Aduna pa bay laing
Jesse T. Auxilio?
Hunyo 22, 2008
Ang maong pangutana nagtangag og dakong hagit ngadto sa mga estudyante sa BIT International College sa Talibon, Tagbilaran, Jagna, ug Carmen nga anaa pa sa ubos nga ang-ang kon nagsunod pa kang Jesse T. Auxilio sa ilang pag-graduwar sa susamang kurso nga BEED nga nahuptan niya.
Lakip sa hagit mao ang mga opisyal, administrator ug mga magtutudlo sa tanang sanga sa maong tulunghaan.
Si Auxilio nga 2006-2007 Bachelor in Elementary Education (BEED) graduate sa Bohol Institute of Technology – Talibon nga karon BIT International College palaran nga nalandig sa ika-unom (6) nga dapit sa teachers board ning tuiga sumala sa release gikan sa Professional Regulations Commission (PRC) sa niaging bulan.
Kini maoy dakong kasaysayan sa BIT ug nakab-ot ra ang gitawag og “Golden Harvest.” Dakong dungog dili lang sa lungsod sa Talibon kon dili lakip na ang tibuok lalawigan.
Mapagarbohon ako nga mopaila nga aduna akoy tipik o parte nga natampo sa kadaugan ni Auxilio tungod kay ako usa sa iyang mga magtutudlo sa daghang mga subjects iyang nakuha ubos nako sa wala pa ako maka-retire sa BIT.
Si Auxilio usa ka hilomon nga estudyante, apan saludo ako sa kahait sa iyang salabutan, ma-oral o theoretical exams.
Kasagaran perfect ang rating nga akong nahatag kaniya. Sa nagtudlo pa ako sa BIT, diha pa ang akong mga kauban nga magtutudlo nga may tugob sa kaalam ug hataas nga kasinatian sa natad sa pagtudlo sama nila ni kanhi Director Dr. Eugenio F. Torrefiel, Mrs. Honorata Torrefiel, Dr. Gerry Tumarao, Dr. Marcelina Sales, ug Mr. Conrado Bautista.
Ang BIT-Talibon nagsugod pag-operate sa Poblacion, Talibon kaniadtong 1993 nga temporaryo nga edepisyo inabangan lamang.
Sa akong nahinumdoman, halos tanang graduwado dinhi sukad sa pagsugod sa pag-operate sa Poblacion nagmalampuson kay nakapasar sa mga exams sa kurso nga ilang nahuman og gani aduna nay mga trabaho.
Wala pa i-required niadto ang thesis writing, lahi na karon kay gialig-ig pag-ayo ang mga estudyante sa thesis writing og pagdepensa niini atubangan sa mga moderators.
Susama ra sila sa mograduwar sa masteral degree. Sa akong nahibaw-an, daghan ang naglisod sa pag-graduwar dinhi sa mga kurso sa kolehiyo tungod kay ang mga estudyante adto man mosumiter sa Tagbilaran sa ilang thesis writing nga dako jud og gasto sa pagpuyo didto ilabi na kon dili magkadimao ang ilang pagsulat niini og kanunay nga mag-usab-usab.
Ako komo magtutudlo kanhi sa BIT og ang kapikas ania usab nagpart-timer magpakabana sa paghangyo sa Presidente sa BIT International College nga ipiyal na lang sa BIT-Talibon sa adunay kaalam og katakos nga modumala sa thesis writing ug ang mga moderators sa panahon sa pagdepensa sa sinulat mao na lay moanhi sa Talibon aron mamenos-menos ang kalabad sa ulo sa mga ginikanan sa mga galastohan niining bahina.
Ang pagbatog sa mga langgam ngadto sa taas nga kahoy anaa ra kanila sa ilang kinaugalingong paningkamot og sa pangapaykapay sa kinabuhi.
Mao kini ang nahitabo kang Jesse T. Auxilio
Paminaw
Hunyo 15, 2008
Ang unang pulong sa Rule of St. Benedict mao ang pagpaminaw. Kini maoy maayong tambag sa pagsunod sa atong pagpangandam sa atong pagpakabana sa apostoladong biyahe ni Pope Benedict XVI ngadto sa Estado sa America.
Nilabay na kini niadtong Abril 15-20 nga panghitabo nga nagsugod sa dakong open air masses didto sa Washington, D.C. og sa New York City sa ubay-ubay nga ginagmay nga meetings kauban sa nga U.S. bishops, seminarians, Catholic educators, interfaith leaders og mga batan-ong katawhan.
Si Pope Benedict naghimo sa unsay iyang gihimo sukad siya napili sa katungdanan sa tulo na ka tuig nga nilabay sa bulan sa Abril.
Si Pope Benedict, sa iyang inaugural homily nag-ingon sa pinulongang English, “My real program of governance is not to do my own will, not to pursue my own ideas, but to listen, together with the whole Church, to the word and the will of the Lord, to be guided by Him, so that He himself will lead the Church at this hour of history.
Si Pope Benedict sa iyang pagpaminaw sa Dios, siya usab nagsulti og nagbuhat. Sa gibuhat ni Pope Benedict maoy lamdag nga salamin nga angay himoon nga dakong gabayan sa kinabuhi sa tawo ang pagpaminaw ilabi na gikan sa mga maalam og may mga proyba na nga makita og mahikap.
Sa atong mga maayong butang nga napaminaw, ato usab nga isulti ngadto sa
uban aron kini mosanay ang maayong binhi nga angay ipaambit ngadto sa tanan.
Human sa Pista, Eskuyla
Hunyo 8, 2008
Ang kasaulogan sa pista sa bulan sa Mayo dinhi sa lalawigan sa Bohol nagsugod sa Tagbilaran City sa Mayo 1 ug nahuman sa Talibon sa Mayo 31.
Na hala mobayad na ta sa atong mga utang sa pista, kana kon mangutang jud aron lang jud makareseber sa atong mga bisita.
Sunod nga hunahunaon, magpa-enrol na aron sa pagpaeskuyla sa atong mga kabataan.
Wa nay problema sa nakapangamdam sa niini. Kadto rang wala nay nahot maoy magsige’g pangutkut sa ulo.
Ato man jud nga obligasyon ang pagpaedukar sa atong mga kabataan basta magtinarong lang sa pagtuon.
Kitang mga ginikanan maghago pag-ayo, magkadusingot og magkalapok-lapok sa pagbugwal sa yuta, mag-antos sa kainit sa adlaw mao usab kini ang alantosonon sa mga ginikanan nga mananagat, labihanay ang pag-antos nga makakuha og mga isda sa pinobre nga pangita.
Kinahanglan ang mga ginikanan maningkamot pag-ayo sa pagpaedukar sa ilang mga anak, kay ang edukasyon mao ray dakong bahandi nga dili makawat o matulis.
Mao kini ang mohatag sa masanag nila nga kaugmaon. Dugang kalan-on sa utok
mahitgod sa edukasyon si Henry Peter Brougham sa pinulongang English
nagkanayon, “Education makes people easy to lead, but difficult to drive;
easy to govern, but impossible to enslave.”