— "¿Sabes, collaciu?" —dixo Aedrics mentantu finaba d’asitiar nes alforxes les veles rituales— "nestes caberes nueches, cá vegada que vamos chucamos fíxome nesa montonera ramascaya qu’encoberta lo que podríen ser tres finxos. Sí, hom, esa que tenemos de cote y que ta nel camín que baxa pal poniente".

— "¿Y?..." —Wanics nun veía claro qué yera lo que-y quería dicir el collaciu.

— "Bono, ye que parezme bien curioso que tea asitiada xusto a tres pegollos dende aquel regodón. Y mira, nel adebuxu de la llábana, la primer ringlera siñala un puntu, que sedría el regodón, y tres anchos pegollos que son neto que los que ves dende esi regodón pa poniente. Curioso, ¿acuei?".

— "¡¡Acabáremos, hom!! Tu lo que quies ye que vaigamos a char una güeyada a esi llugar. ¿Ye, o nun ye?".

— "Ye" —sorrió Aedrics— "Conócesme meyor que yo mesmu. ¿Qué tal si, enantes de la xinta, vamos rozar un migayu el llugar?".

— "Si paguen bien el llabor..." —riose Wanics.

Garrando los hachos y les espades, dexaron la cuerria na qu’anochaben dende había tres díes y empobinaron dica la montornera ramascaya que siñalare Aedrics. Y dempués d’atentu estudiu, hachu va, hachu vien, foi colando’l tiempu, el fuelgu y el trabayu fasta que los estómados de los rozadores fexeron rebelguinos y bona ruxidera.

Bien pasao el meyudíe, delantre d’ellos afayaron non tres, sinon seis finxos. Tres grandonos, que yeren los que se veíen enantes del llabor entamao, y otros tres que taben xusto delantre d’aquellos otros, más pequeños n’altor, pero de toes formes tamién de bona midida.

Escayos, edra y espinera, teníen el llugar francamente selvaxe.

Gracies al gabitu de Vulina, que truxo la xinta y quinxo arrimar el llombu, pudieren, enantes de comer, tener iguao un bon fogaral amburando, con grande fumera, la basoria vexetal rozada y atropada.

Descubrir seis pegollos agrupaos dos a dos, punxo mas entrugues que rempuestes na mente de los máxicos. Yera ciertu que ya teníen los seis finxos polos que naguaben (ya que na redolada tolos finxos yeren diferentes y nun s’atopaben d’una mesma tacada), pero inda faltaben les piedres en forma triangular qu’amosaba la misteriosa comprendoria adebuxada na llábana.

Tres d’entamar la foguera, xulgaron prudente ponese a comer. Vulina, ente bocáu y bocáu, animó la xinta cuntando hestories de los pescadores de Dob-Ar, d’aquelles captures fantástiques de raros pexes de les que siempre falaben los mas vieyos nel arte, y sobro les trampes y embullos nos que se metíen aquellos colos vaqueiros, y mercaderes cuando baxaben de la cordal a mercadiar.

Dempués de la bona comida, vieno’l pigazu. Y tres el pigazu, la vuelta al trabayu. Y Wanics nun taba mui pola llabor d’entregase a la estaya entamada. Quinxo espatuxar cuando decatose qu’amás d’atopar aquellos tres pegollos más pequeños, más nada hobiere nel llugar.

Xulgaba, y con tinu, que tantu trabayu esclariando’l llugar nun pagaba la pena.

— "Vamos dexalo, collaciu. Ya ves que nun hai un res, sacante matu y estos seis finxos. Y nun ye que seya de los que-yos presta dexar entamanda una xera, pero eso que creyes ver na llábana, dende llueu, seya lo que seya, nun ta pequí. Dalcuerdu con que tenemos seis finxos, pero más nada. Si esto ye una comprendoria, o ta mui mal fecha, o nun tien xaciu".

Aedrics nun podía negar que l’amigu nun s’enquivocaba. Rozar aquello paicía, sinon lo yera, un trabayu valeru de xacíu. De todes formes, el máxicu quinxo mirar meyor los finxos, que de manu, nun amosaben denguna especialidá o cosa notable respective los demás. Sacante’l fechu de que fueren pareyes, bien xuntes, de pegollos desiguales n’altor, afincaos de tala forma que’l mayor yera esterior a un teóricu puntu mediu asitiáu metanes la escampiñada que rozaben. Quiciabes podía destacase que teníen el mesmu altor, consideraos tres a tres, y que los mas altos amosaben el picalín allabanáu a dos faces pel llau que miraba’l puntu mediu del que ya falemos, demientres los menores, na so basa, amosaben fondes talladures, seique atribuyibles al aldu del so basnamientu enantes d’afincalos ú taben.

— "Si. Pémeque tienes razón. Equí nun se ve un res. Pero había que tentalo. Dempués de tantos díes de viaxe...". — Aedrics entamaba tar cuidosu por nun atopar l’esperau signu de los dioses del que falare Wanics nel Llagu Zimeru.

Y Vulina, menos esmolecia polos signos de la deidad busgosa (que per otra parte, nin pescanciaba nin-y pruyíen), tres de xintar y echar el pigacín, púnxose a la gueta yerbatos. Quería pañar el mayor númberu d’ellos pa que’l mayestru Aedrics, tres d’identifica-ylos, desplicare-y al empar les propiedades melecinales que podíen caltener.

Dende que l’almitiere’l máxicu nel camín de la druidada, ya nun vagaba pa atropar cuantos más conocimientos meyor, y aquel sitiu yera tan bonu comu cualaquier otru pa esbillar herbes o corteyes, y n’especial facelo peles bases qu’arrodiaben los pegollos, que por mor ser de piedra ácido teníen plantes xebrades del restu de suelu calizo.

Y taba Vulina nesta xera d’esbadielle cuando, apalicándose, encontose escontra ún de los pegollos pequeños d’aquel ensame de seis, pa garrar fuelle, y comentar dello, a los máxicos, de lo que diba atropando ente la granicería y el matu.

— "Sabéis, mayestros, que nesti llugar..."

Entamó falar Vulina, pero nun fo a siguir. Un respingu vieno-y pel carrastiellu cuando sintió, de sópitu, con esi aquél misterioso de lo que se conoz ensin racional freba, que la so espalda díbase-y pa dietrás, enfilando ‘l camín del suelu. Instintivamente, echó les manes p’alantre, dexando cayer herbes y garabatu, mazapilando, y tentando ganar una verticalidá cásique perdida, xiró la tiesta pa ver qué yera lo que-y pasaba.

El silenciu de calón nel que fincó la moza fexo xirar tamién les tiestes a los máxicos en direición aú taba Vulina falando. Y lo fexeron p’atopase cola ablucante goriada, llenta, espurría ya inacabable, del finxu nel que taba encontada Vulina. Y foi cosa ver a los máxicos dar al empar un blincu y el glayíu d’avisu de que’l pegollu aquel diba cayendo. Porque asina yera.

El finxu debalábase llento. Pasín ente pasu. Pero imparable.

Adebuxando yá nel aire la curva fatal. Aliando al vientu l’ensame bilortos esfaragayaos qu’entá lu enllapiñaben a pesar la roza que fexeren los máxicos.

— "¡¡Garrái a Sairina!!"

Gritó Wanics al decatase que tamién aquella andaba al delláu de Vulina, y que nun podía facer un res por dir por ella, ya qu’entrancabelláu pol blincu, capitoniaba al suelu, de forma llastimera y noxante, tentando salvar el focicu d’un xuru fostiazu.

Garrola Vulina pel brazu, y xuntes, corrieron al abellugu de la mayor distancia de la fana.

En suelu los máxicos, doliosu y bruñíu Wanics pola bracada, y ablucáu Aedrics, oyeron el bufíu increscendo del aballamientu a tierra del finxu. Y ver la cayida d’aquel pegollu, de non menos de nueve pasos d’altor, cardosu y vexetal, foi cosa de vese y oyise Y sentise. El retemblíu del suelu, pola llegada de la piedra, foi d’espavoriar, y sintieron la bocarada del aire desplazáu.

Lo magosu y mollar del tarrén impidió que surdiera polvu, y amatagó dalgo los sonidos qu’ún esperaría d’avezu nesti tipu fanes. Pero ente aquellos, pudo oyise un soniducu comu metálicu.

Viníen les moces pa escontra los máxicos, y estos ya allevantábense adoloríos, palpiándose les zones mayaes pola cayida, cuando oyeron l’avisu d’Aedrics.: otru de los finxos pequeños mazapilaba. Y al cabu unos intres percurtios, el mazapile camudó en cayida dafechu. Tamién aquel pegollu debalaba. Porque ‘l finxu que cayere primero, toviere golpeao la basa del pegollu vecín, desarreyando’l nueu aballamientu.

El segundu retemblíu foi neto que’l primer, y traxo, a la so vuelta, el zarapicamientu del tercer pegollu que taba al dellau del qu’aballara, y la cayida del mesmu a la gueta la basa del primer pegollu qu’aballare, y que xacía francíu en dos cachos.

Sacante Sairina, que siguía n’ayén, el restu la tropiella, a unos venti pasos del llugar, contemplaba ablucada aquel dexastre.

— "¡Mirái, mirái....!" —gritó Aedrics siñalando’l restu pegollos qu’entá calteníense en pie — "...mirái... ¡Tamien cain!".

Dexastre que se veía nun finaba nel tercer retemblíu. Porque masque yera imperceptible de manu, los otros tres finxos de mayor altor, tamién fincaron inestables, ximielgándose al aire. Y pasín ente pasu, aquellos tres altos finxos foron acingándose, anque’l so zarapicar llevolos a adebuxar, llento, un arcu de d’aballamientu cásique perpendicular al restu los cayíos. Y asina, foron converxendo, ún escontra otru, faza’l centru la escampiñada.

Con un soníu metálicu amatagáu, el mesmu que s’oyere enantes de cayer el segundu y tercer pegollu, alcontráronse los picalinos de los tres finxos mayores. Y fincaron los tres pegollos encontaos, ún colos otros dos, xusto pol allabanamientu qu’aquellos amosaben, formando un curiosu conxuntu de trípode pétreu.

— "¡Mialma, qué fexemos!" —xuxurió un tremosu Wanics.............