My Life
二零零二年二月二十八日 天氣：晴 心情：緊張-->好
二月的最後一天，過得真快，sem B都過了差不多一半..
今日終於完成左個pol present，經過今日既present，我知道打死我都唔會揀pol讀。
夜晚約左Annie同Ivy一齊食巴西燒烤的buffet，很不錯，但肉了點，我們還撞到...hehe..都係唔公開免得安妮姐尋仇，Ivy說了一句：『我們三個經常都好stable咁可以約出黎食飯。』皆因其他人都好難約，仲有的...弦外之音是什麼?
我今日又好大慒咁差d禁完錢唔記得拎..........
二零零二年二月二十七日 天氣：晴 心情：------
The ans: Flatman and Ribbon
今日前所未有的咁大慒。上完business，有一段時間剩，之後去左computer lab print野，之後就去上sociology tutorial，但當我準備去上堂既時候，我發現自己冇帶timetable，唔知係邊個課室上堂。我諗上sociology，咁就一家係SO上，仲要係一樓，上到去，見到思齊閒聊左一陣，仲要話Iris已經去左上堂，咁我就好快咁開門入去搵課室，一入到去，好似同上個星期o個度唔同樣，搵搵下都唔見我上堂既人同地方，但我記得係一樓，之後我擔心，又冇帶電話(因為冇電)。好彩見到思齊，諗住打俾一個之前係o個課室上堂的同學，點知佢飛左線番屋企。係呢個時候如果再番宿舍拎就唔駛上，好彩carman仲有少少聰明，記得tutor間房門口有timetable，當然我最後都上到堂，不過就遲左d囉.......
尋日番左city練劍，好耐冇試過練到一身汗，仲被阿拎拎『吉』左一下鎖骨，o個一下既聲都不知幾清脆，到今日都仲隱隱作痛呀。
二零零二年二月二十六日 天氣：ok啦 心情：麻麻地
Today's Question:
What do u call Batman and Robin when they've been run over by a truck?
(from my roommate's calendar) Ans will be posted tmr !
今日要折隋到走堂做功課、做present，唉，真係不知所謂，但又係有一噸野要做，點做呀？
二零零二年二月二十四日 天氣：ok啦 心情：緊張
今日打了Joint-college fencing individual competition。
二零零二年二月二十三日 天氣：ok啦 心情：好飄忽
今日沒有補習，有點兒內疚，昨晚訓得唔好，可能係擔心卦！?今日情緒好低落，唔知點解，但好快就好番，that's why 我話係飄忽。明天一早就要去柴灣ive比賽，做乜要去到咁遠呢？
o個d賤人，真係好好好黑人憎，聽到後實在太嬲喇！
二零零二年二月二十二日 天氣：ok啦 心情：沒什麼特別
做乜我無啦啦會去青衣ive呢?
今日聽到話某人係一個msg board到留了鬧人的說話，有種無奈的感覺，感情事，旁人沒有插手或插口的權利，我並不幫任何人，只係覺得你唔係當時人，你知發生咩事咩?這樣做是不智的行為，希望不會再有這種事情出現啦！
人係需要發洩的，只係方法唔同，講粗口唔係問題，只要唔好開心唔開心都講就是了。有咩唔開心可以同我地講....我們是一家人！
二零零二年二月二十一日 天氣：ok啦 心情：沒什麼特別
今早很晏才起身，訓得很滿足呢.....但今日上堂，依然覺得好眼訓。
昨天的日記，害得朋友都很擔心，你們放心，我不會自殺既，我只係想『腎』下，我沒事的。
我忽然間係度諗番，從前跟朋友一起談話總是嘻嘻哈哈，談談她們的感情生活，現在談的都是GPA，都是錢，總之都要唉聲嘆氣，人大了，要煩惱的事自然多了，或許我勤力些，便不會這樣多麻煩了！
二零零二年二月二十日 天氣：ok啦 心情：差
好想大喊一場發洩下，怎麼可能對住份功課幾個鐘頭，其實已經好幾天了，都做不下，只係一版紙，激死人喇！仲有pol present，仲有logic，仲有business，仲有soc，仲有.........................救命！
二零零二年二月十九日 天氣：ok啦 心情：普通
今日好眼訓。
係我檯的面前，有一棟參考書，不錯，因為有一堆野要做，我檯面才會出現一棟的參考書。
夜晚小組，提及他們的壓力，但我想到自己好像是沒有壓力似的，我只會說我很擔心，因為.........但從未因為擔心而出現生理上的病症，更不會吃不下食物，沒有壓力是好還是不好呢?我是抱著一個怎麼樣的心態去小組呢？明顯是不同了。
二零零二年二月十八日 年初七 天氣：ok啦 心情：普通
生日快樂！
我今日dayoff了自己，因為未做晒功課，又想去玩，所以同敏敏、飛仔同Jeremy，去左唱lunch k，但番到宿舍，肚子唔舒服了，今早睇醫生的藥有用了。好慘，又病過，餓到胃痛都唔想食野，但當然啦，我唔會刻薄自己，我依然有吃晚餐。
要開始做野了，尋晚做到3點都做唔完....唉！
二零零二年二月十六日 年初五 天氣：ok啦 心情：普通
今日要番工，想到了一些事，原來人與人之間係講條件，好多大人買玩具俾小朋友時，大都要求小朋友做些事，最典型的就是要俾心機讀書、或者係聽話，好少人願意無條件地付出，其實情侶都係一樣，往往要求對方做一些事，對方做唔到，就係佢既錯...人就是這樣的了......
我亦睇到最幸福的小朋友唔係父母願買任何玩具給他們，最幸福的是沒錢的父母，他們雖然沒有買玩具給他們，但看到他們願意付出時間帶佢地既仔女去玩具反斗城玩，就知道佢地用心良苦。我小時候，爸爸媽媽從來都未帶過我去玩具反斗城，但佢地都會買玩具俾我，我都好珍惜我的每一份玩具，我幼稚園時，佢地買俾我既聖誕老人爬梯玩具還在呢，我覺得我都算是幸福的小朋友，或者小時候妹妹還未出世，做獨女是很好的事。
同埋今日我最後決定了代表city參加jointcollege，對於嶺南，感到好唔好意思，但我知道今次係我最後一次同那幾位美麗戰友一起作賽，今次過後，唔知幾時先有機會，好懷念大家一起練劍bilibala的日子。
二零零二年二月十五日 年初四 天氣：好好 心情：
今日要開工了---補習，逗了我認為大的利是，除此之外，別無其他特別事發生了。
今晚又同Ivy講了很久電話，今次係我刻意搵佢，因為有問題要請教佢，佢令我最感欣賞既係佢可以俾到一點指示我，同佢傾完，好似知道自己應該點做，social work好適合她。
奇怪，怎麼大家都寫起日記來，還是我太八卦，無喇喇去看別人的日記。
二零零二年二月十四日 年初三 天氣：好好 心情：幾好
今日本以為又要坐係屋企，後來去左舅母屋企，再同阿ling去左睇<Ocean's eleven>(盜海豪情)，一套頗深的戲，要不斷咁用腦先至明，但好滿足看了一套好戲。
忘了一句要補充，今天是情人節。
二零零二年二月十三日 年初二 天氣：好 心情：悶
又是在家裏悶，無無聊聊地，租了隻VCD看，<我的兄弟姐妹>想睇好耐，沒機會罷了，果然，我是個不折不扣的感性女子，邊看邊哭，哭得把自己也看成是一劇中的一分子，那麼感人的戲，怎能不哭呢？
小孩子的可愛、天真，他們兄弟姐妹間的愛，對父母的愛......真的讓人感動了，很久已沒有看過這麼令感動的戲了，還想看多一次吧！
二零零二年二月十二日 年初一 天氣：ok好 心情：沒什麼特別
今日係大年初一。但一早起身，個鼻就麻煩了，不斷流鼻水，結果係不斷咁訓，訓到人也有點兒呆了，現在沖完涼，才稍為清醒一點。
今日睇完阿妍既日記，覺得佢大個了。佢既日記多了好多更深既感受，人經歷多了，感受自然更深，是好是壞，唔知呢？視乎佢自己啦................
二零零二年二月十一日 年三十晚 天氣：ok好 心情：沒什麼特別
今日都冇咩做.....只係待在家罷了。
晚上同屋企人去行花市(指定動作)，唔知係咪一杯雪糕車的雪糕，定係因為著唔夠衫，愈行愈支力，愈行我的傷風就愈嚴重，我想撐不了。
二零零二年二月十日 天氣：ok好 心情：都好
小妹今日既心情好好，皆因尋晚睡眠充足，今晚又可以同低重心家人食團年飯。好不容易，捱到收工了，可以食團年飯。毛肥介紹的那家酒店的buffet真的很不錯，三文魚好好食.......食到肚都脹脹的。之後就到尖沙咀飲野，飲左一陣便回家了。
二零零二年二月九日 天氣：普通 心情：麻麻
今日要番工，但好似發燒唔多舒服，搞到今日好辛苦。番到屋企就訓，一訓就訓到第二朝。
二零零二年二月八日 天氣：忘了 心情：差、失望
今日才從宿舍走，約了阿Ling吃午飯，本以為可以開開心心放假過新年，又可以與低重心一家吃團年飯，但係..今日發生了兩件好唔開心既事.............
第一，阿媽打電話俾我，從來都唔同阿媽講電話既我，同佢談上了好幾分鐘，原因？不應、不想發生既事，發生第三次。我們一直以黎既寬恕、原諒又有什麼用？佢究竟要我地點做，先肯真的改過呢？重蹈覆轍，令我對這一個人不能再信任，沒有了希望，係我家中的一個遺憾。
今晚約了瑋琪同敏敏到沙田食飯，食東東雲x面，當然在我們的約會，多以傾心事為主，給她看了我們去海南島的相。海南島，小妹的第一次旅行，本以為是一個美好的回憶，對這個旅行滿有憧憬，可惜回來後所發生既一連串事情，令我有更深的罪咎感，如果唔去旅行，一切事情都唔會發生，唉！
第二件發生既事，就係關於妍妍同毛肥的事，事情已發生到無可救藥的地步，莫文蔚的那首<兩個女孩>就好o岩毛肥，我對這個朋友，一向以真心對待，又信任佢，但係點解會係咁？
二零零二年二月七日 天氣：普通 心情：ok
很煩，要搞低重心的團年飯，沒錯本是低重心要食團年飯，不知怎的嶺南的劍會也有團年飯，仲有好多人添(Joanna, Debbie, Maggie, Carrie, Carmen, Evena, Bear, 軒, 粟米, 奧雲, 阿迪, 有兩個唔知咩名, 珊, jack, peter...我諗冇數漏的，有的請多多包涵！)
要報Joint-college，連我自己也找不出答案應該如何，其實我好像沒有選擇權，只是看看那一邊肯要我罷了。
我要努力d練劍呀，不負『師傅』s所望。邊個係?
低重心應該去到食團年飯卦......................！?
二零零二年二月六日 天氣：有點冷、陰 心情：普通啦
今日又上八點半，功課開始多起來。係時候要多做點事。
昨天，阿妍問我info的問題，我不曉得有多少人有update別人info的習慣，但我想過去了，我講也沒有問題，反正都是正常的。
每個人都有自己的一套思想和信仰，我相信是有必要堅持自己的一套，但有些時候，旁觀者看事情特別地清晰。
今日同Jacky係icq傾了很多.................
二零零二年二月五日 天氣：有點冷、陰、大霧 心情：唔好
唔知係咪天氣的影響，人既心情亦隨之而暗下來，好想提起勁做野，好想開開心心過活，好想朋友們都開開心心，但畢竟人總不能事事如意，究竟我往後的日子，又會係點呢?
今日上Introduction to Logic，有點混亂，原來我對logic這是一竅不通，對它一點概念也沒有，我該怎樣學與明才對呢?
今晚小組，我去到了另一個階段，算是信了主吧，係小組的過程中，我忽然想到了好多野，我想食雪糕(結果同Joanna去左百佳買)，我忽然想到了CCIV的阿sir，我記得他曾問過：你信輪迴嗎?想到了CCIV，我便想起了他，至今忘懷了沒有?我不清楚，只是我偶然也會想起便是了。
二零零二年二月四日 天氣：有點冷、沒有陽光 心情：緊張
我今日終於都去拎成績表，even我之前已經知道，但始終去拎張成績表既心情係唔同既。看到了，2.78....吁出一口氣，放下了心頭大石，算是大步跨過卦！？
我尋晚先同Iris姐傾完，點解我現在多了點不忿，多了點好勝，從前我唔介意成績差，我唔介意輸劍，我從不和別人比較，但現在呢？這樣比較的感覺很差，有點兒辛苦，或許我應該睇開d，這算是迫自己沒有要求嗎？
看到桌面一堆notes，從沒有眼尾看過一眼，係時候要動工了，絕不能再拖下去，我要發奮，我要努力！