咖臨東京目黑區

可能你已經去過東京無數次，邊間舖最正邊間餐廳夠抵都一清二楚，不過就未必去過目黑區。其實呢度係個住宅區，冇旅遊點，不過就有幾間特色咖啡店。點解要專登走去飲咖啡？因為除左飲野，仲可以一邊買衫、買燈同買CD囉，對於連食飯都掛住買野的超級購物狂黎講，絕對值得大「咖」光臨。

購物狂天地

由中目黑站出發，沿住大馬路山手通直行十零分鐘，經過住宅區，在獨立洋房間穿插，就會見到呢幾間咖啡店，地點較僻唔易搵，正好俾大家休休閒閒慢慢逛。

Mangosteen Cafe門口細細，行快D都會走漏眼，但咪以為舖仔細細就位都唔多個，情況剛好相反。由正門一入就係露天茶座，三、四張細木台最適合談心曬月光，非常「露ManTic」；室內分兩部分，前半部一格格擺滿印花衫裙，後半部主打餐點，可進餐兼飲咖啡，店內仲有兩部試聽機俾客人試聽或選購CD，就算一個人去都唔會悶；最後面仲有兩間私家房，三五知己傾偈劈酒一流。

Mangosteen Cafe

地址：日本東京目黑區青葉台3-14-2 舖

電話：（81）3-5458-5725
營業時間：中午12:00~11:00pm
前往方法：由中目黑出口，行15分鐘左右即到。

目黑狗同盟

同Nike絕對無關 Cafe Nike，距離Mangosteen Cafe 5分鐘路程，由一隻假狗看門口，一入去即有一團黑影迎面撲來，原來係咖啡店內專同客人玩的狗黑仔（小記幫佢改名）。坐低飲杯咖啡，¥500（約HK$32），發現除左狗之外仲有貓，又可以買狗衫，幾過癮！愛狗之人必到。

Cafe Nike
地址：日本東京目黑區青葉台3-17-7舖
電話：（81）3-3780-1017
營業時間：中午12:00~12:00pm

樂迷熱蒲點

熱愛音樂的森敦彥，兩年前開左Rock Steady，以音樂會友之餘，亦作為自己的錄音室，所以音樂設備齊全。酒吧內主要以播放Jazz同巴西輕音樂為主，等你靜靜飲酒談心，仲有機會欣賞到老闆森敦彥的即場演奏！呢度有六、七十年代的黑膠唱片，可以買返屋企慢慢嘆！

Rock Steady
地址：日本東京目黑區青葉台3-17-10舖Sharom BLD. 1/F
電話：（81）3-3462-1176
營業時間：7:00pm~凌晨5:00（逢星期日休息）

交通：往目黑區要搭JR東急東橫線，惠比壽站轉日比谷地鐵，中目黑出口出就得。