauveur, et redempteur,
et de tous les saincts
pour artifices, et effects naturels.
Quiconque s' asseurera de tels personnages,
il peut fier son bercail
aux loups, et aux lyons, et sa bourse
aux plus grands voleurs du
monde.
Vous souvenez-vous point de
la subtilité de certains larrons, lesquels
n' osans, ou ne pouvans dérober
vostre argent, de peur qu' ils
ont d' estre apprehendez, et justiciez,
ils accompagnent ceux qui
veulent dupper, et apres s' estre insinuez

p219

en leur bonne grace, ou en
leur familiarité, ils feignent d' avoir
trouvé quelque chaisne d' or, ou
d' argent, ou quelque bague, et pierre
precieuse : ce qu' ils pratiquent si
industrieusement, qu' ils attrapent
ceux qui pensent estre les plus
fins, et les plus rusez. Car ils escrivent,
ou font escrire des lettres par
leurs associez, comme si c' estoient
quelques notables personnes, qui
escrivissent à leurs amis, ou à leurs
parens, et leurs envoyassent quelque
chose de precieux, et feignans d' avoir
trouvé cela en leur chemin,
ou de l' avoir achepté à bon prix, ils
vous en font participant, et vous laissent
le tout à moitié de profit, à
condition que pour vostre part
d' un diamant d' alençon, qui vaut
peut-estre un escu, ou pour une
chaisne de mesme prix, vous leur

p220

donniez une vingtaine de pistolles
plus, ou moins selon qu' ils cognoissent
vostre portee. Mais le premier
orfevre, ou lapidaire, que
vous abordez, vous ayant decouvert
la happelourde, vous vous
appercevez de l' affronteur. Il me
semble que Cardan, Machiavel,
Brunus, et un tas de semblables canailles
en font de mesme en cequi
est de la foy, et de la religion chrestienne,
car ils taschent à persuader
que leurs artifices sont miraculeux,
et leurs pensees veritables en
matiere de religion, et de police, et
que la nature mesme confirme
leurs opinions, qu' ils estalent
comme pierres precieuses, afin d' arracher
la verité de la foy de nostre
esprit, et de nous dérober la creance,
que le fils de Dieu nous a gravee
dedans le coeur avec les goutes

p221

de son sang precieux.
Ce sont ces brigands desquels
il se faut soigneusement garder en
ce temps icy, auquel il semble que
l' impieté vueille empieter sur la
vraye religion, et déraciner la verité
catholique de l' ame des gens
de bien. à quoy Cardan semble
viser lors qu' au mesme livre de sa
sagesse il parle de nostre redempteur
Jesus-Christ, comme d' un
cavillateur, et d' un sage mondain,
voulant par ce moyen estouffer sa
divinité, car il le fait respondre par
la seule prudence humaine, au lieu
qu' il devoit monstrer, ou du moins
insinuer et se souvenir que nostre
sauveur voyoit toutes nos pensees,
et tous les desseings de ceux
qui l' interrogoient, ausquels il respondoit
tellement, qu' ils demeuroient
confus, et qu' ils eussent peu

p222

facilement cognoistre que ces responses
ne pouvoient venir que de
celuy, qui cognoissoit leurs pensees,
et leurs volontez, et qui par
consequent estoit le vray dieu, et
le messie, qui leur avoit esté envoyé,
lequel respondoit plustost
à leurs pensees qu' à leurs paroles.
Je laisse toutes les autres perverses
opinions, desquelles sa sapience
est farcie, comme quand il
dit qu' il faut estre hardy, et temeraire
jusques à commettre quelque
grand crime, selon ce meschant
vers,
(...),
si on veut estre riche, ou parvenir
à quelque dignité ; et que pour
boire plus facilement l' iniquité, il
est bon de se persuader qu' il n' y a
rien apres ceste vie : voyla une petite

p223

parcelle des opinions extravagantes
de Cardan ; par lesquelles
vous pouvez juger quel il estoit
en son ame : concluez maintenant
si un bon chrestien doit lire ses livres,
si premierement il n' est assez
sçavant, et resolu, pour cognoistre
ses erreurs, et pour les renverser.
Je ne veux pas maintenant discourir
de l' immortalité de l' ame,
de laquelle il parle si indignement
au livre qu' il a fait de ce suject,
que j' ay honte quand il me souvient
de ses resveries : comme
quand il fait la question, si la creance
de l' immortalité sert à l' homme
pour vivre vertueusement, et
dit tout ce qui luy vient en l' esprit,
afin de persuader que cela ne sert
de rien, bien qu' il se cache tant
qu' il peut dans l' ancre de son venin
comme la seche, de peur d' estre

p224

recognu pour athee ; mais ny
luy ny ses complices, tels que sont
ces deistes apostats, parmy lesquels
vous vous estes perdu, ne
sçauroient si bien se deguiser qu' on
ne les recognoisse incontinent à
leurs paroles, et à leurs façons de
faire.
Plus avant il doute si c' est une
bonne chose de suivre la verité, il
eust peu semblablement douter
s' il fait clair en plain midy, mais si
nous prenons garde qu' il estoit
poussé du maistre de mensonge,
nous ne nous estonnerons pas
beaucoup, puis que chacun parle
fort librement de ce qu' il ayme, et
suit l' opinion du maistre qu' il sert.
N' eust esté la crainte du supplice,
je croy qu' il en eust dit davantage,
comme il paroist par ses paroles
de la page 280, (...),

p225

bien qu' il eust assez monstré l' opinion
qu' il avoit des miracles, car
il les rapportoit à la seule nature, et
les faisoit dependre des affections
de nos esprits : opinion si ridicule
qu' il ne peut y avoir nul bon esprit
qui ne s' en moque, d' où vient que
luy-mesme contraint par la force
de la verité, confesse que la resurrection
des morts, et le transport
des montagnes surpassent l' estenduë
de toute la nature, c' est en la
page 214 (...).
Je ne veux pas maintenant parler
de la foy divine, par laquelle
nostre sauveur asseure que les
montagnes peuvent estre transportees
d' un lieu en un autre, ce

p226

que Cardan, ny ses semblables
n' ont jamais entendu ; neantmoins
il faut que vous preniez
garde que quand les miracles arrivent,
que c' est Dieu lequel opere
par sa toute puissance, la creature
ne luy servans que d' organe, et
d' instrument, de laquelle il se veut
servir pour l' honorer, et l' attirer à
une plus grande recognoissance
de sa divinité, ce qui devroit estre
suffisant pour nous embraser de
son sainct amour, et nous faire
quitter toutes sortes d' inutiles occupations,
telles que sont les sonnets,
les odes, et mille sortes de livres
que ceux de vostre bande
composent tous les jours, qui sont
remplis d' amour impudique, de
sottises et d' impietez ; à ce que
nous n' eussions plus de temps, ny
de loisir que pour aymer Dieu, et

p227

l' adorer en toutes façons en commençant
icy la beatitude, de laquelle
ceux là joüiront eternellement,
qui auront assujetty leur esprit
à la foy, et à la revelation divine,
et leur volonté aux sainctes
ordonnances de la divine majesté.
Voila ce que j' avois à vous dire
touchant Cardan, qui a tasché tant
qu' il a peu à decrediter la verité de
la religion chrestienne, ce qui
luy a fait dire en la page deux cens
97, que les prophetes se font naturellement,
à cause de la partie
du monde qu' ils habitent, pensant
qu' il n' y en peut avoir vers le septentrion ;
mais les propheties monstrent
assez qu' elles n' ont peu venir
ny du temperament du corps,
ny du lieu de la terre : et ceux qui
ont tant soit peu de jugement,

p228

voyent assez que la prophetie ne
peut arriver que par la lumiere divine,
que Dieu verse dans l' esprit
des prophetes, comme nous enseigne
tres clairement le coryphee
des apostres S Pierre dans sa seconde
epistre chap. 1. (...).
Le D ô Dieu, que j' ay esté
trompé jusques à present ! On m' avoit
fait à croire que Charron,
Cardan, Machiavel, et quelques
autres auteurs semblables estoient
les meilleurs livres que je peusse
lire, et que tout ce que les autres
autheurs, qui traictent de la religion,
rapportent, n' estoit que fables
pour entretenir le monde, et
pour donner de la terreur aux
meschans : resoluëment il faut que

p229

vous m' esclaircissiez sur cecy, avant
que je me départe d' avec
vous : car je me sens merveilleusement
bourrelé depuis que vous
m' avez descouvert les maudites
opinions de ces autheurs.
Le Theol je suis prest à vous
satisfaire en tout ce que je jugeray
estre necessaire pour vostre instruction :
mais voyons un peu auparavant
en quelle estime on doit avoir
Jordanus Brunus, lequel seroit
excusable s' il s' estoit contenté
de philosopher sur le poinct,
l' atome, et l' unité, et qu' il n' eust
eu autre dessein que de prouver
que la ligne circulaire, et la droite,
le poinct, et la ligne, la surface,
et le corps ne sont qu' une mesme
chose ; que le divisible finy ne
peut estre divisé infiniment, mais
qu' il faut venir à un poinct : (je laisse

p230

son infinité de mondes estoilés,
et plusieurs autres choses,
lesquelles appartiennent à la philosophie,
ou aux mathematiques). Je ne m' amuserois pas icy à
le reprendre, mais puis qu' il a passé
outre, et qu' il a attaqué la verité
chrestienne, il est raisonnable
de le décrier comme un des plus
meschans hommes que la terre
porta jamais.
Et afin que vous ne pensiez pas
que je parle sans sçavoir, si vous
lisez son troisiesme chapitre de
existentia minimi , vous cognoistrez
aysément qu' il favorise la
transmigration des ames d' un
corps en un autre, et qu' il semble
n' avoir inventé une nouvelle façon
de philosopher, qu' afin de
combatre sourdement la religion
chrestienne, ne s' osant descouvrir

p231

plus clairement de peur
du feu deu aux impies, mais il n' a
peu si bien faire, qu' il ne l' ait experimenté.
Si on profonde un peu
ce qu' il veut dire par l' extention
du centre, la consistence de la
sphere, et la contraction du centre,
qui luy servent pour expliquer
la naissance, la vie, et la mort, on
s' appercevra que son intention est
de n' advoüer aucune immortalité
de l' ame raisonnable, que celle
qu' il donne à l' ame des brutes, et
des plantes, et à tous les individus,
qui sont icy bas.
Ce n' est pas tout, il tasche de
prouver que Dieu n' a point de liberté,
afin qu' il persuade ses mondes
infinis, mais c' est en vain, car la
liberté ne seroit pas une perfection,
si elle n' estoit en Dieu. Je
luy demanderois volontiers, ou à

p232

ceux de sa suitte, si Dieu n' a peu
faire ceste terre, sur laquelle nous
marchons, plus grosse, ou plus petite,
s' il n' a peu esloigner le soleil
davantage qu' il n' est : je croy qu' il
n' y a homme sur la terre, qui ne
m' accorde que Dieu pouvoit faire
une terre cent fois moindre, ou
plus grande ; qu' il pouvoit placer
le soleil où sont les estoiles, et faire
mille choses qu' il n' a pas voulu
faire, autrement il faudra dire que
Dieu est tellement attaché à ceste
terre, et son infinité liee aux choses
qui sont finies, qu' il ne peut estre
tout puissant, et infiny sans elles, ce
qui ne peut estre, ny se concevoir
en aucune façon.
Ce meschant homme a encore
esté pire que Cardan, comme sçavent
ceux qui le hantoient lors
qu' il estoit à Paris, et comme tesmoigne

p233

le livre qu' il a intitulé sigillus
sigillorum , dans lequel il met
quinze sortes de contractions à ce
qu' il puisse sapper les fondemens de
la vraye religion : car dans la premiere
il rapporte les miracles de
nostre Seigneur à la qualité du
lieu ; les ravissemens ecstatiques
des saincts en l' air à l' imagination,
et à la melancholie dans la 2 espece
de ses contractions ; dans la troisiesme,
il veut que la prophetie
vienne par le racourcy qu' on fait
de l' horizon au centre ; dans la quatriesme,
il feint que les revelations
arrivent par la force de la grande
attention. La cinquiesme passe au
delà de Cardan, qui disoit que le
transport des montagnes surpassoit
les forces de la nature, car il
veut que cela se puisse faire par
une affection de foy, ou plustost

p234

d' imagination, de presomption,
et de fole creance, comme on verra
si on le lit attentivement, car
pour ce qui est de la foy chrestienne,
et divine, il n' en croit
point.
Je laisse ses contractions de la
pieté envers le pere, de la crainte,
de la convoitise, des sens exterieurs,
de la melancolie, et des esprits
vitaux, animaux, et sensitifs,
par le moyen desquels il pense
qu' on peut s' eslever en l' air, comme
Sainct Paul, qui fut ravy jusques
au troisiesme ciel. Bref, je
passe la contraction qu' il fait venir
du mauvais aliment, laquelle engendre
la melancholie avec la fable
de celuy qu' il rapporte estre
devenu grand prophete, grand
theologien, et sçavant en toutes
sortes de langues, et la contraction,

p235

ou rappel de l' esprit, afin que
nous ne perdions point le temps à
refuter toutes ses resveries, et que
le voyage qui me presse ne nous
separe avant que nous ayons examiné
ce qui est de vos opinions.
Je vous eusse parlé de Machiavel,
n' eust esté qu' il y en a plusieurs
qui ont renversé ses impietez avec
des raisons qui sont suffisantes
à ce qu' on quitte les erreurs qu' on
auroit peu succer dans ses livres.
Passons donc à ce qui vous touche
de plus pres, car je croy m' estre acquitté
de ce que vous aviez desiré
touchant les autheurs, par la lecture
desquels vous vous estiez égaré
de la religion catholique, estant
assez à un bon esprit, tel qu' est
le vostre, de cognoistre le mal
pour le fuyr ; car vous voyez clairement
que ces autheurs sont fort

p236

dangereux, et qu' il faut que celuy
qui les lit, soit continuellement sur
ses gardes, et en une perpetuelle
deffiance, puis qu' ils semblent n' avoir
eu autre plus grand dessein
en publiant leurs livres que de
nous faire quitter la verité de la
religion, et nous faire succer le
venin de leurs malheureuses opinions,
et de leurs imaginations fantasques,
et bigearres ; et bien que
les propositions qu' ils mettent en
avant semblent n' estre pas grande
chose de prime abord, et qu' elles
plaisent à cause de quelque image
de probabilité, neantmoins si tost
qu' on les embrasse, leurs consequences
les trainent à l' impieté, de
laquelle il est par apres tres-difficile
de se retirer.
Si vous desirez sçavoir les impuretez,
et les tours de soupplesse

p237

de Vanin, lequel a esté bruslé à
Tholose pour ses opinions brutales,
et remplies d' atheisme, vous
pourrez facilement les treuver
dans la premiere question de la
genese, dans laquelle j' ay renversé
la plus grande partie de ses maximes.
Et puis j' espere que je refuteray
toutes les fantaisies de ce
maudit Lucilio, et tous les paralogismes
qui se rencontrent és oeuvres
de Jordan Brun, et és livres de
semblables badins, quand je mettray
la main à quelque oeuvre que
j' ay dans la pensee, estant assez
pour le present que je vous aye
fait toucher au doigt leur impertinence.
Je ne veux pas vous entretenir
plus long temps sur ce suject, attendant
à refuter tout ce que ces
autheurs ont dit mal à propos en

p238

l' encyclopedie, laquelle je prepare
en faveur de toutes les veritez,
contre toutes sortes de mensonges,
dedans laquelle j' examineray
plus diligemment ce qu' ont advancé
Gorlee, Charpentier, Basso,
Hill, Campanella, Brun, Vanin, et
quelques autres. Je me contenteray
pour maintenant de cotter
quelques unes de leurs impertinences,
telles que sont celles-cy de
Charpentier en sa premiere decade,
que toutes choses se font, et se tirent
du rien , ce qui oste toutes sortes de
generations, et ne laisse qu' une
creation perpetuelle. qu' il n' y a
point de mouvement d' un lieu en un autre. 
en la seconde decade, que la
transsubstantiation est impossible , ce
qu' il tasche de preuver avec des
argumens de paille, que nul n' est
conjoinct a son sujet par inherence .

p239

Gorlee s' accorde avec luy en ce
poinct, que toutes choses se font de
rien, et s' en retournent en rien, et par
consequent que la creature peut
produire quelque chose en le tirant
du neant. Il adjouste que les
accidens peuvent passer d' un subjet
en un autre, qu' ils peuvent estre
sans aucun suject d' inherence, et
qu' ils se font de rien : qu' il y a des
atomes dedans les corps, qui ont
quantité, et figure, etc.
Quant à ce qui est de la philosophie
epicurienne de Hill, il faudroit
la transcrire, si on vouloit en
rapporter les resveries ; au bout du
conte ils sont tous heretiques,
c' est pourquoy il ne faut pas s' estonner
s' ils s' accordent comme
larrons en foire. Advisez maintenant
si vous desirez que nous parlions
de la secte, laquelle vous

p240

m' avez dit avoir embrassee, et y
avoir esté confirmé par la lecture
que vous avez faite de Charron,
de Cardan, et de quelques autres,
qui avoient l' esprit extravagant, et
qui ne respiroient rien que le libertinage,
et l' impieté.
Le D monsieur, si vous me
pouvez oster de l' opinion, que j' ay
euë jusques à present touchant la
religion, vous pouvez vous asseurer
que vous aurez gaigné une
ame à Dieu, car je n' ay trouvé personne
qui m' ait satisfait sur ce sujet,
et qui m' ait fait voir que la religion
chrestienne soit meilleure
que celle que j' ay espousee depuis
neuf, ou dix ans en ça.
CHAPITRE 11


p241

dedans lequel le theologien preuve que
la religion catholique est la seule
veritable. 
bon dieu en quel siecle
sommes nous ! Qu' il
faille qu' on preuve la
parole de Dieu, et qu' il
y ait des hommes si aveuglez qu' il
leur faille monstrer qu' il est jour
en plein midy. Est-il donc possible
qu' apres une si grande multitude
de martyrs, qui ont respandu leur
sang, et donné leur vie pour tesmoigner
la verité de la religion
chrestienne, vous puissiez en douter ?
Certainement il n' y a consideration
aucune, sur laquelle je puisse
jetter les yeux, qui ne soit capable
de me persuader qu' il n' y a

p242

point d' autre religion que la catholique,
soit que je contemple la
quantité d' hommes sçavans de toutes
sortes, les nations, qui l' ont embrassee
sans esperance d' aucune
utilité temporelle, ce qui a esté
suffisant pour arrester ce grand
aigle des docteurs sainct Augustin,
comme il tesmoigne par ces
paroles : (...) ; soit que
je considere les miracles, (...) : par
lesquels Justin Le Martyr dit en sa
1 apol. Au senat de Rome, qu' il a
esté conduit à la foy de Jesus-Christ.
Et quoy, Dieu auroit-il permis
que tant de milions de personnes,
qui ne respiroient rien que sa gloire,
et son honneur, ayent perdu la

p243

vie pour la religion chrestienne,
et qu' elle ne fust pas veritable ? Ce
pourroit-il faire que Dieu auteur
de toute verité, eust fait des miracles
en faveur d' une fausse opinion ?
Nenny certes, c' est pourquoy
il est necessaire d' advoüer
qu' elle est tres veritable, puisque
la fontaine de la verité l' a tellement
favorisee, et la cherit tous
les jours par tant de façons, que sa
puissance, sa providence, et sa bonté
reluisent à l' égal au soin qu' il
en a. Remarquez je vous prie avec
combien d' affection, et d' ardeur
ceux qui se sont convertis au commencement
du christianisme, ont
embrassé la vertu, avec quelle
saincteté de vie ils ont passé le reste
de leurs jours, avec quelle fidelité,
et diligence ils ont renversé
les erreurs par paroles, et par escrit,

p244

esquels ils avoient trempé
avant la lumiere de l' evangile.
Ce n' est pas tout, si vous prenez
garde à la façon, par laquelle la
religion chrestienne a esté introduite
au monde, vous confesserez
ingenuëment qu' il est impossible
que ce ne soit la vraye religion,
car sont esté de pauvres gens, et
des idiots, qui l' ont plantee, sçavoir
est les apostres, et leurs disciples,
la pluspart desquels n' avoient
point estudié, et n' avoient
ny or, ny argent pour se faire suivre.
Et puis ils ne proposoient aucune
volupté, aucun plaisir du
corps, aucune dignité, pas un denier :
au contraire ils ne preschoient
que misere, que disette, que douleurs,
que gibets, et autres sortes de
tourmens : et neantmoins ils ont esté
suivis par les grands, et par les petits,

p245

par les pauvres, et par les riches,
par les maistres, et par les serviteurs,
par les princes, par les roys,
par les empereurs, et par tous leurs
subjects, ce qui n' a peu se faire que
par une vertu divine, à laquelle
nous en devons rapporter tout le
succez, comme advouëront tous
les hommes de la terre bien sensez,
si on leur en demande leur advis,
ce qu' a fort bien remarqué
Sainct Augustin, lors qu' il a dit que
les philosophes, et tous les sages
du monde interrogez là dessus respondront
que la religion des
chrestiens n' a peu estre persuadee
par des hommes, (...).

p246

Pour faire embrasser la religion
chrestienne à un homme de
bon jugement, je ne voudrois autre
chose que le tesmoignage de
nos plus grands ennemis, lesquels
sont miserables, et le rebut de tout
le monde, à cause qu' ils ont crucifié
le vray messie, au lieu qu' auparavant
ils estoient le peuple aymé,
et chery de Dieu par victoires,
miracles, et propheties. à quoy on
pourroit adjouster les excellens
tesmoignages, que les empereurs
ont donné des chrestiens, bien
qu' ils fussent idolatres, comme
nous lisons dedans Eusebe, et Justin
Le Martyr.
Que sera-ce si vous jettez l' oeil
sur toutes les propheties contenuës
dedans l' ancien testament,
lesquelles ont predit tout ce qui

p247

est arrivé à nostre sauveur si clairement
qu' Esaie semble voir les
mysteres de la vie, et de la mort de
Jesus Christ. Vous sçavez que nous
n' avons pas inventé ces predictions,
car nos ennemis jurez, qui
ont conservé ces livres jusques à
present, nous garantissent de cela ;
et afin qu' on ne puisse dire que
nous y avons adjousté, ils ont conté
toutes les lettres de leur loy,
qu' ils disent estre, si bien me souvient,
huict cens vingt et un mil et
quatre vingts une : et puis nous
nous servons des mesmes bibles
qu' eux, lesquelles doivent avoir
une plus grande authorité, que
tous les autres livres du monde,
encore que nous ne parlassions
que de l' authorité naturelle, puis
qu' ils sont les plus anciens, dedans
lesquels les plus excellens

p248

philosophes, et les plus sçavans de
toute l' antiquité ont puisé ce
qu' ils ont de meilleur.
Certainement si les chrestiens
n' eussent eu la vraye religion, jamais
ils n' eussent peu subsister parmy
tant de persuasions des juges,
et des empereurs : et si la vertu divine
ne les eust renforcez, ils eussent
esté bien tost étouffez, laquelle a
souvent empesché que les tourmens
ne leur ayent fait mal, multipliant
à cet effect miracle sur miracle.
Mais à quel propos suis-je si
long-temps sur cecy, veu que les
paroles, et les oeuvres de Jesus-Christ
estoient si merveilleuses,
qu' elles ne pouvoient estre faites
que par un homme qui fust Dieu.
Considerez quelle efficace avoient
ses paroles, lors qu' il preschoit, et
avec quel zele il procuroit

p249

la gloire eternelle de son pere :
et si vous me voulez croire, lisez
les evangiles, je m' asseure que
vous confesserez librement n' avoir
jamais rien leu de semblable,
car la lecture attentive de la bible
est si charmante, qu' on ressent je
ne sçay quelle vertu extraordinaire,
qui nous frappe l' ame en la lisant,
et nous console, si nous sommes
affligez, nous fait embrasser la
vertu, et quitter le vice, bref c' est
un banquet, un remede, un soleil,
un contentement universel.
Et quand tout cela ne seroit pas,
je dis que la religion catholique
ne contient rien que de tres-juste,
et raisonnable, et ne peut se faire
qu' elle ne soit veritable, car elle
n' embrasse que ce qui est digne
de la divine majesté, rejettant bien
loing tout ce qui est indigne d' un

p250

si grand estre, si bien que quiconque
advoüera une divinité, confessera
quand et quand que la maniere
de laquelle nous servons
Dieu, est tres-saincte, et fort convenable
à la majesté divine. Voudriez
vous une meilleure religion
que celle qui embrasse courageusement
toute sorte de vertus, et
deteste toutes sortes de vices, et
d' imperfections ? Desireriez vous
une creance plus relevee, et plus digne
de Dieu que celle, laquelle ne
reçoit rien que ce qui est à sa plus
grande gloire ? Laquelle ne faict
conte de la mort, des biens, des
honneurs, et de la vie, lors qu' il est
question de l' honneur de Dieu, et
qui assujetit l' appetit sensitif à l' esprit,
et la raison à Dieu, qui rend à
un chacun ce qui luy apartient,
bref qui n' a autre motif, autre plaisir,

p251

autre occupation que de plaire
à la majesté divine ? Veritablement
quand Dieu n' auroit donné
aucune loy, il ne seroit pas possible
qu' on en peust trouver une
plus excellente que la nostre. Toute
la lumiere de la nature, et tous
les esprits des hommes ne sçauroient
en inventer une semblable,
comme vous pouvez juger de toutes
les loix qui ont esté faites par
tous les legislateurs, lesquelles
ont tousjours esté vicieuses, et imparfaites
en plusieurs choses, c' est
pourquoy il a esté necessaire pour
nostre salut, que Dieu nous ait enseigné
ce qui estoit de la verité, et
la vraye façon de le servir, autrement
nous fussions tousjours demeurez
en nos erreurs.
Or je croy que tous ces motifs
sont plus que suffisans pour vous

p252

remettre au bon chemin, et vous
faire quitter vos opinions, car il est
impossible qu' apres tant de merveilles,
qui ont esté faites en faveur
de la religion chrestienne,
elle ne soit pas veritable, et l' unique
que Dieu approuve, autrement
nous pourrions dire que Dieu
nous auroit deceus, ce qui ne se
peut faire. Tenez donc pour tout
asseuré qu' il n' y a que ceste creance,
selon laquelle, et dans laquelle
vous puissiez estre sauvé.
CHAPITRE 12


p253

dans lequel le deiste rapporte ces trois
premiers quatrains avec leur refutation,
et est monstré que le chrestien
n' est pas superstitieux ; que Dieu
fait tout par un mesme acte : qu' il
n' est subjet à aucun changement, ou
perturbation, et qu' il punit tres-justement
les meschans, bien que le peché
soit un rien. 
Le Deiste
monsieur, ce discours
m' a satisfait entierement,
mais j' ay plusieurs
difficultez, lesquelles
m' ont tellement
embarassé l' esprit, qu' il
m' est quasi impossible de m' en depétrer :
je voy bien d' un costé que

p254

vos raisons sont merveilleusement
fortes, mais d' un autre costé
je treuve tant de difficultez en la
religion catholique, que cela a
esté cause que je l' ay abandonnee
il y a long temps.
Le Th s' il ne tient qu' à resoudre
vos doutes, je m' offre à ce faire
durant tout nostre voyage, pourveu
que vous ne mettiez point en
avant les moeurs, et la corruption
des particuliers, car en tous estats,
et en toutes conditions et compagnies
il se trouve des meschans.
Le D vous me ferez un singulier
plaisir, je vous promets que je
ne m' attacheray point aux vices,
ou malversations des particuliers,
car je sçay que la doctrine ne depend
pas des moeurs ; or je ne sçaurois
pas proposer toutes mes objections,
si ce n' est que je vous les

p255

die par ordre selon les quatrains,
qu' un des principaux de nostre cabale
a faits, afin qu' on sçeut parfaictement
ce qui est de nostre religion,
et si je ne puis me souvenir
des quatrains, je vous en diray la
substance.
Le Th vous ne pouvez avoir
aucune legitime religion, que celle
dont je vous ay parlé, si bien
que la vostre ne peut estre que
pretenduë, afin que vous ne vous
trompiez pas au commencement :
neantmoins je ne veux pas vous
troubler si tost, proposez vos quatrains
quand il vous plaira, pourveu
que vous me promettiez que
vous quitterez toutes les erreurs,
qui y sont enfermees, et que vous
embrasserez la religion catholique,
si je vous satisfaits sur toutes
vos difficultez : car je ne desire pas

p256

perdre ma peine, encore que tout
le gain, s' il y en a, vous en doive revenir.
Or si vos vers sont ceux qui me
sont autrefois tombez entre les
mains, nous aurons bien tost fait,
car je croy que le sommaire de la
response que j' avois preparee à ces
mal heureux vers, vous contentera
parfaictement, reservant à vous
en faire voir une plus longue,
si je voy qu' elle soit necessaire.
N' importe pas beaucoup si vous
ne pouvez vous souvenir de tous
les quatrains, ce sera assez que
vous en rapportiez le sens, neantmoins
je laisse le tout à vostre volonté,
et à la bonté, et fidelité de
vostre memoire, mais à telle condition
que je ne lasseray pas à vous
satisfaire moyennant la grace de
Dieu, bien que vous proposiez

p257

d' autres vers que ceux que j' ay entre
les mains.
Le D je ne sçay pas quels sont
ceux que vous avez, mais les nostres
sont fort secrets, car nous ne
les communiquons à personne,
que nous ne cognoissions bien auparavant,
et que nous ne scachions
s' il en fera son profit quittant les
erreurs populaires : or nous leur
donnons pour tiltre, l' antibigot .
Le Theol ce sont les mesmes
indubitablement, ne se commencent-ils
pas par ce vers.
puis que l' estre eternel, etc. 
Le D justement, je suis fort aise
qu' ils soient tombez en si bonne
main, veu que je ne desire rien tant
que de me tirer d' erreur, si j' y suis,
bien que je sçache que tous ceux
qui sont de mon party, en seront
fort marris, car ils tiennent ces vers

p258

comme un thresor, et ne les departent
que soubs la cappe. Vous
plaist-il donc que je commence ; si
premierement je vous advertis
que nous entendons le chrestien,
ou le catholique par le bigot, et par
le superstitieux , afin que les equivoques
ne nous arrestent point.
Le Theolog commencez
quand il vous plaira, si vous pouvez
reduire les quatrains en peu
de mots, nous aurons plustost fait,
car les vers ont coustume de contenir
beaucoup de choses qui ne
sont pas à propos.
Le D j' en suis content, nommement parce que
les vers sont mal faits,
y ayant de mauvaises rimes,
et quantité d' injures, et de
boufonneries : je vous reciteray
neantmoins les deux premiers
quatrains tels qu' ils sont, et puis

p259

j' apporteray la substance des autres,
voicy donc le commencement
de nostre poëme.
Le Deiste
puisque l' estre éternel est eternellement
tres-heureux, et parfait en toute suffisance,
qu' il est la bonté mesme, et sage infiniment,
sur tout ce qu' en conçoit l' humaine intelligence,
le superstitieux est il pas insensé
de se le figurer constant, et variable,
embrasé de vengeance, et d' un rien offensé,
ennemy des tyrans, et plus qu' eux redoutable. 
Le The je vous prie de vous
rendre attentif aux responces que
je feray à tous ces quatrains, car je
me promets avec la grace de Dieu
de vous monstrer clairement qu' ils
ne contiennent rien contre la religion
catholique, qui ne soit tres-faux ;
et que vostre poëte est un cajoleur,
un menteur, un imposteur,
et un des plus meschans hommes
que la terre porta jamais. Le 1 quatrain

p260

ne contient rien que ce que
nous advoüons, car nous disons, et
croions fermement que tout ce qui
est en Dieu est tres parfaict, puis
qu' il est Dieu mesme, suivant la maxime
de la theologie, (...) :
et que c' est un estre essentiellement
independant, et infiny,
lequel surpasse toute sorte
d' intelligence. Mais s' il entend le
chrestien par ce mot de superstitieux ,
c' est un imposteur, veu qu' il n' y a
personne qui soit tant esloigné de
la superstition que le vray chrestien.
Que vostre poëte cherche
donc ailleurs son superstitieux, que
parmy ceux qui embrassent nostre
creance : car je vous prie, qu' est-ce
que la superstition ? Est-ce pas un vice
contraire à la religion, par lequel
on rend le culte à celuy, qu' on ne
doit pas ? Comme lors que les idolatres

p261

rendoient l' honneur aux
creatures, lequel est deu au seul
createur ; à quoy on peut rapporter
toutes les especes de divination,
par lesquelles on recognoist
que les choses futures peuvent estre
predites par les diables, ou
bien on les consulte sur quelque
dificulté : car c' est à Dieu seul que
nous nous devons addresser en
nos difficultez, nommement en ce
qui est des choses futures, lesquelles
dependent de sa volonté ou de
nostre liberal arbitre, puis qu' il
n' y a que luy qui puisse penetrer
ces ressorts. L' autre espece de superstition
est quand on sert Dieu,
mais par une façon indecente, et
qui n' est digne de la divine majesté.
Or je maintiens que le vray
chrestien n' est superstitieux en
pas une de ces façons, car il honore

p262

le vray Dieu par les formes, et
ceremonies que luy mesme nous
a revelees, ou qu' il a inspirees à l' eglise
son espouse ; ce qui paroist
en ce que nous n' avons aucune ceremonie,
ou coustume de servir
Dieu, laquelle ne soit grandement
conforme à la droite raison, et convenable
pour recognoistre la dependence
que nous avons de l' estre eternel.
Je ne veux pas m' estendre sur
les diverses especes de divination,
que Sathan a tasché d' introduire
au monde, afin de se faire recognoistre
autheur de ce qui se faict
icy bas, car on sçait assez que le
chrestien ne deteste rien tant que
la negromantie, lecanomantie,
gastromantie, catoptromantie,
dactylomantie, et toutes les sortes
de magies, que la folie, la superstition,

p263

ou la malice a inventees.
Voyez donc maintenant que
vostre poëte s' est fort mal addressé,
et qu' il ne trouvera pas un superstitieux
en tout le christianisme.
Que son superstitieux soit insensé
tant qu' il voudra, jamais cela
ne conviendra à un vray catholique,
lequel ne se figure point
Dieu variable, au contraire il le
croit tel qu' il est, sçavoir est tres-constant,
et du tout immuable. Ce
qui suit au 2, et 3 vers du 2 quatrain,
semble butter contre l' escriture
saincte, laquelle nous descrit
la majesté divine embrasee de
vengeance contre les pecheurs,
comme quand Moyse la represente
par ces paroles de l' excellent
cantique, lequel est au 23 du deuteronome
verset 19 (...).

p264

Et le prophete royal, en l' un
de ses plus grands pseaumes, qui
est le 77 verset soixante cinq. (...).
Or ces passages et plusieurs autres,
qui se trouvent dedans l' escriture
saincte, ne repugnent en aucune
façon à l' immutabilité divine, car
ils ne declarent autre chose que les
peines, que Dieu fera endurer aux
meschans, lesquelles surpassent

p265

tous les tourmens, qu' on nous
puisse faire souffrir en ce monde :
ce qui ne se fait sans la colere, vengeance,
ou furie de ceux qui nous
tourmentent, comme vous pouvez
voir dans les histoires des
martyrs. Mais ces émotions que
nous appercevons aux hommes,
ne sont point en Dieu, les actions
duquel nous expliquons par nostre
façon de concevoir, et d' entendre,
sçachans neantmoins que
tout ce qui est d' imparfait en nos
pensees, ne peut estre attribué à la
souveraine majesté.
Peut estre que ce malheureux
poëte endurcy, et envieilly en sa
meschanceté, nous dira que nous
donnons ceste explication, afin
d' eviter ses objections, et eluder
ses pointes, mais il se trompe fort,
si j' avois affaire à quelqu' un, lequel

p266

receust l' authorité de la saincte escriture,
il me seroit facile de luy
monstrer par d' autres passages tres-exprez,
que la furie, ny semblables
passions ne peuvent se retrouver
en Dieu, à la façon qu' il l' entend
en ses quatrains ; mais puis qu' il est
si malheureux, et obstiné qu' il ferme
les yeux à la lumiere de l' evangile,
et les oreilles du coeur, et du
corps à tous ceux qui l' advertissent
de son salut, je luy respons,
qu' il doit par toutes sortes de loix,
recevoir l' explication que nous
luy apportons touchant les susdits
passages, veu qu' ils sont pris de nos
livres, et de nostre religion qu' il
attaque.
Qu' il sçache donc avec tous ses
confidens, que ny l' escriture, ny les
predicateurs n' ont pas intention
de mettre quelque chose de nouveau

p267

en Dieu, lors qu' ils disent qu' il
se fasche, ou qu' il se reconcilie avec
les pecheurs : ce n' est non plus qu' ils
entendent que cela se fasse selon
le son des paroles, ains seulement
à ce que nous concevions la haine
que Dieu porte à l' iniquité, et la
peine de laquelle il la punit. Car la
bible n' est pas seulement pour les
sçavans, qui ont des eslevations
d' esprit plus épurees, et qui s' approchent
de plus pres des veritez
eternelles, mais elle est pour toutes
sortes de personnes, pour les
petits, et pour les grands, pour les
pauvres, et pour les riches, et pour
tous ceux qui voudront y profiter,
soit en la lisant, soit en l' escoutant.
Il ne faut donc pas que vous
trouviez estrange, si elle parle tantost
en une façon basse, tantost en
une plus relevee, et qu' elle touche

p268

les effects de la volonté divine en un
lieu, tels que sont les supplices
eternels des damnez, et en un autre
l' essence mesme de ceste volonté,
sans avoir égard aux effects
qui en decoulent : plustost devons
nous remercier la divine bonté de
ce qu' elle nous a donné une doctrine
si bien assaisonnee, qu' elle
peut repaistre toutes sortes de personnes,
et satisfaire à tout le monde.
C' est donc l' effect que l' escriture
nous met devant les yeux, laquelle
n' a autre but que de nous
faire craindre les supplices deubs
aux pechez, et nous representer
les jugemens divins, à ce que nous
les évitions, et que nous sçachions
combien celuy-là est malheureux,
qui mesprise les ordonnances divines,
et combien Dieu est grand,

p269

puissant, et redoutable, puis qu' il
a de si grands supplices pour chastier
tous ceux qui contreviendront
à ses commandemens.
Vous pouvez encore mieux
comprendre ceste difficulté, si vous
faites reflection sur vostre premier
quatrain, qui dit que Dieu est un
estre eternel tres parfait ; ce qui ne
peut estre veritable, si vous ne
m' accordez qu' il est tres-simple, et
par consequent qu' il est un acte
tres pur, et qu' il fait tout ce qui est
creé et tout ce qu' il fera desormais
par le mesme acte de volonté, par
lequel il s' ayme soy-mesme : car
Dieu n' a qu' un seul acte d' entendement,
et de volonté, lequel est une
mesme chose avec son essence, et
par lequel il ordonne la gloire eternelle
pour les bons, et l' eternel
des-honneur pour les damnez, de

p270

façon que quand il y a de la varieté,
et du changement, cela n' est
qu' en la creature, Dieu demeurant
tousjours tres-immuable, et tel
qu' il est de toute eternité, ne pouvant
cesser d' estre inalterable, immobile,
et souverainement parfaict
en toutes sortes de perfections,
s' il ne cessoit quant et quant d' estre
Dieu, ce qui est parfaitement,
et souverainement impossible.
Le D comment est-il donc
possible que Dieu fasse des choses
si differentes, et que tantost il recompense,
tantost il punisse, s' il n' a
qu' un seul acte ?
Le Th imaginez vous que l' action
de l' entendement, par lequel
vous avez conceu ce que vous
venez d' objecter, soit infinie en
perfection, qu' elle soit toute puissante,
et qu' elle puisse faire tout ce

p271

qui n' a point de repugnance, est-il
pas vray que s' il vous plaist, vous
recompenserez les bons par ce seul
acte d' intellect ; et que par le mesme
acte vous punirez les mauvais,
et ferez tout ce qui peut tomber
en l' entendement ? Or l' acte divin
tres-simple est tres-parfait, infiny,
et tout puissant, qui empesche donc
que Dieu ne fasse tout ce qu' il fait,
par la vertu de cet acte ? Si le centre
d' un cercle estoit tout puissant, il
produiroit toutes les lignes qui
vont à la circonference : Dieu est il
pas le centre infiny de toutes choses ?
Voyez vous pas que le mesme
point d' un miroir represente une
grande diversité d' objects ? Une
mesme colomne est-elle pas tantost
en bas, tantost en haut, tantost
à droit, tantost à gauche, bien qu' elle
soit immobile ? Sçachez donc que

p272

Dieu fait tout ce qu' il fait sans aucune
émotion, car son decret eternel
est tres-un, et tres-simple, bien
que nous le concevions par nos diverses
imaginations, et qu' il nous
faille de differentes pensees, quand
nous voulons l' entendre.
Il faut donc bien se garder de
croire que Dieu soit embrasé de
vengeance à la façon des hommes :
sa cholere, et la vengeance
dont il use envers les damnez, n' est
autre chose que la ferme resolution,
par laquelle il veut que les
hommes reçoivent le loyer, ou la
peine selon leurs merites, ou leurs
iniquitez ; il est en nous de choisir
lequel que nous voudrons, car si
nous aymons Dieu, comme il faut,
il nous donnera la gloire eternelle :
si nous mesprisons ses ordonnances,
et que nous mourions

p273

opiniastrement en nostre malice,
il nous punira par les flammes
devorantes, lesquelles ne finiront
jamais.
Pleust à Dieu que vostre poëte
s' embrasast luy-mesme d' une juste
vengeance contre ses pechez, et
qu' il se punist rigoureusement
pour avoir employé son esprit, ses
rimes, et sa logique à provigner
son impieté, et à renverser, s' il eust
peu, la religion chrestienne, laquelle
durera jusques à la fin du
monde malgré luy, et tous les deistes,
et les athees, et s' en ira avec
tous les esleus triomphante droict és
parvis celestes, à ce qu' elle soit coronnee
de la guirlande d' une felicité
qui durera tousjours. Je vous conjure
par l' amitié que je vous porte
que vous taschiez de le ramener à la
raison, et de luy faire quitter sa malice,

p274

et ses debauches ; il ne faut pas
sous pretexte qu' il y a trop long-temps
qu' il s' est egaré de la creance
des chrestiens, et qu' il a sauté
du calvinisme au deisme, qu' il se
desespere, car Dieu est tousjours
prest de le recevoir à misericorde.
ô Dieu ! Seroit-il si perdu, si oublieux
de son salut, si opiniastre en
sa malice, qu' il ayme mieux estre
damné à jamais, que de se recognoistre,
et quitter ses erreurs, ses
boufonneries, et ses autres sales
voluptez, ausquelles il s' est abandonné
jusques à present ? Mais
voyons ce qu' il adjouste, disant
que puis que le peché est un rien,
que Dieu ne peut estre offensé par
le peché. Il est vray que le peché
n' est rien qui vaille ; ce n' est qu' un
defaut, et un desordre, mais ne
sçait-il pas que le capitaine punit

p275

justement le soldat, quand il n' a
rien fait de ce qu' il luy avoit commandé ?
Et quoy, l' homme sera
obligé d' observer les loix que
Dieu luy a prescrites, et ne les voulans
pas garder il ne sera pas puny ?
Erreur manifeste contre les principes
de la raison : car celuy-là merite
d' estre griefvement puny, qui
n' a voulu rien faire de ce que luy
avoit commandé son roy, ou son
superieur : ce que feroient tousjours
les superieurs, quels qu' ils
soient, s' ils estoient tres-justes,
comme Dieu.
Ne trouvez donc pas estrange,
si Dieu se tient offensé, et mesprisé,
lors que nous ne faisons conte de
ce qu' il nous commande, soit par
la loy naturelle, qu' il nous a empreinte
dedans le coeur, soit par la
loy escrite, et la loy de grace. Plustost

p276

devriez vous trouver estrange
si Dieu ne punissoit point ce rien,
ou ce peché, puis que quand nous
commandons à nos serviteurs,
nous les chastions, s' ils y manquent,
et si c' est un amy sur lequel
nous n' ayons nul pouvoir, du
moins le jugeons-nous indigne
d' estre aymé, s' il ne fait ce dequoy
nous le prions. Par où vous voyez
que le rien du peché est punissable,
n' y ayant aucune chose en ce
monde, qui ne soit en quelque façon
semblable à Dieu, excepté le
peché, lequel est d' autant plus
horrible, qu' il s' oppose davantage
à la bonté eternelle, ou à ses ordonnances,
ou mesmes à son essence,
laquelle est un tout tresparfait,
et le peché une privation de tout.
Passons outre, il conclud de ce

p277

qu' il nous faict dire, que Dieu est
ennemy des tyrans, et plus redoutable
qu' eux : qui en doute ? Car les
tyrans estans meschans, il ne se
peut faire que Dieu ne soit leur
ennemy, et leur juge redoutable.
Asseurément il n' y a rien à redouter
comme la justice de Dieu : car
tous les tourmens du monde ne
sont que des ombres au regard
des peines que Dieu a preparees,
et ordonnees pour punir tous
ceux qui ayans transgressé ses
commandemens, ne veulent
point se recognoistre, et meurent
obstinez.
Or si vous prenez garde, vostre
malheureux poëte s' est efforcé de
representer la justice de Dieu par
les façons les plus ridicules qu' il a
peu choisir, afin de le rendre odieux,
et d' arracher la crainte des

p278

jugemens divins de l' esprit de
ceux, à qui il a donné son poëme
en cachette : mais qu' on sonde un
peu ses paroles, et son intention,
on découvrira soudain qu' il est
malicieux, et ignorant, et que tout
ce qu' il objecte est pris d' un mauvais
biais, ou que ce sont impostures,
et calomnies. Ce qui se void en
ce second quatrain, auquel il dict
que Dieu est plus redoutable que
les tyrans, non afin que nous nous
eslevions à contempler la grandeur
de la justice divine, laquelle
est un attribut infiny de Dieu, aussi
bien que sa puissance, sa bonté, et
sa volonté, mais à ce qu' on haye la
doctrine catholique, laquelle
nous enseigne que Dieu est aussi
redoutable aux meschans, comme
il est aymable aux bons.
Pleust à Dieu qu' il redoutast

p279

ceste justice autant comme elle
est redoutable, je suis asseuré qu' il
feroit tout ce qui seroit en luy, afin
de pouvoir desabuser tous ceux
qu' il a seduit avec son poëme. Faites
luy entendre, si jamais vous le
rencontrez en bonne humeur,
que Dieu n' est point lesé, ny interessé
en son essence par le peché,
puis qu' il est impassible, et immortel,
et neantmoins qu' il punist le
pecheur aussi justement que s' il
avoit esté offensé en ceste façon,
d' autant que le meschant a la volonté
de ce faire, quand il peche,
puis qu' il ne tient pas à luy
que cela n' arrive ; ce qu' il monstre
par le mes-estime qu' il faict de sa
saincte volonté. Il n' y a homme si
brutal, qui ne confesse que celuy
là merite d' estre puny, qui se moque
des ordonnances de son roy ;

p280

et personne ne treuve à redire aux
peines qu' on fait tous les jours endurer
aux larrons, bien qu' ils
n' ayent point offensé le roy, ou le
juge en sa personne : et m' asseure
que ce deiste seroit bien ayse
qu' on fist subir la rigueur des loix
à celuy qui luy auroit derobé sa
bource, ou faict perdre son honneur.
Pourquoy est-ce donc qu' il
reprend nostre doctrine, par laquelle
nous sommes instruicts
que les damnez seront punis eternellement,
puis qu' ils ont mesprisé
les commandemens de leur
createur, et les ont trangressez
avec une opiniastreté, qu' ils ont
renduë eternelle, entant qu' il a
esté en eux, lors qu' ils sont morts
en leur malice ?
Par où vous voyez assez clairement
à mon advis que vostre detestable

p281

poëte a eu tous les torts
du monde de s' opposer à une doctrine
si veritable, si utile, et si digne
de la majesté divine, comme
est celle des catholiques.
Voila ce que j' avois à vous dire
touchant vos premiers quatrains,
je croy que c' est assez pour vous
contenter, neantmoins si vous avez
encore quelque difficulté,
vous la pouvez proposer, car comme
je n' entreprends ce discours
que pour vostre salut, et afin que
tous les deistes soient desabusez,
je vous donne toute liberté de repartir
à toutes mes responses, à ce
que vous n' ayez plus aucun doute
sur ce qui est de l' impieté de vos
opinions.
Le D je n' ay maintenant aucune
occasion de vous retarder, c' est
pourquoy je poursuis.

p282

Le Deiste
est-il pas insensé de penser, et de s' imaginer
qu' il est le souverain gouverneur de ce monde :
et neantmoins qu' il se laisse conduire selon nos
passions humaines. 
Le Theol ce poëte est bien
estourdy s' il croit que nous nous
imaginions seulement que Dieu
regit cet univers, car nous le
croyons fermement, qui est beaucoup
plus que de se l' imaginer. Et
quoy, si Dieu ne le gouvernoit,
qui est-ce qui le pourroit entreprendre ?
Qui a donné plus de lumiere
au soleil qu' à la lune ? Qui
donne plus de force au lyon qu' à la
fourmis ? Qui fait que la terre n' est
pas en la place de la lune, et que
ces planettes ne sont plus grandes,
ou plus petites, plus proches, ou

p283

plus esloignees ? Qui a ordonné
toutes les parties du monde comme
nous les voyons ? N' a ce pas esté
Dieu ? Regardez je vous prie tous
les globes celestes, et vous advoüerez
ceste verité, car comment se
pourroit-il faire que la lune fist
son cours en l' espace de 27 jours,
et 8 heures, et qu' elle peust atteindre
le soleil en 29 jours, et 13 heures ?
Que le soleil, Mercure, et Venus
ne manquassent jamais d' accomplir
leur cours chaque annee ?
Mars en un an, et 322 jours ; Jupiter
en 11 ans, et 215 jours ; Saturne en
29 ans, et 174 jours ; les estoilles en
28800 ans, avec un mouvement si
reglé, qu' ils ne manquent pas d' un
iota, s' il n' y avoit un souverain moteur,
qui les regist, et gouvernast ?
Le soleil pourroit-il tousjours
s' esloigner de la terre par 1181 semi-diametres,

p284

lors qu' il est en son apogee ;
la lune de 56, Mercure, et Venus
de 1142 ; Mars de 1745 ; Jupiter
de 3990, Saturne de 10550, et les estoilles
de 14000 ; s' il n' y avoit une
eternelle providence, qui maintient
tous ces astres, et ces globes
au mesme ordre, qu' elle a estably
dés le commencement du monde ?
J' ay honte de m' amuser à prouver
une verité si claire, et m' estonne
comment il est possible qu' il y
ait des hommes si aveuglez, qu' ils
nient la providence divine, sans
laquelle les ressorts de l' univers
ne sçauroient subsister, ou se mouvoir.
Dites moy de grace, si vostre
corps n' a aucun mouvement, si l' ame
ne le meut, pensez vous que ce
monde puisse garder un train si
reglé, si Dieu ne le conduit, et ne
luy donne le bransle ?

p285

Certainement les philosophes
ont apperceu ceste verité, lors
qu' ils ont voulu introduire une ame
universelle, et une forme generale
de tout l' univers, afin que par
icelle le monde fust gouverné
comme un grand animal, car bien
que Dieu ne soit pas la forme d' aucune
chose, neantmoins il est present
en tous lieux, et ne se peut rien
faire qu' il ne voye : de plus, il est
impossible qu' aucun mouvement arrive
sans son aide, et sans son secours
car il est plus necessaire à tout ce qui
est au monde, que n' est la lumiere
aux couleurs, ou l' ame aux corps :
je ne sçaurois mieux vous expliquer
la necessité de ceste presence
divine que par ces vers, qui monstrent
aussi son immensité.

p286

Dieu est dessus, dessous, dedans, et dehors tout ;
il n' est clos d' aucun lieu, ores qu' il soit par
tout :
dessus comme pilot qui le meut, et compose ;
dessus comme pivot qui ferme le soustient,
dehors comme cerceau, qui en rond le contient,
dedans le penetrant, bref il est toute chose. 
Le D nous ne nions pas que
Dieu ne soit la guide souveraine
de cet univers, mais seulement
nous tirons ceste consequence,
que ceux-là sont insensez, qui
croyent ceste verité, et disent nonobstant
que Dieu est subject à passion,
comme les hommes : autrement
il quitteroit bien tost le gouvernail
de ce grand monde,
quand on l' irriteroit, ce qui n' arrive
point, car nous voyons que toutes
choses vont tousjours d' un mesme
train.
Le Theol je sçay que vous ne
niez pas expressément que Dieu

p287

gouverne l' univers, bien que je
sçache d' ailleurs que ce sont vos
discours, lors que vous vous
trouvez entre vos confidens : aussi
n' ay-je pas dit que vous creussiez
cela, mais qu' il faudroit estre merveilleusement
egaré d' esprit, pour
croire qu' il n' y eust aucune providence,
et que Dieu ne gouvernast
pas ce monde.
Or ce qu' il inferoit en ces deux
derniers vers, est tres-faux, car nous
sçavons fort bien que Dieu ne
peut estre subject à aucune passion,
comme je vous ay monstré
cy devant : je vous donne à penser
s' il ne destourneroit pas son soleil
de dessus les meschans, et s' il ne les
reduiroit pas au neant, s' il estoit
subject aux passions humaines :
comment y seroit-il subject, veu
que ce sont émotions de l' appetit

p288

sensitif, lequel n' est qu' en l' homme,
et en la beste ?
C' est assez que vous remarquiez
icy la noire malice de vostre rimailleur,
qui veut persuader que
nous croyons que Dieu est suject
à nos passions : sçachez donc que
nostre creance touchant ce suject
est que Dieu est inalterable, immuable,
et exempt de toutes sortes
de passions : et delà concluez que
cet imposteur vous a donné des
bourdes, et des calomnies pour
des veritez, comme j' espere vous
faire voir tres-nettement en ce qui suit.
CHAPITRE 13


p289

dans lequel les quatrains du deiste depuis
le quatriesme jusques au neufiesme
sont refutez ; et est monstré que
Dieu declare l' amour qu' il se porte en
punissant les damnez, et comment
il ayme, il hayt, et fait tout par une
mesme action. 
Le Deiste
est-il pas effronté d' exalter son amour, et
puis de le depeindre pire envers nous, que n' est un
barbare envers son pire ennemy ? 
Le Theologien
cela est tres faux
que nous depeignions
Dieu comme
il le dit, et que nous
disions aucune chose, qui contrarie

p290

tant soit peu à son amour ;
mais je voy bien où il en veut venir,
car il desireroit fort que Dieu
n' eust ny force, ny justice pour
chastier les meschans : c' est cela
qu' il appelle estre de mauvaise volonté
envers ceux qui l' offencent,
ce qui n' est pas ainsi qu' il le dit,
d' autant que Dieu se sert du mesme
amour en punissant les damnez,
duquel il use en recompensant
les bien-heureux, puis qu' il
fait l' un, et l' autre pour sa gloire, et
pour l' amour qu' il se porte à soy-mesme.
Je me doute bien que
vous, et luy, et tous ceux de vostre
faction aurez de la peine à vous
persuader cecy, mais soyez attentif,
et je vous le feray comprendre.
Il est certain que Dieu ne faict
rien qu' il n' ait quelque fin, et
quelque raison, autrement son

p291

action sembleroit estre vaine, ce
qui est impossible : or il ne peut
avoir d' autre fin à proprement
parler, que soy-mesme, autrement
s' il luy faloit mandier une derniere
fin hors de soy-mesme, il ne seroit
pas Dieu. Cette fin qui est Dieu
mesme, ne peut qu' elle ne soit tres-aymable,
et le principal motif de
tout ce qu' il a fait, de tout ce qu' il
opere maintenant, et de tout ce
qu' il fera jamais : donc quand il
chastie les mauvais, ou recompense
les bons, c' est à cause de soy-mesme,
et parce qu' il est tresbon, donc
c' est par amour qu' il fait l' un, et
l' autre.
Et si vous me demandez comment
il se peut faire que Dieu
haysse les meschans par amour,
aussi bien qu' il ayme les justes, je
ne veux autre chose pour vous le

p292

faire entendre, que la façon mesme
par laquelle vous aymez, ou
hayssez quelqu' un.
Est-il pas vray que quand vous
prenez vengeance de vostre ennemy,
ou du moins que vous le
hayssez, que c' est à cause qu' il s' est
opposé à ce que vous cherissez, et
qu' il empesche vos desseins ? Est-il
pas encore vray que tout ce que
vous caressez hors de vous mesme,
que c' est à cause de l' affection, et
de l' amour que vous vous portez
vous mesmes ? Si bien que vous
voyez clairement que tout ce que
vous faites en ce monde, et tout ce
que vous pensez, n' est pour autre fin
que pour l' amour, ny pour autre
raison, que pour l' affection que
vous vous portez, soit qu' elle soit
déreglee, ou non, car je ne veux
pas maintenant entrer en cette

p293

nouvelle consideration.
C' est ainsi que Dieu s' aymant
d' un amour infiny, rebutte, et punist
eternellement tout ce qui
s' oppose à cet amour, tel qu' est le
peché, duquel on n' a point de repentance :
car s' il s' ayme infiniment,
est-il pas tres-raisonnable
qu' il haye, et punisse eternellement
ceux qui le hayssent, et le
mesprisent, comme font les pecheurs ?
C' est donc par l' amour qu' il
se porte qu' il chastie ses ennemis,
c' est par amour qu' il deteste, et
extermine tout ce qui contrevient
à cet amour. Bref il est impossible
de trouver aucune chose,
soit au ciel, soit en la terre, ou au
milieu des enfers, qu' il ne la fasse
par amour.
De là vous conclurez que si
nous exaltons l' amour de Dieu,

p294

nous ne disons par apres rien au
contraire, puisque nous ne l' eslevons
pas moins en asseurant, et
croyant qu' il chastiera les meschans,
qu' en disant qu' il recompensera
les bons, veu qu' il fait le tout pour
l' amour, dont il s' ayme, auquel il
n' y a rien qui puisse estre parangonné.
Mais j' estime qu' il n' est besoin
de m' estendre si au long sur
ce quatrain, car je conjecture que
les suivans nous donneront assez
de pareilles matieres. C' est pourquoy
suivez maintenant, si ce n' est
que vous ayez quelque notable
difficulté sur ce que je viens de
dire.
Le D veritablement cela me
semble un peu subtil, et difficile,
car la punition semble estre un
effect de la justice, et non pas de la
bonté ; de la hayne, et non de l' amour :

p295

comment est-ce donc que
Dieu chastie les meschans par amour.
Le Theol cecy est facile à entendre,
si nous concevons ce qui
est tres-asseuré, sçavoir est que
Dieu faict tout pour l' amour de
soy-mesme, car puis qu' il est l' estre
souverain, il faut que tout ce
qui est, se rapporte à luy, et par
consequent que tous les chastimens
des pecheurs buttent à sa
gloire ; or Dieu n' ayme sa gloire
et son honneur, qu' entant qu' il
s' ayme d' un amour infiny, si bien
que nous pouvons dire que de
mesme que tout ce que nous faisons,
et toutes les actions de nostre
appetit raisonnable, et sensitif
prennent leur origine de l' amour
que nous nous portons, ainsi toutes
les actions que nous concevons

p296

en Dieu, et tous les effects,
qui partent de sa puissance, viennent
de l' amour qu' il se porte, suivant
ceste riche sentence de Sainct
Augustin, amor meus, pondus
meum, illo feror quocunque feror .
Ce qui n' empesche pas qu' il ne
soit vray que les supplices, que
Dieu fait tres-justement endurer
aux malheureux damnez, soient
les propres effects de la justice divine,
entant que nous entendons
que l' acte divin tres simple, par lequel
Dieu fait tout ce qu' il fait,
respond à la conception que nous
avons du supplice ; si nous avions
une action infinie en nostre entendement,
nous concevrions
tout ce qu' il y a en Dieu, et tout ce
qu' il a fait, qu' il fera, ou qu' il pourroit
faire, mais nos pensees estant imparfaites,
n' envisagent l' acte divin

p297

que selon leur portee, et leur estenduë,
et conformément à l' effet qui
paroist à nos yeux. Poursuivez s' il
vous plaist, car nous expliquerons encore
ceci plus clairement cy apres.
Le Deiste
et quoy ? S' il ne voudroit pas engendrer des
enfans, s' il croioit qu' ils deussent estre miserables,
comment est-ce que Dieu qui est infiniment
bon, pourroit nous mettre au monde s' il
sçavoit que nous deussions estre perdus. 
Le Theol vostre rimeur avoit
tasché de nous jetter la poudre
aux yeux au 4 quatrain, nous
voulant persuader que c' estoit faire
Dieu cruel, de dire qu' il chastie
les meschans ; et maintenant
il veut luy oster les verges de la
main comme l' enfant à son pere.
J' ay ouy dire qu' il y a un franc resveur
à La Rochelle, qui maintient
n' y avoir point d' enfer, à cause de

p298

cette seule comparaison d' un pere
avec Dieu : je ne m' en estonne pas,
car estant Huguenot, il luy est facile
de passer à l' atheisme.
Voyons si cette semblance conclud
quelque chose. Dites moy,
Dieu crée-il nos ames à la façon
que nos peres nous engendrent ?
Nullement : car si tost que l' embryon
est parfaitement formé,
Dieu y conjoinct l' ame raisonnable,
afin de conserver l' ordre, qu' il
a estably au monde dés le commencement.
Laissons la façon à
part, car elle importe fort peu icy.
Je dy que si un pere pouvoit tirer
un plus grand bien du mal, comme
Dieu, qu' il pourroit engendrer
un enfant, bien qu' il sceust que
son enfant deust estre tourmenté
à jamais ; par exemple, si un pere
estoit tout puissant, et qu' il voulust

p299

faire paroistre sa toute puissance,
il pourroit engendrer des enfans,
bien qu' il previst, qu' ils se perdroient
par leur malice, d' autant
que par là il monstreroit que sa
bonté, et sa puissance ne pourroient
estre empeschees par quelque
malice que ce soit, bien que
cette malice deust estre eternelle.
Et certes un tel pere seroit content
de s' estre manifesté en son enfant
par le bien de l' estre, qu' il luy auroit
communiqué, n' estant tenu
de se manifester par le bien de la
gloire, s' il ne fait les oeuvres, qu' il
luy auroit prescrites pour ce sujet.
Or sus est ce pas une grande merveille
que ce que Dieu a donné
(sçavoir est l' estre, et la nature), ne
puisse perir par quelque malice
que ce soit, bien que tous les diables
conspirassent à le ruiner. Est-ce

p300

pas une grande joye aux bien-heureux
de voir tousjours l' oeuvre
de Dieu en son entier, lors qu' és
damnez ils distinguent ce qui est
de Dieu, et du peché, cestuy-cy
n' estant rien que tenebres, et l' autre
rien que lumiere, et verité ?
Que sera-ce, si je vous dy que
la sagesse, et la bonté de Dieu reluit
davantage en la production
de celuy qu' il sçait qui l' offencera,
et qui refusant ses graces eslira la
malice, et l' enfer, qu' en la production
d' un autre, duquel il prevoit
qu' il sera servy, et honoré ? Car celuy-là
semble tout à faict indigne
de recevoir l' estre de la main de
Dieu, lequel ne pourroit jamais
tant faire de bien à cet ingrat, s' il
n' estoit infiniment bon, non plus
qu' il ne pourroit le punir eternellement,
s' il n' estoit tout puissant,

p301

voire mesme tout bon. Ouy je
maintiens sur ma vie qu' il faut estre
infiniment bon pour pouvoir chastier
eternellement une malice faicte
contre le souverain autheur
de toutes choses : car pour veoir si
quelqu' un est infiniment bon, quand
il est question de chastier un méfaict,
par lequel la volonté de Dieu
souverainement bonne est mesprisee,
je tiens qu' il faut qu' il chastie
ce crime d' un suplice infiny.
Le D comment est-il possible
que la bonté de Dieu paroisse
par le supplice eternel des meschans ?
Le Theol il est tres-asseuré
que la malice est aussi grande, que
la bonté qui luy est opposee ; il est
aussi certain que si on vouloit recompenser
une infinie bonté, qu' il
faudroit que la recompense fust

p302

infinie, donc si on vouloit punir
une malice, qui fust opposee à cette
bonté, il faudroit que le supplice
fust infiny pour respondre à
cette malice. Or la malice de celuy
qui mesprise les commandemens
de Dieu, est opposee à la bonté divine,
il faut donc que le supplice
soit infiny, si on veut reparer le
mespris, que le pecheur a fait de la
bonté divine, puis qu' elle est infinie.
Partant je dy que quand Dieu
chastie le peché eternellement,
il monstre par ce supplice, que sa
bonté est eternelle, et par consequent
ceste bonté paroist par la
peine, qu' endurent les damnez.
Certainement on pourroit penser
que la bonté, contre laquelle se
bande le peché, seroit finie, si la
peine deuë à ce peché estoit limitee,
et que la puissance, et la justice,

p303

par lesquelles le chastiment est
ordonné, et executé, estoient bornees
(telles que sont la justice, et la
puissance des hommes) si le supplice
avoit quelque fin.
De là nous concluons que tant
plus le chastiment des reprouvez
est grand, et tant plus grande paroist
la bonté de Dieu. Si vous considerez
bien cecy, vous verrez clairement,
que vostre poëte ne conclud
rien par la similitude d' un
pere, qui n' est souverainement
bon, et puissant, comme Dieu. Et
quoy si un pere estoit tout puissant,
feinderoit-il d' engendrer des
enfans, bien qu' il sçeust qu' ils seroient
pendus, ou roüez, s' il sçavoit
qu' il n' encourroit aucune
ignominie, ou honte de ce que ses
enfans seroient suppliciés, au contraire
qu' il en tireroit de la gloire,

p304

et de l' honneur ? Est-ce pas une admirable
sagesse de tirer de la gloire,
et du bien de la malice des
hommes ? ô Dieu que vous estes
adorable en vos pensees, et en vos
oeuvres ! ô Dieu que vous estes sage
de tirer les grands biens des
grands maux, et malgré les hommes
impies, et les diables triompher
de la mort, du peché, et de
tous les defauts du monde : beny
soyez vous par tous les esleus és
siecles des siecles. ô grand Dieu,
j' adore vos arrests, qui ordonnent
le supplice eternel aux meschans ;
et la gloire aux bons. Faites s' il
vous plaist que tous les deistes
quittent leurs erreurs, et embrassent
ce qui est de vostre saincte volonté.
Or sus que vostre poëte fort
ignorant en matiere de religion,

p305

fasse distinction entre pere, et pere,
et qu' il considere leurs diverses
qualitez, afin qu' il ne pense pas
nous piper, et nous faire à croire
sous ombre qu' un pauvre pere,
qui ne sçait le plus souvent ce qu' il
faict en caressant ses enfans, bien
qu' ils soient tres-mauvais, que
Dieu doit faire le mesme. Qu' il
sçache donc qu' il faut que Dieu se
monstre dissemblable aux hommes
en sa justice, et en punissant,
puis qu' il se monstre dissemblable
en leur pardonnant, et en les recompensant.
Quel pere a jamais
tant en duré de ses enfans, comme
Dieu endure de nous ? Quel pere
leur a jamais si souvent pardonné ?
Qui leur a promis, et donné de telles
recompenses comme est la gloire
des esleus ? Mais quoy cecy n' entre
point dans vostre esprit, car

p306

vous quittez ce qui est de l' intelligible
pour courrir à bride abatuë
apres vos passions, et vos appetits
brutaux, et desreiglez. Si vous me
voulez croire, vous quitterez bien
tost ces opinions fantasques, sensuelles,
et badines pour vous remettre
au giron de l' eglise catholique.
Le D certainement ce discours
icy ma fort esbranlé, je commence
à voir plus clairement en
ceste matiere, c' est pourquoy je
vous prie ne vous ennuyer pas de
respondre aux autres quatrains,
car si vous me contentez aussi
bien sur tout ce qui suit, je quitteray
toutes ces erreurs, voicy donc
le sixiesme quatrain.

p307

Le Deiste
il est certain que Dieu nous ayme beaucoup
plus, et nous est meilleur que n' est la meilleure
mere du monde à ses enfans, et par consequent
il ne nous peut imposer un malheur infiny pour
satisfaire à une cholere feinte. 
Le Theol cela est evident
que Dieu est beaucoup meilleur
qu' aucune mere, car il ne nous
substente, et conserve pas seulement
quant à l' exterieur, comme
nos meres, mais, qui est bien davantage,
quant à l' interieur, ce que
ne peut faire la mere. Et puis les
meres traittent bien leurs enfans
à cause du service, et du plaisir
qu' elles esperent retirer d' eux,
quand ils seront grands, mais Dieu
n' a que faire de nous, c' est sa seule
bonté, qui le meut à nous mettre

p308

au monde, et à nous donner l' air
que nous respirons, la terre, qui
nous porte, et les vivres qui nous
alimentent. Bref nous ne sçaurions
subsister un seul moment, s' il ne
conserve nostre estre, et n' use comme
d' une continuelle creation en
nous conservant : mais il ne s' ensuit
pas delà, qu' il ne nous punisse eternellement ;
ce qui n' est pas nous
imposer un infiny malheur, car
c' est nostre malice, qui est l' architectrice
de ce malheur, veu qu' il
n' y en a point de plus grand que le
peché, ostez-le, et vous ostez
l' enfer, et toute autre sorte de malheur,
comme disoit un grand docteur
de l' eglise, (...).
Mais supposons que le supplice
deu au peché, soit un infiny malheur ;
je dy que c' est fort mal parlé

p309

d' asseurer que ce chastiment est
pour assouvir la feinte cholere de
Dieu : premierement, parce que
c' est un blaspheme tres-grand de
mettre aucune fiction en Dieu. Secondement,
parce que ce n' est pas
pour assouvir l' ire divine, veu que
pour estre assouvi, et pour recevoir
un nouveau contentement de
quelque chose, il faut au prealable
en avoir eu besoin, or Dieu n' a
besoin d' aucune chose, comme a
fort bien remarqué le prophete
royal, (...).
Tiercement, parce que c' est afin
que ce qui appartient à un chacun
luy soit rendu.
Dites moy je vous prie, combien
loüeriez vous un roy, qui seroit
si prudent, et si vertueux, qu' il
donnast les dignitez à un chacun

p310

selon ses merites sans acception de
personne, et qui puniroit quant et
quant tous les meschans selon leur
forfait, sans qu' ils peussent opprimer
les bons.
Dieu est le roy des roys, qui
gouverne tout le monde, et qui
donne à un chacun le lieu, la recompense,
ou la peine qu' il a merité ;
il faut donc le loüer grandement,
et nous resjouyr d' avoir un
roy, un pere, un maistre, un createur
si puissant, si sage, et si bon.
Il a recours à une mere, mais on
sçait trop que les meres perdent le
plus souvent leurs enfans manque
de les chastier ; et puis quelle
mere est toute puissante, et tres-juste
pour punir ses enfans, (bien
que tres mauvais) d' un supplice
infiny : sçavez vous pas que Dieu
n' a point mis ce supplice en la puissance

p311

des hommes ? Et quoy, si
nous voulons parangonner la
bonté, et la charité de Dieu envers
nous, à l' amour d' une mere envers
ses enfans, qui ne void que l' amour
que Dieu nous porte, est
infiniment plus grand, soit que
nous regardions à la creation, ou à
la recreation, et à la redemption ?
Si vous consideriez quel doit estre
l' amour bien ordonné, vous ne
diriez pas que Dieu deust aymer
un meschant autant qu' un bon, et
confesseriez que le mal est si indigne
de tout amour, qu' il est impossible
de l' aymer, lors qu' on le
cognoist tel qu' il est : comment
voulez vous donc que Dieu ayme
le mal, qui est dedans le pecheur,
et qui le rend mauvais ? Que vostre
poëte propose ses paralogismes à
d' autres, car ses finesses sont descouvertes,

p312

et sa malice esventee, si
bien que vous pouvez maintenant
apporter les autres quatrains,
et vous ressouvenir que si
une mere estoit infiniement bonne,
et juste, qu' elle chastieroit le
peché de son enfant d' un supplice
eternel, supposé qu' il ne voulust
se recognoistre.
Le Deiste
puis que le bigot ne voudroit, ny ne pourroit
voir ses pires ennemis au milieu d' un extréme
supplice durant un mois, comment est-il possible
qu' il vueille que Dieu repaisse sa justice
chastiant l' oeuvre de ses mains d' un supplice
infiny. 
Le Theol voicy encore une
plus sotte comparaison que ce detestable
poëte fait d' un bigot avec
Dieu ; je vous proteste que vous
devriez rougir de honte, de prendre

p313

ce poëme pour fondement de
vostre deisme ; mais quoy, j' en attribuë
plustost la faute à ce fat, qui
a basty ces rimes, que non pas à
vous, lequel monstre qu' il n' a aucun
respect de Dieu.
Toutesfois prenons son bigot,
quel qu' il soit, je luy demande s' il
est infiniment juste, et bon, ou
non : s' il dict qu' il est infiniment
juste, ce qui ne se peut, je dis qu' il
peut voir souffrir son ennemy non
seulement un mois, mais une eternité ;
s' il ne l' est pas, cela est fort
inepte de tirer des raisons de son
bigotisme pour combatre la verité
de la religion catholique. Qu' il
sçache donc que ce seroit plustost
merveille, si le supplice du meschant,
qui ne veut se recognoistre
en ceste vie, estoit finy, que ce n' est
de ce qu' il est eternel, puis que la

p314

recompense des bons est eternelle
à cause de la bonté de Dieu, qui
veut que le supplice deu à ses ennemis,
ne dure pas moins que la
recompense deuë à ses amis.
Certainement il ne se peut faire
que Dieu n' ayme autant sa justice,
comme sa bonté, et sa justice vindicative,
et punissante, autant que sa
justice recompensante, puis que
ce n' est qu' une mesme chose en
Dieu, duquel les attributs sont
tous une mesme essence divine, si
incomprehensible, que nonobstant
que nous usions de mille, et
mille conceptions, et industries,
nous ne sçaurions l' entendre que
fort imparfaictement, ce pendant
que nous sommes en ce monde. Il
faut donc que la justice punitive,
et suppliciante ait un pareil effect
envers les damnez, pour ce qui est

p315

de la duree, qu' a la recompensante
envers les bien-heureux, c' est à dire
eternel, puis que toutes deux elles
sont egales.
Dites moy, de grace, pensez
vous que la gloire de Dieu paroisse
moins, quand nous recognoissons
qu' il reprouve autant le vice,
comme il approuve la vertu, que si
nous ne voyions que son amour
envers les justes, sans nous appercevoir
de la haine, qu' il porte au
mal, et aux impies, à cause de leur
malice ? Or les flammes eternelles,
qui bruslent les damnez, vous font
voir qu' il hait autant le mal, comme
il ayme le bien. Prenez garde que
vous, qui prisez tant l' experience
des choses pour en avoir la science,
n' experimentiez la rigueur de
ces peines deuës à vostre infidelité,
et irreligion.

p316

Helas ! Pleust à dieu que vous
peussiez seulement une fois le jour
les apprehender, comme il faut, et
que vous meditassiez serieusement
où vous irez, et comme vous serez
traicté apres cette vie ; asseurez
vous que vostre incredulité ne
vient que faute de considerer
l' advenir, et du peu de soing
que vous avez de vivre vertueusement.
Retenez donc de ce discours,
qu' il n' y à personne, s' il
estoit aussi juste que Dieu, qui ne
fist souffrir un supplice eternel aux
meschans, qui ne veulent quitter
leur impieté ; et qu' il est raisonnable,
et tres-juste que Dieu donne
un lieu à un chacun, tel qu' il le
merite, or le meschant merite le
lieu de l' enfer, ne vous formalisez
donc plus, s' il a, ce qui luy est deu.

p317

Le Deiste
nostre infirmité peut elle trouver un appuy
autre part, où elle se repose mieux que sur la
justice divine, puis qu' elle est une mesme chose
avec sa volonté, et son divin amour ? 
Le Theol il est certain que
ces deux attributs sont une mesme
chose, comme nous avons dict auparavant,
car il ny à aucune diversité
en l' essence divine ; et que nostre
infirmité à son recours à ceste
bonté, comme au centre dedans lequel
elle doit trouver sa perfection.
Mais tout cela n' empesche pas, que
Dieu ne chastie les pervers, qui
au lieu de chercher leur repos
dans la volonté, et dans l' amour de
Dieu, l' ont tellement mandié des
creatures, qu' ils les ont preferees
au createur. Certainement la justice

p318

divine est un grand repos d' esprit
aux gens de bien, car ils croyent
fermement qu' apres avoir servy
Dieu de tout leur coeur, il leur
donnera la juste recompense de leur
travaux ; et au contraire elle apporte
un grand trouble, et une perpetuelle
inquietude d' esprit aux
meschans, d' autant qu' ils doivent
estre ramenez, et soubmis à l' ordre
de la providence divine (de laquelle
ils s' estoient voulus soubstraire)
par ceste justice qu' ils redoutent
si fort qu' ils voudroient
qu' elle ne fust point, et qu' on ne
leur en parlast jamais, parce
qu' elle condamne leurs crimes.
Or il faut que vous remarquiez
que c' est une foiblesse d' esprit de
penser pouvoir comprendre les attributs,
ou les actes divins avec nos
entendement finis, et que ce que

p319

nous faisons avec plusieurs actions,
et proprietez, Dieu le faict par un
seul acte, mais avec une perfection
infiniment plus grande, que s' il le
faisoit avec plusieurs actions,
comme nous. De là vient que bien
que sa justice, et sa bonté soient
une mesme chose, et qu' il condamne
les impies par le mesme
acte, par lequel il recompense les
bons, ils n' en sont pas moins condamnez,
et chastiez, ou couronnez,
et recompensez : ne plus ne
moins que le ciel ne laisse pas d' estre
distingué de la terre, encore
que Dieu ait faict, et creé l' un et
l' autre par un mesme acte. Mais
c' est trop dict sur ce quatrain, lequel
ne semble rien conclurre
contre nous, par ainsi il vaut
mieux passer outre.
CHAPITRE 14


p320

auquel est preuvé que Dieu faict du
bien aux damnez : que nous pouvons
hayr les meschans, et que Dieu les
punit justement sans cruauté : et les
quatrains du deiste depuis le 9 jusques
au 19 sont renversez. 
Le Deiste
si nous pensons qu' il ne faut rien attendre de
la bonté divine, comment nous en pouvons nous
servir d' exemple pour rendre le bien pour le mal
à nos ennemis ?
Dieu pourroit-il nous inspirer de donner secours
à tout le monde, s' il estoit plus cruel que
nul autre ? 

p321

Le Theologien
si vous voulez appercevoir
la nullité de l' objection,
qu' il faict au neufiesme
quatrain, il faut remarquer
que la bonté de Dieu nous est un
modelle, et un archetipe, sur lequel
nous devons regler nos bontez,
et duquel depend tout ce que
nous avons : mais la façon par laquelle
nous devons l' imiter, est
celle qui luy plaist, et qu' il nous
prescrit, et non celle que nous
nous imaginons : or ceste bonté
divine veut que nous aymions
nos ennemis, et que nous leurs
rendions le bien pour le mal, cependant
qu' ils sont en estat de se
pouvoir amender : c' est une pure
calomnie de dire que Dieu ne
fasse nul bien à ceux qui se sont

p322

rendus ses ennemis par leur peché ;
car ne voyez vous pas à chaque
moment, que Dieu fait pleuvoir
aussi bien sur les plus meschans
que sur les plus gens de
bien ? Est-ce pas de ceste bonté
eternelle que nous vient l' air, lequel
nous respirons, l' eau que
nous beuvons, et tout ce qui est
pour nostre necessité, et pour nostre
contentement ?
Avez vous jamais veu que pour
tant d' impietez, qui se commettent
tous les jours par tout le monde, il
ait retiré sa main des autheurs
coulpables de ce mal ? Bien qu' il
chastie par fois quelques uns de ce
monde icy pour servir de tesmoignage
à sa providence, et à sa justice,
et d' exemple aux autres. Il est
donc certain que Dieu fait plus de
bien à ses ennemis en un seul moment,

p323

que nous ne leur en sçaurions
faire en toute nostre vie. Je
ne veux pas icy employer la redemption
de tous les hommes par
la mort de nostre sauveur pour
preuve de cecy, car la nature nous
fait assez paroistre combien la
bonté divine s' estend sur toutes
sortes de personnes. Et par ainsi
cette bonté nous est un parfaict
exemplaire à ce que nous fassions
bien à nos ennemis ; mais parce que
vostre poëte tasche d' oster l' enfer,
je dy que Dieu fait plus de bien
aux damnez, que tous les hommes
du monde ne sçauroient faire tous
ensemble à leurs enfans, ou à qui
que ce soit ; car tout ce que nous
pouvons communiquer, n' est en
rien comparable à l' estre, ny aux
proprietez de l' estre que Dieu
conserve à tous les damnez.

p324

Et ne sert rien de dire qu' on
aymeroit mieux n' estre point que
d' estre avec un tel supplice, car
Dieu ne regarde pas nostre perverse
volonté en ordonnant ce
qu' il fait, mais il regarde ce qui est
bon, juste, et convenable : je sçay
assez que ceux de vostre secte aymeroient
bien mieux n' estre
point, que d' estre miserables, et
tourmentez à jamais : mais helas !
Leur desir ne peut faire qu' ils eschappent
ce qu' ils ont merité par
leurs impietez, dedans lesquelles
ils se plongent volontairement, et
opiniastrement, taschans à se persuader
que Dieu n' a aucun supplice
pour eux.
Au reste cet amour que Dieu
veut que nous portions à nos ennemis,
n' est que durant cette vie,
pendant qu' ils sont encore capables

p325

de la beatitude eternelle,
comme nous ; car si tost qu' ils sont
decedez, s' ils sont bien-heureux,
ce qui arrive toutes et quantesfois
qu' ils se repentent de leurs mesfaits,
et meurent en la grace de
Dieu, ils ne sont plus nos ennemis,
au contraire nous n' eusmes jamais
de meilleurs amis : s' ils sont damnez
manque d' avoir voulu quitter
leur malice, Dieu ne nous oblige
plus de les aymer, ou de leur
faire aucun bien, ains veut que
nous les ayons en horreur, et que
nous les hayssions, comme il fait :
si bien que le sophisme de vostre
rimeur est par terre de quel costé
qu' il se puisse tourner.
Je sçay bien que tout ce qui est,
est aymable, et que Dieu ne hayt
pas l' estre des damnez : aussi ne le
hayssons nous pas, ains nous aymons

p326

leur estre, et la nature des
diables, entant qu' ils portent l' image
de Dieu, et entant que l' estre,
et la bonté s' entresuivent necessairement :
mais cela nempesche
pas que nous ne detestions, et
hayssions parfaictement leurs
meschancetez ; c' est pourquoy je
veux bien que vostre poëte, et que
tous les deistes, et les athees sçachent
que je leur porte une hayne
mortelle, entant qu' ils sont impies,
et qu' ils ravissent l' honneur
deu à mon dieu, mon createur, et
mon redempteur, aussi bien que
le prophete royal faisoit envers
les meschans de son temps, (...).
Mais pour ce qui est de leur nature,
de leurs proprietez, et des
perfections du corps, ou de l' entendement

p327

que Dieu leur a departy,
je les ayme, je les caresse, je les
honore, et les prise grandement
comme oeuvres de Dieu, estant
marry qu' ils emploient la subtilité,
et la force de leur esprit, et l' elegance
de leurs paroles à se bander
contre celuy de qui ils ont receu
tout ce qu' ils ont : et ne desire rien
davantage que leur amendement,
prest à subir toutes sortes de travaux
pour ce suject, si je sçavois la
façon de les pouvoir ramener à la
verité de la religion catholique,
car je suis obligé de procurer leur
salut, cependant qu' ils sont en vie,
mais personne n' est tenu d' avoir
ce desir envers les damnez, d' autant
qu' ils sont hors de toute esperance.
Par où vous voyez ce qu' il faut
respondre au 10 quatrain, puis que

p328

Dieu ne nous inspire pas d' estre
secourables envers les damnez, et
ne veut pas que nous soyons moins
cruels envers eux, qu' il est ; si toutesfois
cela se pouvoit appeller
cruauté, ce qui est faux, car il n' y a
point de cruauté à punir un criminel
selon ses delits, veu que jamais
il n' y a cruauté, que lors que le supplice
excede le m' éfait ; or au lieu
d' exceder, quand Dieu punit, il
est beaucoup moindre, que celuy,
qu' il pourroit justement exiger : de
là vient que les theologiens disent
fort bien que punit citra coudignum, 
aussi bien que remunerat ultra condignum :
c' est pourquoy la punition
divine doit plustost estre nommee
misericorde, ou douceur, que
cruauté ; c' est ainsi que nous disons
que les juges font misericorde
aux criminels, lors qu' au lieu

p329

qu' ils avoient merité d' estre roüez,
ou bruslez, ils les condamnent seulement
à finir leurs jours en prison
au pain, et à l' eau, ou d' avoir le
foüet par les carrefours.
Le D je suis fort satisfait sur
ces deux quatrains, dieu vueille
qu' il m' arrive le mesme sur ce qui
suit.
Le Deiste
peut-il nous commander d' aymer nos ennemis,
s' il les hayt luy mesme veu qu' il est tout juste,
et tout bon ; quelle apparence que nous les
puissions ayder en leur misere, s' il les voit
souffrir une peine immortelle ? 
Le Theol ce que nous avons
dit cy devant, monstre assez que
ce quatrain ne conclud rien, car
vous avez veu que Dieu ayme
mieux ses ennemis, que nous ne

p330

faisons pas : et quoy ? S' il ne vous
eust aymé, vous eust-il conservé
jusques à present, vous eust-il fait
ceste grace que d' estre instruict de
la verité de nostre religion, et desabusé
des erreurs compris dans ce
poëme, afin qu' au lieu d' estre puny
eternellement, si vous eussiez
persisté en ceste malheureuse opinion,
vous jouyssiez de la gloire
eternelle, si vous vivez desormais
constamment dans l' eglise catholique,
et si vous gardez soigneusement les
commandemens de Dieu.
De plus vous voyez qu' il compare
l' amitié que nous devons
porter à nos ennemis en ce monde,
avec la haine que Dieu leur
porte apres qu' ils sont morts opiniastres
en leur peché : et par ainsi
il ne conclud rien, car nous sommes

p331

contens, et nous nous resjouissons
selon la saincte volonté de
Dieu, de ce que ceux qui l' ont icy
deshonoré, entant qu' ils ont peu,
mesprisans ses commandemens,
sont maintenant chastiez de leurs
meschancetez. En quoy nous
monstrons l' amour que nous portons
à Dieu, estans bien aises que
ses ennemis soient punis. Et croy
qu' il ny a personne de bon jugement
qui ne pensast que celuy là
haïroit le roy, qui seroit marry,
que ces ennemis, et ceux qui l' auroient
offensé, fussent punis selon
leur demerite : et qu' au contraire il
aymeroit son prince, se resjouyssant
de ce que ceux qui luy auroient
esté rebelles, seroient chastiez,
soit que cela servist d' exemple,
ou non.
C' est en ceste façon que nous

p332

aymons la gloire, et la bonté de
Dieu, en nous resjouyssans de ce
que les criminels de leze majesté
divine sont punis. Pour ceux qui
sont hors de la grace de Dieu, si
nous les cognoissions asseurément,
nous pourrions les hayr
comme ennemis de Dieu, cependant
qu' ils seroient en cét estat.
Je dy bien plus, car nous nous pouvons,
et devons hayr nous mesmes,
lors que nous sommes tombez
en peché, bien qu' il ne soit
que veniel ; ce que les meilleurs
chrestiens font assez paroistre,
lors qu' ils jeusnent, ou s' affligent en
quelque façon que ce soit, afin de
punir leurs mesfaits : punition volontaire,
laquelle tesmoigne l' amour
que nous portons à Dieu, et
la hayne du peché, ce qui fait que
les penitences volontaires sont

p333

fort agreables à la divine majesté,
et ont une grande force pour effacer
le peché.
Le D vous avez touché un
poinct de ces punitions corporelles,
contre lesquelles vous verrez
tantost qu' une grande partie de
ce poëme combat, mais j' apperçoy
desja par ce que vous venez de
dire, que le tout sera bien aysé à refuter :
cependant je poursuy.
Le Deiste
on ne peut pas concevoir un tourment infiny
pour contenter l' ire de Dieu, si ce n' est qu' on
die qu' il est infiniement cruel, et qu' il nous
traite plus mal que le plus grand tyran du
monde.
si le bigot se contentoit de l' estimer tel
comme luy, c' est à dire, qu' il assouvist sa
vengeance de quelque supplice limité, on pourroit
excuser une telle ignorance.

p334

mais de dire que Dieu punit l' homme d' une
peine infinie pour ses deffauts sur peine
d' injustice, c' est accuser la bonté divine d' une
malice immortelle. 
Le Theol ouy, il se peut concevoir
un tourment infiny, lequel
plaise eternellement à Dieu, puis
qu' il est eternellement juste, et
qu' il hayt le peché eternellement.
Ouy, le bien peut plaire infiniment
à Dieu, et par consequent la
punition des meschans, laquelle
est un grand bien, et fort digne des
damnez luy peut estre agreable.
L' ire de Dieu n' est autre chose
que l' aversion qu' il a du mal, comme
d' un déreglement, et d' une abolition
de l' ordre, qu' il a estably.
Dequoy vous pouvez vous plaindre,
si les meschans n' ayans pas
voulu eslire le costé droict, où estoit
la courone, et la gloire, ont

p335

mieux aymé choisir la fenestre, à
laquelle estoit la confusion, et le
supplice ? Mais vous ne pouvez
conclure de là que Dieu soit cruel :
le roy seroit-il cruel, s' il donnoit
le choix d' estre recompensé de
quelque excellente dignité, si on
le servoit fidelement, ou d' estre
chastié, si on luy estoit traistre, lors
que le criminel endureroit le supplice ?
Nullement, car ce seroit sa
faute, et non celle du roy. Ostez
donc cete cruauté de vostre esprit,
car Dieu ne peut estre cruel, comme
vous pouvez conclure de ce
que j' ay dit cy dessus.
Mais je vous prie, un tyran est-ce
pas celuy, qui fait endurer les
innocens tres-injustement ? Qui opprime
ceux, sur lesquels il n' a aucun
droit, et qui se bande contre
toute sorte de justice ? Où est-ce

p336

que ce miserable deiste a estudié
une si mauvaise leçon, qui luy ait
appris que Dieu soit tyran : Dieu,
qui ne peut commettre aucune injustice,
et qui a tous les droicts du
monde de faire, et ordonner tout
ce qu' il fait ? C' est donc à d' autres
qu' il faut que ce sophiste vende
ses coquilles, car Dieu a tres-juste
raison de chastier eternellement
ceux qui en mourant, et refusant
de recognoistre leur createur,
l' ont eternellement mesprisé, tesmoignans
cette eternelle opiniastreté
par le dernier acte de leur
vie, dans laquelle ils demeurent
tousjours.
Je vous proteste qu' il est bien
aveuglé au treiziesme quatrain,
dans lequel il veut que Dieu imite
un bigot, lors qu' il chastie le peché :
voicy bien le monde renversé,

p337

que le createur prenne loy de sa
creature. Il seroit volontiers d' advis
que Dieu se rendit finy, et que
la haine qu' il porte au peché, ne
durast pas tousjours ; mais c' est en
vain, car cete haine durera tout autant
comme Dieu sera Dieu. Il ne
faut point de l' imitation à un supplice,
qui est destiné pour un crime,
qui n' a point de fin. Il faut que
l' oeuvre par lequel la grandeur de
la justice divine est tesmoignee, et
apperceuë par les hommes, soit
eternel, il faut que la peine d' une
vengeance infinie soit infinie ; or
la vengeance divine estant un acte
de la justice eternelle, doit aussi
estre eternelle : dequoy est ce
donc que vous vous pouvez plaindre,
si Dieu chastie eternellement.
L' homme quel qu' il soit n' a garde
de prendre une vengeance infinie,

p338

estant finy, comme il est, bien qu' il
s' en trouve assez, qui ont cette ferme
volonté de se venger eternellement,
s' ils pouvoient, comme ils
tesmoignent faisant du pis qu' ils
peuvent à leurs ennemis, non seulement
quand ils sont vivans, mais encore
apres leur mort, par leurs médisances,
ou en nuisant aux heritiers.
Vous voyez donc par ce discours
que ce n' est pas nostre ignorance
qu' il faut excuser, mais celle de vostre
dialecticien, qui ne conclud
rien qui vaille, et qui est si ignorant,
qu' il ne sçait pas qu' il faut
qu' il y ait de la proportion entre le
juge, et sa justice, entre le crime, et
le supplice ; je croy neantmoins
que c' est plustost une malice affectee,
que l' ignorance, qui luy a
mis la main à la plume, et la conception
dans l' esprit pour nous estaler

p339

ces quatrains farcis d' erreurs,
d' impostures, d' ignorances,
et de calomnies.
Voicy encore un paralogisme
dedans son quatorziesme quatrain,
où il veut faire à croire que
nous accusons Dieu d' estre meschant,
quand nous disons qu' il
exerce la justice, lors qu' il punit
les meschans ; car nous n' usons pas
de ces termes, qu' il apporte, sçavoir
est que Dieu seroit injuste,
s' il ne punissoit les meschans, bien
qu' estant entendus sainement,
comme il faut, on pourroit vrayement
dire que la justice ne seroit
pas renduë à celuy qui meurt en
son peché, s' il n' estoit puny, d' autant
que comme la justice veut
que celuy qui meurt en la grace
de Dieu, soit recompensé de
la felicité eternelle, la mesme

p340

veut aussi que le supplice des reprouvez
soit eternel.
Et ne sçay pas ce qu' un homme
de bon jugement pourroit reprendre
en cecy, car la lumiere de la
raison nous fait toucher au doigt
cette verité.
Neantmoins comme toutes
choses sont tousjours en l' absolu
pouvoir de Dieu, bien qu' il ne
chastiast le meschant, il ne seroit
pourtant pas injuste, d' autant qu' il
peut tousjours le retirer de ce peché,
luy donnant une force surnaturelle
pour se repentir, et pourroit
par ce pouvoir infiny, qu' il a
par tout, et sur tout, retirer tous
les damnez de l' enfer ; mais nous
ne sommes pas sur ce poinct, et
suffit maintenant que vous apperceviez
la meschanceté de vostre poëte,
qui vouloit persuader au monde,

p341

que nous accusons la bonté divine
d' une eternelle malice, ou
au contraire nous l' adorons en
toute humilité, et confessons haut,
et clair que sa bonté ne paroist pas
moins en la punition des meschans,
qu' en la recompense des
bons, mais seulement en diverse
maniere, car l' un, et l' autre, comme
j' ay desja dit, est un oeuvre signalé,
et eternel de la justice divine.
Or il faut icy remarquer que
Dieu ne laisseroit pas à estre juste
infiniment, bien qu' il ne punist,
ou ne recompensast personne,
d' autant que ces attributs ne dépendent
pas des effects, qui nous
paroissent, car ils sont d' eux-mesmes
sans aucune dependance ; ce
n' est qu' à nostre respect, qu' il est
necessaire d' en voir les effects
pour les recognoistre, parce que

p342

nous ne voyons point les perfections
divines, que par ce qui nous
paroist, et par ce que nous pouvons
concevoir. De là vient que pour
conclure une justice infinie en Dieu,
la peine eternelle des damnez ne
nous sert pas de peu, bien que sans
icelle nous la peussions croire, et
concevoir en quelque façon, veu
que les effets ne sont pas de l' essence
de la cause : mais c' est assez dit,
à mon advis, sur ce quatrain, passez
aux autres.
Le Deiste
je sçay qu' il respondra pour s' excuser, que
Dieu ne peut quitter son eternelle justice, et
qu' il faut qu' il assouvisse sa fureur d' une peine
immortelle, puis qu' il est infiny.
mais il ne s' ensuit pas qu' un méfait limité
doive estre puny d' une peine infinie, bien que sa
divine majesté ait un estre infiny, et invariable. 

p343

Le Theol cela est certain que
Dieu ne peut quitter sa justice
immortelle, s' il ne se quittoit soy-mesme,
car la justice luy est aussi
essentielle, comme la raison l' est
à l' homme ! Mais il parle de Dieu
avec tant de passion, d' irreverence,
et de manie, qu' il ne peut, ce
semble, s' abstenir de ces mots de
cruauté, vengeance, fureur, assouvissement,
etc. Je veux traitter plus
doucement avec vous, qu' il ne fait
avec Dieu, et vous faire ressouvenir
que si quelque effect, soit de
peine, soit de recompense, a quelque
rapport, et proportion avec
les perfections divines, c' est particulierement
lors qu' il est eternel.
Donc si la haine que Dieu porte au
mal de coulpe, est immortelle,
(comme elle est vrayement, et ne
peut qu' elle ne soit telle, et par

p344

consequent nous ne disons pas cela
pour couvrir aucune erreur,
mais parce qu' il est si veritable,
qu' il ne peut autrement arriver)
il est evident que la peine deuë à
cette coulpe, et qui doit estre proportionné
à la haine, que Dieu luy
porte, doit estre infinie, et immortelle.
Mais c' est mal parlé de rendre
Dieu furieux, comme ce poëte
fait, non pas qu' on ne puisse attribuer
à Dieu le courroux, la vengeance,
et la fureur, à cause des effects
de sa justice, qu' il fait paroistre
sur les meschans, car la saincte
escriture en parle ainsi pour s' accommoder
à nostre façon d' entendre
les choses, mais par ce qu' il
use de ces termes par un mespris
des choses divines, et comme estant
luy mesme remply d' un furieux,
entheusiasmes, ou plustost

p345

d' une rage perpetuelle contre l' eglise
catholique, et contre tous
les chrestiens. Mais passons à l' autre
quatrain, car c' est là qu' il reserve
sa pretenduë raison contre le
châtiment du peché, disant que
puis que le peché est finy, qu' il ne
doit pas estre puny d' un infiny
supplice.
Je desirerois fort sçavoir de luy
si du moins il pense que les pechez
doivent estre punis de quelque
supplice temporel, et finy, et
qu' il me dist par quelle penitence
il punist les siens, je croy que les
marques en seroient invisibles.
Or bien qu' en quelque façon le
peché soit finy, comme à cause
qu' il est la privation d' une vertu,
où d' une rectitude finie, neantmoins
il est assez infiny pour estre
chastié d' un infiny tourment ; premierement

p346

en ce qu' il est contre
le respect, que nous devons à l' estre
infiny, qui nous defend le peché
(les actes ou privations prenant
leur estre, ou leur denomination
de leurs objets) : secondement
parce qu' il nous détourne d' un bien
infini, qui est la joüissance de Dieu,
car au lieu que nos actions devroient
butter à la gloire du createur,
le peché les fait butter à
la gloire des creatures, puis qu' il
est une aversion, et un détour
de la fin derniere, qui est Dieu seul,
et une conversion vers les creatures ;
et ainsi faisant nous mesprisons
Dieu pour priser la creature,
car il est impossible d' offenser
Dieu mortellement, sans le mespriser,
et le postposer aux creatures.
Pourquoy est-ce donc que celuy
là ne sera pas puny eternellement,

p347

qui a mesprisé l' estre eternel,
et qui a continué ce mespris
une eternité, en tant qu' il a esté en
luy, car la derniere resolution,
qu' un homme a en mourant, peut
estre dite eternelle, puis qu' il l' eternise
en tout ce qu' il peut.
Il faut donc que le supplice de
celuy, qui meurt en mesprisant
Dieu, soit eternel, puis que sa volonté
demeure pervertie, et mesprisante
pour tout jamais, si tost
qu' elle a finy la carriere de ceste
vie en ceste maudite resolution de
ne se point repentir, et de continuer
son peché.
Enfin bien que le peché fust limité
en toutes façons, Dieu le
pourroit neantmoins punir tres-justement
d' un supplice eternel,
car son commandement est une
ordonnance eternelle, et le crime

p348

doit estre puny d' autant plus griévement
que la personne, contre
laquelle il se commet, est relevee.
Mais je vous prie, Dieu n' a-il
pas peu deffendre le peché mortel
sous peine d' un supplice eternel, et
par consequent a-il pas peu chastier
de ce supplice tous ceux qui
tombent en ce peché ? Qui le peut
nier sans un horrible blaspheme ?
Puis que nous confessons ingenuëment
que celuy qui transgresse
l' ordonnance des roys, merite
le chastiement, lequel est porté
par la loy, telle qu' est la mort que
celuy-là à merité, qui a tué quelqu' un
injustement.
Bon dieu ! Pourroit-on nier que
celuy-là ne merite d' estre privé
pour jamais de la gloire eternelle,
et de vostre saincte face, lequel a
étably sa derniere fin, et sa beatitude

p349

dans une chetive creature,
au lieu qu' il pouvoit, et qu' il devoit
la chercher en vous tout seul ?
Sera-il dit que vous n' aurez pas
un juste pouvoir de chastier
eternellement celuy qui a méprisé
vostre infinie majesté, et qui n' a
tenu nul conte de vos sainctes ordonnances ?
Mais le deiste voudroit peut-estre
que Dieu sauvast les hommes
malgré qu' ils en eussent ; ce n' est
pas à luy à donner la loy à son
createur, lequel a voulu que nous
cooperassions à nostre salut, et que
nous obtinssions la beatitude eternelle
en qualité de recompense,
ce qui nous releve beaucoup
davantage, que si nous la devions
avoir par une autre voye. Qu' il
prenne seulement garde qu' il ne
tiendra qu' à luy s' il n' acquiert cette

p350

beatitude, car s' il veut quitter
ses desbauches, et sa miserable façon
de vivre, et qu' il demande
seulement pardon à Dieu en suivant
desormais ses saincts commandemens,
il aura cette beatitude
eternelle, à laquelle tous les
hommes doivent viser.
Et quoy ? Veut-il que Dieu luy
donne le paradis, et luy ne voudra
pas demander pardon, ny pas mesme
concevoir un regret en son
coeur d' avoir vescu si mal jusques
à present ! ô dieu quel aveuglement,
et quel endurcissement !
Vrayement cette sentence de S
Gregoire Le Grand luy convient
fort bien, (...).
Disons encore que celuy-là merite
d' estre banny eternellement
du paradis, et d' estre privé pour

p351

de la vie, et de la lumiere
eternelle, lequel s' est luy-mesme
jetté dans le peché mortel ; aussi
bien que celuy-là merite d' estre
tousjours aveugle, ou privé de vie,
lequel s' est arraché les yeux, ou
s' est luy-mesme tué ; car ne plus ne
moins que personne ne sçauroit se
resusciter, ou se rendre la veüe, aussi
personne ne peut se relever de
son peché, ny recouvrer la lumiere
de la foy par ses propres forces,
c' est pourquoy celuy qui quitte
volontairement le service divin, et
le respect qu' il doit à Dieu, et à la
religion, par laquelle il veut estre
servy, et adoré, il se rend indigne
de la beatitude eternelle, et digne
d' une perpetuelle misere.
Il ne faut point icy penser que
Dieu soit cruel, nenny, mais c' est
toy deiste malheureux, qui t' es

p352

cruel à toy-mesme, puis que pour
je ne sçay quel plaisir brutal, ou je
ne sçay quel enragé contentement,
que tu prends, ou du moins
que tu t' efforce de prendre à tes
fantasies, et à croire, et dire que tu
es fort en repos, quand tu oste la
justice à Dieu, et que tu t' imagine
qu' il n' y a point de peine pour les
damnez apres cette vie ; puis que,
dis-je, pour ce plaisir imaginaire, et
ce vain contentement tu te jette
en toutes sortes de pechez, et te
rends indigne que Dieu te fasse jamais
aucune grace.
Voy, je te prie, si tu trouvas jamais
ce plaisir, et ce repos dans tes
delices, et dans tes opinions fantasques,
lequel tu t' estois imaginé ;
es-tu pas pire que les diables, lors
que tu vas disant à l' oreille de tes
confidens, que tu leur veux apporter

p353

le vray repos, et la vraye beatitude,
s' ils veulent espouser tes bizarreries ?
Combien de fois t' ont-ils
repris de tes sottises, et de tes
blasphemes, te remettans ton repos,
et ton contentement phantastique
devant les yeux en se moquant
de toy, lors que la faim pressante,
ou la perte que tu faisois en
joüant avec eux, te rendoit miserable,
et te tiroit des paroles de la
bouche, et des souspirs du coeur,
qui tesmoignoient que le repos,
et le contentement de l' ame, duquel
tu fais si grande estime au
temps de la bonne chere, est aussi
éloigné de ton esprit, comme il est
proche de tes lévres.
Monstrez luy le danger où il
est, quand vous le verrez, et luy dites
ce mot veritable du grand s.
Duquel je vous parlois tantost : (...).

p354

Il est encore vivant, il
peut quitter sa malice, et ne la rendre
pas eternelle ; qu' il ne s' amuse
plus à considerer le plaisir du peché
lequel ne dure qu' un moment,
car bien que le plaisir du
larron, ou de l' homicide n' ait duré
qu' un instant, il ne laisse pas d' estre
mis en une prison perpetuelle,
ou d' estre mis à mort, sans que
jamais on luy rende la vie, bien
qu' il eust deu vivre mille ans, voire
mesme une eternité : les juges
temporels usent de ses chastimens,
personne ny treuve à redire, quand
on a l' esprit bien fait ; au contraire
on louë la justice, et les juges qui
l' ont renduë ; et nonobstant tout
cela il se treuve des hommes si
étourdis, et si despourveus de jugement

p355

qu' ils appelleront Dieu
cruel, s' il chastie ceux qui l' ont méprisé,
d' un supplice infiny. ô Dieu
où sommes nous ! Quant à moy je
dirois plustost, et croirois fermement
que le supplice infiny duquel
les damnez sont chastiez, seroit
trop leger, que je ne penserois
qu' il fut trop grand ; et croy qu' un
chacun sera de mon advis, qui
pensera serieusement quelle est la
majesté divine, quel honneur, et
quel service elle merite, et quelle
est la temerité, la presomption, et
la malice du pecheur.
C' est une chose estrange qu' on
croye facilement que Dieu donnera
la gloire eternelle à ceux qui
auront bien fait, et qui l' auront aimé
de tout leur coeur en luy sacrifiant
leur corps, et leur ame, et en
gardant ses commandemens, et

p356

qu' on ne vueille pas croire qu' il
punira les meschans qui l' ont mesprisé,
d' un supplice eternel. Mais
cette creance imaginaire qu' ils
ont, qu' il n' y a point d' enfer, n' empeschera
pas la sentence du juge
tout puissant, laquelle il fulminera
contre les damnez au jour du jugement
general, et qu' il prononce
par le jugement particulier à leur
mort ; laquelle est aussi expresse en
ses paroles, (...),
comme celle, par laquelle
il appellera les bons à la beatitude
des saincts, (...),
si bien qu' il ne faut point
que personne se flatte sous pretexte
de la bonté, et de la misericorde
de Dieu : ny qu' on pense que la sentence
des damnez n' est que comminatoire
pour détourner ceux-là
du peché, lesquels n' ont pas l' esprit

p357

assez bien fait pour fuyr le vice,
et pour se porter à la vertu par
le seul motif de sa beauté, ou de la
l' aideur du peché, et pour le seul
amour de Dieu.
Car ne plus ne moins que la
promesse que Dieu fait aux bons
de la recompense eternelle, n' est
pas seulement pour nous enflammer
à la vertu, et pour nous faire
suivre ses commandemens, mais
est tres veritable, et sera accomplie
de poinct en poinct : ainsi le
supplice duquel il menace les
damnez, n' est pas seulement pour
faire peur aux meschans, mais il est
tres-veritable, lequel ils endureront
aussi vrayement, et reellement,
comme le bon-heur des justes
sera vray, et reel.
Et quoy ? Est-il pas tres-raisonnable
que les damnez lesquels

p358

meritent d' estre chastiez eternellement,
n' endurent pas seulement
en nos pensees, et par imagination,
mais reellement, et en effect,
puis que ce n' a pas esté par nostre
seule pensée, et en imagination
qu' ils ont mal-fait, et qu' ils ont
commis leurs meschancetez, mais
reellement, et de fait. Vous ne voudriez
pas que la recompense que
Dieu nous promet, ne fut qu' imaginaire,
si vous sçaviez devoir
estre des bien-heureux, comme
vous serez asseurément, si vous
quittez vos impietez pour tout jamais,
et si vous obeyssez à Dieu le
reste de vostre vie : pourquoy est-ce
donc que vous voudriez que la
recompense des meschans, laquelle
est la punition que merite leurs
pechez, ne fust que phantastique,
et imaginaire ?

p359

Concluez donc, si le supplice
doit estre borné, par lequel celuy-là
est puny, qui a mesprisé l' infinie
bonté de Dieu, et qui est mort en
cette impieté : et si vous me voulez
croire, detestez autant la perverse
doctrine de vostre poëte, que
vous l' avez cherie cy-devant, à
fin que Dieu vous fasse pardon, et
misericorde, c' est ce que j' espere
de vous.
Le D monsieur, vous ne serez
pas frustré de vostre esperance,
avec l' ayde de la divine majesté ;
mais je vous prie ne vous ennuyez
pas de respondre à ce qui suit, afin
que je puisse de plus en plus concevoir
la verité, que nostre poëte
avoit tasché de faire eclypser ; voicy
donc ce qui suit.

p360

Le Deiste
ils font icy une objection, sçavoir est que le
bon-heur des uns ne peut estre sans la misere
des autres, et que Dieu seroit un pere injuste,
s' il aymoit tous ses enfans.
mais cela ne se peut dire sans faire Dieu
cruel, afin qu' il soit juste ; et puis c' est luy
prescrire la façon de gouverner le monde. 
Le Theol il apporte une objection
de son creu, car nous ne disons
pas que le bon-heur des bien-heureux
dépende de la misere des
damnez ; au contraire cela est certain
que quand il n' y auroit aucun
damné, et que tous seroient bien-heureux,
que la gloire n' en seroit
moins grande, ny moins agreable,
car comme elle est infiniment
infinie, elle ne se diminuë par aucune
multitude de ceux qui en

p361

jouyssent. C' est pareillement une
imposture de nous faire dire que
Dieu ne sçauroit aymer tous ses
enfans sans injustice, car nous disons
que Dieu les ayme tous, de
sorte que son amour s' étend jusques
aux enfers, car c' est par amour,
qu' il conserve l' estre des
damnez ; soit donc tenu ce quatrain
pour pure calomnie, afin d' examiner le
suivant.
Certainement il n' est pas moins
faux que l' autre, car comme il
l' infere du precedent, il ne peut
qu' il ne suive sa nature, si la consequence
est bien tirée, car d' un
principe faux, on ne sçauroit
rien legitimement inferer qu' une
fausse consequence. Mais prenez
garde qu' il prend tousjours la justice
de Dieu, et son effect pour
cruauté : c' est estre trop cruel envers

p362

la justice de Dieu que d' en
parler si impertinemment, et si
cruëment.
Or sçachez que nous sommes
merveilleusement éloignez de ces
opinions phantasques, aussi bien
comme de vouloir reduire la volonté
de Dieu à nos jugemens : et
vous asseurez que nos jugemens en
matiere de religion n' ont autre branle
que la volonté de Dieu, et la lumiere
qu' il nous a donnée par la
foy. Son empire ne peut dépendre
d' autre que de luy, ny la façon
qu' il se comporte avec toutes les
creatures : ce nous est beaucoup
d' adorer par une profonde meditation,
et contemplation le sainct
ordre de sa volonté, et d' admirer
la profondeur de ses jugemens, et
de ses voyes, esperans qu' apres
cette vie nous verrons la claire

p363

verité de tout ce que nous avons
icy creu, et seulement consideré
par la foy, comme par un
miroir et par un enigme.
Voila ce que j' avois briefvement
à respondre aux quatrains de vostre
poëme, car le chemin ne me permet
pas de m' estendre plus au long
sur ce suject. Tant y a que j' estime
vous avoir donné assez de lumiere
pour quitter ceste folle opinion
que vous aviez d' un dieu, duquel
vous ne desiriez que les douceurs,
la bonté et la misericorde : et
ne croy pas que vueilliez plus long
temps tremper en cet erreur, si vous
considerez que Dieu a toutes sortes
de perfections, et qu' elles sont
toutes infinies, et qu' il a voulu que
chacune parust en telle façon que
nous peussions apprehender leur
infinité : et puis qu' il ne tient qu' aux

p364

damnez qui ne soient sauvez (lors
qu' ils sont en estat de meriter, et
de se convertir, qui est en ceste vie)
lesquels ayment mieux suivre leur
abominables desirs ; et leurs sales
concupiscences, encore que Dieu
le defende expressément, que d' embrasser
sa loy. Vous n' appellez-pas
le roy cruel, lors qu' il fait mourir
quelqu' un pour avoir contrevenu
à ses ordonnances, pourquoy est-ce
donc que vous vous imaginez
que Dieu est cruel de punir ceux
qui luy desobeïssent. De plus un
pere n' est pas tenu de s' abstenir de
la generation, bien qu' il sçeust
que son fils deust miserablement
perir, supposé principalement
qu' il ne doive perir, que par sa propre
faute ; pourquoy voulez-vous
donc que Dieu ne produise pas celuy,
duquel il prevoit la cheute,

p365

et le peché, puisque ce n' est que sa
faute quand il offense la divine
majesté ; voulez vous point que
nostre meschanceté surpasse sa
bonté ? Ce ne sera pas jamais ; contentez-vous
donc l' esprit en admirant
les oeuvres de Dieu, et rentrez
dans la creance de l' eglise.
Le D si vous m' aviez donné
autant de satisfaction sur les autres
quatrains, j' adviserois ce que j' aurois
à faire, mais cela seroit bien
long, et craindrois vous donner
trop de peine.
Le Theol il n' y a rien qui me
puisse donner de la peine sinon
tres-agreable, en ce qui est de vous
desabuser de ce libertinage d' opinions,
et d' erreurs, que vous appellez
deïsme : neantmoins avant que
vous proposiez le reste, je suis d' advis
que nous disnions à ce passage,

p366

et par apres vous poursuivrez vos
quatrains, cependant vous pourrez
penser à ce que je vous ay dit.
CHAPITRE 15

que l' amour de Dieu est immuable,
quels sont ses objects : comment il
nous a peu racheter, veu que nous luy
appartenions : comment il peut s' asservir
à l' homme, et comment nous luy
pouvons faire resistance, avec la refutation
des quatrains du deiste, depuis
le 19 jusques au 29. 
Le Deiste
voicy des objections
encores plus fortes que
les precedentes, ausquelles
vous vous trouverez
peut-estre bien empesché,

p367

quelque subtilité d' esprit que
vous puissiez avoir, ou du moins
confesserez que ce n' a pas esté sans
raison, que j' ay suivy cette opinion :
prestez donc s' il vous plaist
attention aux quatrains qui suivent.
Le Deiste
d' abondant puis que l' amour de Dieu est
une action, de laquelle il est le seul object, et la
cause invariable, est-ce pas s' embrouïller d' une
contradiction de croire que cet amour divin
puisse cesser envers nous ?
et quoy, si cet amour ne peut en aucune façon
se diviser de l' essence divine, pourquoy est-ce
que le bigot la corporalise, la rendant sujette à
l' inconstance humaine ?
n' est-il pas insensé lors qu' il croit que Dieu
est capable d' offense, puis que tout pouvoir depend
de luy ? Et qu' il ait peu nous mettre les armes
en main contre luy, et qu' il se soit donné

p368

de la peine, et de la souffrance pour nous, veu
qu' il est tout sage ?
pourroit-il donner son assistance pour estre
surmonté, et afin qu' on luy ravist son ouvrage,
et puis endurer qu' on executast toute sorte de
rage contre sa volonté pour racheter le susdit
ouvrage ? 
Le Theol c' est assez, demeurez
là, afin que je vous fasse paroistre
les impostures, et les mensonges
impudens de vostre poëte, lequel
a remply ses quatrains de
blasphemes, car au premier il dit
que l' amour de Dieu a une cause,
ce qui est faux, puis que c' est Dieu
mesme : il se coupe de son propre
glaive, car si Dieu seul est l' object
de son amour, il ne nous ayme
donc pas, autrement nous serions
aussi l' object de ce mesme amour :
mais pour vous desembarasser l' esprit

p369

de ce sophiste, il faut que vous
supposiez que Dieu ayme les choses
telles qu' elles sont : si elles sont
bonnes eternellement, il les ayme
eternellement, si elles ne sont bonnes
que quelque temps, il ne les
ayme que ce temps là, de façon
neantmoins que cet amour, entant
qu' il est en Dieu, ne s' altere en
aucune façon, mais demeure tousjours,
et ne tient qu' aux choses aymables,
si elles ne sont aymees
eternellement de Dieu, lequel ne
les a plus pour objet de son amour,
lors qu' elles cessent d' estre aymables ;
ce qui paroist en l' homme,
quand commet le peché mortel. Si
vous vous estonnez de ce que Dieu
n' ayme plus le meschant entant
qu' il est pecheur, estonnez vous si
les corps opaques, et tenebreux ne
donnent point de lumiere, et si la

p370

nuict ne luit pas comme le jour ; et
pour dire en un mot l' amour que
Dieu nous porte, n' est point perissable,
mais nous sommes mortels,
et perissables, et vrayement nous
perissons, et mourons spirituellement,
lors que nous perdons la vie
de la grace.
Je veux vous donner un exemple
dans la nature, lequel vous fera
voir tres-clairement qu' il n' est pas
besoin que Dieu se change, ou que
son amour soit variable, encore
que tantost il ayme l' homme, lors
qu' il est en sa grace, et tantost il le
haisse, quand il est en peché mortel.
Est-il pas vray que quand la lune
est entre nous, et le soleil, qu' il se
faict eclypse de soleil, et que nous
sommes privez de sa lumiere ? Sans
doute : et neantmoins il illumine
ceux qui n' ont point la lune entre

p371

eux, et le soleil.
Or ce n' est pas le soleil qui se
change, car il est en mesme lieu,
auquel je suis content que vous
l' imaginiez arresté avec les coperniceens,
afin que vous entendiez
mieux l' exemple. C' est donc le
changement de la lune, qui en est
cause, ou le mouvement de l' homme,
qui se met vis à vis de ce corps
lunaire, quand il luy plaist, et qui
est cause de ce qu' il est privé de lumiere ;
ce qui est fort à nostre propos,
car nous sçavons que le fol,
tel qu' est l' homme pecheur, est
muable comme la lune, (...).
Il faut donc que le meschant
s' en prenne à soy-mesme, lors que
Dieu le hayt, et qu' il luy soustrait
les rayons de sa grace : c' est luy qui
oppose son crime au soleil de justice,

p372

comme une lune grossiere,
et opaque ; qu' il oste son peché,
Dieu luy rendra sa grace : car
comme le soleil illumine incessamment,
ainsi Dieu départ tousjours
les rayons de ses faveurs, et
ne desire autre chose que nostre
salut : ce qui se fait sans que l' amour
de Dieu perisse, non plus
que la lumiere du soleil ne perit
point, mais demeure immuable,
particulierement si nous supposons
que le soleil soit immobile,
et que la terre se meuve tout au
tour, afin que l' exemple vous satisfasse
avec plus de contentement.
N' importe que l' hypothese ne
soit pas veritable, c' est à dire que
la terre ne soit pas mobile, ny le
soleil fixe, car c' est assez que cela
se puisse faire, s' il plaisoit à Dieu.
D' où nous pouvons conclurre en

p373

passant, qu' il est necessaire que le
soleil, et la terre ayent esté faits, et
qu' ils ayent receu la vertu de se
mouvoir, ou de s' affermir, puis
qu' ils estoient indifferents à l' un,
et à l' autre : or cette determination
a se mouvoir, ou ne bouger d' un
lieu, n' a peu venir que d' un estre
eternel qui est Dieu.
Que vostre poëte sçache donc
que l' amour de Dieu ne se divise
non plus de son essence, que la lumiere,
du soleil ; et qu' il s' aille
pourmener avec son bigot, et sa
corporalization, car je ne cognois
point de chrestien, qui fasse
l' amour de Dieu sujet à aucune
inconstance, au contraire il n' y en
a pas un qui ne confesse haut, et
clair, que l' amour de Dieu est
exempt de tout changement, puis
qu' il est Dieu mesme selon ce

p374

beau verset de l' apostre, (...).
Le troisiesme quatrain semble
supposer que Dieu soit offensé, et
lezé comme les hommes, mais
nous sommes bien loin de cette
creance, car Dieu ne peut recevoir
aucun mal, lequel est seulement
offensé entant qu' on ne luy rend
pas le service, qui luy appartient,
et qu' on fait le contraire de ce
qu' il nous a declaré vouloir ; non
qui ne l' empeschast facilement
s' il vouloit, mais il nous laisse en
nostre liberté : je dy donc que Dieu
est capable de permettre qu' on ne
suive pas ses commandemens, parce
qu' il n' en est pas moins heureux,
et moins Dieu, que si on les
pratiquoit, et cette permission
n' est pas nous armer contre luy,
veu qu' il ne nous a donné la liberté

p375

que pour en bien user.
Nous pouvons encore nous servir
du susdit exemple, afin de concevoir
comment Dieu est offensé
sans qu' il en reçoive aucun dommage,
car si le soleil departoit volontairement
ses rayons en qualité
de graces, et qu' il n' aymast que
ceux-là qui reçoivent sa lumiere
s' exposans à ses rayons ; et au contraire
qu' il hayt tous ceux lesquels
y mettroient quelque empeschement,
et qui se soustrairoient de
ses faveurs, il seroit vray que le soleil
ne se changeroit pas, et qu' il ne
seroit pas offensé en son corps,
mais tout au plus en sa lumiere,
qu' on empescheroit.
C' est ainsi que le roy est offensé
lors qu' on traite mal quelqu' un
de ses ambassadeurs, sans neantmoins
que le coup porte sur sa personne ;

p376

or les graces divines, et les
rayons par lesquels Dieu nous illumine,
sont comme des ambassadeurs,
par lesquels il nous persuade
de nous tourner de son costé,
et de nous unir avec sa bonté : ses
preceptes sont des rays de la lumiere
eternelle, par lesquels il
nous conduit en ce monde, et
nous attire à sa gloire.
Advisez si celuy qu' on passe la
riviere avec un bac, coupoit le
chable, ou la corde, s' il n' offenseroit
pas le battelier, et s' il meriteroit
qu' on le passast : le pecheur
fait-il pas le mesme, lors qu' il refuse
la grace de Dieu, et qu' il la
retranche ? Il estoit attiré par les
cordes de l' amour de Dieu, et par
les liens d' une charité paternelle,
(...) : il couppe, il rompt, il

p377

rejette les cordes, et les doux liens
des preceptes divins, n' est-il pas
digne de toutes sortes de supplices ?
Pour la peine qu' il a voulu subir
pour nous, elle a fait paroistre
une merveilleuse sagesse, et bonté
tout ensemble, et doit fermer la
bouche au detestable deiste pour
tout jamais, puis qu' il confesse luy-mesme
qu' il ne peut comprendre
comment Dieu a voulu endurer
pour nous, apres s' estre revestu de
nostre nature, mais Dieu ne peut
rien vouloir, n' y rien faire qui ne
soit tres-sage, et tres-bon, or entre
toutes les oeuvres de sagesse, et de
bonté cét auguste mystere de l' incarnation,
contre lequel il agit,
est un des plus grands. Il me faudroit
des annees entieres pour parler
de son excellence, et la seule

p378

meditation que vous en ferez, servira
de bride à vos libertinages.
Dites moy, je vous prie, est-ce
pas un grand creve-coeur de voir
que les hommes sont si meschans
qu' ils ne craignent point de se servir
du secours, que Dieu leur donne
à chaque moment, pour faire
ce qu' il a defendu ? ô miserables
que vous estes, vous ne le croyez
pas, d' autant que cela comprend
une trop grande misericorde, indulgence,
et bonté, et neantmoins
vous voulez que son amour soit
infiny ; voyez de grace, si celuy qui
abuse d' une si grande misericorde,
ne merite pas d' estre tourmenté à
jamais. Certainement je m' ennuye
grandement d' entendre ses
quatrains si mal digerez, et n' estoit
que j' espere que vous quitterez
vostre erreur, je ne voudrois pour

p379

rien du monde m' amuser à refuter
toutes ces sornettes, qui sont tirees
tant des anciennes, que des nouvelles
heresies, lesquelles sont causes
de toutes ces impietez.
Le D je voudrois bien ne vous
donner pas ceste peine, mais puisque
nous avons commencé, et que
vous m' avez satisfaict à ce que j' ay
apporté, je croy que vous seriez
marry, si je demeurois dans les difficultez,
qui sont contenuës és quatrains
suivans : or afin que la chose
soit plus claire et plus briefve, je
me contenteray de proposer quatrain
à quatrain, si ce n' est que
quelques-uns soient attachez par
ensemble à cause du sens, ou de
l' identité de la matiere, ce que je
feray sans y joindre autre chose, car
j' ay apperceu que vous sçavez
fort bien où ils buttent, que si

p380

vous me satisfaictes, je ne repartiray
point, mais j' apporteray simplement
le quatrain suivant.
Le Theol je le veux bien, mais
je vous prie de vous rendre attentif,
et vous ressouvenir de ce que
nous aurons dict auparavant, afin
que si vos quatrains repetent la
mesme impieté que les precedens,
nous les passions comme chose
de neant, à laquelle nous aurons
desja respondu.
Le D j' accepte ces conditions
comme fort raisonnables, voicy
donc ce qui suit en ce 23 quatrain.
Le Deiste
si Dieu avoit ceste ambition de monstrer sa
force, et sa puissance contre nous, son desir ne
seroit-il pas une grande imperfection, et une
pure indigence ? 

p381

Le Theol c' est fort mal parlé
d' appeller ambition le desir que
Dieu à que ses perfections nous
paroissent, telle qu' est sa force, et
sa justice, ce desir n' est pas une
imperfection, si vous n' appellez
imperfection l' amour qu' on porte
à la vertu ; ceste affection tres-loüable,
et tres-saincte n' est pas
une indigence, mais un grand
thresor : et l' execution de sa justice
eternelle est tres-excellente puis
qu' elle monstre combien c' est un
grand mal que le peché, et combien
Dieu est grand, puisque l' action, ou
l' omission par laquelle
nous contrevenons à ses ordonnances,
merite un tel chastiment,
auquel il ne doit rien y avoir icy
de comparable en grandeur, ny en
duree, puisque c' est le supplice du
peché, qui leve les cornes contre

p382

celuy à qui rien n' est comparable
ny en grandeur n' y en duree.
Mais je vous prie si le roy faisoit
severement punir celuy qui
l' auroit mesprisé, et qui se seroit
moqué de ses ordonnances, diriez
vous qu' il seroit espris d' ambition ?
Nullement ; au contraire
tout homme de bon jugement seroit
bien aise de ce chastiment, par
lequel la justice est renduë, et l' authorité
du roy est maintenuë. Et
quiconque seroit marry de ceste
punition, pourroit à bon droit
estre estimé traistre à son roy, car
il feroit paroistre qu' il ne feroit cas
de la volonté du roy, estant marry
que ceux qui s' y opposent,
soient punis selon leur demerite.
Que s' il faut accorder cela touchant
les loix d' un prince, que sera
ce lors qu' il est question du

p383

roy des roys, et qu' on parlera de
deffendre l' honneur de Dieu ?
Souvenez-vous donc que tout
homme qui ayme vrayement
Dieu, doit estre bien aise que ceux
qui le mesprisent, et qui transgressent
ses commandemens, soient
punis : ce que Dieu execute par sa
force, et par sa puissance, et non par
ambition (laquelle ne peut tomber
en Dieu) mais à cause de l' amour
qu' il porte à la justice, et afin qu' il
n' y ait rien sous la divine providence,
qui ne soit reglé par la justice,
laquelle faict une admirable
harmonie de tous les discordans
accords, qui se treuvent au monde.
Dites donc à vostre poëte, si jamais
vous le voyez, qu' il prenne
mieux garde desormais comme il
parlera de Dieu.

p384

Le Deiste
peut-il estre croyable qu' il ait peu faire quelques
ennemis, lesquels ayent esté capables d' empescher
ses desseins immuables, puis qu' il a sousmis
toutes choses à sa volonté ? 
Le Th ce quatrain peut avoir
deux sens, s' il entend de la soubmission
de dependance necessaire,
il est vray, si de la soubmission
volontaire, il est faux, car les meschans
ne veulent pas se sousmettre
à Dieu, ny ne veulent suivre ses
commandemens. Il est aussi tres-faux
que Dieu fasse des ennemis,
mais les pecheurs se rendent ennemis
de Dieu par leur malice, lesquels
bien qu' ils se bandent contre
sa saincte volonté, neantmoins
jamais n' empescheront ses desseins
immuables qui consistent à

p385

donner le paradis à ceux qui suivront
la regle de vivre, qu' il nous
a donnee, et de punir eternellement
ceux qui la transgresseront.
Or afin que vous entendiez
mieux ceste responce, il faut que
vous sçachiez que toutes choses
sont tellement en la puissance de
Dieu, de laquelle elles relevent
comme de leur souverain Seigneur
et de leur createur, qu' il ne
se peut qu' elles ne luy soient sujettes,
non plus qu' il ne se peut faire
qu' elles ne soient dependantes :
aussi le verbe eternel ne s' est pas
incarné, et fait homme pour faire
que nous nous assujettissions à
Dieu de cette naturelle subjection,
sans laquelle il est impossible
qu' elles soient, et par laquelle Dieu
peut faire dedans chaque creature,

p386

et de chaque chose tout ce qui
luy plaist, c' est ce qu' appellent les
theologiens puissance obedientielle ,
laquelle est tellement emprainte
en chaque individu, qu' ils en ont
tiré cét axiome, que Dieu peut
faire (...), de chaque
chose tout ce qu' il voudra, car
l' air n' obeyt pas si promptement
au traict décoché, au boulet du
canon, ou à la foudre, ny la cire au
cachet, ny l' eau aux poissons, comme
font toutes choses à Dieu par
cette obeissance naturelle, et inseparable :
comme il se voit lors que
Dieu commande aux maladies de
s' en fuyr, aux vents, et à la mer de
s' appaiser, au soleil de ne bouger,
et à toutes les autres creatures d' executer
ce qui luy plaist leur commander.
Mais outre cette obeissance

p387

aveugle, et necessaire, il a voulu
rendre les hommes capables de
luy obeyr d' une obeissance clairvoyante,
laquelle dépendist de nostre
liberté, afin qu' il eust des creatures
qui le servissent, non par
contrainte, ou necessité, ce qui est
commun à toutes, mais franchement,
et de leur bon gré ; service
que Dieu prise beaucoup plus que
le naturel, d' autant qu' il est plus
relevé, et approchant de plus pres
de la divinité.
C' est donc par cette volonté, et
par cette liberté, que les hommes
se rendent ennemis de Dieu : ils
n' empeschent pas pourtant ses
desseins immuables, lesquels ne
dépendent aucunement de nostre
liberté, car il fait tout ce qui luy
plaist, et ce en quelque façon qui
luy plaist, sans qu' aucun le puisse

p388

empescher ; et entre tout ce qui
luy plaist, c' est de nous laisser en
nostre liberté, de luy obeyr, ou
non, afin que nostre obeissance ne
soit point contrainte, et qu' il nous
ait plustost pour bons enfans, qui
luy servent librement, que pour
esclaves, qui ne fassent rien que
par menace, ou pour crainte du
supplice ; ou pour serviteurs, qui
n' obeissent que pour la recompense ;
car il faut qu' un bon chrestien
prenne un tel plaisir à servir,
honorer, et adorer Dieu, qu' il ne
laissast à faire tout cela, bien qu' il
n' y eust ny paradis, ny enfer.
Ce qui me fait souvenir d' une
belle histoire, qui est en la vie de
Sainct Louys roy de France, d' une
femme qui portant un réchaut
plein de charbons ardans dans
une main, et un vase plein d' eau en

p389

l' autre, interrogée qu' elle fut
pourquoy elle portoit ces deux
choses si contraires, respondit que
le feu estoit pour brusler le paradis,
et l' eau pour esteindre l' enfer,
d' autant qu' il faut servir Dieu
avec tant de liberalité, et d' affection,
et d' un amour si filial, que
nous l' aymions tousjours de tout
nostre coeur par dessus toutes choses,
bien que nous ne nous proposions
devant les yeux, ny peine, ny
recompense.
Voila ce que je vous ay voulu
dire, afin que vous sçachiez ce qui
est de nostre creance, et de la façon
que nous servons, et adorons
la majesté divine : poursuivez
maintenant.

p390

Le Deiste
si Dieu gouverne toutes choses d' un pouvoir
absolu, qui soit égal, et reciproque à son
intelligence, qui est-ce qui pourroit empescher
l' effect de sa volonté malgré qu' il en eust, il n' y
auroit pas moyen de luy resister. 
Le Theol cela n' est pas que
Dieu employe son pouvoir absolu
à gouverner ce monde, mais comme
un tres-bon, et tres-sage ouvrier
il s' acommode à son ouvrage, et le
maintient doucement, et puissamment
selon que la nature de la
chose le requiert ; or on ne peut
pas comparer son pouvoir à sa
science en toute chose, particulierement
en ce qu' il entend beaucoup
de choses, qu' il ne peut pas faire
comme sont les 3 personnes qui ne
sont pas faisables, car il y en a seulement

p391

2 produisibles, et l' autre,
sçavoir est le pere, qui ne peut
estre produite : puis il entend tous
les contraditoires, lesquels ne sont
pas faisables ; si bien que l' object
de sa science, et de son intelligence
s' estend plus au large, que celuy
de son pouvoir. Que si sa volonté
estoit absoluë par laquelle il desire
que personne ne soit damné, elle
ne pourroit pas estre empeschee ;
mais elle n' est que conditionnee,
car elle suppose qu' on ne contrevienne
point aux commandemens,
qu' il met és mains de nostre
franche volonté, si bien que si
nous ne les gardons, nous ne faisons
contre son decret absolu, infaillible,
et eternel, veu qu' il n' en a
jamais eu un tel pour nostre salut,
mais seulement à condition, que
nous ferions ce qu' il ordonneroit

p392

pour y parvenir, et par ainsi nous
ne faisons pas le peché malgré
luy, en la façon qu' il le prend en
ce quatrain, puis que Dieu ne veut
pas absolument empescher que
nous ne le fassions, car il le permet
ne voulant pas destruire la liberté,
qu' il nous a donnee.
Le Deiste
y a-il quelque pouvoir qui puisse servir
contre celuy auquel tout pouvoir fait hommage ;
Dieu mesme se pourroit-il asservir aux hommes,
et prendre leur arbitrage pour regle de son
vouloir ? 
Le Theol nenny, il n' y a aucun
pouvoir, qui puisse empescher
le pouvoir de Dieu ; on peut neantmoins
resister à ses commandemens,
puis qu' il ne veut point
nous contraindre, nous laissent libres

p393

de les faire, ou ne les faire pas :
et certainement ce n' est pas le
pouvoir de l' homme, qui le rend
criminel, mais s' est de n' user pas de
ce pouvoir à faire ce bien, et de
s' en servir à faire le mal ; or Dieu la
donné pour faire le bien, et non
pour faire le mal. Si vous appellez
s' asservir aux hommes, lors qu' on
les gouverne, et qu' on a soing
d' eux de peur qu' il ne leur arrive
quelque mal, je dy que Dieu se
peut asservir aux hommes, et regler
son vouloir selon qu' ils auront
besoing de son assistance ;
c' est ainsi qu' un bon roy, s' assujettit
à ses sujects, quand il veille pour
leur bien, et pour leur repos : et par
ce qu' il leur a donné une nature libre,
il se gouverne avec eux comme
avec des creatures libres, leur
aydant de son concours general

p394

en tout ce qu' elles font, car il ne
veut pas destruire l' ordre qu' il a
mis dans la nature pour l' impieté
de quelques-uns, autrement la
malice des hommes sembleroit
surpasser sa providence, et sa bonté :
veritablement c' est une chose
admirable, que personne ne peut
eschapper l' estenduë de sa providence,
car s' il n' embrasse les uns
par sa misericorde, et par la recompense,
il les reduit par le supplice,
et par sa justice, bien que ce ne soit
que leur faute, lors qu' il les chastie.
Je dy donc que Dieu se peut
non seulement asservir, mais
vrayement qu' il s' asservit à l' homme,
entant que toutes et quantesfois
que l' homme veut agir, Dieu
agit avec luy, et luy donne la force
de faire ses actions.
Or il faut bien entendre cecy,

p395

car on seroit grandement deceu,
si on pensoit que Dieu se rabaissast,
lors que nous disons qu' il
nous donne tout ce qui nous est
necessaire, et nous sert à poinct
nommé tout ce qui est requis
pour la manutention de nostre
estre. Regardez si le soleil s' abaisse
en quelque chose, quand il darde
ses rayons sur nous : nullement,
Dieu qui est tousjours immuable
aussi bien apres la creation du
monde, comme auparavant, s' abaisse
encore moins que le soleil,
lequel se meut, et tantost décend
plus pres de nous de 81 semidiametre
terrestre, tantost s' en esloigne
autant, afin que l' ordre des saisons,
et des generations soit conservé
en son entier.
Mais la difficulté consiste en ce
que Dieu s' accommode à nostre

p396

arbitrage , ce que vostre poëte ne
peut digerer, ou du moins feint ne
pouvoir entendre. Qu' il sçache
donc que Dieu peut s' accommoder
avec chaque chose, comme il
luy plaist ; et non seulement qu' il
le peut, mais qu' il le fait, car c' est
luy qui ayde au feu à brusler, et à
l' eau à refroidir : et comme il nous a
donné une nature libre en ses actions,
et laquelle il a tellement
creée, qu' il a voulu qu' elle peust
élire cecy, ou cela, ou le refuser ;
choisir le feu, ou l' eau, le bien, ou
le mal : il a pareillement voulu cooperer
avec cette nature toutes et
quantesfois qu' elle voudroit agir,
à ce que nous ne peussions dire
que nostre liberté fust liée, et empeschée,
manque du concours divin.
Voila donc en quoy on peut dire

p397

que Dieu a reglé son vouloir selon
nostre liberté, entant qu' il
nous ayde tout autant de fois que
nous voulons agir, et faire quelque
chose ; ce qui n' empesche en
nulle façon qu' il ne nous puisse
dénier ce concours, et cét ayde, car
il nous ayde qu' entant qu' il luy
plaist. De là vient qu' il dissipe souvent
les pernicieux desseins des
meschans, bien qu' il ne vueille
empescher leur mauvaise volonté,
afin que l' homme apperçoive
combien ses pretentions, et ses desirs
sont inutiles, si Dieu ne les fait
reüssir.
Je ne veux pas icy disputer, comment
Dieu nous ayde, mesme és
actions, par lesquelles nous nous
opposons à ces commandemens,
sans neantmoins qu' il soit cause
de nostre peché, tant par ce que

p398

j' ay traitté cela fort au long en respondant
à la 4, 6, 7, et 8 objection
des atheistes, dans la 1 question
sur la genese, que parce que vostre
poëte ne touche pas cette difficulté.
Retenez donc que Dieu ne s' asservit
point à nostre liberté sinon
qu' entant qu' il nous preste son concours,
et ayde toutes nos actions ;
et que le pouvoir que nous avons
est double, l' un est naturel, qui fait
necessairement hommage à Dieu,
comme l' ombre à la lumiere,
comme l' effect à sa cause, et la creature
à son createur : l' autre est libre,
et volontaire, qui ne peut rien
oster à Dieu, ny diminuer, ou ternir
tant soit peu le lustre de son infiny
pouvoir.
Comment est-ce donc, me direz
vous, que par cette liberté

p399

nous nous opposons à Dieu ? C' est
parce que sçachans ce qu' il desire
de nous, nous ne le faisons pas :
c' est par ce que nous mes-usons du
liberal arbitre, qu' il nous a donné
pour le servir librement, et rendre
une hommage volontaire à
son pouvoir, et à sa liberté infinie :
c' est enfin par ce que le peché est
tel, que si la puissance divine pouvoit
estre diminuee, où abolie, ce
seroit par iceluy, car puis que le
meschant ne veut pas faire ce que
Dieu a ordonné, il haït donc cet
ordre, donc il voudroit qu' il ne
fust pas, donc il le destruiroit s' il
pouvoit ; donc le peché est contre
la puissance, et l' ordonnance divine,
et tasche de la destruire, entant
qu' il peut. Poursuivez.

p400

Le Deiste
si on ne peut rien oster, ny soustraire du ressort
de la toute puissance de l' estre infiny, comment
peut-il avoir perdu, et puis racheté ce qui
n' a jamais esté à d' autre qu' à son essence
divine ? 
Le Theol je respond à ceste
question fondee sur l' ignorance,
que la creature a deux rapports à
l' estre infiny, qui est Dieu seul ; le
premier est comme à son createur,
de qui elle depend, et en ceste
façon elle ne luy peut estre soustraite,
ny s' esloigner tant soit peu
de sa toute puissance, car il la peut
reduire au neant, quand il luy voudra
luy denier la conservation de
son estre, qui est comme une perpetuelle
creation : le second rapport
que la creature peut avoir avec
Dieu est entant que fille adoptive

p401

par la grace, que Dieu
nous donne pour nous faire coheritiers
avec son fils en la gloire eternelle,
si bien qu' il est nostre pere,
à l' heritage duquel nous participerons,
si nous nous maintenons en
ce privilege, et si nous cooperons
à ceste grace par nos bonnes oeuvres ;
mais par ce qu' il veut que
nous soyons libres en ceste cooperation,
et que nous venions à cet
heritage librement, et non par necessité,
ou par contrainte, nous
pouvons le refuser, et ne cooperer
pas avec sa grace, et en ceste maniere
il peut nous perdre, puis que
nous ne sommes plus de ses enfans,
lors que nous avons repudié
la grace d' adoption par nostre faute ;
et comme il nous peut redonner
ceste mesme grace, veu qu' il
en est la fontaine, s' il le fait en se

p402

revestant de quelque nature, qui
luy appartienne en proprieté, et
qu' il endure, ou donne quelque
chose à ce que l' homme, qui estoit
décheu de l' esperance du paradis,
rentre dans ce droit, pour
lors il aura racheté ce droit, et aura
mesme racheté l' homme puis que
de captif qu' il estoit par le peché,
et de banny qu' il estoit du paradis,
il l' aura delivré, remis en grace avec
Dieu, et l' aura fait rentrer au
droit, qu' il avoit auparavant à la
gloire eternelle ; or Dieu le pere a
envoyé son fils en ce monde, afin
qu' il executast ce dessein, lequel il
a accomply, si bien qu' il est nostre
sauveur et redempteur.
Quand quelqu' un a offensé le
roy, il luy peut donner sa grace,
mais s' il veut garder les formes de
la justice, il faut qu' il paye sa rançon,

p403

ou qu' il rachete ce criminel
de la mort, qu' il a meritée selon la
rigueur de la justice ; ce qu' il peut
faire ou par argent, ou envoyant
son fils, ou quelque autre, qui patisse
pour le criminel ; Dieu le pere
roy de tout le monde a envoyé
son fils, qui nous a rachetés par son
precieux sang, et par sa mort, que
demandez vous donc davantage ?
Le Deiste
bien que le bigot n' ose pas dire clairement
qu' il est plus charitable envers ses ennemis, que
Dieu n' est envers nous, neantmoins cette
consequence execrable se tire manifestement de ses
opinions. 
Le Theol le chrestien (tres-esloigné
du bigotisme) n' a jamais
pensé à ceste folie, qu' il soit plus
charitable envers qui que ce soit,

p404

que Dieu ne l' est envers nous, car
qui peut jamais avoir esté si charitable
qu' il ait employé une personne
divine pour sauver son ennemy,
et le delivrer de la mort ?
Treuverez vous quelqu' un qui ait
enduré la mort pour son ennemy ?
Pleust à Dieu que vous considerassiez
les benefices, que Dieu a fait
à l' homme, ô que vous seriez esloigné
de ceste impieté diabolique !
Quand vous ne regarderiez que
l' estre, et la conservation que nous
avons de Dieu, seroit-ce pas un
plus grand amour, qu' il nous porteroit,
que ce que nous sçaurions
jamais recevoir d' aucun amy ? Si
un ennemy estoit aussi puissant
que Dieu, il vous auroit bien tost
reduit au neant, mais Dieu tres-bon
conserve tousjours sa creature ;
conservation, à laquelle il n' y a

p405

aucun acte d' amitié, ou de charité
creée, qui soit comparable ; par où
vous jugerez s' il vous plaist de l' ignorance
de vostre poëte.