FRONTPAGE BALITA

TAGBILARAN CITY - Subay sa mikatap nga balita nga adunay mga Gobernador nga nakadawat ug P5 milyon nga pondo alang sa fertilizer ug sa pagka bulilyaso diin gipahigayon karon ang pakisusi sa senado, hugot nga gipanghimakak ni Gobernador Erico B. Aumentado nga may labot ang probinsya sa Bohol ning maong isyu.

Gipadayag ni Aumentado panahon sa iyang programa nga governors report kaniadtong Byernes nga wala siya mangayo ug bahin sa giingon nga fertilizer fund nga gipang-apod-apod ni kanhi Department of Agriculture Under Secretary Jocjoc Bolante ug labaw sa tanan ang probinsya wala mangayo ni makadawat ug pondo gikan sa fertilizer scam nga salapi.

Dugang saysay sa gobernador nga mipadala sa atong lalawigan ang DA region 7 office ug kini gipang-apod apod pinaagi sa Ginintoang Ani Program, apan wala siyay kasayoran ug kini miabot sa Provincial Agriculture Office ug nga gipang-apod-apod kini ngadto sa mga mag-uuma ilabina kadtong naapektohan sa milabay’ng el niño.

Dason pa sa Gobernador wala usab siya masayod kon pila ang kantidad sa gipadala dinhi sa DA Region 7.

Sumala pa sa PAO mokabat sa 6,000 ka botilya sa liquid nga fertilizer ang nadawat sa probinsya.

Dugang ni Aumentado kon unsa nga klase wala siya masayod kay wala siya makakita.

Hinuon gitataw niya nga malagmit gigamit lang ang mga pangalan sa mga gobernador ug walay kalabutan ang provincial government.

Dugang pa niya ang DA lamang ang dunay kasayuran kon duna man gani sakote didto apan ang lalawigan sa Bohol walay labot.

Panapos nga pamahayag sa Gobernador nga wala siya masayod sa ebidensya nga anaa sa kamot sa Ombudsman nga mihikay sa pagka bulilyaso sa maong pundo.

Sa gibuhat nga lakang sa gobernador nagdahum usab ang mga Bol-anon nga mosunod sa ang tulo ka mga kongresista human malambigit sa 728-million fertilizer fund scam.

Ning maong wala pag-angkon, ang Bagong Alyansang Makabayan (BAYAN) Bohol mihagit ngadto kang Governor Aumentado, Congressmen Chatto, Jala ug Cajes nga mogawas ug mosulti kon unsay ilang nasayran kalabot sa maong isyu.

Ang maong pamahayag nga pinirmahan ni secretary general John Ruiz III nagkanayon nga ang ilang pamahayag maghatag og hustisya sa mga mag-uuma nga gigamit.

Nalambigit sa maong eskandalo ang mga Department of Agriculture executives, 105 ka mga kongresista, 53 ka mga gobernador ug 23 ka mga mayor, sigun sa taho sa Ombudsman.

Ang maong pagpang-hunaw sa gobernador magbaliwala sa mga alegasyon nga ang gikatahong P5 M fertilizer alang sa Bohol gigamit sa kandidatora niya ug sa presidente niadtong milabayng piliay.

Ang grupong BAYAN mialegar nga ang gobernor, sama sa tulo ka mga kongresista dinhi mga kaalyado ni GMA ug nakadawat sa fertilizers.

Nagkanayon usab ang maong grupo nga ang mga mag-uuma walay makakita sa mga abuno nga gihisgotan sa gobernador.

Apan, sigun sa pakisusi sa senado, ang matod pa fund scam architect nga si Bolante miangkon nga walay kalabotan si Presidente Gloria Macapagal Arroyo sa maong eskandalo sa fertilizer fund.

Ning maong katikaran, ang Malacañang nagpabilin sa ilyang baroganan nga modistansya kalabot sa maong pakisusi nga gipahigayon.

Si Press Secretary Jesus Dureza nagkabayon nga ang palasyo mitugyan sa fertilizer fund scam ngadto sa Senado.

Si Dureza nagkanayon nga gitataw sa palasyo nga gusto niining mogawas gayod ang matuod, ug dili sila mangilabot samtang iyang gipadayag nga walay kalabotan ang palasyo niining maong eskandalo.

Gidugang usab ni Dureza nga kinahanglan gayod nga masayod ang katawhang Pilipino kon hain paingon ang mga pundo sa gobyerno ug kon gigamit ba kini sa tinarong nga paagi.

Midugang usab siya nga ang adunay katungod niini mao ang Ombudsman ug nga manubag kadtong mga responsible ngadto sa hukmanan.