کوئی اگر مر جائے ۔۔۔ تو

کڑی دھوپ میں چلتے چلتے سایہ اگر مل جائے ۔۔۔ ۔تو

اک قطرے کو ترستے ترستے پیاس اگر بجھ جائے ۔۔۔ تو

برسوں سے خواہش کے جزیرے ویراں ویراں اجڑے ہوں

اور سپنوں کے ڈھیر سجا کر،کوئی اگر رکھ جائے ۔۔۔ تو

بادل، شکل بنائیں جب نیل آکاش پہ رنگوں کی

اُ ن رنگوں میں اس کا چہرہ آکے اگر رک جائے ۔۔۔ تو

خاموشی ہی خاموشی ہو دل کی گہری پاتالوں میں

کچھ نہیں کہتے کہتے گر کوئی سب کہہ جائے ۔۔۔ تو

زندہ رہنا سیکھ لیا ہو سارے دکھوں سے ہار کے جب

بیتے سپنے پاکے خوشی سے

کوئی اگر مرجائے ۔۔۔۔۔۔۔۔۔۔۔۔۔۔۔۔۔۔۔۔۔ تو؟؟؟

فرزانہ نیناں