Si t'i mbrojmë vlerat tona nga vandalistë në Tetovë

Shtatoren e Naim Frashërit do ta ruajë policia?

"Kam biseduar me kryeshefin e policisë së Tetovës, Zemri Qamili, që policët lokalë të bëjnë sigurimin e shtatores së Naimit pas përmbysjes që ndodhi të shtunën në mbrëmje", ka thënë Shaip Emërllahu, drejtor i MNL "Ditët e Naimit"


Tetovë, 29 tetor - Pas përmbysjes së shtatores së Naim Frashërit, që ishte vendosur në platonë para Pallatit të Kulturës në Tetovë, me rastin e manifestimit "Ditët e Naimit 2002", kjo figurë e rilindjes sonë kombëtare rrezikohet edhe më tej nga vandalistët dhe kundërshtarët e kulturës shqiptare.
"Kam biseduar me kryeshefin e policisë së Tetovës, Zemri Qamili, që policët lokalë të bëjnë sigurimin e shtatores së Naimit pas përmbysjes që ndodhi të shtunën në mbrëmje", ka thënë Shaip Emërllahu, drejtor I MNL "Ditët e Naimit". Ai ka thënë se ata që kanë bërë një vepër të tillë të shëmtuar janë gati ta bëjnë edhe një herë, ndërkohë që policia duhet në kohë t'i kapë aktorët e një gjesti të këtillë.
Persona të panjohur kishin përmbysur shtatoren natën e së shtunës, ndërkohë që ishin larguar pa gjurmë, thonë burimet policore. Ndonëse shtatorja të dielën në mëngjes sërish ishte ngritur në vendin e vet. Një dëshmitar okular, që deshi të mbetet anonim, ka thënë se shtatoren e ka përmbysur një grup maqedonasish, pasi që edhe vetë i kishte parë. Këto
prova i janë të njohura policisë, por deri më sot nuk ka kurnjë veprim konkret në bardhjen e rastit.
"Tre vjet jemi duke kërkuar leje për vendosjen e shtatores të poetit tonë të madh, Naim Frashëri, por deri më tash nuk kemi pasur përgjigje", thotë Emërllahu, duke shtuar se KK i Tetovës duhet të miratojë kërkesën tonë, të cilën ia kemi bërë para dy vjetësh, kurse më vonë për këtë duhet të deklarohen edhe institucionet e tjera përgjegjëse.
"Mendojmë se shtatorja e Naim Frashërit nuk duhet t'i pengojë askujt, sepse ai ka përhapur mesazhet e fqinjësisë së mirë dhe ka vlera universale", përfundon Emërllahu.
A. A.