<EnJoY LiFe 11> - Cute Little Girl
今日參加了「八達通育苗展才計劃」的義工服務，
帶一班小朋友去睇＜功夫熊貓＞，行吉之島買野，
食麥當勞同埋搭天星小輪。
天公做美，活動的時候沒有下雨。
早上 9:00 到達了黃埔 UA 戲院準備。
有 UA 的贊助，每人有一杯汽水同一筒爆谷。
電影 9:45 分開始播放，但我負責的小學還未到 ......
睇左 20 分鐘左右出去接佢地，同佢地分名牌同風褸，
去埋厠所，先再入場，應該都 miss 左成 10 分鐘。
最搞笑係，有個男仔個名係大維，但係個名牌寫左做大雄。
仲有佢大份一制，著唔落件風褸，
我好醒目咁俾左我個件風褸佢，睇完先幫佢換件大啲。
入左場，再睇多半個鐘左右，有個妹妹仔想去洗手間，
我就陪佢出左去，佢好開心呀，睇得好興奮咁，
仲話啲爆谷好好味，好味過以前食嗰啲。
差不多完個陣，又有個妹妹仔要去廁所，
原來又係頭先嗰個，佢話好急，非去不可，
佢話佢飲完汽水就係咁，
我無奈地又出多去一次！
返入黎個陣套戲已經完左 lu.....
結果成套戲出左去三次...
講番套戲，雖然我應該 miss 左幾多野，
不過都覺得套戲好搞笑，勁好笑位，
成場大笑聲，連坐我隔離個 miss 都有笑出聲，哈哈！
熊貓阿寶加埋陳奕迅既配音真係好搞笑！
睇完戲之後，去吉之島買野，
我揀左帶頭先勁去厠所嘅妹妹寶玲同成日痴住佢既直希。
呢次活動，佢地每人都派左一張 100 蚊既八達通卡，
可以俾佢地買野，活動完之後收番。
我地首先去左 10 蚊店行。
寶玲一開始揀左個塗改帶，佢話屋企嘅已經用晒；
直希就一直都諗唔到買咩。
佢地兩個都話要慳啲，無野要買，佢地話 10 蚊都好貴！
再行多陣，寶玲揀左個膠紙連座；
直希揀左一包鉛筆同埋一包禮物包裝袋仔，
佢話媽咪每年都會用啲袋仔包手巾送俾人；
寶玲之後再揀多條毛巾送俾婆婆。
最後，我地去左超市行，
寶玲話要買麵粉給媽媽做餃子，可惜找不到；
相反，直希就高興的見到一包日本年糕，說買給媽媽，
後來從老師口中才知道直希的媽媽原來是日本人。
帶住兩個二年級嘅小妹妹買野都好開心，
佢地兩個都係第一次自己去買野，自己俾錢，
非常興奮，成程跳黎跳去，哈哈！
買完野，搭旅遊巴去火車站麥當勞食飯，
剛開車，寶玲就同我講佢想嘔，我即刻拎個膠袋俾佢，
後尾同佢傾計，佢又無事 lu，無嘔到，仲愈傾愈興奮！
係麥當勞，寶玲仲大食過我，
食左一個豬柳蛋漢堡，一個細薯條，一個蘋果批，
同埋一個朱古力新地，勁呀！
食完飯，搭車去紅磡碼頭。
去上車個陣我行得後左啲睇住其他小朋友，
寶玲上車個陣唔見我，仲擰轉頭大叫左聲 "姐姐呢？"，
哈哈，好開心呀！
上到車，佢嘔左啲呀，不過隔離車既哥哥整左幾個鬼臉之後，
佢又大笑番，精神番，完全無野咁，哈哈！
最後搭船個陣我都好擔心佢會再嘔，全程睇實佢，
佢可能第一次搭船，好興奮咁望住個海，完全無事。
仲好開心同我講，"我知道點睇到架船開緊喇，
架船開緊個陣船邊會有啲白泡泡架"，哈哈！
對住啲小朋友個人都開心啲，佢地真係好得意呀！
去到灣仔，佢地係會展隔離上旅遊巴返學校 lu，
雖然唔係識左兩個小妹妹好耐，不過都有啲唔捨得....
The Little Girl is really so cute!
Hope that she still remember me at the closing ceremony!
That's my life! =D
VienneTTa 28-June-2008
-------------------------------------------------------------------------------
~ 只要有信念，凡事可成真 ~