Tabi na sab ta!

By Eden

Niadtong eleksyon, nag volunteer ko sa NAMFREL-NASSA aron dili ko maapil sa Partisan Politics kay midagan pagka vice mayor ang akong bayaw.

Duha ka adlaw bag-o miabot ang piniliay, daghan nag text sa ako nga naay mga bugas nga gibagsak sa ilang barangay. Mga kapitan, kagawad, purok lider pa gyud ang uban nga nag apud-apod sa mga bugas, naa pa gyud kwarta. Ang nasakitan nako’g buot kay ang uban sa mga naglihok aron mopalit ug boto, pirmi naa sa simbahan, ang uban naa pa gyu’y katungdanan:naay kaabag, choir, lector ug uban pa. Mga tawo nga pirmi makadungog sa pasidaan sa maayong pagpili ug kandidato.

Niadtong adlaw na gyud sa eleksyon, miadto ko sa eskwelahan aron moboto. Diha pa lang sa gawas sa gate naa ko’y gikasab-an nga tawo kay lagi gaapud-apod og sample ballot. Ang nakapasamot sa akong kasuko kay naa sa iyang tapad ang usa ka nag-unipormi nga CAFGU. Wa’y gibuhat.

Sa dihang ga-linya na ko pasulod sa among presinto, naa’y nagpasiga sa akong mata nga T-shirt nga dunay pangalan sa usa ka kandidato! Paglili nako sa nawong sa nagsuot, usa ka choir member sa parokya. Daw gikumot ang akong dughan! Ngano nga nasayud man unta kining mga tawhana nga sayop kini, apan tuyuan man gayud og buhat? Mitaas ang akong tingog ug gipapahawa nako siya.

Sa dihang naga-encode mi sa mga Election Returns (ER), human na niadtong tungura nahibaloan ang resulta sa local nga piniliay, naay usa na pod ka choir member ang miduol nako. Nailhang lider siya sa usa ka political party. Gikasab-an ako niyag maayo kay nganong gipahawa daw nako ang iyang kauban nga nagsuot ug sinina nga naay ngalan sa ilang kandidato. Kipasidan-an pa gyud ko niya nga pungkolan kung mo-usab ko sa akong pagbadlong kanila. Wala nako siya tubayi, apan naguol ko nganong himoon man nila ang sayop ug pakasamahong sakto aron lang modaug ang ilang kadidato!

Gidala-dala nako kadtong maong panghitabo. Pagka huwebes niadtong semanaha, nag saulog og Misa sa munisipyo ang mga empleyado. Kanunay namo kini ginabuhat matag huwebes ang maong fellowship, isip pagpatuman sa moral recovery program. Diha sa tunga-tunga sa misa, niabot ang duha ka myembro sa choir nga akong nakabingkil. Misantop sa akong huna-huna ang pulong sa bibliya nga nag-ingon: “Kon aduna kay hahinumduman nga nasilo kanimo, biyai ang imong halad, pakig-uli sa imong igsoon ug balik aron paghalad.” Bisan gibati ko’g kaulaw ug kahadlok nga dili dawaton ang akong pakig-uli, giadto nako ang duha nga atoa sa dapit sa choir ug nag-sori ko sa ilaha. Samtang gikanta ang Amahan Namo, gipislit nako ang kamot sa usa kanila aron pagpabati kaniya sa kamahinungdanon sa pakig-uli. Ang usa kanila mibalos ug pahiyom kanako, apan ang usa nagpabilin nga wala nahimoot.

Gidaawat nako si Hesus nga malinawon. Apan TABI, kay hangtud karon naa gihapo’y mga pangutana sa akong kasing-kasing. Kanus-a pa kaha makamatngon ang mga Filipino sa tinuod nga diwa sa Piniliay!?