BALITANG LOKAL (VALENCIA)

Nagbitbit og .38, nasikop
Hunyo 22, 2008

Valencia - Nasikop sa kapolisan ang usa ka 19-anyos nga lalaki tungod sa kasong illegal possession of firearms kaniadtong Dominggo (Hunyo 15).

Usa ka Jovanie Bagtasos, ulitawo nga residente sa Brgy. Benliw, Ubay ang gisikop nga nagbitbit og .38-calibre nga pistola.

Naalerto ang mga kapolisan sa taho nga usa ka tao ang nakit-an sa Brgy. Anas nga nagkubot og pusil.

Sa ilang pagrespondi, ilang nasikop si Bagtasos ug duha ka iyang mga kauban nga silang Eric Estimo ug Bryan Bagtasos.

Gidala ang tulo sa PNP station. Nakuha ang pistola ug duha ka .38-calibre cartridge nga sulod sa usa ka bag.

Apan silang Bryan Bagtasos ug Eric Estimo gibuhian ra usab gumikan kay wala man kini nagakubot og illegal nga mga butang. DM