Mga Matang Sa Kooperatiba
Hulyo 13, 2008

ATONG hisgutan karon ang mga matang o kategoriya sa kooperatiba. Kay isip sakop o bisan gani sa gustong magpasakop sa kooperatiba angayan gayud nga masayud sa unsang klase o kategoriya sa kooperatiba ang iyang gisudlan.

UNA niining tanan, aduna kita’y gitawag og kooperatiba sa pautang o credit cooperative. Kining klaseha sa kooperatiba nagdasig sa mga sakop sa pagdaginot ug mohimo’g mga pondo diha sa panudlanan aron makahatag ug mga pahuwam alang sa pagpadaghan sa abot ug uban pang mga gitinguhang katuyuan.

IKADUHANG matang sa kooperatiba mao ang kooperatiba sa mga pumapalit o consumers cooperative. Ang nag-unang katuyuan niining koperatibaha mao ang pagpangangkat ug pag-apod-apod sa mga bisan unsa nga butang, pagkaon o palaliton ngadto sa mga sakop ug dili mga sakop. Sa laktud nga pagkasulti ang kooperatibang sama niini magbaton ug usa ka tindahan nga mobaligya ngadto sa mga sakop ug dili mga sakop.

IKATULONG matang sa kooperatiba ang gitawag nato ug kooperatiba sa mga tigpadaghan o tig-gama o producers cooperative. Ang mga aktibidadis niining klaseha sa kooperatiba naglambigit sa kalihukan sa pagpadaghan sa abot sa pangyuta o sa pagpanggama.

IKAUPAT nga matang mao ang kooperatiba sa paninda o marketing cooperative. Kini nagalambigit sa pagsangkap sa mga gikinahanglan pag-ayo sa mga sakop alang sa pagpadugang sa abot ug sa pagbaligya usab sa ilang mga produkto.

IKALIMA mao ang kooperatiba sa pagserbisyo o service cooperative. Kining maong kooperatiba gimugna alang sa pangatimang medikal ug dental, panambal, transportasyon, kaseguruhan, pagpamalay, pagtrabaho, suga ug gahum dagitab, komunikasyon ug uban pang pag-alagad.

KATAPOSAN, aduna kita’y gitawag og kooperatiba sa bisan unsang katuyuan o multi-purpose cooperative. Kining maong kooperatiba nagadala sa duha o labaw pa ka kalihukan sa negosyo nga nagalakip sa lainlaing matang sa kooperatiba.

Nindot gyud nga magpasakop na ta sa mga kooperatiba ug nindot usab nga masayran nato ang klase sa atong kooperatiba nga pagasudlan.

Busa alang sa tanang wa pa magpasakop, apil na ug tagamtama ug dimdima ang kalami sa kooperatiba.

Mabuhi ang kooperatibang Bol-anon!

Hulyo 6, 2008

"Ang pagtukod ug pagpalambo sa mga kooperatiba isip praktikal nga behikulo sa pagpadasig sa kaugalingong pagsalig ug paggiya sa gahom sa katawhan ngadto sa pagkab-ot og ekonomikanhong kalamboan ug katilingbanong hustisya.

Ang nasod kinahanglang modasig sa mga pribadong sektor nga molusad og aktwal nga paghulma og mga kapunungan sa mga kooperatiba ug momugna ug usa ka kalikopan nga angayan sa pagdako ug paglambo niini nga mga kooperatiba.”

“Niini nga tumong, ang kagamhanan ug ang tanan niyang kasangahan, mga subdibisyon, mga ahensya kinahanglang mopasalig sa paghatag og teknikal nga pag-agak, pagbulig sa panalapi ug uban pang mga serbisyo nga makapahimo niining gihisgot nga mga kooperatiba, nga malambuon, ug angayan sa pag-atiman ug makapanubag sa ekonomikanhong pagpatigayon busa, mosangpot kini sa usa ka malig-on nga kalihukang mabuligon nga gawasnon sa mga kondisyon nga dili managad sa awtonomiya ug hugponganong kaligdong sa mga kooperatiba.”

Tataw kaayo sa pamahayag sa polisiya sa estado nga ang mga kooperatiba giumol ug pagaumolon gayud alang sa tinguha nga pagpalambo sa kahimtang sa matag sakop niini.

Ang gobyerno andam ug tagana gayud nga motabang sa mga momugna og kooperatiba inubanan usab sa pag-abag sa pribadong sektor sa katilingban.

Ang mga kooperatiba angay gyod nga palambuon aron makab-ot niini ang iyang tinguha isip usa ka instrumento sa katilingbanong hustisya ug ekonomkanhong kalamboan.

Busa ipatigbabaw nato ang atong kadasig isip sakop sa kooperatiba kay usa kini ka pangindahay alang sa ekonomikanhong seguridad ug oportunidad ug mahimong solusyon sa atong pinansyal nga suliran.

Mabuhi ang mga Kooperatiba!!!