g@lici@-suroeste
edición
electrónica 
g@lici@-suroeste
edición
electrónica
|
Mércores, 1 de decembro de 2004 O Problema
de Correos en Tomiño en vías de solución
Nos últimos
días falabamos dos problemas que os veciños de distintas parroquias de
Tomiño, sobre todo en Tebra, estaban a ter co reparto de correos. O
problema parece ser que está en vías de solución segundo informa nunha
nota o Presidente da Asociación de Veciños, Carlos Encisa.
Logo das
protestas realizadas polos veciños e de dirixirse ó Xefe Provincial de
Correos, este contestaba a Asociación de Veciños a semana pasada, cando
tamén visitaba Tomiño o xefe de Loxística de Correos, quen parece ser que
amais se entrevistou co Alcalde.
No día de onte
o Presidente da Asociación de Veciños dirixiu un escrito ó Alcalde de
Tomiño no que informa das últimas xestións e compromisos, e insta ao rexedor tomiñés a que
realice unha serie de melloras.
Segundo Carlos
Encisa, o Xefe Provincial de Correos, na resposta que lles remitiu, achaca
os problemas rexistrados no reparto á falla de pracas nos barrios, así
coma á falla de numeración nas vivendas. A isto o Xefe de Loxística, que
estivo a semana pasada en Tomiño, engade que a numeración das vivendas é
incorrecta xa que nalgúns lugares hai varias vivendas co mesmo
número.
Segundo
expoñen os veciños o Xefe de Loxística entrevistábase a semana pasada co
Alcalde quen se comprometía a pór as pracas cos nomes dos barrios e os
números correctos nas vivendas. Amais o sábado pasado os veciños de Tebra
celebraban unha Asemblea na que se comprometían a colocar buzóns en cada
vivenda.
No escrito da
Asociación de veciños de Santa María de Tebra, asinado polo seu presidente
Carlos Encisa, piden ao Alcalde que cumpra o compromiso adquirido co Xefe
de Loxística, referido á colocación de indicadores cos nomes dos barrios e
a numeración da vivendas. Tamén lle solicitan que faga ás xestións
oportunas para que se amplíe o horario da oficina de Correos en Tomiño, e
que medie para que volva a abrir a Oficina que había en Santa María de
Tebra, que daría servicio ás parroquias de San Salvador, Santa María e
Vilameán. Por último os veciños manifestan a súa preocupación pola situación que pode darse o próximo mes de xaneiro cando se incorpore a súa praza o novo repartidor e se elimine o reforzo que se estableceu no servicio estes días, xa que se non se solventa a situación, poderían repetirse os mesmos problemas. . O Club
Deportivo Miño – Teixugos organiza a concentración de Augas Bravas “Cando
o Tamuxe-Ruxe”.
O Club
Deportivo Miño – Teixugos de Goián celebra, do 3 ó 8 de decembro, a
Concentración de Augas Bravas de Galicia en Inverno denominada “Cando o
Tamuxe-Ruxe”.
Este encontro,
de referencia na Península, vai camiño de converterse nun dos principais a
nivel europeo, e un ano máis congregará en Goián a centos de palistas
nacionais e estranxeiros.
Co obxecto de
lograr que esta concentración sexa toda unha festa o Club Deportivo Miño,
en colaboración con diversas entidades organizou tamén unha serie de
actividades parellas. Así haberá dúas xornadas de Vídeo Forum no Centro Goianés en colaboración coa Asociación Cultural A Xanela. E o pavillón de Goián acollera un concerto no que actuarán Alberto Mvundi, Tino Baz e Foliada, entre outros. Aquí a organización corresponde á Asociación de Veteranos do Goian FC.
Martes, 30 de novembro de 2004 O Concello
de Tomiño construirá tres parques infantís
O Concello de
Tomiño vai construír tres parques infantís nas parroquias de Pinzás,
Vilameán e no Campo da Feira en Tomiño. As obras veñen de ser adxudicadas
recentemente.
A inversión
ronda ós sesenta mil euros, dos que algo máis de 33.400 proceden de fondos
do PRODER II e os 26.400 restantes son aportados polo propio
concello.
Coa
construcción destes parques infantís melloraranse notablemente os espacios
de esparcimento para nenos e maiores no termo municipal. O obxectivo do
goberno local é continuar con accións similares ate dotar a tódalas
parroquias deste tipo de instalacións.
Por outra
banda, en relación con obras, o Concello de Tomiño vén de solicitar de
Augas de Galicia unha subvención de 1.623.401,63 euros para financia-la
obra do “Colector Xeral de Tomiño” na súa segunda fase.
O Concello
de Tomiño recibe achegas por valor de 46 mil euros para a inserción
laboral de parados
A Consellería
de Asuntos Sociais, Emprego e Relacións Laborais, da Xunta de Galicia, vén
de conceder máis de 46 mil euros ó concello de Tomiño, dentro da política
de fomento da inserción laboral dos parados. Esta importante achega se realiza
ó través de tres programas de fomento do emprego.
O primeiro é o
Programa de Cooperación, no que o Concello de Tomiño percibe 3.136,12 €
para a contratación durante dous meses de dous peóns destinados a
servicios de limpeza de parques.
Ó abeiro do
Programa Labora, Tomiño recibe unha achega de 37.113,60€ para a
contratación durante un ano de catro peóns para servicios de limpeza de
rúas e zonas verdes.
Por último se
vén de prorrogar o servicio de Limpeza e Mantemento da Área Recreativa do
Lago da Pedra e outras, grazas á subvención de 6 mil euros de Asuntos
Sociais, aportando o concello idéntica cantidade. Aquí o fomento do
emprego realízase coa contratación de empresas de economía social. A
Concellería de Cultura de Tomiño fai pública a súa programación para o mes
de decembro
Cinco
espectáculos conforman a programación plantexada para este mes de decembro
pola Concellería de Cultura de Tomiño en colaboración cos ciclos “Galicia
nos sentidos” e “Sons de Fronteira”.
O primeiro dos
espectáculos previstos terá lugar este próximo venres ás once da mañá no
Auditorio de Goián. Vai ser unha representación de títeres para escolares
a cargo da compañía Falcatrúa. Os nenos do Colexio Rural Agrupado de
Tomiño asistirán á representación de “Linocho e a lúa”.
Dentro desta
programación de decembro o día 19, á unha do mediodía, actuará no local
social do pavillón de Barrantes, o trío Eire. Tamén o día 19, pero ás seis
da tarde, no Auditorio de Goián, está previsto un concerto a cargo do
tenor José Antonio Campo e a soprano Amparo Navarro, acompañados pola
Agrupación Musical de Goián.
O mércores 22
o público poderá disfrutar co directo da Orquestra Sinfónica de Melide,
que a partires das oito e media da tarde, actuará no Auditorio de
Goián.
Por último o
domingo 26 de decembro a Igrexa de Santa María de Tebra acollerá a
orquestra Mesturas. Este colectivo ofrecerá un concerto a unha menos
cuarto do mediodía.
(Redacción) Sábado, 27 de novembro de 2004 O director Xeral de Montes non ten coñecemento de que se vaian construír campos de golf ou urbanización algunha en Pinzás Ante a
pregunta formulada pola deputada do BNG, Rosa Darriba, sobre o proxecto de
construcción de dous campos de golf e 840 vivendas en Pinzás por parte
dunha empresa privada, o Director Xeral de Montes da Consellería de Medio
Ambiente respondeu que coñece “este suposto proxecto” polos escritos do
veciños e pola iniciativa do Bloque no parlamento galego, pero insiste que
non coñece ningún proxecto nin o anteproxecto. De todos
xeitos, di o Director Xeral na súa resposta, que a construcción destes
campos de golf sería posible a través de concesión, pero suxeitos a unha
limitación de tempo que unha vez rematada esta concesión revertiría na
Comunidade de Montes. Ao ser así, o suposto de construcción de vivendas
-afima o Director Xeral- é practicamente imposible que suceda, xa que
tería que haber unha permuta con outro terreo que limitara tamén coa
Comunidade de Montes ou haber un expediente de expropiación que demostrara
a prevalencia do interese público sobre o propio valor do monte.
Todo o
anterior require, ademáis, o informe previo da Consellería de Medio
Ambiente e tampouco descarta que por tratarse dun campo de golf fose
necesario un estudio de impacto ambiental. Segundo o Director Xeral nos
casos de construcción de campos de golf hai moitos intentos e rumoroloxía,
pero que na maioría dos casos non chegan a materializarse. Dende o BNG en Tomiño pregúntanse como é posíbel que se alimenten este tipo de rumores e que nin o Concello nin ningún deputado do Partido Popular no parlamento galego, poña interese en averiguar o fundamento que poden ter estas actuacións e a posibilidade que teñen de seguir adiante, dende o BNG seguirase de perto este caso para que os veciños poidan ter a información axeitada.
Venres, 26 de novembro de 2004 O BNG de
Tomiño inaugura hoxe local social
Ás nove desta
noite está prevista a inauguración
da sede local do BNG en Tomiño. Trátase dun baixo emprazado na
avenida principal do Seixo, na rúa Jose Antonio número 28. Ó acto de hoxe
está prevista a asistencia de Santiago Domínguez Oliveira, membro da
Executiva Nacional e concelleiro do BNG en Vigo, e de Olaia Fernández,
deputada no Parlamento español.
Este novo
local, que hoxe vai ser inaugurado,
ten coma obxectivos ser un centro de traballo para a organización
local do BNG, ó tempo que se busca que sexa un punto de encontro
referencial para tódolos militantes e simpatizantes nacionalistas de
Tomiño. Inicialmente o local abrirá para atender ó público tódolos luns de
oito da tarde a dez da noite. . O Concello
de Tomiño diríxese a Correos demandando un mellor funcionamento do
servicio no municipio
O Concello de
Tomiño vén de dirixir un escrito á Dirección Xeral de Correos de
Pontevedra para lle transmitir ás continuas queixas que se están a
producir no municipio polo “deficiente servicio de correos” neste termo
municipal. Así o acordou a Xunta de Goberno local quen considera que este
mal servicio débese, principalmente, á desaparición e á precariedade dos
postos de traballo de repartidores nas distintas parroquias
tomiñesas.
Dende o
Concello de Tomiño amosan tamén á Dirección Xeral de Correos a súa vontade
de colaborar para mellorar o funcionamento deste servicio no municipio.
Engaden amais a solicitude de ampliación do horario de atención ó público
nas oficias de Tomiño e Goián, xa que debido ó importante incremento da
poboación nos últimos anos, o horario actual é insuficiente para atender
ás demandas dos usuarios.
Xoves, 25 de novembro de 2004 Tomiño conmemora o Día Internacional contra a Violencia de
Xénero
En Tomiño a Concellería de Muller, Xuventude e Asuntos Sociais do Concello
de Tomiño programou unha serie de actividades ante a celebración hoxe, 25
de novembro, do “Día Contra a Violencia de Xénero”.
A primeira
desenvolveuse onte no mercadiño semanal e nas rúas do centro urbano, e
hoxe no IES de Tomiño. Será unha campaña coa finalidade de sensibilizar e
esperta-la conciencia da poboación para facer fronte á violencia no fogar
cos instrumentos que a lei ofreza e a sociedade teña ó seu alcance.
Por elo na
praza do Concello colocaron unha pancarta, confeccionada polas voluntarias
para a ocasión co lema “Nas túas mans”. Co mesmo lema están a repartir
pegatinas. . O BNG esixe
beirarrúas na estrada Cotro-Seixo
O grupo parlamentario do BNG presentou unha enmenda ós orzamentos da Xunta
para 2005 na que reclama o remate da urbanización da estrada Couso-Cotro,
xa que segundo din, as obras pararon ó chegar ó núcleo de Tomiño, no
Seixo, e non se completaron co remate do axeitamento dende o Seixo ata o
Cotro.
Dende o BNG
esixen que se remate a estrada e que se constrúan as beirarrúas
Cotro-Seixo, xa que segundo indican se teñen producido varios accidentes
de gravidade neste tramo. Engaden que os veciños dos barrios da Costa e
Cotro que se dirixen ó Seixo teñen que transitar por riba da calzada co
risco que supón facelo nunha estrada cun tránsito denso e que circula a
velocidades altas.
O tema foi
levado ó debate parlamentario polos nacionalistas, solicitando que nos
Orzamentos de 2005 se inclúa unha partida para sufragar esta obras e
correxir esta deficiencia, que indican “pode provocar máis accidentes se
non se actúa a tempo”.
Na nota, onda
fan pública esta esixencia, os nacionalistas de Tomiño critican tamén que
no seu parecer os Orzamentos da Xunta do próximo exercicio volven estar
caracterizados pola “ausencia de investimento real en Tomiño”. . A Asociación Xuvenil Taíña organiza un
Magosto en Goián A Asociación Xuvenil Taíña,
continuando na liña marcada desde fundación
deste colectivo de recuperar vellas tradicións e costumes da zona, vai
oerganiza-la festa dos magostos. Será o sábado, 27 de novembro, a partires
das seis do serán e terá como lugar de celebración a praza da Igrexa en
Goián. Como é costume nesta antiga festa galega, serviranse
castañas de balde. Para amenizar a festa “Taíña” contará con grupos
de musica tradicional e farán unha gran foliada na cal cada quen pode
traer o seu propio instrumento. Servirase viño, licor cafe e cilantro e
rematará a festa cunha queimada popular. A Asociación Xuvenil Taíña convida a tódolos goianeses e non goianeses a participar nesta festa e congratúlase de que sexa a mocidade de goián a que recupere para este pobo unha festa que xa desaparecera.
Mércores, 24 de novembro de 2004 Actos culturais en Goián
Dous son os
concertos que esta semana se van celebrar en Goián dentro do ciclo “Sons
de Fronteira” que promove a Fundación Comarcal O Baixo Miño.
O primeiro dos
eventos musicais deste ciclo celebrarase o sábado, ás nove da noite, no
Auditorio de Goián. Será o espectáculo “Missa Magnificus”. E ao día
seguinte, domingo, ás doce e media da mañá, a coral Ad Libitum actuará na
Igrexa Parroquial de Goián. . Actividades
en Tomiño por mor do “Día Contra a Violencia de Xénero"
A Concellería
de Muller, Xuventude e Asuntos Sociais do Concello de Tomiño programou
unha serie de actividades ante a celebración mañá, 25 de novembro, do “Día
Contra a Violencia de Xénero”.
A primeira
destas actividades vaise desenvolver hoxe ,no mercadiño semanal e nas rúas
do centro urbano, e mañá no IES de Tomiño. Será unha campaña coa
finalidade de sensibilizar e esperta-la conciencia da poboación para facer
fronte á violencia no fogar cos instrumentos que a lei ofreza e a
sociedade teña ó seu alcance.
Por elo na
praza do Concello será colocada unha pancarta, confeccionada polas
voluntarias para a ocasión co lema “Nas túas mans”. Co mesmo lema serán
repartidas tamén unha serie de pegatinas.
Amais hoxe,
mércores, e mañá, xoves, os alumnos e alumnas de terceiro e cuarto da ESO
do IES de Tomiño asistirán á proxección da primeira parte do documental “A
espalda do mundo”. Logo haberá un coloquio no que participará a técnica de
xuventude e a responsable da Oficina de Voluntariado da Mancomunidade.
Amais para o
sábado, está prevista a recepción, por parte do Alcalde, das once persoas
que están a participar no programa de voluntariado no concello. Tamén
acudirá a Concelleira de Asuntos Sociais. E xa para a próxima semana vaise celebrar en Tomiño a I Semana do Voluntariado. Será na casa de Cultura. De luns a venres, de catro a sete da tarde, poderase visitar unha exposición de Voluntariado e Cooperación cedida pola Asociación Solidarios para ó Desenvolvemento, e tamén se exporán os traballos dos alumnos do curso de Coiro, de fotografía, da Asociación de Veciños de Pinzás, e da Asociación Vontade, entre outros. .(Redacción) O PSdeG-PSOE denuncia a montaxe
irregular dunha grúa que ocasiona atrancos a persoas e comerciantes
|
|
|
O grupo municipal do PSdG-PSOE, de Tomiño, cualifica de “desidia” e
“covardía política” a actitude do goberno municipal do PP en relación a
instalación dun guindastre de obra sen licencia e ocupando o vial da rúa A
Guarda dende hai meses, a pesar de ter advertido no Pleno do día 30 de
outubro desta circunstancia. Naquel pleno, recordan os socialistas, se
espuxo a situación de ilegalidade do guindastre, engadindo ademais do
feito de estar utilizando o víal como depósito de materiais. Esta
ilegalidade foi corroborada por un informe da policía local. “Daquela a
hoxe”, engaden desde o PSOE, “a única actuación por parte da empresa
constructora foi a sinalización con luces do valado da obra, sen que ata o
momento se teña constancia de legalización desta grúa que está a ocasionar
dificultades puntuais de tráfico”, sinalando tamén desde a formación
socialistas, que se chega a pechar o vial para descargar materiais
causando molestais aos peóns e usuarios de establecementos comerciais da
rúa, sen que “se teña iniciado expediente sancionador por parte do goberno
municipal”. Dáse a circunstancia, din desde o PSOE, que o propietario da
empresa constructora foi concelleiro do PP na pasada lexislatura. O
PSdG-PSOE reclama a inmediata retirada da grúa xa que ademais do perigo
pontencial que supón para os que circulan por esta rúa, é un agravio para
as empresas constructoras que cumpren coas súas obrigas.