Mariangela Fumagalli Nettuno
Opera in dialetto comasco
VITA
Vita, vita dela galeera,
ogni dì a l'è el salt de la ringhera.
Mi credi semper
che la sia l'ültima volta...
ma ogni matina, spolveri giò
la cumprension e la pazienza.
A ciàpi per brasc el "savè
fà"
e me meti inscii denanz al specc
e cerchi de vedè
se podi fa un quai coss!
La facia l'è tiraada,
smönta, sbiadida,
a pitüri un po i öcc de blé,
i laber de ross, a me tiri sù i cavèi
e me par inscii de vech püsée curacc
e pizzi su la radio.
A vöri vess sicüra
che tüta l'Italia la ghe sia anca mò,
e dopo a cori, a cori là a la porta
per continüa la vita... cun sentiment.
Sommario