SATURNO, ASTROLOXÍA Y KARMA



Mos fabla o esoterismo tradizional que tot o que partizipa d'a manifestazión ye soxetaú a bellas laies, que ni os ombres ni os dioses pueden crebantar. Una d'istas laies ye a lai d'o Karma...

“Karma” ye una parola d'o idioma sanscrito, a luenga d'a antiga India, l'antiga Ariavarta, que poderbamos traduzir como “aizión – reyazión”, isto ye, que toda aizión que s'enfaiga produzirá una reyazión proporcional, y por consiguién, toda situazión n'a que sigamos agora ye o resultaú de aizions anteriors.

A zienzia autual, con a conoxida como Tercena Lai de Newton, mos esplanica: “Si un cuerpo A exerze una zierta fuerza sobre un cuerpo B, allora, o cuerpo B exerze una fuerza sobre o cuerpo A, que ye a mesma y de sentíu contrario a ra anterior”.

Pero os filosofos indúes, eniban una mica más allá d'ixo, pues deziban que ista mesma lai se enpodeba aplicar, no solamen t'o plan fesico y más palpiable, sino tamien a ras atrás grandarias d'a manifestazión: o plan enerxetico, emozional y mental.

Asinas, o ser umán, seguntes a dotrina esoterica, en ha un amplo albedrío ta construyir o suyo esdebenidero, en cuenta de dixar-se arrozegar por fuerzas ziegas y determinans como dize a zienzia materialista, o por as conzieteras espentas de bel ser superior como nos dizen bellas relixions anclatas n'a letra muerta d'os suyos testos dogmaticos. Tamién enabemos una risponsabilidá, pues ixe esdebenidero depende d'as nuestras dezisions, as cuals mos carriarán, como bimos antis, una reyazión d'alcuerdo a ixas dezisions.

SATURNO

A mitoloxía clasica, ixa fuén inexecaple de conoximiento que a ra mena de falordietas (solamén a ra mena) mos dixaron os nuestros debanpasaús tamién mos puede amostrar muito a respeutibe d'isto. Muitas begadas queremos trobar un conoximiento en luengos países y ro en tenemos amán de nusatros...

Kronos n'a mitoloxía griega, Saturno estié una d'as dibinidaz italicas más antigas. Le se ripresentaba como un ombre portiando una falz, por o que le se enrilazionó con as siembras y ra agricultura, pero n'atra zifra más zaboyata, Kronos – Saturno ripresenta o tiempo y o karma, o cual se enmanifiesta sin remeyo, como ra fuella d'una falz. O conoxíu cuadro de Francisco de Goya le mos amuestra abalando implacablemen todas as mainadas, pues rayalmén o tiempo de vida mos se enfuye inesorablemén, y como emos dito antis, talmen l'unico que mos pertoca reyalmén siga o albedrío con que concaremos o nuestro esdebenidero, pues o pasaú ya no se enpuede cambear, y ro presén... pasó.

Pero no ixuplidemos tamién que Saturno ye un planeta, con una influyenzia sobre ra Tierra y toz os sers que en ella semos abitando. Y ra influyenzia de Saturno ye muito relazionata con ixa dotrina d'o karma, como amplamén amuestra Alan leo n'a obra suya “Saturno, o Segador”.

A parola que definiría a suya influyenzia ye ra amugazión, u siga, amugaría o que por o nuestro karma acabalaú enpodemos o no enpodemos fer. Le se relaziona con a durazión, as dificultaz y as penalidaz, o que anque n'una zifra parixen malos aspeutos, no están sino oportunidaz de equilibrar a nuestra balanza karmika con as prebas que mos enportia ra vida.

Por ixo, n'o antigo Egipto se endeziba:
“cada begada que mos adormimos n'a materia, a garra de Seckmet ( a diosa con tozuelo de liona que ripresenta n'una de as suyas zifras o karma) mos rebella. Os ombres comuns dizen que les ha tocaú a disgrazia, pero nusatros sabemos que mos tocó Dios”.

As conchunzions de Saturno con o nuestro Sol ( intes n'os que Saturno ye n'o mesmo puesto que ocupa o Sol n'o nuestro tema natal) no son goyosos momentos ta escomenzipiar aizions nuebas.

Por exemplo, en tenemos, como mos rezenta Louis de Wohl en “Busté y ra Astroloxía”, os aspeutos en relazión a Saturno que teneban os alemans escomenzipiando la Segunda Guerra Mundial: conchunzión, 0º. Fue una guerra que se enprolargó muito más d'o prebeyíu n'o tiempo, pues se amostraron as amugazions d´una nazión que se concara prauticamen solenca a ra resta de países, portiando disgrazias y penalidaz como nunca se bi eban conoxíu n´o mundo.

Sí, Saturno ye un planeta que amaga muitos secretos… Rixe a ro signo de Capicornio, y no ixuplidemos a importanzia que en todas as cibilizazions de caraúter iniziatico tenié o Solstizio d´Ibierno, como diya rilazionaú con os muertos y con aquers que rematoron a suya “etapa” umana, isto ye, os enzetaús, y tampono ixuplidemos que ra naxenzia de muitos establidors de relixions ye amán d'ista data, a cual consona mesmamén con o prencipio de Capicornio.

O ZICLO DE SATURNO Y RAS PREBATINAS D´A BIDA

Asinas, hemos trobaú que son pareyans as tradizions antigas a respeutibe d'a lai de karma, a cual, si ye berdadera , be de aber un mecanismo medián o cual plegue dica nusatros.

O astrologo Marco Boni de Aristizábal mos esplanica que con unas simplas efemerides y estudeando o “tema natal” de bellas presonas, comprebó que as grans prebas de as suyas bidas plegan t'os seres umans con matematica periodicidá, consonando precisamen con o ziclo de Saturno, lo antigo dios d´o tiempo y ro karma. A cada presona, ixe ziclo le se enmanifiesta d'una traza determinata, dependiendo d'o puesto d'os planetas en o inte d'a suya naxenzia, pero en todas conzide que ben de concarar-se a aspeutos difíciles y no resueltos d'as bidas suyas.

Antimás, parixe que ixe karma acabalato no les plega tot n'una mesma begada, sino que ye dosificato, plegandonos una parti con cada nuebo transito de Saturno. Una situazión no resuelta totalmen, torna a manifestar-se exautamen con un nuevo transito de Saturno.

En as suyas propia parolas:
“(…) ye como si ro destín mos baiga dixando bellas cosas pendiens en funzión d'os transitos esdebeniders, como si mos ise dosificando as prebatinas d´a bida”.

Parixe que Saturno rixe a esperenzia d´o pasaú, a conzenzia d'o ya bibíu, fendo un camín de esdebenidero d'alcuerdo a ro destín de cadagún. Por ixo o karma no be de trafulcar-se nunca con una traza de chuez bengatibo y endino, sino como una “intelixenzia” d´a natura que mos debuxa o nuestro camín, d'alcuerdo a ras nuestras posibilidaz, amanandonos t'o nuestro destín.

Atra begada, como siempre que estudeamos con ecleutizismo os temas rilazionatos con o ser umán aparixe una “intelixenzia” rixiendo a eboluzión de l´ombre, en contraposizión a ro que o materialismo razionalista mos presenta como un camatón de casolidaz sin dengún destín. “Intelixenzia” que pueblos luengos como ros indúes y ros d'a compleganza d'o Mediterraneo fan muito similars.

O TIEMPO Y RAS OPORTUNIDAZ

Asinas, no parixe imposible que pleguemos a prebeyer o nuestro propio destín más inmeyato y aprofeitar as buenas oportunidaz que ra vida baiga portiando-nos.
Por ixo, os clasicos deziban que Kronos – Saturno teneba un fillato clamado “Kairós” (a oportunidá), que teneba a metá posterior d'o tozuelo rasurato y os pies alaús, o que feba que le se enpudierba pillar (por os pelos…) si le se enbeyeba plegar, pero escorredizo cuan bi eba pasaú.

O tiempo mos se enfuye como l'augua d'as mans, o cualo ta bellas presonas ye enchaquia de trestuque, y tratan de engañar a ro biello dios intentando rechubenezer o suyo cuerpo fesico, disaprofeitando a gran oportunidá que ra biellura suposa ta posar un gafet d'oro a ra bida, adempribiando-la con dinnidá y naturalidá.

Y ye que o trango d'o tiempo, talmén luen de estar una maldizión, puede tornar-se en una buena traza de aprofeitar as oportunidaz que a bida mos traye cutianamen. Si paramos cuenta y sabemos beyer ixas oportunidaz, talmen consigamos que o biello dios Kronos – Saturno se torne en un buen amigo. N'un berdadero aliaú.

 

Hosted by www.Geocities.ws

1