Ce document est extrait de la base de données textuelles Frantext réalisée 
par l'Institut National de la Langue Française (INaLF)
http://gallica.bnf.fr
Auteur Mersenne, Marin  
Titre  [L']impiété des déistes, athées et libertins de ce temps : 
combattue et renversée de point en point par raisons tirées de la philosophie et de 
la théologie, ensemble la réfutation du "Poème des déistes"... / par F. Marin Mersenne,...  
Publication Num. BNF de l'éd. de Paris : INALF, 1961-.
Reprod. de l'éd. de Paris : P. Bilaine, 1624  
Description  616 Ko  
Collection  Frantext ; Q659, Q662  
Notes  Document numérisé en mode texte.
Texte daté de 1624, d'après Frantext.
P. 1-834 du document original, qui contient 2 parties en 2 vol.  
Sujet(s) Foi -- Ouvrages avant 1800  
Domaine Religions chrétiennes  
Identifiant N089062  

[L']impiété des déistes, athées et libertins de ce temps [Document électronique] : 
combattue et renversée de point en point par raisons tirées de la philosophie et de 
la théologie, ensemble la réfutation du "Poème des déistes"... / par F. Marin Mersenne,...

CHAPITRE 1


p1

dans lequel l' excellence de l' homme est declaree. 
le theologien.
Monsieur, apres vous avoir presenté
le salut que tous les hommes
se doivent desirer les uns
aux autres, je vous diray que du
plus loin que je vous ay apperceu
dans cette route, j' ai hâté le pas pour
vous joindre, et consoler dans la
douceur de vostre compagnie, si
vous l' avez pour agreable, l' ennuy
qu' apporte d' ordinaire avec soy la
fatigue, et la solitude du chemin.
Le Deiste monsieur, pour chemin
je n' en tiens point d' arresté, je
vas errant à l' avanture dans ces forests,
recherchant autant que je puis

p2

les lieux les plus écartez du commerce
des hommes, que je fais
profession de hayr tous comme
monstres en la nature, c' est pourquoy
de salut d' eux je n' en desire
point, non plus que je ne puis avoir
pour agreable qu' ils recherchent
ma compagnie : la malice, et infidelité
de leurs esprits, et la misere de
leurs corps sont les causes de l' ennuy
que vous pouvez lire dans mon
visage, ce me sont des objets insupportables
aussi bien que les miseres
qui les environnent de toutes parts ;
et en effet je me sens beaucoup
plus consolé de la diversité du ramage
de ce petit rossignol que vous
voyez, que de l' entretien du plus
homme de bien d' entr' eux, aussi estimay
je sa condition plus heureuse
mille fois que celle du plus grand
monarque de la terre, je le dis avec
verité, et sans rougir de honte,

p3

et ne scay neantmoins à qui je m' en
dois prendre, ou à la nature marastre,
ou à moymesme.
Le Th si vostre tristesse n' a
point d' autre source que ceste consideration,
j' estime que le chant des
rossignols ne sera pas necessaire
pour vous tirer de ceste melancholie.
S' il vous plaist m' accompagner,
je croy que je vous delivreray
facilement de ce chagrin, car ce que
vous pensez de l' homme est merveilleusement
esloigné de la verité,
veu qu' il n' y a rien de pareil en perfection
dans tout le monde. N' importe,
qu' il y ayt des personnes vitieuses,
cela n' empesche pas que l' esclat
de l' image de Dieu ne reluise
sur le front, et sur l' ame de l' homme,
auquel il est facile de quitter sa
malice, aydé qu' il est de la grace de
son dieu. Voulez vous escouter

p4

un discours, lequel vous fera paroistre
l' excellence de son corps et de
son ame, qu' un grand personnage a
dressé en forme de dialogue, dedans
lequel Aesculape, Vesta, et Uranie
sont introduits, et je m' asseure que
vous louërez, et releverez autant les
hommes, comme vous les avez blasmez,
et ravalez par vostre discours.
Le D vous me ferés un singulier
plaisir, et tiendray ceste journee
pour tres-heureuse, si vous me
tirez de ceste malheureuse tristesse,
qui s' est emparee de mon esprit.
Le Th il faut que vous supposiez
que Vesta avoit blasmé l' homme
en tout ce qu' elle avoit peu en
presence d' Uranie, lors qu' Aesculape
deffendant l' excellence de l' homme
entama son discours en ceste façon.
Aesculape tout ce que vous avez
dit jusques à present, ne me semble

p5

rien en comparaison de mon petit
monde, car il n' y a palais si beau, ny
republique si bien policee, que le
microcosme, auquel l' architecture a
esté observee avec tant de perfection,
qu' à bon droit on peut appeller
le corps humain, le miracle
du grand monde (...), l' edifice
incomparable, et le louvre royal,
où les jambes servent comme
de chariot, les mains de vivandier,
le cerveau de conseiller, le foye, et le
ventricule de cuisinier, le coeur de
moderateur, et solliciteur, la rate,
et les reins d' arriere chambre, les
veines servent à table, et portent la
viande, les arteres mettent le réchaut,
et les nerfs font la sauce ; l' humeur
melancholic donne le maigre, le pituiteux
le gras, le bilieux le chaud,
le sanguin le temperé : le sang est
comme le pain, qui n' ennuye jamais,

p6

la pituite ressemble au fruict doux,
et aqueux, la bile à l' espicerie, et le
suc melancholic avec son aigreur
donne le saupiquet : l' imagination
peint des tableaux, la memoire conte
des histoires, les yeux sont les
chandeliers, et flambeaux, la bouche
est le portail de la maison, la face
le frontispice, les costes sont les
parois, les vertebres sont les maitresses
solives, les autres os sont les
chevrons : le ventricule est la basse
court, les veines sont les fontaines,
les plus grands trous sont les fenestres ;
les veines meseraïques servent
d' alembic pour tirer le plus subtil.
Le ventricule est comme l' argentier,
et despencier, qui reçoit la viande,
la garde, la retient, la hache, et la
couppe, et puis l' ayant preparee
l' envoye en un autre membre du
logis, pour la presenter aux veines

p7

mesaraiques, qui la tirent, la colorent,
et la portent en la maistresse
cuisine, où estant mise sur le feu, elle
est boüillie pour nourrir les parties
molles, comme sont les membranes,
et la graisse ; elle est rostie
pour alimenter les chaudes, comme
le coeur ; elle est fricassee pour les seiches,
comme les os ; et encore qu' elle
paroisse rouge, toutefois il y a du
noir pour la rate, il y a du blanc pour
les cartilages, pour les membranes
et pour les os ; il y a du jaune verdoyant
pour la bourse du fiel ; il y a
du jaune paillé pour la serosité, il y a
du pourpre pour les poulmons.
Le maistre d' hostel est la veine
cave, qui envoye tous ses officiers
pour servir toutes les tables tant dedans
que dehors le logis ; dehors
comme aux extremitez ; dedans au
plus bas estage, ou partie inferieure,

p8

au milieu qui est vital, et au troisiesme
qui est animal. Ainsi tout ce
que le peritoine enveloppe, est ce
que sont les officiers en une grande
maison pour la cuisine, ou pour les
immondicitez. La vessie, les reins,
la ratte, et la bourse du fiel sont comme
les soüillons, et chambrieres qui
nettoyent toute cette partie.
Le moyen estage, où est le coeur,
et où sont les poulmons, ressemble
aux sales, et aux chambres d' un
palais, où le maistre de la maison se
chauffe, comme le coeur, qui est la
fontaine de la chaleur : où il s' exerce
par le mouvement en s' estressissant,
ou en s' estendant, où il prend
la friscade en ouvrant les fenestres,
lors qu' il respire, ou en les fermant
quand il aspire. Il se plaist à la
musique, à laquelle il sert d' organiste,
et les poulmons de soufflets, et

p9

les anneaux de l' artere de clavier.
De là mesme ce seigneur envoye
ses commandemens à tout le corps
par ses serviteurs, qui sont les arteres,
donnant faveur, et appuy à tous
ceux qui en ont besoin.
Le troisiesme, et plus haut estage
est comme le cabinet, et le thresor
d' un Louvre enrichi de toutes
parts de belles morisques, grotesques,
et païsages bigarrez, et tracez
par l' imagination. C' est là qu' est l' espargne,
car comme les anciens ont
dit que l' argent est le nerf de la guerre,
aussi le mouvement du corps est
celuy, qui met les actions en execution :
estant comme l' ame des
offices, et officiers de ceste maison
corporelle : et le sens est comme un
surcroist d' animosité, et de vie
pour toutes les parties de ce corps.
Et tout ainsi que la marmite renverseroit

p10

sans les commoditez du
cabinet, aussi les membres pourriroient
sans ce beau cabinet superieur
faict à cul de lampe basti sur la
colomne du col vouté en parfaicte
rondeur ; où entre autres singularitez
sont les quatre ventricules, comme
quatre grands coffres. Car bien
que les facultez soient unies en leur
essence, qui est l' ame diffuse par
tout le corps, si est ce que l' imagination
est un coffre d' inventions,
la memoire d' especes, l' entendement
de science, la volonté de vertu :
adjoustez y le sens commun
des especes singulieres, et l' appetit des passions.
Vran vrayement vous m' avez
grandement contenté, Aesculape,
avec une si belle description de vostre
microcosme, mais il me semble
que vous le rabaissez un peu

p11

trop de le parangoner à une maison,
veu qu' il merite bien d' estre comparé
a une cité toute entiere.
Aes à cela ne tienne Uranie, que vous
ne soyez parfaitement contente. Je
diray donc que nostre corps est la
vive image d' une republique, et
d' un royaume parfaict, où le roy
est la raison, et la royne l' affection,
qui enfante de beaux enfans, sçavoir
est les vertus, et les bonnes oeuvres ;
son thresor est l' entendement,
son conseil est le jugement, ses bateleurs,
ses sibilots, et harlequins est
la phantasie. Lors qu' il tient ses
estats, le troisiesme est en l' estage
plus bas, et aux extremitez, où il y a
des escrivains, des peintres, des architectes,
des violons, qui sont les dix
doigts de la main tant gauche que
droite ; il y a des postillons, des couriers,
et des baladins, qui sont les

p12

jambes ; les marchans, et vivandiers
sont la bouche, et l' estomac ; les boulangers,
cuisiniers, et autres artisans
plus mechaniques, et plus vils se retrouvent
parmy les estats inferieurs
de nostre corps, qui sont bien plus
admirables que ceux d' une republique,
puisque la pluspart ne reposent
jamais. L' estat de la noblesse
est en la poictrine, car la generosité,
la vaillance, et le courage ont leur
sejour au coeur : aussi dit-on que la
cholere n' est autre chose que le
boüillonnement du sang à l' entour
du coeur, et c' est le coeur qui resiste
ordinairement aux ennemis : d' où
vient que comme la noblesse estant
mise en desroute, le reste des estats
ne semble plus rien ; de mesme le
coeur manquant tout meurt, comme
tesmoignent les syncopes, et les
defaillances.

p13

La noblesse se plaist à la guerre,
et le coeur comme brave guerrier a
tousjours le tambour, qui avec les
deux bastons de sistolé, et diastolé
ne sonne pas seulement la diane, ou
le changement de garde, mais ne
cesse de battre. Le clergé se trouve
au cerveau par la foy qui est en
l' entendement, par la meditation
qui est en la memoire, par l' esperance,
et la charité, qui sont en la
volonté, par lesquelles nous devons
eslever nos esprits, et considerans
les merveilles de ce corps concevoir
aussi qu' elles sont pour le rendre
instrument du service de Dieu : et
tout ainsi que les temples, et les
eglises ne sont basties que pour
la priere, (...), aussi ce temple vivant
est basti pour honorer, et adorer le
tout-puissant.

p14

Vesta je voy bien que vous
avez ravy la belle Uranie par vos discours,
mais je ne croy pas que vous
luy vueilliés donner la palme à mon
prejudice, car je veux que son petit
monde soit semblable au Louvre
d' un grand roy, et à tout un royaume :
mais combien tout mon
grand monde contient-il de palais,
de citez, de republiques, de royaumes,
et d' empires ? Ne vous en souvenez
vous pas, lors que je les ay
racontez ?
Aesculape vous plaist-il me
permettre Uranie, que je parangonne
mon petit monde avec tout le
grand, affin que Vesta n' ait aucun
subject de se plaindre, si je remporte
la victoire ? Uran je ne sçay
à qui cét offre ne plairoit pas Aesculape,
veu que vos discours sont si
agreables, qu' ils seroient capables

p15

de ravir tout le monde.
Aescul apprenez donc Vesta, que
ce monde visible, et l' invisible sont
comme un simulachre de ce corps,
ou si vous voulez, le corps en est la
ressemblance : car tous les elemens,
et tous les corps se retreuvent dans
le microcosme, et comme ils font
le monde inferieur, aussi la partie
basse de ce petit monde les represente
en tout, et par tout. La rate est
ce pas une terre, la bourse du fiel
un feu, la pituite de l' estomach, et
des intestins une eau ; le vague d' entre-deux
un air ? Y a-il arbre plus
branchu, et qui ait plus de parties
que la veine cave, et la veine porte ?
Les animaux n' y repairent-ils pas
en trois especes de vers, qui s' engendrent
aux intestins ? Les pluyes : et les
gresles se forment en l' uretere, les
vents, les tonnerres, et les orages

p16

en la colique, et en diverses ventositez ;
les cometes, et autres apparences
de feu en la peste, bubons, charbons,
et entrax, qui se forment plus
souvent en ses parties inferieures,
que dans les autres ?
Nous trouvons és quatre humeurs
corrompuës des pierreries,
metaux, mineraux, gommes, et sablons
de toutes couleurs, et figures,
et mille extraordinaires dans
les reins, la rate, et ailleurs.
La poictrine est la vraye effigie
du ciel : le ciel se remuë tousjours,
aussi fait la poictrine : il se meut
d' orient en occident, et d' occident
en orient : le mouvement du
coeur va, et revient, et se fait par
contrarieté : le ciel est incorruptible,
le coeur est le dernier du corps, qui
perd la vie : par les rayons du soleil,
et des autres flambeaux celestes,

p17

nous est communiquée l' influence
aetherée, et par les rayons du
coeur, qui sont les esprits vitaux,
l' entretien est envoyé par tous les
membres : les yeux servent de
moyen pour monter au plus haut
estage, et la faculté vitale du coeur
est une preparation à l' animale, et
l' intelligible.
La teste finalement est le symbole
du ciel empiree : là on void
Dieu, icy on croit en luy ; on joüyt
là de la gloire, icy on l' attend, la
grace est commune, la liberté est
en l' un et en l' autre : on prie en
mesme sens icy, comme là, et peut-estre
en mesme langage. Et par
ainsi comme ce grand univers,
que Vesta a tant loué, est le temple
de Dieu, le microcosme est
celuy de l' ame. Dieu est par tout,
mais il monstre principalement

p18

et estale sa gloire dessus les cieux,
l' ame est diffuse par tout le corps
aussi, mais elle exerce ses plus eminentes
actions dedans la teste, si
bien que Vesta n' aura plus aucun
subject de se plaindre, puis que ce
grand monde avec ses trois estages,
l' intelligible, le celeste, et sublunaire,
est le naïf portraict du
corps humain ; car la raison agissant
en la teste, symbolise avec le
monde intelligible, le coeur respond
au ciel, sans lequel nous ne
pouvons vivre, bien que Galien
au chapitre dernier du 7 de sa methode,
rapporte qu' un certain Marulus
a marché le coeur luy ayant
esté arraché ; le ventre represente
le monde elementaire remply de
toute sorte de corruption.
Vesta je vous prie, Uranie, ne
prenez pas garde aux discours

p19

miellez d' Aesculape, ou du moins
ne luy donnez pas tellement vostre
attention, que ne me reserviez
une oreille pour m' entendre.
Je confesse que l' homme a quelque
rapport à tout l' univers, mais
comme il n' est qu' une parcelle de
la terre, tesmoin le nom que luy
donne l' hebrieu, adam, et les latins,
homo, qui ne sonnent que terre,
il s' en faut beaucoup, qu' il arrive
à l' excellence de ce monde
sublunaire, si ce n' est que la partie
soit plus noble que le tout, et
l' effect que sa cause.
Uranie voyez, Aesculape, si vous
pourrez satisfaire à Vesta, car je
ne la veux mescontenter.
Aesculape madame, je suis fort
content de respondre à Vesta, car
j' espere, qu' elle me cedera tout
aussi tost. Il est vray que l' homme

p20

s' appelle Homo, et Adam, et qu' il a
esté formé de poussiere, ou du limon,
ainsi que nous asseure le
sainct texte de la Genese, mais cela
n' empesche, que les autres noms,
qu' on luy a imposez, ne luy conviennent,
tels que sont vir , parce
que c' est son devoir de suivre la
vertu, et de se conformer par toutes
sortes de bonnes moeurs à celuy
qui luy a gravé son image au
profond de l' ame ; ou (...), qui
monstre le rapport qu' il a aux
choses superieures. Je ne veux
maintenant rapporter les autres
noms, qu' on lui donne, et qui font
à sa loüange, car je l' ay desja fait
ailleurs. Mais j' espere satisfaire à
Vesta, si je luy prouve que l' homme
n' est pas seulement semblable
au monde elementaire, qu' elle
louë tant, et qu' elle luy prefere en

p21

tout, et par tout, mais qu' il en est
comme le roy, s' en servant en
tout ce qu' il luy plaist.
CHAPITRE 2

comme l' homme fait tout, se sert de
tout, et commande à tout
le monde. 
c' est vrayement un
grand miracle que le
monde, mais l' homme
me semble d' autant
plus merveilleux, qu' il est plus petit,
et neantmoins il a tant de subtilité,
que par la magie naturelle il
peut representer en un corps diaphane,
et ce fort distinctement,
tout ce qui paroist dedans l' horizon.
Il peut comme un Vulcain,
et un Promethee tirer le feu d' où

p22

il luy plaira, contrefaire le tonnerre
comme Salmonée, former l' arc
en ciel par le jaillissement d' une
fontaine : s' il est operateur il tirera
l' eau, la terre, le sel, le souffre et le
verre de toutes choses. Par la perspective
il representera mille phantosmes,
de façon que l' ignorant
pensera que ce soient des hommes
qui marchent. Il n' y a plante, ny
corps aucun qu' il n' effigie par la
peinture, qu' il ne burine par la
graveure, qu' il ne releve en bosse
par la sculpture. Qu' est-ce que ne
fait pas l' homme ? Puis qu' il engendre
des poulains, comme une femme
à Veronne l' an 1254 un demy oyseau
à Ravenne 1512 un demy veau au
village Stethel De Saxe, un enfant
à teste de grenoüille à Boileroy
1517 un demy chien l' an 1493 et un
vray chien, excepté la teste, à Anvers

p23

1571. Mais parce que cela n' est
pas selon l' art, ny suivant la nature,
je di qu' il contrefait les metaux, et
les pierreries par l' alchimie, de façon
que les plus habiles lapidaires,
ny les orfevres ne peuvent le
recognoistre.
Il fait bien davantage, lors qu' il
applanit les montagnes, releve les
valees, abysme les campagnes, perce
tout avec les mains ; des pieds il
marche dessus, et dessous les enfers,
et ses yeux passent les estoiles.
Que si châque animal a son aliment
particulier, et que les uns mangent
la terre, comme les taupes, les autres
soient carnaciers, comme les
lyons : les autres se servent de vegetables,
comme les boeufs : d' autres
vivent de l' air, comme on dit du chameleon,
et d' autres vivent de l' eau,
comme les poissons : l' homme se

p24

sert de tous les corps simples, et
meslangez, car il y en a peu, ou
point, qui ne couvrent sa table.
Nous voyons que châque chose
a son terroir, et sejour particulier,
(...).
L' espicerie vient des Moluques, la
pierrerie des autres Indes Orientales,
l' or du Peru, la rheubarbe de
Tartarie, le rapontique de Moscovie,
les elephans d' Afrique, et des
Indes, l' encens de l' Arabie, les perles
d' Ormus, la terre sigilee de
Lemnos, les lyons de Fez, les marthres
zibelines de Russie, l' alce de
Scandie, l' estain de glace d' Angleterre,
le gaiac des Terres Neufves ;
le saule croist és lieux aquatiques,
le pin és montagnes. Des terres, les
unes sont argilleuses, les autres
crayeuses, ou sablonneuses, les unes

p25

bonnes pour le froment, d' autres
pour l' orge : les bons chevaux ne
se treuvent pas par tout, les asnes
ne vivent pas au septentrion, non
plus que les orangers ; et au midy
la cire, et le miel ne sont pas en telle
abondance, non plus que le
beure, et le vin, comme ils sont au
septentrion.
Mais l' homme ayant commandement
sur tout l' univers demeure
par tout, et tire l' usage de toutes
choses. De là vient qu' il y a des habitans
és plus hautes montagnes :
dessus la mer glaciale 800 lieuës
de long il y a d' aussi beaux logis
qu' à Paris ; il y en a qui habitent
dans des trous, et des cavernes, au
milieu des marets, des estangs, et
des lacs : car la ville de Quinzai, où
il y a 1260 ponts, est bastie sur pilotis.
N' est-ce pas habiter dans le feu

p26

que de demeurer dans la Guinee
toute rostie du soleil ? N' est-ce pas
estre aux fauxbourgs des enfers,
que de vivre avec les gastadours,
pionniers, et tireurs de minieres
cent brasses sous terre ?
Que diray-je de l' air, et des
nuës, que penetrent souvent les
tours, et les autres bastimens ; et les
margajats dorment en l' air dans
un filet pendillant à deux petites
cordelettes. Voila comme tous
lieux s' accommodent à l' homme,
et l' homme s' accommode à tout.
Et ne croyez pas, Vesta, que l' homme
ne surmonte l' univers que par
ses actions, et par ses facultez, et que
tout le monde ne soit fait que pour
lui preparer sa demeure, car toutes
les pieces de ce grand monde contribuent
à sa formation, comme
à une belle Pandore. Voyez vous
pas que Dieu luy imprime son

p27

image, que les anges sont voüez
à son service, et que le ciel distile
sur luy les rays de sa lumiere, le benefice
de son cours, et la douceur
de son influence ? Le feu l' eschauffe,
l' air l' humecte, l' eau le rafreschit,
la terre le porte, les animaux
le servent, les plantes l' alimentent,
le reste luy apporte mille sortes
de contentement, et ce non
par contrainte, et contre nature,
mais par sympathie, et reverence,
s' accordant aux inanimes par l' estre,
aux vegetables par la nourriture,
aux animaux par le sentiment,
à la terre par la secheresse, et dureté,
à l' eau par la mollesse, à l' air par
l' humidité, au feu par la legereté,
au ciel par l' incorruption, aux anges
par l' intelligence, à Dieu par
domination, ainsi que tesmoigne
le psalmiste, (...).

p28

Voulez vous que j' adjouste
quelque chose au riche equipage
de ce microcosme ? Lequel non
seulement se trouve bien par
tout, tire contribution de tout, et
symbolise à toutes choses, mais il
n' y a rien qui ne se retrouve dedans
l' homme ; car Dieu y est en presence,
entant qu' il est par tout.
Dieu est en l' homme par grace,
puisque, (...). Les anges
luy assistent tousjours comme fidelles
gardiens, les demons par
tentation, ou punition le saisissent
par fois : les cieux y sont par qualité
(puisque, tesmoing Fernel, il y a
une chaleur celeste dedans nous)
et par representation les estoiles
sont dedans les yeux : le ciel, et
toutes les choses naturelles sont

p29

au sens par especes, en l' imagination
par pensee, en la memoire
par souvenance, en l' entendement
par science.
Le feu est és arteres, l' eau pure
est en la pituite espanduë par le
corps, l' eau salee, et mixte est en la
vessie, l' eau marescageuse, et verdastre
est en la bource du fiel : la
terre est en la rate, les rochers sont
és os, les pierres menuës és mains,
les mineraux, et metaux se procreent
en diverses parties massives
du corps, comme dans la rate :
l' air est aux poulmons, les meteores
sont aux intestins, l' or mesme s' est
trouvé en un enfant d' Alemagne,
qui en avoit une dent entiere. Et
bien, Vesta, que voulez vous davantage,
puisque jusques icy je
vous ay monstré que l' homme fait
tout, que l' homme est par tout,

p30

qu' il peut tout, que tout est en
l' homme en quelque façon que vous
le puissiez considerer, et qu' il est
toutes choses tant en bien qu' en mal,
selon le party qu' il veut eslire ?
Le D veritablement ce discours
m' a grandement pleü, et ne
pense pas que si on consideroit les
perfections de l' homme comme il
faut, qu' on n' advoüast incontinent
qu' il est impossible que Dieu
ne soit, lequel a basty ce microcosme,
afin que tous les humains s' eslevassent
à son amour, et à la contemplation
de ses merveilles. Et neantmoins
je me retreuve souvent
parmy des compagnies si malheureuses
que les paroles, et actions
d' un tas de jeunes badins font assez
paroistre qu' ils ne croyent aucune
divinité. C' est pourquoy je
desirerois fort qu' il vous pleust

p31

m' enseigner quelques bonnes raisons,
par lesquelles je leur peusse
preuver clairement qu' il est necessaire
d' advoüer une divinité :
car ils font, pensent, et disent tout
ce qu' ils peuvent lors qu' ils sont
parmy leurs confidens, afin d' estouffer
les semences de la vertu,
et le sentiment qu' ils devroient
avoir de la religion, et de leur
createur. J' estimerai ceste journee
tres-heureusement employée, si
vous m' armez puissamment contre
ces tisons d' enfer : neantmoins
avant que d' entrer en ceste lice,
je desirerois fort qu' il vous pleust
me declarer ce que c' est que vivre
moralement, et quelle difference
il y peut avoir entre une action
bonne, moralement parlant, et
parlant naturellement, ou physiquement
comme on dit aux escoles.
CHAPITRE 3


p32

en quoy consiste ce qu' on appelle vivre
moralement, et quelle difference il y
a entre une action morale, et naturelle. 
le theologien.
Il n' y a quasi rien si
commun dedans la
bouche des hommes
sçavans, que ceste distinction,
lors qu' on
demande si quelque chose se peut
faire, ou si telle, ou telle chose est
bonne, ou mauvaise, l' un disant
qu' elle est bonne physiquement,
ou naturellement, et l' autre asseurant
qu' elle est mauvaise parlant
moralement, comme si l' estre naturel
estoit tout autre chose que

p33

l' estre moral. Pour bien entendre
cecy, il faut supposer qu' il y a de
bonnes, et de mauvaises actions, ce
qui est si clair, et si evident, qu' il n' est
besoin de recourir à l' escriture
saincte pour le prouver, lors qu' elle
deteste le fratricide de Cain, l' adultere
de David, et mille autres
mauvaises actions, que Dieu a griévement
puny, et punira eternellement,
ainsi que ceste sentence de
S Math 25. (...),
fulminee par la bouche
de Jesus-Christ, nous tesmoigne :
il n' est (dis-je) besoin de prouver la
bonté, ou malice des actions, que
fait l' homme, par l' escriture saincte,
veu que les payens, et toutes
sortes de nations en tous siecles, et
en tous lieux, ont recognu ceste
verité, et l' ont tesmoignee par escrit,
par paroles, et par les supplices,

p34

dont ils ont chastié les meschans ;
meilleurs, et mieux sensez
en cela, (comme en beaucoup
d' autres choses) que Calvin, Kemnitius,
Luther, et leurs disciples,
lesquels ont escrit, que l' homme,
bien qu' il fust juste, ne faisoit aucune
chose, qui ne fust peché mortel,
encore que cela ne luy fust impieté,
à cause de la pieté de Christ,
qui leur estoit imputee par la foy.
Ce qu' ils asseuroient à cause de
plusieurs passages mal entendus
par eux, tirez de l' escriture saincte,
lesquels condamnent, ou semblent
condamner tout le monde,
tels que sont ceux-cy en la Gen 6
et 8 que toute la pensee des hommes
n' estoit attentive qu' au mal ;
qu' il n' y a personne qui fasse ce
qui est du bien, Psal 13 qu' il n' y a
point d' homme sur la terre, qui

p35

soit juste, et fasse bien, et qui n' offense
point, dans l' ecclesiastique
7 qu' un mauvais arbre ne sçauroit
faire de bons fruicts, en S Math 7
et que tout homme à raison de la
concupiscence, laquelle entretient,
et allume le peché, qu' on appelle
(...), est un mauvais
arbre, qui est captif, de façon
qu' il ne fait le bien, qu' il veut,
mais le mal, qu' il hayt, comme S
Paul enseigne dedans son epistre
aux romains C 7. Ce sont ces passages,
et quelques autres semblables,
qui les ont fait chopper, car
estans bien entendus, ils ne disent
rien contre nostre supposition,
sçavoir est qu' il y a de bonnes actions,
veu que cela est tesmoigné
en un million de passages par l' escriture
saincte, comme lors qu' il
est dit que toute la terre estoit

p36

remplie d' iniquité, et que tous les
hommes ne visoient qu' à faire
mal au 6 et 8 de la genese. Noë est
appellé juste, et homme de bien,
Abraham, et quantité d' autres
personnes sont loüez pour leurs
bonnes actions : d' où vient qu' il
faut expliquer ces lieux, qui semblent
condamner tout le monde,
de la plus grande partie des hommes,
car elle se sert d' une maniere
de parler universelle, et generale,
lors qu' elle veut comprendre une
grande multitude.
Ces lieux se peuvent aussi entendre
en ceste façon, que personne
n' est juste, de ceste grande justice
essentielle, que Dieu a en soy,
avec qui nous ne pouvons estre
comparez : ou qu' il n' y a personne,
qui n' offense quelque fois, du
moins veniellement : si ce n' est

p37

que Dieu le preserve particulierement :
car pour les pechez enormes,
qu' on appelle mortels, il est
certain que les gens de bien n' en
font point ; n' importe que le (...)
nous captive, car ces premiers
mouvemens, desquels Saint
Paul se plaint, et s' ennuye, ne sont
pas pechez à proprement parler,
mais seulement une matiere de
peché, à laquelle nous pouvons, et
devons resister, jusques à ce que
nous ayons donté tous leurs
mouvemens, et qu' ils soient parfaitement
sujets à la raison, ce qui
s' accomplira dans tous ceux qui
seront bien heureux. Ce qui suffit
maintenant pour conclurre la verité
de nostre supposition, sçavoir
est qu' il y a de bonnes, et de mauvaises
actions, comme il appert
par la loüange, ou le blasme, le

p38

pris, ou le mespris qu' on en fait, et
par la recompense, ou par le supplice
qu' on ordonne pour les punir,
ou pour les recompenser. Certainement
puisque nous pouvons
faire de mauvaises actions à raison
de la desobeissance d' Adam, et de
nostre mauvaise volonté, il est
bien raisonnable que nous en
puissions faire de bonnes à cause
de l' obeissance de nostre sauveur,
et redempteur, duquel le merite
est beaucoup plus puissant, que le
demerite d' Adam, et que les pechez
de tous les hommes ne sont
impuissants ; et mal-faisans : nous
pouvons donc faire de bonnes
actions, puisque la grace de Dieu
est une semence assez excellente pour
les faire germer, et croistre dans
nostre volonté. Mais laissant cecy
à part, il faut voir en quoy consiste

p39

ceste bonté morale, qu' on attribuë
à nos actions, ce qui conviendra
aussi à la malice, ou mauvaitié
morale : car l' estre moral est commun
à l' une, et à l' autre ; et par ainsi
nous verrons s' il est necessaire de
recourir à une fin derniere, pour
trouver ceste moralité, et si la
science des morales peut estre establie
à la façon de la physique,
ou des mathematiques par des
raisons à priori , et par des causes
efficientes, sans en prendre le principe
de la derniere fin, comme a
fait l' Aristote, et tous ceux qui
l' ont suivy jusques à present. Ce
que je feray, Dieu aydant, en telle
façon, que tous les philothees, et
theotimes en pourront retirer
du plaisir, et du profit spirituel, auquel
butte ce traicté, et toutes mes
pensees : car puis qu' il n' y a rien de

p40

plus excellent dedans l' homme
que l' esprit, il faut tascher de le
perfectionner, puis qu' en cela
consiste nostre felicité.
L' action morale, ou la moralité
de l' action, selon l' opinion de
quelques uns, n' est autre chose,
que quand nous agissons avec une
parfaite cognoissance, soit que nostre
action soit libre, soit qu' elle
soit necessaire, d' autant que cette
cognoissance de la raison fait que
nos actions sont humaines, et differentes
de celles des bestes, lesquelles
n' agissent point en cognoissant
la fin, et la proportion
des moyens avec icelle : mais ceste
opinion n' est approuvee des theologiens,
lesquels maintiennent,
que les actions, par lesquelles les
bien-heureux voyent, et ayment
Dieu, ne sont pas morales, bien

p41

qu' elles soient avec une pleine, et
claire cognoissance, et qu' elles
soient humaines, d' autant qu' elles
sont hors de l' estat, dans lequel on
merite ; et en disent autant de l' amour
naturel, que les anges portent
à Dieu : et puis Dieu peut faire
que la volonté d' un homme agisse
necessairement, bien que l' entendement
l' esclaire avec indifference :
car la volonté ne suit pas
tousjours la façon que tient l' intellect
en sa proposition, d' où
vient que quand il propose deux
moyens, ou deux biens, l' un plus
grand, et l' autre moindre, nous
pouvons choisir le moindre ; et
puisque la liberté ne consiste pas
en l' indifference de la raison, mais
en celle de la volonté, la premiere
indifference demeurant en son
entier, Dieu peut faire que la seconde

p42

ne demeure pas, afin que la
volonté agisse necessairement, car
sa liberté est finie, Dieu est infiny,
et par consequent il peut empescher
et surmonter ceste liberté.
Ces raisons ont fait que la pluspart,
outre ceste plenitude de cognoissance
raisonnable, desirent
que nos actions soient libres pour
estre morales, de sorte que ce ne
soit autre chose d' estre moral, que
d' estre libre, et la moralité rien
autre chose que la liberté, qui est
dedans l' action ; ce qu' ils prouvent
parce que nos actions sont reputees
loüables, ou vicieuses, entant
qu' elles sont libres, c' est pourquoy
on n' impute point ny à vice,
ny à vertu, ce que fait une beste, ou
un fol, d' autant qu' ils n' ont pas un
pouvoir libre sur leurs actions.
Neantmoins il y a de scavans personnages

p43

qui ne veulent recevoir
cette opinion, parce que (disent-ils)
l' action peut estre changee
quant à ce qui est de sa moralité,
bien qu' elle demeure libre, et
qu' elle soit en la parfaite puissance
de la volonté, comme auparavant,
ce qui ne se pourroit faire, si l' action
morale n' estoit autre que la libre,
ou que la moralité ne fust rien
que la liberté : car cependant que
la raison formelle de la moralité
demeure saine, et entiere, son effet,
qui est de rendre l' action, morale,
doit necessairement demeurer :
aussi bien que les autres effets
demeurent, quand leur cause formelle
demeure. Or que cet effect
ne demeure pas, ils le preuvent
par l' acte de creance qu' a peu avoir
un juif devant le point de la
nativité de Jesus Christ vray messie,

p44

je croy au futur messie, lequel acte
a peu estre continué jusques
apres la nativité de nostre Seigneur,
quant à ce qui est de son
estre physique, et de son estre libre,
et humain, de sorte qu' auparavant
la nativité il estoit libre de
la mesme liberté, qu' il est apres
icelle, veu que c' est par la mesme
puissance de l' entendement, et
commandement de la volonté
qu' il le continuë, et neantmoins
il change d' espece en ce qui appartient
à la moralité, car avant
la nativité, c' estoit un acte de foy
bon, et loüable, qui meritoit
recompense, lequel apres une
suffisante cognoissance de la venuë
de Jesus-Christ vray messie,
est un acte d' infidelité, mauvais,
vituperable, et qui merite
un juste chastiment : et par ainsi

p45

le mesme acte quant à la liberté,
est differend en espece quant à la
moralité, puis qu' il a divers motifs,
diverses fins, et intentions.
Ce qui est encor evident en
une action, qu' on fait pour divers
motifs, comme lors que quelqu' un
donne l' aumosne par misericorde
pour subvenir au pauvre,
par charité pour plaire à Dieu, et
par penitence pour satisfaire à ses
pechez, cet acte n' a qu' une liberté,
et neantmoins il a plusieurs
moralitez. Et puis la liberté est
une proprieté naturelle de l' homme,
à qui cette façon d' agir n' appartient
pas moins naturellement
qu' au feu d' eschauffer, et au
soleil d' esclairer, partant si l' estre
moral, et l' estre naturel sont distincts,
il faut confesser que la liberté
n' est pas ce qui fait que l' action

p46

soit morale (or la façon d' agir
avec liberté convient à l' homme
entant qu' il a son estre naturel
d' homme) : car c' est ainsi, que chasque
estre naturel, et chasque espece
a sa façon propre d' agir differente
d' avec la façon d' agir de
toutes les autres especes. Et bien
que la cognoissance de l' entendement
avec son indifference, et celle
de la volonté ne soient precisément
la moralité, ou pour mieux
dire, ne constituent pas nos actions
en leur estre moral, neantmoins
elles y sont necessaires, comme
matiere et fondement sans lequel
elles ne pourroient estre morales,
non plus que libres, si la cognoissance
n' y estoit, et que l' entendement
n' y fust conjoinct comme
vraye racine, et fondement de la liberté.

p47

D' autres ont pensé que l' estre
moral, à cause duquel nous appellons
nos actions morales, estoit
une soubmission, ou subordination,
qu' à la volonté à l' entendement,
entant qu' il luy propose ce
qu' il faut faire, ou obmettre, et
qu' il luy sert de regle pour s' exercer
en ses actions, de sorte qu' ils
appellent ceste action, laquelle est
conforme à ceste proposition, et
regle de l' entendement, morale ; je
dis regle, parce qu' il faut que l' entendement
soit comme regle,
comme precepteur, ou dictateur,
et qu' il soit une loy, à laquelle la
volonté se conforme ; autrement si
nous considerons la seule cognoissance
de la raison, entant qu' elle
est necessaire pour vouloir, elle ne
sera cause de l' action entant que
morale, mais seulement entant

p48

qu' humaine, et volontaire, ce qui
demeure en l' estre naturel, à qui
appartient la proposition, et irradiation
de la raison sur la volonté,
et sur la liberté d' agir. Il faut donc
que ce respect de la volonté vers
l' entendement, entant qu' il commande,
et sert de loy, et de regle,
intervienne à ce qu' une action
soit morale, autrement il sera impossible
qu' il y ait aucun acte moral :
car si vous ostez toute sorte de
regle, de precepte, et de loy, il n' y
aura plus ny bien, ny mal : n' y ayant
plus ny bien, ny mal, il n' y aura
plus d' estre moral, puisque l' action
morale se divise en actions
bonnes, et mauvaises : et neantmoins
la liberté demeurera à
l' homme, car l' entendement esclairera
encores la volonté avec indifference,
mais il ne commandera

p49

plus rien, ou ne servira plus de
regle, à ce que la volonté fasse ce
qui est expedient : si bien que la moralité
sera prise du respect que nos
actions ont avec la regle de la volonté,
laquelle regle est à nostre
égard le dictamen de la raison :
mais en Dieu, c' est sa volonté mesme,
car il n' a autre regle, autre loy,
ou obligation que soy mesme, si
bien que la moralité des actions
libres de Dieu, telles que sont sa
misericorde, sa charité, et son amour
envers nous, n' est prise d' aucune
loy, que donne l' intellect divin à
la volonté, mais de la volonté divine,
laquelle est seule inpeccable
par nature, d' autant que toute seule
elle est sa regle, et le principe
formel de ses actions morales.
Ce qui n' empesche pas que la
mesme formalité de l' action morale

p50

ne convienne aux actions divines,
veu que ce n' est que par accident,
que l' entendement est la
regle de la volonté : car si l' homme
estoit infini, comme Dieu, il n' auroit
rien que sa volonté pour regle :
c' est pourquoi ceci ne doit pas
estre cause que nous changions de
raisons, ou d' opinion, non plus qu' il
n' en faut point changer, lors qu' il
est question de parler des sacremens,
desquels bien que le materiel
fust changé (comme quelques
uns pensent qu' il est maintenant
changé au sacrement de l' ordre)
le formel, sçavoir est la signification
pratique, demeureroit en son entier,
quoi qu' elle fut transportee à
ce signe, et à cette matiere, ou à une
autre : de mesme pourveu que les
actions libres soient faites avec ce
regard, que nous avons dit, à leur

p51

regle, elles seront morales, soit
que l' entendement, ou la volonté,
ou quelqu' autre puissance que
ce soit, serve de regle. D' où nous
pouvons conclurre, que la loüange,
ou le blasme (voire mesme la
racine de ses proprietez, qui est la
dignité, pour laquelle on fait prix,
ou on tient à mespris une action,
qu' ils nomment, imputabilité ) ne
sont pas ce qui fait qu' une action
soit morale, mais ce sont seulement
proprietez, qui suivent l' estre
moral, comme l' ombre le corps.
Il faut encore remarquer, pour
bien entendre cette moralité, que
la volonté humaine peut regarder
le dictamen de la raison comme
sa loy, et sa regle en deux façons :
premierement entant que cette
regle precede, et est comme l' acte
premier, lors que la volonté n' agit

p52

pas encore, mais qu' elle regarde,
ou apperçoit à sa façon le precepte
de la raison ; et ce precepte
de l' entendement determine moralement
la volonté, bien qu' elle
puisse n' agir pas, ou faire le contraire
de ce que l' entendement
luy prescrit comme le plus expedient.
Ce qui se peut expliquer par
l' exemple d' un artisan, lequel est
determiné par les regles de son
art, ou par l' exemplaire, et l' idee
qu' il se propose avant que d' agir :
pour la cause naturelle, laquelle
opere sans liberté, elle est determinee
à son action par une inclination
naturelle : mais la volonté
n' est determinee que par ce dictamen
de raison, avant que d' agir.
Secondement le regard de la volonté
qu' elle a vers la raison, comme
vers son legislateur, peut estre

p53

consideré comme un acte second,
ce qui se fait lors qu' elle agit selon
qui luy a esté prescrit par l' entendement :
or la moralité de l' action
depend, et s' establit par le premier
regard, car avant qu' elle vueille,
ou ne vueille pas, elle est subjéte à
ceste loy de la raison, qui luy commande,
et luy enseigne comme il
faut qu' elle se comporte : c' est
pourquoy à cet instant qu' elle n' opere
pas encore, et qu' elle est indifferente
à vouloir, ou ne vouloir
pas, elle est cause de l' action libre,
entant que ceste action est morale,
laquelle elle rend par apres
bonne, ou mauvaise selon qu' elle
agit, comme nous dirons cy apres.
CHAPITRE 4


p54

où il est declaré ce que c' est que de la moralité,
et de la bonté morale,
qui se retreuve en nos actions. 
bien que nous ayons
dit cy devant que l' estre
moral estoit le respect
qu' avoit la volonté
à sa regle, ou au commandement
de la raison, neantmoins
nous n' avons pas encore veu si cet
estre est reel, où s' il n' est qu' imaginaire,
c' est à dire, s' il n' a autre estre
que ce pendant que nous y pensons
actuellement, ou si c' est quelque
chose de vray, et de reel, avant
l' operation de l' entendement, et si
ceste realité est interieure, ou
seulement exterieure à l' action.
Quant à ce qui est de la realité, il

p55

est certain que la moralité est reelle,
puis qu' une bonne action n' est
pas moins distincte d' une meschante
avant que nous y pensions,
que la volonté d' avec l' entendement,
veu que tous deux sont de
differentes especes. Mais il y en a
beaucoup, qui croyent que ceste
realité n' est autre chose qu' un
nom, ou denomination exterieure,
qu' on donne à l' action, laquelle
ne reçoit en soy aucune mutation ;
ce qu' ils confirment par l' exemple
d' un juif, qui croioit devant
l' advenuë de nostre Seigneur
que le messie n' estoit pas arrivé, et
demeura en ceste mesme creance
apres la nativité, acte qui n' est
changé interieurement, bien qu' il
soit bon, et mauvais, mais seulement
à cause de la circonstance du
temps, laquelle luy est exterieure.

p56

Le mesme se peut dire d' un qui par
un mesme acte voudroit manger
de la viande à un jour qui n' est defendu,
et au jour suivant defendu,
et de mille autres actes pareils.
Neantmoins il semble plus veritable,
que ceste realité morale
est interieure à l' action, non pas
entant qu' elle est simple action,
mais entant qu' elle est morale, de
façon que ceste moralité, aussi
bien que la liberté, est une entité
morale, qui adjouste quelque chose
d' interieur à ceste action : ce que
je monstre briefvement, afin de venir
à ce qui est de la bonté morale.
Lors que plusieurs choses sont
appellees telles, ou telles, par une
denomination exterieure à cause
d' une autre, cet autre icy doit avoir
en soy la raison formelle,
pour laquelle les susdites ont ce

p57

mesme nom, comme lors que la
medecine, et la pourmenade sont
appellees saines, à cause qu' elles
apportent la santé au corps, ceste
santé, qui n' est dedans la medecine,
doit estre au corps, ou pouvoir
y estre. Or nous avons plusieurs
choses, qui s' appellent morales, à
cause de l' acte produit par la volonté,
et reglé par la raison, telles
que sont les actions commandees
des autres facultez, comme les operations
de l' entendement, de l' imagination,
et de la puissance motive,
dont il doit y avoir une raison
interieure, ou une forme de
ceste moralité dedans sa volonté,
par les circonstances des actions,
et tout ce que nous faisons pour la
vertu, et en consequence de cet
acte moral de la volonté, soit appellé
moral.

p58

Ce que je confirme, parce qu' il
est impossible que ceste action
morale, entant que morale, procede
d' un autre principe que de la
volonté, de laquelle s' il ne dependoit
point, il ne seroit moral ; comme
si Dieu le produisoit par soy-mesme,
il n' auroit plus ceste dependance
de la volonté, necessaire
à ce qu' il soit moral ; ce qui fait
paroistre qu' une nouvelle raison
de vie, ou vitalité, (pour parler avec
la philosophie) est adjoustee par la
moralité, aussi bien que par la liberté.
De plus, l' acte vital elicite,
que produit la volonté avec indifference,
et par commandement
de la raison, est dit libre, et
moral plus proprement, que n' est
pas l' effet que Dieu produit hors
de soy, comme quand il cree une
ame dedans le corps organizé : car

p59

ceste moralité doit estre interieure
à l' action de nostre volonté,
mais l' oeuvre exterieur que Dieu
fait est appellé libre par une denomination
reelle, qui ne luy est
qu' exterieure. Il s' ensuit donc que
la moralité est une nouvelle entité ,
ou modalité , laquelle est receuë dans
l' action de la volonté, et par laquelle
elle se porte d' une autre façon
vers son object, que si l' action
estoit seulement libre, et
non morale. Ce qui fait qu' il n' y
a point d' autre cause pourquoy
une action est morale, que la volonté,
entant qu' elle produit un
acte libre soumis au dictamen
de la raison ; et le mesme acte, entant
que libre, n' est produit que
par la mesme volonté, entant
qu' elle peut agir, ou ne pas agir, si
bien qu' en agissant, et quant

p60

faisant une reflexion expresse,
ou virtuelle sur cette indifference,
elle produit ceste liberté,
laquelle enrichit ceste action d' une
nouvelle raison, et comme d' une
nouvelle modification : c' est ainsi
que les tapisseries enrichissent les
murailles d' une chambre, excepté
que le premier tapi est exterieur
au second, aussi bien que la muraille :
mais la liberté, et la moralité
sont interieures à l' action volontaire.
De là vient que la volonté,
entant qu' elle est principe de la
moralité, depend de la conduite,
et de la regle de la raison, à laquelle
elle a une habitude essentielle,
ce que n' a pas le drap, ou la ligne,
à l' aune, ou à la regle, par laquelle
elle est mesurée, car la ligne ne depend
pas de la regle, comme la volonté,
entant que principe de l' estre

p61

moral, depend de ce rapport à la
regle de la raison : c' est pourquoy
la ligne peut estre sans la regle,
mais l' action morale ne peut estre,
que l' entendement ne juge,
et commande ou du moins n' addresse
auparavant la volonté.
D' où je concluds que vivre moralement
est vivre en se soubmettant
au dictamen de la raison ; et
que l' estre moral n' est rien autre
chose que ce respect vital qu' a la
volonté au commandement de
l' intellect, lors qu' elle veut agir,
de façon que tout ce qui concerne
ceste volonté agissante en ceste
façon, est appellé moral à cause de
la moralité, qui se retrouve formellement
dedans l' action de la
volonté reglee au niveau de la
raison.
Reste maintenant à monstrer

p62

d' où vient qu' une action est dite
bonne, ou mauvaise, moralement
parlant, et que c' est qui la rend
bonne de ceste bonté morale, à
cause de laquelle nos actions sont
loüables, et dignes de recompense.
Nous parlons icy des actions
produites par la seule volonté, car
les actions des autres facultez, non
plus que leurs objects, et habitudes,
n' ont aucune liberté, que celle
qu' ils empruntent des actions morales
de la volonté. Or il est aisé
à conclure de ce que nous avons
dit cy dessus, que la bonté morale
n' est pas seulement une chose
conceuë, et attribuee à l' action
de la volonté, telle qu' est l' action
de l' oeil, qu' on attribuë à ce qu' on
a veu, et à cause de laquelle nous
disons qu' une maison a esté veuë,
ce qui n' apporte rien de nouveau

p63

à la maison, mais ceste bonté est
interieure, et reelle à l' action morallement
bonne, comme la proprieté
de rire, et de pleurer est
interieure à l' homme. Et bien que
Dieu soit reellement createur, encore
que cela ne soit qu' une denomination
exterieure, laquelle vient,
et procede d' une habitude de raison,
qu' a Dieu à la creature, neantmoins
ceste realité est fondee sur
la puissance de Dieu, qui luy est essentielle.
Il n' y a donc nul doute
que la bonté convient reellement
à nos actions, avant que l' entendement
pense à ceste bonté, c' est
pourquoy il y a diverses especes
reelles de bonté morale, comme
nous verrons tantost.
La bonté morale prise formellement,
et à proprement parler,
n' est pas dans la loy, ou dans la droite

p64

raison, ny tiree d' icelles, puis qu' elle
n' y est pas ; car puis qu' elle est interieure
à l' action, la loi, ny la raison
ne peuvent estre ceste bonté, veu
que toute sorte de loy est exterieure
à l' action. Que si ceste bonté
pouvoit estre quelque chose hors
de l' action morale, un homme
pourroit estre bon, et mauvais sans
aucun changement, à la façon d' une
colomne, laquelle sans se changer
est tantost à droict, et tantost à gauche.
Or bien qu' il soit necessaire
que l' objét, la fin, et les circonstances
soient conjointes à l' action selon
que requiert le dictamen de la
raison, neantmoins la bonté moralle
ne consiste point en tout
cela, non plus que l' art ne consiste
pas formellement en tous
les artifices qu' on faict par iceluy,
car tout cela est exterieur

p65

à l' action produite par la volonté,
à laquelle seule convient la bonté
morale, de laquelle nous parlons.
La raison n' a garde d' advoüer
qu' une action soit bonne, si elle
n' a tout ce qu' elle juge estre de sa
perfection, non plus que l' artiste
n' approuvera jamais un ouvrage,
si tout ce que requert son art, n' y
est observé ; or la raison confessera
ingenuëment, que l' objet, la
fin, et les circonstances ne sont pas
cette bonté morale, laquelle doit
estre aussi intime, essentielle, et
reelle à la bonne action, comme la
moralité est essentielle à l' action
morale, puisque la bonté morale
est une difference, qui restraint les
limites de cette moralité, comme
le genre moral a une certaine espece
d' estre moral, et puis que telles
doivent estre les differences, quel

p66

est le genre. Or nous avons monstré
cy dessus, que la moralité estoit interieure,
reelle, et essentielle à l' action
morale ; il ne faut donc plus
douter que la bonté, dont nous parlons,
ne soit intime à l' action bonne
moralement parlant, afin que
la bonté morale responde à la bonté
surnaturelle, par laquelle nous
sommes justifiez, qui nous est interieure,
ainsi qu' à definy le concile
de Trente contre les heretiques,
qui pensent que nostre bonté, et
nostre justification ne nous est
qu' exterieure, et imputative.
Or ceste realité n' est autre chose
qu' une nouvelle raison de vie, laquelle
perfectionne, et accomplit l' action,
luy apportant un nouveau degré
de perfection, qui lui est comme
essentiel, entant qu' elle est bonne.
De sorte que comme la substance n' est
pas assortie de toutes ses perfections

p67

jusques à ce qu' elle ait sa
subsistance, aussi l' action n' est en
sa perfection, si ceste bonté morale
ne l' enrichit, estant comme la
perle, qui accomplit la beauté interieure
de nos actions. Ceste
bonté est produite en ce mesme
instant que la volonté se soubmet
à la droite raison, et qu' elle execute
son raisonnable commandement,
ou qu' elle suit sa direction :
car le dictamen de la raison est le
niveau auquel la volonté se doit
conformer ; c' est pourquoy ceste
conformité à la raison est ce qui
fait, que l' action produite par la
volonté est bonne moralement
parlant : et ceste conformité n' est
rien autre chose qu' un rapport
qu' a la volonté à l' entendement,
ou à la droite raison ; si bien que la
volonté produisant son acte en se

p68

rendant conforme à la droite raison,
produit quant et quant ceste
bonté morale, dont nous parlons.
Et bien que l' action que nous devons
faire, et que nous appellons
bonne moralement, soit desja
bonne en soy, avant que la raison
dicte, qu' elle est bonne, puis qu' il
est vray de dire, que telle, ou telle
action est bonne, avant que l' entendement
la prescrive, veu que la
raison suppose que ce qu' elle propose,
est bon lors qu' elle est droite :
neantmoins ceste bonté n' est
que fondamentale, et naturelle,
entant qu' elle est convenable affin
de perfectionner l' homme,
mais elle ne peut avoir ceste bonté
formelle, par laquelle l' homme
est dit avoir une bonté morale : car il
faut necessairement que l' homme
produise ceste action avec une entiere

p69

liberté selon que luy dicte
la droite raison, avant que l' action
qu' il produit, soit bonne de la bonté
dont nous parlons. C' est pourquoy
si un homme faisoit la meilleure
action du monde sans liberté,
ou sans se conformer à la droite
raison, elle ne pourroit estre bonne
de ceste bonté morale, qui est
interieure à l' action produite par
la volonté. D' où sensuit que la
science des morales ne peut estre
establie, si premierement nous ne
supposons la liberté, et la raison,
sans lesquelles rien ne peut estre
bon moralement : car la raison est
si necessaire, que l' action ne peut
estre que bonne, moralement parlant,
qui se conforme à sa droicture,
bien qu' elle fust deceuë, et
qu' elle dictast le mal au lieu du
bien, lors qu' elle ne peut appercevoir

p70

ceste tromperie, comme nous
avons dit en un autre lieu, lors que
nous avons traicté de l' usage de la
raison.
Le D je vous suis merveilleusement
obligé de m' avoir tellement
esclarcy ce point de la morale,
pleust à Dieu que le temps
permit que vous me donnassiez
une idee de tout ce qu' il faut sçavoir
de ceste science, et que me fissiez
voir si on pourroit l' establir
à priori , sans qu' il fust necessaire de
recourir à une derniere fin.
Le Theol vous proposez icy
un point, sur lequel j' ay souvent
medité, afin de voir si la morale se
pourroit traicter à la façon des autres
sciences, mais ce n' est pas une
difficulté, qu' il faille resoudre à la
legere, car elle importe grandement.
Ce qui me fait croire que

p71

cela ne se peut, c' est que les plus
sçavans du monde tant en philosophie,
qu' en theologie, l' ont tousjours
traictee par la consideration
de la fin, tels qu' ont esté Aristote et
S Thomas. Toutesfois si jamais
l' occasion s' en presente, j' en descriray
quelque lineament, par lequel
je monstreray ce qui s' en peut dire
à priori , ou du moins je declareray
si cela est tout à fait impossible.
Le D je suis merveilleusement satisfait
de ce discours, mais je vous prie
vous ressouvenir de la requeste que
je vous avois faite cy-devant, afin
qu' estant armé de fortes raisons pour
preuver que Dieu est, je retire beaucoup
de libertins, (avec lesquels
je me treuve souvent) de leur impieté,
et de leur aveuglement, qui est si
grand qu' ils ne croyent aucune divinité,
quoy qu' on leur puisse dire.
CHAPITRE 5


p72

dans lequel le theologien preuve que
Dieu est, contre les athees, et
les libertins. 
Le Theologien
je suis bien aise que
vous m' ayez jetté sur
ce sujet ; car je desire
grandement que l' atheisme
prenne fin, et
que tout le monde recognoisse le
grand moteur de l' univers pour createur
de toutes choses. Je vous asseure
que je me suis fort souvent estonné,
lors qu' on m' a dit qu' il y avoit
des athees, veu qu' il n' y a creature
si chetive qui n' enseigne que Dieu
est, et qu' il est unique et souverain.
Je croy qu' il faut avoir l' ame merveilleusement

p73

abbrutie pour en
venir jusques là que de penser
qu' il n' y a point de Dieu. Certainement
je suis bien empesché par où
je commenceray pour vous monstrer
qu' il est necessaire de confesser
que Dieu est, car il n' y a rien au
monde, qui ne le preuve ; et ne le
suis pas moins à trouver ce qui a
peu estre cause que quelques-uns
soient tombez en cet abisme d' impieté,
bien que j' en aye rapporté
dix-huict raisons en l' article 3
de la question, que je fis imprimer
l' an passé contre les athees.
Je me contenteray maintenant
d' en extraire quelques preuves
pour vous armer contre les atheistes.
Il n' y a personne qui ne m' accorde
que s' il y a un estre souverainement
bon, il merite le nom de

p74

Dieu, puis que nous n' entendons
autre chose par ce nom, que ce qui
a toutes sortes de perfections, et à
qui rien ne manque : or que ce
bien souverain soit, je le monstre.
S' il n' est pas, il faut donc que sa privation
soit, laquelle sera le souverain
mal, et par consequent le souverain
non estre, puis que le mal,
et le non estre sont une mesme
chose, mais il n' y a nulle apparence
que la privation soit plustost
que son acte, lequel la doit necessairement
preceder ; il faut donc
confesser qu' il y a une souveraine
bonté, puis qu' il ne peut y avoir
une souveraine malice : nous avons
donc un estre souverain, puis
que nous refusons un souverain
non estre, estant necessaire que
l' un, ou l' autre soit, il ne faut donc
plus douter qu' il n' y ait un dieu,

p75

lequel est si necessaire, qu' il est impossible
que cela ne soit : car autrement
il seroit impossible qu' il y
eust rien de tout ce qui est, puis
qu' il n' y auroit rien qu' un eternel
non estre, avec lequel toute sorte
d' estre est incompatible.
D' abondant il est necessaire
qu' il y ait un estre independant,
qui n' ayt aucunes bornes, ou limites
de perfections, autrement il seroit
impossible qu' il y eust rien au
monde, car il faudroit que tout ce
qui y seroit, fust dependant, or ceste
dependance ne pourroit remonter
jusqu' à l' infiny, de façon
que tout ce qui seroit, eust receu
son estre, et qu' il n' y eust point d' estre,
lequel n' eust receu le sien de
personne. Et puis s' il n' y avoit
point de Dieu, ou d' estre independant,
il seroit impossible qu' il

p76

y en eust, et par ainsi nous aurions
une plus grande imagination, que
tous les estres du monde : et l' estre
de nos pensees, et de nos phantasies
surmonteroit infiniment tous
les estres reels, et ce qui seroit imaginaire
surpasseroit ce qui est veritable,
ce qui ne peut estre. Que
nos imaginations et pensees fussent
plus grandes, cela est clair ; par
ce que nous concevons un estre
infiny quand nous voulons : et
quoy, sera-il dit que ces pensees
n' auront aucun object ? Comment
est-il donc possible que l' entendement,
ou la volonté s' y portent,
si grandement, si puissamment, et
avec tant de ferveur ? Arriere des
bons esprits la maudite pensee de
ceux qui sont si estourdis, qu' ils estiment
qu' il n' y a point de Dieu.
Dites moy, je vous prie, est-il

p77

possible de se persuader qu' il n' y a
point de Dieu ? Ce peut-il faire que
ces beaux lambris celestes, ces 4
elemens, et tout ce que nous
voyons, n' ait esté fait de personne ?
Sera-il plus facile de croire qu' une
oraison de Ciceron, que l' aeneide
de Virgile, qu' une maison, ou une
ville ne peut estre de soy mesme,
que les estoilles, ou les elemens ?
Mais je vous prie, pourquoy est-ce
que le ciel n' est plus grand, pourquoy
n' est il quarré, ou sexagone,
au lieu d' estre rond, s' il ne depend
d' aucun ? C' est une contradiction
tres-evidente de dire que ce qui
n' est infiny, n' ait pas esté faict, car
s' il est finy, il est necessaire que
quelqu' un l' ait finy, et limité : or
tout ce que nous voyons est finy,
en suite dequoy il faut qu' il ait receu
ses bornes de quelqu' un, qui

p78

ait un estre infiny, qui est le vray
Dieu, lequel estant immense borne
toutes choses selon son bon plaisir.
Voicy encore une autre raison
entre cent qu' on pourroit rapporter
à ce suject. Tout ce qui est au
monde, se resoult és principes, desquels
il est composé, car vous ne
sçauriez trouver corps aucun, qui
ne se resolve en ces 3 principes, sel,
quelques-uns, en corps, esprit,
et ame, ou en terre, feu, et eau : or
tout ce qui se resoût, et dissoût, a esté
conjoinct et composé, veu que
le mesme ordre qu' on garde à la
dissolution, s' est retrouvé à la composition ;
il faut donc que quelqu' un
ait fait ceste composition,
lequel n' ait esté composé, mais qui
soit tres-simple. De plus, puis que
toutes choses, soient pierres, plantes,

p79

animaux, ou mineraux, qui se
retrouvent és 4, ou 5 familles, et
estages de ce monde, prennent
fin, et se font avec le temps, il est
certain qu' elles ont aussi commencé
avec le temps, comme a fort
bien remarqué le premier historiographe
du monde, lors qu' il a
dit que Dieu crea le ciel, et la terre
au commencement du temps.
Mais il est impossible que Dieu ait
esté creé, puis qu' il est devant tout
temps, et devant tout ce que nous
voyons : il estoit, comme il est encore,
et sera eternellement, et immuablement,
ce tres profond ensoph
des cabalistes, bien-heureux par
soy mesme, lequel n' a fait les hommes
que pour sa gloire, et afin
qu' ils contemplassent la bonté souveraine
pour la servir, et l' adorer
à tout jamais. C' est donc là où

p80

nous devons aspirer, et ne devons
avoir autre but, ou pretention que
de jouyr de ce bien infiny, ne nous
soucians, et n' usans d' aucune chose,
qu' entant qu' elle nous servira
comme d' échelon pour nous unir
à Dieu, qui nous a faits, et nous entretient
de nourriture, de vie, de
vestemens, et de tout ce qui nous
est necessaire, à ce que nous le
loüions eternellement, et que
nous l' aymions par dessus toutes
choses.
Le D beny soit l' eternel, qui m' a
donné ce jourd' huy une telle rencontre,
jamais je n' ay entendu discours
qui m' ait plû davantage. Bon dieu ! Se
peut il treuver quelqu' un si abruty,
et si aveuglé qui pense qu' il n' y
ait point de Dieu : pour moy j' estime
que cela ne peut venir que faute
d' esprit, et de jugement, car tout

p81

ce qui est au monde nous presche
ceste verité.
Le Theolog veritablement
quand on contemple le bel ordre
qui est au monde, et qu' on voit
que chaque chose retient son
rang, et son lieu, nonobstant tous
les desordres, qui semblent arriver,
il faut conclure qu' il y a quelqu' un
qui gouverne tout le monde,
et qui maintient toutes choses
en bon ordre, car le monde ne
pourroit pas garder le branle inviolable,
et la cadence reguliere,
que nous y appercevons, n' estoit
l' Orphee divin, qui touche les cordes
du grand luth de l' univers, et
qui a soing de tous les ressorts, et
mouvemens, qui paroissent dans
les cieux, et dans les elemens. Se
pourroit-il faire qu' une nef evitast
le naufrage, laquelle n' auroit pilote

p82

ny gouvernail ? Nullement ;
que sera-ce donc de ceste grande
arche, et de ce grand navire du
monde, si Dieu ne le regit, et conduit
en toutes ses demarches ? Ce
qu' a fort bien consideré un docte
poëte de nostre temps en ces vers.
callez les voiles bas, etc. 

p93

pleust à Dieu que tous nos
poëtes françois voulussent employer
leur temps, et leurs plumes
à descrire les merveilles de Dieu,
afin d' enraciner de plus en plus la
creance du createur en ces esprits
qui sont si mal faits, que rien ne
leur est agreable, s' il n' est parsemé
de mille discours folastres de l' amour
impudique, au lieu qu' ils
s' amusent, et perdent le temps à
composer une infinité de ravauderies,
qui ne meritent pas d' estre
leuës, et pour lesquelles ils seront
griefvement punis apres ceste vie,
s' ils n' en font icy penitence, et s' ils

p94

n' employent leur travail à quelque
chose de plus serieux, et qui
soit agreable à Dieu.
Le D veritablement je croy
que si un tas d' escrivains qui
broüillent, et perdent le papier
avec leurs frivoles, et inutiles inventions
pour attraper la piece
des imprimeurs, et des libraires
addonnez à leur avarice (qui n' ont
que le lucre devant les yeux, sans
se soucier si ce qu' ils impriment
est bon, ou mauvais, sale, ou honneste,
diffamatoire, ou non, pourveu
qu' ils en fassent leur profit, et
remplissent leur bourse) si, dis-je,
ces escrivains, qui semblent maintenant
surpasser les mousches, si
non en nombre, du moins en importunité,
changeoient de batterie,
et que leurs escrits dressassent
les jeunes hommes à la vertu, ou

p95

leur enseignassent quelque science,
nous ne verrions pas tant de
jeunesse enervee, perduë et quasi
abrutie. Il seroit à desirer que la justice
y mit ordre : car il importe
grandement pour le repos public,
pour la conservation de l' estat, et
pour maintenir le respect qu' on
doit porter aux princes, aux legislateurs,
et aux loix. Mais je vous
prie de me faire encore part de
quelqu' autre raison pour establir
l' estre divin dedans l' esprit de
quelques ecervelez, avec lesquels
je me retrouve souvent, et qui
font gloire de ne croire rien qui soit.
CHAPITRE 6


p96

dedans lequel on continuë à prouver
que Dieu est. 
bien que les raisons
que je vous ay deduites
jusques icy, ne
soient que trop suffisantes
pour faire esvanouyr l' atheisme :
neantmoins puisque vous
prenez plaisir à ce discours, et qu' il
semble que desirez vous en servir
pour desabuser quelques uns de
vostre cognoissance, j' adjousteray
encore quelques raisons, que je
prendray d' entre celles que j' ay
plus amplement deduites en la
question contre les athees.
Il est impossible qu' il y ait un
tel nombre de planettes, et d' estoilles,
comme il y a, et que les

p97

cieux puissent garder la distance
qui se trouve des uns aux autres,
s' il n' y a quelqu' un qui leur ait
donné ces proportions, et qui les
ait fait en ce nombre, plustost
qu' en un autre ; car je vous prie,
pourquoy est-ce que la lune est
esloignee de nous de cinquante
et six semidiametres de la terre,
lors qu' elle est en sa moyenne distance ?
Pourquoy le soleil se recule-il
de nous par 1182 semidiametres,
quand il est en son apogee,
lequel se retrouve ceste annee
1624 au dixiesme degré de l' escrevisse ?
Et pourquoy n' est-il distant
que de 1101 semidiametres, lors
qu' il est en son perigee, qui se retrouve
au signe du (...). Qui est-ce
qui luy fait faire ce chemin en descendant
plus bas en l' un qu' il n' estoit

p98

en l' autre de 81 semidiametres.
Je vous en pourrois demander
tout autant de Saturne, de Jupiter,
et de Mars, et m' enquester pourquoy
ils sont tantost plus haut,
tantost plus bas, mais je serois trop
long : c' est assez que vous voyez
clairement qu' il faut necessairement
advoüer qu' il y a un estre divin
reglant tout, et qui n' est reglé
de personne.
Car le soleil n' en seroit pas
moins soleil, bien qu' il fust plus
prés, ou plus esloigné de la terre,
aussi bien que les estoiles pourroient
encore estre estoiles, si elles
s' absentoient plus loing de nous
que de quatorze mille semidiametres
terrestres. La proportion qui
se trouve entre tous les corps du
monde, conclud aussi qu' il y a un

p99

Dieu, qui a fait tout l' univers en
poids, en nombre, et en mesure :
car la terre n' auroit pas une pareille
raison avec le soleil, qu' a 1 à
140, et avec la lune que quarante
à avec 1 ; et ne seroit pas en comparaison
de toute la solidité spherique
du monde visible comme
un à (...), (c' est à dire
qu' elle n' auroit pas la proportion
qui est entre l' unité, et deux trilions,
sept cents quarante et quatre
bilions : ce que d' autres diroient
deux mille sept cents quarante
et quatre miliards, prenant
chaque miliard pour dix cents milions) :
la terre dis-je n' auroit pas
ceste raison avec les planettes, et
avec tout le monde, s' il n' y avoit
un souverain architecte, qui
leur eust donné ces quantitez,
ces mesures, ces distances, et ces

p100

proportions.
Le D vous me feriez un singulier
plaisir, si vous vouliez prendre
la peine de me dire toutes les proportions
qu' ont les cinq autres
planettes, et toutes les estoilles
avec la terre, et par ensemble.
Le Theol il me semble qu' il
est plus à propos de passer outre,
tant parce que vous pouvez voir
tout cela en la 19 26 et 33 raison,
que j' ay rapportee en la susdite
question contre les atheistes,
que parce que Tycho Brahe, Kepler,
Blancan, l' astronomie danique,
et plusieurs autres deduisent
ces matieres fort amplement.
C' est pourquoy je mets fin à ce
discours, c' est assez que vous consideriez
attentivement d' où la
raison tiree de ces distances, et
proportions prend sa force, qui est

p101

que le soleil, ou quelqu' autre
planette que ce soit, n' a peu se
determiner soy-mesme à s' esloigner
tantost plus, et tantost
moins, et n' a peu faire que sa grandeur
fust autre qu' elle n' est : non
plus que la terre n' a pas eu 7200
lieües en son circuit, parce qu' elle
n' a voulu en avoir davantage,
mais parce que celuy qui l' a faite,
ne luy a voulu donner que cela. Il
n' y a pas moyen d' en trouver une
autre cause ; cherchez tant que
vous voudrez pourquoy le circuit
du firmament a cent milions
huict cens mille lieuës ; et par consequent
pourquoy son diametre
est de trente et deux milions, et septante
et quatre mille lieuës, vous
n' en sçauriez donner autre raison,
sinon que Dieu l' a ainsi voulu
pour beaucoup de raisons que

p102

nous ne sçaurons qu' en paradis.
On trouve aussi la mesme raison
dedans les mouvemens celestes,
n' y ayant autre cause que la
volonté divine, pourquoy la mer
se meut plustost en 25 heures,
qu' en 100, ou en quelqu' autre
nombre ; pourquoy la lune court
tout le zodiaque en 27 jours, et
huict heures, et r' atteint le soleil
en vingt neuf jours, et 12 heures :
pourquoy le soleil demeure 365
jours 5 heures (...) à faire son cours
annuel, et pourquoy son apogee
est 28800 ans, avant que d' achever
tout le zodiaque, qui est le temps
du propre mouvement des estoilles.
Car nous ne pouvons dire que
le soleil, ou les autres astres ayent
besoin de ces mouvemens pour
leur conservation, veu que le repos
ne leur est contraire ; et bien

p103

que quelqu' un pensast que ce
mouvement fust necessaire pour
empescher la corruption ou de
l' astre, ou des individus qu' il s' imagineroit
estre là, comme de
nouveaux mondes, il faudroit neantmoins
venir à sonder la raison
pourquoy ces individus auroient
besoin de ce mouvement, et tousjours
avoir recours à un premier
moteur, si bien que de quelque
costé que nous nous tournions, il
faut confesser que Dieu est.
Le D je voy clairement que
toutes ces raisons sont irrefragables,
car bon gré mal gré qu' on en
ait, il est necessaire que tout ce
qui est limité en grandeur, en figure,
en nombre, en poids, et
en mouvement, ait esté limité
par quelqu' un, lequel n' ait point
de bornes, et qui soit infiny, veu

p104

qu' il est impossible qu' on ne vienne
à une premiere cause, qui donne
l' estre, la difference, et toutes
les proprietez à toutes choses, et
qui ait aussi bien determiné le
nombre des genres, et des especes,
comme celuy des individus.
Or avant que nous sortions de ces
mouvemens, je vous supplie de
me dire si on pourroit prouver
combien de lieuës fait chaque
estoille du firmament en une heure.
Le Theol vostre demande
peut avoir un double sens, car
vous demandez cela ou du mouvement
qu' elles ont d' orient en
occident, par lequel elles font le
tour entier en vingt quatre heures,
ou du mouvement, qui leur
est propre de l' occident à l' orient,
lequel ne s' acheve qu' en

p105

vingt et huict mille huict cents
ans, comme j' ay desja dit. Si vous
parlez du premier mouvement,
qu' on appelle rapide à cause de sa
vitesse, il est fort facile de sçavoir
combien chaque estoile de l' equinoctial
fait de lieuës en une
heure : car il ne faut qu' à diviser
(...), qui est le nombre des
lieuës de tout le circuit du firmament,
par vingt quatre, et le quotient
donnera les lieuës pour chaque
heure du jour, qui seront
(...), c' est à dire quatre milions
deux cents mille : de là mesme
vous pourrez sçavoir combien
de lieuës feront ces estoiles
dedans une minute d' heure, car
(...) divisé par 60, qui sont
les minutes d' une heure, donnerent
sept mille lieuës, que les susdites
estoiles feront en une minute ;

p106

si par apres vous divisez 7000 par
60, le quotient vous donnera les
lieuës, que font les estoiles en une
seconde minute, et seront 116
lieües (...). On pourroit ainsi proceder
à l' infiny pour trouver combien
de lieües elles font en une
tierce, une quarte, une dixiesme,
et ainsi des autres. Ce qui monstre
clairement qu' il faut que nous
ayons receu nostre entendement
d' un estre infiny, puisque nous appercevons
qu' il penetre tout sans
borne, et sans fin.
Mais pour trouver le chemin
qu' elles font l' espace d' une heure
par leur propre mouvement, il est
un peu plus difficile, neantmoins
je vous le diray pour en avoir la
memoire fresche, car je l' ay desja
fait sur la fin de la 33 raison contre
les athees, au lieu que j' ay cy devant

p107

allegué. Or pour entendre
cecy, il faut supposer qu' elles ne
font en un an entier que 51 secondes,
et par consequent qu' en l' espace
de 1461 jours qui font 4 ans, elles
font 204 secondes, ou 12240 tierces :
servez-vous maintenant de la
regle de trois, en disant si 1461
donnent 12240 tierces, combien
un jour en donnera-il, vous aurez
8 tierces (...) qui est le chemin particulier
des estoiles durant un jour.
De plus il faut sçavoir qu' il y a
dedans le circuit du firmament
1296000, lesquelles respondent
à 360 degrez : or ces degrez, ou
ces secondes de tout le circuit
donnent (...) lieuës, donc
51 (qui est ce que font les estoiles
en un an par leur propre mouvement)
donneront 3967 lieuës

p108

avec (...) donc le mouvement d' un
jour, sçavoir est (...) donneront
unze lieuës, et presque (...)
que les susdites estoiles feront en
un jour. D' où il sensuit encore par
une infallible raison qu' elles chemineront
en une heure 1380 pas,
qui respondent a 21 quatriesme,
27 cinquiesmes, 12 sixiesmes, et
27 septiesmes. Bref vous sçaurez
quel chemin elles font en une minute,
si vous divisez 1380 pas par
60, car vous aurez 23 pas que font
les estoiles, qui sont dedans l' equinoctial.
Par où vous voyez
quelle proportion il y a entre leur
mouvement rapide, et cestuy cy,
qui leur est propre, veu que par
celuy là elles font 7000 lieuës en
une minute, et par cestui-cy 23 pas.
Le D je prendray encore la
hardiesse de vous demander à

p109

quel espace de la terre respondent
23 pas du firmament, si vous jugez
que je le puisse comprendre.
Le Theol j' ay aussi monstré cela
au lieu susallegué, où j' ay dit que
la raison qu' il y a du circuit du firmament
(...), au circuit
de la terre 7200 lieuës, se retrouvoit
presque entre 23 pas, et deux
tiers d' une ligne : d' où je concluds
que les estoiles passent les (...) d' une
ligne sur la terre en l' espace d' une
minute de temps. Mais il faut
que vous preniez garde que je ne
parle que des estoiles de l' equinoctial,
ou de celles qui en sont fort
proches, car tant plus elles s' en esloignent,
et moins font elles de
chemin. De plus lors que je vous
ay parlé de lieuës, j' entends des
françoises, ausquelles je donne
trois mille pas, et à chaque pas

p110

5 pieds de roy, sans m' astreindre
à l' ancien pied des geometres, qui
n' est en commun usage parmy
nous.
Ne vous semble-il pas que
l' homme a de merveilleuses prerogatives
par dessus les animaux,
puis qu' il s' assujettit le ciel, et la
terre par la force de son entendement ?
Par lequel il trouve que ces
estoiles ne font que 23 pas en une
minute, et en une seconde quasi 2
pieds, et en une tierce 5 lignes, et
mille autres choses, qui sembleroient
surpasser nostre capacité, si
nous n' avions quelque semence
d' immortalité.
Le D il n' y a pas moyen de
nier cela, c' est pourquoy je croy
fermement l' immortalité de l' ame,
et que Dieu accomplira tous
les desirs que nous avons en ce

p111

monde de sçavoir, et de jouyr de
toutes choses, autrement il faudroit
dire que nos souhaits seroient
inutiles, et que la nature
nous seroit marastre de nous faire
desirer si ardemment ce qu' il
nous seroit impossible d' acquerir
si Dieu ne le nous donnoit.
Le Theol nous ne manquons
d' autres raisons pour convaincre
les athees, telles que sont celles
qui sont prises de cet axiome, tout
ce qui se meut, est meu par quelqu' un :
ou, tout ce qui est, a estre d' un autre,
qui ne reçoit son estre d' ailleurs, excepté
Dieu qui a son estre de soy-mesme . Mais
je me contente de les avoir deduites
en la 1 question sur la genese,
d' où je vous en rapporteray
encore deux ; l' une se prendra de
la verité, et l' autre de la bonté, et
de l' estre souverain.

p112

Pensez, si vous pouvez, quand il
n' a pas esté veritable que quelque
chose estoit future, ou passee : que
si vous ne sçauriez vous imaginer
ne l' un ne l' autre, et que neantmoins
ne l' un ne l' autre ne puisse
estre veritable sans la verité, il est
impossible de s' imaginer que la
verité ait fin, ou commencement,
donc elle est eternelle, et par suite
necessaire, elle est Dieu ; car si la verité
a commencé, ou si elle doit finir,
il estoit vray que la verité
estoit avant qu' elle fust, et apres
qu' elle ne sera plus, il sera vray
qu' elle ne sera plus, or le vray ne
peut estre sans la verité, donc
apres qu' il n' y aura plus de verité,
il y aura de la verité, car la
verité sera que la verité ne sera
plus, donc la verité sera, et ne sera
pas, ce qui est une absurdité trop

p113

manifeste ; pour laquelle finir, il
faut confesser qu' il y a une verité
eternelle, laquelle ne depend
d' ailleurs, et est Dieu mesme.
S Augustin se sert aussi d' une raison
prise de la verité, lors qu' il dit.
(...).
Achevons ce discours par l' autre

p114

raison tiree de la supréme
bonté en nous adressant à elle avec
S Anselme en son prosologe.
ô Seigneur, nous croyons que
vous estes si grand qu' on ne peut
rien penser de plus grand, ny de
meilleur ; faudra-il dire que telle
nature n' est point, parce que le fol
a dit en son interieur qu' il n' y avoit
point de Dieu ? Certainement
lors qu' il escoute ce que je dis, lors
qu' il m' entend prononcer, et asseurer
qu' il y a un estre si bon,
qu' on ne sçauroit en concevoir un
meilleur, il entend quelque chose
si grand, qu' il ne peut y avoir rien
de plus grand : or ce qu' il conçoit,
est en son entendement, bien
qu' il n' entende pas que cela soit
reellement, et de fait, car c' est autre
chose, qu' on ait cela en l' intellect,
et autre chose qu' il soit en

p115

estre ; et le peintre pensant à ce
qu' il doit faire, sçait bien mettre
difference entre ce qui est à faire,
et ce qu' il a desja fait, et cognoist
que ce qui est à faire, n' est pas encore
fait.
Le fol est donc convaincu que
du moins il a en son entendement
une chose si grande, qu' il ne peut
y en avoir de plus grande, car il
m' escoute, et m' entend, et tout ce
qu' il entend, est en son entendement.
Or l' estre, qui est le plus
grand de tous ceux qu' on peut
concevoir, ne peut estre dedans le
seul entendement, car s' il est dans
le seul intellect, on peut concevoir
qu' il est reellement, et en effect ;
ce qui est plus grand que s' il
estoit dedans le seul entendement.
D' où il s' ensuit que si cet estre,
par dessus lequel on n' en peut

p116

concevoir un plus grand, est dans
le seul entendement, cela mesme
qui est le meilleur, et le plus grand
de tout ce qu' on peut concevoir,
sera l' estre, au delà duquel on en
pourra concevoir un plus grand,
ce qui ne se peut dire, ny ne peut
estre, il faut donc necessairement
qu' il y ait une chose non seulement
en l' intellect, mais reellement,
et de fait, qui soit si bonne,
et si excellente, qu' on n' en puisse
concevoir une meilleure, et que
vrayement il n' y en puisse avoir
une plus excellente, laquelle sera
ce grand Dieu, qui nous a faits, et
formez à son image pour le servir,
l' aymer, et l' adorer, et pour jouyr
de sa divine essence en la gloire
des bien-heureux.
Vous pouvez tirer de semblables
raisons de tout ce que nous

p117

voyons icy bas : car il n' y a proprieté
aucune, laquelle ne depende de
Dieu, et ne soit une veritable participation
de ses perfections, comme
quand nous disons que le ciel
est grand, il faut que Dieu soit plus
grand : mais d' une grandeur plus
relevee, et plus eminente, laquelle
n' ait aucune imperfection : si la
terre est, si le ciel, si le soleil a l' estre,
il faut conclure qu' il y a un estre,
incomparablement plus excellent,
selon la maxime de tous
les philosophes, (...).
De plus, si vous pensez à l' eternité,
à la toute puissance, à la souveraine bonté,
à la justice, à la sagesse,
à l' entendement, à la volonté,
bref à tout ce que nous pouvons
dire, vous trouverez qu' il ne
peut y avoir nul temps, nulle bonté,

p118

nulle justice, nulle sagesse, nul
entendement, nulle volonté dedans
les estres finis, si premierement
vous n' advoüez qu' il y a un
estre eternel, tout puissant, souverainement
bon, et juste, sage et
sçavant à l' infiny, de qui depend
le temps, et tout ce qui est icy bas.
Car le temps ne peut s' estre faict
soy-mesme, et nos puissances, nos
bontez, nostre justice, et toutes
nos autres facultez n' ont pas leur
estre d' elles-mesmes, il faut donc
qu' elles l' ayent receu de quelqu' un,
lequel n' ait pas receu le
sien d' ailleurs, autrement nous retomberions
en la mesme absurdité.
Et puis, s' il n' y avoit point d' estre
eternel, independant, souverainement
sçavant, juste, et bon,
nos pensees seroient meilleures

p119

que cet estre souverain, d' autant
qu' il ne seroit pas en estre, et ne
pourroit y estre, et neantmoins seroit
dedans nos entendemens : il ne
seroit pas en estre, comme nous supposons,
il n' y pourroit estre : car
qui est-ce qui le feroit, et qui luy
donneroit estre ? Et par ainsi cet
estre souverain seroit meilleur
n' estant qu' imaginaire, et produit
par nostre seule pensee, laquelle
ne met rien en l' estre des choses,
que s' il estoit reellement en soy-mesme,
et qui ne se peut pas concevoir,
et est tout à fait impossible.
Par où vous voyez qu' il est si necessaire
que Dieu soit, qu' il est infiniment
necessaire, qu' il soit impossible
que Dieu ne soit pas. Si
vous comprenez ces raisons, et
que vous les puissiez entendre, et
deduire bien à propos, quand

p120

vous vous trouverez parmy ces
malheureuses compagnies d' atheistes,
et de libertins, je m' asseure
que vous les ramenerez au bon
chemin, et les contraindrez de dire,
et confesser ingenuement, qu' il
est impossible que Dieu ne soit, et
d' advoüer qu' il est necessaire qu' il
y ait un estre souverain en toutes
perfections, duquel depend tout
ce qui est en tout l' univers.
CHAPITRE 7


p121

par lequel les medecins sont justifiez,
contre ceux qui disent qu' ils sont le
plus souvent atheistes, et où il est
monstré que les hommes sçavants
soit en mathematique, soit en philosophie,
soit en la cabale, ne sont ny
athees, ny deistes, ny libertins. 
Le D je vous demanderois
volontiers d' où
vient que les medecins,
les mathematiciens,
et ceux qui
ont beaucoup estudié en philosophie,
et à la science de la nature,
sont estimez athees, et se moquent
de toute sorte de creance :
car ils ont ce bruit là, ce qui n' est
pas à mon advis sans suject : et croy

p122

que cela est en partie cause pourquoy
tant de jeunes hommes suivent
ceste impieté, parce qu' ils
voyent que c' est le sentiment des
plus sçavans, sans mettre les plus
grands, et les plus riches en ligne
de conte, lesquels ne monstrent
que trop par leur tyrannie envers
les pauvres, par leurs opressions, et
par leur maniere de vivre à qui la
regardera de bien prés, qu' ils ne
croyent point qu' il y ait de divinité.
C' est la seule difficulté qui me
reste sur ce suject, c' est pourquoy
je vous prie de m' esclarcir là dessus,
afin que nous passions outre.
Le Theol il semble que vous
ayez desseing d' attaquer 4 sortes
de personnes, lesquelles ne sont
pas telles que vous les faites, entre
lesquelles vous donnez le premier
rang aux medecins, et les distinguez

p123

d' avec les philosophes. Je
sçay que les medecins n' ont besoing
de ma deffence, leur preud' homie,
et leur vertu estant trop
esclatante pour faire évanouïr
toutes les calomnies dont on les
voudroit noircir. Si est-ce que j' entreprendrois
hardiment de faire
une apologie en leur faveur contre
tous leurs ennemis, et médisans,
n' estoit que la plus part de
leurs livres donnent un clair, et solemnel
dementir à tous ces cajoleurs,
qui parlent sans sçavoir ce
qu' ils disent. Vous pouvez voir en
la question contre les athees
combien facilement la medecine
nous porte à la recognoissance
d' un vray Dieu. Je me contenteray
pour ceste heure de vous rapporter
le sentiment que Galien a eu
de Dieu, vous ne sçauriez refuser

p124

son tesmoignage, car il estoit
payen, je m' asseure que tous les
medecins du monde, s' ils ont l' esprit
bien fait, advoüeront ce qu' il a
couché disertement par escrit au
3 livre de l' usage des parties chap.
10. Voicy le passage comme je l' ay
retenu en latin.
(...) ; par où vous voyez qu' il appelle
ces livres de l' usage des parties un
hymne fait à la loüange de Dieu,
d' autant qu' il n' y a corps, il n' y a
membre, ny veine, ny nerf, ny artere,
qui ne rende un evident tesmoignage
que Dieu est, si on considere
leur ordre, leur grandeur,
leur figure, leur action, leur usage,

p125

et tout ce qui les concerne : suyvons
maintenant avec luy. (...).
Voyla les trois attributs que les
theologiens donnent aux trois
personnes de la bien heureuse
trinité, comme S Thomas le declare
subtilement, et fort au long
en la premiere partie de sa somme,
question 39 article 8. Escoutez
le reste. (...).

p127

Prenez garde à une chose fort importante,
qui est que Galien advouë
que le ciel, et le soleil ont
esté faicts, encore qu' il estime
qu' ils ayent une ame ; ce qui est
contre certains ignorans, lesquels
faisans les platoniciens, se plaisent
à rouler l' ame universelle de tout
le monde dans leur creuse imagination,
pensans qu' il n' y a point
d' autre Dieu que ceste ame chimeriquement
universelle de tout
l' univers. Mais Galien, plus sçavant
que tout ce qu' ils sont, confesse
que ceste ame depend de
Dieu. Passons outre.
(...).

p129

Or il faut neantmoins prendre
garde que Galien a grandement
failly en ce qu' il a dit que le soleil
avoit sa grandeur, et sa qualité
de soy-mesme, aussi bien comme
il a manqué, quant à ce qui estoit
de la vraye religion, qu' il devoit
embrasser pouvant sçavoir,

p130

s' il eust voulu s' en enquester, qu' il
n' y avoit que les chrestiens qui
recogneussent parfaictement la
puissance, la sagesse, et la bonté de
Dieu, et qui l' aymassent de tout
leur coeur en le servant, et l' adorant :
ce que j' ay voulu dire en passant,
afin de vous advertir. Suyvons.
(...).

p131

Pourroit-on desirer une confession
plus claire, ou plus franche
d' une divinité, laquelle a tout
fait, et qui regit et gouverne toutes
choses par sa providence ? Or je
vous défie de pouvoir treuver aucun

p132

medecin lequel n' embrasse
ceste verité, et qui ne confesse que
jamais Galien n' a mieux dit que
lors qu' il a descrit la puissance, la
sagesse, et la bonté de Dieu, lesquelles
reluisent en chaque individu.
Et afin que vous ne pensiez
pas que ce soit une boutade, en
laquelle il se soit oublié, voicy ces
paroles tirees du 17 livre du mesme
usage chap. 1. (...).

p133

Et au 2 chapitre blasmant les
athees il dit, (...). Bref pour
monstrer la creance qu' il avoit
d' une souveraine cause, il tesmoigne
sur la fin de tous ses livres,
qu' ils ne sont que comme un
hymne, et une loüange dressee à
la gloire de Dieu. C' est au chap. 3
et dernier, où il parle ainsi.

p134

(...).
Qui est quasi le mesme que si
nous donnions ce tiltre aux livres
que nous composons, loüange à
Dieu : en quoy Galien nous apprend
nostre leçon ; car nous devrions
rapporter toutes nos actions
et tout ce qu' il y a au monde,
à sa gloire, et à son amour, puisque
tout depend de luy, et qu' il est

p135

la derniere fin de toutes choses.
C' est assez (je croy) pour defendre,
et justifier les medecins, entre lesquels
j' en recognois de grands
serviteurs de Dieu, et qui sont
prests de répandre leur sang pour
l' amour de Dieu, et pour la verité
de la religion catholique, s' il estoit
question de ce faire.
Le D je suis merveilleusement
satisfait, et entierement desabusé
touchant ce qu' on m' avoit faict à
croire des medecins, et confesse
ingenûment que ce que vous avez
apporté de Galien est suffisant
pour confondre tous les médisans,
et calomniateurs. Je vous prie
de me dire un mot des mathematiciens,
et des philosophes, et des
cabalistes, car je n' ay plus que ce
doute sur ceste matiere.
Le Th si vous desirez estre informé

p136

plus amplement, lisez l' anatomie
du corps humain, que
Monsieur Du Laurent a faite, je
m' asseure que vous vous rirez à
bon escient de l' ignorance de
ceux qui accusent les medecins de
libertinage. Or je viens aux autres,
puis que vous desirez en estre
esclarcy, et dis premierement que
ce qu' on pense des mathematiciens,
est une fourbe, et un conte
fait à plaisir : car il n' est pas possible,
si on n' est tout à faict hebeté,
qu' on ne confesse qu' il y a un premier
moteur qui donne le branle
à tous les astres, qui d' une façon
et d' un costé, et qui d' un autre, lors
qu' on vient à considerer leur
train si reglé, et leur course non
jamais errante. J' ay eu cet honneur
d' entretenir plusieurs fois
quelques uns de ces personnages,

p137

mais je n' ay veu personne, qui
croye plus fermement une divinité,
car quand ils considerent l' activité
du soleil, et la splendeur de sa
lumiere, qui est si admirable que
nous ne sçaurions comprendre ce
que c' est, ils pensent incontinent
quelle doit estre la lumiere increée,
et infinie, d' où depend la lumiere
creée, et finie du soleil, et avoüent
franchement que comme
rien ne peut estre lucide, ou lumineux
sans la lumiere, aussi rien ne
peut avoir estre sans l' estre des estres,
lequel est le vray Dieu, qui
ne depend d' aucune chose, et de
qui depend tout ce qui est au ciel,
et en la terre.
Il n' est pas besoin de m' estendre
davantage sur ce suject, car
tous leurs livres crient, et enseignent
haut et clair, que ce monde,

p138

et toutes ses parties, n' ont peu estre
disposees comme nous les
voyons, sans la providence d' un
souverain seigneur : et puis j' ay deduit
ces matieres icy fort au long
en la question susdite, d' où vous
pourrez prendre ce qu' il vous
plaira. Or s' il se retrouvoit quelque
mathematicien qui fust si étourdy,
et si insensé que de soublier
de Dieu, et de sa providence,
je serois d' advis qu' on le bannit, et
qu' on luy fist perdre la vie de laquelle
il seroit tout à fait indigne.
Mais on ne sera s' il plaist à Dieu en
ceste peine, car je ne croy pas qu' il
y en ait aucun qui se laisse emporter
à ceste extréme impieté, et folie
insuportable, que de penser
que ces mouvemens celestes si
bien ordonnez, soient sans un premier
moteur qui les conserve, et

p139

qui leur donne le branle.
Passons donc aux philosophes,
et disons que nous n' avons point
de motifs plus puissans en la nature
pour recognoistre le createur
de toutes choses, que leurs discours,
par lesquels ils font paroistre
que comme par la force, et
l' industrie de l' entendement nous
rassemblons la varieté des individus
en une mesme espece, les diverses
especes en un mesme genre, et
cathegorie, et les divers genres
en un seul estre, quand nous
entendons tout par ceste diction
en : ainsi faut-il confesser que tous
les estres particuliers se rapportent
à un seul estre, duquel ils dependent,
qui est Dieu. Je ne veux
pas vous rapporter une infinité de
passages de Platon, d' Aristote, et
des autres philosophes, pour vous

p140

monstrer la cognoissance qu' ils
ont euë d' une divinité, et l' estat
qu' ils en ont fait, de peur d' estre
trop long en ce discours, voyez
seulement Eugubin au livre qu' il
a composé sur ce suject.
Quant à ce qui est des cabalistes,
soit que vous les preniez
pour ceux qui n' ont que la cabale
commune parmy les rabins, laquelle
se sert des lettres, et de leurs
combinations pour treuver quantité
de secrets, et matiere de discours,
soit que vous entendiez les
autres, qui font estat de sçavoir la
verité de la nature, ses causes, et
ses principes, vous vous estes mépris,
car les uns et les autres discourent
fort advantageusement
de la divinité, et de ses perfections,
et attributs. Ceux-là mesmes font
une quantité de noms afin d' honorer

p141

l' eternel par diverses façons,
et sous diverses considerations ;
et ceux cy recognoissent tellement
la presence de Dieu en
toutes choses que s' il leur estoit
possible ils le monstreroient au
doigt à tout le monde, à ce qu' il
fust recognu, servy, et adoré par
tout l' univers : ceux là prennent
l' escriture saincte pour leur fanal,
et ceux-cy en font plus grand estat
que d' aucun autre livre : ceux
là fondent tout sur le discours,
ceux-cy veulent establir ce qu' ils
disent sur la realité des choses ;
bref les uns et les autres parlent
tres dignement de l' eternel, et de
sa divine providence, comme je
pourray faire voir une autrefois
plus amplement. Or de tout ce
que dessus vous voyez qu' il n' y a
personne de quelque qualité, ou

p142

condition qu' il soit, qui ne recognoisse
une divinité, de laquelle
depend tout l' univers ; car bien
que les medecins, les mathematiciens,
les philosophes, et les cabalistes
se puissent abuser, et decevoir
en beaucoup de choses, si est-ce
qu' en ce qui est de recognoistre
un vray Dieu, ils en sont tous
d' accord, et ne pourroient autrement
rendre raison de mille choses
qui se rencontrent emmy la nature,
s' ils ne presupposoient une
souveraine cause infinie, et independante,
par laquelle tout le
monde est conservé, et subsiste en
son estre.
CHAPITRE 8


p143

dans lequel on voit que c' est que la cabale,
et quelles sont ses parties ; et
auquel le deiste declare ce qui a esté
cause de ce qu' il est tombé en impieté. 
Le Deiste
je vous prie m' apprendre
ce que c' est que la
cabale, de laquelle
on fait un si grand estat,
et si c' est une
vraye science, ou non : car selon
que vous en avez parlé cy devant,
il semble que ce soit quelque chose
de grand, et de relevé par dessus
les autres sciences.
Le Theol si la cabale estoit
telle que les rabins disent, asseurément
elle surpasseroit toutes les

p144

autres sciences : car ils veulent que
par le (...) Beresith, on cognoisse
tout ce qui appartient à la nature,
et par le Mercaua (...) tout ce
qui concerne la divinité. Il est vray
que les cabalistes choisissent particulierement
le Mercaua, et les
talmudistes le Beresith. Or entre
tout ce qu' ils ont de plus excellent,
ils se servent particulierement
de leurs numerations qu' ils
appellent Sephirots, par lesquels ils
asseurent que la sagesse divine se
respand sur eux, et donne à chaque
individu les trois degrez de
vie, sçavoir est le vegetable, le sensible,
et l' intellectuel : de plus, ils
ont 32 chemins pour arriver à la
sapience ; et 50 portes d' intelligence
pour sçavoir tout ce qui appartient
à la nature, et à la divinité.
Le D je vous prie me favoriser

p145

tant que de me dire qui sont ces
sephirots, et combien il y en a.
Le Theol ils en content dix,
entre lesquels Cheter (...) est le premier,
qui signifie une couronne
representee par (...) symbole de la
trinité, c' est pourquoy ils luy attribuent
le nom essentiel de Dieu
(...), et disent qu' il influë par
les seraphins au premier ciel mobile,
et en toutes choses pour leur
donner l' estre. Le 2 sephirot est
(...) sagesse, qui influë avec
le grand tetragramme (...) par l' ordre
des cherubins dedans le firmament
les idees de toutes choses.
J' aurois beaucoup de choses à
rapporter sur ces deux noms, mais
passons outre de peur que cela
vous trouble la memoire.
Le troisiesme sephirot est (...),
le nom duquel est Elohim

p146

(...), et influë par les throsnes
dans Saturne, et represente le
sainct esprit, comme le 2 le fils, et
le premier le pere : c' est de ce sephirot
qu' ils tirent leurs 50 portes
d' intelligence. De plus, ils tirent
du nom Elohim les 32 chemins
de la sapience, d' autant que ce
nom est repeté trente et deux fois
en la genese, avant que l' homme
soit formé, comme si toutes les
creatures avoient esté faites par
les zirufs, ou diverses transpositions
de ce mesme nom Elohim. Le
Jesirah que j' ay rapporté sur le 207
probleme de Venetus, appelle (...)
les trois meres entre les lettres,
que les cabalistes accommodent
à ces trois sephirots, (...) au pere,
et au sel, (...) au fils, et au mercure,
et (...) au sainct esprit et au soulphre.
Je laisse les autres applications de

p147

ces trois lettres à la loy de nature,
à celle de Moyse, et à celle de grace ;
aux ebaz, thmuraths, et zirufs
des elemens, et à la ligne, au triangle,
et au quarré.
Le 4 Sephirot est Chesed (...) clemence,
son nom est (...) et influë par
les dominations dans Jupiter les
exemplaires de tous les corps.
Le cinquiesme est Ghebourah severité,
et force (...), lequel a le mesme
nom que le troisiesme, et influë
par les puissances, et par Mars
la guerre, etc. Le sixiesme est Tiphereth
(...) grace, qui influë la lumiere,
et la vie par les vertus, et par
le soleil : il a pour son nom Eloah
(...). Le septiesme, (...) Nehte victoire,
influë l' amour de la justice dans
Venus, par les principautez, et
a pour son nom (...) Jehouatheuaot,
et produit les vegetaux. Le

p148

huictiesme est Hod (...) loüange influe
par les archanges, et par
Mercure la concorde avec son
nom, (...) Elohim Tseuaot. Le
9 (...) influë ce qui sert à accroistre
les choses d' icy bas, par les
anges, et par la lune, et a pour son
nom (...), ou (...) Elohai, ou Sadai,
Dieu vivant, et tout puissant. Le
dernier sephirot est Malchout (...)
empire, qui influë par les ames
bien heureuses et par les creatures
raisonnables le sçavoir, et l' industrie,
ayant pour son nom Adonai
(...), seigneur.
Voila les dix numerations par
lesquelles les cabalistes veulent
que Moyse soit parvenu à la cognoissance
du Beresit, et du Mercaua ;
les divers rayons par lesquels
Dieu nous depart tout ce qui est
icy bas ; la chaisne d' or avec laquelle

p149

Jupiter attire tout à soy :
l' eschelle de Jacob, par laquelle
nos prieres, et nos voeux montent
à Dieu, et ses graces descendent
à nous : en fin ils veulent que les
10 cathegories, et les cieux leur
soient attribuez, et que Moyse ait
surmonté les dix especes de charme,
desquelles Ammonino, et Amaël
magiciens de Paraon se
servoient, par les dix vertus de ces
sephirots respondantes aux dix
commandemens de Dieu.
Vous pouvez encore remarquer
qu' on les appelle Belimah
(...), par ce qu' ils sont des nombres
tres-purs sans addition, ou
que les choses divines se comprennent
mieux par une profonde
meditation en silence, que par
discours. Je ne vous dy point qu' ils
pensent qu' Adam eut la science

p150

de toute la nature par ces numerations,
et que Moyse fist ses miracles
par les mesmes ; que Solomon
cogneut toutes les plantes, et acquit
la grande sagesse, qui le faisoit
admirer ; et mesmes que le
messie doit faire tous ses prodiges,
et miracles par ces sephirots,
car cela est assez vulgaire : bien que
les autres dient que ç' a esté par la
vertu du grand nom (...) que tout
cela a esté fait.
Le D je vous supplie me donner
quelque exemple, lequel me
fasse comprendre la façon dont
les cabalistes se servent de toute
ceste cabale.
Le Theol je le veux, et suis
content de me servir du grand
nom de Dieu pour cet effet, car ils
ont beaucoup pris de peine à dire
tout ce qu' ils ont peu penser sur

p151

ce subject. Ils veulent donc que la
premiere lettre (...) represente la simplicité
de l' essence divine, lequel
compose toutes les lettres, et contient
tous les nombres, car il vaut
dix ; c' est pourquoy les chaldeens
representent le grand nom tetragramme
avec un seul (...) trois fois
repeté.
C' est ce nom par lequel ils pensent
que Moyse a fait des merveilles,
et qui par sa vertu a creé le
ciel, et la terre, comme si toutes
les creatures n' estoient que ce
nom estendu par tout ; le (...) y est
deux fois, à ce que le premier represente
la production ad intra ,
qui est en Dieu, et le second la
production ad extra ; celuy-là respond
à la pensee, celuy-cy à la parole,
celuy-là est le modelle, et l' idee,
et celuy-cy en est comme

p152

l' effect.
Et tous deux representent les
deux natures qui sont au verbe
eternel incarné : car le premier (...)
qui suit apres (...) lequel signifie le
pere, nous monstre la nature divine ;
apres lequel suit le (...) symbole
du sainct esprit : le second (...) respond
à la nature humaine ; ou bien
les deux (...) nous feront ressouvenir
de l' egalité des deux personnes
produites par le pere, signifié par
(...) qui vaut dix, autant que les deux
(...), lesquels multipliez l' un par
l' autre font 25, le double duquel
donne 50 pour le grand jubilé.
Il n' y a que trois lettres diverses
en ce grand nom, lesquelles sont
toutes circulaires : car si vous multipliez
(...), ou (...), ou (...), c' est à dire 10,
ou 5, ou 6, ces nombres se rencontrent
tousjours à la fin de la multiplication,

p153

car dix fois dix font
cent, et dix fois cent font mille, qui
a tousjours dix à la fin, et est le cube
des cubes : de mesme cinq fois
cinq font 25, et six fois six trente
six, et ainsi jusques à l' infiny. Ils
multiplient aussi ce ternaire de
lettres par soy mesme, afin de
treuver neuf cieux, et neuf ordres
d' anges : et disent que Moyse estendit
ce nom en trois fois 72 lettres,
qui font 216, autant que le cube
de six : de plus, qu' ils pensent
que le (...) Torah ne soit autre chose
que ce grand nom Schem Hammaphoras,
et qu' il contient deux
milions de lettres, autant qu' il sortit
d' ames d' Aegypte, y compris les
vieillards, les femmes, et les enfans.
Or ils tirent le susdit nombre
216 de 3 versets du 14 de l' exode,
chacun desquels contient 72 lettres

p154

au texte hebrieu, lesquelles
produisent autant de noms explicatifs
du tetragramme, chacun de
trois lettres, et ce en dix manieres
differentes par autant de Zyruphs,
ou commutations de lettres : ils
tiennent aussi ce nombre de 72
en (...) par leur Ghematrie, car (...) vaut
dix, mais avec (...) il fait 15, et puis (...),
(...) valent 21, et finalement les 4 pris
ensemble valent 26, or 10, 15, 21, et
26 font septante deux, par lesquels
ils disent que Moyse prosterna
non seulement les 6 cents chariots
d' Aegypte, mais aussi les 72 potentats,
et langages representez par
autant de grenades, et de cymbales
qui estoient au bord de la robbe
du grand prestre, autant qu' il y
eut de langues, et de nations divisees
à la confusion de Babylone.
Enfin le grand nom de Dieu est si

p155

remply de mysteres qu' on en
pourroit faire des volumes entiers,
si nous voulions suivre la force,
ou la signification qu' ils donnent
aux nombres : car si tost que
ils apperçoivent quelque rapport
d' iceux avec quelque effect
de la nature, ou de la grace, ils se
jettent incontinent sur ces considerations,
comme quand ils disent
que la derniere porte d' intelligence
estoit reservee au messie,
d' autant qu' il devoit nous delivrer
parfaictement de l' Aegypte
des pechez, et des imperfections,
nous donnant la beatitude, qui est
la fin du Binah, et le commencement
du Hochmah ce qu' ils pensent
avoir esté signifié par la delivrance,
et issuë de l' Aegypte, laquelle
est repetee 50 fois seulement
en l' escriture saincte pour nous

p156

monstrer le grand jubilé de nostre
redemption, que le messie a
peu donner, Moyse n' ayant entré
qu' en la 49 porte denotée par le
quarré des 7 inferieurs sephirots.
Ces sephirots, vestemens, ou
courtines, qu' ils attribuent à la divinité,
ont plusieurs noms qu' il
sera bon que vous sçachiez, afin
de les comprendre plus facilement,
voicy comme un docte poëte
les descrit, lequel commence
par la plus basse, que nous avons
nommee Malchut.
tantost elle est le regne, etc. 

p158

nous parlerons, Dieu aydant,
une autre fois de ces numerations,
ou sephirots plus amplement, si je
voy qu' il en soit besoing, desquels
il me souvient avoir discouru en
la 50 question sur la genese : souvenez-vous
cependant que ces diverses
significations des susdits
sephirots, servent grandement
pour entendre le zoar, et les autres
cabalistes, qui ont presque
tousjours en la bouche quelqu' un
de ces noms.

p159

Jamais je n' aurois fait si je voulois
vous raconter tout ce qu' ils
disent de leurs vingt et deux lettres,
entre lesquelles ils pensent
que les trois meres du Jezirah (...)
representent les trois mondes,
sçavoir est l' intelligible, le celeste,
et l' elementaire ; et par les
vingt et deux lettres multipliees
les unes par les autres, ils croyent
qu' on peut cognoistre le nombre
des estoiles, et de toutes les autres
creatures : voicy leur nombre (...).
Ils adjoustent à ces vingt et deux
lettres les cinq finales pour faire
le nombre de vingt sept cube du
ternaire, que Platon a pensé tenir
le lieu de la forme, du masle, et de
l' argent, comme 8 cube du binaire
tient le lieu de la matiere, du patient,
et de la femelle. Les 3 lettres

p160

susdites representent les trois elemens,
les 12 signes du zodiaque,
et les 7 planettes ; mais les seules
lettres ne sont que comme les
parties materielles des individus,
jusques à ce que les poincts, ou
voyelles leur donnent la forme, la
vigueur, et l' ame : et les accents
leur apportent les formes operatrices,
lesquelles respondent aux
influences superieures : de sorte
que celuy qui prononcera la langue
hebraïque comme il faut, representera
l' harmonie celeste, et
archetype, parce que les lettres representent
toutes les parties materielles,
les poincts monstrent les
formes, et les autres accents les
operations du composé : si bien
que ces 22 lettres seroient à ce
conte les idees de toutes les creatures
formees, et à former.

p161

Voila en sommaire ce que le
zohar, et les autres rabins, talmudistes,
et cabalistes disent de
leurs lettres, s' imaginans Dieu dedans
son Ensoph, qui darde ses
rayons, et ses influences par le
grand nom (...) representant les 4
elemens, et par les 10 sephirots sur
tout ce qui est icy bas selon les
idees du verbe eternel, que quelques
uns pensent estre le Mettatron,
l' ame de l' univers, et la forme
des formes, d' où les nombres formels
prennent leur source, et leur
origine, et vont aboutir au Malchut,
qui represente la lune archetype,
la cerve unicorne, ou le
quadrilettre (...), qui se divise en
4 fleuves à guise de la fontaine de
la genese chap. 2. Le premier fleuve
ou canal est l' amour Ghedulah ;
le 2 la justice, ou la force Geburah,

p162

le 3 la vertu agissante et masculine
Tipheret ; et le 4 la feminine recevante
Malchut ; ces 2 derniers
sont le soleil, et la lune, l' espoux,
et l' espouse des cantiques : le sens
litteral, et le spirituel, la justice, et
la misericorde, le blanc, et le rouge
cant. 5. (...), l' eau, et le sang, qui sortoient
du costé de nostre sauveur.
Le D je vous asseure que ces
inventions semblent estre merveilleusement
subtiles, et croy
qu' il n' y a rien de plus excellent
au monde que l' alphabet hebraique,
si tout ce que vous avez
rapporté des cabalistes a quelque
fondement en la nature. Mais je
n' entends pas bien la methode
qu' ils tiennent pour treuver tous
ces mysteres, c' est pourquoy je
vous prie de me la faire comprendre ;

p163

et me dire librement vostre
advis sur ces inventions.
Le Theol ils ont plusieurs façons
pour venir à leurs mysteres,
esquelles je ne treuve pas grand
fondement, car bien que ce qu' ils
disent de Dieu, et de ses perfections,
soit conforme à l' escriture
saincte, et à la verité, ils le tirent neantmoins
de certains principes,
qui ne me semblent pas recevables :
c' est pourquoy mon sentiment
est que toute la cabale rabinesque
n' est qu' une pure invention
des hommes, qui ne peuvent
avoir autre raison de leur dire que
ce qu' ils sçavent à posteriori par les
effects, soit par science, soit par revelation.
Ce qui n' empeschera pas
que je ne vous rapporte ce qui est
de leur methode, et de leur art.
La premiere façon s' appelle

p164

Etbas, c' est à dire transpositions de
lettres, ce qui se fait en deux sortes ;
premierement par equivalence
de nombres, lors que deux dictions
contiennent une mesme
somme, ce qui se voit en Metattron
(...) qui comprend 314, aussi
bien que Sadai (...), c' est pourquoy
ils le mettent, ou l' interpretent
souvent l' un pour l' autre,
d' où l' arithmantie des grecs semble
avoir pris son origine, laquelle
j' ay refutee en la 50 question sur
la genese art. 3 4 et 5. L' autre sorte
est par metatheses, et anagrammes,
telles que sont celles desquelles
je me suis servy pour expliquer
la premiere parole de l' escriture
saincte Beresit, en la 4 question art.
2 et 3 voicy une transposition plus
briefve au nom de Dieu (...), et (...)

p165

lo qui veut dire non , comme si on
vouloit dire que nous comprenons
mieux ce qui est des grandeurs
divines par la negative, que
par l' affirmative ; la lumiere divine
estant comme la nuict d' Orphee,
et d' Hesiode, ou comme un Ensoph
à nostre regard. Vous pouvez voir
quelque chose de semblable dans
le cratyle de Platon touchant le
nom d' Apollon.
La seconde façon est appellee
Thmurah, qui fait les changemens
materiels ; la troisiesme Ziruph, laquelle
fait les mutations, et combinations
formelles, et n' est guere
esloignee du Zairagia des mores :
or par ceste voye ils conjoignent
les 22 lettres de leur alphabet,
selon qu' ils ont appris du Jezira,
qui parle ainsi. (...),

p166

afin qu' ils ayent 22 alphabets.
La quatriesme façon est leur
Ghilgul quotité numerale, par laquelle
ils treuvent quantité de
mysteres dans chaque mot selon
la valeur de son nombre, comme
quand en (...) Malah, c' est à dire sel,
ils treuvent 78, lequel divisé en
deux donne 39, qui est un nombre
pareil à ce mot (...) Cuzu, qu' ils appellent
le fourreau du grand nom ;
divisé en trois parties ils ont 26, autant
que vaut le tetragramme : je
laisse le reste d' autant que je ne
voy aucune raison en tout cecy.
La cinquiesme façon est le Notaricon,
qui met une lettre, ou une
syllabe pour un mot, ou pour une
lettre un mot entier : c' est ainsi que
par ces trois lettres (...) ils signifient

p167

la Ghematrie, le Notaricon, et
le Themurah, qui sont les 3 parties
de la cabale : et que par amen , qui se
lit dans Isaye chap. 65 vers. 16 ils
entendent (...),
c' est à dire le seigneur roy fidelle :
et par ce mot du 3 psalme (...), ils
entendent les romains, les babyloniens,
les ioniens, et les medois.
Il seroit facile d' escrire aussi viste
comme on parle, qui voudroit se
servir de ces abbreviations.
Enfin la sixiesme façon est appellee
Ghematrie, laquelle se sert
des mesures, et des proportions.
Mais laissons tous ces discours,
puis que nous pourrions treuver
de semblables artifices en nostre
alphabet françois, cela ne dependant
que de l' institution, et de la
volonté des hommes, c' est assez

p168

que les cabalistes nous fassent
voir par les diverses revolutions,
dont ils se servent, qu' ils croyent
fermement que Dieu est, et qui
luy attribuent les mesmes perfections
que nous recognoissons, et
adorons en la divinité.
Leurs 12 revolutions du nom
tetragramme, qu' ils appellent Hauaioth,
afin que la vertu divine passant
par les 12 signes du zodiaque,
et par tous les cieux jusques à
nous, donnent un certain tesmoignage
qu' ils ne s' esloignent point
de l' arbre de vie qui porte douze
fruicts en l' an, une fois chaque
mois : ny des 12 portes de la cité
celeste, ce qui nous represente nostre
sauveur, et le vray paradis, auquel
parviendront tous ceux qui
auront recognu le vray Dieu, et
l' auront servy selon sa saincte volonté.

p169

Plaise à sa bonté divine
nous faire ceste grace, à ce que
nous le benissions, et l' adorions eternellement
avec tous les bienheureux.
Je croy que tout ce que
nous avons dit jusques à present,
est suffisant pour vous armer contre
les atheistes, et pour les faire
rougir de honte en quelque compagnie
que vous les puissiez treuver,
s' ils ne veulent quitter leur impieté.
Le D ceste verité me semble
si bien prouvee, qu' il n' est pas possible
d' en douter, aussi n' ay-je jamais
voulu suivre ces malheureux
atheistes, qui sont indignes de vivre,
et croy que si Dieu n' estoit infiniment
misericordieux, et souverainement
bon, qu' il les reduiroit
au neant, ou les puniroit d' une peine
infinie.
Le Theol il ne faut pas que

p170

vous doutiez qu' il les punira, s' ils
ne se repentent avant la mort : car
estans hors la grace de Dieu, et ses
ennemis jurez, ils meritent l' enfer,
et tous les tourmens qui y sont.
Le D monsieur, je sçay qu' en
vostre religion vous tenez ces maximes,
mais je n' y trouve pas grande
apparence : car seroit-il possible
que Dieu, qui est si bon, voulust
que sa creature fust à jamais miserable ?
Le Theol parlez vous tout à
bon, ou si vous voulez vous donner
carriere ? Comment, ne croyez
vous donc pas que tout ce qui est
en la religion chrestienne, est
tres-veritable, puisque c' est Dieu
mesme qui en est l' autheur ? Il est
vray que Dieu est souverainement
bon, voire la bonté mesme,

p171

mais il est aussi juste, comme il
est bon, et par consequent il ne
faut point douter qu' il ne chastie
les meschans, aussi bien comme il
recompensera les bons.
Le D monsieur, j' ay estudié à
une escole, laquelle ne m' a pas appris
cela : car les maistres que j' ay
eu, m' ont entretenu en ces pensees,
que c' estoit assez de croire en
Dieu, mais que tout le reste avoit
esté inventé par les hommes,
et pour ce sujet veulent que nous
portions le nom de deistes.
Le Theol il y a long temps
que j' ay ouy parler de ceste secte,
mais asseurés vous qu' elle ne vient
que d' un pur libertinage, lequel
a pris pied en France, lors que les
maudites heresies de Calvin, Luther,
et des autres heretiques y
ont entré. S' il y eut jamais une

p172

grande porte ouverte à toutes sortes
de desbauches, d' impietez, et
de trahisons, c' est celle-cy, par laquelle
le dragon à sept testes tasche
d' attirer avec sa queüe endiablee
une grande partie des hommes
à sa suitte pour estre à jamais
damnez avec luy. Or je suis bien
aise que vous m' ayez descouvert
vostre esprit : car le mal estant cognu,
est à demy-guary, et me fais
fort avec l' ayde de Dieu de vous
tirer de cet erreur.
Le D vous appellez erreur, ce
que j' estime veritable, neantmoins
si vous pouvez me monstrer
que je suis en mauvais chemin,
et que nos opinions sont
fausses, je ne seray point opiniastre,
ains j' embrasseray volontiers
ce que vous me proposerez.
Le Theol il ne se peut faire

p173

que vous ne sçachiez que c' est que
la religion chrestienne, car vous
estes françois de nation, c' est
pourquoy je pense qu' il suffit que
je vous propose, et vous maintienne
qu' il n' y a que ceste seule religion
qui soit la vraye, d' où il s' ensuit
que la vostre pretenduë, et
tout ce qu' il y en a au monde, sont
toutes fausses, et irreligions, non
pas religions, excepté la pure, saincte,
et veritable religion des chrestiens,
qui font hommage au verbe
eternel, et à toute la trinité
bien-heureuse, de leur ame, de
leur corps, et de tout ce qu' ils ont,
et detestent tous ceux qui desadvoüent
Jesus-Christ nostre sauveur,
et redempteur, et quittent
la voye qu' il nous a donnee pour
aller regner avec luy au ciel.
Le D pourriez vous me monstrer

p174

que vostre religion fust telle
que vous dites ? Car bien que
j' aye esté baptisé, et que j' aye receu
la confirmation ; neantmoins
estant plus grand, et plus aagé,
certaines personnes de bon esprit,
et de bon jugement (du moins
ont-ils ceste reputation parmy les
honnestes compagnies) m' ont fait
entendre que la religion chrestienne
ne servoit que pour retenir
les hommes brutaux en leur
devoir, afin que les loix en fussent
mieux gardees : mais que les sages,
et les esprits déniaisez, et relevez
par dessus le commun, comme
l' or par dessus les metaux, n' avoient
que faire de telles considerations
pour bien faire, la vertu
estant aymee de tels personnages
pour la beauté qu' elle a en soy, et
non pour l' utilité, ou pour la peur

p175

de quelque supplice. En quoy j' ay
esté confirmé par la lecture que
j' ay faite de quelques autheurs,
qu' on estime tres-honnestes hommes,
esprits forts, et excellens, et
qui ont couché par escrit leurs advis
assez librement, tels que sont
Charron, et Cardan en leurs sagesses,
et quelques autres.
Le Theol il faut estre merveilleusement
credule, et foible
d' esprit, pour s' estre laissé persuader
à ces jeunes folastres, lesquels
vous avez hantez, que la religion
chrestienne n' estoit faite que
pour la manutention des loix. Est
il possible que vous vous soyez
laissé aller aux cajolleries de ces
badins, qui ne desirent rien davantage
que de se donner du bon
temps à quelque prix que ce soit ?
Faut-il que vous ayez perdu la foy,

p176

que vous avez receuë au sainct
baptesme, et à la confirmation,
par la persuasion de quelques étourdis,
qui cherchent, et taschent
par tous moyens de quitter la
crainte de Dieu, à ce qu' ils puissent
commettre leurs excez, et
qu' ils se veautrent dans l' iniquité,
et dans la lubricité sans aucune
synderese et remords de conscience ?
Bon dieu, où en sommes nous !
Ne rougissez vous point de honte
de vous estre laissé abuser si facilement,
et d' avoir renoncé à la religion
chrestienne avec si peu de
raison ? Mais quoy, prenez bon
courage, il ne tiendra qu' à vous si
vous ne quittez cet erreur, et revenez
à la vraye creance, sans laquelle
il est impossible d' estre sauvé.
Dites moy de grace, qu' avez vous

p177

treuvé à redire en nostre religion ?
Enseigne-elle rien qui ne soit conforme
à la droite raison, et favorable
aux bonnes meurs ? Je sçay
qu' elle fait pallir, et trembler les
meschans, et qu' elle les empesche
d' effectuer leurs mauvais desseings
si librement comme ils feroient,
s' ils pouvoient tout à faict
bannir la crainte de Dieu, et de sa
justice de leur esprit. Je sçay
qu' ils ont la religion catholique
en horreur, par ce qu' elle reprimende
leurs appetits dereglez, et
leur defend ce qu' ils ayment, et
cherissent par trop. Je sçay qu' ils
redoutent qu' on leur en parle serieusement,
et qu' ils n' y veulent
pas mesme songer, de peur que
l' apprehension des jugemens divins
ne leur oste une partie de la
volupté, qu' ils prennent à assouvir

p178

leurs sentimens, et leur donner
tout ce qu' ils demandent, et au
delà. Bref, je sçay que jamais ils ne
s' accorderont à ce qu' enseigne la
religion chrestienne, cependant
qu' ils viveront à la façon des bestes,
et qu' ils espouseront le party
de l' appetit inferieur commun à
l' homme, et aux brutes, et qu' ils se
banderont contre la raison, laquelle
voyant les motifs de nostre
foy, et considerant la beauté, l' honnesteté,
et l' utilité de la religion
catholique, ne peut qu' elle ne
l' embrasse, et qu' elle n' advouë,
que ceste religion ne peut estre
venuë que de Dieu, si tant est
qu' elle vueille cooperer avec les
graces divines, que son createur
luy depart pour l' esclairer, lors
que de son costé elle considere, et
pese serieusement toutes les raisons

p179

qu' elle propose pour se faire cherir, et embrasser.
Ostez donc de vostre esprit ce
qui vous a fait quitter la foy, et la
religion, et croyez fermement
qu' il n' y a rien dans sa doctrine,
qui ne soit honneste, sainct, utile,
et veritable : pour ce qui est des
autheurs, que vous avez rapportez,
je suis content que me dispensiez
d' en dire mon advis, car ils
ont desja un assez mauvais bruit,
sans que j' y adjouste mon sentiment.
Le D monsieur, il me semble
que vostre discours m' a fait ressentir
je ne sçay quelle lumiere, c' est
pourquoy je veux y penser un peu
plus serieusement : neantmoins
vous m' obligeriez fort si vous me
vouliez dire ce que vous jugez des
autheurs que j' ay citez, car c' est

p180

par cette lecture que je suis tombé és
opinions que vous avez touchees,
asseurez vous que cela pourra me
servir à quitter l' opinion que j' avois
conceuë de la religion catholique.
CHAPITRE 9

auquel le theologien porte son jugement
touchant les oeuvres, et les
opinions de Charron, et de quelques
autres escrivains, et où ses impietez
sont descouvertes, et refutees. 
Le Theologien
je sçay que c' est une
matiere fascheuse, et
odieuse, lors qu' il est
question de porter
son jugement de

p181

quelques autheurs, soit qu' ils
soient morts, soit qu' ils soient vivans,
c' est pourquoy je n' entreprens
pas de dire ce que je pense
de ceux que vous avez proposez,
sinon parce que vous jugez que
cela vous pourra esclaircir sur vos
doutes, et servir à vous tirer de vos
erreurs. Ce qui rend tels jugemens
odieux est parce qu' il est
difficile de persuader qu' on ne
fasse cela par envie, qu' on porte à
leur plume, et à leur gloire ; ou
qu' on ne se vueille venger pour
quelqu' autre consideration, ou
qu' on ne vueille faire paroistre
qu' on est plus habile, plus judicieux,
ou plus eloquent qu' ils n' estoient ;
or tous ces motifs sont autant
blasmables, comme ils sont
vicieux, et indignes d' un vray
chrestien. Aussi ne (...) poussé

p182

de ces respects, et aymerois beaucoup
mieux convaincre les erreurs,
qu' ils auroient commis par
des raisons contraires, que de les
blasmer sous d' autres pretextes.
C' est ce que j' ay souvent pensé
touchant la sagesse de Monsieur
Charron, mais le temps, et le loisir
ne me l' ont encore permis, et ay
tousjours attendu que quelqu' autre
l' entreprist donnant une sagesse
qui soit aussi chrestienne,
qu' humaine, et polytique, à ce que
la police, et la religion se conjoignent
par le lien d' une veritable
harmonie, et qu' un chacun voye
deux choses tres clairement : premierement,
que la foy, et la religion
catholique ne repugne en
aucune façon à la meilleure police,
qui se puisse imaginer au monde.
Secondement, qu' elle n' empesche

p183

point la subtilité de l' esprit,
ny les belles, et curieuses recherches,
et inventions, ny mesme
les recreations, et les voluptez honnestes,
vertueuses et raisonnables,
à ce qu' il n' y ait pas un homme capable
de raison sur la face de la
terre, qui voyant l' excellence, la
beauté, l' utilité, et la facilité de la
religion catholique, ne la suive,
et l' embrasse courageusement.
Neantmoins puisque vous me
pressez, je vous diray un mot de ce
que je pense des oeuvres de ce personnage,
sans toucher à ce qui est
des propos, qu' il tenoit és compagnies
qu' il avoit coustume de frequenter,
lesquelles estoient fort
libertines, et ressentoient souvent
l' atheisme : ny à ces façons de vivre,
desquelles je pourrois dire
beaucoup de particularitez, s' il

p184

estoit à propos, et necessaire. J' en
ay veu bien peu, lesquels ayant leu
ces trois veritez, et les discours
qu' il a fait de la divinité, et des
mysteres de nostre foy, n' en fassent
de l' estime : mais si on les considere
de pres, on y trouvera beaucoup
de maximes, lesquelles approchent
fort de l' impieté, particulierement
en sa premiere verité.
Il y a plus de difficulté en sa sagesse,
de laquelle on juge diversement :
les uns disans qu' elle est seminaire
d' irrelligion, et d' atheisme :
les autres confessans que si
un homme n' est bien sur ses gardes
en la lisant, qu' il court risque
d' estre esbranlé en sa creance, et
en sa religion ; il y en a qui disent
qu' ils n' ont jamais rencontré un
meilleur livre, à cause que le style
en est pressé, et nerveux, et que les

p185

maximes y sont druës, et frequentes,
et ceux-là sont ordinairement
libertins, et se moquent des ceremonies
de l' eglise, marris de ce
qu' il leur faut garder ses ordonnances,
sur peine d' estre declarez
heretiques.
Or laissant à part les jugemens
qu' on en fait, je me contenteray
pour maintenant (attendant quelqu' autre
occasion, ou j' examine
toute sa sagesse, si quelqu' autre,
selon que je souhaitte, ne me previent)
de dire que cet homme
estant catholique, et escrivant entre
les chrestiens devoit s' abstenir
de plusieurs choses qu' il a escrit,
ou du moins les devoit tellement
addoucir, et modifier, que
personne ne fust choqué particulierement
en ce qui est de la verité
de nostre foy, laquelle est la racine

p186

de nostre salut eternel.
Je dy donc qu' il a eu tort (luy
qui estoit homme de jugement, et
qui prevoyoit bien que plusieurs
se scandaliseroient de la façon
qu' il traittoit la sagesse humaine,
comme il a assez tesmoigné en sa
preface) qu' il n' a esclaircy plusieurs
difficultez, et qu' il n' a parlé
plus chrestiennement, et plus religieusement,
qu' il n' a pas fait dedans
ce livre, duquel nous parlons
maintenant.
Ce n' est pas que je croye qu' un
bon esprit se puisse pervertir par
ceste lecture, car il fera comme
l' abbeille, laquelle sucçote ce qu' il
y a de bon en la fleur, et laisse le
venin, et ce qui est inutile, ou mauvais.
Mais il y a bien peu de tels esprits
parmy le monde, nommément
s' ils ne sont cultivez par une

p187

longue estude, et meditation en
ce qui est de la vraye philosophie,
et de la theologie : car c' est à ces
esprits qui sont fournis de toutes
sortes de sciences, et qui ont la religion
gravee bien avant dans l' ame,
de pouvoir lire, et juger de tels
livres comme est la susdite sagesse,
et non pas a un tas d' ignorans, qui
parlent comme perroquets en cage,
sans sçavoir le plus souvent ce
qu' ils disent, et qui font trophee
de n' entendre ny grec, ny latin, se
contentans de sçavoir se moquer
de la religion, et de blasphemer,
et renier Dieu parmy leurs confidens.
Le D monsieur, obligez moy
tant que de me dire quelque chose
en particulier de ce que vous y
trouvez à redire, afin que je puisse
voir si ce sera ce qui m' a entretenu

p188

en ceste mienne opinion de laquelle
je vous ay parlé.
Le Theol il faut encore icy
faire distinction, car il y a deux
impressions de ce livre : la premiere
est de Bordeaux, et l' autre plus
recente est de Paris, de l' an 1618, laquelle
a esté corrigee, et par consequent
il y a moins à reprendre
qu' en la premiere, ce sera peut
estre celle-là que vous aurez leuë.
Le D veritablement c' est celle
de Bordeaux que j' ay leuë, c' est
pourquoy je vous prie de m' en dire
vostre sentiment, sans neantmoins
oublier ce que vous penserez
de l' autre edition, afin que je
m' en puisse desormais servir, s' il
n' y a plus d' erreurs, ny de danger
en la lisant.
Le Theol ce seroit une chose
trop longue de parler de tout ce

p189

qu' on pourroit reprendre en ces
deux editions ; et puis vous avez
desja à la fin de la derniere edition
ce qui a esté osté de la premiere ; je
parcouray seulement l' epitome
qu' il a fait de sa sagesse, d' où vous
pourrez tirer le jugement de tout
le reste.
Commençons par la preface,
dedans laquelle il touche 7 points
qu' il dit estre causes pourquoy on
le blasme ; le premier est, qu' on
prend les choses autrement qu' il
ne les entend, rapportant au droit
ce qui est du fait : mais il eust deu
tellement esclarcir cela, lors qu' il a
esté question d' en entamer le discours,
que personne n' eust esté
deceu, et qu' un chacun eust peu
facilement distinguer, lors qu' il
parle de faire, ou de juger, et
quand il n' a que proposé sans resoudre ;

p190

quand il parle par la bouche,
et selon l' opinion d' autruy, et
non de son creu ; car comment
veut il que le lecteur fasse choix
de ses propres opinions entre celles
des autres, puis qu' il broüille
tellement son discours, et pesle-mesle
ce qui est du sien, et ce qui
est des autres, qu' il faudroit un argus
pour le recognoistre, encore
ne sçay-je pas s' il en pourroit venir
à bout.
Il me semble que c' est abuser,
et perdre le lecteur, quand on embarasse
tellement le discours, que
celuy qui le list, est en un danger
perpetuel d' espouser les pensees, et
les resolutions de ceux qui sont introduits,
lesquelles sont fausses ou
ne valent rien, comme si c' estoient
les conceptions, et conclusions de
l' autheur ; si bien que le mal qui

p191

suit de ceste lecture, peut justement
estre imputé à la façon d' escrire,
dont l' auteur s' est servy, soit
qu' il l' ait ainsi voulu par malice,
ou par imprudence : ce qui faict
que je ne puis excuser Monsieur
Charron, lequel est d' autant plus
blasmable, qu' il sçavoit mieux, ou
aussi bien qu' aucun autre, que son
livre feroit beaucoup de libertins,
et que sa sagesse en rendroit un
grand nombre d' insensez, tels que
sont ceux qui vous ont seduit par
leurs propos emmiellez, ou pour
mieux dire envenimés des pensees
de Charron.
Certainement il ne merite point
d' excuse, quoy qu' il pretende qu' on
entend des actions exterieures, ce
qu' il a dit des interieures, veu que
c' est à faire à un hypocrite, et à un
sot, indigne de la conversation humaine

p192

de faire tout au rebours à
l' exterieur, et en presence des
hommes, que ce qu' il croit et pense
en son interieur : car pourquoy
le corps a-il une si grande correspondance
avec l' ame, et les sens
avec l' esprit, si ce n' est afin qu' ils
se rendent conformes en leurs actions ?
Pourquoy l' ame a-elle un
tel domaine, et un si grand ascendant
sur son corps ? Est ce pas à ce
qu' elle luy donne le mesme branle
qu' elle a en soy-mesme ? Et quoi,
si l' esprit, et le corps n' ont qu' un
mesme autheur, (si ce n' est qu' on
nous vueille renouveller l' heresie
des manicheans avec leurs deux
principes, l' un de la lumiere, l' autre
des tenebres, l' un du corps, l' autre
de l' ame) pourquoy est-ce que
nous déguisons nos comportemens ?
Voyez je vous prie, ou ceste

p193

pernicieuse doctrine de Charon,
et de ceux de sa suite nous meine ;
car si le sage a tout autre chose en
l' ame que ce qu' il fait paroistre au
dehors, quelle asseurance y aura il
en ces paroles ? Lors qu' il dira vous
estre amy, ce sera lors qu' il vous
trahira, et pourchassera vostre
mort, ou vostre honneur, et par ainsi
tout le fondement de la police, et
des estats s' en ira par terre.
Je ne croy pas qu' il y ait homme
d' esprit, et de jugement qui ne
die que jamais plus grande folie
n' a peu monter en la teste de
Charron, que lors qu' il a voulu establir
ceste sottise, et la faire passer
en maxime de sagesse ; et me
semble que c' est assez pour decrediter
tous ses discours, puis qu' ils
sont la pluspart fondez sur ceste
fole opinion. Je vous donne à penser

p194

combien il est esloigné de la
pensee, et de la volonté de Dieu,
lequel ne prise rien tant qu' une
simplicité, et candeur en nos actions,
paroles, et pensees.
Si jamais aucun livre politique,
ou sagesse humaine a esloigné du
sentiment de la religion, de la
crainte de Dieu, de la vraye sagesse,
et de l' establissement d' une
vraye police, telle qu' elle doit se
retrouver entre ceux qui suivent
la droite raison, c' est celuy de la
sagesse de Charron, car lors qu' il
est question de descrire les conditions
du sage, il se rend si ridicule,
qu' on voit assez que c' estoit un esprit
extravagant, et remply de
presomption, lequel se croyoit
plus habile, et de meilleur jugement
que tout le reste des hommes,
ausquels il veut prescrire des

p195

loix non seulement de leurs actions
exterieures, mais aussi de
leurs pensees les plus secrettes,
comme s' il estoit quelque souverain
dictateur ou legislateur.
Je sçay que vous me direz que
son opinion n' est pas telle, ou du
moins si cruë comme je la fais :
qu' il ne parle pas pour nous obliger
à suivre ses propositions, ny
pour nous lier à ses pensees, mais
qu' il nous laisse en nostre liberté,
et qu' il doit estre permis à un chacun
de donner son advis, et de publier
le sentiment qu' on a sur chaque
chose, nommément en ce qui
appartient aux moeurs, et façons
de vivre. à quoy d' autres adjousteront
qu' il y a de grands personnages
fort sçavans, et fort judicieux,
qui maintiennent qu' il n' y a
rien dedans ceste sagesse, qui ne se

p196

puisse dire, et soustenir, s' il est bien
entendu, comme il faut.
Mais je responds à cela, premierement
que je ne doute point que
beaucoup de choses ne puissent
estre bien entenduës, et tirees à un
bon sens, et se peut faire que Monsieur
Charron n' ait pas tousjours
eu mauvaise intention en publiant
ses pensees ; ce qui le peut
justifier là dessus, est que dés son
vivant il a corrigé, et addoucy
beaucoup de points, qui se retrouvoient
en la premiere edition,
comme il paroist en la seconde, et
le testament qu' il fist un peu devant
sa mort lequel est en partie
rapporté en l' eloge qu' on a faict
de sa vie, qui se retrouve au commencement
de la seconde edition :
car ce testament nous donne
asseurance de sa bonne volonté,

p197

et de sa pieté envers Dieu, auquel
il semble avoir recours.
Secondement, je respons que
son livre ne laisse pas d' estre dangereux
pour les esprits foibles, tels
que sont les libertins, et les deistes,
encore qu' un esprit fort, bien
fait, et qui a la crainte de Dieu emprainte
bien avant dedans son
ame, en puisse faire son profit. En
suite dequoy il eust deu tellement
proposer ses opinions, que les libertins
n' eussent point eu d' occasion
de fortifier leurs erreurs par
la lecture de son livre, veu qu' il
sçavoit que ce siecle icy porte
multitude d' esprits remuants, qui
ne cherchent qu' à ruiner l' estat, et
la religion.
Tiercement, je dy qu' il n' est pas
permis de publier son sentiment,
lors qu' on juge, ou qu' on doit probablement

p198

juger qu' il nuira, et sera
cause de la perte de plusieurs esprits.
Or je maintiens que ces livres
de la sagesse ont plus fait de mal,
que de bien, et ont fait égarer de
la vraye religion un plus grand
nombre de personnes, qu' ils n' en
ont tiré d' erreur.
Je passe sous silence beaucoup
de choses qu' il a proposees, comme
si luy seul les eust apperceuës,
ou qu' elles eussent surpassé l' esprit
du vulgaire, lesquelles neantmoins
sont aussi bien recogneuës
par les rustiques, et villageois,
comme par ces esprits relevez, et
déniaisez, qu' il nous descrit : car
qui ne sçait, et ne confesse que
nous avons mille coustumes, et
façons de vivre, et de signifier ce
que nous avons dedans l' ame, lesquelles
seroient aussi bonnes, ou

p199

meilleures, si nous vivions d' autre
façon ? Par exemple qu' il seroit
aussi à propos de disner debout,
comme assis : de se toucher à la poictrine,
ou à quelqu' autre partie du
corps pour s' entre-saluër, comme
d' oster le chapeau : de porter un
habit plus leger, ou plus pesant,
fait d' une piece, ou de plusieurs, et
1000 autres choses semblables, lesquelles
sont si indifferentes que
nous nous accommodons aux uz,
et coustumes de toutes sortes de
nations, parmy lesquelles nous
avons à converser, bien que plusieurs
practiquent le contraire,
comme les espagnols, ou italiens,
qui retiennent leur particuliere
façon d' habits, bien qu' ils demeurent
en France.
Pour ce qui est de ces choses là
chacun en peut juger comme bon

p200

luy semble : mais il se faut bien garder
d' estendre ces pensees à ce qui est
de nostre foy, et de nostre creance,
comme font un tas d' ignorans, lesquels
ayans leu ceste sagesse, s' estiment
plus habiles que ceux qui ont usé
leur vie à l' estude des bonnes lettres,
et à la contemplation des mysteres
divins. Vous les verriez avec
leur modestie academique mettans
tout en doute, et prenans autant
de peine à se prendre garde
de croire que les catholiques ont
la vraye religion, comme s' ils deffendoient
une ville contre l' ennemy.
Pourquoy cela ? Parce qu' ils
ont leu dedans la sagesse de Charron
qu' une des conditions du sage
est juger de tout, et ne s' aheurter,
ou ne s' attacher à rien : afin que
l' esprit de ces sages demeure indifferent,
general, et universel. Mais

p201

c' est maintenant à eux que j' en
veux, et suis content d' excuser
Charron (par une supposition pretenduë
qu' il n' ait point eu mauvaise
intention : nous supposons
bien quelquefois des choses impossibles)
et rejetter tout le blasme
sur ces esprits boufons, et malins :
car bien qu' il ait dit quelque chose
en la premiere edition, qui les
ait peu mener au libertinage, neantmoins
il faut avoir recours à la
2 impression, car estant la derniere,
et corrigee de sa main, elle doit
estre tenuë pour la meilleure, or
il fait paroistre combien il est
esloigné du pyrrhonisme en matiere
de religion. Voicy ses paroles
au 2 chapitre de son epitome.
ceste liberté etc. 

p202

il faut donc remarquer que les
deistes tirent de pernicieuses conclusions
du livre de Charron, contre
son intention : je le veux ex hypothesi :
car bien qu' il ait dit en la
premiere edition page 351, que
toutes les religions fournissent
de miracles, prodiges, oracles,
mysteres sacrez, saincts prophetes,
certains articles de foy, et creance

p203

necessaire à salut : et quelques autres
choses, lesquelles prises à la
lettre sont tres-fausses, n' y ayant
que la seule religion catholique
qui ait de vrays miracles, de vrayes
propheties, et de vrays prophetes,
et articles de foy : neantmoins il
n' y a point d' apparence qu' il vueille
signifier par ces paroles, qu' aucune
religion que la catholique
ait rien de tout ce qu' il a dit, en verité,
et realité (bien que toutes les
sectes se vantassent de cela) mais il
a seulement voulu expliquer ceste
vanterie, laquelle est tres-fausse,
estant impossible qu' aucun miracle
se fasse en faveur des religions
bastardes, qui n' ont rien qu' irreligion,
et ne cognoissent pas le vray
Dieu, ou le recognoissans ne suivent
pas sa volonté, et la doctrine
qu' il nous a revelee.

p204

Ce qui nous pourroit faire ainsi
juger de l' intention de Charron,
est le livre des trois veritez, auquel
il monstre clairement contre
les athees, les juifs, les mahometans,
et les heretiques, qu' il n' y a
aucune autre vraye religion que
la catholique : car lors qu' il est
question de juger de l' intention
d' un autheur sur quelque poinct,
ou controverse proposee, il faut
avoir recours aux lieux, où il a
traicté ceste matiere fort au long,
et expressément, et non pas où il
n' en a touché qu' un mot en passant,
ou en quelque lieu, d' où on
peut tirer des raisons pour et contre.
Le D monsieur, je suis fort aise
que vous vous soyez un peu estendu
sur ceste matiere, mais je demeure
quasi en suspend si vous resolvez

p205

en dernier lieu que la lecture
de Charron soit pernicieuse, et
dangereuse ou non.
Le Theol il me semble que
vous n' avez aucun suject de douter
de cela, puis que vous me tesmoignez
vous mesme, que ceste
lecture vous a faict tomber en vos
erreurs, ou qu' elle vous y a confirmé ;
et puis que telles gens, comme
vous, qui prenent l' essort à la
premiere pensee, qui flatte leur
humeur, et s' accommode à leurs
desirs, ne peuvent qu' ils ne soient
esbranlez, lors qu' ils lisent ce que
dit cet autheur, que l' immortalité de
l' ame etc. ,

p206

la plus part desquelles
sont fausses, car entre toutes les
choses morales je ne sçay pas ce
qui est mieux prouvé que l' immortalité
de l' ame, comme il paroist
par les raisons qu' on rapporte
pour ce sujet, desquelles j' ay fait
un abbregé en respondant à la 12
objection des athees ; si vous vous
donnez la patience de lire ce que
j' en ay dit, j' estime que vous confesserez
que Charron a tort.
Pour ce qui est de la nature, qu' il
dit qu' il faut suivre, si vous l' entendez
de la nature de l' homme, telle
que Dieu l' a creée avec ses graces,
et en la justice originelle, j' accorde
que si on l' avoit encore en ceste
integrité, qu' il seroit bon de la
suivre ; il est maintenant tres-mauvais,
car elle est decheute de ceste

p207

perfection, de sorte que l' appetit
sensuel, et brutal a souvent le dessus,
et maistrise la raison au lieu de luy
obeyr, c' est pourquoy il faut suivre
la piste que la foy nous monstre,
et gourmander nos passions,
afin que nous puissions retourner
à ceste premiere perfection, en laquelle
les sens obeissoient à l' esprit
à poinct nommé, et l' esprit à
Dieu. Il n' y a point d' autre moyen
d' estre restablis en cet estat, qu' en
embrassant le chemin que la religion
catholique nous enseigne,
ce que vous ne ferez pas facilement
en lisant la sagesse de Charron,
laquelle se soucie fort peu des
choses immortelles, et divines, car
ceste sagesse humaine ne vise qu' à
bien faire ses affaires en ce monde,
et vivre paix, et ayse, comme on
dit.

p208

Or la sagesse du chrestien vole
plus haut, car elle cherche l' honneur,
et la gloire de Dieu aux dépens
du sien, si besoing est, et ne
respire autre chose que l' amour de
son createur, s' estimant bien-heureuse
lors qu' elle endure quelque
peine pour ce mesme amour : c' est
elle qui fait courageusement mépriser
tout ce qu' il y a en ce monde,
honneurs, biens, dignitez, plaisirs,
et la vie mesme, et qui nous esleve
autant pardessus nous-mesmes,
comme nous sommes élevez
par dessus les bestes.
Ce qu' il dit que nous naissons
chrestiens, juifs, etc. Est aussi cause
de ce que beaucoup de jeunes
folastres, et cerveaux mal timbrez,
qui le lisent, ne font conte de
la vraye religion, non plus que des
autres, qui sont fausses, au lieu

p209

qu' ils devroient remercier Dieu
de ce qu' ils sont chrestiens, ce
que ne leur apporte pas le païs, ny
le ventre de leur mere, mais le
sang de nostre redempteur Jesus-Christ,
lequel opere sur eux au baptesme,
qui est la porte de la vraye
religion, et comme le premier effect
de la predestination, auquel
Dieu les a choisis entre un milion
d' autres, qui ne reçoivent point
ceste premiere grace ; laquelle
convainc Charron que la vraye
religion ne se tient pas par moyens
humains, car le premier moyen,
qui est le baptesme, aussi bien que
tous les autres (tels que sont tous
les sacremens) sont voyes surnaturelles,
lesquelles ne peuvent venir
que de la main de Dieu, estant impossible
que tous les hommes du
monde, ny que toute la nature

p210

nous puisse donner la grace de
Dieu, ou nous esclairer par la lumiere
de la foy.
Passons maintenant à Cardan,
car de tout ce que dessus vous pouvez
conclurre qu' on ne peut lire
la sagesse de Charron sans peril
d' estre esbranlé en la creance catholique,
si ce n' est quelque esprit
fort, sçavant, et bien ferme en la
foy, qui se serve de ceste lecture.
Nous reserverons pour une autre-fois
à peser, juger, et examiner toutes
les autres opinions de cet autheur.