vun Johnny Meyer,

 Sept.2000

De Hauptstraaten dör Amerika hefft jo all Nummern, de graden Talen loopt vun Westen nah Oosten un de ungraden Talen vun Norden nah Süden. Veele vun disse Straaten loopt dör verscheeden Staaten, towielen vun eene Küst bit nah güntsiet vun Amerika.

Över de lesten Jahre heff ik nu faken 'ne Schangs harrt so mannig een vun disse Hauptstraaten to beföhrn. Egol wor dat uk henn gung, dar is eene Straat, de een enormen Indruck up mi maakt hett. Dat is de Hauptstraat Nummer hunnerteen.

Disse Straat: Nummer hunnerteen, fangt in Olympia, Washington an. Se bögt, dreiht un loppt meis Tiet an't Water langs, övern Fluss Columbia, dör Oregon, ganz bit nah San Diego in Californian runner.

Dar dör dat de Pacifische Ozean so wild un unbereekenbor is, is de Küst jüst so unbereekenbor. Maal is de Straat boven up'n Barg, 'n paar Km wieter geiht unnen an't Water langs, maal is Wald un Felsen, denn kaamt Sand Dünen or groote Buchten, Strand un Wellen. All dat wesselt sik aff, bold so gau at de Wulken an'n Himmel. Man weet gornich wor to eers henkieken schass. Gans up un dahl de Straat sünd nu uk Utsichtspunkte, wor man nich an vorbi föhrn schull, denn dat kunn angahn dat just dor de schönste Utsicht weer.

Darum, um ne Urlaubstuur över so 'n Straat to plaanen, dar möss Tiet to hebben, nix at Tiet. So an de hunnertfofftig Km, or hunnert Milen vor een Daag un denn övernachten, denn hess noog Tiet, di alln's in Ruhe an to kieken. Denn kann de Kopp dat upnehmen, anners at ween't all an di vorbi fleegen deiht un denn kriggst allns dör'n annern. De ganze Urlaub is denn verdurven, blots wiel de, de denn Urlaub plaant hett, nich noog Tiet laaten hett.

Mien Fro un ik, wi reist jo faken, wenn't uk man blots vor dree bit veer Daag is, dat kann over uk dree bit veer Weeken wesen, un denn will een Tuur een Plaan hebben. Een Plaan de bit in't Leste geiht, denn mit Böker, Telephone, Fax un Internet, uk mit anner Lüüd snacken, all dat hölpt an meesten. Man mööt utkundschaften wor dat wat to beleeven or to seen gifft, wor een goot Motel or Restaurant is, wor se in Seehaven een goot Geschäft hefft, de frischen Granat or röökerten Lachs to verköpen hefft. All so wat möt mit up'n Plaan stahn. De Reservierungen in Motel, wenn een in Sommerdaag or Hauptsaison reisen will, de hört dor eenfach mit to. Manch een Urlaub is jo all inn'e Binsen gahn, blots wiel nix plaant weer. Wenn over all'ns klappt, Jungedi denn maakt over Spass. Denn möss maal de grooten Oogen sehn vun de inlaaden Gäst de mit kaamt, dat alleen is een Plaseer. Dat "Minsch dat hett over goot smeckt, dat harr'k nich dacht," krieggst denn faken to hörn.

Morgens fröh, rut ut'n Bed, utslaapen kanns to Huus. Nu büst up Urlaub, wullt jo uk wat seen. Fröhstück in Motel gifft meis Tiet to, wenn nich, sülvens een Speegelei maaken un een beten Cerial darto, eer di versust büst all woller unnerwegens. Morgens um seven hest de ganze Straat vor di alleen, denn kanns anholn wor du wullt, seen wat du wullt. De annern Lüüd, de de ümmer noch slaapen doot, de verpast de halve Tiet. De findt uk nich dat Strandgoot wat övernacht answemt is.

Middags, kummt dar up an, of in een Stadt bis or of een Picnic beter ut sehn deiht dar unnen an Strand, up een grooten answemten Boom, de at Disch deenen kann. De Frische Granat mit Kekse un de röökerte Lachs de kaamt nu goot to pass. Wenn dat denn noch mit een Glass Wien or een Buddel Beer affsetten deihst, sowat bekummt jedeneen.

Dat Fernglass un de Fotoapperat de hört dar eenfack mit to, just so at een Jack, vor Wind un Regen un goode flache Scho.

Dat eerste wat een upfallen deiht, wenn man vun "Olympia" ut losföhrn deiht, is de fleeten Brügg över'n Hoods Kanal, een vun de längsten in disse Welt. Dar kanns wenn dat Glück hest, uk een vun de Atom dreeven U-Boote sehn de dar dör föhrt. Bi "Gardineer" de Trolls an de Waterkant de een denn Kopp verdreihn dot. Een beten wieter, in "Port Angeles" kummt de Affbögung na "Hurrican Ridge," bi goot Wär, een must seen hebben. De wilden Deerten alleen, is disse Fahrt weert. Denn kort na dem man dör dat Boomfällerdorp "Forks" föhrt is, kummt de "Regenwald," wer hier een gooden sunnigen Dag hett, de möt uk noog Film mit hebben, de Natur is hier to bewunnern. De Schattenspeele dör dat dicke Moos, wat dar vun de Bööm runnerhangen deiht is eenfack wunnerboor.

 " Kalaloch," is een gooden Platz toon övernachten, dar is soveel Driefholt an Strand, dat is kuum to glöven, een wunnert sik wor dat Holt all herkamen is. De Strand is wieter nix at Kieselsteen, kien beten Sand to seen.

Denn tokamen Dag ward dat over anners, glieks de eersten lüttjen Indianerdörper "Moclips" un "Copalis" hefft een moijn Strand, wor man mit'n Auto an Strand langs föhrn kann. Wieter de Straat endahl bit "Ocean Shores," een annern gooden Platz toon övernachten, is de "Gray Gull," or "The Polinesian" Motel. Uk hier is de Strand good vor een Spazeergang, or um up Peer to rien, een Moped to mieten, or um een Drachen stiegen to laaten.

"Westport" is een beten vun Weg af, over för de Lachs Anglers, or de Lüüd de gern maal een Wal seen willt, dit is de rechte Platz. Mannig een Lachs heff ik dar all ut Water trucken, un Wale kemen glieks vor us Boot bold twee Meter hoch ut Water, blots um us gooden Dag to seggen. De Straat geiht nu Inland un nix anners at Bööm sind hier to seen. Bi "Astoria" ward dat woller anners, hier geiht dat övern Columbia River un denn geiht dat woller an de Küst endahl. "Gerhart by the Sea," is een gooden Platz toon övernachten, uk um an witten Strand to loopen. Dar kanns di uk denn Wind um de Ohren blasen laaten. "Seaside" is man blots twee Milen wieter un hett veele goode Restaurants to beden. Uk de Promenade is vun Bedüdung. Veel Leeven geiht vun disse Stadt ut, is uk bedüdent luter, deswegen nich so goot toon övernachten.

Wenn't an morgen wieter geiht, "Cannon Beach" is een schön't lüttjet Dörp, direct an Ocean, hett uk veel goode Objecte toon fotografeern, un uk good to'n Middag eten.

Ganz bit na "Tillamook" dahl, gifft veele schöne Utsichtspunkte. Denn geiht woller inlands bit na "Lincoln City." De "Spanish Head" is een empfehlenswertes Motel or Condo, dat Restaurant is boven in ölvten Stock un vun hier hess een wunnerbooren Utblick up't Meer un denn Sunnenunnergang. De Strand hett uk veel up to wiesen. Kummt soon beten up de Jahrestieten an, over 'n hoopen Waterköters gifft up jeden fall dar to seen. Bi goot Wär is een Lagerfüür uk nich just to verachten, Driefholt gifft genoog, dar kummt nich up an.

An tokamen Dag mööt dat utslaapen soon beten up'n annern Dag töven. De groote, warme Pool tövt all, just so at de Jaccusi, man nix at rin, dar vor is he boot wurn. Dat Fröhstück boven in't Restaurant smeckt wunnerboor, just at de Sunn över de Bööm wegkieken deiht, un eehre eersten Strahlen up't Meer smieten deiht. Disse Dag hett veel to beden darum nich all toveel Tiet vertüdeln.

All glieks in "Depot Bay," kanns direct vun't Auto ut de Wale seen, de dar in de Bay um de grooten Kelpbete an't Duken sünd. In de Geschäfte up güntsiet vun de Straat is uk so manch een Geschenk or T- shirt to finnen.

In "Otter Rock" dar kummt dat soon beten up Ebb un Flot an. Bi Ebb kanns dar moi up de groten Steen rumloopen un seen wat dar all so in't Water leven deiht. Bi Floot is dat Düvelshorn to bewunnern.

Bi Middag rum is "Newport" de Stadt, wor een nich just to kort kummt. De Ole Stadt is an de Waterfront un dar is dat Leven. Dor leegt de Seelöwen hoopen wies un bölkt sik gegen sietig an. De Seelöwen sünd ganz licht to fotograpfeern vun boven ut. De kanns uk nich verpassen, denn dat Bölken is so luut, dat kanns all vun wieten hörn.

De Hunger drifft rin, seggt se jo faken, over hier in Oregon gifft nu soon ganzen Barg vun Restaurants de de besten Soppen hefft de't geven deiht. Wor dat nu up Platt heet, weet ik uk nich, over dar kummt dar unnen jo uk nich up an. Wat ik empfehlen kann, dat heet "Clamchowder."

At ik maal mien Ollnborger Frünnen dar mit hen nehmen de un se gaaanz vorsichtig denn eersten Probelöppel vull runner harrn, moss de Kellnerin us glieks twee groote Kummen vull herbringen so goot weer dat. Dat weer um ölven Uhr, noch nich maal Middagstiet. Minsch dat smeckt, wor heet dat noch? "Clamchowder" seggt se dar to. Wi harrn doch een goot Fröhstück harrt, or? Vun nu an hefft wi dat tweemaal an Daag eten. Jo wenn een up Urlaub is, denn kanns jo uk leeven at een Fürst, dat maakt jo nix. Wi, up jedenfall harrn't verdeent.

Uk in "Yachats", wor wi bleven för de Nacht, stund "Clamchowder" mit up't Menu. De Pelikane de dar över't Water seiln deen, weern wunnerboor vun't Restaurant un uk vun us Ruum ut an to kieken. De ruge Küst harr eer Utsehn hier woll een paar Vulcane to verdanken, de eere Lava in't Meer överloopen leeten. Up lange Wanderwege an't Water langs, kunnen wi us goot de Fööt vertreen. Uk vun hier harrn wi een eerstklassigen Utblick över't Water un kunnen to glieken Tiet den farvenfrohen Sunnenunnergang mitbeleven.

Glieks na't Fröhstück gung't wieter, De "Heceta Lüchtturm" stund stolt up denn Felsen, vun wor he de Seefahrer denn Weg wiesen de.

Een beten wieter de "Seelöwenhöhlen" tövten all up us. Dar dör dat noch fröh an morgen weer, weern de Seelöwenhöhlen noch nich so överloopen mit Touristen. Mit 'n Fahrstohl gung't in denn Barg bit na unnen, so even övern Meeresspeegel, wor de Höhlen weern. Vun dar kunnen wi de Seelöwen beobachten, at se sik gegensietig vun de grooten Steen schubsen deen, um eere Överleegenheit to bewiesen.

  Kort na "Florence" fangt de Dünenlandschaft an. Disse Dünen wannert in eens weg na't Binnenland to. Towielen gaht se all bit an de Straat. De witte fine Sand ward ständig vun Wind dreven un weiht över alln's weg wat in Weg steiht. Ne Fahrt dör de Dünen mit een vun de grooten Trucks is dat Geld wert. Mit de lüttjen Gocarts dat weer us een beten to gefährlich, dar is all manch een bi to Malör kamen.

In "Coos Bay" gifft allerhand goode Geschäfte welk dat bekannte Mürtlelholt utstellt un verköpt. Dar is all manch een schön't Geschenk herkamen. 

Een beten wieter dar is "Bandon by the Sea." De ole Haven Stadtdeel is moi upboot wurn. Dar gifft goode Restaurants un is uk een Bummel an de Waterkant wert.Dar gifft to glieken Tiet goode Motive fört Fotografeern.

Um over denn richtigen Indruck vun de Gewalt vun Pacifischen Ozean to kriegen, möss all denn "Scenic Drive" langs föhrn, dar sünd uk de Motels. Vun dissen Scenic Drive or Wunderstraat ut, kanns na allerhand Utsichtspunkte, Parks un Strandtogänge henkamen. De Strand is eenige Km lang. De Felsen de ut Water rutkiekt un uk an Strand vereenzellt rum leegt, maakt eenen sehr gooden Achtergrund vor de Fotografen. Regen, Sunn, Wind un Nevel wesselt sik hier so gau af, dat in fofftein Minuten all'ns hebben kanns. To'n övernachten is dit een gooden Platz, uk de Sunnenunnergang vun hier, blifft een noch lang in Erinnerung.  

Disse Strecke maakt een sehr gooden Urlaub. Dat gifft nich veel Placken in Amerika de so veel to beden hefft at hier. De Trüchtuur na Seattle över de Autobahn, vun hier kann in een Dag schafft weern. Disse 700 Km lange Tuur is bi wieden de Indruck fullste de't in Nordwest Amerika geven deiht.

Trüch na mien Heimaat Siet

Mien Heimaat Siet

[email protected]