Plattdeutsch - Plattdüütsch,
dat is un blifft mien Mudderspraak
"Us" Ohmster
Bahnhoffvun Johnny Meyer
Vun de Stadt ut weer us Bahnhoff de Eerste, knapp fiev Kilometer weer't.
Dar dör, dat us lüttje Dörp Ohmstede, all meiss to de Stadt Ollnborg gehörde, speelde sik nich all to veel up usen Bahnhoff aff. De Bahnhoff sülbens weer een staatchen Steenbo, upboot in Victorian Stil. De Hauptperson de denn Bahnhoff överseeg dat weer Unkel Harms, he weer de "Bahnhoff Vorsteher". He weer de, de de Fohrkoorten verköpen de, he moss denn Aven in Wortesaal naböten, (wat he geern vergeten de,) un towielen moss he uk us tein Jahr olen Jungs, ut sienen Wortesaal, an de frische Luft setten, (wat he leevens geern de).
Wat kunnen wi Jungs dar denn an maaken, dat dat Woter all woller mal boben in use Holschen loopen weer un wie all woller natte Fööt harrn, de wi dar up'n Bahnhoff afdrögen deen. Over ansonsten leet he uk noch denn Tog affförn. Hier weer sien Revier, he alleen harr dat hier to seggen.
Wenn he achtern Schalter seet un över sien Näsenknieper weg plierde, denn harr he jümmers ne baue Mütz up. Sobold over een Tog keem, denn wesselde he gau sien Mütz un settde sick eene roode up. Wat uk glieks siene Persönlichkeit soon beten verstärken de. De Schalter wurd denn afslaten un dat Schild, "Schalter z. Zeit geschlossen," bammelde denn soon beten scheef an een Tüddelband.
Kort nadem de Tog anholn de, sprung de Schaffner af un mit ne luute dannige Stimm reep he: OHM- STE -DE, leep een poor Trä wieter un woller reep he: OHM-STE-DE. Unkel Harms over weer dorbi sien eeken mit Iesen besloan Gepäckhandwogen ganz na vorne vun'n Tog to trecken um dat Gepäck un de Kuffer in Gepäckwogen af togeven un annered uk woller in Empfang to nehmen. Wenn dat don weer un een poor Wör snackt weern, denn fummelde he in sien Westentasch na sien Taschen Uhr rum, keek twee bit dree mal darrup, vergleek dat noch maal mit de groote Bahnhoffsklock un denn reep he "auf Bahnsteig eins, alles einsteigen" un noch mal "EIN-STEI-GEN", dar na geev he dat Signol mit sien gröne Kelle, dat de Tog woller affförn kunn. "Wo schass denn sonst woll instiegen, he hett jo blots eenen Bahnstieg, de Angeber" meende mien Fründ Bernhard. Unkel Harms harr sien Trillerpiep all blosen un reep nu mit sien piepsige Stimm "AB-FAHRT." Dat weer dat Teeken vör denn Lokomotievföhrer, sien Bimmel af to stelln, noch een maal sien groote Horn to blosen un de Tog sett'de sik uk all in Bewegung. Unkel Harms knallde noch gau een poor open Döörn to, at de Tog an em vorbi rullde, un denn weer woller Ruhe in't Dörp. Een poor Lüüd winkten noch achter denn Tog an, gungen denn sinnig woller na er Peerd un Wagen to, um woller na Huus to fahrn. Over Unkel Harms truck sienen Handwagen ganz sinnig na de "Gepäckabfertigung" un dar sett'de he eers woller siene blaue Mütz up. Eers denn kunn he de Kuffer utgeben, "alles nach Vorschrift" at he to seggen plegde. Bi de Iesenbahn gung jo allens na Vorschrifft, blots vun Iel harr nümms wat seggt.
De Neeschier, wie dat woll boben in Unkel Harms siene Wohnung ut sehn de, de jo övern Wortesaal leeg, leet us Jungs nich in Ruh. Dar man eenfach rup gahn un nakieken dat gung nich, wiel dat groote Schild anne Döör weer. "Zutritt verboten" stund dar up, un denn uk noch een mit "Privatwohnung."
Mien Fründ Bernhard un ik, wi harrn een Plan, um dar rup to kamen. Wi wullen us mit Harms eere Kinner befrünnen un denn to sehn dat wi to een Geburtdaagsfier or viellicht uk all to Wiehnachten inloden wurrn, um de Speelsooken to bekieken.
Dat hörde sik all moi un goot an, wenn wi man blots eers an Unkel Harms langs weern, he kunn us jo nich utstohn, he harr us an leevsten in Gütertog sett un de Döör dicht maakt, "mit ne Blombe anne Döör, wenn't ween mutt" at he seggen de, um us "bit an't End vun de Wilt to schicken." Faken harr he us all seggt dat dit kien Kinnerspeelplatz weer, " Maakt dat ji nah Huus komt, ji lüttjen Swieneegels, hier hefft ji ganz un gor nix to söken."
Ut een afsunnerlichen Grund, truck us dat over jümmers woller na denn Bahnhoff hen, dar geev dat wat to seen, wat to beleven, un wenn anners nix los weer, denn kunnen wi woll even Unkel Harms een beten targen. Over in denn Vorsteher sien Wohnung, dar sund wi nie nich rinkomen, dat weer vor us - -"Zutritt verboten."
E - mail:
