OUTUBRO-DECEMBRO 2001



CURSIÑO DE EFECTOS ESPECIAIS		En colaboración coa Casa da Xuventude de Ourense, curso impartido polo técnico Ricardo Spencer, único especialista na materia dentro do audiovisual e a escena de Galicia. O curso, esencialmente práctico, pero tamén con interpretación de guións, mostra de vídeos con rodaxes, etc., tivo unha duración de 20 horas, e transcorreu nos locais da Casa da Xuventude os días 31 de maio a 4 de xuño de 1999. Spencer, brasileiro afincado en Vigo, licenciado en periodismo, ten unha experiencia de catorce anos como técnico en efectos especiais de todo tipo, primeiro no seu país natal e desde hai un tempo nas terras portuguesas e galegas, onde ten sido o responsable de efectos especiais de películas como *Fisterra* (de Xabier Villaverde) ou *Blanca Madison* (de Carlos Amil), telefilmes como *O Tesouro* ou *Mareas Vivas* (ambas para a TVG), e infindade de curtametraxes, pezas publicitarias, obras teatrais e montaxes dos máis diversos estilos. As prácticas deste curso permitiron aos participantes realizar trucos baseados na utilización de materiais sinxelos, dispoñibles no comercio habitual e de baixo custe, e ademais facelos con total seguridade, posibilitando ao participante desenvolver os seus propios productos e orientalos a promover a capacidade de improvisación e adecuación a orzamentos mínimos. Temario do cursiño: o circuíto eléctrico — a fabricación de moldes de partes do corpo — a simulación de disparos no corpo — as maquillaxes e o sangue — as explosións controladas.
CURSIÑO DE GUIÓNS CINEMATOGRÁFICOS		Curso impartido por Carlos Hervella, profesor titular da Escola de Imaxe e Son de Vigo, cunha duración de 20 horas, nos locais da Casa da Xuventude de Ourense, os días 10, 17, 24 de novembro e 1 e 7 de decembro de 2001. Carlos Hervella imparte na EISV as materias de Proxectos, Guión e Producción de TV; ten participado en películas como Dame algo, de Héctor Carré, ou Lena, de Gonzalo Tapia; e en produccións televisivas como Energías renovables (Canal +) ou os magazines Cousa nosa e 2010. O contido do curso foi un achegamento pormenorizado ao guión cinematográfico e o seu proceso inicial: sinopse, tratamento, estructura, guión literario e guión técnico.
OBRADOIRO DE CINEMA		Dentro dos Obradoiros de Extensión Universitaria 2002 da Universidade de Vigo, no campus de Ourense, o Cineclube Padre Feijoo organizou o Obradoiro de Cinema. Complementando a proxección de varias películas no Ciclo de Cinema Clásico (abril e maio), o curso, impartido por Henrique Torreiro, consistiu na análise das diversas facetas do fenómeno cinematográfico, desde a realización das películas ata o seu visionado, cunha duración total de 10 horas, convalidables por 1 crédito. As aulas teóricas complementáronse con visitas á cabina de proxección do salón de actos da Biblioteca Pública e ás dos cines Lauren Ourense. Henrique Torreiro foi coordinador as edicións quinta e sexta do Festival Internacional de Cine Independente de Ourense. Colaborador con críticas cinematográficas en medios radiofónicos (Onda Cero Ourense e Radio Voz Ourense) desde 1992, é secretario e programador do Cineclube Padre Feijoo desde 1995. Os obradoiros, con diferente programa, fixéronse coordinadamente cos cineclubes Pontevedra e Kinema (Vigo). Programa do curso: 1. As orixes do cinema: Prolegómenos — Inventos previos — As primeiras proxeccións públicas — A xestación do espectáculo cinematográfico; 2. Da producción á distribución: Historial básico do proceso cinematográfico — Vocabulario e oficios básicos — As redes de distribución; 3. A proxección: Os distintos formatos — Os proxectores — Os tipos de pantalla — Os estándares de son; 4. Achegamento ás análises cinematográficas: comentar unha película: Perspectivas básicas — Interpretación e comparación de críticas cinematográficas

voltar á páxina principal