pasasalamatsaiyo

Salamat binibini
at iyong nagustuhan
ang munti kong alay
na isang tula-tulaan.

Ako ngayo'y nagagalak
at lubhang nasiyahan
sapagkat asarang sinimulan
ay atin ng maiiwasan.

Sana'y huwag makalimot
sa isang naging kalaban
na ang ninanais ngayon
ay maging isang kaibigan.

Kung ikaw ma'y nangangailangan
at nais masoklolohan
narito lang ako sa isang tabi
upang ikaw ay alalayan.

Maraming salamat
ang aking masasabi
sa isang kaaway
na minsang umapi.

Ngunit ngayo'y hindi na
sapagkat ikaw ay kaibigan
mga salitang binitawan noon
ngayo'y dulot ang kaligayahan.

Sandali lang teka muna
mukhang ang usapan ay napapalayo na
Mister Alaskador and ibinansag
sa iyong kaasaran nung una pa.

Wala pa rin akong masasabi
at ibang mababanggit
kundi ang kagandahang pilit
na sa aki'y isinisingit...

Ano pa ang masasabi ko
dahil ewan ba kung totoo
ang mga sinasabing
sa akin ay lumilito...

Ang sagot ko ay ito
sa bansag mong ibinato
Miss Pogi ang nababagay
na dapat itawag ko sa iyo.

Pero dahil kaibigan na kita
aalayan na lang kita
ng mga tulang ginawa
para sa Poging dalaga...

Siguro'y naiinis na naman
pagkat ang asaran ay nasimulan
ng aking tula-tulaang
tila nagkukunwari lamang.

Ngunit ang tula kong nilikha
sa pagkukunwari ay di ginawa
dahil sa tula nakasalalay
mga binitawang salita.

Huwag ka sanang mainis
at ako ay kagalitan
huwag rin naman sana akong
kaagad ay husgahan.

Pero sana'y ngumiti ka
kahit ba di ko nakikita
dahil sa isang pagngiti
ay akin ng ikasasaya.

Mukhang sumobra na yata
ang pagkukunwaring makata
dahil minsan sa aking buhay
ay na-adik sa paggawa ng tula...

Kaya ngayon ay 'wag magtawa
pagkat inaamin ko naman
na ang aking kakornihan
lumalabas sa anyo ng tula-tulaan.

Puwede mo ring pagtawanan
dahil sa aking kabaduyan
sapagkat tulad ng binanggit
na sobra sa kakornihan.

Kung ikaw ay nagugutom
at wala kang maiulam
basahin lang ang tula
dahil iyong matutuklasan...

Na ang ulam ay di lamang
sa tindahan makakamtan
at dahil sa kakornihan ko
ay may mais ka ng maiuulam.

Hindi ba't ayos lamang
ang medyo may kakornihan
ang isang kalabang kaibigan
na pupuno sa iyong tiyan.

Hindi naman pagkain
ang aking ilalaman
kundi puro hangin
na dulot ay katatawanan.

Kung ikaw man ay tatawa
mungkahi ko ay 'wag pigilan
pagkat 'pag ito ay pinigil
baka kabagan ka lamang.

At 'pag iyon ang nangyari
tiyak na walang masisiyahan
sa malakas na puwersa
na sa hulihan pakakawalan.

Salamat muli sa mensahe mo
na ipinadala sa araw na ito
dahil sa sobrang salat
pati kaluluwa ko ay napatakbo

Para tuloy baliw
ang kaluluwang naligayahan
kaya pati ako rin
ay gayon ang pakiramdam.

Pinasaya mo ako ngayon
kahit inasar nung una
pero dahil natalo ka
dapat lamang na ikaw ay magpaligaya.

Ako'y masaya na
dahil sa pagiging kaibigan
at tinapos na rin
ang pakikipag-asarang labanan.

Iyo bang naalala
ang simula nating asaran
lalo na sa tsanel
na parehong sa atin ay naglalaman.

Kung iyo pang naaalala
ang sinabi nung isa
ay "hotdog" na isawsaw
sa gatas na sariwa pa...

Ngunit ang sabi nung isa pa
yak! kadiri raw talaga
kaya aking sinabi doon
na parang "Oreo" pala...

Ikaw ay nagsalita
at sa pinag-uusapan ay tumawa
dahil ang mga naka-usap
ay parang mga baliw pala.