|
|
|
Ruta 1 Dica la
fana de Xinistaza. Arquiteutura ya naturaleza
amiestanse nesti camín pol Cuartu de Riera, testimoniu
de que la segunda ía más fuerte ya gana'l tiempu de
miente más amañosa que l'acción ya'l trabayu del home.
Dende Tinéu, el viaxe principia baxando p´hacia Cangas
dica la caleyada de La Florida, ú nos escibiamos haza
Uviéu, siguiendo'l camín del Narcea (AS-15). Despuéis
de cruciar la Central Térmica de Soutu la Barca, n'usu
dende 1965, aprucirá más ou menos a 2 Km, la escibia pa
Tuña (AS-310). Nu l.láu dreitu puen apreciarse los
voladizos nos que hasta los anos 50 se coutivabanse
vides. En dirección a Xinistaza, dególase'l val.le dica
Torayu ya La Pontecastru, onde, un pouco más alantrona,
el desvío a manzorga de la caleya empobinarános dica
Xinistaza; despuéis de percorrer 3 Km más por una
caleyina estreita, ente castañales ya rebol.los, el
viaxeiru chega a un puelu mediu abandonáu. Ya a la
salida del puelu, camín de L'Azurera, sorprenderanos los
materiales arrastraos como consecuencia de la gran
fendedura natural de la montaña, lo que se conoz en
l.lingua asturiana como fana; 4 Km más ya 1300 mts
d'altura aportamos a la Braña los Cadavales onde
toparemos formosos fayeos. |
|
Ruta
2 Naraval-Silval.lana. En chegando a Navelgas,
el camín tuerce a la dreita, haza L.luarca (AS-219). A 4
Km ta'l puelu de Naraval. Dende eiquí, el camín dica la
Braña de Silval.lana pue faese a pía, nun percorríu
bonu d'andar de malapenas 8 Km. En Naraval cueise'l
camín de la capiel.la de S.Damías, cua festividá
celebran al dia siguiente de S.Salvador (6 d'agoustu),
patrón de la parroquia. Asitiáu nun guapu parax
boscosu, antes faciase una xanta nuna l.lanada ya güesi
faise misa ya procesión. El trayeutu haza Silval.lana
faise por un camín de ferradura en bon estáu, ensin
grandes saltuchones, al son del riu, ya nu cual
s´entrecaya la viesca caducifola xabaz conos ocalitos.
Silval.lana yera residencia de iviernu. Alcuentrase nun
parax xabaz, empobináu al meudia ya dende'l que
s'acolumbra'l puntu de partida d'esta excursión: las
l.lombas de la Braña de Bustel.lán. |
|
|
|
|
|
Ruta
3 Por tierras vaqueiras. Na primavera de 1998
l'Asociación Cultural Manxelón, nome de la l.lomba que
guarda los restos del primitivu castru pésicu denomáu
Castiel.lu Manxelón (los pésicos yaran el puelu
prerromanu qu'habitaba la zona ya bona parte del ouccidente
asturianu cuando los romanos aportanon a Asturies),
perfilou'l proyeutu d'un Muséu Vaqueiru, cua sede ta
anguano en construcción. El Muséu Vaqueiru vei ser
dende'l próximu branu un puntu de partida pa conocer ya
percorrer, preferiblemente a pía, burru ou bici las 7
brañas d'esta parroquia ya las rutas tradicionales de la
trashumancia vaqueira, esos caminos qu'antano sofitaban
el pasu de ganaos, tarecos ya familias de Monterizu,
Bousinán, Brañaescarden, Aristébanu ou Silval.lana
haza los praos de branu de Las Tabiernas, Bustel.lán o
Los Corros. Hasta hai 20 anos, la trashumancia faciase a
pía ou en burru. Una filera de vacas grandes ya
pequenas, burros ya pul.linos cargaos con arabías de
l.labranza, tarecos de la casa ya alimentos, poníanse en
marcha haza la braña de riba alrodiu San Xosé. Por
muitas causas, tales como'l cambéu de ganáu, l'abandonu
d´ouveas ya chibas ante las repoblaciones forestales ya
l'apaición de las agrupaciones escolares, la
trashumancia nun ía más qu´un recuerdu de tiempos más
difíciles, de los que los vaqueiros de Las Tabiernas ya
Bustel.lán se recuerdan con una fiesta braniega na
Casa'l Puertu. Enguanu, el viaxeiru puei fer un cómodu
trayeutu de una a outra braña se anantias dispuén de
vehículu priváu. En saliendo de Tinéu pola carretera
de Vil.latresmil (Tl-1), el viaxeiru sube dica'l altu de
Casa'l Puertu, dende onde pudirá, en días ensin cercia,
char una güeyada a toda la Braña de Las Tabiernas conos
típicos cortinos al rodiu de la casa tradicional de
planta terrena. |
. |
Dende
Las Tabiernas puei subirse dica Bustel.lán, ya dende
esta braña aportar a la de Los Corros, yá en territoriu
de Valdés. El contautu conu paisax ya xente d'estas tres
brañas ufren al viaxeiru esi primer achegamientu al aire
de l.libertá de las tierras altas ya abiertas, al tiempu
con todalas suas inclemencias. Continuará despuéis pola
estrada (TI-2) baxando polas aldeas de El Fondal,
Fastias, La Rubiera ya L.laneces hasta Caeras, onde lu
recebirá'l cuerpu al.longáu de la ilesia parroquial que
da solombra al xuegu los bolos. La Ilesia de Samartín,
muito grande, féixose na segunda metada del sieglu XIX
ya nel.la ta'l retablu del desapaecíu monesteriu de
L.lapéu, en Balmonte. Al l.láu del templu ta la casa de
Riegu, feita sobro una antigua torre medieval nu sieg lu
XVIII ya desfigurada por sucesivas anovadas. Nu mesmu
puelu, tendida sobro la fastera, apaez outra casona
solariega, la de los Xiraldo, de finales del sieglu
XVIII. Siguiendo en dirección a Navelgas, cruciase'l
puelu de Esi, asitiáu onde se xuntan los ríos Bárzana,
Navelgas ya Caeras que xunen sus aguas pa formar el
truiteru ya salmoneiru Esva. El puelu d'Esi yera l.lugar
de pasu obligáu pa los vaqueiros que cruciaban el riu
por una ponte de piedra qu´entá se caltien en bon
estáu. A la oriel.la del riu ta la pequena capiel.la de
San Pedru, que caltien humildosamente na sua muria
testera una ventana románica de dous arcos de ferradura.
Al cruciar La Rebol.lada La Veiga Folgueras ya Muñalén
atafaral.lará viaxeiru el fuerte contraste ente las
aldeas de los xaldos, nu val.le, ya las brañas
vaqueiras, na sierra. |
|
|