Di Raw BF Pero May Malaking Photo Sa Kwarto Niya!

Pinabulaanan ni Jennylyn Mercado na kaya di nito itinuloy ang pag-audition sa Darna role ay dahil pinagbawalan siya ng rumored boyfriend niyang si Mark Herras.

"Bakit naman sisisihin si Mark gayung wala naman siyang karapatang pagbawalan ako dahil hindi naman kami magnobyo. Nagtataka nga ako kung saan nanggaling ang balitang yan. Sa totoo lang, natakot ako sa harness dahil malulain ako at may phobia sa matataas na lugar. Isa pa, hindi pa ako handang magsuot ng sexy costume ni Darna. Feeling ko hindi ito bagay sa akin," sey ng dalaga.

Idinagdag pa rin nito na kailangan niyang mag-work-out ng mabuti para pumayat at bumagay sa role ni Darna.

Kahit i-deny nito na hindi sila magnobyo ni Mark ay maraming ayaw maniwala dahil may nakasabit na malaking picture ng aktor sa kanyang kwarto. Katwiran pa rin nito ay close friends lang sila.

Nakalipat na si Jennylyn sa Golf Hills sa isang townhouse sa old Balara kaya hindi na ito hirap sa biyahe di gaya nung nasa Las Piñas pa sila.