Tuni tuhun ciangin leitungbup gamthupi mun tuam-tuam ah Zomi te kizel (ki theh thaang) in ki om a, mualzatam halna ah ii omphial mah zongin pianna tun nu Zogamnuam leh Zomite khantoh theih na dingin lungsim tawng munkhat ciat ah lainatna leh veina nei vive hihang.
Online ah ahi zongin,adang media tuam-tuam pan ahi zongin hihtheihzah in a sem sem mah tampi om hi.
Kawlgam sungpan ahi lo mundang gamdang aa om Ciin leh Tuai te ading ahih leh online tungtawn in kizopna tam pi zai tuam hi-mah taseleh ii gam ii lei aa, ii om lai,neek leh dawn hamsatna tek mahtawh leh khua muhlohna ahang tuam-tuam te hangin online community sung alut zo lo lah atamzaw ki omlai hi.
Kawlgam sung a om Ciin Leh Tuai te ading ahihleh ii theih-sa-mah bangin lampi ding them beek zong omlo hi.
Ciin leh Tuai te aw Zogam leh Zomi ei leh ei ii ki uk zongin,kawlgam ki ukna sungah kua kumpi kua kumpi in hong uk zongin Zogam leh Zomi khantoh nading Zomi Ciin Leh Tuaite mah in hanciam takin mapan-na neih kei leh suun mang te taangtung zo ngei diam?
Gam dang lamnapi aa omte in hanciam in, kikum in, sem sem mah ta leh Zogam leitang aa om Zomipi te in theihpihna,noptuampihna,galmuhna beek nei kha kei le uh maw!
Ii ngimna,ii tupna,ii hanciamna te Zogam leitang tung mahmah ah leh Zomi pi sung mahmah ah zong a husa kizel kim,thawn kim na theih ding thupi hi.
Zogam leh Zomi khantoh nading a kisam mah-mah ve-ve khat ahi a nuai a thulu pen Ciin Leh Tuai te ki lunghualna tawh sem khia zo leng ci-in itna muanna tawh kong zawn hi.
Pilna saal (library)
Pilna saal' thupit zia ii thei tek hi.
Tedim,Tonzang,Kawlpi hih khua thum beek ah Zomi khangthak te a ding pilna saal nei zo leng hoih ding hi.
Online tungtawn aa ii ki kup zel thute leh adang thu-thupi tuam-tuam te Zomipi in a theih kim na ding in hih pilna saal te ki zang thei ding hi.
Pilna saal khat laibu bu 1000 tawh pan leng 500,000 kyats
a tawm pen ki sam pah hi.
Sepzia ding te leh athu neng nawi tuam-tuamte pen ki kum pha lai leng a hoih pen na sep na khat ki suah zo ding hi.
Itna muanna tawh,
[email protected]