_________________________________________________________________________
   Informacion mbi Procesin e Hartimit te Kushtetutes ne Shqiperi  Mars 1998
_____________________________________________________________________________________
 
 

Forumi mbi Ekzekutivin i Organizuar nga QAKAPP

Më 12 Mars 1998, QAKAPP organizoi forumin e
katërt të  OJQ-ve për Kushtetutën.  Forumi - i
përqëndruar tek ekzekutivi - vazhdoi fazën e
pjesëmarrjes së publikut në procesin e hartimit të
kushtetutës dhe edukimit të publikut.  Gjatë forumit,
qytetarë dhe grupe qytetarësh shqiptarë identifikuan
çështje mbi pushtetin ekzekutiv të cilat sipas tyre
duhet të përfshihen në Kushtetutën e re të Shqipërisë.

Në Forum morrën pjesë më shumë se dyzetë
përfaqësues të OJQ-ve. Forumi filloi me një seancë të
shkurter referimesh prej ekspertëve shqiptarë,
Theodhori Sollaku dhe Genti Ibrahimi.  Referimet e
ekspertëve ishin në mbështetje të çështjeve që do të
diskutoheshin.  Më pas u organizua procesi i
"brainstorming" i drejtuar nga lehtësues shqiptarë dhe
të huaj.  Pjesëmarrësit u inkurajuan të ngrinin lirisht
çështje që ata ndjenin se ishin të rëndësishme për
kushtetutën.  Pasi u diskutuan çështjet e ngritura u
kalua në procesin e votimit për të identifikuar çështjet
më të rendësishme.  Çështjet më të rëndësishme për
çdo grup u paraqitën më pas në sesionin plenar prej
raportuesve të çdo grupi.

Pas forumit QAKAPP kombinoi rezultatet për secilin
prej katër grupeve në një listë të vetme çështjesh të
cilën do t'ia paraqesë Komisionit Kushtetues të
Parlamentit.  Këto çështje mendohet të debatohen në
Diskutimin e Përqëndruar në Grupe, workshope, dhe
aktivitetet e shtypit; përfundimisht do t'u paraqiten
edhe hartuesve të Kushtetutës.

Më poshtë do të gjeni rezultatet e forumit.  Ndonëse
shumë pjesëmarrës paraqitën edhe qëndrimet e tyre
mbi zgjidhjet e mundshme për çdo çështje, qëllimi i
forumit ishte të identifikonte çështjet dhe jo t'i
zgjidhte ato.

Zgjedhja e Presidentit
 
Shumë nga diskutantët në Forum e zgjodhën këtë
çështje si një nga çështjet e rëndësishme.  Gjatë
diskutimit u ngritën probleme dhe shqetësime si;
mënyra e votimit për Presidentin; procedura e
shkarkimit; mosha; anëtarësia në parti politike; dhe
marrëdhënia e tij me partitë politike në përgjithësi.
Shumë prej tyre ishin të mendimit që nga momenti i
zgjedhjes në postin e Presidentit, personi duhet të
ndërpresë funksionet partiake dhe të distancohet nga
partitë politike.

Funksionet dhe Kompetencat e Presidentit

Kjo çështje u diskutua gjërësisht pothuajse nga të
gjithë pjesëmarrësit në Forum.  Ata diskutuan për
probleme të tilla; si papajtueshmëria e funksionit të
Presidentit me funksione të tjera; heqja e Presidentit;
marrëdhëniet e tij me pushtetet e tjera; kompetencat
ekzekutive të Presidentit--në emërimin e kuadrit të
lartë ushtarak, kompetencat mbi forcat e armatosura,
raporti i kompetencave të Presidentit me ato të
Kryeministrit; kompetencat e vetos etj.  Një nga
çështjet e rëndësishme për pjesëmarrësit ishte edhe
përcaktimi i rasteve dhe i ushtrimit të kompetencave të
emergjencës nga Presidenti.  Gjithashtu pjesëmarrësit
diskutuan gjërësisht edhe për rolin dhe kompetencat e
Presidentit në lidhje me çështjet e sigurisë kombëtare
dhe të shërbimit sekret.

Zgjedhja e një Sistemi Qeverisës

U morrën në konsideratë zgjedhja midis sistemeve
Parlamentar, Gjysëm-Presidencial, Presidencial ose
Monarkik.  Disa prej pjesëmarrësve sugjeruan që një
çështje e tillë duhet të jetë një nga çështjet e
referendumit për kushtetutën.

Roli i Ekzekutivit në Kohë Krizash Qeveritare:
Mekanizma për një Kalim Paqësor

Pjesëmarrësit identifikuan si të rëndësishme edhe
përcaktimin e procedurave që duhet të ndiqen në rastet
e krizave qeveritare.  Dispozitat kushtetuese duhet të
ndihmojnë në arritjen e një kalimi paqësor të pushtetit
duke shmangur konflikte që mund të jenë në dëm të
shtetit dhe të mirëqënies së shoqërisë në përgjithësi.

Ushtrimi i së Drejtës Ligjvënëse nga Ekzekutivi

Për këtë çështje, diskutantë në Forum, u shprehën se
Kabinetit i duhet njohur e drejta ligjvënëse, por kjo
vetëm në ato raste kur legjislativi nuk është në gjëndje
t'a bëjë një gjë të tillë dhe kur kjo është një
domosdoshmëri për rrethanat përkatëse.

Struktura, Funksioni, Roli dhe Kompetencat e
Këshillit të Ministrave

Shumë nga pjesëmarrësit diskutuan për problemin në
fjalë si një nga më të rëndësishmit për çështjet e
Ekzekutivit.  Brenda kësaj kornize ata diskutuan për
përbërjen e Kabinetit dhe kriteret politike për
emërimin e anëtarëve të tij si dhe të administratës
shtetërore në përgjithësi.  Gjithashtu ata përmendën
edhe rishikimin e marrëdhënieve që Kabineti duhet të
ketë me publikun dhe me organizatat jo-qeveritare në
veçanti.  E rëndësishme për ata ishte edhe raporti që
duhet të ketë midis konfidencialitetit të Kabinetit me
Interesin Publik.  Disa nga pjesëmarrësit diskutuan
edhe për nevojën e një strukture të caktuar të Kabinetit
qeveritar me dispozita të kushtetutës.

Zgjedhja dhe Kompetencat e Funksionit të
Kryeministrit

Pjesëmarrësit ishin të shqetësuar mbi mënyrën dhe
procedurën e zgjedhjes së Kryeministrit.  Gjithashtu,
ata diskutuan edhe për raportin që kompetencat e këtij
funksionari (Kryeministrit) duhet të kenë me ato të
Presidentit të vendit.  Disa prej tyre theksuan që në
mënyrë të veçantë këto kompetenca duhet të
rregullohen për kushtet e gjëndjes së jashtëzakonshme.

Raporti i Qeverisë Qëndrore me Pushtetin Lokal

Diskutantët ngritën probleme të ndryshme në lidhje me
këtë çështje por ranë dakort për nevojën e forcimit të
kompetencave të pushtetit lokal.  Në mënyrë të
veçantë pjesëmarrësit theksuan që autoritetet lokale
duhet që të kenë kompetenca mbi tatimet.

Marrëdhëniet Midis Funksionarëve Politikë dhe
Atyre të Shërbimit Civil

Në këtë kuadër, diskutantët ngritën shqetësimin e tyre
mbi nevojën e përmirësimit të legjislacionit ekzistues
me synim qartësimin e kësaj marrëdhënie.  Nëpunësit
shqiptar --theksuan shumica prej diskutantëve--duhet
të jenë të mbrojtur në kryerjen e detyrave të tyre.  Një
përkufizim më i qartë i përgjegjësive të ministrave dhe
nëpunësve civil është i nevojshëm.  Brenda kësaj
çështje pjesëmarrësit diskutuan rreth përkatësisë
politike dhe anëtarësisë në Kabinet.  Ata gjithashtu
ngritën edhe çështjen e kritereve profesionale të
kualifikimit që duhet të zbatohen dhe se çfarë lloj
imuniteti duhet ose nuk duhet të zbatohet për veprimet
e marra.
 

Mbledhja e Gjashtë e Komisionit Kushtetues

Më 25 Shkurt 1998, Komisioni Kushtetues i
Parlamentit Shqiptar pati mbledhjen e tij të
gjashtë.  Takimi kishte këto çështje në
rendin e ditës:

     Diskutimi i projektit të listës së çështjeve
     kushtetuese kryesore të përgatitur prej Stafit
     Teknik.  (Sipas Rregullores së Brendshme të
     Komisionit Kushtetues këto çështje do të jenë
     objekt i një votimi special);
     Shqyrtimi dhe miratimi i anëtarëve të rinj të
     Stafit Teknik; dhe
     përgatitja e një kalendari dhe plani për
     regjistrimin televiziv dhe në kaseta
     audiofonike të mbledhjeve të Komisionit.

Komisioni dëgjoi gjithashtu:

     Prof. Dr. Jur. George Brunner prej Institutit të
     Drejtësisë së Universitetit të Këlnit i cili
     diskutoi mbi çështje dhe procesin kushtetues.
     Z. Brunner u ofroi gjithashtu parlamentarëve
     ndihmën e tij mbi çështje të procesit të
     hartimit të kushtetutës gjatë qëndrimi të të tij
     në Shqipëri.;
     ORT Rrjeti për Demokraci mbi rezultatet dhe
     çështjet që ishin ngritur në Forumin e dytë të
     OJQ-ve, në të cilin ishin trajtuar çështje të
     legjislativit.  Ky raport u paraqit nga
     Përfaqësuesja e Programit Juli Hoxha;
     Përfaqësuesin e ABA\CEELI John Kelley në
     lidhje me programin e USAID mbi treinimin
     për Kushtetutën, i planifikuar për t'u
     organizuar në Uashington, D.C.

Përveç anëtarëve të Komisionit në këtë mbledhje morri
pjesë edhe Kryetari i Kuvendit Popullor Skënder
Gjinushi.
 

Mbledhja e Shtatë e Komisionit Kushtetues

Më 27 Shkurt 1998, Komisioni Kushtetues u
mblodh për të diskutuar Listën e Çështjeve
Themelore për Projekt-Kushtetutën.
Anëtarët e Stafit Teknik paraqitën secilën prej
çështjeve duke u shpjeguar secilën prej tyre anëtarëve
të komisionit.  Lista e Çështjeve u miratua me disa
ndryshime.  Në fund të mbledhjes Bashkëkryetarët
Sabri Godo dhe Arben Imami i kërkuan Stafit Teknik
të përgatiste Hyrjen dhe një kapitull të parë ku të
trajtoheshin parimet themelore si p.sh. simbolet
kombëtare etj.
 

Mbledhja e Tetë e Komisionit Kushtetues

Më 13 Mars 1998, Komisioni Kushtetues u
hap me një diskutim në lidhje me
pjesëmarrjen e anëtarëve të partive të
opozitës.  Bashkëkryetari Godo ngriti mendimin se
dikutimi i çështjeve të rëndësishme duhej të shtyhej
për t'i dhënë kohë anëtarëve të opozitës, e cila u kthye
në Parlament më 21 Mars, të caktonin formalisht
përfaqësuesit e tyre në Komision.  Pas diskutimesh dhe
debatesh u pranua shtyrja e diskutimit të çështjeve të
rëndësishme.  Më pas, përfaqësuesi i ABA\CEELI
parashtroi shkurtimisht rezultatet e treinimit të
USAID.  Në takim ishin të pranishëm me statusin e
dëgjuesit edhe përfaqësues të komuniteteve më të
mëdha fetare.
 

Mbledhja e Nëntë e Komisionit Kushtetues

Më 18 Mars  1998, Komisioni Kushtetues i
Parlamentit Shqiptar mbajti takimin e tij të
nëntë.  Ky takimin kishte këtë rend dite:

     Shqyrtimi dhe diskutimi i Hyrjes dhe
     Kapitullit të Parë, të paraqitura nga stafi
     teknik;
     Shpërndarja e projektit të Kapitullit të Dytë i
     cili trajton të Drejtat e Njeriut, i paraqitur nga
     stafi teknik;

     Shpëndarja dhe diskutimi i një neni mbi lirinë
     e shprehjes të hartuar nga organizatat Artikulli
     19 dhe Grupi Shqiptar për të Drejtat e Njeriut.

Edhe në këtë mbledhje ishin të pranishëm përfaqësues
të grupeve më të mëdha fetare.  Si reagim ndaj
pjesëmarrjes së përfaqësuesit të Fesë Ortodokse,
Anëtari i Komisionit dhe përfaqësues i Partisë së Ballit
Kombëtar, Hysen Selfo, refuzoi të hynte dhe të merrte
pjesë në mbledhjen e Komisionit.
 

USAID Mbështet Treinimin për Kushtetutën

Gjatë javës prej 1-7 Mars, katër anëtarë të
Komisionit Kushtetues të Parlamentit dhe dy
ekspertë kushtetues morrën pjesë në një
sesion treinimi në Washington, D.C., të sponsorizuar
nga Agjensia e Shteteve të Bashkuara për Zhvillim
ndërkombëtar (USAID).  Pjesëmarrësit shqiptarë ishin:

Fehmi Abdiu, Anëtar i Parlamentit (Partia Socialiste);
Anëtar i Komisionit Kushtetues dhe Kryetar i
Komisionit të Ligjeve të Parlamentit.

Zamira Çaka, Anëtare e Parlamentit (Partia Socialiste);
Anëtare e Komisionit Kushtetues.

Petrit Kalakula, Anëtar i Parlamentit (Partia
Demokratike e Djathtë); Anëtar i Komisionit
Kushtetues.

Vladimir Metani, Anëtar i Parlamentit (Partia
Socialiste); Anëtar i Komisionit Kushtetues; Anëtar i
Komisionit për Çështjet Kushtetuese dhe Pushtetin
Lokal.

Illirjan Rusmali, Ekspert Kushtetues; ish Pedagog i së
Drejtës Kushtetuse; Ish-Këshilltar Ligjor i Ish-Presidentit Sali Berisha.

Theodhori Sollaku, Anëtar i Stafit Teknik të
Komisionit Kushtetues; Këshilltar Ligjor i
Presidentëve Rexhep Meidani dhe Sali Berisha.

Treinimi u ideua dhe organizua nga Iniciativa Ligjore
e Vendeve të Europës Qëndrore dhe Lindore, projekti
i Organizatës së Juristëve Amerikanë (ABA\ CEELI)
dhe World Learning me ndihmesën e QAKAPP, Zyrës
së OSBE për Institucione Demokratike dhe të Drejtat
e Njeriut (ODIHR), Qendra e së Drejtës Kushtetuese
Europiane dhe GTZ.

Treinimi konsistonte në një sërë diskutimesh të
përqëndruara në çështjet kryesore të mëposhtme:

     Pushteti Ekzekutiv;
     Pushteti Legjislativ;
     Pushteti Gjyqësor;
     Pushteti Lokal;
     Të Drejtat e Njeriut;
     Bërja e Ndryshimeve dhe Shtesave në
     Kushtetutë; dhe
     Parime të Hartimit Legjislativ.

Për secilën nga këto çështje, njëri prej anëtarëve të
Delegacionit Shqiptar hapte sesionin duke bërë një
përshkrim të shkurtër të problemeve ekzistuese për t'u
zgjidhur në Shqipëri në atë fushë.  Pas këtij përshkrimi
një ekspert i huaj ftohej të jepte përgjigje të
përgjithshme për çështjet.  Pas kësaj, ekspertëve të
tjerë të huaj u kërkohej të diskutonin në hollësi për sa
më lart.  Anëtarët e delegacionit shqiptar mund të
ndërhynin dhe të kërkonin sqarime mbi secilën prej
çështjeve.

Ekspertët e huaj përfaqësonin një numër të
konsiderueshëm shtetesh, duke përfshirë Gjermaninë,
Greqinë, Italinë, Poloninë dhe Shtetet e Bashkuara. Si
rezultat i këtij grupi multinacional, Delegacioni
Shqiptar pati mundësi të merrte pjesë në një diskutim
të detajuar të ngjashmërive dhe ndryshimeve të
sistemeve ligjore dhe instrumentave të përdorura në
demokracitë e sotme.

Në fund të programit, pjesëmarrësve iu kërkua të
vlerësonin programin dhe vlerësimi i përgjithshëm i
dhënë ishte tejet pozitiv.  Pjesëmarrësit shprehën
dëshirën për të vazhduar këtë lloj dialogu intelektual
për çështje të tjera të cilat mund të lindin gjatë procesit
kushtetues.

Informacion kontaktimi:

ABA CEELI
Rr. "Ismail Qemali", Nr.30
Tiranë, Shqipëri
Tel/Fax: 355-42-34950/346 24
E-mail: [email protected]
Liaison: John Kelley
E-mail: [email protected]
Liaison: Kim Meyer

ABA CEELI
740 15th St., N.W., 8th Floor
Washington, D.C. 20005-1009
Tel: (202) 662-1950
Fax: (202) 662-1597
E-mail: [email protected]
Drejtore për Shqipërinë: Lisa Dickieson, Esq.
http://www.abanet.org/ceeli

World Learning--Europa në Tranzicion
USAID Participant Training Program
Rr. "Ali Demi," #24, 2nd Floor
Tiranë, Shqipëri
Tel: 355-42-40305
E-mail: [email protected]
Drejtore e Projektit: Matty Thimm
 

Konkursi në Fakultetin e Drejtësisë

Në mbyllje të Forumit të OJQ-ve për Çështjet
e Ekzekutivit, QAKAPP shpalli fituesit e
Konkursit për Punimin më të Mirë për
Kushtetutën të organizuar në Fakultetin e Drejtësisë së
Universitetit të Tiranës.  Çmimet u sponsorizuan prej
Shërbimit Informues të Shteteve të Bashkuara (USIS).
Më poshtë po paraqesim fituesit, titujt e punimeve të
tyre, si dhe çmimet:

     Dritan Mishto, Roli i Prokurorit të
     Përgjithshëm në Lidhje me Pushtetin
     Gjyqësor--çmimi, një fjalor i terminologjisë
     juridike Black's Law Dictionary;
     Ditmir Bushati, Shqyrtimi Gjyqësor i
     Kushtetueshmërisë së Ligjeve--çmimi, një
     fjalor American Heritage Dictionary;
     Për të gjithë studentët që morrën pjesë në
     konkurs u shpërndanë kopje të librit Letrat e
     Federalistëve.

Z. Mishto, shprehu dëshirën e tij për ta ndarë këtë
çmim me të gjithë studentët e Fakultetit Juridik të
Universitetit të Tiranës.  Ai ia ofroi fjalorin
Bibliotekës së Fakultetit të Drejtësisë.

Diskutimet e Përqëndruara në Grupe të ORT

Më 19-20 Mars 1998, the ORT Rrjeti për
Demokraci, në bashkëpunim me OJQ
shqiptare Qendra për Studime Ekonomike,
Fakultetin e Drejtësisë dhe Fondacionin për Kulturë
Juridike organizoi dy Diskutime të Fokusuara në
Grupe mbi çështje të Pushtetit Legjislativ.  Edhe
QAKAPP dha ndihmesë materiale e organizative.

Diskutimi i Përqëndruar në Grupe u mbështet mbi
çështjet  e identifikuara nga Forumi i OJQ-ve mbi
Pushtetin Legjislativ organizuar nga ORT.  Lista e
çështjeve u nda në dy grupe, gjysma e parë u diskutua
më 19 Mars dhe gjysma tjetër më 20 Mars.  Shtatë
përfaqësues të OJQ-ve u paraqitën çështjet
pjesëmarrësve, duke bërë edhe një koment për çdo
çështje sipas shqetësimeve që ishin ngritur në grupet e
tyre.  Në shumë raste ata u ngritën pyetje ekspertëve
dhe juristëve që morrën pjesë.  Në secilin prej grupeve
morrën pjesë rreth 25 persona që përfshinin juristë,
pedagogë drejtësie dhe anëtarë të Stafit Teknik të
Komisionit Kushtetues.

Secili prej Diskutimeve të Përqëndruara në Grupe u
Lehtësua prej dy juristësh, të cilat provokonin dialogjet
interesante dhe drejtonin diskutimin.  Për secilën nga
çështjet ato përmblodhën sugjerimet, duke marrë
parasysh të gjitha opinionet dhe argumentat e
shprehura nga pjesëmarrës të ndryshëm.  Secili prej
sesioneve u regjistrua në kaseta dhe u mbajtën
shënime.  Së shpejti ORT do të përmbledhë rezultatet
dhe do të përgatisë një raport të detajuar në lidhje me
sugjerimet që dolën nga ky diskutim publik.

Informacion Kontaktimi:

ORT Rrjeti për Demokraci
Rr. Mustafa Matohiti,  Nr. 16
Tiranë, Shqipëri
Tel/Fax: 355-42-
E-mail: [email protected]
Drejtore e projektit: Lisa Davis

ORT International Cooperation
2025 I St., N.W., Suite 320
Washington, D.C. 20006
Tel: (202) 293-2560
Fax: (202) 293-2577
Drejtore në US: Celeste Scheib Angus
 

Vatikani Sugjeron një Formulim

Në Mbledhjen e Komisionit Kushtetues të
datës 27 Shkurt, Bashkëkryetari Godo lexoi
një letër të dërguar nga Selia e Shenjtë.  Kjo
letër paraqiste një propozim për formulimin e
dispozitës mbi lirinë e fesë.  Formulimi i sugjeruar
jepet në version e tij të plotë më poshtë:

                    Liria e Fesë dhe Ndërgjegjes

i) Të gjitha grupet fetare janë të barabrta përpara ligjit
dhe të ndara nga shteti.  Ato respektojnë këto parime
mbi bazën e reciprocitetit dhe bashkëpunimit për të
përmirësuar bashkarisht shoqërinë.

ii) Republika e Shqipërisë deklaron hapur dëshirën e
saj për të respektuar dhe garantuar të drejtën themelore
të lirisë së fesë dhe ndërgjegjes, siç parashikohet nga
marrëveshjet ndërkombëtare të nënshkruara prej saj.
 

Grupet e Opozitës Shpallin Shqetësimet e tyre

Duke iu referuar Deklaratës Tre-Parlamentare,
Grupi Parlamentar i Partisë Demokratike dhe
Grupi Parlamentar e Djathta e Qendrës
paraqiti një listë formale me shqetësimet e tyre me 17
Mars.  Kjo listë përmbante çështje që këto grupe
mendonin se duhet të zgjidheshin për të bërë të
mundur pjesëmarrjen e tyre në Komisionin Kushtetues
të Parlamentit.  Lista paraqiste këto kërkesa:

     1) Diskutimi i përbërjes së Komisionit
     Kushtetutes, për të bërë të mundur që këto dy
     grupe, të cilët konkretisht kanë 30 deputetë
     dhe rreth 32% të votave të proporcionalit, të
     kenë të drejtën e votës bllokuese, ç'ka do të
     ndihmonte në marrjen e vendimeve me
     konsensus;

     2) Bashkëkryetari i Komisionit që përfaqëson
     opozitën duhet të zgjidhet prej partive të
     opozitës;

     3) Kryesia e Komisionit nuk duhet të ketë një
     anëtar të kabinetit qeveritar.

Artikulli 19 & Grupi Shqiptar i
të Drejtave të Njeriut Paraqesin
Një Propozim
Në mbledhjen e 26 Marsit  të Komisionit
Parlamentar, ACCAPP paraqiti një propozim
të bërë nga organizatat Artikulli 19 dhe
Grupi Shqiptar për të Drejtat e Njeriut.  Këto dy
organizata u takuan me QAKAPP dhe diskutuan
mendimet e tyre dhe paraqitën një projekt për
formulimin e një neni mbi lirinë e shprehjes dhe
informimit.  Më poshtë po paraqesim propozimin e
tyre:

                  Liria e Shprehjes dhe Informimit

i) Çdo njeri ka të drejtën e lirisë së shprehjes dhe
informacionit.  Kjo e drejtë përfshin lirinë e opinionit,
lirinë për të marrë e dhënë informata dhe ide të çdo
lloji, pavarësisht nga kufijtë, në formën me gojë, me
shkrim, të shtypur, ose artistike, nëpërmjet medias ose
me çdo mjet të zgjedhur prej tij, pa ndërhyrjen e
autoritetit publik.

ii) Ky nen nuk i ndalon shtetet të vendosin një sistem
autorizimesh për institucionet e transmetimit për shkak
të kufizimeve teknike dhe mbështetur në kritere jo
diskriminuese.  Media e shtypur përjashtohet nga ky
kufizim.

iii) Nuk lejohet asnjë censurim paraprak.

iv) Ushtrimi i këtyre lirive do t'i nënshtrohet disa
formaliteteve, kushteve dhe kufizimeve ose
ndëshkimeve të cilat janë të parashikuara me ligj dhe
të domosdoshme në një shoqëri demokratike:
(a) për respektimin e së drejtës ose reputacionit të të
tjerëve;
(b) për mbrojtjen e sigurisë kombëtare, ose rendit
publik, ose shëndetit dhe moralit publik.

v) Cdo shtetas ka të drejtën e marrjes së informacionit
shtetëror, e drejtë që mund t'u nënshtrohet vetëm
kufizimeve të parashikuara nga paragrafi (iv).

Informacion kontaktimi:

Artikulli 19
Qendra Ndërkombëtare Kundër Censurës
Lancaster House
33 Islington High St.
Londër N1 9LH
Mbretëria e Bashkuar
Tel.: 44 171 278 9292
Fax: 44 171 713 1356
E-mail: [email protected]
Drejtore e Projektit: Helen Darbishire

Grupi Shqiptar i të Drejtave të Njeriut
Rr. "Myslym Shyri", Pall. 44, Shk.4, Ap.37
Tirana, Albania
Tel/Fax: 355 42 250 60
Celular: +382023950
E-mail: [email protected]
Drejtore: Elsa Ballauri
 

Aktivitetet e Ardhshme

Për të siguruar koordinimin e aktiviteteve të
ardhme kushtetuese, QAKAPP u kërkon të
gjithë përsonave të interesuar të paraqesin
detaje mbi aktivitetet e planifikuara.  QAKAPP u
kërkon të gjithë sponsorëve që së bashku me
informacionin për aktivitetet e ardhshme të na
dërgojnë edhe emrin e  tyre, anëtarësinë në organizata
të ndryshme, adresën, numrin e telefonit dhe faksit dhe
adresën e E  -mail-it.

     3 Prill - Diskutim i Përqëndruar në Grupe -
     CEELI & GTZ
     9-10 Prill-Diskutim i Përqëndruar në Grupe -
     ACCAPP/QAKAPP
     Prill - Debat Publik në Korçë -  Shoqata për
     Kulturë Demokratike
     13-15 Maj - Workshopi mbi Tre Pushtet
     Kryesore   CEELI & GTZ (Datë e re.)
     Prill-Qershor -Grupet e Diskutimit Rajonale
     Donatorë të Ndryshëm  (Planifikimi në
     progres)

 
 
Hosted by www.Geocities.ws

1