May isang sulok na nagsusumikip sa diwa
Madulas ang lagkit ng iyong balat
Mapagparaya
Lupa may luluhod sa iyong kagandahang
Di ko sukat matawag
Hininga mo ma'y pumupulupot
Ganyan ka... MAPANLINLANG
ng aking pagnanasa
natirintas na isang ihip na wari'y
minsan mong iglap at sandaling pagbigkas
ng mga salitang aalon-alon sa aking gunita
masikip ang hagupit ng iyong hawak
parang hawla at ayaw akong pakawalan
boses mo'y gitara-oyayi na
lumalagaslas sa abang dagat
ang iyong halik
apoy na hulog sa kalangitan
animo'y bagsan ng ulang unti-unting
umiinit pagkatapos ng lamig
bigay ng kung sino man,
parang ginawan ng sariling hulmahan
pagkatapos ay binasag
nang hindi pa malikha ang iyong muling pagsilang
ang iyong pangalan sa sumisibol na umaga,
hinihintay ko
ang ika-labimpitong dagsa ng mga uwak
upang tawagin ka nila
sa haba ng tagsibol,
sagradong ritwal upang bulaklak ay umunlad
yaring ulap, tubig sa dugo
kulay ng iyong dila