Plattdüütsch, dat is mien Mudderspraak
Een amerikaansche Hochtiet
Use Ollste harr sik dat in Kopp sett to heiraten, veele Deerns dot jo sowat. So sinnig wurd nu uk Tiet, denn se weer grad nich de Jüngste mehr. Nu keem’t denn jo uk, at sik dat gehört, eenes gooden Daags er Fründ un frogte um eere Hand un usen Seegen to kriegen, so dat de beiden heiraten kunnen. Wi harrn afsluts nix dargegen, un vun nu an leep allns een beten beter.
All to lang hett denn uk nich mehr duurd, bit he siene junge Brut in een Limosine afholn de, um in een vun de betern Restaurants to eten. Dar in’t Restaurant in een private Eck, hett he se denn uk frogt, of se em de Ehre woll geben wull, siene Fro to weern. Jo, dat wull se denn woll. At he er denn uk noch mit een Verlobungsring presentiern de, weern se jo nu officiell verlovt.
Soo’n Hochtiet mutt jo uk een beten plant sien, wenn’t wat wesen schall. De ganze Planeree weer aver een Klacks vor us Ollste. Bi eere Firma wo se arbeiten de, harr se Erfahrungen sammelt, um Weltwiete Programme tohoop to setten, de immer een Erfolg weern. So wat leeg er woll to. To eers mossen wi denn aver denn Brögamm siene Ollern richtig kennen leern. Wi harrn us woll up een anner Gelegenheit all mal sehn, aver noch nich över een Hochtiet snackt. Darum wurrn de Ollern un de Verlovten denn eens gooden Daags inladen, to een feinet Eten wat mien Fro trecht maakt harr. Wi kemen all tohoop moi mit’n annern trecht, hefft veel Lacht un een ganz super goode Tiet mit’n annern harrd. Wi hefft us faken wunnert, woveel Lebenserfahrungen in use beiden Famieljen de glieken weern, de wi maakt harrn. De Ollern un wi harrn in dat glieke Jahr heirat, beide Famieljen harrn een Geschäft up de Been stellt. Beide Famieljen harrn er eegen Huus. Uk een Boot un twee Kinner weern in beide Famieljen. Up de Aart is glieks een wunnerboret Verhältnis togange kamen.
De Ollern vun den Brögamm hefft een wunnerbore Verlobungsparty up er groot Boot geven, uk wi weern darto inladen wurrn.
up’t Boot vun de Sweegeröllern
Intwüschen leep de Planeree vun de Hochtiet up Hochtouren. In de Prespetärien Kark, wo de beiden sik jo dropen harrn, schull nu aver uk de Hochtiet wesen. Een Datum in August wurd denn uk sett, wiel de Hochtiet in Sommer un buten wesen schull. De Kark weer vor een Freedag abend free un is reserviert wurrn .
Um een Leben lang to hoop to blieven, sik to leeven un in Ehren to holn, in ruuge un uk in goode Tieten, mutt man aver een beten up’n rechten Padd sett weern. Hier vor harr de groode Kark een besonnert Programm to hoop sett, wo de beiden, un uk annere Paare mit de glieken Gedanken, sik an bedeeligen kunnen. De beiden Verlovten hefft een speciellen Kursus mit maakt de vor junge Minschen, de een Leben lang tohoop blieven wulln, um to leern wat man don mutt, um to hoop toLeben.
Soon Hochtiet mutt denn jo uk een beten fiert weern, denn so een Begebenheit is jo eenmaalig, of dat immer so henhaut, blifft een anner Frog de sik vunsülms mit de Tiet.
beantern lett.
An een Dag in Februar sind wi denn mit use Dochter up Tour gahn um us verscheedene Stä’n an to kieken wo se sik up Hochtieten specialieseert harrn. Dar weern Clubhüser, Ole Villas, Danzsäle un Hotels, de sik all up solke Veranstaltungen utbildet harrn. Us Dochter harr vordem all de Nam vun de Plätze tohoop sett un nu bruukten wi nur na de Adresse to fahrn un wi harrn uk glieks een Verafredung mit de jeweiligen Vertreters. Een mojet Middageten in een Restaurant an een See in Seattle, hett us denn soon beten over denn Schreck vun de enormen Kosten weghulpen.
Dat eerste Hotel, wat wi us ankeeken hefft, hett us aver so beindruckt, dat wi vun de Elegance total beindruckt weern un de ganze Hochtiet all vor use Ogen sik afspeeln de. At wi de Bilance an abend trucken hefft, weer dat in use Ogen ganz klar welk een Platz vor us in Froge kem. De berufliche Instellung mit de sik dit Hotel presentiert hett, hett us gau een Entschluss faten laten. Dat moje weer aver, dat naher nich eene Entäuschung dar bi wesen is, um us anners denken to laten. Allns is genau so wesen at us dat vorsett wurn is.
Nadem wi utreekent harrn, wat de Gesamtkosten weern, hefft wi denn een Bedrag up us Dochters Konto överschreeven. Nu kunn use Dochter eere Vorbereitungen maken, nu harr dat all Hand un Foot. Dat Brutkleed un de Trohtügen eere Kleeder kunnen bestellt weern, de Antöge vun de Biständer kunnen in een Tuxshop reserviert weern.
Us Dochter moss so manch eene Entscheidung drepen un sik in manche Saken vun Experten beraden laten. Up eeren Komputer hett se denn all de Gästelisten tohoop sett, de Inladungen maakt un to hoop sett. Uk een up de Minute genauet Programm harr se tohoop stellt, de Musik harr se uk nich vergeten, de de DJ vor speelen schull. De Bloomen mossen utsocht un bestellt weern, de Haar mossen an Hochtietsdag maakt weern un uk dat moss vordem all up de Minute genau aflopen. Uk de Fahrt vun de Kark na dat Hotel in de Hochtietskutsche, wat sik aver at een dicken Mercedes utstellt hett, all dat moss vordem besnackt weern. Intwüschen hett de Brögamm de Hochtietsreis arrangiert un utsocht. De schull denn vor een Week na de Cayman Inseln in Golf vun Mexico un dar na, na Florida vor een Week hengahn.
Dat Datum vor de Hochtiet kem gau, eer wi us versehn deen, weern wi all in de Kark an Dag vor de Hochtiet um een Generalprobe to maken. So dat jed een Person uk wuss genau wat he or se to maken harr. Dat duurde man knapp een Stunn, un denn hett de Brögamms Vadder alle Anwesenden inladen to een ganz elegantet Eten in een mojet Italjenisched Restaurant. Dar wurrn denn noch een paar Anspraaken holn, een Prost seggt un dat wunnerbore Eten wurd serviert.
An tokamen Dag, denn Hochtietsdag, mossen wi use groote Deern all
De Generalprobe
namiddags vun er Apartment afholn. Se weer just vun Friseur kamen.
In de Kark weern een paar extra Zimmer wo sik de Deerns un Jungs all trecht maken kunnen. Wi harrn een groote Iesbox full mit Brote un Kekse un wat to drinken mit brocht. Manch een de kem, harr noch nix to eten hard siet Fröhstück, wegen de langen Anfahrten un denn verstopten Verkehr. De Fotograpf weer överall to finnen, he maakte siene Biller at noch nie bevor. De Junge Fro de de ganze Hochtiet coordinaten de, leep hen un her, se paste genau up dat uk allns genau na eern Stunnenplan leep. Dör de goode Upstellung de us Dochter to hoop stellt harr, leep allns at een Klock. De Bloomen wurrn leevert un an de Karkenbänke fastbunnen, up’t Altar keemen welke hen un uk an de Antöge un Kleeder vun all de Jungs un Deers, weern se to finnen. Groote witte Kersen weern vorne up’t Altar upstellt wurrn. Sinnig kemen de Gäste, een na’n annern. De Spannung wurd grööter, nu weert an de Tiet mien Beer, wat ik rinsmuggelt harr to hebben, ah, wat een Genuss. Veele Hannen wurrn schüttelt un just so veele Umarmungen geef dat vundagen. Dit weer een speziellen Dag. De Orgel speelde at de Jungs de Gäste an eeren Platz wiesden. De Deerns de de Kersen ansteckten, weern all up’n Weg na’t Altar, at de letzten Gäste noch gau in de Bänke flitzten. Nu keem de groote Moment wo se all up tövt harrn.
De Leiterin in de Kark stund vor us, “so, nu sind ji dran”, se trock noch een beten an denn Schleier, lachte un nehm de Brut in de Arme un seggt: “Sehr, sehr hübsch sisst du vundagen ut, veel Glück” denn maakte se de doppeln grooten Döörn open un drückte up’n Knop, nu wuss de Orgelspeeler, wi weern klar. Mit lute Orgelmusik speelde se:”Hier kummt de Brut”
All de Gäste stunnen inne Kark un keeken us to, at wi Arm in Arm sinnig denn Gang up’t Altar to gungen. Dar stunnen all de Trohzeugen, de Deerns up eene Siet, de Jungs up de anner Siet. De Pastor stund vorne un lachte us an. At he frogt, welk een de Brut weggeben deit, heff ik em antert: ”miene Fro un ik sind dat”. Denn heff ik eeren Arm nahmen un denn in denn Brögamm sien Arm leggt un mi denn neben miene Fro up de eerste Bank hensett. Nu kem de ganze Ceremonie, de Pastor harr een ganz wunnerbore dütliche lute Stimme. He maakte dat ganze een recht freundliche Predigt. To’n End seggt he noch un nu will ik jo dat nee verheirat Ehepaar vorstelln.
Dat Ehepaar un de Trohzeugen un Biständers
All de Gäste klatschten inne Hannen. Denn gung de Pastor vorne weg un de jung verheiraten Lüüd kemen achter em an. De Biständers hefft denn de Gäste een na’n annern na Buten laten. Dat nee verheirat Ehepaar weer aver all in eeren Mercedes steegen un afhaut, denn de Empfang schull jo in dat Hotel up de anner Siet vun denn See wesen. Wi hefft noch gau use Saken int Auto leggt un sind denn uk na dat Hotel fahrt.
At wi dar ankemen wurrn wi glieks mit Champagner empfungen, denn wurrn wi na Buten leited up’n Rasen wo de Empfang wesen schull. Hier weer dat nee’e Ehepaar, wi kunnen de beiden graleern, de Ollern vun Brögam graleern un denn hefft wi us dar mit to stellt. De Gäste kemen nu een nah’n annern vorbi um us all to graleern. At dat don weer geef dat glieks een wunnerboret Buffet. Dat seeg so moi ut, dar geeft vun allem wat, wat man sik denken kann. Buten weer een groot Telt upstellt mit witte Möbel un groode Kronleuchters un witte Schleier an de Deek vun’t Telt, wo all de Gäste eten kunnen.
Dit weer ELEGANCE puur. De Utsicht weer över’t Water weg in denn Sonnenunnergang, up de anner Siet vun See.
Beter kunnt nich wesen. At wi an denn Enddisch seten kemen veele vorbi um dar Biller to maken. To drinken geeft, wat ümmer man uk hebben wull. De Fotograf weer över all, he maakte vun alle de Gäste Biller. In dat Hotel wo dat Buffett upstellt weer, wurd nu alln’s anne Siet stellt un denn wurd de Musik anstellt, De DJ harr siene genauen Instructionen un speelde nur dat, wat erwünscht weer. Natürlich keem dat Brutpaar eers. Se harrn vun een Danzinstructor sik een wunnerboren Danz bibringen laten, denn se us nu vordanzt hefft. Ik harr garnich dacht dat use Deern so moi danzen kunn, Dat hett alle de Gäste goot gefulln Denn kem ik dran un moss mit de nee’e Brut danzen, De Kaiser-walzer weer grad recht vor us. Kort darup kemen all de annern Gäste. Use Dochter harr all de Kinner vun de Gäste uk mit inladen un de hefft een ganz wunnerbore Tiet hard, hier to danzen, twüschen all de annern Gäste, dar weern 35 Kinner in ganzen mit bi. Twüschendör moss ik denn noch even een Prost un een paar Wör dar to seggen. De groote Hochtietskoken de in dree Schichten up’n annern stund, wurd nu uk ansneen. Darto geef dat woller Champagner un Koffee. De Danzeree duurde noch de halve Nacht an, veel vun de Gäste sind ganz bit ton End dar bleeven un uk vundagen noch krieg ik to hörn, dat dat een ganz wunnerbore Hochtiet wesen weer, de wi dar fiert hefft. Veele, veele Minschen de ik noch nie sehn heff, kemen vorbi um sik to bedanken. Dat weer de Idee, alle, egol of jung or old, schulln sik moi amüseern, un dat hefft se uk .
Julia un Tim Long
August 15. 2003
My Guestbook