Prima, si trattarà d'un riassuntu storicu di u corpus planning in u casu di a Corsica. Si vidarà cusì comu sta sucetà di tradizioni urali hà adupratu u scrittu à un'epica impurtanti di a so storia. Fighjularemi u passaghju da un codici scrittu vicinu da a grafia talianu à un codici duva hà da sbuccà una grafia corsa specifica. A parta da u 1971, hà da nascia una nova mentalità linguistica, i corsi anu da fà a leia trà i cuncetti di tradizioni è di criazioni, è s'hà da pudè rispittà à u scrittu a variazioni linguistica di l'isula. Faremi u puntu nantu à a situazioni attuali par ciò chì tocca à u sviluppu terminulogicu è i pratichi in issu sensu.

U sicondu puntu ammenta u status planning, vali à dì a pulitica linguistica da un puntu di vista ghjinirali. Si tratta di a gestioni di i rapporti trà a lingua corsa è l'altri lingui prisenti in l'isula dipoi u XVIII u seculu. A situazioni attuali : comu sò spartuti i duminii occupati da i dui lingui in prisenza, u francesi è u corsu, è in chì modu si pò parlà di diglussia, di plurilinguisimu è di bislinguisimu.

Si compii cù l'aspettu ufficiali : da a rivendicazioni linguistica à i misuri aduprati da l'assemblea di Corsica è da u statu francesi. U prublema di u statutu di a lingua corsa, a pusizioni di a Francia di pettu à l'insignamentu ubligatoriu è à a cuuficialità. A mancanza d'una vera riflissioni nantu à a pianificazioni linguistica, mancanza di strutturi incaricati di a lingua. U rolu di l'Auropa, a carta di i lingui minuritarii è a nicissità d'una riflissioni in cumunu.