各行各業之禁忌
棺材鋪
開棺材鋪就梗係唔老禮，而最緊要嘅兩個禁忌，就係：
1)一定要係日落之前收工，
費事ｄ遊魂野鬼走入嚟啦。
2)一定唔可以貪得意「
瞓」棺材，生人霸死棺，你地話係咪有幾唔老禮啊，俾錢都唔制喇。
記者
通常ｄ死於意外的人通常都血跡斑斑，面目全非咖啦．聽講話記者去到意外現場，千其唔可以講好核突呀，咁係對死者或意外者不敬的說話，如果唔係佢地真係會跟住你。
空姐
以前的空姐通常都會養龜，寓意『歸』來的意思，因為好多時佢地身在外地，客死異鄉就唔好啦。
理髮鋪
理髮鋪最多係乜？鏡囉！中國傳統，鏡不祥也．所以舊的理髮鋪收工之前，都會將毛巾蓋住哂所有嘅鏡先會收鋪，就係廢時俾ｄ鬼走入去喇。
警察
我諗好多人都聽過喇，就係無論點都好，晚上行必，千其唔可以除帽。所以你地睇佢地追賊都係按住頂帽去追就係咁解。點解關頂帽事？聽講話隻帽頂上嗰頂花，好大殺氣，所以無鬼夠膽攪你。仲有就係係凶殺案現場，都會莊柱香先。等被害的『人』幫手，可以等佢快ｄ尋冤得雪咁話。
演員
如果演員要拍死的戲，拍完之後就一定要囉翻封利是．囉的時候導演仲要同你講：『做戲嘅啫』廢事ｄ牛頭馬面信以為真，咁你就大件事啦！
導遊
帶團通常最多時間同團友一齊嘅時間，就係係架巴士度。係巴士度，導遊就梗係吹下水，唱下歌，講下郊遊心得和注意事項。但聽講話如果去緊一間酒店的話，就唔可以講果間酒店的鬼古。因為ｄ酒店閑閑地幾百年歷史，覺得你對佢不敬就唔好啦。
搭棚
原來搭棚的竹，分新竹同舊竹。所有臨搭棚的竹，都要莊香拜過一日一夜先可以上棚。如果唔係就好容易會有意外咁話。
巴士司機
好似係車廠出車之前，響一次大『安』，目的都係叫ｄ朋友仔（寄宿車內或搭車之遊魂野鬼）落車，俾ｄ晨光第一綫照親就唔好啦。
救生員
老一輩嘅救生員，都覺得有人遇難，除咗泳術唔掂之外，都會覺得係水鬼作怪。如果佢地救左一個人上水，就算真係無咗氣都好，都要係佢地耳邊不停講：『你未死架，你都未斷氣，快ｄ醒番』之類的說話，目的就係想等ｄ水鬼信以為真，離開遇難者，咁佢地咪就可能會救得番囉。
騎師
騎師嘅禁忌呢，就係騎師裝束上任何一樣野都唔可以『掛』，
尢其係對掛皮靴．掛靴即係退休，離開馬場也。
聽講話幾年前有個好出名的騎師唔信邪，掛左對靴，之後一落埸隻馬突然發癲，個騎師就跌咗落馬，斷左條大勒骨，從此係馬場上拜拜。
仵作
乜野係仵作，仵工？每當ｄ人死左，都有人黎收拾條『咸魚』架，仵工，就係果ｄ咁偉大的人。佢地仲有一樣野做，就係將ｄ舊『咸魚』係棺木度囉起上黎，削骨去肉，之後去入金塔或者入火化，再放係骨灰堂恭放。咁敏感的行業，小禁忌講三日都講唔哂，咁我不如講個最緊要的禁忌俾大家聽。就係無論點都好，唔可以唔見左『人地』身體的任何一塊骨，如果唔係就會得到同樣的報復。我個朋友話，有個仵工唔小心唔見左『人地』個下巴，又唔向『人地』講個對不起。之後一個星期發生交通意外，成個身一個傷口都無，剩係撞甩左成個下巴，你地話得唔得人驚？我聽到以後心都寒哂。
黃大仙解籤佬
黃大仙解籤佬嘅禁忌，就係唔可以講大話．就算有個病到半死的人，求到健康的下下籤，都一定要講出真相，依籤直說．
如果唔係就會應驗係自己度．聽落我覺得似係專業操守，多過似係禁忌。
漁民
十個漁民十個都信天后，希望風條雨順。初一十五食齋呀，呢ｄ我諗個個都會知。但係佢地有一個禁忌，就係如果捉到一種叫做『車輪魚』的魚，一定要掉番落海放生．聽講話捉到都已經會行衰運．如果唔信邪，分分鐘連命都無。所以係街市，大家從來都未聽過有得賣一種叫『車輪魚』嘅魚，就係咁解喇。
的士司機
佢地的禁忌就係唔想駕入掘頭路，驚有入無出，好容易掉頭的時間見到污漕野。之不過好多司機，驚無貼士，已經唔會再信乜野所謂禁忌囉。
