O siñal d'Aragón. A
berdat sobre o siñal reyal d'Aragón
Catalans, balenzianos, balears y aragoneses tenemos alazetalmén un mesmo siñal
autonomico encara que con chiquetas bariazions. As cuatro comunidaz
s'identifican con o siñal cuatribarrato, u siga, cuatro franchas royas sobre
fundo amariello.
Belunas d'istas comunidaz han creyato leyendas sobre l'orichen anzestral de dito
Siñal. Pero, cuála ye a berdá estorica d'iste símbolo tan aragonés?
POSIBLE ORICHEN
Sancho Remírez, segundo rai d'os aragoneses, fa un biache ta Roma, riende
basallache a o Papa y íste lo nombra o suyo portastandarte. En ixa epoca as
colors d'o papato yeran royo y dorato, as de más gran balura en a terminolochía
eraldica.
En Daroca s'alza una umbela basilical con as colors roya y amariella papals, y
en Salamanca, se saca en prosezión ta l'Alcorpus unatra identica. Iste podreba
estar l'orichen d'o siñal d'o rai d'os aragoneses, pero no podemos afirmar cosa
que siga decumentata.
ORICHEN ZIERTO
L'orichen zierto d'o siñal cuatribarrato se puede decumentar en o rainato
d'Alifonso II d'Aragón "o Casto" (1162 - 1196), pos asinas amanixe en as monedas
que él cudiba. Bi ha atra curiosidá en iste rainato y ye a siguién:
Dica Alifonso II toz os rais s'apellidaban, rex Aragonensium (rai d'os
aragoneses) y dimpués d'iste rai empezipian a nominar-sen, rex Aragonensis (rai
d'Aragón).
O cambeo ye senificatibo, pos empezipia a reconoxer-se un territorio como
propio.
Puede afirmar-se -siguindo ista mesma lochica- que con o tiempo, o que yera
simbolo presonal d'o rai pasa a estar siñal de dinnidá, o Siñal Reyal, y dimpués
siñal nazional, ye dizir d'o territorio, pero sin tresbatir o premitibo
senificato. En os armorials de toda Uropa, o siñal cuatribarrato ba asoziato t'a
Casa Reyal d´Aragón. Resumindo, o siñal cuatribarrato escomenzó estando Siñal
Presonal d'o rai, dimpués n'estió d'a Casa suya, ta rematar estando siñal
Nazional d'os diferens territorios d'a Corona.
DIFUSIÓN D'O SIÑAL
En o siglo XIII, Chaime I conquista Balenzia y Mallorgas; podeba aber integrato
istos nuebos territorios en Aragón y en Cataluña, sin dembargo no lo fizo. O rai
creyó dos nuebos territorios con ran de raino, alazetato en a dibisión d'a
potestá reyal, ye dizir, que prozeden d'a Casa d'Aragón y emplegan as mesmas
colors de dinnidá que a Casa Reyal d'Aragón.
O mesmo escaize con as conquistas d'o Mediterranio (interpresa d'a Corona) que,
independienmén de quí las reyalize fesicamén, o simbolo que las identifica ye o
Siñal Reyal d'a Casa d'Aragón, simbolo que encara no ha adoutato Cataluña como
beyeremos más ta debán.
Con a unión monarquica d'as Casas d'Aragón y Castiella, amanixe un escudo en o
que se reflexan os simbolos distintibos d'as dos Casas, -o escudo d'os Rais
Catolicos-, pero en ista epoca no bi ha un siñal ni un escudo d'España encara.
En o escudo d'os Rais Catolicos as barras representan a Casa d'Aragón. En
Cataluña, a cruz de San Chorche ye o emblema d'a Generalitat, en Balenzia a
ziudá sobre ondas de mar y en Mallorgas o castiello con u sin a palma.
CATALUÑA S'ENCORPORA EN 1701
Cataluña en as suyas estituzions nazionals que son y yeran, as Cortes y a
Generalitat, utilizaba como simbolo a cruz de San Chorche, asinas costa en os
libros de ditas estituzions, dica que en 1701 as Cortes Catalanas adoutan
boluntariamén o siñal d'a Casa d'Aragón, sin garra imposizión. Encara o 12 de
chulio de 1713 os "Diputats del General del Principat de Catalunya", suscriben
un decumento con a cruz de San Chorche en o que istan a os lugars a mantener-sen
fidels a l'archiduque Carlos. Por o tanto, podemos dizir que ye a partir d'o
sieglo XVIII cuan as barras representan en o escudo d'España, tamién a Cataluña,
como nazionalidá.
PERIGLO DE DESAPARIXIÓN
En o siglo XIX con a plegada ta o trono d'España d'a Casa de Saboya se preduz un
escaizimiento que autiba o nazionalismo aragonés. O rai don Amadeyo retira d'o
escudo d'España as barras d'Aragón ta clabar-ie as d'a suya Casa Reyal de
Saboya.
Solo que os aragoneses reaizionan; diz que bi abió dica contornillos, y ye
Chuaquín Costa qui encapeza a quexa dizindo:
"As barras son l'alma en o escudo d'España; o buedo que ellas dixan no s'imple
con dengún escudo d'a Tierra, porque l'alma d'Aragón es inmensa... Ayere mos
furtón as libertaz; güei mos furtan os remeros."
O Siñal d'España amanixe en o rainato de Caros III, en primer puesto, solo que
ta distinguir a las suyas naus. En 1785 esliche como pabellón un siñal semellán
a o que Alifonso V o Magnanimo, rai d'Aragón, eba portato ta Nápols. Iste siñal
ye adoutato dimpués por o exerzito en 1843 y se torna en o siñal nazional
d'España.
O ESCUDO D'ARAGÓN
Muito menos conoxito -popularmén- que o siñal, no dentra en garra polemica.
Amanixe por primer begada en a suya confegurazión autual en l'añada 1499, en a
portalada d'una Coronica d'Aragón que escribe ta Fernando o Catolico o flaire
Gauberto Fabrizio de Bagad.
Se reconoxe ofizialmén l'añada 1612 por meyo de cudizions de monedas u en os
escudos d'a Deputazión Cheneral d'Aragón. En l'añada 1921 a Reyal Academia d'a
Estoria española opina en a suya fabor y en l'añada 1978 s'encorpora de nuebas
como simbolo ofizial d'Aragón a trabiés d'o Estatuto d'Autonomía Aragonesa.
O Chustizia d'Aragón emplega o escudo de Bagad de 1499, que en cuentas de corona
ubierta, porta un anchel proteutor.