Heureux qui, comme *Ulysse, a fait un beau voyage,
Ou comme cestuy la qui conquit la toison,
Et puis est retourné, plein d'usage & raison,
Vivre entre ses parents le reste de son aage !

Quand revoiray-je, helas, de mon petit village
Fumer la cheminee, & en quelle saison,
Revoiray-je le clos de ma pauvre maison,
Qui m'est une province, & beaucoup d'avantage ?

Plus me plaist le sejour qu'ont basty mes ayeux,
Que des palais Romains le front audacieux,
Plus que le marbre dur me plaist l'ardoise fine :

Plus mon *Loyre Gaulois, que le *Tybre Latin,
Plus mon petit *Lyré, que le mont *Palatin,
Et plus que l'air marin la doulceur Angevine.

Je me feray sçavant en la philosophie,
En la mathematique, & medicine aussi,
Je me feray legiste, & d'un plus hault souci
Apprendray les secrets de la theologie :

Du lut & du pinceau j'ebateray ma vie,
De l'escrime & du bal. Je discourois ainsi,
Et me vantois en moy d'apprendre tout cecy,
Quand je changeay la *France au sejour d'*Italie.

O beaux discours humains ! je suis venu si loing,
Pour m'enrichir d'ennuy, de vieillesse, & de soing,
Et perdre en voyageant le meilleur de mon aage.

Ainsi le marinier souvent pour tout tresor
Rapporte des harencs en lieu de lingots d'or,
Aiant fait, comme moy, un malheureux voyage.