Lia Makloke

Lia-Tokodede hanesan mós lia ne’ebé ema Tokodede sira koalia iha area Likisá, Bazartete ho Maubara.  Lia-Tokodede refleta ema Tokodede nia moris iha tinan rihun nia laran hahu husi bei’ala ema Tokodede sira.  Lia ho liafuan Tokodede aprezenta riku soi kultura, hanesan mós liafuan sira seluk iha rejiaun Timor Leste nia laran.

Ema matenek sira dehan lia ho liafuan hatudu ba kultura. Ne’e katak, lia ou liafuan laos deit hanesan media komunikasaun atu hatutan relasaun entre individu no ema iha sosiadade ida nia laran, maibe atu esplika mós ema ou komunidade ida nia moris. Nune’e, Lia ho liafuan importante tebes ba ita, laos deit atu halo komunikasaun maibe mos atu esplika ita nia kultura no ita nia moris rasik.

Ojetivu husi disionáriu ida ne’e : a) atu hamoris nafatin lia ho liafuan ne’ebé ema Tokodede koalia ou lia-Tokodede,  b) atu ita nia jerasaun bele hatene no hadomi liu  tan ita nia lia, hanesan lisan no riku-soin hosi kultura bei’ala sira nian c) hanesan referensia akadémiku ida bá ema hotu ne’ebé presiza atu haburas no hamoris riku soin linguazen iha Timor Leste.

Ami hatene katak, Disionáriu ida ne’e la bele remata wainhira la hetan tulun husi ema barak. Nune’e, iha oprtunidade ida ne’e, ami hakarak hato’o obrigadu ba’in ba kompañeiru Michio Takahashi husi TNCC ne’ebé anima no fo inspirasaun ba ami atu hakerek livru ida ne’e. Ami mós hato’o agradese ba mane sanulu hosi Uma Lisan Besilau Baulelo ne’ebé fo fatin no kourajen atu halo peskizasaun iha area kultura. Ami mós hakarak hato’o ami nia agradese bá Sr. Jose Correia ho Sr. Thomas da Silva hosi suku Lauhata, Sr. Alarico Goncalves ho Adelino dos Santos husi suku Vavikinia, no Sr. Alberto dos Santos husi suku Hatukesi bá liafuan no koresaun ne’ebé sira halo. La haluha mós ba kompañeiru tomak iha LSG ne’ebé ho pasensia halo koresaun ba Disionáriu ida ne’e.

Ikus liu, ami nakloke nafatin ba hanoin, idea no krítika ne’ebé konstrutiva atu hadia no kompleta liu tan Disionáriu  ida ne’e.  Obrigadu.

Hosi ami

Lekede’e Study Group (LSG)