jo shajar sookh gayaa hai woh haraa kaisay ho
maiN payambar to nahiN, maeraa kahaa kaisay ho

dil kay har zarray peh hai naQsh mohabbat us-ki
noor AaNkhooN kaa hai, AaNkhooN say judaa kaisay ho

jis ko jaanaa hi nahiN, us-ko khudaa kiyooN maanaeN
aur jisay jaan chukay haiN, woh khudaa kaisay ho

umr saari to andhaeray maeN nahiN kaT sakti
ham agar dil na jalaa-aeN to ziaa kaisay ho

jis say do roz bhi khul kar na mulaaQaat hui
mudattooN ba'ad milay bhi to gilaa kaisay ho

kin nigaahooN say usay daekh rahaa hooN ~SHEHZAAD~
mujh ko ma'loom nahiN, us ko pataa kaisay ho?