ikawangnagsimula

Magandang araw sa malayong binibini
nais kong ipabatid na di ako nagkasala
sa isang pangyayari
na ikaw ang nagbadya.

Ako'y inaway mo nung una
sa pag-akala na magiging masaya
pero ngayon tila sumusuko ka na
sa mga salitang di mo na kaya.

Di mo yata matanggap
na wala kang iuubra
sa isang katulad ko
na di mo pa nakikita.

Sa iyong pang-iinis
ay aking ikinasiya
gumanti ako at nang-asar
ngunit ikaw yata ay suko na.

Kung ano ang iyong ibinato
ay siyang ibabalik ko
ang magiging pagkakaiba nga lamang
ay mas malakas ang matatanggap mo.

Hindi mo sa akin maipipilit
na mas higit ang iyong itsura
kung hindi ko naman nakikita
walang silbi at walang kwenta.

Ikaw ang nagpasimula
ng laban mong inaatrasan
noong una pa ngang salita
sa pang-aasar ay maanghang.

Ngunit tila yata iba na ngayon
sapagkat nag-iba na ang panahon
pati yata hangin ay bumaligtad
kaya nag-iba ang iyong desisyon.

Huwag ka ng mag-alala
sapagkat iibahin ko na
mga mensahe kong ipinapadala
ay di na tulad nung una.

Ngunit ikaw ay dapat mangako
at sana ay hindi naman mapako
upang sa gayon ay masiguro
na ikaw talaga ay nagbago.

Huwag mo sana akong sisihin
kung nakasakit ako ng damdamin
sapagkat sa iyo unang nanggaling
ang mga salitang makabasag salamin.

Hindi ko ninais makipag-away
lalo na sa isang binibini
ang gusto ko ay kaibigan
ngunit laban ang aking inani.

Kung anoman ang naging hidwaan
sana ay iyo ng kalimutan
sapagkat sa aking palagay
ay di mo na makayanan.

Kung ako naman ang iyong tatanungin
ay wala na iyon sa akin
sapagkat ako'y walang galit
sa mga mensaheng nangungulit.

Sana ay ibahin mo na
ang mga mensahe na ipinadadala
dahil sa iyong mga mensahe
nakasalalay ang aking ipadadala.

Sana rin ay pag-isipan mo
kung ano ang maidudulot
ng mga salita at letra
na lagi mo sa aking ibinabato.

Alam kong ikaw ay nababaduyan
sa aking munting tula-tulaan
ngunit hindi ko naman inaasahan
na ito ay iyong hangaan.

Alam kong isang kahangalan
ang paggawa ko ng isang tula
mga salitang aking binitawan
kung makasakit ay di ko sadya.

Wala kang magagawa
kundi basahin itong tula
dahil ako ang gumawa
sa iyo ito'y balewala.

Hindi kita nais awayin
lalo na ang katulad mo ay paiyakin
hindi ko rin naman alam
na ikaw pala ay lubos na nasaktan.

Kung ikaw man ay aking nasaktan
ang hiling ko ay kapatawaran
sa mga mensahe at pag-aakala
na ikaw ay naliligayahan.

Sana ay iyong isaisip
na kaibigan ang hinahanap ko
at hindi ang isang kaaway
na laging inaakala mo.

Siguro ay inaasahan mo
na ako ay iyong matatalo
at nagkamali ka sa iyong palagay
kaya ang laban natin ay widro.

Ako ay natatawa sa iyo
at lubhang nasisiyahan
lalo nung simula kong isulat
itong alay na tula-tulaan.

Alam kong ikaw ay nakokornihan
sa binabasa mong tula-tulaan
pagka't di mo na pinag-iisipan
ang tunay nitong nilalaman.

At hindi ko rin nalalaman
kung iyo bang napag-isipan
ang nais kong ipabatid
na nakasaad sa tula-tulaan.

Sadya talagang iba ako
sa laging inaakala mo
kaya nga kung iyong sasabihin
na ako talaga ay wirdo.

Pero ang masasabi ko lang
ay magkaiba lamang tayo
hindi dahil sa babae ka
at dahil lalaki ako...

Hindi rin dahil sa ikaw ay malayo
at ako naman ay mas lalo
sa magkaibang kapaligiran
na pareho nating ginagalawan.

Iisa naman ang ating mundo
na magkaparehong ginagalawan
kaya mali ang akala mo
na ipinanganak ako nung digmaan.

Sa pagbasa ng mga mensahe
sana ay iyong maunawaan
inilapat kong mga letra
dito sa aking tula-tulaan.

Iyo rin sanang maintindihan
ang nais kong isaalang-alang
sa away mong pinasimulan
ay pagkakaibigan ang makamtan.