mareez-e-muhabbat

- Qamar Jalalabadi

mareez-e-muhabbat unheen ka fasaanaa
sunaataa rahaa dam nikalte nikalte
magar zikr-e-shaam-e-alam jab bhi aayaa
chiraagh-e-sahar bujh gayaa jalte jalte

iraadaa thaa tark-e-muhabbat ka lekin
fareb-e-muhabbat men phir aa gaye ham
abhi khaake thokar sambhalne na paaye
ke phir khaai thokar sambhalte sambhalte

unhen khat men likhaa thaa dil muztarib hai
javaab un kaa aayaa muhabbat na karate
tumhen dil lagaane ko kisne kahaa thaa
behel jaayegaa dil behelte behelte

vo mehmaan rahe bhi to kab tak hamaare
hui shammaa gul aur doobe sitaare
"Qamar" is qadar un ko jaldi thi ghar ki
vo ghar chal diye chaandni dhalte dhalte