mumkin ho Aap say to bhulaa diji'ay mujhay
paththar peh hooN lakeer, miTaa didi'ay mujhay

har roz mujh say taazah shikaayat hai Aap ko
maiN kiyaa hooN, aek baar bataa diji'ay mujhay

maeray sivaa bhi hai ko'ie mauzoo'-e guftugu
apnaa bhi ko'ie raNg dikhaa diji'ay mujhay

main kiyaa hooN kis jageh hooN, mujhay kuch Khabar nahiN
haiN Aap kitni door sadaa diji'ay mujhay

ki maiN nay apnay zaKhm ki tash-heer jaa-ba-jaa
maiN maantaa hooN jurm, sazaa diji'ay mujhay

Qaa'im to ho sakay ko'ie rishtah guhur kay saath
gehray samundarooN maeN bahaa diji'ay mujhay

shab bhar kiran kiran ko tarasnay say faa'idah?
hai teeragi to Aag lagaa diji'ay mujhay

jaltay dinooN maeN Khud pas-e-deevaar baiTh kar
saa'ay ki justujoo maeN lagaa diji'ay mujhay

~SHEHZAAD~ yooN to shu'la-e jaaN sard ho chukaa
laikin sulag uThooN to havaa diji'ay mujhay