PALCOSCENICO

(Voce) Signó' acaláte,
ca i', dimane, nun ce vengo!


Va p''o vico na voce, na stesa,
p''e mmaéste ca vònno fá spesa...
Na carretta, ch'è chiena 'e campagna,
ll'accumpagna pe' tutt''a cittá.
Coro: Ll'accumpagna pe' tutt''a cittá.
Mo na sciassa cu 'o rrusso e cu 'o ggiallo,
s'appresenta cu 'a museca e 'o ballo:
pazzariéllo è chist'ommo ch'avanza...
Vótta e scanza, cchiù folla se fa...

Puó' dí
ch''e strade 'e Napule cheste só':
nu palcoscenico,
puó' dí
ch''a gente 'e Napule chesto vò':
nu palcoscenico...
Só' scene comiche,
só' scene tragiche,
mentre se recita
siente 'e cantá:
"Napule, Napule, Napule, Na'...
Acqua fresca...chi s''a véve!"

II

'Npont'ô vico s'apára na festa...
passa 'o ruoto, 'o varrile, 'a canesta...
Comm'arriva na chiorma 'e straniere,
che se vede? Currite! Currí'!...
Coro: che se vede? Currite! Currí'!...
Carulina se scippa cu Rosa,
chesta è 'nzista, ma chella è gelosa,
pe' nu guappo ca 'nganna duje core,
sti ddoje sore só' bone 'e murí...

Puó' dí
ch''e strade 'e Napule cheste só':
nu palcoscenico...
puó' dí
ch''a gente 'e Napule chesto vò':
nu palcoscenico...
Só' scene comiche,
só' scene tragiche,
mentre se recita siente 'e cantá:
"Napule, Napule, Napule, Na'...
'e mellune chine 'e fuoco!"


Finalino: (Voce)

Signó' acaláte,
ca i', dimane, nun ce vengo...
Acaláte!


Bonagura - Bruni